Me rifillimin e gjysmësezonit pranveror në Ligën e Parë të Maqedonisë së Veriut, vëmendja e opinionit sportiv do të jetë e përqendruar te derbi shqiptar mes Shkëndijës dhe Struga Trim Lum. Ky duel pritet të jetë kryefjala e xhiros së parë pranverore dhe një test serioz për ambiciet e dy skuadrave që edhe këtë sezon synojnë titullin kampion, njofton Telegrafi.

Shkëndija dhe Struga kanë kaluar një fazë mjaft të suksesshme të përgatitjeve dimërore në Antalia të Turqisë. Përveç stërvitjeve intensive, të dyja ekipet kanë zhvilluar edhe disa ndeshje kontrolluese, duke fituar ritëm gare dhe duke testuar formën e lojtarëve para rifillimit të kampionatit. Në këtë aspekt, të dyja skuadrat hyjnë të përgatitura dhe me objektiva të qarta në pjesën vendimtare të sezonit.

Java e 17-të nis të martën, më 10 shkurt, me dy përballje: Shkupi – Tikveshi dhe supersfidën Shkëndija – Struga Trim Lum. Të mërkurën, më 11 shkurt, do të zhvillohen takimet Vardari – Arsimi dhe Sileksi – Bashkimi, ndërsa xhiroja mbyllet të enjten, më 12 shkurt, me ndeshjet AP Brera – Makedonija Gj.P. dhe Pelisteri – Rabotniçki. Të gjitha ndeshjet do të luhen në të njëjtin orar, duke filluar nga ora 14:00.

Megjithatë, pavarësisht pritshmërive dhe paralajmërimeve të shumta, analiza e afatit kalimtar dimëror tregon se afati kalimtar ishte një zhgënjim i përgjithshëm. Rrallëherë vitet e fundit është parë një afat kalimtar kaq i varfër, si në aspektin e cilësisë, ashtu edhe të numrit të përforcimeve, edhe pse pati disa përjashtime.

Sa u përket ekipeve shqiptare, fokusi kryesor mbetet te Shkëndija dhe Struga Trim Lum, të cilat edhe pas afatit kalimtar dimëror, vazhdojnë të mbeten pretendentët më serioze për titullin duke shhtuar këtu edhe Vardarin. Shkëndija posedon tashmë një skuadër të konsoliduar dhe nuk kishte nevojë për përforcime të shumta, por pas largimit të Klisman Cakës, ishte e domosdoshme ndërhyrja në repartin defensiv. Tetovarët sollën Fahd Ndzenge nga Brera dhe Drilon Islamin nga Cluj, ndërsa një nga “përforcimet” më të rëndësishme konsiderohet edhe mbetja e Reshat Ramadanit, i cili edhe këtë sezon do të vazhdojë si lojtar i huazuar nga Dinamo Kiev.

Struga TL, ndonëse nuk ishte shumë aktive në përforcime, zgjodhi një qasje më të matur, duke afruar dy futbollistë të rinj dhe perspektivë: Adrian Zendelovskin dhe Vasko Vasilevin. Me bërthamën ekzistuese të ekipit dhe stabilitetin e ruajtur, djemt e Bledi Shkëmbit mbeten në garë serioze për titull.

Në anën tjetër, Arsimi dhe Bashkimi hyjnë në pjesën pranverore me objektivin kryesor – mbijetesën. Arsimi tentoi të përforcohet, ndërsa vlen të theksohet afrimi i Remzifaik Selmanit, një emër i njohur i kampionatit, i cili dikur me fanellën e Renovës ishte ndër lojtarët më të mirë. Edhe Bashkimi pritet të ketë një pranverë të vështirë, ku çdo pikë do të jetë jetike në luftën për qëndrimin në elitë.

Situata më shqetësuese mbetet te FC Shkupi. Klubi nuk solli asnjë përforcim gjatë afatit dimëror, ndërkohë që u përball me largime të shumta. Problemet financiare dhe organizative e kanë pamundësuar një përgatitje normale për sezonin pranveror, ndaj nga kjo skuadër nuk priten ndryshime apo befasi, por një betejë e vështirë për të përballuar pjesën e mbetur të kampionatit.

Gjysmësezoni pranveror pritet të sjellë sfida interesante, por edhe të nxjerrë në pah dallimet mes skuadrave që luftojnë për titull dhe atyre që synojnë mbijetesën. /Telegrafi/

Shefit Shefiti, pas vetëm një gjysmësezoni të kaluar te KF Arsimi nga Çegrani, ka vendosur të nisë një aventurë të re jashtë vendit, duke u transferuar në Emiratet e Bashkuara Arabe, njofton Telegrafi.

