Martesa nuk është vetëm dashuri, kimi apo dëshira për të ndërtuar një jetë me dikë. Është një zgjedhje që të lidh me një person përtej versionit që njeh sot: me ndryshimet e tij, vështirësitë, frikërat, financat, të kaluarën dhe mënyrën se si do të përballeni me jetën.

Ekspertja e marrëdhënieve Jillian Turecki ka ndarë gjashtë gjëra që duhet t’i kuptosh përpara se të vendosësh të martohesh me dikë. Në thelb, të gjitha të çojnë te një pyetje: A është ky person dikush me të cilin mund të kalosh jo vetëm ditët e bukura, por edhe ato kur gjithçka bëhet e vështirë?

1. Asgjë nuk është më e rëndësishme se besimi

Besimi nuk ka të bëjë vetëm me besnikërinë. Është siguria se kur jeta të godet dhe gjithçka duket sikur po shembet, partneri yt do të afrohet drejt teje dhe jo do të largohet.

Personi me të cilin zgjedh të martohesh nuk duhet të jetë vetëm ai që feston me ty kur gjithçka shkon mirë. Duhet të jetë edhe ai që qëndron kur gjërat bëhen të vështira.

2. Personi me të cilin martohesh do të ndryshojë

Këtë duhet ta dish që në fillim: nuk po martohesh me një version të pandryshueshëm të një njeriu.

Trupi i tij do të ndryshojë. Hormonet, nevojat, dëshirat dhe ambiciet mund të ndryshojnë. Mënyra se si e sheh jetën në të 30-at mund të mos jetë e njëjtë me atë që do të ketë në të 40-at apo 50-at.

Edhe ti do të ndryshosh.

Prandaj duhet ta duash dikë përtej pamjes fizike dhe të jesh në gjendje të respektosh evolucionin e tij. Një jetë së bashku do të thotë të duash më shumë se një version të të njëjtit person.

3. Fol për paratë përpara martesës

Mos e trajto paranë si një temë të sikletshme.

Duhet të dish çfarë marrëdhënieje ka partneri yt me financat. Si shpenzon? A kursen? A ka borxhe? Si i përdor kreditë? A i përballon problemet financiare apo preferon të mos merret me to?

Nuk bëhet fjalë për ta gjykuar nga sa fiton. Bëhet fjalë për të kuptuar mënyrën se si mendon dhe sillet me paranë.

Sepse kur martohesh, vendimet financiare të partnerit bëhen pjesë e jetës tënde.

4. Mos pyet vetëm çfarë merr nga marrëdhënia

Të duash dikë gjatë fazave të ndryshme të jetës së tij është një privilegj. Por një marrëdhënie nuk mund të funksionojë vetëm duke pyetur veten: “A po më plotësohen nevojat e mia?”

Ka edhe një pyetje tjetër po aq të rëndësishme:

“Çfarë mund të jap unë?”

Si mund ta mbështesësh partnerin? Si mund t’ia bësh jetën më të mirë? Si mund të jesh një prani që e ndihmon të rritet, në vend që vetëm të presësh prej tij?

Dashuria nuk është vetëm ajo që merr. Është edhe ajo që zgjedh të japësh.

5. Martesa nuk është premtim se do të jesh gjithmonë i lumtur

Partneri yt nuk mund të të mbrojë nga çdo periudhë e vështirë e jetës. Nuk mund të zgjidhë çdo problem dhe as ta bëjë çdo ditë të bukur.

Dhe nuk duhet të presësh që ta bëjë.

Mund të të mbështesë, të të qëndrojë pranë dhe ta kalojë stuhinë bashkë me ty. Por ti vazhdon të jesh përgjegjës për mënyrën se si përballesh me jetën, emocionet dhe vështirësitë e tua.

Partneri mund të ecë përkrah teje. Nuk mund ta jetojë jetën në vendin tënd.

6. Përpara se të martohesh me dikë, përpiqu të kuptosh fëmijërinë e tij

Shumë nga mënyrat se si sillemi në një marrëdhënie kanë nisur shumë kohë përpara se ta njihnim partnerin.

Mënyra se si ai përballet me konfliktin, frika nga braktisja, nevoja për kontroll, vështirësia për të shprehur emocionet apo mënyra se si jep dhe merr dashuri mund të kenë rrënjë në fëmijëri.

Prandaj përpiqu të kuptosh si dhimbjet, por edhe gëzimet e fëmijërisë së tij, shfaqen sot tek ai si i rritur.

Sepse kur martohesh me dikë, nuk po zgjedh vetëm njeriun që ke përballë. Po bashkon jetën tënde edhe me historinë që e ka formuar atë.

Martesa nuk është të gjesh një njeri perfekt.

Është ta shohësh dikë ashtu siç është, të kuptosh se të dy do të ndryshoni dhe të dish se jeta nuk do të jetë gjithmonë e lehtë.

Dhe pastaj t’i bësh vetes pyetjen që ndoshta ka më shumë rëndësi se të gjitha të tjerat:

Kur jeta të mos jetë e bukur, a është ky ende personi që do të doje të kishe pranë?

The post 6 gjëra që duhet të dish përpara se të martohesh me dikë appeared first on iconstyle.al.

Neda Balluku ka bërë një nga rrëfimet e saj më të hapura dhe personale, disa muaj pasi ndarja nga Ogren Balluku u bë publike. Përmes një shkrimi të gjatë, ajo u ka kërkuar ndjesë njerëzve që e kanë ndjekur ndër vite, duke pranuar se imazhi që kishte përcjellë për jetën, martesën dhe familjen e saj nuk përputhej me realitetin që ajo po jetonte.

“Mbase gënjeva”, shkruan Neda, duke e nisur kështu një reflektim të fortë mbi mënyrën se si për vite me radhë kishte folur dhe kishte lënë të kuptohej publikisht se kishte ndërtuar familjen dhe marrëdhënien që dëshironte.

Ajo shpjegon se nuk bëhej fjalë për gënjeshtra të qëllimshme, por për një realitet që edhe vetë kishte pasur nevojë ta besonte.

“Gënjeshtrat e mia nuk ishin të errëta, por nuk ishin as të bardha. Nuk ishin të qëllimshme edhe pse për mua të nevojshme. Nuk ishin për një arsye, por edhe jo pa shkak. Prej vitesh, edhe pse në një formë që më shumë lija të kuptoja sesa tregoja vërtet, krijova një perceptim të gabuar publik për sesi ishte jeta ime, marrëdhënia ime dhe familja ime”, shkruan ajo.

Për Nedën, kuptimi i asaj që kishte ndodhur duket se ka ardhur pas një procesi të gjatë reflektimi. Ajo pranon se familja që prezantonte publikisht ishte, në njëfarë mënyre, edhe familja që ajo vetë dëshironte të kishte.

“Pas shumë vitesh pune me veten dhe reflektim të pambarimtë, kuptova se imazhi publik që krijoja ishte veçse ëndrra dhe iluzioni im. Dhe nevoja ime për të besuar se ia kisha dalë të krijoja diçka të bukur. Ajo që do kisha dashur jeta ime të ishte dhe mbase, nëse do e trumpetoja apo thjesht lija ta kuptoja, do ndodhte. Ose thjesht do e besoja dhe vetë.”

Rrëfimi merr një tjetër peshë kur vendoset përballë historisë së saj me Ogren Ballukun.

Neda dhe Ogreni u njohën në vitin 2010, gjatë pjesëmarrjes së tyre në edicionin e katërt të “Big Brother Albania”. Historia e dashurisë që nisi përpara kamerave vazhdoi edhe jashtë shtëpisë dhe në vitin 2015 ata u martuan.

Për rreth 15 vite, nga njohja deri te ndarja, ata ishin një nga çiftet e njohura të showbiz-it shqiptar. Nga marrëdhënia e tyre erdhën në jetë tre fëmijë, dy djemtë Serzh dhe Zai dhe vajza Suzie Ann.

Por në nëntor të vitit 2025, pas një periudhe me aludime për krizë në çift, Neda konfirmoi publikisht se ajo dhe Ogreni po ndaheshin dhe se kishin nisur procesin e divorcit pas rreth 10 vitesh martesë.

Në atë kohë, Neda tregoi se problemet mes tyre nuk kishin nisur papritur. Sipas saj, marrëdhënia prej vitesh nuk ishte më e shëndetshme dhe ata prej një periudhe jetonin të ndarë. Ajo zbuloi gjithashtu se çifti kishte kaluar një tjetër krizë të fortë në vitin 2020, por atëherë kishin vendosur të përpiqeshin sërish për të mbajtur familjen të bashkuar.

Nga ai pajtim, siç ka treguar vetë Neda, erdhi më pas në jetë edhe vajza e tyre e vogël.

Në rrëfimin e saj të ri, ajo duket se shkon edhe më tej. Këtë herë nuk flet vetëm për fundin e një martese, por për hendekun që kishte ekzistuar prej vitesh mes realitetit privat dhe imazhit publik të saj.

“Ndiej fort, së tepërmi, të kërkoj ndjesë. Komunikimi me njerëzit duhet të jetë i sinqertë, i pastër, i vërtetë. Sidomos për dikë si unë që dua t’i përkushtoj jetën komunikimit publik.”

Neda pranon se, ndërsa kishte qenë e sinqertë me publikun për atë që ishte si person, nuk kishte arritur të tregonte me të njëjtën transparencë realitetin e marrëdhënies në të cilën jetonte.

“Ndonëse kam qenë e ndershme për të treguar se cila isha, nuk bëra dot të njëjtën gjë për jetën në të cilën ndodhesha.”

Megjithatë, fundi i martesës nuk duket se ka ndryshuar bindjen e saj për dashurinë dhe familjen. Përkundrazi, ajo thotë se vazhdon të besojë tek një familje e shëndetshme dhe tek një marrëdhënie ku dy njerëz zgjedhin çdo ditë njëri-tjetrin përmes dashurisë dhe respektit.

“Ende sot besoj me gjithë zemër tek forca e familjes së ndershme dhe të shëndetshme. Tek partneriteti i sinqertë, i thellë, i prekshëm mes dy njerëzve që zgjedhin njëri-tjetrin çdo ditë sepse duhen dhe respektohen. Zemra ime lëngon për këtë. Por nuk mundem të mos kërkoj ndjesë që këtë e transmetova për vite me radhë, pa qenë aspak e vërtetë.”

Pas konfirmimit të ndarjes, raporti mes Nedës dhe Ogrenit u bë sërish objekt i vëmendjes mediatike në fillim të vitit 2026, kur çështjet mes tyre mbërritën edhe në dyert e gjykatës. Të dy palët ngritën pretendime ndaj njëri-tjetrit, ndërsa Neda kishte kërkuar urdhër mbrojtjeje. Për shkak të natyrës së pretendimeve dhe faktit se në qendër të situatës janë edhe tre fëmijët e tyre, Neda ka kërkuar vazhdimisht që kjo pjesë e jetës së saj të trajtohet me privatësi.

Edhe në statusin e fundit ajo pranon se prej afro një viti dëgjon versione të ndryshme për realitetin e saj të ri, por thotë se nuk fajëson askënd për këtë.

