Ministria e Mbrojtjes ka bërë një përditësim mbi situatën e zjarreve në vend, duke njoftuar se gjatë ditës së sotme janë ndjekur 9 vatra zjarri në zona të ndryshme të Shqipërisë. Sipas ministrisë, ndërhyrja e koordinuar e strukturave operacionale nga toka dhe ajri ka bërë që situata të përmirësohet ndjeshëm dhe aktualisht nuk raportohet asnjë rrezik për komunitetet apo zonat e banuara.

Në zonën e Dajtit, zjarri është fikur pas ndërhyrjes së forcave të MZSH-së, Administratës së Zonave të Mbrojtura dhe mbështetjes nga helikopteri i Forcës Ajrore. Zona vijon të monitorohet, ndërsa edhe vatra në Priskë është shuar plotësisht.

Në Çikallesh të bashkisë Kavajë, ndërhyrja e zjarrfikësve nga Kavaja, Kamza dhe Rrogozhina, e mbështetur nga avioni “Air Tractor”, ka mundësuar izolimin e plotë të zjarrit.Ndërkohë, në Riban, Ngraçan dhe Panahor në bashkinë Mallakastër, flakët janë izoluar në të gjithë perimetrin dhe zonat vijojnë të mbahen nën mbikëqyrje.

Situata në Plan të Bardhë, bashkia Klos, ishte ndër më problematiket për shkak të përhapjes së zjarrit nga era dhe rrezikut për banesa e infrastrukturën elektrike. Pas ndërhyrjes së zjarrfikësve, Policisë së Shtetit, strukturave vendore, vullnetarëve dhe 25 efektivëve të Forcave të Armatosura, situata është vënë nën kontroll.

Gjithashtu janë shuar plotësisht vatrat në Kostren 2, bashkia Berat, dhe në Uruç, bashkia Peqin. Në Alikomemaj të bashkisë Memaliaj vijon ndërhyrja për një vatër zjarri në një sipërfaqe me pisha./aa

Qytetarët e Rrogozhinës janë mbledhur në Parkun e Qytetit për të protestuar kundër ndryshimeve të propozuara në ndarjen territoriale, duke kundërshtuar mundësinë që Bashkia e Rrogozhinës t’i bashkohet Bashkisë së Kavajës.

Gjatë protestës, qytetarët i bënë thirrje përfaqësuesve të qeverisë që të vizitojnë Rrogozhinën dhe të dëgjojnë nga afër shqetësimet e banorëve. Sipas tyre, Bashkia e Kavajës përballet me problematikat e veta dhe nuk mund të përballojë njëkohësisht edhe nevojat e Rrogozhinës.

Protestuesit kërkuan anulimin e projektligjit për ndarjen territoriale, duke theksuar se Rrogozhina duhet të mbetet një bashki më vete, me përfaqësimin dhe administrimin e saj. Ata paralajmëruan se do të vijojnë reagimet e tyre nëse kërkesat nuk merren në konsideratë nga autoritetet.

Banorët e Memaliajt kanë dalë sërish në protestë kundër projektit të ri të ndarjes territoriale, që parashikon bashkimin e Bashkisë së Memaliajt me Bashkinë e Tepelenës. Kjo është protesta e dytë radhazi e organizuar nga qytetarët, të cilët shprehen kundër ndryshimeve të propozuara dhe kërkojnë që Memaliaj të ruajë statusin e tij si njësi vendore më vete.

Protestuesit deklarojnë se bashkimi me Tepelenën do të dëmtojë përfaqësimin dhe zhvillimin e zonës, ndërsa i bëjnë thirrje qeverisë të rishqyrtojë projektin e ndarjes territoriale.

Banorët kanë paralajmëruar se do të vijojnë protestat edhe në ditët në vijim, nëse kërkesat e tyre nuk merren në konsideratë.

Protestuesit kanë nisur marshimin drejt godinës së Kryeministrisë, ku pritet të mbajnë edhe fjalimet e tyre, duke përmbyllur kështu ditën e 69-të të protestës.

Nën thirrjet “Rama, jepe dorëheqjen” dhe “Shqipëria kërkon revolucion”, ata marshuan me pankarta në duar dhe mes sloganeve të forta kundër qeverisë, duke kërkuar largimin e menjëhershëm të drejtuesve aktualë.

Protestuesit theksojnë se u qëndrojnë të palëkundur kërkesave të tyre dhe se nuk do të pranojnë negociata lidhur me to.

Ata deklarojnë gjithashtu se do të vijojnë protestat deri në largimin e kryeministrit, ndërsa kërkojnë edhe nisjen e hetimeve nga SPAK.

Një automjet është përfshirë nga flakët pak minuta më parë në lagjen “Apollonia” në Fier, duke shkaktuar alarm në zonë.

Në vendngjarje kanë mbërritur menjëherë forcat zjarrfikëse, të cilat kanë bërë të mundur shuarjen e zjarrit, duke parandaluar përhapjen e flakëve te automjetet e tjera të parkuara pranë.

Nga veprimet paraprake dyshohet se shkaku i zjarrit mund të ketë qenë një defekt në impiantin e gazit të automjetit.

Ndërkohë, shërbimet e Policisë ndodhen në vendngjarje dhe po kryejnë veprimet hetimore për të përcaktuar shkaqet dhe rrethanat e plota të rënies së zjarrit.

Dy ora dore me mbishkrimin “Rolex” dhe 351 cigare puro të markave të ndryshme, të ndara në 36 kuti dhe të padeklaruara, janë konstatuar gjatë një kontrolli në Portin e Durrësit.