Futbollisti i krahut ka nënshkruar kontratë me klubin Hatta, skuadër që garon në ligën e dytë të futbollit në Emiratet e Bashkuara Arabe. Sipas informacioneve, Shefiti ka nënshkruar kontratë deri në fund të sezonit aktual, duke hapur kështu një kapitull të ri në karrierën e tij profesionale.

Shefiti ishte një nga lojtarët më të spikatur të këtij edicioni në Ligën e Parë, ku me fanellën e Arsimit zhvilloi një gjysmësezon të shkëlqyer. Ai e mbylli pjesën e parë të kampionatit me 11 gola të realizuar në vetëm 12 ndeshje, statistikë që e vendosi në mesin e sulmuesve më efikasë të kampionatit.

Karrierën e tij futbollistike, ka nisur te Shkëndija, për të vazhduar më pas te Renova, Prishtina, Arsimi dhe Besa, duke ndërtuar një rrugëtim të pasur në futbollin vendor dhe rajonal. Transferimi në Emiratet e Bashkuara Arabe pritet të jetë një hap i rëndësishëm në afirmimin e tij në arenën ndërkombëtare. /Telegrafi/

Kriza brenda FC Shkupit po thellohet edhe më tej, ende pa filluar gjysmësezoni pranveror. Pas zhvillimeve të fundit lidhur me paqartësitë pronësore dhe organizative, klubi mbetet tashmë edhe pa trajner, njofton Telegrafi.

Trajneri kryesor, Erkan Murseli, ka bërë publike dorëheqjen e tij përmes një komunikate zyrtare, duke theksuar se vendimi vjen si pasojë e zhvillimeve të fundit, mungesës së qartësisë institucionale dhe lëvizjeve të padëshiruara brenda klubit. Ai nënvizon se këtë detyrë e kishte pranuar vetëm nga dashuria dhe respekti për FC Shkupin, duke punuar pa siguri apo mbulim financiar, gjë që e ka bërë të pamundur vazhdimin e bashkëpunimit në këto rrethana.

Largimi i trajnerit është një tjetër goditje për klubin nga Çairi, i cili prej ditësh ndodhet në një situatë të rëndë pas përplasjeve dhe paqartësive rreth pronësisë. Siç është bërë e ditur më herët, këto zhvillime kanë çuar edhe në vendimin e “Këshillit për shpëtim dhe rikthim të ndershmërisë, dinjitetit dhe identitetit të KF Shkupi” për ngrirjen e të gjitha aktiviteteve, deri në arritjen e një marrëveshjeje të qartë dhe të shkruar për drejtimin e klubit. /Telegrafi/

Në prag të rifillimit të sezonit pranveror, FC Shkupi ndodhet në një nga momentet më delikate të historisë së tij, me pasiguri të madhe për të ardhmen sportive dhe institucionale.

FC Shkupi, një emër me peshë të madhe në futbollin vendor, klub që dikur ishte simbol suksesi dhe krenarie për qytetin, sot po kalon një nga periudhat më të errëta të historisë së tij, njofton Telegrafi.

Kampioni i shumëfishtë i vendit gjendet në një krizë të thellë organizative dhe pronësore, që po lë pasoja serioze në funksionimin e klubit, te ekipi, stafi dhe mbi të gjitha te përkrahësit. Në prag të rifillimit të sezonit pranveror, situata brenda klubit është përshkallëzuar pas një njoftimi dhe veprimesh kontradiktore lidhur me pronësinë e FC Shkupit. Gjatë ditës së mërkurë, drejtuesit aktualë të organizimit të klubit kanë marrë një telefonatë nga Bekim Baftijari, i cili ka pretenduar se ka marrë pronësinë mbi klubin. Ky pretendim u shoqërua më pas me publikimin e një fotografie nga ish-presidenti Jasin Konjali, ku ky i fundit i uronte Baftijarit “pronësinë” e klubit.

Megjithatë, sipas sqarimeve të dhëna nga strukturat aktuale drejtuese, dokumentacioni i prezantuar nga Baftijari nuk përbën dëshmi për transferim të aksioneve apo pronësisë, por vetëm një autorizim për përfaqësim në emër të klubit para institucioneve. Një autorizim i tillë, theksohet, është dhënë edhe më parë për persona të tjerë dhe mund të revokohet në çdo moment nga ish-presidenti, duke e bërë gjithë procesin të paqartë dhe të pasigurt.

Drejtuesit aktualë të organizimit të klubit kanë ngritur shqetësime serioze për mungesën e transparencës, dallimet e thella në filozofinë e menaxhimit dhe rrezikun që emri i tyre të përfshihet në veprime pa një drejtim të qartë. Ata theksojnë se me shumë mund është rikthyer harmonia brenda ekipit, por kjo është rrënuar brenda një çasti, duke krijuar pasiguri edhe te lojtarët dhe stafi teknik për të ardhmen e tyre.

