Inspektorati Qendror i Mbikëqyrjes së Tregut, që vepron në kuadër të Ministrisë së Industrisë, Ndërmarrësisë dhe Tregtisë, ka realizuar një aksion të gjerë inspektues në bashkëpunim me Policinë e Kosovës, Administratën Tatimore të Kosovës dhe Inspektoratin Qendror të Punës.

Qëllimi i aksionit ishte sigurimi i respektimit të standardeve ligjore, mbrojtja e konsumatorëve, garantimi i konkurrencës së ndershme dhe verifikimi i përmbushjes së obligimeve ligjore nga subjektet ekonomike.

Gjatë këtij operacioni janë inspektuar 69 subjekte ekonomike, me fokus të veçantë në bizneset që ushtrojnë veprimtari në fushën e hotelerisë dhe turizmit, përfshirë vilat dhe motelet në territorin e Republikës së Kosovës.

Në bazë të kompetencave ligjore, inspektorët e Inspektoratit Qendror të Mbikëqyrjes së Tregut kanë urdhëruar mbylljen e përkohshme të 26 subjekteve ekonomike, kryesisht për mosregjistrim të bizneseve dhe mungesë të pëlqimeve apo aktvendimeve që dëshmojnë plotësimin e kushteve minimale teknike.

Ndaj operatorëve ekonomikë që ushtronin aktivitetin e tyre në kundërshtim me legjislacionin në fuqi, janë shqiptuar gjithsej 27 masa ndëshkuese.

Inspektorati Qendror i Mbikëqyrjes së Tregut ka bërë të ditur se veprimtari të ngjashme inspektuese do të vazhdojnë edhe në të ardhmen, me qëllim forcimin e sundimit të ligjit dhe krijimin e një mjedisi të sigurt, të rregullt dhe transparent për zhvillimin e veprimtarive ekonomike në Republikën e Kosovës./Telegrafi/

Një ish-pjesëtar i Ushtrisë Çlirimtare të Kosovës, shtetas i Kosovës, është arrestuar nga autoritetet në Serbi paraditen e 5 shkurtit, thanë nga Organizata e Veteranëve të Luftës së Ushtrisë Çlirimtare të Kosovës (OVL UÇK) dhe avokati Arianti Koci.

Nënkryetari i OVL të UÇK-së, Gazmend Syla, tha për Radion Evropa e Lirë se Lozhani u arrestua në kufirin mes Serbisë dhe Kroacisë dhe gjatë kontrollit i është gjetur në xhep kartela e anëtarësisë së veteranit të UÇK-së.

Syla shtoi se ai ka marrë pjesë në disa stërvitje në Shqipëri dhe nuk ka informacione të ketë qenë në vijat e frontit në Kosovë.

Ndërkaq, Koci tha se arrestimi ndodhi rreth orës 11:00 të 5 shkurtit.

Arrestohet në Serbi një tjetër qytetar i Kosovës, Koci: Po bëhet shqetësuese

Sipas tij, ky rast nuk është i izoluar, pasi arrestime të shtetasve të Kosovës që kalojnë nëpër Serbi po përsëriten.

Koci kërkoi nga autoritetet e Kosovës që të reagojnë për këto arrestime, pa përjashtuar edhe masa politike, “përfshirë edhe mbylljen 24-orëshe të kufirit, nëse arrestimet vazhdojnë”.

“Nga ana ime në cilësinë e avokatit, po bëhet maksimumi i mundshëm. Megjithatë, mbrojtja efektive e qytetarëve të Kosovës nuk mund të mbetet vetëm në nivel individual. Kjo është përgjegjësi e shtetit, brenda dhe jashtë kufijve të tij”, shkroi ai.

Nga Ministria e Punëve të Jashtme dhe Diasporës ende nuk kanë reaguar për këtë rast.

Ende nuk dihet se nën çfarë pretendimesh është arrestuar Lozhani./Radio Evropa e Lirë/

Në gjykatën e Posaçme, Henrik Hoxhaj, i pandehur në dosjen “Plumbi i artë”, rrëfeu detaje për një porosi për vrasjen e Sokol Sanxhaktarit.

Ai tregoi se gjatë përgatitjeve për vrasjen e vëllezërve Haxhia, kishte diskutuar me Nuredin Dumanin për një tjetër “punë”, ku i ishte ofruar një shumë prej 200 mijë eurosh për të goditur Sanxhaktarin.

Hoxhaj tha se nuk ishte i interesuar dhe se nuk e dinte kush ishte investitori, vetëm se, sipas Dumanit, kishte të bënte me dhëndrin e kryetarit të Bashkisë së Elbasanit. Ai nuk mbajti mend të ishte përmendur emri Suel Çela dhe nuk mori pjesë në ngjarje.

