Kryetari i Partisë Demokratike Sali Berisha, nga sheshi para Kryeministrisë u është drejtuar me një thirrje gjyqtarëve në Hagë, pas kërkesës së Prokurorisë së Specializuar në Hagë për dënimin me nga 45 vite burg të katër ish-drejtuesve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit.

Berisha tha: “Të dashur miq, dje në Hagë, Prokuroria paraqiti një pretencë kundë udhëheqjes së Kosovës, identike me pamfletën e propagandës së verbër ultranacionaliste serbe. Nga kjo platformë, iu bëj thirrje gjyqtarëve të vlerësojnë gjithçka në bazë të ligjit, të shpallin pafajësinë e atyre burrave që me heroizëm mbrojtën dhjetëra e mijëra shqiptarë nga gjenocidi serb. Zotëri gjykatës, ballkani ka njohur gjenocide të tmerrshme dhe dy janë ata që e kryen. Vuçic që mori safaarin e qytetarëve në Sarajvë dhe nuk njeh gjenocidin serb në bosnjë, argati i tij, Edi Rama që përzuri shqiptarët. Ndaj dhe zotëri gjykatës, për të bërë drejtësi duhet që këto dy monstra të ulen përpara jush, dhe jo luftëtarët e lirisë.”

Partia Demokratike ka thirrur këtë të martë simpatizantë në protestën e saj kombëtare në Bulevardin “Dëshmorët e Kombit”.

Analisti Frrok Çupi, i ftuar në “ Tirana Live” tha se protestat e Sali Berishës nuk sjellin asgjë të re, madje ato janë konsumuar deri në pikën që vetë Çupi i cilësoi si “tubime kotësie”.

Ai theksoi se shqiptarët e dinë tashmë se kush është Sali Berisha dhe cilat janë bëmat e tij. Sipas Çupit, Berisha është i vetmi perSon, që derdhi gjak në atë bulevard për të mbajtur pushtetin.

“Sa herë shikojmë këto protesta, janë konsumuar edhe vetë vëzhgimet, janë konsumuar për shkak të kotësisë. Gjithmonë më shkon mendja te hall i këtij bulevardit, është hall i vërtetë. Mos ta quajnë më “kilometri i fundit”, por një ngjarje e shëmtuar në këtë bulevard.

Ai është i vetmi që derdhi gjak në atë bulevard, erdhi një djalë nga Tropoja dhe e bllokoi bulevardin. Ky është gjakatar. Ky njeri nuk kthehet për demokraci, për liri, por kthehet për arsye të instinktit në vendin e krimit. I vetmi Sali Berisha që ekzekutoi në mes të bulevardit dhe në sy të të gjithëve. “, tha ai.

Ervin Salianji nuk mungoi në protestën e PD, por qëndroi larg ‘zemrës’ ku ajo po mbahet para kryeministrisë.

Salianji është vendosur te Piramida, aty ku edhe protestuesit janë edhe më të shpërndarë, ndërsa shihet duke qeshur e biseduar me hare me disa prej përkrahësve të tij.

Ndërkohë Berisha e ka përjashtuar nga partia duke thënë se ka shkelur vijat e kuqe dhe se punon për Ramën.

Kreu i PD-së Sali Berisha në fjalën e mbajtur në protestën e sotme para Kryeministrisë foli “për një kryengritje paqësore”, ndërsa theksoi se Shqipëria është në momentin më kritik të 35 viteve të fundit.

“Zhvillimet e ditëve të fundit bëjnë që ne të mblidhemi sot në këtë shesh, në këtë bulevard, në kushte ndër më alarmantet, ndoshta jemi mbledhur në kryengritjen tonë paqësore, në momentin më kritik të Shqipërisë në 35 vitet e fundit. Ndaj më duhet ta nisë këtë fjalë me një shprehje që sot tingëllon më aktuale se kurrë: Ata që harrojnë të shkuarën janë të dënuar ta përsërisin atë“, tha Berisha.

Ilir Alimehmeti ka folur në protestën kombëtare të kësaj të marte të Partisë Demokratike, duke e cilësuar shpopullimin si dështimin më të madh të qeverisë Rama. Sipas tij, mbi 1.6 milionë shqiptarë ndodhen sot jashtë vendit, ndërsa 1 në 5 qytetarë mendon të largohet, një tregues i qartë i pasojave të politikave qeveritare.