Sipas tyre, ky autorizim i fundit shihet si një përpjekje e ish-presidentit për të blerë kohë dhe për të shmangur dorëzimin real të klubit tek ata që, sipas tyre, janë pronarët legjitimë – qytetarët e Shkupit. Jo rastësisht, e gjithë kjo ndodh pak ditë para fillimit të sezonit pranveror, në një moment tejet delikat për klubin.

Për këto arsye, “Këshilli për shpëtim dhe rikthim të ndershmërisë, dinjitetit dhe identitetit të Klubit Futbollistik Shkupi” ka marrë vendim drastik: ngrirjen e të gjitha aktiviteteve në klub dhe rreth klubit, deri në arritjen e një marrëveshjeje të shkruar dhe të qartë për bashkëpunimin dhe drejtimin e ardhshëm. /Telegrafi/

Federata e Futbollit të Maqedonisë ka përcaktuar oraret dhe terminet për ndeshjet e xhiros së parë pranverore në ligën e Parë. Kjo xhiro nuk do të zhvillohet gjatë fundjavës, por të gjitha ndeshjet do të luhen në ditë pune, të ndara në tre ditë, njofton Telegrafi.

Po afrohet fillimi i pjesës së dytë të kampionatit në Ligën e Parë të Maqedonisë së Veriut, e njohur ndryshe si sezoni pranveror, ndërsa vëmendja e opinionit sportiv do të jetë e përqendruar te derbi shqiptar mes Shkëndijës dhe Struga Trim Lum. Ky duel pritet të jetë kryefjala e xhiros së parë pranverore dhe një test serioz për ambiciet e të dyja skuadrave.

Shkëndija dhe Struga kanë kaluar një fazë mjaft të suksesshme të përgatitjeve dimërore në Antalia të Turqisë, ku përveç stërvitjeve intensive kanë zhvilluar edhe disa ndeshje kontrolluese, duke fituar ritëm dhe duke testuar formën e lojtarëve para rifillimit të kampionatit.

Ndryshe nga ta, situata te FC Shkupi mbetet shqetësuese. Kjo skuadër nuk pati mundësinë të përgatitet në mënyrë normale për sezonin pranveror, për shkak të problemeve të thella financiare dhe organizative që vazhdojnë ta përcjellin klubin. Këto vështirësi pritet të reflektohen edhe në paraqitjet e ekipit në vazhdim të kampionatit.

Java fillon të martën, më 10 shkurt, ku do të zhvillohen dy takime: Shkupi – Tikveshi dhe derbi i shumëpritur Shkëndija – Struga Trim Lum. Të mërkurën, më 11 shkurt, përballen Vardari me Arsimin dhe Sileksi me Bashkimin.

Xhiroja mbyllet të enjten, më 12 shkurt, me ndeshjet AP Brera– Makedonija Gj.P. dhe Pelisteri – Rabotniçki.

Të gjitha ndeshjet e javës së 17-të të Ligës së Parë do të luhen në termin të njëjtë, duke filluar nga ora 14:00.

Sezoni pranveror nis kështu me përballje interesante dhe me derbin shqiptar që premton emocione të forta që në start. /Telegrafi/

Kampioni i Maqedonisë së Veriut ka zhvilluar pasditen e sotme ndeshjen e fundit miqësore në kuadër të përgatitjeve në Antalia të Turqisë. Takimi mes Shkëndijës dhe Ordabasit nga Kazakistani u mbyll me rezultat të barabartë 1:1, njofton Telegrafi.

Skuadra kazake kaloi në epërsi në pjesën e parë me golin e Meilit, ndërsa në minutat e fundit të ndeshjes Shkëndija arriti të barazojë përmes Trumçit, duke vendosur shifrat përfundimtare 1:1.

Pas kësaj miqësore, ekspedita e Shkëndijës rikthehet në vend, ku do të vazhdojë fazën përfundimtare të përgatitjeve para nisjes së pjesës pranverore të sezonit 2025/26.

Tetovarët i presin gjithashtu edhe dy përballje të rëndësishme në Ligën e Konferencës, ku më 19 dhe 26 mars do të përballen me ekipin turk Samsunspor. /Telegrafi/

Ekipet shqiptare të Ligës së Parë të Maqedonisë së Veriut po vazhdojnë me intensitet ndeshjet kontrolluese në kuadër të përgatitjeve dimërore, në prag të fillimit të sezonit pranveror, njofton Telegrafi.