Mallrat u zbuluan nga shërbimet e Doganës dhe Policisë Kufitare gjatë kontrollit të një automjeti që tentonte të hynte në vend. Pas verifikimeve, ato u sekuestruan nga autoritetet.

Njoftimi:

Strukturat e Doganës Shqiptare, në bashkëpunim me Policinë Kufitare, kanë evidentuar një rast të mosdeklarimit të mallrave gjatë kontrollit të një mjeti në Portin e Durrësit.

Gjatë kontrollit u konstatuan:

2 ora dore me mbishkrimin “ROLEX”

351 cigare puro, të markave të ndryshme, të ndara në 36 kuti

Dogana Shqiptare vijon kontrollet dhe bashkëpunimin ndërinstitucional me Policinë e Shtetit, për parandalimin dhe evidentimin e rasteve të mosdeklarimit dhe shkeljeve të legjislacionit doganor.

Komuniteti i Serres në Greqi vijon të jetë i tronditur nga aksidenti tragjik rrugor në rrugën provinciale Amfipolis–Drama, ku humbën jetën një nënë 43-vjeçare dhe djali i saj 21-vjeçar shqiptar. Ndërsa hetimet vijojnë për të përcaktuar shkaqet e përplasjes fatale me një kamion, eksperti i sigurisë rrugore Panagiotis Stamiris ka dhënë një analizë të pamjeve të aksidentit, duke ngritur dyshime se përveç shpejtësisë mund të ketë ndikuar edhe një shpërqendrim i drejtuesit të automjetit.

Sipas analizës së tij, drejtuesi i mjetit nuk ka reaguar në kohë pasi makina ka kaluar në korsinë e kundërt. “Që nga momenti kur automjeti fillon të largohet nga korsia e tij, shoferi kishte mundësi ta korrigjonte drejtimin. Por ai vazhdon për disa metra në korsinë e trafikut përballë dhe vetëm më pas përpiqet të kthehet”, tha Stamiris.

Eksperti vlerësoi se automjeti mund të ketë qenë duke lëvizur me një shpejtësi mbi 70–80 km/orë, bazuar në pamjet dhe dëshminë e një drejtuesi tjetër në rrugë. “Shpejtësia ishte e rritur dhe besoj se ishte mbi kufirin e lejuar. Kur një automjet kalon shpejtësinë kritike në një kthesë, mund të humbasë kontrollin dhe të devijojë”, shpjegoi ai.

Megjithatë, Stamiris theksoi se reagimi i vonuar i drejtuesit mbetet një nga elementët më të rëndësishëm për t’u hetuar. “Skenari mund të jetë që ai e ka kuptuar me vonesë çfarë po ndodhte, ose për shkak të mungesës së përvojës nuk ka arritur ta vlerësojë siç duhet situatën”, përfundoi eksperti. Aksidenti i rëndë i mori jetën 43-vjeçares dhe djalit të saj 21-vjeçar, duke shkaktuar tronditje të madhe në zonën e Serres.

Autoritetet ligjzbatuese në Kosovë kanë konfirmuar gjetjen e mbetjeve njerëzore edhe në lokacionin e tretë të dyshuar për varr masiv në komunën e Zubin Potokut.

Policia e Kosovës dhe Prokuroria Speciale bënë të ditur se gjatë veprimeve hetimore që po zhvillohen në këtë zonë është konfirmuar prania e mbetjeve mortore, ndërsa ekipet forenzike vijojnë ekzaminimet dhe procedurat e nevojshme për zbardhjen e rrethanave.

“Gjatë veprimeve hetimore që janë duke u zhvilluar lidhur me rastin në Zubin Potok është identifikuar dhe është konfirmuar prania e mbetjeve mortore edhe në lokacionin e tretë të dyshuar”, thuhet në njoftimin e përbashkët të institucioneve kosovare.

Gërmimet në Zubin Potok kanë nisur pas një hetimi rreth dyvjeçar dhe dyshimeve se në këto zona mund të ketë varreza masive me mbetje të personave të zhdukur gjatë luftës së viteve 1998-1999 në Kosovë. Hetimet lidhen edhe me arrestimin e tre personave të dyshuar për krime lufte.

Ekipet e forenzikës janë duke punuar në tri lokacione, përfshirë fshatrat Kalludër e Vogël dhe Jakubë, ndërsa autoritetet kanë bërë të ditur se procesi mund të zgjasë për shkak të terrenit të vështirë dhe shpërndarjes së mundshme të mbetjeve njerëzore.

Institucionet e Kosovës kanë kërkuar nga bashkësia ndërkombëtare që të ushtrojë presion ndaj Serbisë për bashkëpunim dhe hapjen e arkivave ushtarake, me qëllim zbardhjen e fatit të personave të zhdukur gjatë luftës.

Sipas të dhënave të institucioneve kosovare, rreth 1 mijë e 577 persona vijojnë të rezultojnë të zhdukur nga lufta e fundit në Kosovë, shumica prej tyre shqiptarë.

Autoritetet kanë theksuar se është ende herët për të përcaktuar identitetin e viktimave të mundshme dhe se duhet të ruhen procedurat hetimore deri në përfundimin e analizave forenzike.

Nga Fatos Çoçoli

Një tjetër problem serioz që e detyroi Qeverinë shqiptare të niste procedurat për zgjidhjen e kontratës së koncesionit të Aeroportit Ndërkombëtar të Vlorës lidhej me një hua prej 100 milionë eurosh, të marrë nga njëra prej kompanive të koncesionarit pa miratimin paraprak të Shtetit shqiptar.

