Bordi Drejtues i Federatës së Futbollit të Maqedonisë (FFM), në seancën e mbajtur sot, ka marrë vendim për emërimin e trajnerit të ri të ekipit kombëtar. Detyrën e selektorit do ta marrë Goce Sedloski, njofton Telegrafi.

Vendimi është marrë me propozim të Komitetit për Zgjedhjen e Trajnerit, i përbërë nga presidenti i FFM-së, Masar Omeragiq, drejtori i ekipeve kombëtare, Goran Pandev, kryetari i shërbimit të vëzhgimit, Nikolçe Noveski, anëtari i Bordit Drejtues, Agim Ibraimi, si dhe zëvendëspresidenti Marjan Stojkovski.

Goce Sedloski është një nga emrat më të njohur në historinë e futbollit vendor. Ish-kapiteni i përfaqësueses së Maqedonisës duke regjistruar 100 paraqitje dhe ka shënuar 8 gola, duke u bërë futbollisti i parë që arrin shifrën e 100 ndeshjeve për përfaqësuesen.

Sedloski ka qenë më herët pjesë e stafit teknik të përfaqësueses. Në gusht të vitit 2012, ai e drejtoi Maqedoninë si ushtrues detyre në ndeshjen miqësore ndaj Lituanisë në Shkup, e cila u fitua me rezultat 1:0.

Në karrierën e tij si trajner, Sedloski ka ushtruar detyrën e ndihmëstrajnerit dhe trajnerit të përkohshëm të Maqedonisë, ndërsa në nivel klubesh ka drejtuar Horizont Turnovon, Vardarin, Rigën në Letoni, Shiroki Brijegun në Bosnjë e Hercegovinë, ekipin e dytë të Dinamo Zagrebit në Kroaci, Shkupin, si dhe Vllazninë në Shqipëri.

Gjatë karrierës së tij trajneriale, Sedloski ka fituar tre tituj kampioni: dy me Vardarin në sezonet 2015/16 dhe 2016/17, si dhe një me Shkupin në sezonin 2021/22. Në sezonin 2024/25, ai fitoi edhe Kupën me Vardarin.

Si futbollist, Sedloski ka ndërtuar karrierë të pasur brenda dhe jashtë vendit. Duke luajtur me Bratstvo Gorno Konjari dhe Pitu Guli Krushevë, për të vazhduar te Pobeda e Prilepit. Më pas, ai luajti për Hajdukun e Splitit dhe Dinamo Zagrebin. Karrierën e vazhdoi te Sheffield Wednesday në Angli, ndërsa përvojë ndërkombëtare fitoi edhe në Japoni me Vegalta Sendai, në Turqi me Diyarbakirspor dhe në Austri me Mattersburgun.

Promovimi zyrtar i Goce Sedloskit si trajner kryesor i përfaqësueses së Maqedonisë do të mbahet nesër (të martën), duke filluar nga ora 11:30, në hotelin “Hilton” në Shkup. /Telegrafi/

Klubi i Futbollit Bashkimi nga Kumanova po përgatit një skuadër të re me një objektiv të vetëm, mbijetesën në Ligën e Parë të Maqedonisë së Veriut, njofton Telegrafi.

Klubi nga Kumanova u është falënderuar nëntë futbollistëve që ishin pjesë e ekipit gjatë gjysmësezonës vjeshtore. Ndryshimet më të mëdha pritet të ndodhin në repartin ofensiv, pasi Bashkimi është ndarë nga plot pesë sulmues: Marko Simonovski, Oguzan Ajdogan, Flamur Xhelili, Abdulhadi Jahja dhe Nedim Haxhiq.

Nga mesfusha janë larguar Isa Adenkule dhe Habubulla Askar, ndërsa nga reparti defensiv skuadrën e kanë lënë Faruk Bihorac dhe Samet Rexhepi.

Në klub tashmë po planifikohen hapat e radhës sa i përket afrimit të emrave të rinj, me synimin për ta përforcuar ekipin për pjesën pranverore të kampionatit. Gjysmësezonën vjeshtore Bashkimi e mbylli në pozitën e gjashtë me 22 pikë, katër më shumë se Tikveshi i vendit të tetë. /Telegrafi/

Shkëndija ka shkruar histori duke u renditur në vendin e 22-të në fazën e ligës së UEFA LigëneKonferencës, një pozicion që i siguron kampionit të Maqedonisë së Veriut një kualifikim historik në fazën nokaut të kësaj gare evropiane, njofton Telegrafi.

Tashmë vëmendja është kthyer nga shorti i fazës së radhës dhe, sipas rregullave të UEFA-s, tetovarët kanë dy kundërshtarë të mundshëm për këtë raund.

Goli i shënuar në kohën shtesë nga AEK-u në fitoren ndaj Krajovës rezultoi vendimtar për renditjen finale, duke e ngjitur Shkëndijën në vendin e 22-të. Kjo pozitë i lejoi kuqezinjtë të shmangin një përballje shumë të vështirë me ekipin e Premier League, Crystal Palace.

Skuadrat e renditura në vendet 22 dhe 23, Shkëndija dhe KuPS-i finlandez, në fazën e ardhshme do të përballen me Samsunspor-in nga Turqia ose Lech Poznan-in nga Polonia. Shorti do të përcaktojë nëse kampioni ynë do të udhëtojë drejt Turqisë apo Polonisë në vazhdimin e kësaj aventure evropiane.