Kampioni i vendit, Shkëndija e Tetovës, ka shënuar fitore të rëndësishme në përgatitjet që po i zhvillon në Antalia të Turqisë. Kuqezinjtë triumfuan ndaj ekipit të Sarajevës me rezultat 3:2. Skuadra boshnjake kaloi e para në epërsi me golin e Beganoviqit në minutën e 12-të, por Shkëndija reagoi shpejt. Besart Ibraimi barazoi nga pika e bardhë në minutën e 16-të, ndërsa në minutën e 33-të realizoi golin e dytë personal për përmbysje të rezultatit. Në pjesën e dytë, Spahiu në minutën e 56-të shënoi për 3:1, ndërsa Sarajeva arriti vetëm të ngushtojë rezultatin në 3:2, duke vendosur edhe shifrat përfundimtare të takimit.

Fitore bindëse ka shënuar edhe Bashkimi i Kumanovës, i cili po zhvillon përgatitjet në Medulin të Kroacisë. Bashkimi mposhti ekipin kroat Prva Iskra Bariq me rezultat të thellë 5:2. Golat për kumanovarët i realizuan David Manasievski, Luis Ribeiro si dhe Arnel Hoxhiq, i cili shënoi tre herë. Ndeshjen e radhës kontrolluese në Medulin, Bashkimi do ta zhvillojë ndaj ekipit rumun Muscelul.

Ndërkohë, ekipi i Arsimit zhvilloi një ndeshje miqësore në shtëpi, ku e mposhti skuadrën e Teteksit me rezultat 4:1. Golat për Arsimën u shënuan nga Malik Bejuli, Sikiru Olatunbosun, Shefit Shefiti dhe Remzifaik Selmani. Arsimi tashmë ka përfunduar fazën bazike të përgatitjeve, të cilat i zhvilloi në Medulin të Kroacisë, ndërsa së fundmi ka prezantuar edhe përforcimet e reja: futbollistin me përvojë Xhelil Abdulla, si dhe reprezentuesin e Ugandës, Bajo, i cili vjen si huazim nga skuadra e Vardarit. /Telegrafi/

Struga Trim Lum u paraqit denjësisht ndaj gjigantit rus Rubin Kazan në ndeshjen e dytë kontrolluese në Antalya, por dy gola në pjesën e dytë i sollën humbjen 0:2 skuadrës strugane, njofton Telegrafi.

Pas një jave përgatitjesh intensive, Struga Trim Lum ka zhvilluar sot ndeshjen e dytë kontrolluese në kuadër të fazës përgatitore që po e zhvillon në Antalya të Turqisë.

Skuadra nënkampioneve esezonit vjeshtor u përball me një nga klubet më të njohura ruse, Rubin Kazan, duke u paraqitur në një nivel mjaft të mirë, megjithatë pa arritur të shmangë humbjen. Ekipi rus shënoi dy gola në pjesën e dytë dhe triumfoi me rezultat 0:2.

Struganët zhvilluan një pjesë të parë shumë të barabartë ndaj kundërshtarit favorit, duke treguar organizim dhe disiplinë në lojë. Pas pushimit, pas shumë zëvendësimeve nga të dyja skuadrat, Rubini arriti të shfrytëzojë rastet e krijuara dhe të sigurojë një fitore të merituar. Golat për skuadrën ruse u realizuan nga Kuznetsov në minutën e 69-të dhe Mukba në minutat e fundit të takimit.

Vlen të theksohet se te Rubin Kazan aktivizohen tre futbollistë shqiptarë: Veldin Hoxha nga Kosova, Mirlind Daku, përfaqësues i Kombëtares shqiptare si dhe Dardan Shabanhaxhaj, i cili posedon pasaportë austriake. Në ndeshjen e sotme ndaj Strugës u aktivizuan vetëm Hoxha dhe Shabanhaxhaj, ndërsa Mirlind Daku nuk ishte as në bankën rezervë.

Kujtojmë se para shtatë ditësh Struga Trim Lum barazoi me Trençinin, ndërsa gjatë qëndrimit në Antalya e presin edhe disa ndeshje të tjera miqësore. /Telegrafi/

FC Bashkimi nga Kumanova ka zyrtarizuar përforcimin e radhës në këtë afat kalimtar, duke prezantuar Nickel Ronaldo Orr si lojtarin më të ri të skuadrës. Futbollisti vjen nga ekipi qipriot PAEEK dhe pritet të jetë një shtesë e rëndësishme për repartet e ekipit, njofton Telegrafi.