“Nuk ka më justifikime. Kur ke gjithë pushtetin, ke edhe gjithë përgjegjësinë. Shkollat pa nxënës, spitalet pa ilaçe dhe pronarët pa prona janë rezultat i drejtpërdrejtë i abuzimeve dhe keqqeverisjes. Për të gjitha këto ka një emër: Edi Rama”, deklaroi Alimehmeti.

Ai theksoi se largimi masiv i qytetarëve përbën akuzën më të rëndë ndaj një qeverie, duke shtuar se “kur populli ikën, kjo është prova më e madhe e dështimit”.

Në fjalën e tij, Alimehmeti bëri thirrje për rikthimin e vlerave europiane dhe për një ndryshim të thellë politik, duke theksuar se Shqipëria ka njohur arritje të mëdha në të shkuarën, si liberalizimi i vizave dhe anëtarësimi në NATO.

“Duhet të largohet Rilindja, duhet të largohet Edi Rama. Vetëm duke qëndruar së bashku, Shqipëria mund të fitojë”, tha ai.

Një sulm ajror rus vrau këtë të martë, më 10 shkurt, një vajzë 11-vjeçare dhe nënën e saj, si dhe plagosi 14 persona të tjerë në pjesën e kontrolluar nga Ukraina të rajonit lindor të Donetsk-ut. Të paktën kështu tha sot guvernatori i këtij rajoni, Vadym Filashkin në një postim në aplikacionin Telegram.

Sipas tij, një vajzë 7-vjeçare ishte gjithashtu mes të plagosurve në sulmin ndaj qytetit Sloviansk.

Sloviansk dhe Kramatorsk, qyteti fqinj, janë dy nga të ashtuquajturat “qytete fortesë” që ndodhen pranë vijës së frontit dhe kanë qenë shpesh objektiv i sulmeve ruse, shkruan Reuters.

Rusia kërkon që Kievi të heqë dorë nga 20% e mbetur e rajonit të Donetsk-ut, që forcat e Moskës nuk kanë arritur ta pushtojnë, për të bërë përparim drejt një marrëveshjeje paqeje, diçka që Ukraina refuzon ta bëjë.

Si Moska ashtu edhe Kievi mohojnë se po synojnë civilët në këtë luftë, e cila nisi me pushtimin e plotë rus në vitin 2022.

Komisioni për Kulturën, Turizmin dhe Diasporën, nën drejtimin e kryetares Ina Zhupa, zhvilloi sot një seancë dëgjimore për shqyrtimin e ndryshimeve në ligjin “Për librin në Republikën e Shqipërisë”. Në qendër të diskutimeve ishte përshtatja e legjislacionit me epokën digjitale dhe mbështetja financiare për autorët shqiptarë.

Kreu i Shoqatës së Botuesve, Petrit Ymeri, theksoi para deputetëve se ligji aktual i vitit 2006, pavarësisht ndërhyrjeve të mëparshme, ka mbetur pas zhvillimeve teknologjike. Sipas tij, projektligji i ri sjell një strukturë të plotë rregullatore për librin digjital (e-book).

“Projektligji i ri ka për qëllim rritjen e nivelit të leximit, mbështetjen e qëndrueshme për operatorët dhe botuesit, si dhe përmirësimin e aksesit në libra për personat me aftësi të kufizuara,” u shpreh Ymeri.

Ai sqaroi se ndryshimet nuk krijojnë kosto shtesë për buxhetin, por synojnë një përdorim më efikas të fondeve ekzistuese dhe harmonizim me praktikat evropiane.

Dyfishohet fondi i QKLL

Gjatë seancës, Drejtoresha e Politikave për Artin dhe Kulturën në Ministri, Irena Prici, bëri të ditur një rritje të ndjeshme të mbështetjes financiare për vitin 2026.

Buxheti i Qendrës Kombëtare të Librit dhe Leximit (QKLL) është dyfishuar, duke kaluar nga 10 milionë në 20 milionë lekë të reja.

“Duhet bërë edhe më shumë, por duke pasur parasysh mundësitë, i kemi dhënë prioritet kësaj qendre në funksion të librit dhe mbështetjes së krijimtarisë në gjuhën shqipe,” theksoi Prici.