Në rast se Shkëndija arrin ta kalojë këtë pengesë të parë, atëherë sipas “skemës” së UEFA-s, në raundin pasues e pret një tjetër sfidë e madhe, përballë njërës nga këto dy skuadra: Rayo Vallecano ose Shakhtar Donetsk.

Një rrugëtim evropian që tashmë ka hyrë në histori, por që për Shkëndijën duket se ende nuk ka përfunduar. /Telegrafi/

Edhe pse u mposht minimalisht në transfertë nga AEK Larnaca me rezultat 1-0, kampioni i Maqedonisë së Veriut, Shkëndija, ka arritur një sukses historik duke siguruar kualifikimin në “play-off”-in e UEFA Ligën e Konferencës, njofton Telegrafi.

Falë rezultateve të favorshme në ndeshjet e tjera, tetovarët “kapën trenin e fundit” dhe u renditën mes skuadrave që do të vazhdojnë garat evropiane, duke siguruar një pranverë europiane të artë.

Takimi nisi me një Shkëndijë më konkrete dhe më të guximshme. Qysh në minutën e 4-të, Ronaldo Webster depërtoi në zonë, dribloi dy kundërshtarë dhe gjuajti diagonalisht, por portieri Alomeroviç reagoi mirë duke e devijuar topin në këndore. AEK Larnaca ishte thuajse i pafuqishëm në fazën ofensive, ndërsa mbrojtja e Shkëndijës funksionoi në mënyrë perfekte. Në 30 minutat e para, vendasit regjistruan vetëm një rast serioz, një goditje me kokë që përfundoi mbi traversë.

Në vazhdimin e pjesës së parë, të shtyrë nga publiku vendas, qipriotët rritën presionin dhe provuan disa herë portën, por pa sukses, pasi çdo gjuajtje u bllokua nga mbrojtësit kuqezi. Para pushimit, pas një aksioni të rrëmujshëm pas një ndërprerjeje, topi përfundoi te koka e serbit Ivanoviç, i cili shënoi, por goli u anulua nga VAR për pozitë jashtë loje.

Pjesa e dytë nisi keq për Shkëndijën, që mbeti me një lojtar më pak pas kartonit të kuq të Liridon Latifit për ndërhyrje të ashpër. Trajneri Jeton Beqiri reagoi menjëherë me ndryshime, duke hedhur në fushë Alhassan dhe Tamba për të ruajtur freskinë dhe shpejtësinë, ndërsa më pas aktivizoi edhe Mazarin. AEK vazhdoi presionin dhe arriti golin në minutën e 83-të, kur pas një këndoreje të Ledes Gustavo, Angielski shënoi me kokë për 1-0.

Deri në fund të ndeshjes, vendasit ushtruan presion të vazhdueshëm para portës së kampionit maqedonas, por rezultati nuk ndryshoi. Humbja minimale nuk e zbehu suksesin e madh të Shkëndijës, e cila mbylli fazën në pozitat që çojnë drejt sfidave të reja europiane, duke konfirmuar se ky ekip ka shkruar tashmë një faqe të rëndësishme historie në arenën ndërkombëtare. /Telegrafi/

Shkëndija sonte del përballë një sfide të madhe evropiane, por me besim të plotë në forcat e veta. Kuqezinjtë nga Tetova janë mysafirë të AEK Larnaca-s në Qipro, në një duel që nis në ora 21:00 dhe që mbart peshë të veçantë për ambiciet e ekipit shqiptar në arenën ndërkombëtare, njofton Telegrafi.

Pas paraqitjeve pozitive dhe rritjes së dukshme në lojë, Shkëndija ndaj qipriotëve luan me synimin e qartë për të nxjerrë rezultat pozitiv dhe për ta dëshmuar edhe një herë karakterin e saj konkurrues. Ekipi tetovar është i motivuar maksimalisht, i përgatitur taktikisht dhe i vetëdijshëm se një paraqitje e fortë sonte mund të jetë vendimtare për vazhdimësinë e rrugëtimit evropian.

Trajneri Jeton Beqiri për këtë ndeshje ka vendosur të luajë në portë me Gaye, ndërsa mbrojtja përbëhet nga Trumçi, Fetai, Cake dhe Webster.

Në mesfushë luajnë, Zejnullai, Ramadani dhe Qaka.

Sulmi nuk ka pësuar ndryshime dhe përbëhet nga kapiteni Besart Ibraimi, i cili do të ndihmohet nga shokët e krahut, Liridon Latifi dhe Sebastjan Spahiu.

Në anën tjetër, te AEK Larnaca trajneri Imanol Idiakez në sulm ka zgjedhur të luajë në sulm me boshnjakun Bajiç.

KF Shkëndija: Gaye, Trumçi, Fetai, Cake, Webster, Zejnullai, Ramadani, Qaka, Spahiu, Latifi dhe Ibraimi.

AEK Larnaca: Alomeroviç, Godswill, Miliçeviç, Roberge, kapiteni Garcia, Naoum, Ledes, Miramon, Ivanoviç, Waldo Rubio dhe Bajiç.

/Telegrafi/

Kuqezinjtë sonte zhvilluan seancën e fundit stërvitore para përballjes vendimtare të raundit të gjashtë në UEFA Ligën e Konferencës, ku të enjten në Qipro do të sfidojnë AEK Larnaca-n, me synimin për të marrë rezultat pozitiv dhe për të konfirmuar kualifikimin në fazën e ardhshme të garës, njofton Telegrafi.

Në prag të këtij dueli të rëndësishëm, trajneri Jeton Beqiri theksoi se ekipi i tij ka treguar se mund të përballet denjësisht edhe me skuadra të forta evropiane.