“Ndërsa po përgatitesha për vrasjen e vëllezërve Haxhia, diskutuam me Nuredin Dumanin për një punë tjetër. Ai fliste në telefon gjithë kohën. Kishte ditëlindjen atë dite. Nuk e di me kë. Më tha për Sokol Sanxhaktarin”.

Prokurori: Kush ishte i interesuar për të goditur Sokol Sanxhaktarin?

Henrik Hoxhaj: Unë kam marrë një ofertë, tha Nuredin Dumani, për Sokol Sanxhaktarin. Më tha se do bënim takim. Jepeshin 200 mijë euro. Më pyeti nëse isha i interesuar. Por mbeti këtu, nuk u bë më shumë muhabet. Nuk më tha kush ishte investitori. Nuk më është përmendur Suel Çela. Më tha se është dhëndri i kryetarit të Bashkisë së Elbasanit. Nuk më tha pse, o prokuror. Nuk mbaj mend të jetë përmendur më.

Prokurori: Një Bledar Muça, a ju ka thënë ndonjë gjë Nuredini?

Henrik Hoxhaj: Jo. Nuk kam qenë i interesuar. Nuk u morëm më me Sokolin, se u morëm me atë çfarë ishim aty.

Ditën e arrestimit të Sokolit nuk e di a kam biseduar apo jo, se nuk më ka interesuar.

Prokurori: Në 30 korrik 2020, kur Sokol Sanxhaktari vrau Florian Lamçen, Nuredini të ka shkruar ty: “Na humbën 200 mijë euro.”

Hoxhaj: Po, se nuk u mbarua puna, pra.

Drejtoria Rajonale e Policisë në Prishtinë ka njoftuar sot se, falë reagimit të menjëhershëm, veprimeve të koordinuara operative dhe hetimeve intensive, ka arritur të identifikojë, ndalojë dhe procedojë të gjithë personat e përfshirë në një incident të rëndë që rrezikoi drejtpërdrejt jetën e qytetarëve dhe sigurinë publike në Vranjevc të Prishtinës.

Më 31 janar 2026, rreth orës 15:15, Policia e Kosovës ka pranuar informacione për të shtëna me armë zjarri në rrugën “Fahri Fazliu” në Prishtinë.

Hetimet e para zbuluan se, pas një konflikti ndërmjet dy grupe personash, situata ka eskaluar në përdorimin e armëve pranë një lokali afarist, duke krijuar rrezik të lartë për qytetarët dhe pronën publike.

Incidenti është zhvendosur më pas në një lokacion tjetër të qytetit, ku një veturë është përdorur si mjet rrezikimi ndaj personave, duke lënduar disa qytetarë.

Po ashtu, dyshohet se nga vetura në lëvizje janë kryer të shtëna të tjera me armë zjarri.

Të shtënat te Kodra e Trimave në Prishtinë, pamje nga momenti i goditjes së turmës me veturë

Në vendngjarje janë kryer ekzaminime të plota kriminalistike dhe forenzike, nga ku policia ka sekuestruar: gëzhoja dhe fragmente predhash, municion, mjete të forta, veturën e dyshuar të përfshirë në rast.

Hetimet janë zhvilluar në koordinim të plotë me Prokurorinë e Shtetit dhe është iniciuar procedurë në drejtim të veprave penale:

Vrasje në tentativë, shkaktim i rrezikut të përgjithshëm, mbajtje e paautorizuar e armëve.

Masat dhe veprimet hetimore të ndërmarra: Janë identifikuar dhe intervistuar të gjithë personat relevantë, janë siguruar video-incizime nga kamerat e sigurisë dhe prova të tjera materiale, janë kryer tri bastisje në lokacione të ndryshme dhe janë konfiskuar dy armë zjarri dhe prova shtesë të rëndësishme.

Poashtu janë identifikuar gjithsej pesë persona të dyshuar; njëri prej tyre, me inicialet A.T., është arrestuar dhe ndodhet në paraburgim prej 30 ditësh, ndërsa katër të tjerët janë liruar në procedurë të rregullt.

Policia e Kosovës rithekson përkushtimin e saj për garantimin e rendit, ligjit dhe sigurisë publike, duke deklaruar se nuk do të tolerojë asnjë formë dhune apo rrezikimi të jetës së qytetarëve./Telegrafi/

Avokati Arianit Koci ka bërë të ditur se sot rreth orës 11:00, gjatë kalimit transit nëpër territorin e Serbisë, është ndaluar dhe arrestuar shtetasi i Kosovës, Mit’hat Lozhani.

