Specialistët e Seksionit për Hetimin e Krimeve kundër Pronës dhe Pasurisë, në bashkëpunim me shërbimet e Forcës së Posaçme “Shqiponja, si rezultat i sigurimit të informacionit në rrugë operative, mbi vendndodhjen e shtetasit të kërkuar për llogari të Spanjës, dhe shkëmbimit të këtyre informacioneve, me Interpol Madridin, nëpërmjet Interpol Tiranës, finalizuan operacionin e koduar “Aksi”.

Në kuadër të operacionit, u kap teksa lëvizte me automjet, te rrethrrotullimi i Shëngjinit, dhe u arrestua provizorisht, me qëllim ekstradimin në Spanjë, shtetasi A. I., 45 vjeç.

Në vitin 2025, autoritetet gjyqësore në Spanjë i kanë caktuar këtij shtetasi, masën e sigurisë “Arrest në burg”, për veprën penale “Vjedhja me armë”, kryer në kuadër të grupit të strukturuar kriminal.

Nga verifikimet e mëtejshme rezultoi se 45-vjeçari drejtonte automjetin tip “Benz”, me leje drejtimi të dyshuar të falsifikuar.

Me cilësinë e provës materiale u sekuestruan automjeti tip “Benz” dhe dokumenti i dyshuar i falsifikuar.

Materialet procedurale iu referuan Prokurorisë së Lezhës, për veprime të mëtejshme. Ndërkaq, Interpol Tirana vijon bashkëpunimin me homologët, për të finalizuar procedurën për ekstradimin e shtetasit A. I., në Spanjë.

Kur mendojmë për qytetet më të ndotura në botë, na vijnë në mendje imazhet e Delhit ose Pekinit, por të dhënat e reja kanë zbuluar probleme të mprehta të ndotjes më afër zemrës së Evropës.

Një studim i publikuar nga gazeta britanike The Guardian konstaton faktin se ndotja nga grimcat në Ballkanin Perëndimor është më e larta në Evropë.

Nivelet e ndotjes në këtë rajon llogariten madje se janë ndër më të lartat në botë. Dioksidi i karbonit në dimër në shtetet ballkanike rezulton të jetë mbi 30 herë më i madh se ai që shohim normalisht në Evropën Perëndimore.

Një nga pjesët më të vështira të studimit ishte kalimi i shumë kohës në trafik nga ekspertët e mjedisit, duke ngarë makinën në rrugët e ngushta lart e poshtë kodrave të kryeqytetit boshnjak. Disa mbrëmje ishin dukshëm të mbuluara me mjegull në perëndim. Kishte erë të qartë tymi druri dhe qymyri në zonat e banuara.

Ekipi shqyrtoi një pjesë të përzierjes së ndotjes nga grimcat, që tejkaloi udhëzimin ditor të Organizatës Botërore të Shëndetësisë për 66% të kohës dhe shpesh ishte më shumë se tetë herë më e lartë.

Vendet më të ndotura ishin zonat e banimit, ku ndotja e ajrit dominohej nga ngrohja e shtëpive, duke përfshirë djegien e drurit, qymyrit dhe mbeturinave, së bashku me sasi të larta të hidrokarbureve që shkaktojnë kancer. Një flotë e vjetër automjetesh i ka shtuar problemet me ndotjen kryeqytetit boshnjak.
Një automjet mesatar në Sarajevë është 19 vjeç, ndërsa në Mbretërinë e Bashkuar makinat kanë moshë mesatare 10 vjeç.

Për të dalë nga kjo situatë emergjente, ekspertët u kanë rekomanduar autoriteteve boshnjake izolimin e shtëpive, ngrohjen qendrore, si dhe reduktimin e përdorimit të sobave në nëntë zona prioritare të Sarajevës.

Këto plane janë të nevojshme për të ulur ngrohjen me lëndë djegëse të ngurta në ato zona me 90% deri në vitin 2033.

Hiqej si avokate dhe premtonte zgjidhje të shpejtë të çështjeve ligjore, duke përfituar para nëpërmjet mashtrimit, Prokuroria Fier dërgon për gjykim shtetasen K.K.

Prokuroria e Fierit përfundoi hetimet dhe dërgon për gjykim, shtetasen K.K. për veprën penale ‘Mashtrimi’ e kryer më shumë se një herë dhe ‘Fshehja e të ardhurave’.

Nga verifikimet e kryera rezulton se këto shërbime, nuk janë realizuar, megjithëse vlerat monetare janë marrë nga e pandehura. Pagesat janë kryer në forma të ndryshme, përfshirë dorëzime në dorë, transferta financiare dhe pagesa të deklaruara si kapar apo shpenzime procedurale.

Në disa episode, viktimat janë siguruar nga e pandehura se procedurat ishin në vijim dhe se çështjet do të përfundonin brenda afateve të caktuara, ndërkohë që më pas komunikimi me të është ndërprerë dhe nuk është dhënë asnjë rezultat konkret. Në raste të tjera, rezulton se janë dhënë informacione të pavërteta mbi ekzistencën e proceseve gjyqësore apo aplikimeve administrative, të cilat, pas verifikimit pranë institucioneve përkatëse, nuk kanë rezultuar të jenë bërë prej saj. Të mashtruar nga e pandehura në këtë procedim janë evidentuar 8 shtetas kryesisht qytetarë të Lushnjes dhe Fierit.

Hetimi ka zbuluar gjithashtu se e pandehura ka kryer veprime në dukje të një përfaqësimi ligjor në një kohë kur nuk kishte status aktiv për ushtrimin e profesionit të avokatit, si dhe ka përfituar të ardhura nga ky aktivitet pa i deklaruar ato pranë organeve tatimore. Nga të dhënat e administruara, rezulton se për disa vite ajo ka ushtruar aktivitet ekonomik faktik, ndërkohë që figuronte me status pasiv në regjistrat tatimorë, duke mos deklaruar të ardhurat e përfituara dhe duke shmangur detyrimet përkatëse tatimore.

Kryeministri Edi Rama ka ndarë këtë mëngjes pamjet nga punimet për rindërtimin nga e para të gjimnazit “Sulejman Elezi” në fshatin Laknas të Kamzës, që do të mirëpresë rreth 800 nxënësve.

“Mirëmëngjes, dhe me punimet që vijojnë në Laknas për ndërtimin nga e para të gjimnazit ‘Sulejman Elezi’, i cili do të mirëpresë mbi 800 nxënës në kushte dinjitoze, ju uroj një ditë të mbarë”, shkruan kryeministri Edi Rama, krahas pamjeve të punimeve për rindërtimin e gjimnazit.

Nga Arian Leka

Në librin “Treni ADN”  (Intergrafika, 2024) Dhimitër Anagnosti shfaqet jo si poeti që mëton një vend në poezi, por si autor që e ka poezinë si vazhdim të domosdoshëm të jetës së vet krijuese. Qasja ndaj poezisë, si hapësirë arti e pashijuar, e vendos autorin në sporvën e një dallimi thelbësor, që veçon poetët episodikë nga ata që shkruajnë nën “ankthin e domosdoshmërisë” apo nga kërkesa për ta lënë me shkrim dëshminë e tyre. Tashmë ambicia artistike e Anagnostit është qetësuar falë fronit prej korifeu në kinematografi, por nevoja ekzistenciale e tij për t’u shprehur edhe përmes vargjeve është shtysa që e fton jo thjesht të dëshmohet, por për të dëshmuar edhe përmes poezisë.