“Si mund t’i dinë të huajt të vërtetat e mia kur mua m’u deshën vite t’i pranoja dhe kuptoja vetë?!”, shkruan ajo.

Në fund, Neda u drejtohet pikërisht njerëzve që e kanë ndjekur gjatë gjithë këtyre viteve, nga koha kur u bë e njohur në “Big Brother”, te rikthimi i saj në ekran dhe puna në televizion.

“Faleminderit për të gjitha. Që ende më ndaloni në rrugë. Që ende më shkruani. Dhe ju dua shumë gjithmonë. ”

Një ndjesë publike, por mbi të gjitha një pranim se pas imazhit të familjes së lumtur që publiku kishte parë për vite me radhë, ekzistonte një realitet krejt tjetër, të cilin, siç thotë vetë Neda, asaj iu deshën vite për ta pranuar.

 

View this post on Instagram

 

A post shared by Neda Balluku (@nedaballuku)

The post “Mbase gënjeva”/ Neda Balluku kërkon ndjesë publike pas divorcit nga Ogreni: Krijova një perceptim të gabuar për jetën dhe familjen time appeared first on iconstyle.al.

Java e 17–23 gushtit vjen me një energji që nuk na lejon t’i kalojmë gjërat thjesht në sipërfaqe. Emocionet bëhen më intensive, marrëdhëniet kërkojnë përgjigje dhe disa prej vendimeve që kemi shtyrë prej kohësh mund të mos presin më.

Ditët e para të javës favorizojnë reflektimin, bisedat e rëndësishme dhe përballjen me atë që kemi shmangur, ndërsa fundjava sjell një ndryshim të dukshëm energjie. Me hyrjen e Diellit në Virgjëreshë më 22 gusht, vëmendja kalon te puna, financat, organizimi, shëndeti dhe vendosja e jetës në një ritëm më të rregullt.

Për disa shenja kjo mund të jetë një javë shumë e mirë për dashurinë dhe marrëdhëniet, për të tjera mund të hapen dyer në karrierë apo financa. Ndërsa disa të tjerëve yjet u kërkojnë vetëm një gjë: të mos marrin vendime të nxituara.

Ja çfarë rezervon java 17–23 gusht për secilën shenjë:

Dashi

Këtë javë mund ta gjesh veten duke menduar më shumë se zakonisht për atë që jep dhe atë që merr në këmbim. Kjo vlen si për marrëdhëniet personale, ashtu edhe për punën.

Në dashuri, mos u përpiq të interpretohesh çdo fjalë apo sjellje të personit tjetër. Një bisedë e sinqertë mund të zgjidhë shumë më tepër sesa hamendësimet. Nëse je single, një njohje interesante mund të vijë përmes shoqërisë ose një ambienti që nuk e kishe menduar si “romantik”.

Në punë, mund të shfaqet një mundësi për të treguar aftësitë e tua ose për të marrë përsipër diçka të re. Financiarisht, shmang shpenzimet impulsive dhe mendo pak më gjatë para një blerjeje të madhe.

Këshilla e javës: Mos reago menjëherë. Informohu, mendo dhe pastaj vepro.

Demi

Për Demin, java kërkon të gjendet ekuilibri mes sigurisë që të pëlqen dhe ndryshimeve që po trokasin në derë. Jo çdo ndryshim është kërcënim; disa mund të jenë pikërisht ajo që të duhet.

Në punë mund të hapet një diskutim interesant për një projekt, bashkëpunim apo ndryshim pozicioni. Mbaji sytë hapur, sepse një mundësi mund të vijë në një formë ndryshe nga ajo që prisje.

Në dashuri, një bisedë e papritur mund të nxjerrë në sipërfaqe diçka që ka mbetur pezull. Mos u mbyll. Dëgjo edhe versionin e personit tjetër.

Me paratë kërkohet kujdes, veçanërisht nëse ke disa shpenzime të mëdha përpara.

Këshilla e javës: Mos i thuaj “jo” diçkaje vetëm sepse është ndryshe nga ajo që kishe planifikuar.

Binjakët

Mendja jote këtë javë punon me shpejtësi dhe do të kesh shumë ide, biseda dhe plane njëkohësisht. Sfida është të vendosësh se cilat prej tyre meritojnë vërtet energjinë tënde.

Në aspektin profesional, një ide që ke prej kohësh mund të fillojë më në fund të marrë formë. Organizohu dhe mos u shpërnda në shumë drejtime.

Dashuria bëhet më interesante. Për çiftet, komunikimi është çelësi. Për beqarët, një flirt mund të nisë krejt natyrshëm nga një bisedë apo miqësi.

Financat kërkojnë pak më shumë disiplinë. Mund të tundohesh nga një blerje spontane, por pyet veten nëse të duhet vërtet.

Këshilla e javës: Një plan i qartë do të të çojë shumë më larg sesa dhjetë ide të nisura përgjysmë.

Gaforrja

Një javë emocionale, por potencialisht shumë e vlefshme për ty. Mund të kuptosh më qartë se çfarë dëshiron dhe, mbi të gjitha, çfarë nuk dëshiron më.

Në marrëdhënie, shmang sinjalet kontradiktore. Nëse ke diçka për të thënë, thuaje. Personi përballë teje nuk mund të lexojë mendimet e tua.

Në punë mund të marrësh një vlerësim, përgjigje apo rezultat që të jep më shumë siguri. Edhe financat mund të sjellin një surprizë pozitive, por kjo nuk do të thotë se duhet të rritësh menjëherë shpenzimet.

Nga mesi i javës mund të ndjesh nevojën për të kaluar më shumë kohë me njerëzit që të bëjnë të ndihesh vërtet mirë.

Këshilla e javës: Thuaje atë që ndjen, por mos lejo emocionin e momentit të marrë vendimet për ty.

Luani

Java nis me ty ende në qendër të vëmendjes dhe kjo është një periudhë e mirë për të treguar se çfarë di të bësh.

Në karrierë, mos e minimizo një ide vetëm sepse të tjerët nuk e kuptojnë menjëherë. Kreativiteti dhe vetëbesimi mund të të hapin një derë interesante. Një propozim spontan apo një bisedë pune mund të rezultojë më e rëndësishme nga sa duket në fillim.

Në dashuri, tensionet e vogla mund të zbuten nëse të dyja palët heqin dorë nga krenaria. Për çiftet, humori dhe koha cilësore së bashku rikthejnë afërsinë. Për beqarët, fundjava duket më interesante për takime.

Këshilla e javës: Mos prit që dikush tjetër të të japë leje për të shkëlqyer.

Virgjëresha

Po afron sezoni yt dhe energjia fillon të ndryshojë dukshëm në favorin tënd.

Kjo javë mund të të bëjë të reflektosh mbi muajt e fundit dhe mbi gjërat që dëshiron të ndryshosh. Mund të ndjesh nevojën për të pastruar jo vetëm ambientin përreth, por edhe axhendën, marrëdhëniet dhe mendimet e tua.

Në punë, një çështje e komplikuar mund të fillojë të qartësohet. Financiarisht mund të shfaqet një mundësi e mirë ose të marrësh një vendim që të sjell më shumë stabilitet në vazhdim.

Në dashuri, mos u kënaq me gjysmë-përgjigje. Nëse diçka nuk është e qartë, pyet.

Nga 22 gushti, kur Dielli hyn në shenjën tënde, fillon një kapitull i ri personal.

Këshilla e javës: Bëj vend për versionin e ri të vetes që po vjen.

Peshorja

Marrëdhëniet janë tema kryesore e javës për ty.

Mund të kuptosh shumë për dikë duke bërë diçka që nuk është gjithmonë e lehtë për Peshoren: duke mos ndërhyrë. Shiko se kush të kërkon, kush investon dhe kush është aty edhe kur ti nuk je personi që mban gjithçka në ekuilibër.

Në dashuri, kjo mund të sjellë një realizim të rëndësishëm. Për disa Peshore, një marrëdhënie bëhet më serioze; për të tjera, mund të vijë momenti për të vendosur kufij.

Në punë përdor diplomacinë tënde natyrale, por mos premto më shumë nga sa mund të realizosh.

Këshilla e javës: Mos bëj gjithmonë ti të gjithë punën për ta mbajtur një marrëdhënie gjallë.

Akrepi

Java nis me emocione të forta dhe mund të ndjesh sikur gjithçka po të prek pak më shumë se zakonisht.

Por jo çdo situatë kërkon reagim. Në fakt, një nga mësimet më të rëndësishme të javës është të kuptosh se cilat beteja ia vlejnë dhe cilat zgjidhen më mirë pa ndërhyrjen tënde.

Në punë, diçka që ka qëndruar pezull mund të fillojë të lëvizë. Përpjekjet që ke bërë në heshtje mund të fillojnë të japin rezultat.

Në dashuri, kërkon thellësi dhe sinqeritet. Një marrëdhënie sipërfaqësore nuk do të të mjaftojë. Nëse je single, mund të të tërheqë dikush me një energji misterioze ose shumë ndryshe nga njerëzit që zgjedh zakonisht.

Këshilla e javës: Jo çdo gjë që ndjen kërkon një reagim.

Shigjetari

Një javë që mund të të sjellë mundësi interesante, veçanërisht në punë, financa dhe rrethin shoqëror.

Një kontakt, mik i vjetër apo person që ke njohur më parë mund të luajë një rol të papritur. Mos i nënvlerëso lidhjet që ke krijuar ndër vite.

Në karrierë mund të vijë një lajm pozitiv, një mundësi e re ose një shpërblim për diçka që ke bërë më herët. Edhe financiarisht situata mund të përmirësohet.

Në dashuri, megjithatë, mos u nxito të japësh përgjigje. Mund të të duhet pak kohë për të kuptuar se çfarë dëshiron vërtet.

Këshilla e javës: Ndonjëherë heshtja të jep përgjigjen që nuk e gjen dot duke folur.

Bricjapi

Për ty kjo është një javë përgjegjësish, por edhe progresi.

Në punë mund të marrësh më shumë përgjegjësi, të të besohet një projekt i rëndësishëm ose të shfaqet një mundësi që të vendos më afër objektivave të tua. Mos u tremb nga ngarkesa nëse e di se ku të çon.

Në financa, strategjia fiton mbi impulsin. Është një periudhë e mirë për të menduar afatgjatë.

Në familje mund të lindë një keqkuptim i vogël. Mos u bëj menjëherë gjykatësi i situatës; dëgjo të dyja palët.

Në dashuri, dikush mund të kërkojë më shumë nga koha dhe vëmendja jote.

Këshilla e javës: Nuk ke pse të kontrollosh çdo detaj që gjërat të shkojnë mirë.

Ujori

Partneritetet, marrëdhëniet dhe bashkëpunimet marrin një rëndësi të veçantë këtë javë.

Në punë mund të kuptosh se një objektiv që dukej i vështirë për t’u arritur vetëm bëhet shumë më i realizueshëm kur pranon ndihmën e duhur. Madje një person që e ke parë më parë si konkurrent mund të shndërrohet në aleat.

Në dashuri kërkohet komunikim. Nëse je në një marrëdhënie, mos supozo se partneri e di çfarë mendon. Thuaje.

Për beqarët, një njohje përmes punës, miqve apo një aktiviteti social mund të bëhet interesante.