Në mars 2025, kompania “Mabco” nënshkroi një marrëveshje huaje me shoqërinë financiare “Delphos Securities”, me vlerë 100 milionë euro. Sipas informacionit të bërë publik, fondet do të përdoreshin për dy qëllime kryesore: përfundimin e ndërtimit të Aeroportit të Vlorës dhe shlyerjen e një kredie ekzistuese bankare të “Mabco”-s.

Në pamje të parë, një financim i tillë mund të konsiderohej një zhvillim pozitiv për projektin. Projekte të mëdha infrastrukturore kërkojnë kapital të konsiderueshëm dhe një hua e re mund të sigurojë likuiditetin e nevojshëm për përfundimin e punimeve.

Megjithatë, shqetësimi kryesor nuk lidhej me shumën e huasë, por me garancitë e dhëna në favor të huadhënësit dhe pasojat që ato mund të kishin mbi të ardhurat, administrimin dhe të ardhmen financiare të një infrastrukture strategjike si Aeroporti Ndërkombëtar i Vlorës. Pikërisht këto elemente u konsideruan nga autoritetet shqiptare si një tjetër shkelje serioze e marrëdhënies koncesionare dhe një ndër arsyet që çuan në nisjen e procedurave për zgjidhjen e kontratës.

100 milionë euro: financim për ndërtimin apo barrë mbi të ardhmen?

Problemi nuk qëndronte vetëm tek shuma e financimit, por mbi të gjitha tek garancitë e ofruara dhe të drejtat që fitonte huadhënësi mbi të ardhmen ekonomike dhe financiare të Aeroportit të Vlorës.

Sipas marrëveshjes së huasë, “Delphos Securities” merrte garanci mbi të gjitha të ardhurat e ardhshme të aeroportit, përfshirë edhe ato të garantuara nga shteti shqiptar.

Tabela 1. Garancia shtetërore për të ardhurat e Aeroportit të Vlorës

Buxheti i Shtetit garanton të ardhurat minimale gjatë 10 viteve të para të operimit, nëse të ardhurat rezultojnë më të ulëta se 140 milionë euro. Konkretisht:

Viti IV – 9.6 milionë euro
Viti V – 10.3 milionë euro
Viti VI – 11.2 milionë euro
Viti VII – 12.1 milionë euro

Burimi: https://www.infrastruktura.gov.al/wp-content/uploads/2019/12/AL-STUDIM-FIZIBILITETI-VIA.pdf

Por kjo nuk ishte e vetmja garanci. Marrëveshja i jepte “Delphos Securities” kontroll mbi llogaritë bankare dhe politikat financiare të kompanisë, si edhe të drejtën për t’ia transferuar këto të drejta palëve të treta.

Këto dispozita bien ndesh me kontratën koncesionare BOT të Aeroportit të Vlorës, e cila ndalon shprehimisht dhënien e garancive të tilla pa miratimin paraprak të Shtetit shqiptar. Një miratim i tillë nuk u kërkua dhe nuk u dha.

Pikërisht për këtë arsye, Avokatura e Shtetit e konsideroi marrëveshjen si një akt me rrezik të lartë juridik. Me fjalë të tjera, një institucion financiar privat mund të fitonte kontroll ekonomik mbi një projekt strategjik shtetëror, pa dijeninë dhe pa miratimin e Shtetit shqiptar.

Në këto kushte, një shoqëri private merrte angazhime financiare që potencialisht prekën të ardhurat, administrimin dhe funksionimin e një infrastrukture strategjike kombëtare, jashtë mekanizmave të miratimit dhe kontrollit të parashikuar në kontratën koncesionare.

Garancitë e dhëna nga “Mabco” ngrejnë pikëpyetje serioze mbi të drejtat reale të koncesionarit, detyrimet kontraktuale ndaj Shtetit shqiptar, interesat e kreditorëve, mekanizmat e ndërhyrjes në rast mospagimi, si edhe pasojat financiare që mund të kishin mbi operimin e aeroportit.

Të ardhurat e një aeroporti nuk janë thjesht të ardhurat e një kompanie private. Ato burojnë nga operimi i një aseti strategjik kombëtar, i ndërtuar dhe administruar në bazë të një marrëdhënieje koncesionare me Shtetin shqiptar.

Çfarë do të ndodhte në rast të mospagimit të huasë?

Nëse “Mabco” nuk do të ishte në gjendje të shlyente huanë, çfarë të drejtash do të ushtronte huadhënësi?

Duke qenë se garancitë e huasë shtriheshin mbi të ardhurat e ardhshme të projektit, kreditori mund të kërkonte kontroll mbi këto të ardhura, mbi llogaritë bankare ku ato depozitoheshin dhe mbi mënyrën e administrimit të flukseve financiare të aeroportit.

Për më tepër, kontrata i njihte huadhënësit të drejtën për t’ia transferuar këto të drejta një pale të tretë. Kjo do të thotë se, në rast të një krize financiare ose të mospagimit të huasë, kontrolli ekonomik mbi të ardhurat e aeroportit mund të kalonte tek subjekte të tjera, të panjohura në momentin e nënshkrimit të marrëveshjes.

Kontrolli mbi llogaritë bankare dhe transferimi i të drejtave te palët e treta

Një tjetër aspekt problematik lidhet me kontrollin mbi llogaritë bankare dhe politikat financiare të kompanisë.