“Kemi provuar se dimë të luajmë edhe ndaj ekipeve të forta në Europë. Respektojmë maksimalisht AEK-un, por nuk hyjmë në ndeshje për t’u frikësuar”, deklaroi Beqiri, duke shtuar se vetëm përmes punës dhe seriozitetit maksimal gjatë gjithë ndeshjes mund të arrihet rezultati i dëshiruar.

Tekniku kuqezi vlerësoi edhe cilësitë e kundërshtarit, duke veçuar organizimin dhe mbrojtjen e fortë të ekipit nga Qipro.

“Ata luajnë si ekip, sulmojnë dhe mbrohen së bashku, prandaj për të dalë me rezultat pozitiv duhet të bëjmë një paraqitje të nivelit të lartë”, nënvizoi Beqiri, duke shtuar se Shkëndija synon ta përmbyllë me sukses aventurën evropiane në këtë fazë.

Nga ana tjetër, portieri Baboucarr Gaye theksoi se përgatitjet janë fokusuar në detaje dhe në analizën e kundërshtarit.

“AEK-u është një ekip i mirë me lojtarë cilësorë dhe duhet të jemi shumë të vëmendshëm, jo vetëm unë si portier, por i gjithë ekipi”, tha Gaye, duke theksuar rëndësinë e punës së stafit teknik në përgatitjen e ndeshjes.

Gaye foli edhe për qasjen e tij personale para sfidës në Qipro, duke theksuar se fokusi është vetëm te detyrat e tij në fushë. “Përpiqem të qëndroj i qetë dhe i përqendruar, të mbaj portën të sigurt dhe të mbështes ekipin në çdo moment”, u shpreh portieri kuqezi.

Duke folur për rëndësinë e kësaj ndeshjeje, Beqiri rikujtoi se kjo është përballja e fundit e fazës për të dyja skuadrat dhe se të dy ekipet janë në garë për kualifikim.

“Deri në ndeshjen e fundit jemi në luftë për diçka të madhe dhe shpresojmë që me një paraqitje të mirë të vazhdojmë rrugëtimin evropian edhe në pranverë”, deklaroi trajneri i Shkëndijës.

Në fund, Gaye nënvizoi se prioriteti mbetet suksesi i ekipit dhe jo statistikat personale. “Nuk më intereson kush bën pritjen apo kush bllokon topin në vijë, rëndësi ka që ekipi të ketë sukses”, tha ai, duke shtuar se objektivi është që viti të mbyllet fuqishëm dhe me rezultat pozitiv në Qipro. Ndeshja AEK Larnaca – Shkëndija luhet me fillim nga ora 21:00. /Telegrafi/

Futbollistët e Shkëndijës i pret ndeshja e fundit në fazën e grupeve të UEFA Ligës së Konferencës, ku në kuadër të xhiros së gjashtë do të jenë mysafirë të AEK Larnaca në Qipro. Kuqezinjtë vazhdojnë të jenë në garë për një vend në play-off, ndaj synimi kryesor në stadiumin “AEK Arena” do të jetë marrja e të paktën një pikë, por pse jo edhe e tre pikëve të plota, njofton Telegrafi.

Federata Evropiane e Futbollit (UEFA) tashmë ka deleguar zyrtarët e ndeshjeve për këtë xhiro të garave evropiane. Për duelin në Larnaca janë përzgjedhur gjyqtarë nga Lituania.

Arbitër kryesor i takimit do të jetë Manfredas Lukjançukas, ndërsa ndihmës të tij në vijat anësore do të jenë Mirauskas dhe Steponavas. Gjyqtar i katërt është Paulauskas, ndërsa në dhomën VAR përgjegjësi kryesor do të jetë Simenas. Delegat i ndeshjes nga UEFA është Allojzije Shupraha nga Kroacia. /Telegrafi/

Shkëndija e Tetovës ndodhet përballë një prej sfidave më të rëndësishme të sezonit evropian. Të enjten, kuqezinjtë janë mysafirë të AEK Larnaca në Qipro, në ndeshjen e fundit të fazës së grupeve të UEFA Ligës së Konferencës, duel që mund të përcaktojë vazhdimësinë e ekipit tetovar në arenën ndërkombëtare edhe gjatë pranverës, njofton Telegrafi.

Në prag të kësaj përballjeje vendimtare, optimizëm shpreh edhe Sebastjan Spahiu, i cili po rikthehet gradualisht në formën e tij më të mirë.
“Ndjehem shumë mirë, jo vetëm për golin ndaj Slovan Bratislavës, por kam filluar të ndjehem mirë e më mirë, pasi e dinë të gjithë se nuk kam qenë në fazë përgatitore dhe tani e kam marrë veten mirë”, u shpreh mesfushori kuqezi.

Spahiu, i cili gjatë verës kishte disa alternativa për të vazhduar karrierën në kampionate të tjera, zgjodhi Shkëndijën për shkak të projektit dhe ambicieve të klubit, si në garat vendore ashtu edhe në debutimin historik në fazën kryesore të UEFA Ligës së Konferencës.
“Këto janë ndeshje që duhen shijuar. Për këtë kam ardhur në fazën kryesore të Ligës së Konferencës, por edhe për grupin. I falënderoj të gjithë çunat për mënyrën si më kanë pritur. Po ndjehem shumë mirë këtu”, tha 26-vjeçari nga Shkodra.