“Treni ADN”  vjen si një libër ku poezia, kinemaja, kujtesa dhe etika njerëzore bashkohen në një zë unik, që nuk konkurron me traditat, por bashkëbisedon me të. Kërkimi i efektit kalimtar, si një libër kurshtie prej “kineastit që shkruan poezi” është e tejkaluar, pasi Anagnosti e di se historia e artit ka regjisorë të shquar, të njohur edhe në poezi, mes tyre Jean Cocteau, Andrei Tarkovsky, Pier Paolo Pasolini apo Alejandro Jodorowsky, që e poetizuan filmin dhe që e kanë poezinë pjesë të së njëjtës ndjeshmëri artistike. Në këtë këndvështrim “Treni ADN” kërkon vëmendje falë peshës së përvojës që sjell dhe urtësisë së zërit autorial në këtë formë të poezisë vizuale, që lidh kinemanë me poezinë shqiptare.

Titulli i librit është metafora qendrore, që kërkon ta përjetojmë jetën dhe leximin e kësaj vepre si udhëtim. I pandalshëm, hapësirë ku individi – udhëtar takohet me veten, me trashëgimitë, për të pohuar se qenia e tij përbëhet nga kujtesa personale, kujtesa e fisit dhe e gjithë njerëzimit. Treni metaforik ecën mbi spiralen binare të ADN-së, duke mbartur me vete paraardhësit dhe bashkëkohësit kujtesën, “dhimbjen krenare”, peshën e gabimit të brezave, por dhe buzëqeshjen e shpresën.Për Anagnostin jeta është njëherazi udhëtimi gjenetik, historik dhe shpirtëror dhe individi, një nyje në thurimën e trashëgimisë.

*

Anagnosti hyn në poezi jo si pjesë e ndonjë brezi letrar, por si një autor që mbërrin pasi tradita është formuar. Me gjuhën e një arti tjetër ai ka “shkruar” të njëjtin “tekst”, pasi filmat e tij janë poezi vizuale, ndaj çmohet si “poet i kinematografisë”, duke bërë që filmografia dhe poezia e tij të jenë njëkohësisht sociale, personale dhe politike. Tematika e tij, vargjet dhe meditimet, përkon me “territore letrare”, ku më herët të tjerë kanë lënë gurë kufiri të dallueshëm.

Migjeni, me ankthin social, revoltën e papërmbajtur, klithmën morale dhe energjinë e bllokuar në vete; Lasgushi lirik, që e ndërton metafizikë mbi muzikën, simbolin dhe peizazhin e idealizuar; Arapi, deti i të cilit është hapësirë lirike, dashuri, çlirim, magjepsje dhe bukuri; Rreshpja poeti finosh i ekstazës së thyer, i vizionit të shfrenuar, i përfytyrimit të paparashikueshëm, që lëndon me butësi; Agolli, me përditshëminë, idilën e qytetit, idilin rural dhe me etikën e njeriut të zakonshëm apo Kadareja me obsesionin ndaj historisë, qasjet ndaj diktaturës, mitim dhe fajin kolektiv, duket se kanë lënë jo shumë hapësirë për pasardhësin. Por edhe kur duket se porta është mbyllur, rrezet gjejnë një hapësirë për të hyrë.

Anagnosti shkel territore të ngjashme të së njëjtës gjeografi poetike: temat e vuajtjes, hipokrizisë, padrejtësia, zhënjimi, gëzimet e befta, shoqëruar me buzëqeshje të mençur apo lodhjen nga jeta. Ai nuk klith. Vizualish, klithma e tij afron me pikturën “Britma” e Edvard Munch-ut. Shpërthimet mungojnë, por ka rrëfim pas betejës, ku limiti njerëzor dëshmohet si poetikë e pas-revoltës, e njeriut që e di se grushti nuk mjafton.Vargu “O, si nuk kam një grusht të fuqishëm! Malit, që hesht, mu në zemër me ia njesh” merr formën “U lodha, u lodha, u lodha!” Ky ndryshim regjistri është thelbësor, pasi Anagnosti sjell vargjet e energjisë së shteruar.

Prej këtej mund të shihet se, në aspektin metafizik “Treni AND” vjen pa lirizmin e fjalës ornamentale, të temperuar me kujdes, për të nxjerrë prej saj kuptime dhe tinguj. Natyra te Anagnosti është ankth qiellor, një horror kozmik, shenjë paralajmëruese, një ogur që ndjell e nuk ndjell mirë me atë “Hënë të stërmadhe, diell të stërmadh, të kuq si gjaku i mpiksur!”, me një telefon që bie për të dëgjuar dialogun: “-   Sapo mbërrita, po jam shumë e lodhur… –   …..Çlodhu, zemër….!” Kjo është pamja e sjellë nga autori që kërkon thellë në kuptimin e frikës dhe mendon se ekzistencializmi i përshtatet njeriut të sotëm më shumë se simbolizmi.

Optimisti etik i paraardhësve ia ka lënë vendin zhgënjimit të heshtur që, edhe pse e pranon pajtimin e njeriut me jetën, nuk rri dot pa bërë pyetje, shpesh pa përgjigje: “A ia vlen pajtimi?” “Vdekje! / E di që do vish. / Si vdekja e di! / Dhe shumë gjëra / Si vdekja i di!”. Pyetjet kthehen në dilema, dilema e njeriut që nuk e pranon si zgjidhje të qenurit i ngushëlluar ngushëllimin. Pyetjet pa përgjigje janë sprova e njeriut që e ka tejkaluar optimizmin si detyrim social dhe e sheh jetën si balancë të brishtë mes mashtrimit, shpresës dhe vetëmashtrimit: “Vetëngushëllim, a vetëmashtrim?!”. Gjithë sa janë thënë më herët përmes formave “unë vdes për…” (atdheun, nderin, dashurinë, ty”, te Anagnosti marrin trajtë më pranë Dostovjevskit “unë vdes!”, “jam i vdekshëm” dhe kjo ka rëndësi.

Peizazhi, si poezi e natyrës, te “Treni ADN” është i pranishme dhe, po aq sa toka e qielli, në tekste shfaqet edhe deti. Kjo hapësirë krijimi te Deti i Anagnostit është kufi i qenies, vendi ku toka mbaron dhe fillon misteri, aventura e jetës me shumë dilema. Ky det vjen bashkë me një “masiv shkëmbor…ngritur përpjetë duke dalë nga ujërat e thella të Jonit blu”, ai ka thellësi kërcënuese, pafundësi që të gëlltit, prani të heshtur e së panjohurës që, njëlloj si njeriu, nuk kthen përgjigje, por këqyr dhe hy në komunikim. Qasja e lidh Anagnostin më shumë me poetikën filmike, sesa me traditën e lirikës së peizazhit detar, por i jep gjithashtu edhe rastin të shprehet e të nderojë, përmes detit, një poet si Frederik Rreshpja, me vargjet: “Këtu prehet poeti / Prehet “lumi”, prehet “deti” / Prehet qielli i lumë / Me ylber e me furtunë / Prehet dhimbja, çmenduria, mirësia / Prehet zemra, dashuria!” Të dy ndajnë temën e dhimbjes dhe të vetmisë, jo stilin. Anagnosti e mban imazhin nën kontroll, si te “Rekuiemi”, ku lexohen vargjet:“Askush s’derdhi lot për ty / S’kishin lindur ata sy /Turp për ne / Lavdi për ty!”. Kësisoj, Anagnosti bëhet dëshmues i etikës klasike, me fjalë të kursyera, me gjykim të prerë, më shumë skalitje se shkrim.