Kur një huadhënës fiton kompetenca të gjera mbi flukset financiare të një koncesionari, ai nuk mbetet më një kreditor pasiv. Në praktikë, ai fiton një ndikim të rëndësishëm mbi mënyrën se si administrohen fondet e kompanisë.

Në një projekt të zakonshëm privat kjo mund të konsiderohet pjesë normale e marrëdhënies së financimit. Por kur bëhet fjalë për një koncesion strategjik, lind një pyetje themelore: ku përfundon e drejta legjitime e kreditorit privat dhe ku fillon mbrojtja e interesit publik?

Po aq shqetësues është edhe fakti që marrëveshja lejonte transferimin e të drejtave të huadhënësit tek palë të treta.

Kjo krijon një problem serioz transparence, sepse struktura e financimit mund të ndryshojë në çdo moment, pa qenë domosdoshmërisht e njëjtë me atë që ekzistonte kur marrëveshja u nënshkrua.

Për një aeroport me rëndësi strategjike ngrihen pyetje të natyrshme:

Kush është përfituesi real i këtyre të drejtave?
Kush mund të bëhet kreditor në të ardhmen?
Çfarë të drejtash transferohen konkretisht?
Cilat janë kufizimet ligjore?
Çfarë mekanizmash mbrojtës ka Shteti shqiptar në rast të një transferimi të tillë?

Në këtë rast, transparenca nuk është luks; është një domosdoshmëri.

Rreziku nuk është vetëm financiar, por edhe operacional

Një aeroport duhet të funksionojë pa ndërprerje sapo të vihet në operim. Kjo kërkon mirëmbajtje të vazhdueshme, personel të kualifikuar, sisteme teknike, standarde sigurie, kontrata shërbimi dhe burime të qëndrueshme financiare.

Nëse të ardhurat e aeroportit ngarkohen me detyrime të konsiderueshme financiare ndaj kreditorëve, duhet të garantohet se, edhe pas shlyerjes së këtyre detyrimeve, mbeten fonde të mjaftueshme për funksionimin normal të aeroportit.

Një aeroport nuk mund të administrohet me logjikën e një biznesi që synon vetëm shlyerjen e borxhit. Ai është një infrastrukturë kritike, e cila duhet të disponojë në çdo kohë burime të mjaftueshme financiare për të garantuar sigurinë, vazhdimësinë e operimit dhe cilësinë e shërbimit publik.

Përfundim

Në fund, çështja nuk lidhej thjesht me marrjen e një huaje prej 100 milionë eurosh. Projekte të mëdha infrastrukturore financohen shpesh përmes kredive. Problemi qëndronte tek mënyra se si u sigurua ky financim, garancitë e dhëna në favor të huadhënësit dhe mungesa e miratimit paraprak të Shtetit shqiptar, në kundërshtim me detyrimet e parashikuara në kontratën koncesionare.

Kur garancitë e një huaje shtrihen mbi të ardhurat e një aseti strategjik, përfshirë edhe të ardhurat e garantuara nga Buxheti i Shtetit, kur kreditori fiton të drejta mbi llogaritë bankare dhe politikat financiare të koncesionarit, si edhe mundësinë për t’ia transferuar këto të drejta palëve të treta, atëherë çështja nuk mbetet më një marrëdhënie e zakonshme financiare mes një kompanie dhe kreditorit të saj. Ajo prek drejtpërdrejt interesin publik, sigurinë juridike të kontratës koncesionare dhe mbrojtjen e një infrastrukture me rëndësi strategjike për vendin.

Pikërisht për këtë arsye, kjo marrëveshje huaje u konsiderua nga autoritetet shqiptare si një shkelje serioze e marrëdhënies koncesionare dhe u bë një ndër elementët që mbështetën vendimin e Qeverisë shqiptare për të nisur procedurat për zgjidhjen e kontratës së koncesionit të Aeroportit Ndërkombëtar të Vlorës.

Një 47-vjeçar është gjetur i pajetë mëngjesin e sotëm në sheshpushimin e katit të 8-të të një pallati në lagjen “Syrja Dylgjeri”.
Rreth orës 08:00 është marrë njoftimi për gjetjen e trupit të shtetasit me inicialet K. D. pa shenja jete. Menjëherë në vendngjarje kanë mbërritur shërbimet e Policisë dhe grupi hetimor.

Nga këqyrja paraprake e trupit nuk janë konstatuar shenja dhune apo dëmtime të shkaktuara nga mjete ose sende të tjera.

Grupi hetimor, nën drejtimin e Prokurorisë, vijon punën për zbardhjen e plotë të rrethanave dhe përcaktimin e shkakut të humbjes së jetës.

Elbasan/Informacion paraprak

Rreth orës 08:00, është marrë njoftim se, në sheshpushimin e katit të 8-të të një pallati, në lagjen “Syrja Dylgjeri”, është gjetur pa shenja jete shtetasi K. D., 47 vjeç.

Shërbimet e Policisë dhe grupi hetimor kanë shkuar menjëherë në vendngjarje.

Nga këqyrja paraprake e trupit nuk janë konstatuar shenja dhune apo dëmtime të shkaktuara nga mjete ose sende të tjera.

Grupi hetimor, nën drejtimin e Prokurorisë, vijon veprimet për sqarimin e plotë të rrethanave dhe shkakut të humbjes së jetës.