Nickel Ronaldo Orr përfaqëson profilin e një lojtari modern, me vizion të mirë loje, fizik të fortë dhe shpejtësi, elemente që i japin skuadrës më shumë balancë, siguri dhe energji në fushë. Në klub besojnë se ai do të përshtatet shpejt me filozofinë e lojës dhe do të japë kontribut të vlefshëm në realizimin e objektivave sezonale. Ky transferim është një tjetër dëshmi e ambicieve të FC Bashkimi për të ndërtuar një ekip konkurrues.

Ditë më parë, klubi nga Kumanova prezantoi edhe përforcimet Azer Koziç dhe Luis Ribeiro, ky i fundit i ardhur nga radhët e FC Shkupi, ndërsa afrimi i parë në këtë afat kalimtar ishte Foday Trawally, i cili u transferua nga AP Brera.

Skuadra kumanovare tani po vijon përgatitjet në Medulin të Kroacisë ku nga katër ndeshje miqësore të parën e fitoi sot ndaj FK Rudar Pljevlja me rezultat 3:0, ndërsa orarin e miqësoreve e vazhdon të martën kundër FK Radnik Bijeljina, të mërkurën ndaj FK Iskra Bariç dhe në fund luan të shtunën ndaj NK Hrvace.

FC Bashkimi ndeshjen e parë në vazhdim të sezonit do ta zhvillojë më 7 shkurt, kur në Kratovë do të përballet me skuadrën e Sileksit. /Telegrafi/

Skuadra e Shkëndijës nga Tetova ka zhvilluar ndeshjen e parë kontrolluese në Antalya të Turqisë, në kuadër të përgatitjeve dimërore për pjesën pranverore të sezonit. Kundërshtare e kuqezinjve ishte ekipi ukrainas Oleksandriya, me të cilin u nda në barazim 1:1, njofton Telegrafi.

Shkëndija u paraqit më mirë në pjesën e parë të takimit, duke pasur më shumë kontroll të lojës dhe raste konkrete shënimi. Superioriteti u konkretizua në minutën e 33-të, kur Arbin Zejnullai realizoi golin e epërsisë, rezultat me të cilin u mbyll edhe fraksioni i parë.

Në pjesën e dytë, trajneri Jeton Beqiri bëri disa ndryshime në formacion, duke u dhënë më shumë minuta lojtarëve që kishin pasur më pak hapësirë gjatë sezonit vjeshtor. Pas këtyre ndryshimeve, skuadra ukrainase arriti të barazojë rezultatin në minutën e 64-të, me autor Johnathan, duke vendosur shifrat përfundimtare 1:1.

Kujtojmë se në miqësoren e parë të kësaj periudhe përgatitore, të zhvilluar në Shkup, Shkëndija kishte regjistruar fitore bindëse 3:0 ndaj AP Brera Strumicës.

Kuqezinjtë do të vazhdojnë serinë e ndeshjeve kontrolluese gjatë qëndrimit në Turqi sipas këtij orari:
– 24 janar, ora 14:00: Podbrezova (Sllovaki) – Shkëndija
– 28 janar, ora 14:00: Sarajevo (Bosnje dhe Hercegovinë) – Shkëndija
– 1 shkurt, ora 14:00: Ordabasy (Kazakistan) – Shkëndija

Këto takime do t’i shërbejnë stafit teknik për të testuar formacionin dhe për të rritur formën e skuadrës para rifillimit të garave zyrtare. /Telegrafi/

Nënkampionët e sezonit vjeshtor, Struga Trim Lum e udhëhequr nga trajneri Blendi Shkëmbi, kanë zhvilluar miqësoren e parë gjatë përgatitjeve dimërore në Antalya të Turqisë, duke barazuar me rezultat 2:2 ndaj skuadrës sllovake të Trençinit, njofton Telegrafi.

Struga Trim Lum ka nisur me barazim ciklin e ndeshjeve miqësore në kuadër të përgatitjeve dimërore që po zhvillon në Antalya të Turqisë. Nënkampionët e futbollit vendor luajtën baraz, 2:2, ndaj skuadrës sllovake të Trençinit, në testin e parë kontrollues.

Goli i parë për ekipin strugan u realizua në pjesën e parë nga Marjan Radeski, i cili shfrytëzoi mirë një aksion të ndërtuar në repartin ofensiv. Në pjesën e dytë të takimit, Hristijan Maleski u përkujdes për golin e dytë, duke rikthyer baraspeshën dhe duke vulosur rezultatin përfundimtar 2:2.

Për stafin teknik të udhëhequr nga Blendi Shkëmbi, kjo përballje shërbeu si një test i vlefshëm për të vlerësuar gjendjen fizike të futbollistëve dhe për të provuar skema të ndryshme taktike, para rifillimit të garave zyrtare në muajin shkurt.