Kujdes vetëm me shpenzimet, sepse dëshira për t’i bërë qejfin vetes mund të jetë pak më e madhe këtë javë.

Këshilla e javës: Nuk ke pse ta bësh gjithçka vetëm.

Peshqit

Java të kërkon të zbresësh pak nga bota e mendimeve dhe t’u kushtosh vëmendje gjërave konkrete.

Puna, rutina dhe financat kërkojnë organizim. Nëse ke lënë pas dore disa detaje, fundi i javës është moment shumë i mirë për t’i sistemuar.

Në dashuri, intuita jote është e fortë, por këtë herë mos u mbështet vetëm tek ajo. Nëse ke dyshime për diçka, kërko fakte dhe komunikim të qartë.

Një projekt apo çështje që ka mbetur pezull mund të përfundojë më në fund, duke të dhënë ndjesinë se po mbyll një kapitull.

Edhe financiarisht, rutina dhe disiplinimi mund të japin rezultate më të mira sesa një zgjidhje e shpejtë.

Këshilla e javës: Ëndërro sa të duash, por këtë javë bëji ëndrrat plan.

Në përgjithësi, 17–23 gushti është një javë që nis me emocione dhe pyetje, por përfundon me më shumë qartësi. Ajo që në fillim duket e komplikuar mund të marrë kuptim ndërsa afrohet fundjava. Me hyrjen e Diellit në Virgjëreshë, vjen momenti për të lënë pas fjalët dhe për të kaluar te veprimet: të organizojmë, të vendosim kufij, të rregullojmë financat dhe të kujdesemi më shumë për veten.

Dhe për disa shenja, një vendim i marrë këtë javë mund të jetë fillimi i diçkaje shumë më të madhe.

The post Horoskopi javor 17–23 gusht/ Një javë që ndryshon shumëçka: Dashuri, vendime dhe mundësi të reja për 12 shenjat appeared first on iconstyle.al.

Big Brother VIP Albania do të rikthehet edhe këtë vit. Konfirmimi ka ardhur nga vetë producentja e formatit, Sara Hoxha, e cila i është përgjigjur publikisht një ndjekëseje në Instagram, duke i dhënë fund pikëpyetjeve nëse reality show më i komentuar në Shqipëri do të kishte një tjetër edicion.

Gjithçka nisi pasi Sara publikoi në InstaStory një postim lidhur me sezonin e ri sportiv në DigitAlb. Një ndjekëse e pyeti nëse transmetimi i ndeshjeve gjatë javës mund të nënkuptonte se këtë vit nuk do të kishte “Big Brother VIP”.

“S’ka Big Brother këtë vit? Se ndeshjet transmetohen të martë, të mërkurë”, shkroi ndjekësja.

Sara Hoxha nuk e la përgjigjen të hapur për interpretime.

“Po ku rrimë dot ne pa @bigbrotheralb_vip ”, iu përgjigj producentja, duke konfirmuar kështu se formati është pjesë e planeve të Top Channel edhe për sezonin e ardhshëm televiziv.

Përgjigjja e saj merr rëndësi edhe për faktin se Sara Hoxha është producentja ekzekutive e “Big Brother VIP Albania” dhe ka qenë një prej figurave kryesore pas produksionit të formatit.

Edicioni i pestë i “Big Brother VIP Albania” nisi më 20 dhjetor 2025 dhe u mbyll më 18 prill 2026, pas 120 ditësh, me Selin Bollatin fituese. Programi u drejtua nga Ledion Liço dhe u transmetua në Top Channel, ndërsa jeta brenda shtëpisë u ndoq 24 orë përmes kanaleve të dedikuara të DigitAlb.

Tashmë, vetëm pak muaj pas finales së edicionit të pestë, reagimi i Sara Hoxhës është sinjali më i qartë se “Big Brother VIP Albania 6” po vjen.

Megjithatë, deri tani nuk është bërë publik një njoftim zyrtar me datën e nisjes së edicionit të ri, emrat e banorëve apo drejtuesin e spektaklit. Për momentin, Sara ka konfirmuar atë që fansat donin më shumë të dinin: shtëpia më e famshme në Shqipëri do t’i hapë sërish dyert.

The post “Po ku rrimë dot ne pa Big Brother VIP”/ Sara Hoxha konfirmon rikthimin e formatit edhe këtë vit appeared first on iconstyle.al.

Pa një kështjellë, pa qindra të ftuar dhe pa ceremoninë madhështore që mund të pritej nga një prej çifteve më të famshëm në botë. Cristiano Ronaldo dhe Georgina Rodríguez janë martuar pas 10 vitesh dashuri, duke zgjedhur që betimet t’i shkëmbejnë në vendin më familjar për ta: në dhomën e ndenjes së shtëpisë së tyre në Cascais, Portugali.

Ceremonia civile u zhvillua më 11 gusht 2026 dhe ishte jashtëzakonisht intime. Pranë çiftit ishin pesë fëmijët e tyre: Cristiano Jr., binjakët Eva Maria dhe Mateo, Alana Martina dhe Bella. Në vend të spektaklit dhe luksit që shoqëron zakonisht dasmat e personazheve të këtij niveli, Cristiano dhe Georgina zgjodhën familjen dhe shtëpinë.

Zgjedhja e dhomës së ndenjes nuk ishte rastësi. Georgina ka shpjeguar se donte që një nga momentet më të rëndësishme të jetës së tyre të ndodhte pikërisht aty ku familja jeton përditshmërinë e saj.

“Kemi zgjedhur ta bëjmë në dhomën e ndenjes së shtëpisë sonë, aty ku hamë mëngjesin, drekën dhe darkën dhe ku jetojmë realitetin e jetës sonë. Pas 30 vitesh dua që fëmijët të mendojnë: ‘Diçka e mrekullueshme ndodhi në këtë tavolinë — betimet e martesës së prindërve tanë.’”

Edhe data mbante një simbolikë të fortë: martesa shënoi 10-vjetorin e takimit që ndryshoi jetën e të dyve. Historia e tyre nisi në verën e vitit 2016 në Madrid, kur Georgina punonte si shitëse në një butik Gucci dhe Cristiano hyri si klient. Vetë Georgina ka treguar ndër vite se takimi me futbollistin ishte një moment që nuk e harroi kurrë.

Dhe pikërisht këtu fshihet një tjetër detaj shumë i bukur i dasmës së tyre: Gucci u rikthye në historinë e çiftit 10 vite më vonë.

Në ditën e martesës, si Georgina ashtu edhe Cristiano ishin veshur nga shtëpia italiane e modës. Georgina hoqi dorë nga fustani klasik voluminoz i nusërisë dhe zgjodhi një kostum të bardhë me fund mëndafshi, ndërsa Cristiano u shfaq me një kostum bezhë. Ishte një zgjedhje që e lidhte ditën e martesës drejtpërdrejt me vendin ku kishte nisur historia e tyre.

Nga një takim rastësor në Gucci në Madrid, te martesa me Gucci një dekadë më vonë. Një rreth që për çiftin duket se u mbyll pikërisht aty ku kishte nisur.

Georgina kishte vetëm 22 vjeç kur punonte në butik në Madrid. Jeta e saj ndryshoi pas njohjes me Ronaldon, por historia që nisi në vitin 2016 u kthye gradualisht në një familje. Vetë ajo e ka kujtuar më vonë me nostalgji pikërisht Gucci-n si vendin “ku nisi historia jonë e dashurisë dhe jeta jonë së bashku”.

Një tjetër detaj domethënës ishte se fëmijët nuk ishin thjesht të pranishëm në ceremoni, por ishin në qendër të saj. Veshjet e tyre ishin koordinuar në të bardhë dhe bezhë, në harmoni me prindërit, ndërsa e gjithë ceremonia ishte konceptuar si një kujtim familjar dhe jo si një event publik.

Pas ceremonisë civile në shtëpi, familja mori edhe një bekim fetar në Fátima, në një ceremoni të rezervuar.

Megjithatë, kjo mund të mos jetë festa e vetme e martesës së Cristiano Ronaldos dhe Georgina Rodríguez. Çifti ka lënë të hapur mundësinë që në të ardhmen të organizojë edhe një celebrim më të madh me familjarë dhe miq.

Për momentin, ata zgjodhën diçka krejt tjetër: shtëpinë, fëmijët dhe disa nga simbolet që kanë shoqëruar historinë e tyre që nga fillimi.

Dhjetë vite më parë, Georgina ishte pas banakut të Gucci-t kur takoi Cristiano Ronaldon. Më 11 gusht 2026, të dy u veshën me Gucci për t’i thënë “po” njëri-tjetrit. Por këtë herë jo mes luksit të një butiku në Madrid, por në shtëpinë e tyre, përpara fëmijëve.

The post Nga Gucci ku nisi dashuria, te Gucci në ditën e martesës/ Cristiano Ronaldo dhe Georgina kurorëzojnë historinë 10-vjeçare në shtëpi, vetëm pranë fëmijëve appeared first on iconstyle.al.

Hollywood-i është tronditur nga lajmi i ndarjes së parakohshme nga jeta të Hayden Panettiere, aktores së njohur amerikane që fitoi zemrat e publikut me rolet e saj në “Heroes” dhe “Nashville”. Ajo u nda nga jeta më 16 gusht, në moshën vetëm 36-vjeçare. Lajmi u konfirmua nga familja dhe përfaqësuesi i saj, ndërsa shkaku i vdekjes nuk është bërë ende publik.

Në një deklaratë prekëse, familja e përshkroi Hayden si një njeri që sillte dashuri dhe gëzim te të gjithë ata që e njihnin, por edhe te miliona njerëz që e ndoqën ndër vite në ekran. Babai i saj, Skip Panettiere, kërkoi gjithashtu respektimin e privatësisë së familjes në këto momente të vështira.

Hayden e nisi rrugëtimin në botën e spektaklit që në fëmijëri. Një nga rolet e saj të para të rëndësishme ishte në telenovelën “One Life to Live”, ndërsa fama ndërkombëtare erdhi me personazhin e Claire Bennet në serialin “Heroes”. Më vonë ajo do të bëhej po aq e dashur për publikun si Juliette Barnes në “Nashville”, rol që i solli edhe dy nominime për Golden Globe.

Karriera e saj përfshinte gjithashtu filma si “Remember the Titans”, “Raising Helen” dhe serinë “Scream”, ndërsa ajo kishte punuar edhe si aktore zanore. Roli i saj i fundit ishte në thriller-in psikologjik “Sleepwalker”, të publikuar në vitin 2026.

Pas figurës së suksesshme që publiku njihte nga ekrani, Hayden kishte folur hapur edhe për kapitujt më të vështirë të jetës së saj. Në muajin maj të këtij viti ajo publikoi kujtimet “This Is Me: A Reckoning”, ku rrëfeu betejat e saj me varësinë, depresionin pas lindjes dhe vitet e vështira që pasuan.

Aktorja la pas vajzën e saj, Kaya, me të cilën kishte treguar se ruante një lidhje shumë të fortë pavarësisht se jetonin në vende të ndryshme. Vetëm pak muaj para ndarjes nga jeta, Hayden kishte folur publikisht me shumë dashuri për marrëdhënien me të bijën.