Ai mbetet optimist edhe për vazhdimin e sezonit, duke theksuar se Shkëndija synon rikthimin në garën për titull në pranverë, por pa e lënë pas dore objektivin evropian.
“Sigurisht që besojmë se do ta përmbysim situatën në kampionat. Në Shkup është shumë e vështirë të na mundin në Ligën e Konferencës dhe si ekip ndjehemi shumë mirë”, përfundoi Spahiu.

Skuadra qipriote hyn në këtë përballje si favorite absolute, duke qenë se ende nuk ka pësuar asnjë humbje, ndërsa Shkëndija kërkon rezultat pozitiv ose, në rastin më të keq, të mbajë gjallë shpresat përmes skenarëve të tjerë. Edhe një humbje në Qipro nuk do ta përjashtonte automatikisht ekipin e Jeton Beqirit nga gara, pasi ekzistojnë disa kombinime që mund ta çojnë Shkëndijën në play-off.

Në rast disfate ndaj AEK-ut, kuqezinjtë do të kenë nevojë që Crystal Palace të mposhtë KuPS-in, Zrinjski të mos fitojë ndaj Rapidit, ndërsa Breidablik të mos triumfojë në fushën e liderit Strasbourg. Nëse këto rezultate përputhen, Shkëndija do ta siguronte vazhdimin e rrugëtimit evropian edhe pas fazës së grupeve. Në të kundërtën, shpresat do të zhvendosen te dështimet eventuale të Sigma Olomouc, Universitatea Craiova dhe Lincoln, skuadra që aktualisht ndodhen në pozitat 22, 23 dhe 24, po ashtu me nga 7 pikë.

Xhiroja e fundit e fazës së grupeve të Ligës së Konferencës do të zhvillohet më 18 dhjetor, datë që mund të përcaktojë fatin evropian të Shkëndijës për këtë sezon. /Telegrafi/

FC Shkupi po përjeton një nga sezonet më të vështira në futbollin elitar të Maqrdinisë së Veriut. Ekipi nga Çairi është i bllokuar në vendin e fundit në tabelë me vetëm një pikë të fituar pas 16 javë të luajtura, njofton Telegrafi.

Pas përfundimit të gjysmësezonit ka folur trajneri Minas Osmani, i cili ka shprehur hapur dëshpërimin nga situata në klubin që ka katër tituj kampion.

"Për ne si klub, ky gjysmësezon ka qenë zhgënjyes dhe i vështirë. FC Shkupi dhe tifozët tanë nuk e meritojnë këtë situatë. Megjithatë, shpresojmë të fillojmë me energji të re dhe forcë më të madhe për të rikthyer rezultatet dhe krenarinë që ky klub meriton", tha në fillim Minas Osmani, trajneri aktual i Shkupit.

Trajneri Osmani beson se FC Shkupi do të reagojë në merkaton e janarit dhe do të sjellë lojtarë cilësorë për të dalë nga zona e rrezikut.

"Jemi të përqendruar maksimalisht në hapjen e merkatos. Shpresojmë se do të arrijmë të sjellim disa lojtarë cilësorë që do ta forcojnë ekipin në ato fusha ku kemi më shumë nevojë. Sa i përket lojtarëve që kemi tashmë në ekip, do të zhvillojmë biseda individuale me secilin prej tyre dhe së bashku do të vlerësojmë hapat e mëtejshëm."

Minas Osmani thekson se qëllimi kryesor i Shkupit është mbijetesa në futbollin elitar vendas.

“Qëllimi ynë është që FC Shkupi të hyjë në gjysmën e dytë të sezonit sa më i kompletuar dhe më konkurrues”, përfundoi trajneri Minas Osmani.

FC Shkupi do ta luajë ndeshjen e parë të sezonit pranveror në transfertë, më 15 shkurt 2026, në stadiumin e Makedonija Gj.P. /Telegrafi/

Edhe pse para duelit me Slovan Bratislavën Shkëndija konsiderohej autsajdere, gjithçka u përmbys në fushën e lojës. Kuqezinjtë nga Tetova zhvilluan një paraqitje mbresëlënëse dhe dominuese, duke treguar karakter, disiplinë dhe lojë cilësore, që në fund u shpërblye me një fitore të merituar 2-0 dhe ringritje të madhe në garën për pranverën evropiane, njofton Telegrafi.

Futbollistët e Shkëndijës nuk lejuan një tjetër zhgënjim si ai i dy javëve më parë. Me këtë fitore kuqezinjtë u ngjitën në zonën që siguron pranverën evropiane në UEFA Ligën e Konferencës.

Tetovarët, para xhiros së fundit të fazës së grupeve, renditen në pozitën e 21-të me 7 pikë dhe janë shumë pranë plasmanit në play-off (pozitat 9–24). Për të shmangur çdo lloj dështimi, Shkëndijës i nevojitet patjetër fitore në ndeshjen e fundit në udhëtim ndaj AEK Larnakës, ekip që deri tani nuk ka pësuar humbje. Megjithatë, ekziston mundësia e kualifikimit edhe në rast disfate.

Nëse kampioni i Maqedonisë së Veriut humb në Qipro, për të kaluar në play-off do të duhen disa “kalkulime”: Crystal Palace duhet të mposhtë KuPS-in, Zrinjski të mos fitojë ndaj Rapidit, ndërsa Breidablik të mos triumfojë në fushën e liderit Strasbourg.

Nëse këto skenarë realizohen, Shkëndijën do ta shohim edhe në pranverë në arenën ndërkombëtare. Por nëse “plani” nuk shkon si duhet, kuqezinjtë do të shpresojnë në gabimet e Sigma Olomouc, Universitatea Craiova dhe Lincolnit, që ndodhen në pozitat 22, 23 dhe 24 – gjithashtu me nga 7 pikë.