Ministria e Mbrojtjes ka bërë të ditur situatën më të fundit të zjarreve në vend, ku gjatë 24 orëve të fundit janë raportuar 30 vatra zjarri, ndërsa 8 prej tyre vijojnë të jenë aktive. Në operacionet për shuarjen e flakëve janë angazhuar 54 automjete zjarrfikëse dhe 502 forca operacionale, ndërsa në mbështetje të tyre janë vendosur 110 efektivë të Forcave të Armatosura, 3 helikopterë dhe avioni “Air Tractor” i Forcës Ajrore.

Në zonën e Dajtit vijon puna për shuarjen e zjarrit, ndërsa autoritetet bëjnë me dije se nuk ka rrezik për zonat e banuara. Operacionet vijojnë edhe në Priskë dhe Çakallesh, pa kërcënim për komunitetin.

Në Riban, Ngraçan dhe Panahor, në bashkinë Mallakastër, vijon ndërhyrja për neutralizimin e zjarrit në terren të vështirë, por deri tani nuk raportohet rrezik për banesat. Në qarkun e Elbasanit po punohet në vatrat e Shqiponjës, Malit të Dardhës dhe Mjekësit. Zjarri në Shqiponjë është vendosur nën kontroll, ndërsa vatra në Malin e Dardhës është izoluar. Edhe në këto zona nuk raportohet rrezik për zonat e banuara.

Ndërkohë, në Kostren 2, në bashkinë Berat, vijon ndërhyrja për shuarjen e një vatre të riaktivizuar, me forca dhe mjete zjarrfikëse në terren.

Agjencia Kombëtare e Mbrojtjes Civile dhe strukturat e mbrojtjes civile vijojnë monitorimin e situatës dhe koordinimin e operacioneve në të gjithë territorin e vendit.

Një operacion i koduar “Wanted 36” është finalizuar nga Policia e Durrësit, duke çuar në pranga një 40-vjeçar të shpallur në kërkim ndërkombëtar nga drejtësia italiane për trafik droge dhe falsifikim dokumentesh.

Aksioni u ndërmor nga Seksioni për Mbështetjen Operacionale të Hetimit në bashkëpunim me Seksionin për Hetimin e Narkotikëve dhe Trafiqeve në DVP Durrës. Mbështetur në informacionet e siguruara në rrugë operative mbi vendndodhjen e të kërkuarit, efektivët lokalizuan dhe arrestuan në lagjen nr. 12 të qytetit bregdetar shtetasin e identifikuar me inicialet O. D. alias O. K., 40 vjeç.

Ky shtetas ishte shpallur në kërkim ndërkombëtar pasi Gjykata e Apelit e Venecias në Itali e ka dënuar atë me 11 vjet e 1 muaj burgim për veprat penale “Trafikimi i lëndëve narkotike” dhe “Falsifikimi dhe mbajtja e dokumenteve të rreme”. Nga ky dënim, 40-vjeçarit i kishin mbetur për të vuajtur edhe 4 vjet e 15 ditë burgim.

Momentatalisht, Interpol Tirana në bashkëpunim me homologët italianë po vijojnë të gjitha procedurat e nevojshme ligjore për ekstradimin e tij drejt shtetit fqinj, ku do të vuajë mbetjen e dënimit.

Një situatë kritike me zjarret po regjistrohet në masivin pyjor të Drenijës, ku vatrat e flakëve kanë dalë jashtë kontrollit si pasojë e erërave të forta që po favorizojnë përhapjen e tyre të shpejtë.

Shërbimet zjarrfikëse ndodhen në terren dhe po vazhdojnë betejën me flakët për të parandaluar përhapjen e mëtejshme, por kushtet atmosferike dhe era e fortë po e vështirësojnë së tepërmi punën e ekipeve nga toka.

Pas vënies nën kontroll të situatës dhe shuarjes së vatrave kryesore në zonën e Ngrëçanit, autoritetet pritet të orientojnë ndërhyrjen nga ajri edhe drejt masivit pyjor të Drenijës, me qëllim izolimin përfundimtar të zjarrit.

Fatos Çoçoli

Argumenti kryesor i paraqitur nga Ministria e Infrastrukturës dhe Energjisë për zgjidhjen e kontratës koncesionare të Aeroportit Ndërkombëtar të Vlorës është mosrespektimi i afateve kontraktore për përfundimin dhe vënien në funksion të aeroportit. Megjithatë, dokumentacioni i administrimit të kontratës tregon se një nga faktorët që ndikoi drejtpërdrejt në këtë dështim ishte konflikti i zgjatur mes ortakëve të kompanisë koncesionare.

Kontrata parashikonte që aeroporti të përfundonte dhe të bëhej operacional deri më 20 shkurt 2026, me një periudhë shtesë prej 90 ditësh. Edhe pas përfundimit të këtij afati, aeroporti nuk ishte funksional. Punimet kishin mbetur larg përfundimit, ndërsa koncesionari nuk kishte paraqitur një plan të besueshëm për mbylljen e projektit.

*Konflikti që paralizoi koncesionarin*

Një nga shkaqet kryesore të mosrespektimit të afateve ishte konflikti i brendshëm mes ortakëve të kompanisë koncesionare.

Që nga tetori 2025, dy ortakët kryesorë, “Mabco Constructions” dhe “2A Group”, hynë në një mosmarrëveshje të hapur lidhur me strukturën e pronësisë së kompanisë dhe disa marrëveshje financiare të lidhura pa dakordësinë e plotë të palëve.

Mosmarrëveshja kaloi në disa shkallë të sistemit gjyqësor. Në tetor 2025, Gjykata e Shkallës së Parë pezulloi të drejtën e votës së kompanisë “Mabco”. Në dhjetor 2025, Gjykata e Apelit vendosi që pezullimi të zbatohej vetëm për vendimet që lidhen me shitjen e kuotave.