Anagnosti mund ta ndjejë kultin e gjuhës, të kujtesës dhe të kulturës së etnosit, të cilat i nderon, pa krijuar mitin e tyre. Për të kujtesa është barrë, brengë, që do gjuhë të qartë për t’u shprehur, pa alegori, si rrëfime të ndërgjegjes. Kjo optikë nuk kërkon të jetë poezi në kuptimin tradicional. Autori e ndien veten udhëtar, ai që kërkon, humb dhe gjen rrugën, pa u bërë drejtuesi që prin, shprehur në distikun: “Brezat ikin / Brezat vijnë…” Vargjet bëhet pranim i vetëdijshëm i fatit dhe i fatalitetit njerëzor, qëndrim ky që i jep librit tërheqjen e veçantë të leximit si ditar përvojash, pa revoltë romantike. Vargje të tillë si: “Koha dy masa ka / Arkivolin dhe djepin në krah” e shndërrojnë udhëtimin në mekanizëm biologjik e metafizik njëherësh. Ky është “treni” që ecën mbi shinat e njerëzore, ku lindja dhe vdekja janë episode, sekuenca, kadro të një filmi, për të mos thënë se janë vetë kinemaja letrare, ku Anagnosti na fton për të ndjekur këtë flim me fjalë, sa shpirtëror dhe reflektues.

*

Nuk është e rastit që poezitë shfaqen në filmat e Anagnostit. Edhe në këtë libër kineasti është i pranishëm. Për fjalën dhe kompozimin e poezisë ai përdor të njëjtat teknika: rakursi, zgjedhjen e këndit të xhirimit, montazhin, fiksimin e detajit dhe zgjedhjen e pamjes më të rëndësishme në skenës masive. Këto përvoja janë vendimtare për strukturën e “Treni ADN”, si përmbledhjeje imazhesh të pasuruara nga mendimi dhe poezinë vizuale brenda tij, të tilla si “Meditim”.

Poezia e Anagnostit fillimisht sheh, para se të flasë. Autori nuk përshkruan, por kuadron, ai nuk rrëfen gjithë sa sheh syri, por zgjedh me kujdes e më pas montazhon “dublën” më të arrirë.Përshkrimi i maleve të Akrokeraunës dhe Jonit aty ndërtohet mbi dy rakurse, që poeti e përdor me vetëdije, si në vargjet e poezisë “Mali i vetëtimave”: “Kreshta përpjetë / Mbi kokë retë / Këmbët në det”. Peizazhi natyror përmbyset, për t’u shndërruar në peizazh njerëzor: “Këmbët në det / Koka te retë / Mbi kokë rrufetë!” Janë kompozime pamore të thjeshta në dukje, por të sakta, ku lartësia dhe thellësia e imazhit krijojnë tensionin ekzistencial, krijuar me vetëdijen e regjisorit: “Pamja është mahnitëse nga të dy pikëshikimet apo rakurset / do të thoshte një kineast apo piktor”, shkruhet në këtë prozë poetike.” Aty bota shihet nga dy kënde: lart dhe poshtë (det-mal / qiell-tokë.)

Kjo gjendje e bën poezinë e Anagnostit  të funksionojë si filmi poetik, ku vargu është prerje, ndalesë, fokus, detaj. Ajo që e shquan këtë libër të Anagnostit është sinqeriteti brutal, etika pa retorikë dhe moralizim. Ky sinqeriteti i pagrimuar, pa mbrojtje retorike, edhe pse shpesh qesëndisës, i dhimbshëm, por jo cinik, e bën autorin të mos i qaset lexuesit me ton predikues, por të mbërrijë si dëshmitar, i përunjur, i lodhur nga përvojat, prej të cilave lehtësohet kur i ndan me lexuesin. Moralizimi rri larg, për t’ia lënë hapsirën dëshmisë. Flitet haptazi për lodhjen, frikën, pendesën dhe vdekjen, por edhe përjetësinë, gëzimin, por edhe tragjikomedinë e lojës së jetës. E gjitha pa patetizëm, duke e ruajtur veten dhe vargun nga çdo formë sentimentalizmi.

*

Njeriu që ka jetuar gjatë zgjedh të pohojë të vërtetën e tij, jo të prodhojë vargje dhe rima. Në poezinë “U lodha”, ai shkruan si në rrëfimore, pa e mbrojtur veten nga e vërteta rraskaptëse e konvertimit njeri që gënjen e mashtron, që shtiret, flet e dëgjon, të cilin e ka lodhur edhe puna që do. “Jeta lodhje pa mbarim! Gjumi pushim! Vdekja shpëtim?” Pohimi do të ishte i rrezikshëm nëse pyetja fundore nuk do të ishte i zhveshur nga patetika. Ai e njeh jetën nga brenda, menditon mbi lodhjejen si  hipotezë, pa menduar dorëzimin, vdekjen – një takim me veten në zonë kufitare, ku ballafaqimi me të vërtetën kërkon heqjen e maskës, larg teatralitet, pa mitologji urbane.

Një qasje e tillë rri pranë njeriut të zakonshëm, një tjetër veçanti librit, dhe këtë njeri autori e njeh. Janë figurantë të jetës së përditshme: prindërit, pensionistët, gjyshër, një grua shtatzënë, saroshë hedonistë, fëmijë anonimë, vogëlushi Rei, Marigoja dhe Joni i vogël dhe “amaneti ndaj nipit të parë, binjakë, bijat, fëmijët tanë dhe të botës, testamente, dëshira, urime dhe pengje, por edhe emigrantë, tigra e zogj në kafaz, telefona që bien ose nuk bien më dhe mikroskena nga jeta përbëjnë etikën humaniste të autorit, siç lehohet në vargjet:“Kur nuk erdhën më shumë u mërzita… ‘/ Kthehuni ju lutem! / T’u kërkoj dhe ndjesë!” Ndeshim këtu poezinë etike, ku pendesa lind nga mungesa, jo nga predikimi, si përvojë intime, jashtë doktrinave. Autori i sheh vogëlsitë e jetës si metafora të mëdha të fajit të përditshëm njerëzor.

*

Duke lexuar, kupton se poezia dhe proza e këtij libri është një arkiv kujtese, që herë shprehet me rima, herë me vargje me ritëm e herë si mendim i paformatuar. Nga një vështrim tjetër “Treni AND” është libër i kujtesës kolektive, memuaristikë, që përmbledh historinë kulturore shqiptare me një lakonicitet solemn, pa folklorizëm dhe pa retorikë patriotike të zbrazët, duke bërë bashkë përditshmërinë me çaste të përjetësisë. Gjuha shqipe, Skënderbeu, Prenk Jakova, Agim Qirjaqi, Roza me “Medean” në amfiteatrot e Greqisë, diktatura, genocidi, nënshtrimin, pirati Gjon, familjarët, Kosovën, martirët e artit, fabula të vogla jete, pa lejuar që poezia e kujtesës, të shndërrohet në ideologji poetike për triumfin e jetës, si një detyrim.

Në poezinë “Gjuha shqipe” shkruhet: “Me gjak martirësh / E gatuar”, duke e përmbledhur pa retorikë folklorike, por me respekt solemn, historinë kulturore shqiptare ndaj gjuhës që, sipas autorit “bëri shtet”. Avitje të tilla, të menduara, zor se arriheshin pa një tjetër element dallues të këtij komunikimi poetik: qetësia tragjike e zërit autorial, brenda një recitali të trishtuar me njeriun “për të tjerët peng / për vete liri?!”.

Anagnosti nuk kërkon të jetë modern, as provokues. Ai shkruan si artisti-njeri, që ka parë, ka humbur dhe ka kuptuar. Nuk ngre tonin për të bërtitur, ngre fjalën, si ai që ka shndërruar jetën në përvoja. Kjo e bën të qëndrueshëm vargun e tij, ia bën të besueshme ndjenjën dhe thellësisht humane dëshirën për t’ia besuar lexuesit rrëfimin.