Xhiroja e fundit e fazës së grupeve të Ligës së Konferencës do të zhvillohet me 18 dhjetor. /Telegrafi/

Pas një fitoreje historike që ndezi shpresat e tifozëve, Shkëndija vazhdon rrugëtimin e saj në UEFA Ligën e Konferencës me një paraqitje të jashtëzakonshme në Shkup, njofton Telegrafi.

Pas triumfit të madh ndaj Slovan Bratislavës me rezultat 2:0, në konferencën për shtyp ka folur trajneri Jeton Beqiri, i cili ka vlerësuar paraqitjen e skuadrës dhe ka dhënë pritshmëritë për kualifikimin në raundin tjetër të garës.

“Ishte një paraqitje shumë e mirë e skuadrës sonë. Futbollistët punuan me shumë seriozitet dhe ndoqën çdo detyrë që kishim planifikuar para ndeshjes, pasi kishim bërë analizë të stilit të lojës së Slovanit. Jam i kënaqur me lojën dhe fitoren, por do të kisha dashur të shënonim edhe më shumë gola, pasi krijuam raste të pastra,” tha Beqiri.

Trajneri gjithashtu theksoi se ëndrra evropiane nuk është siguruar ende: “Ne ende nuk kemi siguruar pranverën evropiane, pasi na pret edhe një ndeshje dhe gjithçka varet nga rezultatet e tjera. Por kam shpresë dhe besoj se skuadra do të japë maksimumin edhe në ndeshjen e fundit.”

Ndeshja e fundit e fazës së grupeve do të luhet të enjten e ardhshme, më 19 dhjetor, kur Shkëndija udhëton në Qipro për t’u përballur me AEK Larnakën, e cila mban pozicionin e tretë në grup.

Fitorja ndaj Slovan Bratislavës jo vetëm që ngjiti Shkëndijën në zonën e play-off-it, por gjithashtu forcoi pozitat e klubit në UEFA dhe i sjell 400 mijë euro bonus. /Terlegrafi/

Shkëndija ka shënuar një fitore të jashtëzakonshme në UEFA Ligën e Konferencës, duke mposhtur në Shkup gjigantin sllovak Slovan Bratislava me rezultat 2:0. Një skuadër me shumë renome në arenën evropiane dhe me vlerë merkatoje disa fish më të madhe se kuqezinjtë, por që u detyrua të përkulet para kampionit të Maqedonisë. Me këtë triumf, Shkëndija ngjitet në zonën e play-off-it dhe mban gjallë shanset reale për kalimin në fazën tjetër të garës, njofton Telegrafi.

Kuqezinjtë e Tetovës zhvilluan një ndeshje të fuqishme ndaj një rivali që erdhi në Shkup me shumë mungesa, ndërsa vetë Shkëndija e mbyll grupin pa asnjë humbje në shtëpi: dy fitore dhe një barazim para publikut të vet. Në xhiron e fundit, kampionët udhëtojnë në Qipro për t’u përballur me AEK Larnakën.

Sa i përket lojës, Shkëndija e nisi në mënyrë dominuese duke ushtruar presion të vazhdueshëm, dhe shpërblimi erdhi në pjesën e parë me dy gola. Fillimisht, në minutën e 33-të, pas një goditje nga këndi, Bajriç devijoi topin në rrjetën e vet duke ndezur tribunat. Vetëm pak para pushimit, Ronaldo Webster shpërtheu në kundërsulm, asistoi mrekullisht dhe Sebastian Spahiun, i cili e dërgoi topin në rrjetë për 2:0.

Pjesa e dytë ishte shembullore faktikisht, Shkëndija e menaxhoi ndeshjen në mënyrë perfekte, pa i dhënë asnjë mundësi Slovanit. Skuadra sllovake nuk regjistroi asnjë goditje në portën e Gajës, të gjitha shtatë tentimet shkuan jashtë kornizës.

Raste të njëpasnjëshme kishin Latifi, Krasniqi e Ademi, ku ky i fundit goditi transversalen, që ishte aleat për Slovanin që të mos turpërohet më shumë në Shkup.

Fitorja jo vetëm që forcon pozitat e Shkëndijës në Evropë, por i sjell klubit edhe 400 mijë euro bonus nga UEFA, duke ndikuar njëkohësisht pozitivisht në koeficientin e Maqedonisë në listën evropiane. Një mbrëmje e madhe për kuqezinjtë. /Telegrafi/

Shkëndija e Tetovës sonte do të përballet me sllovakët e Slovan Bratislava në kuadër të javës së pestë të Ligës së Konferencës. Ndeshja luhet në stadiumin Arena “Todor Proeksi me fillim në ora 18:45, njofton Telegrafi.

Shkëndija mbetet me një fitore, atë ndaj Shelbournit, ndërsa në javën e katërt u mund nga Drita e Gjilanit. Barazim ka marrë vetëm ndaj Polakëve të Jaglielonia që i ka lënë kuqezinjtë me vetëm katër pikë në pozitën e 25.

Takimin do ta drejtojë ekipi i gjyqtarëve nga Islanda. Kryesor do të jetë Ivar Ori Kristjansson, ndërsa asistentë Birker Sigurdarson dhe Gylfi Mar Sigurdsson. Gjyqtari i katërt është Vilhjalmur Torarinsson. Në dhomën e VAR-it do të jenë skocezët Kevin Clancy dhe Grant Irvin.Trajneri Jeton Beqiri për këtë ndeshje ka vendosur të luajë në portë me Gaye, ndërsa mbrojtja përbëhet nga Trumci, Fetai, Cake dhe Webster.