Sipas tij, ky nuk është një rast i izoluar, pasi raste të tilla po përsëriten dhe po krijojnë pasiguri për qytetarët e Kosovës që udhëtojnë nëpër Serbi.

“Arrestimet e shtetasve të Kosovës gjatë transitit nëpër Serbi po përsëriten dhe kjo po krijon pasiguri reale për këdo që udhëton përmes atij territori. Këto arrestime duhet të ndalen”, ka deklaruar Koci.

Ai theksoi se institucionet e Kosovës kanë obligim që këtë situatë ta trajtojnë si çështje serioze të sigurisë së qytetarëve. Sipas tij, duhet kërkuar ndërmjetësimin e bashkësisë ndërkombëtare, ndërsa diplomacia kosovare duhet të reagojë fuqishëm.

Koci ka përmendur se nëse praktika e arrestimeve vazhdon, nuk duhet të përjashtohen masa konkrete politike, “përfshirë edhe mbylljen 24-orëshe të kufirit”.

Në fund, avokati theksoi se ndonëse ai, në cilësinë e mbrojtësit, po bën maksimumin e mundshëm, mbrojtja efektive e qytetarëve të Kosovës nuk mund të mbetet në nivel individual. “Kjo është përgjegjësi e shtetit, brenda dhe jashtë kufijve të tij”, u shpreh Koci./Telegrafi/

Në kuadër të angazhimeve të vazhdueshme për parandalimin e dukurive negative dhe rritjen e sigurisë në shkolla dhe përreth tyre, Policia në Vushtrri në bazë urdhëresës së lëshuar nga Gjykata ka realizuar kontrolle në gjashtë shkolla (të mesme të larta dhe të ulëta) në territorin e komunës.

Sipas njoftimit të lëshuar nga policia, gjatë realizimit të kontrolleve policore, në katër raste të ndara tek nxënës të ndryshëm janë gjetur dhe sekuestruar mjete të kundërligjshme, si një boks hekuri dhe tri mjete të mprehta (thika).

“Lidhur me rastet janë ndërmarrë veprimet e nevojshme policore, në koordinim me institucionet përkatëse. Policia do të vazhdojë me aktivitete parandaluese me qëllim të ofrimit të sigurisë në ambientet shkollore dhe ruajtjes së rendit dhe qetësisë publike”, thuhet në njoftim.

Presidentja e Republikës së Kosovës, Vjosa Osmani, gjatë pjesëmarrjes në Samitin Botëror të Qeverisjes në Emiratet e Bashkuara Arabe, ka zhvilluar disa takime bilaterale me udhëheqës të vendeve pjesëmarrëse.

Presidentja Osmani u takua me Kryeministren e Mozambikut, Maria Benvinda Levy, me të cilën zhvilloi një diskutim, siç e përshkroi ajo, “përmbajtësor” mbi sfidat e përbashkëta dhe rëndësinë e bashkëpunimit ndërmjet dy shteteve. Ajo theksoi se partneritetet ndërkombëtare janë kyçe për adresimin e çështjeve globale dhe forcimin e marrëdhënieve dypalëshe.

Gjatë samitit, Presidentja Osmani u takua edhe me Kryeministrin e Mbretërisë së Eswatinit, Russell Mmiso Dlamini. Ajo shprehu mirënjohjen e popullit të Kosovës për njohjen e hershme të pavarësisë nga Eswatini dhe ritheksoi përkushtimin për forcim të bashkëpunimit në fusha me interes të ndërsjellë.

Në njoftimin e saj, Presidentja Osmani theksoi se diskutimet përfshinë edhe mundësinë e lidhjes së marrëveshjeve konkrete, si dhe nevojën për koordinim më të ngushtë në forume multilaterale.

Sipas saj, Kosova mbetet e përkushtuar ndaj partneriteteve të ndërtuara mbi respekt të ndërsjellë dhe një vizion të përbashkët për paqe dhe zhvillim./Telegrafi/

Juglindja e Shqipërisë po përjeton prej disa orësh një situatë të shtuar sizmike, me lëkundje të njëpasnjëshme që po mbahen nën vëzhgim nga specialistët dhe autoritetet.

Tërmeti më i fundit është regjistruar pak minuta më parë dhe i është shtuar serisë së goditjeve të lehta, që janë ndjerë në këtë zonë gjatë ditës së sotme, 5 shkurt.

Sipas të dhënave paraprake të publikuara nga instituti sizmologjik, lëkundja ka pasur një magnitudë 3.2 ballë të shkallës Rihter, ndërsa epiqendra është identifikuar në fshatin Hoçisht, në bashkinë Devoll.