I organizuar në stacione jete, me titujt “Loja e jetës”, “Frymë e shpirt”, “Njerëzit vdesin, idhujt mbesin”, “Kurthi magjik”, “Treni AND”, “Pasqara qiellore, kjo vepër e pjekurisë krijuese të Dhimitër Anagnostit nuk e kërkon, por e meriton vëmendjen.

Spanja ka vendosur të mos marrë pjesë në nismën Bordi i Paqes, të krijuar nga presidenti amerikan Donald Trump.

Vendimi u njoftua nga kryeministri spanjoll Pedro Sanchez, i cili argumentoi se kjo nismë është jashtë kuadrit të Kombeve të Bashkuara dhe nuk përfshin Autoritetin Palestinez.

“Ky bord është jashtë kornizës së Kombeve të Bashkuara dhe nuk ka përfshirë Autoritetin Palestinez. E ardhmja e Gazës dhe e Bregut Perëndimor, madje e gjithë Palestinës, duhet të udhëhiqet nga vetë palestinezët, në dialog me Izraelin dhe në zbatim të zgjidhjes me dy shtete”, tha Pedro Sanchez, kryeministër i Spanjës.

Sanchez akuzoi gjithashtu administratën amerikane se po shkel ligjin ndërkombëtar dhe po dëmton rëndë marrëdhëniet transatlantike mes SHBA-ve dhe Bashkimit Europian.

“Realiteti është se qeveria e Shteteve të Bashkuara nuk po respekton ligjin ndërkombëtar dhe po e tensionon marrëdhënien mes SHBA-ve dhe Bashkimit Europian si kurrë më parë. Për këtë arsye, Europa duhet të forcohet nga brenda dhe të hapet më shumë ndaj pjesëve të tjera të botës”, tha Pedro Sanchez, kryeministër i Spanjës.

Kryeministri spanjoll theksoi se Europa kërkon një rend botëror të bazuar në rregulla, ligj ndërkombëtar dhe jo në imponim të forcës apo interesa private.

Ndërkohë, presidenti Trump tërhoqi edhe ftesën për Kanadanë, duke njoftuar publikisht në X se Otava nuk do të jetë pjesë e kësaj nisme.

Nisma Bordi i Paqes u prezantua nga Donald Trump në Forumin Ekonomik Botëror në Davos, si një strukturë që do të ndërmjetësojë armëpushime, do të organizojë sigurinë dhe rindërtimin në zonat e dala nga lufta.

Megjithatë, në ceremoninë e prezantimit munguan aleatë tradicionalë të Shteteve të Bashkuara, si Kanadaja, Britania e Madhe dhe të gjitha vendet e Bashkimit Europian, me përjashtim të Hungarisë dhe Bullgarisë.

Në bord janë përfshirë Izraeli, Katari, Arabia Saudite dhe Emiratet e Bashkuara Arabe.

Një 45-vjeçare nga Kina është proceduar penalisht pasi tentoi të dalë nga Republika e Shqipërisë me rreth 70 mijë euro të padeklaruara, përkatësisht 61 755 euro dhe 10 000 dollarë.

Paratë iu gjetën gjatë kontrollit në vijën e dytë, të cilat synonte t’i nxirrte nga Shqipëria, pa i deklaruar konform ligjit.

Autoritetet sekuestruan shumën monetare dhe po kryejnë hetimet për zbardhjen e veprimtarisë së kinezes.

Donald Trump ka shkaktuar zemërim te deputetët britanikë dhe veteranët, pasi pretendoi se trupat e NATO-s qëndruan larg vijës së frontit gjatë luftës në Afganistan, shkruan sot The Guardian.

Presidenti amerikan i bëri këto komente në një intervistë për Fox News, ku përsëriti sugjerimin e tij se NATO nuk do ta mbështeste SHBA-në nëse kjo do ta kërkonte.

Deklaratat e tij u dënuan gjerësisht nga i gjithë spektri politik në Britani, me kritikët që përmendën 457 vdekjet e britanikëve në Afganistan dhe theksuan shmangien e shërbimit ushtarak nga ana e Trump-it gjatë luftës në Vietnam.

Në total, 3,486 trupa të NATO-s humbën jetën në konfliktin 20-vjeçar, prej të cilëve 2,461 ishin personel ushtarak amerikan. Kanadaja pësoi 165 vdekje, përfshirë edhe civilë.

Danimarka, e cila ka qenë në përplasje me SHBA-në për shkak të synimeve të Trump-it ndaj Groenlandës, pati 44 vdekje luftarake në Afganistan, numri më i lartë për frymë jashtë SHBA-së.

Në intervistën për Fox News, Trump tha: “Ne kurrë nuk kemi pasur nevojë për ta. Ata do të thonë se dërguan disa trupa në Afganistan… dhe e bënë, por qëndruan pak më mbrapa, pak larg vijës së frontit.”

Calvin Bailey, deputet i Partisë Laburiste dhe ish-oficer i RAF-it që shërbeu përkrah njësive speciale amerikane në Afganistan, tha se pretendimi i Trump-it “nuk ka asnjë lidhje me realitetin e përjetuar nga ata prej nesh që shërbyen atje”.

Deputeti konservator Ben Obese-Jecty, i cili shërbeu në Afganistan si kapiten në Regjimentin Royal Yorkshire, tha se ishte “trishtuese të shihje sakrificën e kombit tonë dhe të partnerëve tanë të NATO-s të nënvlerësohej kaq shumë nga presidenti i Shteteve të Bashkuara”.

Tan Dhesi, kryetar i Komisionit të Mbrojtjes në Dhomën e Përfaqësuesve, tha se komentet e presidentit amerikan ishin “të tmerrshme dhe një fyerje për ushtarakët tanë të guximshëm britanikë, burra dhe gra, që rrezikuan jetën për të ndihmuar aleatët tanë, me shumë prej tyre që bënë sakrificën supreme”.

Kryetarja e Komisionit të Punëve të Jashtme, Emily Thornberry, i përshkroi komentet si “shumë më tepër sesa një gabim” dhe “një fyerje” ndaj familjeve të atyre që kishin humbur jetën.

SHBA mbetet i vetmi vend që ka aktivizuar ndonjëherë nenin 5 të NATO-s për sigurinë kolektive, i cili u vu në zbatim pas sulmeve terroriste të 11 shtatorit 2001.

Takimi i dytë i Platformës së Paqes së Ballkanit do të mbahet sot në Stamboll, nën mikpritjen e ministrit të Punëve të Jashtme të Turqisë, Hakan Fidan, raporton Anadolu.

Sipas informacioneve nga burime të Ministrisë së Punëve të Jashtme, takimi në fjalë pritet të organizohet me pjesëmarrjen e ministrave të Punëve të Jashtme të Shqipërisë, Bosnjë e Hercegovinës, Malit të Zi, Kosovës, Maqedonisë së Veriut dhe Serbisë. Po ashtu, është planifikuar që ministri Fidan, në margjinat e takimit, të zhvillojë edhe takime dypalëshe me homologët e tij.

Fidan pritet të vë në pah vullnetin e Turqisë për krijimin e një baze bashkëpunimi të mbështetur në projekte konkrete që do të kontribuojnë në paqen, dialogun dhe prosperitetin në Ballkan. Ai pritet të tërheqë vëmendjen për rëndësinë e zhvillimit të procesit të zgjerimit të Bashkimit Evropian (BE) në një kornizë gjithëpërfshirëse që merr parasysh ndjeshmëritë rajonale.

– Platforma e Paqes së Ballkanit

Platforma, e themeluar me nismën e Turqisë, është krijuar me qasjen e përgjegjësisë rajonale me synimin për të rritur dialogun, besimin dhe bashkëpunimin ndërmjet vendeve të rajonit dhe për të kontribuar në gjetjen e zgjidhjeve të qëndrueshme për çështjet rajonale.