Në mesfushë luajnë, Zejnullai, Rmadani dhe Qaka.

Sulmi nuk ka pësuar ndryshime dhe përbëhet nga kapiteni Besart Ibraimi, i cili do të ndihmohet nga shokët e krahut, Liridon Latifi dhe Sebastjan Spahiu.

Në anën tjetër, te Slovan Bratislava trajneri Vladimir Weiss në sulm ka zgjedhur të luajë me lojtarin më në formë i cili është Nino Marcelli.

KF Shkëndija: Gaye, Trumçi, Fetai, Cake, Webster, Zejnullai, Ramadani, Qaka, Spahiu, Latifi dhe Ibraimi.

Slovan Bratislava: Takac, Wimmer, Kashia, Bajric, Sando Cruz, Pokorny, Ibraim, Blackman, Wiess, Mak dhe Marcelli.

/Telegrafi/

Kur kanë mbetur edhe pak orë deri në fillimin e ndeshjes, Shkëndija po hyn në një duel vendimtar për vazhdimin e aventurës në UEFA Ligës së Konferencës. Edhe pse shanset u zvogëluan pas humbjes ndaj Dritës, ato ende ekzistojnë dhe për të mbajtur gjallë ëndrrën evropiane, kuqezinjtë duhet të kalojnë sfidën e madhe të mbrëmjes, kampionin e Sllovakisë, Slovan Bratislava që nis sonte në ora 18:45, njofton Telegrafi.

Ndonëse në Gjilan Shkëndija dominoi statistikat, një moment pakujdesie i kushtoi ekipit të Jeton Beqirit. Tani në Shkup vjen Slovan Bratislava, një skuadër që së fundmi mposhti edhe Rayo Vallecano dhe ka lojtarë me shumë përvojë. Mes tyre edhe kapiteni 36-vjeçar Vladimir Weiss. Sllovakët megjithatë kanë mungesë të rëndësishme, Tigran Barseghyan që është i dëmtuar, kështu që barra bie mbi krahun e majtë, talentin Nino Marçeli, lojtari më i vlerësuar i ekipit.

Slovani këtë edicion ka pësuar humbje nga Strasburgu, AZ Alkmari dhe KUPS-i, por ka shënuar në shumicën e ndeshjeve evropiane. Shkëndija ndërkohë mbështetet te forca tifozëve, ku fitoi ndaj Shelbourne dhe barazoi me Jagiellonian. Me një fitore, kuqezinjtë do t’i afroheshin realisht fazës me eliminim direkt, por edhe barazimi i mban në garë, por me më shumë llogari para sfidës së fundit në Qipro.

Sipas parashikimeve statistikore, Shkëndija ka rreth 33% gjasa për të kaluar grupin. Pritet një qasje ofensive që nga fillimi, ndërsa golashënuesi më i mirë evropian i klubit, Besart Ibraimi, me shumë gjasë do të nisë sërish nga banka për shkak të ritmit të lartë të ndeshjeve. /Telegrafi/

Shkëndija po i mbyll në ritëm përgatitjet për sfidën e nesërme ndaj Slovan Bratislavas, ndeshje që zhvillohet në kuadër të xhiros së pestë të UEFA Ligës së Konferencës. Kuqezinjtë zhvilluan seancën e fundit stërvitore, ndërsa dueli do të luhet të enjten në arenën “Todor Proeski” me fillim nga ora 18:45, njofton Telegrafi.

Trajneri Jeton Beqiri u shpreh optimist para përballjes, duke theksuar se Shkëndija ka ende gjasa reale për të synuar kualifikimin.
“Mendoj se kjo është mundësia e parafundit për të qëndruar në garë për mesin e 24 skuadrave që vazhdojnë më tej. Kundërshtari është shumë cilësor, vitin e kaluar luajti edhe në grupet e Ligës së Kampionëve, por në Shkup gjithmonë kemi paraqitje pozitive. Shpresoj që të shprehemi në mënyrën më të mirë dhe besoj se kemi të gjitha mundësitë për të marrë një rezultat që na mban në lojë deri në ndeshjen e fundit.”

Beqiri shtoi se pavarësisht mungesës së fatit në dy ndeshjet e fundit, ekipi mbetet plotësisht brenda objektivave.
“Skuadra ka dhënë shumë më tepër sesa ka marrë. Por rëndësi ka që jemi ende në garë dhe që Shkëndija, në mes të dhjetorit, vazhdon të luajë në Evropë. Do të bëjmë maksimumin që të sigurojmë rezultate pozitive në këto dy ndeshje të mbetura.”

Edhe kapiteni Besart Ibraimi ndau të njëjtin entuziazëm para sfidës.“Kemi shkruar histori këtë vit dhe të gjithë jemi të kënaqur, por nuk duhet të ndalemi këtu. Nesër duhet të japim maksimumin për ta fituar ndeshjen dhe pse jo, për t’u kualifikuar më tej. Fakti që të gjitha ekipet janë në pushim, ndërsa ne luajmë në Europë, ndikon, por na jep edhe më shumë motiv. Në dy ndeshjet e fundit fati nuk ishte me ne, por besoj se me pak më shumë fat nesër mund ta marrim rezultatin që duam.”

Shkëndija synon triumfin e madh për të mbajtur gjallë ëndrrën evropiane në një sezon historik për klubin. /Telegrafi/

FC Shkupi po përjeton sezonin më të dobët në historinë e vet, një edicion i errët për klubin emblemë shqiptar që numëron katër tituj kampion, por sot ndodhet në krizën më të thellë që ka përjetuar ndonjëherë, njofton Telegrafi.