Në mbledhje ishin të pranishëm përfaqësues të lartë të institucioneve kulturore, përfshirë drejtoreshën e QKLL, Esmeralda Bardhyli, drejtoreshën e komanduar të Bibliotekës Kombëtare, Majlinda Bami, si dhe përfaqësues të shtëpive botuese, të cilët diskutuan mbi ndikimin e këtyre ndryshimeve në tregun e librit.

Nënkryetari i Partisë Demokratike, Agron Gjerkmarkaj, hapi protestën kombëtare të opozitës, duke deklaruar se kjo nuk është një protestë e zakonshme, por një reagim ndaj një sistemi që, sipas tij, ka humbur legjitimitetin dhe po shkon drejt fundit.

Gjerkmarkaj theksoi se qeveria ka shkelur çdo premtim dhe nuk ka më asnjë alibi, duke mbijetuar politikisht përmes shndërrimit të shtetit në instrument pushteti.

“Kjo nuk është një protestë e zakonshme, por këtij sistemi pa legjitimitet po i vjen fundi. Ky sistem ka shkelur çdo premtim dhe nuk ka më asnjë alibi. Ka mbijetuar politikisht duke shndërruar shtetin në instrument pushteti. Pasojat janë të qarta: eksod biblik i shqiptarëve, ekonomi e deformuar, njëzimi i partisë me shtetin, korrupsioni u shndërrua në mënyrë qeverisjeje. Jeta e shqiptarëve është në kthim pas si në vitin 1976, e maskuar me fjalë dhe shantazh publik”, tha Gjekmarkaj.

Në fjalën e tij, ai akuzoi qeverinë se po mban peng parlamentin dhe po shkel Kushtetutën, duke nënvizuar se demokracia nuk është dhuratë, por një betejë.

“Ne po sakrifikojmë për ëndrrën evropiane që ky komb e ka paguar shtrenjtë ndër shekuj. Qeveria po merr peng parlamentin dhe po shkel Kushtetutën. Demokracia nuk është dhuratë por betejë. Në jemi sot këtu të palëkundur”, tha Gjekmarkaj.

Opozita zhvillon protestën kombëtare në Bulevardin “Dëshmorët e Kombit”, ku kërkon largimin e qeverisë Rama.

Protestuesit janë mbledhur para Kryeministrisë, ndërsa të pranishëm janë edhe deputetë të Partisë Demokratike. Kreu i demokratëve, Sali Berisha, doli nga selia e PD-së dhe iu bashkua protestuesve i shoqëruara nga nënkryetari i partisë, Luçiano Boçi dhe Sekretari i Përgjithshëm, Flamur Noka si dhe mbështetësit demokratë.

Për garantimin e rendit dhe sigurisë, mbi 1300 forca policie janë angazhuar dhe ndodhen në gatishmëri të plotë. Autoritetet kanë vënë në dispozicion edhe autobote me ujë si dhe mjete me gaz lotsjellës, në rast se do të ketë përplasje mes protestuesve dhe forcave të rendit, siç ka ndodhur në protesta të mëparshme ku nuk kanë munguar tensionet.

Forcat e sigurisë kanë rrethuar Kryeministrinë dhe kanë blinduar dyert, ndaj të cilës në protestën e fundit u hodhën fishekzjarrë dhe molotovë.

Si pasojë e protestës, disa akse rrugore janë bllokuar dhe qarkullimi i mjeteve është ndaluar. Aktualisht, qarkullimi është i bllokuar në Bulevardin “Dëshmorët e Kombit”, si dhe në rrugët lidhëse “Ukraina e Lirë”, “Papa Gjon Pali II” dhe “Ismail Qemali”.

Partia Demokratike ka thirrur mbështetësit dhe simpatizantët e saj në protestën kombëtare para godinës së kryeministrisë.

Nisja e protestës ishte parashikuar në ora 17:00.

Abc News sjell pamje me dron nga bulevardi “Dëshmorët e Kombit”, ndërsa vihet re se numri i pjesëmarrësve në protestën e thirrur nga Sali Berisha është shumë i ulët.

Reshje shiu të herëpashershme me intensitet të ulët në pjesën më të madhe të territorit, prej orëve të para të 24-orëshit deri në orët e mesditës, ndërsa në veriperëndim reshje në formën e shtrëngatave.

Nga orët e mesditës e kryesisht në orët e mbrëmjes përgjatë Ultësirës Perëndimore e në jug parashikohen reshje shiu me intensitet deri mesatar në formën e shtrëngatave afatshkurtra të herëpashershme, ndërsa pjesa tjetër e vendit parashikohet të vijojë me reshje shiu me intensitet të ulët.