Në këtë takim të Platformës, pritet të diskutohen një gamë e gjerë temash, përfshirë çështjet rajonale, menaxhimin e përbashkët të kufijve dhe luftën kundër migrimit të parregullt, bashkëpunimin dhe koordinimin në proceset e BE-së, sigurinë energjetike, digjitalizimin, industrinë, rininë, teknologjinë, korridoret e transportit dhe ndërlidhjen.

Takimi i parë i Platformës së Paqes së Ballkanit ishte mbajtur më 26 korrik 2025, gjithashtu në Stamboll.

– Bashkëpunimi shumëpalësh i Turqisë në Ballkan

Vëllimi i përgjithshëm i tregtisë së Turqisë me vendet pjesëmarrëse në Platformën e Paqes së Ballkanit është rreth 7 miliardë dollarë ndërsa investimet e saj totale në këto vende arrijnë në rreth 8.9 miliardë dollarë.

Turqia është pjesë aktive e Procesit të Bashkëpunimit të Evropës Juglindore (SEECP), i cili bashkon 13 vende të Ballkanit, duke nxitur bashkëpunimin rajonal.

Mekanizmat trepalësh të konsultimit të krijuar me nismën e Ankarasë, Turqi-Bosnjë e Hercegovinë-Kroaci dhe Turqi-Bosnjë e Hercegovinë-Serbi përbëjnë shembuj konkretë të rëndësisë që Turqia i kushton dialogut, pajtimit dhe ndërtimit të besimit në Ballkan.

Turqia vazhdon gjithashtu të kontribuojë në sigurinë dhe stabilitetin rajonal përmes pjesëmarrjes në misione ushtarake si Forca Paqeruajtëse e NATO-s në Kosovë (KFOR) dhe Misioni i Forcës Paqeruajtëse të Bashkimit Evropian në Bosnjë e Hercegovinë (EUFOR Althea).

Turqia kishte marrë për një periudhë njëvjeçare komandën e KFOR-it nga Italia në tetor 2025./AA

Ministri i Drejtësisë, Besfort Lamallari, i është drejtuar Inspektorit të Lartë të Drejtësisë (ILD) me një kërkesë zyrtare për fillimin e hetimit disiplinor ndaj gjyqtares së Gjykatës së Shkallës së Parë të Juridiksionit të Përgjithshëm Korçë, Eglantina Mikani, për shkelje të rënda procedurale në trajtimin e një çështjeje penale ndaj shtetasit R.F i akuzuar për veprën “Ndihmë për kalim të paligjshëm të kufirit”, kryer në bashkëpunim.

Sipas dokumentacionit të përcjellë nga Ministria e Drejtësisë, vendimi penal është shpallur më 14 dhjetor 2022, ndërsa vendimi i arsyetuar dhe dosja përkatëse janë depozituar në sekretarinë gjyqësore vetëm më 7 mars 2024, pra me një vonesë prej 14 muajsh e 24 ditësh, në kundërshtim flagrant me afatet e përcaktuara në Kodin e Procedurës Penale.

Ministri Lamallari vlerëson se kjo vonesë e pajustifikuar ka prodhuar pasoja konkrete juridike, pasi vendimi ka marrë formë të prerë më 20 maj 2024, duke i hequr të pandehurit mundësinë për të përfituar nga amnistia e parashikuar në ligjin nr. 33/2024.

Në kërkesën drejtuar ILD-së argumentohet se veprimet e gjyqtares bien ndesh me parashikimet e Kushtetutës të Republikës së Shqipërisë dhe me dispozitat përkatëse të Kodit të Procedurës Penale, të cilat detyrojnë gjyqtarët të shpallin dhe arsyetojnë vendimet gjyqësore brenda afateve ligjore, pa përjashtime dhe pa vonesa të pajustifikuara.

“Në zbatim të neneve 71/2 të ligjit Nr.115/2016 “Për organet e qeverisjes së sistemit të drejtësisë”, nenit 6, pika 10 e ligjit 8678/2001 “Për organizimin dhe funksionimin e Ministrisë së Drejtësisë”, i ndryshuar, dhe nenit 119/2 të ligjit Nr.96/2016, “Për statusin e gjyqtarëve dhe prokurorëve në Republikën e Shqipërisë”, kërkohet fillimi i hetimit disiplinor ndaj gjyqtares së Gjykatës së Shkallës së Parë të Juridiksionit të Përgjithshëm Korçë, Eglantina Mikani”, thuhet ndër të tjera në shkresën e firmosur nga Lamallari.

Ky është rasti i dytë që nga marrja e detyrës në të cilin Ministri i Drejtësisë, Besfort Lamallari, i drejtohet Inspektorit të Lartë të Drejtësisë për hetim disiplinor ndaj një gjyqtari për shkeljet procedurale që cenojnë të drejtat e qytetarëve dhe besimin e publikut te drejtësia. Kujtojmë që në muajin dhjetor ministri Lamallari kërkoi nga ILD hetim disiplinor për gjyqtarin e Lezhës, Ilir Përdeda, i cili gjithashtu për një vit nuk e zbardhi vendimin e dhënë prej tij.

Ministria e Drejtësisë po ndjek me vëmendje edhe raste të tjera në gjyqësor dhe do t’i adresojë menjëherë në institucionet përkatëse, duke konsideruar se respektimi i afateve procedurale dhe standardeve ligjore është thelbësor për funksionimin e shtetit të së drejtës dhe për garantimin e drejtësisë së barabartë për çdo qytetar.

Kina po përjeton një rritje më të dobët ekonomi, e njëkohësisht po bie nataliteti në nivel rekord. Deri në vitin 2100, popullsia e vendit mund të bjerë në 1.4 miliardë.

Ekonomia e Kinës po përjeton një ngadalësim të ndjeshëm të rritjes ekonomike: Sipas të dhënave nga Byroja e Statistikave të Pekinit, produkti i brendshëm bruto (PBB) u rrit me 4.5% në tremujorin e fundit të vitit 2025, krahasuar me të njëjtën periudhë të vitit të kaluar. Kjo shënoi rritjen më të dobët tremujore për ekonominë e dytë më të madhe në botë që nga fundi i kufizimeve të rrepta të vendosura për shkak të pandemisë rreth tre vjet më parë. Në tre tremujorët e mëparshëm, rritja ishte më e lartë: përkatësisht 5.4%, 5.2% dhe 4.8%.

Për të gjithë vitin 2025, u regjistrua një rritje prej 5%. Kështu, u arrit objektivi i parashikuar nga qeveria kineze prej “rreth 5%”. Por në të njëjtën kohë, kjo është një nga normat më të ulëta vjetore të rritjes në dekadat e fudit.

Tregtia e jashtme mbështet ekonominë – pavarësisht Trumpit

Ekonomistët e shohin arsyen kryesisht në kërkesën e dobët të brendshme: tregu i ngushtë i punës dhe çmimet në rënie të pasurive të paluajtshme kanë një efekt depresiv tek konsumatorët. Investimet janë ngadalësuar gjithashtu.

Investimet në asete fikse ranë me 3.8% në vitin 2025 krahasuar me vitin e kaluar. Rënia në sektorin e pasurive të paluajtshme është veçanërisht e qartë: investimet në pasuri të paluajtshme ranë me 17.2%.

Ekonomia vazhdon të mbahet e qëndrueshme nga tregtia e jashtme. Pavarësisht tensioneve të vazhdueshme me SHBA dhe pasigurive të reja në politikën tregtare, Pekini javën e kaluar njoftoi një suficit tregtar rekord prej 1.2 trilion dollarësh për vitin 2025.