Me vetëm një pikë të grumbulluar dhe një formë të rrënuar, skuadra nga Çairi u mposht sërish, kësaj radhe nga Brera Strumica me rezultat 1-3, duke e lënë ekipin praktikisht me një këmbë në Ligën e Dytë.

Ndeshja u luajt në terren neutral në Strugë, aty ku Brera i dha fund serisë negative dhe mori tre pikë të arta. Në pesë ndeshjet e fundit, skuadra nga Strumica kishte katër humbje dhe një barazim, ndaj ky sukses vjen si frymëmarrje për ta para pauzës dimërore.

Brera e siguroi fitoren me dy gola në pjesën e parë dhe një tjetër në të dytën. Emrah Makiq shënoi në minutën e 7-të, Zoran Ivanovski në të 17-tën, ndërsa Mile Todorov vulosi rezultatin 0-3 në minutën e 51-të pas një kundërsulmi. Shkupi shënoi golin e vetëm në fund të takimit me kapitenin Erion Shuku, por pa ndikim në fatin e ndeshjes.

Ndërkohë, sot u zhvillua edhe një ndeshje tjetër në Shkup. Sileksi e mbylli vitin me fitore bindëse, duke triumfuar 0-3 në udhëtim te Rabotniçki dhe duke e justifikuar plotësisht rolin e favoritit. Me këto tre pikë, ekipi nga Kratova e mbyllin gjysmësezonin në vendin e katërt me 31 pikë, ndërsa Rabotniçki futet në pauzën dimërore në gjendje alarmante, menjëherë pas Shkupit, me vetëm 7 pikë në tabelë. Kampionati i Maqedonisë do të vazhdojë në muajin shkurt. /Telegrafi/

Skuadra e Shkëndija mbylli pjesën e parë të sezonit me fitore dhe hyn e qetë në pauzën dimërore. Në kuadër të javës së 16-të të Ligës së Parë të Maqedonisë së Veriut, kampionët në fuqi triumfuan bindshëm si mysafr ndaj Bashkimi në Kumanovë me rezultatin 1:3, duke regjistruar fitoren e 11-të të këtij edicioni. Me këtë sukses, tetovarët e mbyllën sezonin vjeshtor në vendin e tretë me 36 pikë, gjashtë më pak se lideri Vardari. Ndërkohë Bashkimi shënoi humbjen e gjashtë dhe pritet ta përfundojë gjysmën e sezonit në vendin e pestë, njofton Telegrafi.

Ndeshja në Kumanovë nisi furishëm, me dy gola brenda shtatë minutave të para. Mysafirët kaluan të parët në epërsi pas autogolit të Armend Alimit. Por reagimi i vendasve ishte i menjëhershëm, vetëm tri minuta më vonë, Panovski depërtoi bukur në krahun e djathtë dhe asistoi për Aleksovskin, që nga afër e dërgoi topin në rrjetë për 1:1.

Shkëndija kërkoi të rikthente epërsinë dhe dominoi pas golit të pësuar. Rastet u shtuan para portës së Bashkimit, ndërsa Tamba pati mundësinë më të mirë, por goditi jashtë kuadratit. Senegalezi nuk gaboi herën e dytë:,në minutën e 34-t, pas një rasti të shpëtuar në vijën e portës nga Fisnik Zuka ndaj gjuajtjes së Ibraimit, Tamba përfitoi dhe shënoi në portën e boshatisur, duke i çuar miqtë në epërsi 1:2, rezultat me të cilin u mbyll pjesa e parë.

Edhe në pjesën e dytë, ndonëse pritej reagim më i fortë nga Bashkimi, ishte Shkëndija ajo që mbante kontrollin dhe kërkonte golin e tretë. Momenti kyç erdhi pas zëvendësimeve të trajnerit Beqiri, kur në lojë hyri Fiton Ademi, i cili menjëherë goditi traversën. Por pak minuta më vonë, pas një krosimi të saktë të Liridon Latifit, ishte pikërisht Ademi që u gjend i pari te topi i ardhur në zonë dhe vulosi fitoren e tetovarëve 1:3.

Shkëndija e nis pjesën pranverore më 15 shkurt me duelin kundër Tikveshit, ndërsa Bashkimi në shtëpi do të presë Pelisterin. /Telegrafi/

Federata Ndërkombëtare Botërore e Futbollit ka publikuar skemën e grupeve për Kupën e Botës 2026 dhe tashmë dihet se ku do të përfundojë Maqedonia, nëse më parë kalon pengesat e balotazhit, njofton Telegrafi.

Për shkak se shorti e ka vendosur në grup me njërin nga vendet organizatore, përfaqësuesja e Maqedonisë potencialisht do të luajë në dy shtete të ndryshme.

Në gjysmëfinale për Botërorin 2026, Maqedonia do të përballet me Danimarkën. Nëse arrin ta eliminojë rivalin skandinav, në finalen e pret fituesi i ndeshjes Irlandë – Çeki.

Përfaqësuesja që e fiton barazhin do të udhëtojë drejt Grupit A, ku tashmë janë të pozicionuara Meksika, Afrika e Jugut dhe Korea e Jugut. Kjo grupë zhvillohet në disa qytete të ndryshme, mes dy shteteve pritëse, Meksikës dhe SHBA-së.