Në zonën e Alpeve dhe relievet e larta malore në verilindje- juglindje të vendit reshje dëbore me intensitet të ulët.

Era do të fryjë me drejtim kryesor juglindje–jugperëndim me shpejtësi mesatare 7 m/sek, e cila hera-herës përgjatë vijës bregdetare dhe zonave luginore pritet të fitojë shpejtësi deri 17 m/sek.

Valëzimi në detet Adriatik dhe Jon do të jetë i forcës 3-4 ballë.

Kryeqyteti i Kinës, Pekin do të kushtojë më shumë forcë zhvillimit cilësor të mbështetur mbi risitë teknologjike, kështu kërkoi presidenti kinez Xi Jinping gjatë një vizite në një park inovacioni shkencor, zona shërbimi për të moshuarit dhe tregje festive.

Pekini do të mbështetet në pozicionimin e tij strategjik dhe në zhvillimin e koordinuar të rajonit Pekin–Tianjin–Hebei, si dhe do të forcojë zhvillimin të orientuar nga zhvillimi me cilësi të lartë për të realizuar një rritje ekonomike me përmirësim cilësor dhe zgjerim të arsyeshëm sasior.Lehtësimi i Pekinit prej funksioneve jokryeqytetase vlerësohet si pika kyçe për përparimin e bashkërendimit rajonal duke kombinuar kontrollin e shtesave të reja me optimizimin e strukturave ekzistuese, për të arritur një zhvillim të koordinuar mes lehtësimit dhe përmirësimit funksional. Duke shfrytëzuar zgjerimin e Qendrës Ndërkombëtare të Inovacionit Shkencor dhe Teknologjik të Pekinit (dhe rajonit Pekin–Tianjin–Hebei), për forcimin e bashkëpunimit inovativ dhe industrial me Tianjin-in dhe Hebein, për të arrihet në thellimin më tej të zhvillimit të koordinuar rajonal.

Avokati Idajet Beqiri ka ngritur dyshime serioze për rrëmbimin e Bleona Matës dhe ka folur për kontradikta në dëshmitë kyçe të dosjes. Sipas tij, interesi për këtë çështje mbetet i lartë dhe institucionet duhet të veprojnë.

Komentet Beqiri i bëri në emisionin ‘Pa Gjurmë’ me gazetaren Odeta Dume në Report TV, ku tha se rrëmbimi i Bleona Matës është një ngjarje e kryer nga një grup i strukturuar kriminal.

Beqiri vijoi më tej duke thënë se një pjesë e grupit kriminal mund të jetë paguar për kryerjen e rrëmbimit, ndërsa një pjesë tjetër e grupit sipas tij, mund të ketë pasur interesa të caktuara për kryerjen e rrëmbimit.

Ndërkohë në një lidhje direkte nga Kukësi, nëna e Bleonës rrëfeu dhimbjen, akuzat dhe zhgënjimin për mungesën e reagimit nga familjarët e babait. Ajo bëri thirrje që e vërteta të zbardhet dhe drejtësia të vihet në vend. Sipas nënës, ishte halla ajo që e zhduku Bleonën në mal.

“Kjo ka qenë një pistë që është ngritur. Ai mund të jetë në rolin e ekzekutorit, sa për ta marrë dhe për ta çuar diku. Kështu që ai faktikisht është hetuar për këtë çështje dhe është pushuar hetimi ndaj tij, me argumentin se nuk ka pasur prova. Ai mund edhe të ketë kaluar dhe është i sëmurë psiqik.

Edhe mund të jetë i papërgjegjshëm për veprimet që kryen. Por në rast se do të jetë i tillë, ai duhet të futej brenda një institucioni psikiatrik. Në këtë aspekt rezervohem sepse janë vërtetë sekrete hetimore. Ruhem sepse mund të dëmtohet hetimi. Themi gjithmonë që fëmija është rrëmbyer nga një grup i strukturuar kriminal.

Një pjesë e tyre është paguar, ndërsa një pjesë e kanë bërë se kanë qenë pjesë e lojës. Por duhet ta kërkojmë brenda familjes Mata. Përgjegjës kryesor bëj të atin. Por fillimisht gjyshi i saj ka qenë në pozita shumë të mira, ka kontribuar për çështjen, por tërheqja e tij, Zenelit, ngre shumë dyshime dhe ne duhet ta kërkojmë brenda familjes Mata”, është shprehur Beqiri.