Vdekja e saj në një moshë kaq të re ka sjellë reagime dhe homazhe nga industria e filmit dhe televizionit, duke rikthyer në kujtesë një karrierë që nisi kur Hayden ishte ende fëmijë dhe u shndërrua në një prej figurave më të njohura televizive të brezit të saj.

The post Hollywood-i në zi: Aktorja Hayden Panettiere ndahet nga jeta në moshën 36-vjeçare appeared first on iconstyle.al.

Prichard Colón, ish-boksieri portorikan historia tragjike e të cilit tronditi botën e sportit, është ndarë nga jeta në moshën 33-vjeçare. Lajmi u konfirmua nga babai i tij, Richard Colón, më shumë se një dekadë pas ndeshjes fatale që i ndërpreu karrierën dhe i ndryshoi përgjithmonë jetën. Shkaku i saktë i vdekjes nuk është bërë ende publik.

Dikur një prej talenteve më premtuese të boksit portorikan, Colón kishte përpara një karrierë që dukej se po shkonte drejt majave. Para natës që do të ndryshonte gjithçka, ai kishte zhvilluar 16 ndeshje si profesionist dhe i kishte fituar të gjitha, 13 prej tyre me nokaut.

Por më 17 tetor 2015, kur ishte vetëm 23 vjeç, gjithçka mori një tjetër drejtim.

Colón u ngjit në ring në Fairfax të Virginias për t’u përballur me Terrel Williams. Gjatë ndeshjes, ai mori në mënyrë të përsëritur goditje në pjesën e pasme të kokës, të njohura në boks si “rabbit punches” dhe të ndaluara nga rregullat e sportit.

Colón u ankua disa herë për goditjet. ESPN, në një investigim të mëvonshëm kushtuar rastit, raportoi se në raundin e shtatë ai u rrëzua pas një goditjeje në pjesën e pasme të kokës dhe qafës. Gjatë ndeshjes ai komunikoi edhe shqetësimet e tij, përfshirë marramendjen, por dueli vazhdoi.

Në fund të raundit të nëntë ndodhi një tjetër episod i pazakontë. Ekipi i Colón mendoi se ndeshja kishte përfunduar dhe i hoqi dorezat. Kjo çoi në skualifikimin e tij dhe humbjen e parë të karrierës.

Vetëm se pak minuta më vonë, askush nuk do të mendonte më për rezultatin.

Gjendja e 23-vjeçarit nisi të përkeqësohej. Pasi u largua nga ringu, ai volli dhe më pas humbi ndjenjat në dhomat e zhveshjes.

U transportua me urgjencë në spital, ku mjekët zbuluan se kishte pësuar një hematomë subdurale, një gjakderdhje të rëndë në tru. Colón iu nënshtrua një ndërhyrjeje kirurgjikale emergjente për të lehtësuar presionin dhe ënjtjen në tru.

Më pas ra në koma.

Do të kalonin 221 ditë, më shumë se shtatë muaj, përpara se Prichard Colón të dilte nga koma.

Kur u zgjua, jeta që njihte nuk ekzistonte më.

Boksieri që vetëm disa muaj më parë po ndërtonte një rekord të pamposhtur dhe ëndërronte majat e sportit kishte pësuar dëmtime të rënda cerebrale. Karriera e tij përfundoi atë natë, ndërsa nisi një betejë krejt tjetër, këtë herë larg ringut.

Familja e tij u bë pjesë e pandashme e kujdesit dhe rehabilitimit. Nëna e tij, Nieves, u kujdes për të për vite me radhë, ndërsa në rrjetet sociale familja publikonte herë pas here momente nga përparimi i tij.

Me kalimin e viteve pati shenja përmirësimi. Colón mund të reagonte ndaj disa komandave dhe familja punoi edhe me teknologji që e ndihmonte në komunikim. Por ai nuk u rikuperua kurrë plotësisht nga dëmtimi cerebral që pësoi në vitin 2015.

Historia e tij nuk mbeti vetëm një tragjedi sportive. Ajo u kthye gjithashtu në një çështje mbi sigurinë e boksierëve, përgjegjësinë e personave rreth ringut dhe mënyrën se si u menaxhua ndeshja atë natë.

Në vitin 2017, prindërit e Colón ndërmorën një betejë ligjore duke kërkuar më shumë se 50 milionë dollarë dëmshpërblim, me pretendime për neglizhencë që përfshinin mjekun e ndeshjes dhe organizatorët. Sipas raportimeve të fundit, beteja ligjore nuk kishte marrë ende një zgjidhje përfundimtare.

Edhe Terrel Williams, kundërshtari i tij në atë ndeshje, foli më vonë për tragjedinë. Ai deklaroi se lutej për Prichard çdo ditë dhe se nuk kishte pasur kurrë qëllim që t’i shkaktonte një dëmtim të tillë.

Ndërkohë Colón vazhdoi betejën e tij për më shumë se një dekadë, i rrethuar dhe i përkujdesur nga familja.

Historia e tij preku thellë edhe komunitetin ndërkombëtar të boksit. Colón u nderua nga WBC si kampion nderi, ndërsa pas lajmit për vdekjen e tij kanë ardhur reagime dhe homazhe nga organizata dhe figura të sportit.

Më 13 gusht 2026, 11 vjet pas asaj nate që ndau jetën e tij në dy pjesë, erdhi lajmi i trishtë: Prichard Colón u nda nga jeta në moshën 33-vjeçare.

Prichard Colón hyri në atë ring në moshën 23-vjeçare si një boksier i pamposhtur, me 16 fitore dhe një karrierë të tërë përpara. Ai nuk doli më kurrë prej tij si i njëjti njeri.

Për 11 vitet që pasuan, historia e tij nuk ishte më ajo e fitoreve dhe nokautëve, por e një beteje shumë më të gjatë jashtë ringut, e një familjeje që nuk u largua asnjëherë nga krahu i tij dhe e një nate që mbetet një nga kapitujt më të dhimbshëm të boksit modern.

The post Ishte vetëm 23 vjeç kur një ndeshje i ndryshoi jetën përgjithmonë/ Shuhet Prichard Colón, boksieri që kaloi 221 ditë në koma appeared first on iconstyle.al.

Ndoshta nuk është shuma ajo që të dhemb. Mund të jenë 50 euro, 500 apo disa mijëra. Mund të jetë një send, një kartë bankare apo diçka që e kishe në shtëpi. Kur personi që të vjedh është shoku apo shoqja jote e ngushtë, ajo që humbet nuk janë vetëm paratë. Është besimi.

Dhe pikërisht kjo e bën situatën kaq të vështirë.

Në internet gjenden dhjetëra histori të njerëzve që janë përballur me të njëjtën pyetje: Çfarë bën kur zbulon se njeriu të cilin e lije të hynte në shtëpinë tënde, i tregoje problemet e tua dhe ndoshta e konsideroje familje, të ka vjedhur?

Një 23-vjeçar tregonte se kishte kaluar një ditë krejt normale në shtëpi me shokun e tij më të mirë. Luajtën video-games dhe, në një moment, ai shkoi të flinte ndërsa shoku vazhdoi të qëndronte aty. Të nesërmen zbuloi se rreth 300 dollarë që i mbante prej ditësh në një raft kishin zhdukur.

E pyeti. Shoku e mohoi.

Më vonë iu zhdukën edhe kufjet Beats dhe më pas mësoi se njerëz të tjerë kishin pasur eksperienca të ngjashme me të njëjtin person.

Në fund, ai nuk mori rrëfimin që kërkonte. Thjesht filloi të largohej.

Në një rast tjetër, një burrë zbuloi se shoku i tij më i mirë prej 15 vitesh kishte marrë 200 euro nga paratë që një grup miqsh kishte mbledhur për një dhuratë ditëlindjeje.

Ironikisht, të vërtetën e mësoi nga vetë shoku, i cili ia tregoi kur ishte i dehur.

Por në vend që situata të bëhej menjëherë bardhë e zi, viktima filloi të gjente justifikime për njeriun që e kishte tradhtuar. E dinte se ai po kalonte vështirësi financiare dhe mendonte se ndoshta atij i duheshin ato 200 euro më shumë.

Është një reagim shumë njerëzor kur personi që na lëndon është dikush që duam: fillojmë të kërkojmë shpjegime për të, përpara se të mbrojmë veten.

Por ekziston një dallim i rëndësishëm: të kuptosh pse dikush e bëri diçka nuk do të thotë ta justifikosh.

Vështirësia financiare mund të shpjegojë dëshpërimin. Nuk ndryshon faktin se një mik mund të kërkonte ndihmë, ndërsa zgjodhi të merrte diçka fshehurazi.

Një tjetër grua tregonte se shoqja e saj e ngushtë kishte përdorur kartën e saj për të bërë blerje, duke shpresuar se ajo nuk do t’i vinte re.

Pas zbulimit ndodhi diçka interesante: nuk po mendonte vetëm për paratë. Filloi të rishikonte të gjithë miqësinë.

Sjellje që më parë i kishte toleruar filluan t’i dukeshin ndryshe. Biseda të vjetra morën një tjetër kuptim. Dhe pyetja nuk ishte më vetëm “Pse më vodhi?”, por edhe “A e kam njohur vërtet këtë njeri?”

Ky është një nga efektet më të forta të tradhtisë.

Kur thyhet besimi, mendja fillon të kthehet pas: A ka ndodhur edhe herë të tjera? A më ka gënjyer për gjëra të tjera? A kishte shenja që nuk i pashë? Sa prej asaj që besoja për këtë marrëdhënie ishte e vërtetë?

Prandaj fjalia “nuk më interesojnë paratë, më dhemb që ma bëri ai/ajo” është shumë më e thellë nga sa duket.

Në një tjetër histori reale, tradhtia kishte përmasa shumë më të mëdha. Cara Campbell ia besoi drejtimin e biznesit shoqes së saj më të mirë prej rreth një dekade ndërsa po rikuperohej nga një operacion. Më vonë zbuloi se ajo kishte marrë mijëra paund përmes transaksioneve që përfundonin në llogaritë e saj.

Rasti shkoi deri në polici dhe gjykatë.

Megjithatë, Campbell tha se kishte zgjedhur ta falte.

Jo sepse ajo që kishte ndodhur ishte e pranueshme dhe as sepse miqësia mund të kthehej automatikisht aty ku kishte qenë. E fali që të mund të ecte vetë përpara.

Dhe këtu qëndron një nga dallimet më të rëndësishme kur flasim për tradhtinë: falja nuk është e njëjta gjë me pajtimin.

Mund ta falësh dikë dhe të mos e lejosh më të ketë të njëjtin vend në jetën tënde.

Mund të mos e urresh dhe përsëri të mos i japësh çelësin e shtëpisë.

Mund të pranosh kërkimfaljen dhe përsëri të mendosh: Nuk të besoj më.

Sepse falja është një vendim që mund ta marrësh për qetësinë tënde. Besimi, nga ana tjetër, duhet fituar përsëri.

Dhe kjo nuk ndodh me një “më fal”.

Ekspertët që flasin për rindërtimin e besimit pas tradhtisë theksojnë rëndësinë e përgjegjësisë, pendesës dhe ndryshimit të sjelljes në kohë. Një nga pyetjet kryesore është nëse po përballesh me një gabim të izoluar apo me një model sjelljeje.