Sipas planit të publikimit, ndeshja e parë e Maqedonisë nëse kualifikohet, do të ishte kundër Koresë së Jugut në stadiumin “Akron” në Zapopan të Meksikës. Ndeshja e dytë, që njëherësh është edhe hapja zyrtare e Botërorit 2026, do të zhvillohet në legjendarin “Estadio Azteca” në Mexico City, mes Meksikës dhe Koresë së Jugut.

Takimet e Grupit A do të zhvillohen në Mexico City, Zapopan dhe Guadalupe, të gjitha në territorin meksikan, si edhe në Atlantë të Shteteve të Bashkuara. /Telegrafi/

Java e 16-të e Ligës së Parë të Maqedonisë së Veriut pritet të mbyllë gjysmësezonin vjeshtor me duele vendimtare, ku do të mësohet edhe kampioni vjeshtor i këtij edicioni. Ndeshjet zhvillohen nga e premtja deri të hënën, ndërsa gara në krye është hapur, megjithëse me epërsi të lehtë ështe Vardari para Strugës, njofton Telegrafi.

Sipas renditjes aktuale, Vardari hyn në këtë javë si lider dhe është më afër ta mbyllë pjesën e parë të sezonit në vend të parë. Megjithatë, ekipi kuqezi nuk e ka të garantuar epitetin e kampionit vjeshtor. Struga, që ndodhet vetëm një hap prapa, ka shanse reale të kapë kreun, sidomos nëse Vardari ndalet me barazim në duelin ndaj Makedonija Gj.P, ndërsa ata arrijnë fitore në transfertë kundër Tikveshit. Në këtë skenar, Struga do të shkonte në pushimin dimëror si kampione e vjeshtës.

Ndërkohë, kampioni aktual, Shkëndija, ka pësuar ngecje gjatë javëve të fundit dhe praktikisht është jashtë garës për titullin vjeshtor. Megjithatë, tetovarët mbeten ende brenda objektivit madhor, mbrojtjes së titullit në fund të sezonit, pasi distanca me kreun është e rikuperueshme në pjesën pranverore.

Në mesin e tabelës qëndrojnë dy ekipet tjera shqiptare, Bashkimi dhe Arsimi. Të dy skuadrat po zhvillojnë një sezon të qetë, larg zonës së rrezikut, por edhe pa presion për garë në kreun e klasifikimit. Të dyja ekipet synojnë ta mbyllin vjeshtën me rezultate pozitive për të hyrë më të forta në fazën pranverore.

Në anën tjetër, situata më e rëndë i takon Shkupit, i cili po zhvillon sezonin më të dobët në historinë e klubit. Me vetëm një pikë nga 15 ndeshje, Shkupi është ekipi i vetëm që nuk ka provuar ende shijen e fitores. Për të kaltrit e Çairit, java e 16-të është më shumë një përpjekje për të shpëtuar krenarinë sesa luftë për pikë. /Telegrafi/

Dyshet e javës së 16-të:

05.12. – 13:00
• Makedonija Gj.P – Vardari
• Tikveshi – Struga

06.12. – 13:00
• Bashkimi – Shkëndija

07.12. – 13:00
• Shkupi – AP Brera
• Rabotniçki – Sileksi

08.12. – 13:00
• Arsimi – Pelisteri

Bordi Drejtues i Federatës së Futbollit të Maqedonisë (FFM) në mbledhjen e sotme vendosi të mos e rinovojë kontratën e përzgjedhësit të Përfaqësueses A, Bllagoja Milevski, mandati i të cilit ka përfunduar më 30 nëntor 2025. Me këtë mbyllet një kapitull i gjatë i Milevskit në përfaqësuesen e Maqedonisë, ku ai ishte i angazhuar që nga viti 2014, shkruan Telegrafi.

Si trajner i ekipit A, prej 1 gushtit 2021, Milevski e drejtoi Maqedoninë në gjithsej 48 ndeshje. Nën drejtimin e tij, përfaqësuesja regjistroi 18 fitore, 14 barazime dhe 16 humbje. Gjatë kësaj periudhe, Maqedonia realizoi disa arritje të rëndësishme: fitoi dy ndeshje “play-off” për Botërorin, e mbylli në vend të parë në Grupin C të Ligës së Kombeve dhe siguroi kalimin në divizionin B për edicionin e ardhshëm.

“Federata e Futbollit e Maqedonisë shpreh mirënjohje të sinqertë për seleksionuesin Bllagoja Milevski dhe stafin e tij për punën e palodhur, bashkëpunimin profesional dhe rezultatet e arritura. I urojmë suksese në vazhdimin e karrierës”, thuhet në njoftimin e FFM-së.

Nga federata theksojnë se përfaqësuesja ka nevojë për energji të re dhe motivim të ri për sfidat që e presin. “Besojmë se me një staf të ri profesional do të sjellim një ‘erë të re’ në ekip, që do të forcojë konkurrencën dhe ambicien e Maqedonisë në arenën ndërkombëtare.”

FFM siguron se mbetet e përkushtuar për kushte optimale pune dhe mbështetje të plotë për ekipin e përfaqëseuses. Po ashtu, vlerëson bashkëpunimin profesional me Milevskin dhe stafin e tij, duke theksuar se ekipi do të vazhdojë të ketë mbështetjen e pakursyer edhe në fazën e re që e pret.

Sa i përket përzgjedhësit të ri, Bordi Drejtues pritet të marrë një vendim jo më vonë se 25 dhjetori 2025. Ndër kandidatët vendorë që përmenden për stolin e përfaqësueses është edhe trajneri aktual i Vardarit, Goce Sedlloski. /Telegrafi/