Thellësia e tërmetit raportohet të ketë qenë relativisht e vogël, çka ka bërë që lëkundjet të ndihen nga banorët përreth, megjithëse me intensitet të ulët.

Autoritetet lokale dhe strukturat e emergjencave civile janë në ndjekje të vazhdueshme të situatës. Ato konfirmojnë se, për momentin, nuk ka të dhëna për persona të lënduar apo pasoja materiale, ndërsa monitorimi do të vijojë për çdo ndryshim të mundshëm. Gjatë ditës së djeshme, 4 shkurt, një tërmet u regjistrua në Korçë.

Analistët kanë komentuar Kuvendin e LDK-së, Dobësia buron nga humbja zgjedhore, jo nga procesi i brendshëm.

Analisti politik Ylli Hoxha ka deklaruar në emisionin Debat Plus në RTV Dukagjini se Lidhja Demokratike e Kosovës (LDK) është më e dobët jo për shkak të Kuvendit partiak, por si pasojë e rezultatit zgjedhor të 28 dhjetorit.

Sipas tij, problemi kryesor i LDK-së lidhet me humbjen në zgjedhje dhe jo me mënyrën e organizimit të Kuvendit.

Hoxha ka vlerësuar se rizgjedhja e Lumir Abdixhikut në krye të LDK-së nuk ka ardhur sepse ai ka qenë domosdoshmërisht opsioni më i mirë, por për shkak të mungesës së alternativave të tjera brenda partisë.

“LDK-ja është më e dobët jo për shkak të Kuvendit, por për shkak të rezultatit të zgjedhjeve të 28 dhjetorit”, ka thënë Hoxha, duke shtuar se Kuvendi mbetet një nga pikat më të forta të kësaj partie.

Sipas tij, LDK-ja është i vetmi subjekt politik në Kosovë që ka arritur disa herë t’i përballojë sfidat e lidershipit përmes votës, pa përçarje dhe pa përplasje të brendshme.

Pasi i mbijetoi votëbesimit, Abdixhiku fton kritikët të bashkohen pas tij

“Aty është çalimi dhe Kuvendi është pjesë e fortë e LDK-së, sepse megjithatë është i vetmi subjekt që ka arritur disa herë të ketë sfida të tilla të lidershipit dhe ta adresojë këtë çështje me votë”, ka theksuar Hoxha.

Ai ka shtuar se Kuvendin e LDK-së nuk e sheh si dobësi, por si një mundësi për fillim të ri, rifillim apo vazhdim të punës.

Në të njëjtën linjë, analisti Kastriot Jahaj ka deklaruar se Kuvendi i LDK-së është thirrur për përgjegjësi dhe se votëbesimi për Lumir Abdixhikun është realizuar në një formë demokratike, përmes votimit të fshehtë, që u ka dhënë delegatëve liri të plotë për të vendosur.

Ai ka theksuar se çështjet lidhur me organizimin e Kuvendit janë adresuar nga vetë zyrtarët e LDK-së, ndërsa më shumë i ka bërë përshtypje reagimi, apo mungesa e reagimit, e disa figurave të larta të partisë, në veçanti e Avdullah Hotit, i cili kishte shpallur kandidaturën për kryetar.

Ndryshe nga Hoxha dhe Jahaj, analisti Sadri Ramabaja ka vlerësuar se Kuvendi përfaqëson më shumë një lloj ngushëllimi për LDK-në, ndërsa humbja e 28 dhjetorit ka qenë një tronditje e thellë për këtë parti.

“28 dhjetori është tronditja e thellë që ka prodhuar pastaj të gjitha këto të tjerat”, ka deklaruar Ramabaja.

Sipas tij, Kuvendi ka dëshmuar se LDK-ja ndodhet në një krizë të thellë, e cila nuk është më vetëm identitare, por ka marrë edhe karakter strukturor dhe organizativ. Ai ka shtuar se brenda LDK-së janë kristalizuar dy blloqe të fuqishme politike: blloku i “të vjetërve”, që sipas tij ka pasur prirje për bashkëpunim me PDK-në, dhe blloku i “të rinjve”, të cilët angazhohen për një pozicion politik më të qartë “as–as”./Telegrafi/

- YouTube youtu.be

Javëve të fundit nuk janë të rralla njoftimet për rënien nga prodhimi të ndonjërit prej blloqeve në dy termocentralet e Korporatës Energjetike të Kosovës.

Derisa për vitin që shkoi ende nuk është publikuar raporti, sipas atij paraprak, më 2024 pesë njësitë prodhuese të “A”-së dhe “B”-së, ishin ndalur gjithsej 45 herë, prej tyre 32 herë ishin të paplanifikuar apo rënie nga prodhimi.