Por përpara se të vendosësh nëse do të falësh, vjen momenti që shumë njerëz e kanë edhe më të vështirë: konfrontimi.

Instinkti mund të jetë të telefonosh menjëherë, të bërtasësh, të kërkosh shpjegime ose ta vendosësh personin përballë provave ndërsa je ende i zemëruar.

Por një bisedë e tillë ka më shumë gjasa të të japë përgjigjet që kërkon nëse fillimisht vendos se çfarë kërkon prej saj.

Do paratë mbrapsht?

Do të dëgjosh të vërtetën?

Do të kuptosh arsyen?

Do një kërkimfalje?

Apo e ke marrë tashmë vendimin për t’i dhënë fund miqësisë dhe thjesht dëshiron që personi ta dijë se ti e di?

Nëse ke prova të forta, konfrontimi mund të jetë shumë më i thjeshtë nga sa mendojmë:

“E di që mungojnë këto para dhe kam arsye të forta të besoj se i ke marrë ti. Dua të më tregosh çfarë ka ndodhur.”

Dhe pastaj, ndoshta pjesa më e rëndësishme është të heshtësh dhe të dëgjosh.

Sepse mënyra se si personi reagon kur zbulohet mund të tregojë po aq shumë sa vetë vjedhja.

A e pranon menjëherë?

A kërkon falje pa kushte?

A përpiqet ta riparojë dëmin?

A ofron vetë t’i kthejë paratë?

A e kupton se problemi nuk është vetëm shuma, por fakti që ka thyer besimin?

Apo fillon me:

“Ishin vetëm kaq.”

“Do t’i ktheja.”

“Ti ke më shumë para se unë.”

“Nuk e kuptoj pse po e bën kaq të madhe.”

Në rastin e dytë, nuk po përballesh vetëm me vjedhjen. Po përballesh edhe me mungesën e përgjegjësisë për të.

Dhe pikërisht këtu mund të vendoset e ardhmja e miqësisë.

Një njeri mund të bëjë diçka shumë të gabuar dhe të pendohet sinqerisht. Mund të marrë përgjegjësi, të mos kërkojë justifikime, të riparojë dëmin dhe të pranojë se besimi nuk do t’i rikthehet brenda një dite.

Por kur vjedhja shoqërohet me gënjeshtra, manipulim, minimizim të asaj që ka ndodhur ose përpjekje për të bërë viktimën të ndihet fajtore që po e ngre problemin, situata bëhet shumë më e vështirë për t’u riparuar.

Dhe nuk ka asnjë detyrim për të marrë një vendim menjëherë.

Ndonjëherë përgjigjja më e shëndetshme mund të jetë thjesht:

“Nuk e di ende nëse mund ta vazhdoj këtë miqësi. Më duhet distancë.”

Nëse bëhet fjalë për një shumë të konsiderueshme, përdorim të kartave ose llogarive bankare, vjedhje të përsëritur apo refuzim për të kthyer atë që është marrë, atëherë situata nuk është më vetëm një konflikt mes miqsh. Ruajtja e provave, sigurimi i kartave dhe llogarive dhe, kur është e nevojshme, ndjekja e rrugëve formale për rikuperimin e dëmit janë hapa që nuk duhen përjashtuar.

Në fund, ndoshta pyetja më e vështirë nuk është “A mund ta fal?”

Është:

“Edhe nëse e fal, a mund t’i besoj përsëri?”

Sepse paratë mund të kthehen.

Një send mund të zëvendësohet.

Edhe zemërimi, me kalimin e kohës, mund të shuhet.

Por kur njeriu që të ka vjedhur është pikërisht ai që besoje se nuk do ta bënte kurrë, ajo që duhet rindërtuar nuk është llogaria bankare. Është ideja që kishe për të.

Dhe ndonjëherë, ajo është gjëja që kushton më shumë.

The post Kur të vjedh njeriu që i besoje më shumë: A mund të shpëtojë një miqësi pas një tradhtie të tillë? appeared first on iconstyle.al.

Eurovision Song Contest 2027 do të mbahet në Burgas të Bullgarisë, qyteti bregdetar që është zgjedhur zyrtarisht për të pritur edicionin e 71-të të konkursit më të madh muzikor në Europë.

Bullgaria fitoi të drejtën për organizimin e Eurovisionit pasi Dara triumfoi në edicionin e vitit 2026 në Vjenë me këngën “Bangaranga”, duke i dhuruar vendit fitoren e parë në historinë e tij në këtë kompeticion.

Unioni Evropian i Transmetuesve, EBU, dhe Televizioni Kombëtar Bullgar, BNT, konfirmuan se Burgasi do të jetë qyteti pritës, ndërsa spektakli do të zhvillohet në Arena Burgas, një nga impiantet më të reja sportive dhe argëtuese të vendit, e hapur në vitin 2023.

Përzgjedhja erdhi pas një gare mes katër qyteteve bullgare. Burgasi, Sofja, Varna dhe Plovdivi paraqitën kandidaturat e tyre, ndërsa në fazën finale mbetën Burgasi dhe Sofja.

Sipas EBU-së, Burgasi fitoi falë një propozimi të fortë që kombinonte kapacitetet teknike të arenës, mundësitë e akomodimit, transportin dhe lidhjet ndërkombëtare.

Drejtori i Eurovision Song Contest, Martin Green, e cilësoi Burgasin si një qytet me identitet të fortë kulturor dhe muzikor, duke theksuar se organizatorët synojnë që Eurovisioni i parë i zhvilluar ndonjëherë në Bullgari të ketë një karakter të dallueshëm vendas, por pa humbur frymën e festivalit.

“Burgasi sjell diçka vërtet të veçantë në Eurovision Song Contest. Është një qytet i gjallë dhe mikpritës në brigjet e Detit të Zi, me ambicien, infrastrukturën dhe pasionin e nevojshëm për të mirëpritur familjen e Eurovisionit”, u shpreh ai.

Edhe drejtuesit e BNT-së kanë deklaruar se Bullgaria synon të prezantojë përpara miliona shikuesve kulturën, mikpritjen dhe profesionalizmin e saj, ndërsa puna për organizimin e spektaklit ka hyrë tashmë në një fazë intensive.

Eurovision Song Contest 2027 do të zhvillohet nga 11 deri më 15 maj. Gjysmëfinalja e parë do të mbahet më 11 maj, e dyta më 13 maj, ndërsa finalja e madhe është planifikuar për të shtunën, 15 maj.

Për Burgasin, përzgjedhja përfaqëson një moment historik, ndërsa për Bullgarinë Eurovision 2027 do të jetë hera e parë që vendi organizon konkursin.

The post Eurovision 2027 shkon në brigjet e Detit të Zi, zbulohet qyteti që do të presë spektaklin appeared first on iconstyle.al.

Lionel Messi ka thyer heshtjen pas ndarjes nga jeta të babait të tij, Jorge Messi, duke ndarë një prej mesazheve më personale dhe prekëse të karrierës së tij. Për yllin argjentinas, Jorge nuk ishte vetëm babai, por edhe miku, këshilltari dhe përfaqësuesi që e shoqëroi thuajse në çdo hap të rrugëtimit të tij në futboll.

“Babi, ende nuk mund ta besoj që je larguar”, nis mesazhi i Messit.

Kapiteni i Argjentinës shprehet se ende po përpiqet ta përballojë humbjen, ndërsa dhimbjen e bën edhe më të madhe ndjesia se kishin ende shumë momente për të jetuar së bashku.

“E di që po vuaje dhe se kështu është më mirë, por na le shumë shpejt. Kishim ende kaq shumë gjëra për të shijuar së bashku”, shkruan ai.

Një nga pjesët më emocionuese të mesazhit lidhet me Botërorin 2026. Messi tregon se babai i kërkonte vazhdimisht të luante në Botërorin e tij të fundit, ndërsa gjendja shëndetësore e Jorge ishte rënduar vetëm pak ditë përpara nisjes së turneut.

Leo kishte mbajtur gjallë shpresën se Argjentina do të arrinte deri në finale dhe se kjo kohë do t’i mjaftonte babait të tij për t’u rikuperuar dhe për të udhëtuar për ta parë.

“Vazhdoja të të thosha se do të arrinim në finale, që ti të mund të udhëtoje.”

Argjentina ia doli të shkonte deri në finale. Jorge, megjithatë, nuk mundi të ishte atje.

Messi rrëfen gjithashtu se gjatë gjithë Botërorit priste mesazhin e babait pas çdo ndeshjeje. Gjendja e tij e vështirë ishte kthyer në një tjetër motivim për të qëndruar në turne deri në fund.

“Arritëm në finale dhe ti nuk munde të ishe aty. Doja ta fitoja që të mund të ta sillja dhe të të tregoja edhe një tjetër”, shkruan Messi.

Argjentina e humbi finalen ndaj Spanjës dhe Leo zbulon një detaj veçanërisht të dhimbshëm. Kur u kthye pranë të atit, Jorge mendonte se finalja ishte vendosur me penallti. Babë e bir nuk arritën kurrë të flisnin siç duhej për gjithçka që kishte ndodhur gjatë atij Botërori.

Por historia e tyre shkonte shumë përtej trofeve dhe futbollit profesionist.

“Ti ishe babai, miku dhe përfaqësuesi im”, shkruan Messi.

Ai kujton vitet kur Jorge e çonte në stërvitje që fëmijë, shpesh menjëherë pasi përfundonte punën, dhe mënyrën se si rrallë mungonte në ndeshjet e tij. Më vonë, ai do të bëhej një figurë kyçe edhe në karrierën profesionale të të birit, duke e shoqëruar që nga hapat e parë e deri në rrugëtimin që e çoi te Barcelona dhe në majat e futbollit botëror.

Në lamtumirën e tij, megjithatë, Messi zgjedh të kujtojë mbi të gjitha babain, jo përfaqësuesin. Stërvitjet, ndeshjet, këshillat dhe madje edhe debatet mes tyre, pas të cilave Leo pranon se shpesh kuptonte se i ati kishte pasur të drejtë.

Humbja duket se ka tronditur aq shumë 39-vjeçarin, sa në mesazhin e tij ai flet hapur edhe për të ardhmen në futboll.

“Nuk e di çfarë do të bëj pa ty. Nuk e di si të vazhdoj”, shkruan Messi.

Më pas vjen një deklaratë që ka tërhequr menjëherë vëmendjen për atë që mund të nënkuptojë për karrierën e tij:

“Kam luajtur vetëm futboll dhe tani kam shumë dyshime nëse do të vazhdoj ta bëj edhe për shumë kohë.”

Fjalët e tij nuk përbëjnë një njoftim për tërheqje nga futbolli dhe Messi nuk thotë se ka marrë një vendim përfundimtar. Por ato tregojnë se sa thellë e ka prekur humbja e njeriut që kishte qenë pranë tij që nga dita e parë dhe se, për herë të parë, Leo po mendon për vazhdimin e rrugëtimit pa të.

Në fund, Messi flet edhe për fëmijët e tij. Ai premton se Jorge do të vazhdojë të jetë i pranishëm në familjen e tyre përmes vlerave që i ka përcjellë të birit.