Mosmarrëveshja tregtare me Uashingtonin çoi në një rënie të ndjeshme të eksporteve drejt Shteteve të Bashkuara me 20 përqind, si dhe në një rënie të importeve nga Shtetet e Bashkuara me 14.6 përqind. Megjithatë, tregjet e tjera ishin në gjendje të kompensonin këto humbje.

Ekspertët: Ngadalësimi i rritjes do të vazhdojë

Organizatat ndërkombëtare presin një ngadalësim të mëtejshëm të rritjes ekonomike të Kinës në vitet e ardhshme. Banka Botërore parashikon një rritje prej rreth 4.4% për vitin 2026, ndërsa Fondi Monetar Ndërkombëtar – rreth 4.5%. Banka amerikane e investimeve Goldman Sachs është pak më optimiste me një parashikim prej 4.8%, por gjithashtu thekson se eksportet e qëndrueshme ka të ngjarë të mbeten shtylla kryesore.

Në të njëjtën kohë, Goldman Sachs paralajmëron për problemet e vazhdueshme strukturore.

Në Kinë, ndërtimi i një ekonomie të drejtuar nga konsumi dhe shërbimet do të zgjasë “vite, nëse jo dekada”, shkroi në një analizë të kohëve të fundit kryeekonomisti i bankës për Kinën, Hui Shan.

Përveç kësaj, sektori i pasurive të paluajtshme ende nuk ka arritur nivelin më të ulët dhe tregu i dobët i punës vazhdon të ulë blerjet tek familjet.

Kriza demografike – rënia rekord e lindjeve

Kësaj i shtohet edhe kriza demografike. Sipas shifrave zyrtare, popullsia e Kinës ra me 3.39 milionë në vitin 2025, në 1.405 miliardë sot. Kjo shënon vitin e katërt radhazi të rënies dhe rënia është përshpejtuar. Ndërsa numri i vdekjeve është rritur në 11.31 milionë, numri i lindjeve ka rënë në një nivel rekord prej 7.92 milionë.

Sot, lindin vetëm 5.63 fëmijë për 1,000 banorë. Kjo është shifra më e ulët që nga themelimi i Republikës Popullore të Kinës në vitin 1949. Disa nga arsyet për këtë janë kostoja e lartë e rritjes së fëmijëve, strehimi i shtrenjtë, por edhe pasiguria ekonomike midis të rinjve. Numri i dasmave gjithashtu vazhdon të bjerë.

Në vitin 2016, qeveria kineze shfuqizoi të ashtuquajturën politikë të një fëmije, e cila u prezantua në fillim të viteve 1980 për të kontrolluar rritjen e shpejtë të popullsisë. Nga viti 2021, çiftet lejohen të kenë tre fëmijë. Megjithatë, OKB-ja pret që popullsia e Kinës të tkurret nga 1.4 miliardë në 800 milionë deri në vitin 2100. Për të siguruar një fuqi punëtore të mjaftueshme, qeveria planifikon të rrisë gradualisht moshën e daljes në pension.

Ky zhvillim i ndërlikon planet e Pekinit për të rritur konsumin e brendshëm. Humbja e afërt e qindra miliona punëtorëve po ushtron presion shtesë mbi fondet e pensioneve tashmë të shteruara.

Autoritetet greke kanë zbardhur një ngjarje të rëndë kriminale të ndodhur në Athinë, ku më 7 tetor 2025 shpërtheu një mjet shpërthyes artizanal jashtë një lokali, duke lënë të plagosur lehtë një person dhe duke shkaktuar dëme materiale.

Sipas njoftimit zyrtar të Drejtorisë për Luftën kundër Krimit të Organizuar, nga hetimet e Seksionit për Luftën kundër Zhvatjeve u identifikuan dhe u arrestuan dy vëllezër shqiptarë, 41 dhe 32 vjeç, gjatë një operacioni të koordinuar të zhvilluar më 22 janar 2026 në zonën e Keracinit. Arrestimi u krye me mbështetjen e njësive të inteligjencës dhe ndërhyrjes speciale.

Dy të arrestuarit akuzohen, sipas rastit, për organizatë kriminale, shpërthim, ndërtim dhe posedim të lëndëve shpërthyese, shkatërrim prone, dhunë ndaj punonjësve të rendit, si dhe shkelje të ligjit për armët dhe emigracionin. Ndaj njërit prej tyre rezultoi gjithashtu në fuqi një urdhër arresti për grabitje dhe shkelje të kushteve të qëndrimit.

Në dosje është përfshirë edhe një grua 44-vjeçare, shtetase greke, e dyshuar si bashkëpunëtore, e cila dyshohet se u kishte vënë në dispozicion automjetin e përdorur gjatë atentatit.

Nga hetimet rezulton se 32-vjeçari vendosi dhe aktivizoi mjetin shpërthyes, ndërsa 41-vjeçari e priste në automjet për t’u larguar nga vendngjarja. Gjatë kontrolleve, policia sekuestroi telefona celularë, pajisje elektronike, shënime, veshje të përdorura në krim dhe automjetin.

Ministrja për Evropën dhe Punët e Jashtme, Elisa Spiropali ndodhet në Stamboll ku do të marrë pjesë në Takimin e Dytë të Ministrave të Jashtëm të Platformës për Paqe Ballkanike, me ftesë të homologut të saj turk Hakan Fidan.

Platforma është një iniciativë e Ministrit të Jashtëm të Turqisë me fokus zgjerimin e bashkëpunimit dypalësh dhe rajonal në të gjitha fushat me interes të përbashkët, shkëmbimin e pikëpamjeve mbi ndërlidhjen e infrastrukturës, sigurinë energjetike, rritjen e bashkëpunimit ekonomik dhe mbrojtjes.

Përpara takimit të nivelit të lartë, Ministrja Spiropali u prit në një takim nga Ministri Hakan Fidan, me fokus thellimin e mëtejshëm të bashkëpunimit dypalësh në fushat me interes të përbashkët.

Spiropali theksoi se “partneriteti strategjik në rritje mes Shqipërisë dhe Turqisë do të marrë një tjetër peshë me takimin e tretë të Këshillit të Nivelit të Lartë për bashkëpunimin ndërsektorial mes dy vendeve tona përgjatë këtij viti.”

“Mbajtja e Samitit të NATO-s këtë vit në Ankara dhe vitin tjetër në Tiranë, është një mundësi e jashtëzakonshme për të forcuar më tej bashkëpunimin mes dy vendeve mike”, tha Spiropali.

Në kushtet aktuale të zhvillimeve gjeopolitike në kontinent por edhe me gjerë, të dy ministrat vlerësuan rëndësinë e rritjes dhe forcimit të bashkëpunimit për çështjet e sigurisë në rajon.

Gjatë kësaj vizite, Spiropali do të pritet edhe nga Presidenti i Republikës së Turqisë, Recep Tayyip Erdogan.

Nga Ervis Iljazaj

Parlamenti i Shqipërisë ka votuar pjesëmarrjen në Bordin e Paqes për zgjidhjen e krizës së Gazës, me një konsensus bipartizan. Përtej qeverisë, e cila sapo mori ftesën nuk nguroi ta shpallë angazhimin e saj të menjëhershëm nëpërmjet një statusi në rrjetet sociale të Kryeminsitrit Rama, edhe Partia Demokratike e shpalli dakordësinë e saj. Në fakt, opozita shqiptare, si pasojë e retorikës së saj pro Trumpiste, nuk mund të sillej ndryshe dhe nuk kishte pothuajse asnjë kritikë për qeverinë, asnjë analizë se cfarë është ky Bord dhe cfarë sjell për Shqipërinë dhe politikën e saj të jashtme.