Po në dhjetor 2025, në një proces tjetër, gjykata vendosi sërish pezullimin e disa të drejtave të “Mabco”, kompani e lidhur me sipërmarrësin kosovar Behxhet Pacolli. Këto masa u rrëzuan më pas nga Gjykata e Lartë në maj 2026.

Konflikti nuk mbeti vetëm në gjykata. Në maj 2026, Policia e Vlorës raportoi për përplasje fizike në hyrje të kantierit ndërmjet përfaqësuesve të palëve dhe shoqërisë private të sigurisë. Policia sqaroi se bëhej fjalë për një konflikt me natyrë civile dhe kontraktore, ndërsa kallëzimet iu referuan Prokurorisë.

Në praktikë, konflikti bllokoi vendimmarrjen brenda koncesionarit. U vonuan vendimet për financimin, pagesat, kontratat dhe organizimin e punimeve, ndërsa aktiviteti në kantier u ngadalësua ndjeshëm dhe, në disa raste, u ndërpre.

*Nga një investim strategjik në një projekt të bllokuar*

Kur kontrata koncesionare u nënshkrua më 19 prill 2021, projekti u prezantua si një nga investimet më të rëndësishme infrastrukturore të vendit dhe si porta e dytë ndërkombëtare ajrore e Shqipërisë. Aeroporti pritej të rriste kapacitetet e transportit ajror, të mbështeste zhvillimin e turizmit dhe të krijonte një impuls të ri ekonomik për Vlorën dhe gjithë Jugun.

Sot situata është krejt ndryshe. Punimet kanë mbetur të papërfunduara, aeroporti nuk është operacional dhe vetë inxhinieri i pavarur ka konstatuar se nuk mund të japë një afat të besueshëm për përfundimin e projektit.
Në këto kushte, konflikti mes ortakëve nuk mund të konsiderohet më thjesht një mosmarrëveshje private. Ai ka ndikuar drejtpërdrejt në realizimin e një kontrate me interes publik dhe në përmbushjen e detyrimeve që koncesionari kishte marrë përsipër ndaj shtetit.

Megjithatë, thelbi i çështjes mbetet mosrespektimi i kontratës. Konflikti mes ortakëve nuk përbën në vetvete bazën ligjore për zgjidhjen e saj, por është një nga faktorët që çoi në mosrealizimin e projektit brenda afateve të përcaktuara.

Për shtetin, përgjegjësia nuk është të zgjidhë mosmarrëveshjet e aksionarëve, por të garantojë zbatimin e kontratës dhe mbrojtjen e interesit publik. Kur koncesionari nuk është më në gjendje të përmbushë detyrimet e tij, aktivizimi i mekanizmave kontraktualë bëhet i domosdoshëm për të siguruar përfundimin e një projekti me rëndësi strategjike për vendin.

Policia ka dhënë detaje lidhur me grabitjen e ndodhur pasditen e së mërkurës në një argjendari në Paskuqan, në bashkinë Kamëz.

Menjëherë pas marrjes së njoftimit, shërbimet e Policisë kanë mbërritur në vendngjarje, kanë ngritur pika kontrolli dhe kanë nisur kontrollet në zonë për identifikimin dhe kapjen e autorëve. Ndërkohë, grupi hetimor po punon për administrimin e provave, me qëllim identifikimin e autorëve, zbardhjen e plotë të rrethanave të ngjarjes dhe dokumentimin e saj.

Kamëz/Informacion paraprak

Më datë 05.08.2026, rreth orës 14:50, në Paskuqan, 2 shtetas ende të paidentifikuar, kanë hyrë në ambientet e argjendarisë në pronësi të shtetasit L. L. dhe duke kanosur punonjëset me send në dukje armë zjarri, kanë marrë një sasi bizhuterish.

Menjëherë pas marrjes së njoftimit, në vendngjarje kanë shkuar shërbimet e Policisë, të cilat kanë ngritur pika kontrolli dhe po kryejnë kontrolle për kapjen e autorëve.

Grupi hetimor po punon për fiksimin e çdo prove që do të çojë në identifikimin e autorëve dhe kapjen e tyre, si dhe dokumentimin e plotë të rastit.

Pas disa ditësh rritjeje, çmimi i naftës në tregun me pakicë në Shqipëri ka pësuar një ulje të fortë mbrëmjen e sotme. Sipas një vëzhgimi të bërë mbrëmjen e sotme, disa nga rrjetet kryesore të tregtimit të karburanteve e kanë ulur çmimin e naftës nga 214 lekë në 199 lekë për litër, duke e rikthyer për herë të parë pas disa javësh nën kufirin e 200 lekëve. Lëvizja vjen në një moment kur tregjet ndërkombëtare kanë nisur të reflektojnë një rënie të çmimit të naftës, pas rritjeve të forta të javëve të fundit, të cilat u transmetuan me shpejtësi edhe në tregun shqiptar.

Zhvillimi rikthen në vëmendje mënyrën se si funksionoi tregu gjatë periudhës mars-qershor të këtij viti, kur për shkak të luhatjeve të forta në bursat ndërkombëtare u aktivizua Bordi i Transparencës. Në atë periudhë, çmimet maksimale të karburanteve përcaktoheshin nga Bordi dhe monitoroheshin në terren për zbatimin e tyre nga operatorët.