Ndërkaq, më 2023 këto njësi ishin ndalur gjithsej 47 herë, prej të cilave 38 ishin rënie nga prodhimi ose ndalesa të paplanifikuara.

Tri njësitë e termocentralit “Kosova A” tashmë kanë tejkaluar gjysmë shekulli prej kur janë funksionalizuar.

Blloku A5, që është më i riu në këtë termocentral, tashmë ka hyrë në vitin e 51-të të punës – pasi ishte vënë në funksion më 1975. Ndërsa edhe më të vjetra janë dy njësitë tjera, A3-shi që mbush 56 vjet dhe A4-shi 55 sish.

Vetë Strategjia Kombëtare e Energjisë përmend si shqetësim vjetërsinë e njësive të “A”-së duke saktësuar se ato “janë në fund të jetëgjatësisë së tyre teknike”.

Ndërkaq, edhe “Kosova B” që kishte nisur punën në dekadën pasuese, është në afërsi të mesatares së jetëgjatësisë së termocentraleve me thëngjill – që varësisht modeleve dhe teknologjisë sillet deri rreth 40 vjet, me raste deri në 50.

Njësia B1, e funksionalizuar 1983, tashmë ka hyrë në vitin 43 të punës, ndërsa B2 është një vit më e re.

Përkundër vjetërsisë dhe problemeve me besueshmërinë, dy termocentralet përbëjnë “boshtin kurrizor” të prodhimit vendor të rrymës.

Besnik Boletini nga organizata “Çohu”, e cila ndër vite ka kryer hulumtime lidhur me KEK-un, theksoi se situata aktuale është pasojë e mungesës së guximit për investime në kapacitete të reja.

“Janë si pasojë e mungesës së vendimeve strategjike për politikat e energjisë. Nëse ju kujtohet në vitin 2006-07 ka filluar studimi i fizibilitetit Kosovën e Re, janë ndryshuar kapacitetet, u bë pa studim, nuk është ndërtua asgjë. Pastaj kanë filluar opsionet tjera, ka qenë ideja e gazit, nuk është bë asgjë. Do të thotë ka munguar një vendim i madh strategjik, i cili e zgjidhë çështjen e energjisë elektrike”, ka thënë – Besnik Boletini, Organizata “Çohu”.

Përkundër që institucionet përgjegjëse ishin dhe janë në dijeni të vjetërsisë dhe pasojave, Boletini tha se ato nuk morën vendime dhe veprime për zgjidhje.

“Ajo që është diskutuar në vazhdimësi është se përveç që nuk kanë qëndrueshmëri operative, kanë edhe ndotje shumë të madhe të mjedisit, prandaj është e domosdoshme që krijohet një alternativë e re”, ka thënë – Besnik Boletini, Organizata “Çohu”.

Qysh dekadën e kaluar, qeveri të ndryshme kishin diskutuar për dekomisionimin e një pjesë të termocentralit Kosova A, por në mungesë kapacitetesh të reja ishin tërhequr nga kjo ide./Tv Dukagjini/

- YouTube youtu.be

Ish-deputeti i Lidhjes Demokratike të Kosovës (LDK), Agim Veliu, ka reaguar pas mbajtjes së Kuvendit të kësaj partie, duke theksuar se anëtarësia është themeli dhe autoriteti më i lartë i LDK-së.

Përmes një reagimi publik, Veliu ka deklaruar se asnjë kryetar, asnjë kryesi, Këshilli i Përgjithshëm apo Kuvendi i partisë nuk mund të jetë mbi vullnetin e anëtarëve të LDK-së. Ai ka vlerësuar se pas humbjes së thellë në zgjedhje, zgjidhja nuk gjendet duke u mbështetur në struktura të kontrolluara, por duke dëgjuar zërin e bazës.

“LDK nuk është pronë personale, as e një rrethi të ngushtë. Ajo u përket anëtarëve që e kanë ndërtuar, e kanë mbajtur dhe vazhdojnë ta mbajnë”, ka theksuar Veliu.

Ai ka paralajmëruar se historia ka treguar se ata që dëmtojnë themelet e partisë dhe e shndërrojnë atë në interes personal, nuk mbahen mend si udhëheqës, por si ata që e kanë lënë të fundit.

Në fund të reagimit, Veliu ka shprehur shqetësimin dhe njëkohësisht urimin e tij për të ardhmen e partisë, duke përfunduar mesazhin me thirrjen: “Zoti e ruajt LDK-në!”.

Bashkësia Islame e Kosovës dhe Bashkësia Islame e Bosnjë dhe Hercegovinës kanë organizuar ekspozitën “Kujtesa në fotografi”, e cila paraqet xhamitë e shkatërruara gjatë viteve ’90.