Sepse, pjesëmarrja e Shqipërisë në këtë Bord, sigurisht që ka një ndikim në politikën e jashtme të Shqipërisë dhe strategjisë së saj. Po të shikosh se cilët shtete morën pjesë, do të vihet re se vendet kryesore të Europës si Spanja, Franca, Britania, Gjermania apo edhe Italia, ose nuk kanë marrë pjese ose nuk kanë mbajtur një qëndrim të qartë për këtë cështje. I vetmi që e firmosi menjëherë këtë anëtarësim ishte Viktor Orban, i cili nuk shquhet si ndonjë proeuropian i madh. Në firmosjen e anëtarësimit që u zhvillua live, pothuasje asnjë nga përfaqësuesit e vendeve kryesore të BE nuk ishte prezent.

Në përgjithësi, Bashkimi Europian ka qenë kundra këtyre instrumentave ndërkombëtar për zgjidhje të krizave politike apo humanitare me arsyetimin se këto janë instrumenta që i mbivendosen rendit aktual të organizatave ndërkombëtare si OKB, brenda të cilave janë gjetur zgjidhjet ndërkombëtare. Ndërkohë që Donal Trump me veprime të të tilla de facto është duke e zëvendësuar rendin aktual me instrumenta të ideura dhe konceptuara prejt tij.

Në këtë rast, Shqipëria zgjodhi politikën e jashtme të Shteteve të Bashkuara të Amerikës dhe jo atë të Europës. Këtë zgjedhje vendi ynë do të duhet ta bëjë gjithmonë e më shumë në të ardhemen, të paktën për sa i përket politikës së jashtme. Është fare e qartë se aleanca euroatlantike është në një krizë të thellë që kur Donald Trump u zgjodh në mandatin e tij të dytë në Shtëpinë e Bardhë. Mosmarrëveshjet midis Europës dhe Amerikës në këto momente kanë arritur ndoshta pikën më të lartë që pas Luftës së Dytë Botërore. Në shumë cëshjte që nga siguria, ekonomia apo e drejta ndërkombëtare, Trump dhe Europa kanë mendime të ndryshme. Aq të thella janë këto mosmarrëveshje saqë shumë ekspertë të fushës e konsiderojnë si një carje të pakthyeshme këtë aleancë. Madje, vënë në diskutim edhe ekzistencën dhe vashdimësinë e NATOS apo marrëveshje të tilla. Si të thuash, bota që kërkon të krijojë Trump, është toalisht e ndryshme nga ajo që ekziston sot dhe padyshim që kjo vendos në pikëpyetje qëndrimet europiane të cilat po shfaqen publiksiht nga liderë të ndryshëm. Mjafton të dëgjosh fjalimin e Presidenti të Francës ne Davos për të kuptuar se në cfarë pike janë këto marrëdhënie.

Shqipëria padyshim që ndodhet midis dy aletëve të saj historik, që tashmë nuk e mendojnë njësoj për sa i përket cështjeve ndërkombëtare. Bordi i Paqes ishte jë test i parë i dilemave që do të ketë Shqipëria në të ardhmen për sa i përket vendimeve të saj, ku do të duhet të zgjedin midis Europës dhe Amerikës.

Megjithatë, askush nuk e bënë këtë analizë dhe këto qëndrime kaq të rëndësishme nuk bëhen fare pjesë e debatit publik. Ndërkohë që marrëdhëniet me SHBA janë kryefjala kudo në Europë. Shtetet e Bashkuara kanë qenë dhe janë aleati ynë kryesor dhe kontribuesi kryesor i sigurisë së kombit Shiptar deri më sot, por ajo botë ka ekzistuar der më sot, nuk dihet ende nëse do të ekzistojë më. Prandaj, është e rëndësishme që vendimet që përcaktojnë strategjinë tonë kombëtare duhet të jenë të matura dhe kërkohet një reflektim i thellë për botën e re që kemi pëprara.

Kesaj herë, Kosova dhe Shqipëria zgjodhën Amerikën, por në të ardhmen, duke qenë se ne bëjmë pjesë në Kontinentin Europian dhe jemi në proces integrimi, zgjedhja nuk do të jetë kaq e lehtë. Të paktën, mos të jenë vendime të marra me kaq ngut.

Ministri i Shtetit për Marrëdhëniet me Parlamentin, Toni Gogu ka deklaruar se prania e Ivanka Trump sonte në Kryeministri përbën një sinjal të fortë politik dhe njerëzor të besimit që Presidenti i SHBA-ve, Donald Trump, ka ndaj kryeministrit Edi Rama.

Duke folur në emisionin “Top Story” në Top Channel, ministri Gogu theksoi se ftesa për Shqipërinë dhe për Ramën ka qenë personale dhe e drejtpërdrejtë nga Presidenti Trump, çka sipas tij rrëzon pretendimet e opozitës se kryeministri është “i padëshiruar” në arenën ndërkombëtare.

“Presidenti Trump i ka besuar një miku të vet që të mirëpresë vajzën e tij në vendin e tij, në shtëpinë e tij. Sot, vajza e Presidentit amerikan, një nga personat më të afërt të tij në botë, ndodhet me kryeministrin”, u shpreh Gogu.

Ai shtoi se nga pikëpamja njerëzore, ky është një akt që flet vetë për nivelin e marrëdhënies mes dy liderëve, duke e cilësuar si një besim që nuk i jepet lehtë askujt.

Sipas Gogut, prania e Ivanka Trump në Tiranë dhe konkretisht sonte në Kryeministri bie ndesh me narrativën e opozitës, e cila njëkohësisht e cilëson Ramën si të padëshiruar dhe pretendon se ai nuk ka pasur rol në proceset ndërkombëtare të fundit.

“Faktet tregojnë të kundërtën. Sot kryeministri nuk është i padëshiruar, por i dëshiruar.”, deklaroi Gogu, duke theksuar se Shqipëria ka vepruar në përputhje të plotë me Kushtetutën dhe ligjin në procesin e përfshirjes në Bordin e Paqes. “Opozita i bën të dyja dhe e thotë që kryeministri nuk është i dëshiruar, ndërkohë që vajza e një pjesëtari të familjes Trump është sot me të, dje dhe sot, dhe nga ana tjetër thotë që shiko se kryeministri nuk shkoi në Davos sepse nuk ishte i ftuar, ndërkohë që kryeministri ka udhëhequr ashtu siç e ngarkon Kushtetuta, ashtu siç e ngarkon ligji gjithë ekipin e vet që ta përmbushë me sukses këtë akt final të pjesëmarrjes së Shqipërisë në Bordin e Paqes.”

Nga Ylli Manjani

Kam patur idenë, nisur edhe nga raportime gjithfarësh ne media (gabim i madh ky), se zonja Gjoka kërkonte letra greke. Por faktet e zbuluara edhe nga hetimi i Prokurorisë së Përgjithshme, tregojnë një gjë tjetër.

Me pak fjalë:

Zonja Gjoka si çdo qytetar tjetër ka dashur të kalojë krishtlindjet në Greqi në dhjetor të vitit 2002. Autoritetet kufitare greke nuk e kanë lejuar të hyjë me arsyetimin se viza kishte skaduar.

Një vit më vonë, zonja ka marrë një vizë të rregullt në konsullatën e Greqisë dhe ka tentuar të shkojë përsëri për krishtlindje atje.

Përsëri autoritetet Greke nuk e kanë lejuar të hyjë, pa ndonjë shpjegim bindës.

Kaq janë ngjarjet në dijeninë e zonjës Gjoka, e cila ka caktuar një shtetas grek të ndjekë në autoritetet e Athinës dhe të kundërshtojë ndalimin administrativ të hyrjes së saj në Greqi.