Ndeshjen e radhës kontrolluese në tokën turke, Struga Trim Lum do ta zhvillojë më 22 janar, kur kundërshtar do të jetë skuadra nga Uzbekistani, FC Pakhtakor. /Telegrafi/

KF Shkëndija ka mësuar kundërshtarin në raundin play-off të Ligës së Konferencës të UEFA-s, duke shkruar histori për futbollin vendor, pasi bëhet klubi i parë nga Maqedonia e Veriut që arrin të luajë në këtë fazë të një gare evropiane, njofton Telegrafi.

Shorti i hedhur në selinë e UEFA-s në Nion ka përcaktuar çiftet për një vend në 1/8 e finales. Sipas formatit të ri, shorti ishte gjysmë i dirigjuar, ndërsa Shkëndija kishte dy kundërshtarë të mundshëm: Lech Poznań nga Polonia dhe Samsunspor nga Turqia.

Fati e ka përballur kampionin e Maqedonisë së Veriut me ekipin turk Samsunspor në një duel të dyfishtë.Ndeshjet e play-offit do të zhvillohen më 19 dhe 26 shkurt. Shkëndija, si ekip jo bartës, ndeshjen e parë do ta luajë në Shkup, ndërsa takimin e kthimit do të zhvillohet në Turqi. /Telegrafi/

Ramadani dhe Ademi kërkuan më shumë hapësirë në fushë, ndërsa Shkëndija, në frymën e bashkëpunimit, pranoi kërkesën dhe mbylli bashkëpunimin, njofton Telegrafi.

Me insistim të vetë futbollistëve, KF Shkëndija ka vendosur të shprehë mirëkuptim, duke u dhënë leje largimi Florent Ramadanit dhe Fiton Ademit, të cilët nuk do të jenë më pjesë e skuadrës në vazhdim të kampionatit. Kërkesa e tyre kishte të bënte me dëshirën për të gjetur mjedise të reja ku do të kenë më shumë minuta dhe rol aktiv në lojë.

Klubi dhe lojtarët kanë arritur marrëveshje të ndërsjellë për shkëputjen e kontratave, në frymën e respektit dhe bashkëpunimit korrekt. Të dy futbollistët kanë qenë pjesë e rëndësishme e projektit sportiv të Shkëndijës në vitet e fundit, duke u rritur profesionalisht brenda klubit dhe duke dhënë maksimumin sa herë që kanë qenë në dispozicion të stafit teknik. KF Shkëndija ka vlerësuar vazhdimisht përkushtimin, profesionalizmin dhe korrektësinë e tyre, ndërsa ka vendosur të mirëkuptojë ambiciet e tyre për vazhdimin e karrierës. /Telegrafi/

KF Shkëndija ka nisur me fitore përgatitjet dimërore, duke regjistruar sukses bindës 3:0 në ndeshjen e parë miqësore ndaj AP Brera nga Strumica, njofton Telegrafi.

Takimi u zhvillua sot në Shkup dhe shërbeu si testi i parë për kuqezinjtë në kuadër të fazës përgatitore.
Shkëndija e mori herët kontrollin e lojës dhe kaloi në epërsi që në minutën e 11-të me golin e shënuar nga Mazari. Pavarësisht ndryshimeve të shumta në formacion, ekipi tregoi organizim të mirë dhe vazhdoi të dominojë edhe në pjesën e dytë.
Kapiteni Besart Ibraimi vulosi fitoren me dy gola të shënuar në minutat 61 dhe 82, duke konfirmuar formën e mirë dhe efikasitetin në repartin ofensiv.

Kjo miqësore i shërbeu stafit teknik për të parë gjendjen fizike të futbollistëve dhe për të testuar skema të ndryshme taktike në prag të vazhdimit të sezonit.

Shkëndija pritet të zhvillojë edhe ndeshje të tjera kontrolluese gjatë përgatitjeve dimërore, pasi fazën tjetër e ka planifikuar ta zhvillojë në Antalia të Turqisë. /Telegrafi/

KF Shkëndija nga Tetova ka zyrtarizuar programin e ndeshjeve kontrolluese në kuadër të përgatitjeve dimërore për pjesën e dytë të sezonit, njofton Telegrafi.

Kuqezinjtë do të zhvillojnë gjithsej pesë takime miqësore, një në vend dhe katër të tjera gjatë fazës përgatitore në Antalia të Turqisë.
Ndeshja e parë testuese është planifikuar më 15 janar, kur Shkëndija do të përballet në me ekipin AP Brera nga Strumica.
Dy ditë më pas, më 17 janar, skuadra e drejtuar nga Jeton Beqiri do të udhëtojë drejt Antalias, ku deri më 1 shkurt do të zhvillojë fazën kryesore të përgatitjeve.