Ekspozita shërben si dëshmi e kujtesës historike dhe e pasojave të luftës mbi trashëgiminë kulturore e fetare.

Ekspozita do të qëndrojë e hapur për vizitorë deri më 7 shkurt 2026, në Shtëpinë e Kulturës “Xhemajli Berisha” në Prizren.

Gjykata Themelore në Mitrovicë, Departamenti për Krime të Rënda, njofton se ka refuzuar sot kërkesat e Prokurorisë për caktimin e masës së paraburgimit ndaj dhjetë të pandehurve të dyshuar për “falsifikim të rezultateve të votimit”.

Të pandehurit, të cilët përfshijnë R.J., L.H., N.D., A.N., B.F., H.S., Sh.N., Y.S., D.K. dhe S.S., do të vazhdojnë të mbrohen në liri.

Bëhet e ditur se gjykata ka vendosur se, në këtë fazë të procedurës, nuk janë përmbushur kushtet ligjore për paraburgim, duke siguruar respektimin e të drejtave dhe lirive themelore të palëve në proces.

Rinumërimi ka përfunduar gjatë fundjavës që shkoi dhe KQZ-ja ka shpallur rezultatet përfundimtare.

Prokuroria në Mitrovicë kërkon paraburgim për 10 prej kryesuesve të ndaluar për manipulim votash

Për shkak të dyshimeve për manipulim të votave, dhjetëra persona janë ndaluar dhe qindra të tjerë janë intervistuar në shumë rajone të Kosovës.

Po më 2 shkurt, autoritetet nisën hetime në Podujevë, pas dyshimeve për manipulim të votave të kandidatëve për deputetë.

Ndryshe, koordinatorja nacionale për zgjedhje në Kosovë, prokurorja e shtetit, Laura Pula, ka paralajmëruar se edhe kandidatët për deputetë që u ishin shtuar votat do të jenë objekt i hetimeve, ndonëse deri më tani nuk është bërë e ditur nëse ndonjë prej tyre është ftuar për intervistë në prokurori./Telegrafi/

Zbardhen detaje të reja nga operacioni i Komisariatit të Policisë Nr.3, ku u zbulua një arsenal armësh në zonën e Selitës, në Tiranë.

Sipas burimeve policore, armët mbaheshin në një vilë trekatëshe dhe prej aty shiteshin në mënyrë të organizuar. Kur blerësit shkonin për t’i marrë, poseduesit e armëve dilnin jashtë banesës, i vendosnin në një kuti në formë pakoje dhe më pas ia dorëzonin personave që kishin bërë porosinë.

Hetimi për këtë grup kriminal ka nisur rreth dy muaj më parë nga Komisariati Nr.3 në kryeqytet, shkruan A2.

Me metoda speciale hetimore, policia arriti të dokumentojë veprimtarinë e paligjshme të këtij rrjeti të shitjes së armëve. Përmes agjentëve të infiltruar, u kryen blerje të kontrolluara armësh nga anëtarët e grupit kriminal, të cilat u filmuan dhe u shoqëruan me prova ligjore.

Pas kësaj faze u ndërmor edhe operacioni policor, ku u arrestuan katër persona dhe u sekuestruan 8 armë zjarri, një armë gjahu, një jelek antiplumb, municione, tre radio të ngjashme me ato të policisë dhe nëntë telefona celularë. Sa i përket çmimeve, armët e zjarrit, kryesisht pistoleta tip Glock, shiteshin në tregun e zi deri në 5 mijë euro copa, ndërsa automatikët deri në 3 mijë euro.

Në pranga ranë shtetasit Gloris Nezaj, Rezarto Rumi, Kelvin Caushi dhe Ardjan Caushi, të dyshuar si pjesë e grupit që ushtronte tregtinë e paligjshme të armëve.

Ndërkohë, policia po heton edhe pistën se pranë vilës trekatëshe në Selitë ndodhet një person me rrezikshmëri të lartë, i cili dyshohet të jetë edhe kreu i këtij grupi kriminal./A2 CNN

Kryetari i Prishtinës, Përparim Rama, ka bërë të ditur se bashkë me Drejtorin për Siguri dhe Emergjenca, si dhe Komisionin e Kryeqytetit për Vlerësimin e Dëmeve, kanë mbajtur një takim koordinues me Komisionin Qendror për Vlerësimin e Dëmeve.

Sipas Ramës, takimi është fokusuar në forcimin e koordinimit institucional dhe në zbatimin e procedurave ligjore për vlerësimin e dëmeve të shkaktuara nga vërshimet e muajit janar, të cilat kanë prekur ekonomitë familjare, sektorin e bujqësisë, bizneset dhe infrastrukturën.