“Do të më mungosh shumë, por do të jesh gjithmonë i pranishëm, sidomos në mënyrën se si i rris fëmijët e mi, sepse i mësoj dhe i edukoj ashtu siç më rrite ti mua.”

Në lamtumirën e tij nuk ka rekorde, Topa të Artë, gola apo trofe. Vetëm një djalë që i thotë lamtumirë të atit.

“U prehsh në paqe dhe kujdesu për ne nga lart, ashtu siç bëre këtu. Faleminderit për gjithçka.”

Dhe mesazhi mbyllet me fjalët më të thjeshta:

“Të dua, Babi.”

 

View this post on Instagram

 

A post shared by Leo Messi (@leomessi)

The post “Nuk di si të vazhdoj pa ty”/ Messi thyen heshtjen pas humbjes së të atit: Fjalët prekëse dhe dyshimet për të ardhmen në futboll appeared first on iconstyle.al.

The Weeknd nuk është ende gati t’i thotë lamtumirë emrit që e shndërroi në një prej yjeve më të mëdhenj të muzikës botërore. Pas vitesh deklaratash se po mendonte ta mbyllte këtë kapitull dhe të vazhdonte karrierën si Abel, artisti kanadez ka ndryshuar mendje.

Gjatë koncertit të tij në Stokholm më 8 gusht, pjesë e turneut “After Hours Til Dawn”, këngëtari 36-vjeçar, emri i vërtetë i të cilit është Abel Tesfaye, foli hapur me fansat për vendimin.

“Provova pak të përfundoja rrugëtimin tim si The Weeknd dhe nuk më pëlqen mënyra se si ndihem”, u shpreh ai, sipas një videoje të publikuar nga një fans. Më pas shtoi: “Do të jem gjithmonë këtu me ju”.

Deklarata shënon një kthesë nga planet që artisti kishte përmendur prej vitesh. Që në vitin 2022, ai kishte thënë se po mendonte ta ndryshonte emrin artistik në “Abel”, duke marrë si shembull Kanye West, i cili ndryshoi emrin në Ye.

“Ndihem sikur në këtë pikë duhet ta ndryshoj emrin tim artistik në ABEL”, deklaronte asokohe The Weeknd. Madje kishte hedhur idenë që emri të ndryshohej edhe ligjërisht, duke mbajtur vetëm “Abel”, në të njëjtën frymë me artistë si Madonna, Cher dhe Prince.

Në maj të vitit 2023 ai shkoi edhe më tej, kur në një intervistë për W Magazine deklaroi se albumi që po përgatiste mund të ishte publikimi i tij i fundit i madh nën emrin The Weeknd.

Por disa vite më vonë, duket se ndarja nga identiteti artistik që ka shoqëruar thuajse të gjithë karrierën e tij nuk është aq e thjeshtë sa kishte menduar.

Të paktën për momentin, Abel Tesfaye mbetet The Weeknd, duke vazhduar muzikën dhe performancat me emrin që e bëri të njohur në të gjithë botën.

The post Abel apo The Weeknd? Këngëtari i jep fund dilemës për emrin e tij artistik appeared first on iconstyle.al.

Albina Kelmendi ka ndarë me publikun një nga lajmet më të bukura të jetës së saj. Këngëtarja është bërë nënë për herë të parë, duke mirëpritur në jetë një djalë së bashku me bashkëshortin e saj, Valon Vataj.

Lajmin e ëmbël Albina e ka bërë të ditur përmes një postimi në Facebook, ku krahas emocioneve të para si nënë ka zbuluar edhe emrin që çifti ka zgjedhur për vogëlushin: Trim Vataj.

“Faleminderit Zotit që na bekoi me një djalë.

Lusim Zotin që të rritet me shëndet, me gjitha të mirat, të bëhet fëmijë i mbarë dhe të na bëjë gjithmonë krenarë.

Mirë se erdhe në jetën tonë, 𝐓𝐫𝐢𝐦 𝐕𝐚𝐭𝐚𝐣!”, ka shkruar këngëtarja.

 

View this post on Instagram

 

A post shared by Valon Vataj (@valon.vataj)

Me ardhjen në jetë të Trimit, Albina dhe Valoni nisin kështu një kapitull krejt të ri, tashmë në rolin e prindërve për herë të parë.

The post Albina Kelmendi bëhet nënë për herë të parë, zbulon emrin e veçantë të djalit appeared first on iconstyle.al.

Qielli do të dhurojë sot, më 12 gusht 2026, një nga fenomenet astronomike më spektakolare: një eklips total të Diellit, i cili do të përshkojë një pjesë të hemisferës veriore dhe do të jetë veçanërisht mbresëlënës në Europë. Ndërsa në disa zona Hëna do ta mbulojë plotësisht Diellin dhe dita do të kthehet për pak minuta në muzg, nga Shqipëria fenomeni do të jetë i dukshëm vetëm pjesërisht dhe shumë pranë perëndimit të Diellit.

Por çfarë ndodh në të vërtetë gjatë një eklipsi? Pse errësohet qielli, a ulet temperatura, çfarë ndodh me kafshët dhe, mbi të gjitha, a ka ndonjë ndikim te trupi dhe shëndeti i njeriut?

Eklipsi ndodh kur Hëna kalon mes Tokës dhe Diellit, duke penguar përkohësisht dritën e tij. Ajo që e bën fenomenin kaq të jashtëzakonshëm është një përputhje e veçantë astronomike: Dielli është rreth 400 herë më i madh se Hëna, por ndodhet gjithashtu afërsisht 400 herë më larg nesh. Për këtë arsye, kur i shohim nga Toka, dy trupat qiellorë duken pothuajse me të njëjtën madhësi.

Kur pozicionimi është i përsosur, disku i Hënës mbulon të gjithë diskun e Diellit dhe krijohet eklipsi total. Hija e Hënës, megjithatë, mbulon vetëm një brez relativisht të ngushtë të sipërfaqes së Tokës. Jashtë këtij brezi, Dielli mbulohet vetëm pjesërisht.

Më 12 gusht, rruga e totalitetit kalon nga zona të Groenlandës dhe Islandës, përpara se të arrijë në Gadishullin Iberik. Spanja është një nga vendet më të privilegjuara për ta parë fenomenin, me totalitetin që prek një brez të gjerë të vendit dhe ndodh kur Dielli është shumë pranë horizontit.

Në zonat ku eklipsi është total, për pak më shumë se dy minuta Dielli do të zhduket plotësisht pas Hënës. Drita do të bjerë me shpejtësi, qielli do të marrë pamjen e muzgut dhe temperatura mund të ulet. Yjet dhe planetët më të ndritshëm mund të bëhen të dukshëm edhe pse normalisht do të ishte ende ditë.

Në momentin e totalitetit ndodh edhe një nga pamjet më të bukura të fenomenit: rreth diskut të zi të Hënës shfaqet korona diellore, atmosfera e jashtme e Diellit, e cila zakonisht fshihet nga drita tepër e fuqishme e sipërfaqes së tij.

Pak përpara dhe pas totalitetit mund të shfaqen edhe të ashtuquajturat “Baily’s beads”, pika të vogla drite që krijohen kur rrezet e fundit të Diellit kalojnë mes maleve dhe luginave në skajin e Hënës. Më pas mund të shfaqet efekti i famshëm “diamond ring”, kur një pikë e fuqishme drite, e kombinuar me koronën rreth Hënës, krijon pamjen e një unaze me diamant.

Në Shqipëri, megjithatë, situata do të jetë ndryshe. Vendi ynë nuk ndodhet në brezin e totalitetit dhe për këtë arsye Dielli nuk do të mbulohet plotësisht në asnjë moment.

Nga Tirana, eklipsi parcial pritet të nisë rreth orës 19:31, ndërsa maksimumi i dukshëm lokal do të jetë rreth 19:41. Vetëm pak minuta më vonë, rreth orës 19:44, Dielli perëndon. Kjo do të thotë se nga kryeqyteti kemi një dritare shumë të shkurtër, rreth 13 minuta, për ta parë fenomenin.

Për shkak se Dielli do të jetë jashtëzakonisht poshtë në horizont, pamja do të varet shumë edhe nga vendndodhja. Një horizont i hapur drejt perëndimit, pa ndërtesa, male apo re që bllokojnë Diellin, do të jetë vendi më i favorshëm. Nga Shqipëria nuk duhet pritur që “të bëhet natë”; ajo që mund të dallohet është një “kafshim” i diskut të Diellit nga Hëna, pak përpara perëndimit.

Në internet mund të hasen edhe përqindje të ndryshme për madhësinë e eklipsit në një qytet të caktuar. Kjo ndodh sepse disa burime japin magnitudën e eklipsit, ndërsa të tjera përqindjen e sipërfaqes së diskut të Diellit që mbulohet. Janë dy mënyra të ndryshme matjeje dhe nuk duhet të ngatërrohen.

Një tjetër fenomen real gjatë eklipseve totale është rënia e temperaturës. Kur Hëna bllokon rrezatimin diellor, sipërfaqja e Tokës fillon të marrë më pak energji dhe ajri mund të ftohet brenda një kohe shumë të shkurtër. Në eklipset e mëparshme janë regjistruar ulje prej disa gradësh dhe, në kushte të caktuara të thata, ndryshimi mund të shkojë edhe rreth 4–8°C.

Mund të ndryshojnë përkohësisht edhe era, lagështia dhe disa procese që lidhen me formimin e reve. Por këto efekte janë shumë më të dukshme në zonat ku Dielli mbulohet plotësisht ose pothuajse plotësisht. Në Shqipëri nuk pritet ndonjë ndryshim i rëndësishëm meteorologjik, veçanërisht sepse eklipsi ndodh pikërisht në kohën kur Dielli po perëndon dhe temperatura normalisht fillon të bjerë.

Edhe kafshët mund ta perceptojnë ndryshimin. Gjatë eklipseve totale janë vërejtur zogj që ndryshojnë sjellje sikur po vjen nata, insekte të natës që aktivizohen dhe kafshë të tjera që reagojnë ndaj errësimit të papritur dhe rënies së temperaturës.

Shkaku nuk është ndonjë “energji” e veçantë e eklipsit. Organizmat thjesht reagojnë ndaj sinjaleve të mjedisit – kryesisht dritës dhe temperaturës – të cilat për disa minuta ndryshojnë në mënyrë të pazakontë. Edhe këtu, në Shqipëri efekti pritet të jetë shumë më i vogël për shkak të eklipsit të pjesshëm dhe perëndimit të afërt të Diellit.

Por një nga pyetjet më të shpeshta lidhet me ndikimin e eklipsit te njerëzit.

Rreth eklipseve kanë ekzistuar prej shekujsh besime sipas të cilave ato ndikojnë te shtatzënia, menstruacionet, fertiliteti, hormonet, tensioni, humori apo “energjia” e trupit. Në kultura të ndryshme ekzistojnë madje këshilla që gratë shtatzëna të mos dalin jashtë, që njerëzit të mos konsumojnë ushqim gjatë eklipsit apo të shmangin aktivitete të caktuara.