Gjatë qëndrimit në Turqi, kuqezinjtë do të matin forcat me kundërshtarë të fortë ndërkombëtarë, në katër ndeshje kontrolluese që pritet të shërbejnë si teste serioze para rifillimit të kampionatit.
Programi i ndeshjeve në Antalia:
– 20 janar: FC Oleksandrya (Ukrainë)
– 24 janar: FK Podbrezova (Sllovaki)
– 28 janar: FK Sarajeva (Bosnje dhe Hercegovinë)
– 1 shkurt: FC Ordabasy (Kazakistan)

Përmes këtyre përballjeve, stafi teknik synon të rrisë nivelin fizik dhe taktik të skuadrës si dhe të testojë alternativat dhe skemat e lojës, në funksion të objektivave për vazhdimin e sezonit garues. /Telegrafi/

Klisman Cake ka nisur një kapitull të ri në karrierën e tij, pasi zyrtarisht është transferuar te klubi rus Akhmat Grozny. KF Shkëndija dhe mbrojtësi kuqezi kanë mbyllur bashkëpunimin katërvjeçar, pas aktivizimit të klauzolës së largimit nga ana e klubit rus, njofton Telegrafi.

Në respekt të dëshirës së futbollistit për të bërë hapin e radhës në karrierë dhe për të provuar një sfidë të re ndërkombëtare, Shkëndija bashkëpunoi në realizimin e këtij transferimi, duke përfituar edhe një dëmshpërblim financiar.

Largimi i Cakes vjen si një histori korrektësie dhe besimi të ndërsjellë mes lojtarit dhe klubit. Pas fitimit të titullit kampion, verën e kaluar ai ishte lojtar i lirë dhe kishte mundësinë të largohej pa asnjë përfitim për Shkëndijën, por zgjodhi të rinovojë edhe për një sezon tjetër. Kontributi i tij ishte i rëndësishëm në suksesin historik evropian të kuqezinjve, ndërsa sot largohet duke i sjellë përfitim klubit që i dha besimin dhe hapësirën.

Klisman Cake iu bashkua Shkëndijës në janar të vitit 2022 dhe për katër vite e pesë sezone jo të plota ishte pjesë e pandashme e skuadrës. Gjatë kësaj periudhe ai fitoi titullin kampion dhe regjistroi gjithsej 133 paraqitje zyrtare, prej tyre 106 në kampionat, tri në Kupë dhe 24 në garat evropiane, duke shënuar 12 gola.

Cake do të mbetet pjesë e gjeneratës historike të Shkëndijës që realizoi ëndrrën e kualifikimit në fazën kryesore të një kompeticioni evropian, konkretisht në UEFA Ligën e Konferencës.

KF Shkëndija e falënderon Klisman Caken për profesionalizmin, përkushtimin dhe kontributin e dhënë ndër vite, duke i uruar shumë suksese në vazhdimin e karrierës së tij te Akhmat Grozny dhe më tej. /Telegrafi/

Pas afrimeve të Fahd Dzengue dhe Drilon Islamit, KF Shkëndija ka zyrtarizuar edhe dy largime brenda së njëjtës ditë, duke mbyllur bashkëpunimin me mesfushorin kosovar Kamer Qaka dhe mbrojtësin strugan Egzon Belica, njofton Telegrafi.

Ndarja me Kamer Qakën është bërë me marrëveshje të përbashkët mes palëve. Mesfushori kosovar ishte pjesë e rëndësishme e kuqezinjve në dy periudha të ndryshme, fillimisht nga janari 2021 deri në janar 2022 dhe më pas nga janari 2023, duke kontribuar në sukseset e klubit dhe duke qenë pjesë e skuadrës që fitoi dy tituj kampion, në vitet 2021 dhe 2025. Vendimi për ndarje vjen në mirëkuptim të plotë, për t’i dhënë lojtarit më shumë hapësirë për aktivizim të rregullt në vazhdim të karrierës.

Rrugët janë ndarë gjithashtu edhe me mbrojtësin Egzon Belica. Pas diskutimeve mes lojtarit dhe drejtuesve të klubit, u vlerësua se interesi i përbashkët i të dy palëve është që futbollisti të gjejë një ambient ku do të ketë më shumë mundësi për lojë të vazhdueshme. Belica iu bashkua Shkëndijës në afatin kalimtar të verës së kaluar, në një periudhë kur klubi ishte i angazhuar në tri fronte: kampionat, Kupë dhe UEFA Ligën e Konferencës.