Ai ka riafirmuar përkushtimin e Kryeqytetit për mbështetjen e qytetarëve të prekur, duke theksuar se procesi i vlerësimit të dëmeve do të jetë i drejtë dhe transparent, në përputhje me ligjet në fuqi.

Rama ka theksuar se institucionet do të vazhdojnë bashkëpunimin e ngushtë për të siguruar trajtim të barabartë dhe ndihmë të shpejtë për të gjithë qytetarët e prekur nga vërshimet.

Zyrtarët e Doganës së Kosovës, në koordinim të ngushtë me Policinë e Kosovës – Drejtorinë për Hetimin e Trafikimit të Narkotikëve, kanë zbuluar rreth dy kilogramë lëndë narkotike gjatë një kontrolli në Pikëkalimin Kufitar Merdare.

Sipas njoftimit zyrtar, kontrolli i detajuar është realizuar sot, më 02.02.2026, ndaj një automjeti të dyshuar në hyrje të territorit të Republikës së Kosovës.

Gjatë këtij kontrolli, zyrtarët kanë gjetur të fshehura në mënyrë të sofistikuar rreth 2 kilogramë substancë, për të cilën dyshohet se është kokainë.

Për realizimin e kontrollit të thelluar është përdorur edhe skaneri X-ray, donacion i Shteteve të Bashkuara të Amerikës, pajisje kjo që ka lehtësuar ndjeshëm punën e zyrtarëve dhe ka mundësuar identifikimin e saktë të vendit ku ishte fshehur lënda narkotike.

Rasti aktualisht është duke u trajtuar nga organet kompetente, ndërsa ndaj personave të përfshirë pritet të ndërmerren veprimet e mëtejme ligjore, në përputhje me legjislacionin në fuqi.

Dogana e Kosovës dhe Policia e Kosovës kanë ritheksuar përkushtimin e tyre në luftën kundër krimit të organizuar dhe trafikimit të narkotikëve, përmes bashkëpunimit ndërinstitucional, shkëmbimit të informatave dhe përdorimit të kapaciteteve moderne teknike, me synim garantimin e sigurisë së qytetarëve dhe mbrojtjen e kufijve të Republikës së Kosovës.

Federata Sindikale e Punëtorëve Teknikë të Sektorit Privat të Kosovës (FSPTSPK) ka njoftuar se punëtorët teknikë në Qendrën Kryesore të Mjekësisë Familjare (QKMF) në Klinë nuk janë paguar në përputhje me vendimin e Qeverisë së Kosovës për pagën minimale.

FSPTSPK-ja, thekson se vendimi i kryeministrit i marrë më 31 tetor 2025 parasheh që paga minimale nga 1 janari 2026 të jetë jo më e ulët se 425 euro, ndërsa nga korriku i vitit 2026 të rritet në 500 euro.

Megjithatë, sindikata bën të ditur se punëtorët teknikë në QKMF të Klinës kanë marrë vetëm 350 euro pagë, çka sipas tyre përbën shkelje të drejtpërdrejtë të vendimit qeveritar dhe të të drejtave të punëtorëve.

Federata ka paralajmëruar se do të njoftojë Inspektoratin e Punës, ndërsa nuk përjashtohet as ndjekja e rrugëve ligjore, përfshirë adresimin e çështjes në Gjykatë.

“Këta punëtorë sot morën 350 euro pagë, pra në kundërshtim me vendimin e kryeministrit të Kosovës. Për këto shkelje, Sindikata do të njoftojë Inspektorin e Punës dhe nëse ka nevojë edhe Gjykatën”, thuhet në komunikatë.

Vendimi i Komisionit Qendror të Zgjedhjeve për të mos miratuar listën e kandidatëve për deputetë të Listës Serbe është “në kundërshtim me të drejtën e qytetarëve për të zgjedhur në mënyrë demokratike përfaqësuesit e tyre”.

“Çdo përpjekje për të shkelur këtë parim bazë minon partneritetin mes Shteteve të Bashkuara dhe Kosovës”, tha për Radion Evropa e Lirë një zëdhënës i Ambasadës amerikane në Prishtinë.

Më 31 janar, KQZ-ja shpalli rezultatet përfundimtare të zgjedhjeve të parakohshme parlamentare të 28 dhjetorit. Por, gjatë mbledhjes, anëtarët e Komisionit miratuan listat e kandidatëve të të gjithë partive, përveç Listës Serbe – partisë kryesore të serbëve në Kosovë që ka mbështetjen e Beogradit.

Tre anëtarë të KQZ-së votuan për, dy kundër nga Lëvizja Vetëvendosje, dhe anëtarët tjerë abstenuan.