Ndryshe nga ajo periudhë, ulja e mbrëmjes së sotme nuk vjen si rezultat i një vendimmarrjeje administrative, por është reflektuar drejtpërdrejt nga operatorët në pikat e shitjes me pakicë, në përputhje me zhvillimet e fundit në tregjet ndërkombëtare. Mbetet për t’u parë në vijim nëse do të ketë një vendimarrje të qeverisë për rikthimin e funksionimit të Bordit.

Një 40-vjeçar të shpallur në kërkim dhe i dënuar për kultivim të lëndëve narkotike është arrestuar nga policia.  Në kuadër të operacionit të koduar “Shtegu” në pranga u vu shtetasi me iniciale A.B, banues në Tiranë.

Policia bën me dije se 40-vjeçari ishte në kërkim, pasi në vitin 2021 ishte dënuar me 4 vite burg për veprën penale “Kultivimi i bimëve narkotike”. Pas arrestimit, materialet procedurale iu referuan Prokurorisë për veprime të mëtejshme.

Njoftimi: 

Krujë/Finalizohet operacioni i koduar “Shtegu”, për kapjen e një shtetasi në kërkim. Lokalizohet dhe ndalohet një 40-vjeçar i dënuar me 4 vjet burgim, për kultivim të bimëve narkotike.

Si rezultat i administrimit të shpejtë të informacioneve të siguruara gjatë punës operative, mbi vendndodhjen e një shtetasi të kërkuar për kultivim të bimëve narkotike, shërbimet e Komisariatit të Policisë Krujë finalizuan operacionin e koduar “Shtegu”.

Gjatë operacionit u lokalizua, u kap dhe u vu në pranga shtetasi A. B., 40 vjeç, banues në Tiranë.

40-vjeçari ishte në kërkim, pasi në vitin 2021, është dënuar me 4 vjet burgim, për veprën penale “Kultivimi i bimëve narkotike”. Materialet procedurale iu referuan Prokurorisë, për veprime të mëtejshme.

Ish-ministri i Mjedisit, Planifikimit Hapësinor dhe Infrastrukturës të Kosovës, Liburn Aliu është marrë në pyetje nga Prokuroria Speciale e Kosovës.

Aliu, i cili aktualisht është Drejtor i Portit të Durrësit është paraqitur bashkë me avokatin e tij.

Referuar mediave në Kosovë, Liburn Aliu po merret në pyetje në lidhje me një rast të dyshuar për keqpërdorim të detyrës zyrtare gjatë kohës sa ishte ministër në Qeverinë Kurti, pozitë të cilën e mbajti deri në gusht të vitit 2025, kur dha dorëheqje.

Nga Fatos Çoçoli

Ministria e Infrastrukturës dhe Energjisë ka nisur procedurat për zgjidhjen e kontratës koncesionare të Aeroportit Ndërkombëtar të Vlorës, duke shënuar një kthesë të rëndësishme në historinë e një prej projekteve më të mëdha infrastrukturore të dekadës së fundit.

Vendimi vjen pasi koncesionari nuk arriti të përmbushë afatet kontraktore për ndërtimin dhe vënien në funksion të aeroportit, ndërsa vonesat u thelluan muaj pas muaji. Projekti, me një investim prej 103.9 milionë eurosh, ishte konceptuar si porta e dytë ndërkombëtare ajrore e Shqipërisë dhe një motor i ri zhvillimi për turizmin dhe ekonominë e Jugut.

*Çfarë parashikonte kontrata*
Kontrata koncesionare e tipit BOT (Build, Operate and Transfer – Ndërto, Opero dhe Transfero) u nënshkrua më 19 prill 2021 ndërmjet Ministrisë së Infrastrukturës dhe Energjisë dhe konsorciumit të përbërë nga Mabetex Group (50%), YDA Group (48%) dhe 2A Group (2%). Vlera e investimit ishte 103.9 milionë euro.

Punimet nisën zyrtarisht më 20 shkurt 2023. Sipas kontratës, aeroporti duhej të përfundonte brenda 36 muajve, pra deri më 20 shkurt 2026. Ky afat ishte përcaktuar edhe në lejen e ndërtimit.

Kontrata parashikonte gjithashtu një periudhë shtesë prej 90 ditësh. Nëse aeroporti nuk bëhej operacional as brenda këtij afati, shteti fitonte të drejtën të zgjidhte kontratën për shkak të mospërmbushjes së detyrimeve. Edhe ky afat skadoi më 20 maj 2026, ndërsa aeroporti nuk ishte ende funksional.

Punimet mbetën larg objektivit
Raporti i inxhinierit të pavarur i datës 20 maj 2026 evidentonte se rreth 70 për qind e punimeve ishin realizuar, por vetëm 57 për qind e tyre ishin certifikuar.

Njëkohësisht, koncesionari nuk kishte dorëzuar grafikun e përditësuar të punimeve dhe raportimet periodike të kërkuara sipas kontratës.

Në fillim të shkurtit 2026, vetë kompania kërkoi shtyrjen e afatit të përfundimit deri në gusht 2026. Pak muaj më vonë u paraqit një plan tjetër që parashikonte përfundimin e projektit brenda 10 muajve, ndërsa në qershor 2026 mbikëqyrësi teknik propozoi që data e re e përfundimit të ishte 1 mars 2027.

Ndryshimi i vazhdueshëm i afateve ngriti pikëpyetje mbi realizueshmërinë e projektit. Ndërkohë skadoi edhe leja e ndërtimit, ndërsa koncesionari nuk dorëzoi formularin e vlefshëm të sigurimit të kontratës, pavarësisht kërkesave të përsëritura.