Nënkryetari i Partisë Demokratike, Luçiano Boçi, në një intervistë për gazetarin Anesti Barjamemaj në A2CNN tha se me protestën e sotme opozita synon të krijojë qëndrueshmëri, për të arritur më pas drejt një faze palëvizshmërie deri në arritjen e qëllimit të saj kryesor.

“Sot jemi në këtë protestë, në një cikël protestash që duan të krijojnë qëndrueshmëri për të arritur më pas në një fazë palëvizshmërie deri në arritjen e qëllimit kryesor. Kërkesa vjen për shumë arsye, ka arsye të shtuara. Rama është kapur jo thjesht me presh në duar por kërkon që këtë pras ta shesë si spektër fuqie”, tha Boçi.

“Ka afera të tjera ku Rama del më i plotë në kapjen e tij me presh në duar, në korrupsionin galopant, është AKSHI ku është i përfshirë Rama, rrethi i tij i ngushtë familjar, jo familjar, dhe ku më herët PD ka denoncuar me fakte që AKSHI është kopshti privat i Ramës. Gjithçka ku ka para, ku janë miliona dhe miliarda euro është emri i Ramës. Jo më kot nga raportet është përcaktuar që Rama nga kjo xhiro financash në Shqipëri është përfitues i 14 miliardë eurosh, të përdorura pastaj për blerje votash, për lobim të pistë, për çdo gjë të pistë që ka ndodhur për të shitur Shqipërinë”, vijoi ai.

Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka shpallur sot vendimin fajtor për dy anëtarë të një grupi të strukturuar kriminal, të akuzuar për trafikim narkotikësh dhe falsifikim dokumentesh.

Në përfundim të gjykimit të shkurtuar, trupi gjykues i përbërë nga Erjon Çela, Flora Hajredinaj dhe Rudina Palloj, dënoi përfundimisht me 12 vjet e 8 muaj burgim shtetasin Gëzim Bakalli (i njohur edhe me emrin Shkembim Cërmanji) dhe me 8 vjet burgim shtetasin Erjon Loci.

Akuzat dhe dënimet specifike

Sipas vendimit, dy të dënuarit do ta vuajnë dënimin në një burg të sigurisë së lartë.

Gëzim Bakalli (Cërmanji) u shpall fajtor për “Trafikim të narkotikëve” dhe “Drejtim të grupit të strukturuar kriminal”. Atij iu bashkuan edhe akuzat për falsifikim të dokumenteve, letërnjoftimeve dhe akteve të gjendjes civile. Ndonëse dënimi i tij i bashkuar arriti në 19 vite, për shkak të gjykimit të shkurtuar (zbritja e 1/3), ai do të kryejë 12 vite e 8 muaj.

Ndërsa Erjon Loci u deklarua fajtor për “Prodhimin dhe shitjen e narkotikëve” si pjesëmarrës në grupin e strukturuar kriminal. Pas aplikimit të gjykimit të shkurtuar, dënimi i tij nga 12 vite zbriti në 8 vite burgim.

Sekuestrimet dhe provat materiale

Gjatë procesit gjyqësor, Gjykata urdhëroi asgjësimin e dokumenteve kosovare të falsifikuara (pasaportë, patentë dhe letërnjoftim) të përdorura nga Bakalli. Ndërkohë, një sërë provash të tjera materiale të sekuestruara gjatë kontrolleve në banesa, do të mbeten pjesë e fashikullit hetimor për procedime të ndara.

Ndër sendet e sekuestruara që do të mbahen për llogari të hetimeve pasuese përfshihen pasaporta italiane dhe dokumente zvicerane, sende luksi si syze “Gucci”, orë dore “Hublot” (në kuti Rolex) dhe varëse floriri, si dhe pajisje teknologjike si iPhone dhe një laptop MacBook Pro.

Shpenzimet dhe mundësia e ankimit

Të dënuarit janë ngarkuar gjithashtu me pagesën solidare të shpenzimeve procedurale në vlerën e rreth 43 mijë lekëve. Vendimi i GJKKO-së nuk është përfundimtar pasi palët kanë të drejtën e ankimit brenda 15 ditëve në Gjykatën e Posaçme të Apelit.