Lista Serbe më 2 shkurt është ankuar në Panelin Zgjedhor për Aneksa dhe Parashtresa për këtë vendim të KQZ-së./Radio Evropa e Lirë/

Autoritetet e Maqedonisë së Veriut kanë nisur zbatimin e sistemit elektronik për monitorimin e komunikacionit rrugor, të njohur si “Qyteti i sigurt”, përmes të cilit do të evidentohen automatikisht shkeljet në trafik.

Sipas informacioneve zyrtare, monitorimi do të realizohet përmes pajisjeve teknike dhe kamerave inteligjente, të cilat regjistrojnë shkeljet e dispozitave të komunikacionit në përputhje me legjislacionin përkatës të Maqedonisë së Veriut.

Në fazën e parë, sistemi do të zbatohet në qytetet Shkup, Tetovë dhe Kumanovë, si dhe përgjatë Korridorit 8 dhe Korridorit 10. Në këto zona do të evidentohen shkelje si: tejkalimi i shpejtësisë së lejuar, kalimi në semafor të kuq, ndalimi dhe parkimi i parregullt, si dhe qarkullimi me automjete të paregjistruara.

Prej sot filloi zbatimi i sistemit "Safe City", Toshkovski sqaroi sanksionet dhe tolerancat për shoferët

Autoritetet kanë bërë të ditur se sistemi “Qyteti i sigurt” do të vlejë edhe për automjetet me targa të huaja, përfshirë ato nga Kosova. Në rast se një shtetas i huaj kryen shkelje të konstatuar nga ky sistem, ai do të njoftohet gjatë hyrjes ose daljes nga territori i Maqedonisë së Veriut.

Qytetarët e huaj kanë të drejtë që ta paguajnë 50 për qind të gjobës nëse pagesa realizohet brenda afatit prej tetë ditësh. Ndërkaq, në rast të mospajtimit me shkeljen ose mosrealizimit të pagesës, ndaj tyre do të iniciohet procedurë kundërvajtëse për të huaj para gjykatës kompetente.

Ky njoftim u është adresuar qytetarëve me qëllim të informimit dhe rritjes së kujdesit, si dhe respektimit të dispozitave ligjore gjatë udhëtimit dhe qëndrimit në Maqedoninë e Veriut./Telegrafi/

Objektivi i atentatit të ndodhur të dielën në mbrëmje në në Rrilë të Lezhës dyshohet se ka qenë Merando Nikulaj, 21 vjeç, ndërkohë që plumbat i mori 30-vjeçari Sokol Daci, pronar i berberhanes ku po qethej Nikulaj.

Autorët me dy automjete, një Audi dhe një Passat ndaluan përpara berberhanes dhe pasi zbritën nga makinat, dy prej tyre qëlluan me breshëri plumbash në drejtim të berberhanes ku ndodhej i riu Merando Nikulaj, raporton A2.

Brenda biznesit ka qenë edhe një efektiv policie, i cili është kundërpërgjigjur autorëve, dhe që me ndërhyrjen e tij mesa duket ka evituar që atentati të kishte viktima. Në dëshminë e tij paraprake polici ka deklaruar se është gjendur rastësisht në berberhane dhe se ngjarja ka ndodhur shumë shpejt dhe se nuk i ka parë autorët.

Lezhë: Berberi i plagosur dërgohet me urgjencë për trajtim - plagë në shpatull, bark dhe këmbë

Hetuesit kanë marrë gjurmët e gjakut në vendin e ngjarjes, ku pritet të bëhet analiza e ADN-së, për të zbuluar nëse kemi të bëjmë vetëm me një person të plagosur, apo nëse përveç berberit të jetë plagosur edhe Nikulaj, shënjestra e atentatit. Burime policore bëjnë me dije se dyshohet se Nikulaj mund të ketë mbetur edhe ai i plagosur në këmbë.

Nga breshëritë më të cilat është qëlluar, katër plumba kanë prekur edhe dy biznese të tjera përballë berberhanes, por fatmirësisht personat që ndodheshin brenda kanë shpëtuar pa u prekur.

Ndërkohë berberi 30-vjeçari Sokol Daci i cili u plagos aksidentalisht ndodhet në gjendje të rëndë në spitalin e Traumës, por me parametra jetësor stabël, në shërbimin e reanimacionit. Ai dyshohet të ketë marrë të paktën 4 plumba, në shpatull, bark dhe në këmbë.

Shënjestra e atentatit, 21-vjeçari Merando Nikulaj është nipi i Ardian Nikulaj, i vrarë më 19 prill 2023 në Shëngjin në hotelin e tij.