Shkenca nuk ka gjetur prova që eklipsi i Diellit shkakton këto efekte. Pozicionimi i Hënës përpara Diellit nuk shkakton një ndryshim të veçantë biologjik në trupin e njeriut. Për ne, ndryshimi fizik më i dukshëm është thjesht reduktimi i përkohshëm i dritës së Diellit në zonat ku eklipsi është i thellë.

Ekziston, megjithatë, një rrezik shumë real: dëmtimi i syve.

Dielli nuk duhet parë drejtpërdrejt gjatë fazave parciale të eklipsit. Edhe kur pjesa më e madhe e diskut diellor është e mbuluar, ajo pjesë që mbetet e dukshme vazhdon të jetë mjaftueshëm intensive për të dëmtuar retinën.

Syzet e zakonshme të diellit nuk janë mbrojtje e mjaftueshme. Për vëzhgim të drejtpërdrejtë nevojiten syze ose filtra të posaçëm për eklipsin që përmbushin standardin ndërkombëtar ISO 12312-2.

Kjo është veçanërisht e rëndësishme për Shqipërinë. Në zonat ku ndodh totaliteti ekziston një interval shumë i shkurtër kur Dielli është plotësisht i mbuluar dhe korona mund të shihet pa filtër, sipas udhëzimeve për vëzhgimin e eklipsit. Në Shqipëri ky moment nuk ekziston, sepse eklipsi mbetet parcial deri në perëndim. Pra, Dielli nuk duhet parë me sy të lirë në asnjë moment të fenomenit.

Kujdes duhet treguar edhe me telefonat, aparatet fotografike, dylbitë dhe teleskopët. Sidomos pajisjet optike që zmadhojnë pamjen mund të përqendrojnë rrezatimin diellor dhe kërkojnë filtra solarë të posaçëm të vendosur përpara optikës.

Dëmtimi i retinës është veçanërisht problematik sepse mund të ndodhë pa dhimbje të menjëhershme. Retina nuk ka receptorë dhimbjeje dhe një person mund të kuptojë më vonë se shikimi është turbulluar, se ka një njollë në qendër të fushës së shikimit ose se imazhet duken të shtrembëruara.

Eklipsi i 12 gushtit ka edhe një rëndësi historike për Europën. Ai është eklipsi i parë total i dukshëm nga Europa kontinentale perëndimore që prej vitit 1999, duke e kthyer veçanërisht Spanjën në një nga destinacionet kryesore astronomike të ditës.

Dhe seria nuk përfundon këtu. Më 2 gusht 2027 do të ndodhë një tjetër eklips total, këtë herë shumë më i gjatë, me rrugën e totalitetit që do të kalojë në Spanjën jugore, Afrikën e Veriut dhe Lindjen e Mesme. Më 26 janar 2028, Spanja dhe Portugalia do të përjetojnë gjithashtu një eklips unazor, kur Hëna nuk e mbulon plotësisht Diellin dhe rreth saj mbetet e dukshme e famshmja “unazë e zjarrit”.

Për shkencëtarët, ndërkohë, eklipsi është shumë më tepër sesa një spektakël në qiell. Momentet kur disku jashtëzakonisht i ndritshëm i Diellit mbulohet nga Hëna krijojnë kushte të rralla për të studiuar koronën diellore, strukturën e saj dhe proceset që lidhen me erën diellore dhe të ashtuquajturën “space weather”.

Këto procese kanë rëndësi konkrete edhe për jetën moderne, sepse aktiviteti diellor mund të ndikojë te satelitët, komunikimet dhe teknologjitë hapësinore. NASA dhe ESA janë mes institucioneve që e përdorin fenomenin për vëzhgime dhe studime, ndërsa disa matje realizohen edhe nga avionë në lartësi të mëdha për të shmangur një pjesë të pengesave atmosferike.

Dhe sikur eklipsi të mos mjaftonte, nata e 12–13 gushtit sjell edhe kulmin e shiut të meteorëve Perseidë, një prej ngjarjeve astronomike më të bukura të vitit. Këtë herë kushtet janë veçanërisht të favorshme, sepse eklipsi ndodh në periudhën e Hënës së re. Pa dritën e fortë të Hënës në qiell, meteorët e Perseidëve mund të dallohen më lehtë në vende larg ndriçimit artificial.

Pra, 12 gushti 2026 është një ditë e veçantë për qiellin: pasditja sjell një eklips total për një pjesë të Europës dhe parcial për Shqipërinë, ndërsa gjatë natës vëmendja zhvendoset te Perseidët.

Për ne në Shqipëri nuk priten efekte misterioze në trup, ndryshime të forta të motit apo errësim i plotë i ditës. Ajo që kemi është një fenomen astronomik real, i rrallë dhe shumë interesant, që mund të shihet për pak minuta pranë perëndimit të Diellit.

Dhe nëse do ta ndiqni, mbani mend rregullin më të rëndësishëm: mos e shikoni Diellin drejtpërdrejt pa mbrojtjen e duhur, as “vetëm për disa sekonda”.

The post Eklipsi total i Diellit më 12 gusht: Çfarë do të ndodhë sot, si do të shihet nga Shqipëria dhe a ndikon te njerëzit? appeared first on iconstyle.al.

Lamine Yamal është bërë sërish kryefjalë në rrjet, por këtë herë jo për atë që bën në fushën e futbollit. Ylli i Barcelonës dhe Spanjës u përfol për një tradhti ndaj të dashurës së tij, Inés García Santos, pasi disa foto “komprometuese” nisën të qarkullonin me shpejtësi.

Në imazhet virale pretendohej se 19-vjeçari ndodhej me pushime në Kolumbi, në një jaht luksoz, nën shoqërinë e një vajze misterioze me bikini. Fotot mjaftuan që rrjeti të “shpërthente” me aludime për tradhti dhe madje për një ndarje të çiftit.

Por ka një problem: fotot nuk janë reale! Ato rezultojnë të jenë krijuar me inteligjencë artificiale dhe, për rrjedhojë, nuk provojnë asnjë prej pretendimeve për Yamal.

Në rrjet qarkulloi më pas edhe lajmi se Inés e kishte hequr futbollistin nga Instagrami dhe se kishte konfirmuar në TikTok fundin e marrëdhënies pas tradhtive të përsëritura. Edhe këto pretendime rezultojnë të pabazuara. Inés nuk ka bërë publikisht deklarata të tilla dhe madje ka paralajmëruar ndjekësit për profile false që përdorin identitetin e saj.

Madje, gjatë Botërorit 2026, ajo është parë në stadium duke mbështetur Yamal, e veshur me fanellën e tij me numrin 19.

Pra, të paktën deri tani, “skandali i tradhtisë” duket se është një histori e ngritur mbi foto të gjeneruara me AI dhe pretendime të pakonfirmuara në rrjet.

The post “Lamine Yamal tradhtoi të dashurën?” Fotot me vajzën misterioze me bikini bëjnë xhiron e rrjetit appeared first on iconstyle.al.

Enada Hoxha dhe Gerd Vaso janë shfaqur sërish krah njëri-tjetrit pas ndarjes së tyre të bujshme. Dy balerinët janë fotografuar së bashku në aeroport, në shoqërinë e djalit të tyre, Roan, teksa udhëtonin drejt Madridit.

Pamjet kanë tërhequr menjëherë vëmendjen, sidomos pas deklaratave të Enadës për divorcin. Ajo ka folur e emocionuar për fundin e martesës, duke lënë të kuptohet se pas ndarjes qëndronte një “gabim” i bërë nga ish-bashkëshorti.

Por a po sinjalizon ky udhëtim një afrim mes tyre? Për momentin, nuk ka asnjë konfirmim për rikthim si çift. Ajo që duket qartë është se Enada dhe Gerd kanë zgjedhur të lënë mënjanë problemet mes tyre kur bëhet fjalë për djalin.

Të tre janë nisur së bashku drejt Madridit, duke treguar se, edhe pse historia e tyre si çift mund të ketë përfunduar, roli i tyre si prindër vazhdon t’i mbajë pranë në momentet e rëndësishme për Roan.

The post Pas ndarjes që bëri bujë, Enada Hoxha dhe Gerd Vaso shfaqen sërish bashkë! appeared first on iconstyle.al.

Një nga çiftet e njohur të showbiz-it shqiptar, Sarah Berisha dhe DJ PM, është rikthyer në qendër të vëmendjes për shkak të zërave të rinj për një ndarje të mundshme.

Që prej njohjes së tyre në shtëpinë e “Big Brother VIP Albania” në vitin 2021, marrëdhënia e tyre ka qenë shpesh objekt spekulimesh. Sa herë që kanë munguar fotot e përbashkëta apo janë treguar më të rezervuar në rrjetet sociale, nuk kanë munguar aludimet se romanca kishte marrë fund.

Megjithatë, deri më tani, çifti ka zgjedhur ta jetojë lidhjen larg vëmendjes publike. Edhe DJ PM ka deklaruar më herët se preferon një marrëdhënie plotësisht private, duke theksuar se aktiviteti i ulët në rrjetet sociale nuk pasqyron domosdoshmërisht situatën në jetën personale.

Këtë herë, megjithatë, ndjekësit kanë vënë re një detaj që ka shtuar dyshimet: Sarah Berisha dhe DJ PM nuk ndiqen më në Instagram.

Vëmendje ka tërhequr edhe prania e Sarah-t në Sunny Hill Festival, ku ajo u shfaq e vetme. Për më tepër, ajo publikoi në Instagram këngën “The One That Got Away” të Katy Perry, një baladë që flet për një dashuri të humbur, veprim që u interpretua nga shumë ndjekës si një mesazh me nënkuptim.

Deri në këtë moment, as Sarah Berisha dhe as DJ PM nuk kanë reaguar publikisht për të konfirmuar apo mohuar zërat për ndarjen. Për rrjedhojë, gjithçka mbetet në nivel spekulimesh.

The post Pas vitesh bashkë, ndahen Sarah Berisha dhe DJ PM appeared first on iconstyle.al.

Ariana Grande ka reaguar për herë të parë pas njoftimit se, në përfundim të turneut të saj “Eternal Sunshine”, do të tërhiqet përkohësisht nga jeta publike.

Gjatë koncertit të së hënës në Çikago, këngëtarja iu drejtua fansave duke sqaruar se vendimi nuk ishte marrë në mënyrë impulsive dhe as si reagim ndaj kritikave të fundit.

“Ky nuk ishte një vendim reaktiv apo impulsiv. E kisha planifikuar në heshtje prej shumë kohësh”, u shpreh Grande para publikut.

Artistja pranoi se ishte në dijeni të shqetësimit të fansave, të cilët mendonin se komentet negative dhe presioni publik mund të kishin ndikuar në vendimin e saj. Megjithatë, ajo theksoi se arsyeja kryesore lidhej me nevojën për të vendosur kufij dhe për të marrë kohë për veten.

“Duhet të vendosen kufij. Njerëzit kanë nevojë për një pushim ndonjëherë”, tha ajo, duke shtuar se asnjë kritikë apo zhurmë mediatike nuk mund ta zbehë lidhjen dhe dashurinë që ndan me fansat.

Sipas përfaqësuesit të saj, Ariana do të marrë një “pushim të merituar” pas përfundimit të turneut, i cili vjen pas një periudhe të gjatë me vëmendje të vazhdueshme nga publiku dhe mediat.