Ndërkohë, pa e ditur ajo, në gjykatën e Janinës zhvillohet një proçes, pa proçes, pa palë e madje edhe pa avokat kryesisht. Gjykata atje ka dhënë një vendim dënimi prej 3 muaj dhe gjonë me 1500 euro. Vendimi është i vitit 2005.

Për atë vendim zonja Gjoka nuk ka patur dijeni që ekziston deri në ditët e sotme. Në të vërtetë mosdijenia e saj provohet me faktin se ai vendim atje kurrë nuk hyri në fuqi. Madje sipas ligjit Grek vendime të tilla shpallen të paekzekutuara dhe pas 18 muajsh shuhen si të tilla, pa u regjistruar në regjistrin e dënimeve penale

Pra zonja Gjoka figuron e padënuar edhe në Greqi.

Duke mos patur dijeni, sigurisht ska patur as çfarë të deklarojë në formularët e vettingut. Ndalimi i hyrjes në 2002 dhe 2003 nuk ishte i detyrueshëm për deklarim sepse nuk ishte episod i 10 viteve të fundit, siç e kërkonte ligji.

Kjo është shkurtimisht ngjarja e provuar tashmë me fakte.

Tani në këto rrethana, KLGJ duhet ta mbrojë gjyqtaren nga një sulm i padrejtë që i ka bërë një shtet tjetër. Duhet ta bëjë jo thjesht për sovranitet, por për dinjitet.

KLGJ Duhet ta mbrojë gjytaren nga hakmarrja e turmës inatçore. Duhet ta mbrojë gjytaren nga inatet e palëve gjyqsore, të cilët në shenjë pakënaqësie për vendimet e saj gjuajnë me situata të tilla, krejt fatkeqe që u ndodhin shqiptarëve rregullisht në kufinjtë e shteteve të tjera.

Ajo nuk ka kryer asnjë krim askund. Nuk është dënuar as në Shqipëri e as në Greqi.

Duke mbrojtur gjyqtaren nga një sulm i tillë, mbrohen shumë qytetarë të tjerë shqiptarë që Greqia dhe Italia i ka dënuar pa proçes e pa dijeni. Çdo shqiptar ka nevojë për mbrojtjen e shtetit të vet nga vendime abuzive. Rasti i Irena Gjokës është një arsye për të mbrojtur shqiptarët, jo për ti dënuar më tej ato.

Duke mbrojtur gjyqtaren mbrohet shteti, e drejta dhe një standart që ne po e kërkojmë edhe për qytetarët e thjeshtë.

Nuk ka dënime të rregullta me proçese pas shpine, pa proçes dhe madje edhe pa avokat kryesisht.

Kjo nuk e bën aspak imune gjyqtaren Gjoka nga hetimet dhe inspektimet për vendimet që ajo jep.

Por historitë personale të së shkuarës, që ligjërisht janë parashkruar, janë dëshmi e gjallë se si ndaj nesh shtetet e tjera kanë abuzuar.

Një shtet normal e mbron shtetasin e vet, jo ta sulmojë. Greqia e mbron grekun, nuk e sulmon për llogari të shqiptarit….

Policisë Bashkiake do t’i shtohen kompetencat, kështu parashikohet në projektligjin e ri për këtë institucion, raportojnë mediat.

Policia Bashkiake parashikohet të jetë një polici mbështetëse për Policinë e Shtetit në fushën e rendit dhe sigurisë.

Policia Bashkiake do të jetë më e angazhuar për rendin dhe sigurinë, për këtë arsye në projektligj është parashikuar që Drejtori i Përgjithshëm i Policisë Bashkiake do të jetë në varësi të ministrit të Brendshëm.

Struktura e Policisë Bashkiake do të jetë e ndërtuar pak a shumë si ajo e Policisë së Shtetit në fushën e rendit.

Shtetet e Bashkuara kanë përfunduar zyrtarisht tërheqjen nga Organizata Botërore e Shëndetësisë (OBSH), duke finalizuar një objektiv të kahershëm të presidentit Donald Trump. Lajmi u konfirmua të enjten nga Departamenti Amerikan i Shëndetësisë dhe Shërbimeve Njerëzore (HHS), i cili njoftoi se të gjitha fondet amerikane për OBSH-në janë ndërprerë dhe se personeli amerikan i angazhuar në këtë organizatë është tërhequr.

“Ky vendim përmbush angazhimin e Presidentit Trump përmes një urdhri ekzekutiv të firmosur një vit më parë, për shkak të keqmenaxhimit nga OBSH të pandemisë Covid-19 dhe mungesën e vazhdueshme të reformave, llogaridhënies dhe transparencës”, tha Shtëpia e Bardhë.

SHBA i detyrohet ende OBSH-së rreth 260 milionë dollarë, por sipas ekspertëve ligjorë, është e pamundur që OBSH ta detyrojë Uashingtonin të shlyejë këto detyrime financiare.

Administrata Trump e justifikon largimin me pretendimin se OBSH ka dështuar gjatë pandemisë së Covid-19, duke vonuar shpalljen e emergjencës globale dhe duke, sipas saj, minimizuar rreziqe kyçe si përhapja ajrore e virusit dhe transmetimi nga persona pa simptoma. Zyrtarët amerikanë thonë se organizata ka vepruar në kundërshtim me interesat e SHBA-së dhe ka lavdëruar pa kritika reagimin e Kinës.

Megjithatë, ekspertë të shëndetit publik paralajmërojnë se ky vendim mund të ketë pasoja serioze globale dhe kombëtare. Ata theksojnë se largimi nga OBSH dobëson bashkëpunimin ndërkombëtar, kufizon aksesin në të dhëna jetike epidemiologjike dhe e bën SHBA-në më të pambrojtur përballë pandemive të ardhshme. OBSH e ka quajtur këtë tërheqje një situatë “nga ku humbin të gjithë”.

Baton Haxhiu, i ftuar në emisionin “Të Paekspozuarit” në MCN TV, komentoi ndikimin e mundshëm që mund të ketë në hetimet e SPAk ndaj qeverisë, ftesa e Trump për Ramën në Bordin e Paqes dhe një kurs që duket i ndryshuar në raportet mes Ramës dhe amerikanëve.

“Ne nuk mund të themi që kjo nuk është një frymëmarrje e jashtëzakonshme e qeverisë Rama nga kjo letër. Edhe pse beteja me SPAK kishte filluar në fund të dhjetorit, fillim të janarit. Nuk besoj se me SPAK do të ketë mbështetjen amerikane, sepse amerikanët nuk janë aty mbrapa, njerëzit e FBI largohen, projekti europian përfundon në 20 maj.

Nuk besoj, ndoshta Trump ndërron mendje rrugës, por besoj se edhe ata njerëz të ambasadës që i takojnë administratës së kaluar, kanë qenë më të rëndë se kjo administratë, kanë patur një proces të ndërtimi të disa vlerave.

Ushtruesja e detyrës besoj do të shkojë në 20 maj bashkë me zëvendësen e saj, për të cilën ka pakënaqësi edhe në Amerikë. Kjo ambasadë do ta ketë fundin në maj dhe SPAK do ta bëjë betejën vetë, deri në fund të vitit pasi mbaron mandati dhe kthehen në prokurori normale.

Pak a shumë kjo mendoj se do të ndodhë. SPAK do ta bëjë luftën vetë, siç e ka bërë në luftën e fundit.

Mendoj se kryetari i SPAK është njeri dinjitoz, mendoj se situata në krejt sistemin gjyqësor do të jetë krejt ndryshe”, tha Haxhiu.