Raporti më i fundit i inxhinierit të pavarur arrin në përfundimin se nuk mund të përcaktohet një datë e besueshme për vënien në funksion të aeroportit, pasi ritmi i punimeve është ngadalësuar ndjeshëm për shkak të konfliktit ndërmjet ortakëve të konsorciumit.

*Pse po shkon drejt zgjidhjes kontrata*
Nisja e procedurave për zgjidhjen e kontratës duket se mbështetet pikërisht mbi këto shkelje të detyrimeve kontraktore: mosrespektimin e afateve, mosrealizimin e punimeve sipas planit, mungesën e dokumentacionit të kërkuar dhe pamundësinë për të garantuar një afat realist për përfundimin e projektit.

Nëse procedura përfundon me zgjidhjen e kontratës, projekti hyn në një fazë të re, ku shteti do të duhet të vendosë mbi mënyrën e përfundimit të aeroportit, një investim me rëndësi strategjike për transportin ajror dhe zhvillimin ekonomik të vendit.

*Kostoja e vonesës*
Aeroporti i Vlorës nuk ishte projektuar vetëm si një infrastrukturë transporti. Ai ishte pjesë e strategjisë për zgjerimin e kapaciteteve aeroportuale të Shqipërisë, në një kohë kur trafiku ajror dhe fluksi turistik po rriten me ritme të shpejta.

Çdo sezon i humbur nënkupton më pak turistë, më pak investime, më pak vende pune dhe më pak të ardhura për ekonominë lokale. Një aeroport funksional nuk gjeneron vetëm fluturime, por krijon aktivitet ekonomik për hotelet, restorantet, operatorët turistikë, shërbimet e transportit, bizneset lokale dhe investitorët.

Për këtë arsye, kostoja e vonesës nuk matet vetëm me ndërtimin e papërfunduar, por edhe me përfitimet ekonomike që nuk janë realizuar.
Sipas Organizatës Ndërkombëtare të Aviacionit Civil (ICAO), një aeroport i ri ndërkombëtar jashtë kryeqytetit mund të rrisë ekonominë e rajonit ku ndërtohet me rreth 7–10 për qind, ndërsa ndikimi në ekonominë kombëtare vlerësohet në rreth 0.2–0.3 për qind.

Procedurat e nisura tashmë nga Ministria e Infrastrukturës dhe Energjisë për zgjidhjen e kontratës koncesionare përbëjnë kulmin e një serie vonesash dhe problematikash që kanë shoqëruar projektin që nga fillimi i zbatimit të tij dhe hapin një kapitull të ri për të ardhmen e Aeroportit Ndërkombëtar të Vlorës.

Tre persona janë arrestuar dhe një tjetër është shpallur në kërkim pas zbulimit të një aktiviteti të dyshuar të paligjshëm në lumin Devoll.

Policia e Cërrikut, pas kontrolleve dhe verifikimeve për raste që cenojnë mjedisin dhe regjimin juridik të tokës, ka goditur një subjekt që dyshohet se kryente gërryerje të shtratit të lumit jashtë kushteve të lejuara.

Në pranga kanë rënë L. X., 35 vjeç, L. B., 42 vjeç, shtetas indian, dhe B. T., 46 vjeç, ndërsa është shpallur në kërkim administratori i subjektit, K. H., 22 vjeç.

Njoftimi

Arrestohen 2 punonjës në subjektin për llogari të të cilit kryhej gërryerja e shtratit të lumit.
Shpallet në kërkim një 22-vjeçar, administrator i subjektit.

Në pranga dhe 1 shtetas (i afërm i 22-vjeçarit) që kishte ndërtuar pa leje në afërsi të vendndodhjes së subjektit.

Sekuestrohen 1 ekskavator dhe 1 kamion teknologjik, që përdoreshin për kryerjen e kësaj veprimtarie të kundërligjshme.

Në vijim të kontrolleve dhe verifikimeve, si dhe administrimit të shqetësimeve të qytetarëve, për subjekte që dyshohet se kryejnë krime kundër mjedisit dhe/ose cenojnë regjimin juridik të tokës, shërbimet e Komisariatit të Policisë Cërrik goditën një rast në këtë fushë, me pasoja në lumin Devoll. Për rastin:

-u arrestuan në flagrancë shtetasit L. X., 35 vjeç, banues në Cërrik, L. B., 42 vjeç (shtetas indian), banues në Cërrik dhe B. T., 46 vjeç, banues në fshatin Shalës;
-u shpall në kërkim shtetasi shtetasi K. H., 22 vjeç.

Nga veprimet hetimore rezultoi se për llogari të subjektit që administronte 22-vjeçari dhe kishte të punësuar shtetasit L. X. dhe L. B., gërryhej me mjete të rënda, shtrati i lumit Devoll, veprimtari nga e cila ishte devijuar rrjedha e lumit dhe rrezikohej përmbytja e tokave bujqësore në fshatin Gostimë.

Gjithashtu, nga këto veprime rezultoi se subjekti e kryente gërryerjen jashtë koordinatave të përcaktuara në lejen që kishte për këtë veprimtari.

Përveç ndëshkimit penal për shtetasit përgjegjës, subjekti u ndëshkua dhe administrativisht nga strukturat kompetente të IKMT, Tiranë, dhe IMT, Cërrik.

Nga verifikimet e mëtejshme, rezultoi se 46-vjeçari kishte ndërtuar pa leje, në afërsi të zonës ku ndodhej subjekti që administronte i afërmi i tij, shtetasi K. H..

Punohet intensivisht për kapjen e 22-vjeçarit.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.