Turneu “Eternal Sunshine” pritet të përfundojë më 1 shtator, pas dhjetë koncerteve në Londër.

Për shkak të këtij vendimi, Ariana Grande nuk do të jetë më pjesë e produksionit të muzikalit “Sunday in the Park with George” në teatrin Barbican të Londrës, ku ishte planifikuar të interpretonte përkrah aktorit Jonathan Bailey.

Gjatë viteve të fundit, këngëtarja ka qenë shpesh në qendër të komenteve dhe spekulimeve që lidhen me pamjen e saj fizike dhe gjendjen shëndetësore.

Pas lajmit për largimin e përkohshëm, fansat kanë mbushur rrjetet sociale me mesazhe mbështetëse, ndërsa hashtag-u #WeLoveYouAriana është kthyer në trend.

The post Ariana Grande flet për herë të parë pas vendimit për t’u larguar përkohësisht nga jeta publike: “E kisha planifikuar prej kohësh” appeared first on iconstyle.al.

“Odisea” e Homerit është rikthyer fuqishëm në vëmendjen e publikut, këtë herë falë filmit të Christopher Nolan. Suksesi i produksionit kinematografik nuk është kufizuar vetëm në sallat e kinemave, por ka nxitur një interes të jashtëzakonshëm për poemën antike, mitologjinë greke dhe letërsinë klasike.

Në Britani, shitjet e librave të “Odisesë” janë rritur me 1.400% gjatë katër javëve deri më 25 korrik, krahasuar me të njëjtën periudhë të një viti më parë. Ndër botimet më të kërkuara është përkthimi i vitit 2017 nga studiuesja britaniko-amerikane Emily Wilson.

Rrjeti i librarive Waterstones ka raportuar një rritje prej më shumë se 1.000% të shitjeve krahasuar me vitin 2025. Interesi nuk është ndalur vetëm te poema e Homerit, por është shtrirë edhe te “Iliada”, “Circe” e Madeline Miller dhe “Penelopiada” e Margaret Atwood.

Në Amazon, versioni i “Odisesë” nga aktori dhe shkrimtari Stephen Fry kryeson listën britanike të librave historikë më të shitur, ndërsa bumi ka përfshirë edhe librat audio. Spotify ka raportuar një rritje prej 310% të kërkimeve për përkthimet e veprës.

Pedagogët britanikë shpresojnë që suksesi i filmit të nxisë më shumë të rinj të studiojnë letërsinë dhe qytetërimin klasik. Universiteti UCL, ku Nolan studioi Homerin gjatë viteve universitare, pret gjithashtu një shtim të interesit për këto degë në vitet e ardhshme.

Filmi ndjek udhëtimin e Odiseut drejt shtëpisë pas Luftës së Trojës. Matt Damon interpreton Odiseun, Anne Hathaway luan Penelopën, ndërsa Tom Holland djalin e tyre, Telemakun.

“Odisea” ka kryesuar për dy javë radhazi kinematë amerikane dhe ka arkëtuar 640 milionë dollarë në mbarë botën. Megjithatë, filmi është pritur edhe me kritika nga Emily Wilson dhe historiania Mary Beard. Wilson ka deklaruar se skenari nuk arrin thellësinë psikologjike, emocionale dhe etike të poemës, ndërsa Beard ka vlerësuar se ironitë dhe dilemat e veprës janë zëvendësuar nga një mesazh më i rënduar hollivudian.

Por rikthimi i “Odisesë” në qendër të kulturës popullore sjell në vëmendje edhe një lidhje të veçantë shqiptare me veprën e Homerit.

Gati gjashtë dekada më parë, rolin e Odiseut e interpretoi Bekim Fehmiu, një nga aktorët shqiptarë më të rëndësishëm të kinemasë europiane. Ai ishte protagonisti i adaptimit televiziv të vitit 1968, i cili vijon të konsiderohet si një nga ekranizimet më besnike të poemës.

Fehmiu, i lindur në Sarajevë dhe me origjinë shqiptare nga Kosova, ishte ndër aktorët e parë nga Europa Lindore që arriti të depërtonte në produksionet e mëdha ndërkombëtare perëndimore. Interpretimi i Odiseut mbetet një nga rolet më të njohura të karrierës së tij.

Lidhja shqiptare me filmin e ri të Nolan pritet të vazhdojë edhe përmes muzikës. Në kolonën zanore të produksionit do të dëgjohet iso polifonia shqiptare, e regjistruar në jug të Shqipërisë nga kompozitori Ludwig Göransson.

Göransson, i njohur për muzikën e filmave “Oppenheimer”, “Tenet” dhe “Black Panther”, ka zgjedhur një nga traditat më të lashta të këndimit shqiptar për të shoqëruar udhëtimin e heroit të Homerit.

Iso polifonia është pjesë e Trashëgimisë Kulturore Jomateriale të UNESCO-s dhe është ruajtur ndër breza, veçanërisht në jug të Shqipërisë. Përfshirja e saj në një produksion të këtyre përmasave pritet ta prezantojë këtë trashëgimi përpara miliona shikuesve në të gjithë botën.

Kështu, ndërsa Christopher Nolan rikthen Homerin në modë dhe çon mijëra lexues drejt librarive, “Odisea” risjell edhe një histori të bukur shqiptare: dikur Odiseun e interpretonte Bekim Fehmiu, ndërsa sot udhëtimi i tij kinematografik shoqërohet nga zërat e iso polifonisë shqiptare.

The post Filmi “Odisea” i Christopher Nolan rikthen Homerin në modë, shitjet e librave rriten me 1.400% dhe Shqipëria bëhet pjesë e historisë appeared first on iconstyle.al.

Nara Smith ka folur për herë të parë me detaje për periudhën më të errët të jetës së saj, duke zbuluar ankthin që e shoqëroi gjatë gjithë kohës që vajza e saj 2-vjeçare, Whimsy Lou, po luftonte me kancerin.

E ftuar në podcastin “Call Her Daddy”, modelja dhe influencerja tregoi se, përveç betejës me sëmundjen, jetonte çdo ditë me frikën se diagnoza e së bijës mund të bëhej publike para se familja të ishte gati ta ndante vetë.

“Isha vazhdimisht në ankth se dikush do ta zbulonte dhe historia do të dilte në internet ndërsa ajo ishte ende në trajtim,” u shpreh Nara.

Ajo rrëfeu se muajt e trajtimit ishin emocionalisht rraskapitës dhe se çdo ditë sillte një pasiguri të re.

“Ishte vërtet shumë e vështirë. Çdo ditë zgjoheshe pa e ditur çfarë do të sillte dita, çfarë do të thoshin mjekët, nëse trajtimi po funksiononte apo jo. Të gjitha këto e bënin situatën jashtëzakonisht të rëndë,” tha ajo.

Sipas Narës, vendimi për të mos folur publikisht nuk kishte lidhje me dëshirën për ta fshehur të vërtetën, por me nevojën për t’u përqendruar plotësisht te vajza e tyre.

“Duhej të ishim vetëm prindër. E gjithë energjia jonë ishte te vajza,” u shpreh modelja.

Vetëm pasi Whimsy përfundoi trajtimin, ajo ndjeu se ishte gati të fliste.

“Menjëherë pas ditëlindjes së saj ajo hyri në remision. Përfunduam trajtimin e fundit. I ramë ziles. Ishte një moment shumë emocionues,” tregoi Nara.

Ajo tha se historia u bë publike vetëm sepse kuptoi se mund të ndihmonte familje të tjera që po kalojnë të njëjtën sfidë.

“Gjej shumë ngushëllim te fakti që nuk jam vetëm. Nëse mund ta përdor platformën time që qoftë edhe një person të ndihet më pak vetëm, atëherë dua ta bëj. Pikërisht për këtë vendosëm ta ndanim historinë tonë.”

Në fillim të këtij muaji, Nara Smith zbuloi se vajza e saj 2-vjeçare, Whimsy Lou, ishte diagnostikuar me kancer në fund të vitit të kaluar. Ajo tregoi se gjithçka nisi kur instinkti i saj si nënë i tha se diçka nuk shkonte me të voglën. Pas vizitave, analizave dhe një biopsie, mjekët konfirmuan diagnozën dhe nisën menjëherë kimioterapinë.

Edhe pse nuk ka bërë publik llojin e kancerit që preku vajzën, Nara ka treguar se Whimsy tashmë është në remision dhe ka përfunduar trajtimin.

Modelja 24-vjeçare u bë e famshme në TikTok dhe Instagram me videot ku përgatit receta nga e para për familjen e saj. Ajo është e martuar me modelin Lucky Blue Smith dhe së bashku janë prindër të katër fëmijëve: Rumble Honey, Slim Easy, Whimsy Lou dhe Fawnie Golden. Pas muajsh heshtjeje, Nara thotë se zgjodhi ta ndajë këtë histori me shpresën se asnjë prind që po përballet me të njëjtën betejë të mos ndihet i vetëm.

The post “Çdo ditë zgjohesha me frikë”/ Nara Smith rrëfen ankthin e fshehjes së diagnozës së kancerit të vajzës: Kisha tmerr se do të zbulohej në internet appeared first on iconstyle.al.

Dasma e Dua Lipës dhe Callum Turner ishte një nga ngjarjet më të komentuara të showbiz-it këtë vit, por një detaj nuk u shpëtoi fansave: babai i aktorit britanik nuk ishte i pranishëm në ceremoninë luksoze që u zhvillua në Sicili.

Sipas The Sun, në të njëjtën ditë kur Callum dhe Dua kurorëzuan dashurinë e tyre, babai i aktorit, Laurence Coles, ndodhej rreth 2 mijë milje larg, në veri të Londrës, ku mori pjesë në dasmën e Jamie Rae Keeble, vajzës së bateristit të grupit Spandau Ballet, John Keeble.

Burime pranë familjes kanë bërë të ditur se marrëdhënia mes Callum Turner dhe të atit ka qenë e ftohtë prej vitesh. “Laurence dhe Callum kanë qenë të distancuar ndër vite, megjithatë ishte e pazakontë që ai zgjodhi të ishte në një dasmë tjetër pikërisht në ditën kur djali i tij po martohej”, citohet të ketë thënë një burim.

Mungesa e Laurence Coles ka rikthyer në vëmendje raportin e ndërlikuar mes tyre. Edhe pse kohët e fundit ishte raportuar se marrëdhënia ishte përmirësuar pas një periudhe të gjatë largësie, duket se prania e tij në ditën më të rëndësishme të jetës së të birit nuk u bë realitet.

Vetë Callum Turner ka folur më herët për lidhjen me babanë e tij, duke e përshkruar si “të dobët”. Aktori u rrit nga nëna e tij, Rosemary Turner, në Londër, ndërsa babai nisi një jetë të re në Australi, çka ndikoi që ata të jetonin për vite me radhë në kontinente të ndryshme.

Ndërsa dasma e çiftit u kthye në një festë plot yje dhe momente romantike, mungesa e babait të dhëndrit mbetet një nga detajet që ka ngjallur më shumë kureshtje dhe diskutime në mediat rozë.

The post Pse babai i Callum Turner mungoi në dasmën me Dua Lipën? Detajet që po bëjnë xhiron e rrjetit appeared first on iconstyle.al.