KF Shkëndija ka shprehur mirënjohje për kontributin, profesionalizmin dhe korrektësinë e treguar nga të dy futbollistët gjatë kohës sa ishin pjesë e klubit, duke u uruar shumë suksese në vazhdim të karrierës së tyre, ndërsa dyert e klubit mbeten gjithmonë të hapura për ta. /Telegrafi/

Shkëndija e Tetovës ka përforcuar repartin ofensiv me një nga golashënuesit më të mirë të gjysmës së parë të sezonit në Ligën e Parë të Maqedonisë së Veriut.
Kuqezinjtë po zhvillojnë një afat kalimtar dimëror të fokusuar te futbollistët me përvojë dhe kontribut të menjëhershëm, njofton Telegrafi.
Anëtari më i ri i Shkëndijës së Tetovës është Fahd Nzengue, i cili i bashkohet Shkëndijës si lojtar i lirë, pas shkëputjes së kontratës me Brera Strumicën. Sulmuesi nga Gaboni, në gjysmën e parë të sezonit në Ligën e Parë të Maqedonisë së Veriut, zhvilloi 16 ndeshje dhe realizoi tetë gola, duke u renditur mes realizatorëve më efikasë të kampionatit.
Nzengue ishte transferuar te Brera dimrin e kaluar, ndërsa edhe në edicionin paraprak në elitë kishte shënuar gjashtë gola, duke dëshmuar vazhdimësi në paraqitje dhe efikasitet.
Në karrierën e tij, Nzengue ka nisur nga Munana në Gabon, ndërsa sfida e parë evropiane për të ishte Tabor Sezhana në Slloveni. Më pas ka qenë pjesë edhe e Primorjes. Pas një periudhe pa klub, në shkurt të vitit të kaluar iu bashkua Brerës, ku riktheu formën e tij më të mirë dhe tani ka siguruar një transferim te kampioni i Maqedonisë.

Nzengue është përforcimi i dytë i Shkëndijës në këtë afat kalimtar dimëror, pas promovimit më herët të Drilon Islamit, i cili erdhi nga radhët e CFR Cluj. /Telegrafi/

Skuadra e Arsimit nga Çegrani i Gostivarit ka hyrë në fazën përfundimtare të përgatitjeve për pjesën e dytë të sezonit në Ligën e Parë të Maqedonisë së Veriut. Skuadra nga Çegrani, që garon në elitën e futbollit vendor, nga sot ndodhet në Kroaci, ku do të zhvillojë fazën e parë përgatitore e cila do të zgjasë dhjetë ditë, njofton Telegrafi.

Nën udhëheqjen e trajnerit Vildan Saliu, ekipi përveç punës intensive në stërvitje, do të testohet edhe përmes katër ndeshjeve kontrolluese. Programi i deritanishëm parasheh përballje ndaj skuadrave kroate Sllaven Bellupo si dhe duelet kundër Vukovarit dhe Primorjes. Emri i kundërshtarit për ndeshjen e katërt pritet të bëhet i ditur së shpejti.

Paralelisht me përgatitjet, klubi po punon edhe në përforcimin e ekipit. Afati kalimtar dimëror ka sjellë një emër të njohur për mesfushën, Hogan Ukpa, futbollist nigerian me përvojë në kampionatin tonë, i cili për tre sezone ka mbrojtur ngjyrat e Struga Trim Lum.

Kujtojmë se Arsimi, si debutues në elitë, ka zhvilluar një gjysmësezon vjeshtor mjaft të suksesshëm, duke e mbyllur atë në vendin e pestë me 22 pikë dhe duke u konfirmuar si një nga befasitë më pozitive të kampionatit. /Telegrafi/

Shkëndija gjendet në bilancin e fundit të UEFA-s, paguan gjobë për përdorim të piroteknikës, njofton Telegrafi.

Ekipi i Shkëndijës është përfshirë në bilancin më të fundit të UEFA-s, ku janë shënuar klubet që kanë marrë sanksione në kupat evropiane dhe në ndeshjet kualifikuese në të gjitha garat nën ombrellën e “shtëpisë evropiane të futbollit”.

Për shkak të tifozëve të saj, ekipi nga Tetova do të paguajë një gjobë prej 1.500 eurosh në arkën e UEFA-s. Arsyetimi është përdorimi i piroteknikës në sektorin e mysafirëve. Po ashtu, një gjobë për piroteknikë kanë marrë edhe tifozët e Dritës, dhe klubi do të duhet të paguajë 3.750 euro.

Ndeshja mes Dritës dhe Shkëndijës përfundoi me rezultat 1-0 për ekipin vendas. Më parë, UEFA kishte gjobitur Shkëndijën me 20.000 euro, po ashtu për shkak të përdorimit të piroteknikës dhe mesazheve politike gjatë ndeshjes në Shkup. /Telegrafi/