Vendimi i plotë i GJKKO-së:

1. Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Gjykimin e çështjes penale që i përket procedimit penal nr. 108, të vitit 2024, në ngarkim të të pandehurve Gëzim Bakalli(alias Shkembim Cërmanji) dhe Erjon Loci”.
2. Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Erjon Çela, Flora Hajredinaj dhe Rudina Palloj, me vendimin nr. 11, datë 10.02.2026 vendosi:
3. Deklarimin fajtor të të pandehurit Gëzim Bakalli (alias Shkembim Cërmanji) për kryerjen e veprës penale “Trafikim i narkotikëve”, kryer në formën e veçantë të bashkëpunimit, atë të grupit të strukturuar kriminal, dhe më shumë se një herë, parashikuar nga nenet 283/a/2 – 28/4 të K.Penal, dhe në lidhje me nenin 334/1 të K.Penal “Kryerja e veprave penale nga organizata kriminale ose grupi i strukturuar kriminal”, dënimin e tij me 18 (tetëmbëdhjetë) vjet burgim.
4. Deklarimin fajtor të të pandehurit Gëzim Bakalli (alias Shkembim Cërmanji), për kryerjen e veprës penale “Grup i strukturuar kriminal”, kryer në formën e drejtimit, parashikuar nga neni 333/a/1 i K.Penal, dhe në bazë të kësaj dispozite dënimin e tij me 4 (katër) vjet burgim.
5. Deklarimin fajtor të të pandehurit Gëzim Bakalli (alias Shkembim Cërmanji), për kryerjen e veprës penale “Falsifikimi i dokumenteve”, e parashikuar nga neni 186/1 i K.Penal, dhe në bazë të kësaj dispozite dënimin e tij me 1 (një) vit burgim.
6. Deklarimin fajtor të të pandehurit Gëzim Bakalli (alias Shkembim Cërmanji), për kryerjen e veprës penale “Falsifikimi i letërnjoftimeve, i pasaportave ose i vizave”, e parashikuar nga neni 189/1 i K.Penal, dhe në bazë të kësaj dispozite dënimin e tij me 1 (një) vit burgim.
7. Deklarimin fajtor të të pandehurit Gëzim Bakalli (alias Shkembim Cërmanji), për kryerjen e veprës penale “Falsifikimi i akteve të gjendjes civile”, e parashikuar nga neni 191/1 i K.Penal, dhe në bazë të kësaj dispozite dënimin e tij me 1 (një) vit burgim.
8. Në zbatim të nenit 55 të K.Penal mbi caktimin e dënimit për kryerjen e disa veprave penale, i pandehuri Gëzim Bakalli (alias Shkembim Cërmanji) dënohet me një dënim të vetëm prej 19 (nëntëmbëdhjetë) vjet burgim.
9. Në aplikim të nenit 406/1 të Kodit të Procedurës Penale masës së mësipërme të dënimit i zbritet 1/3 duke u dënuar përfundimisht i pandehuri Gëzim Bakalli (alias Shkembim Cërmanji) me një dënim të vetëm prej 12 (dymbëdhjetë) vjet dhe 8 (tetë) muaj burgim.
10. Vuajta e dënimit për të pandehurin Gëzim Bakalli (alias Shkembim Cërmanji) të kryhet në një IEVP, burg i sigurisë së lartë.
11. Deklarimin fajtor të të pandehurit Erjon Loci për kryerjen e veprës penale “Prodhimi dhe shitja e narkotikëve”, kryer në formën e veçantë të bashkëpunimit, atë të grupit të strukturuar kriminal, dhe më shumë se një herë, parashikuar nga nenet 283/2 dhe 28/4 të K.Penal, në lidhje me nenin 334/1 të K.Penal “Kryerja e veprave penale nga organizata kriminale ose grupi i strukturuar kriminal”, dhe dënimin e tij me 12 (dymbëdhjetë) vjet burgim.
12. Deklarimin fajtor të të pandehurit Erjon Loci për kryerjen e veprës penale “Grup i strukturuar kriminal”, kryer në formën e pjesëmarrjes, parashikuar nga neni 333/a/2 i K.Penal, dhe në bazë të kësaj dispozite dënimin e tij me 2 (dy) vjet burgim.
13. Në zbatim të nenit 55 të K.Penal mbi caktimin e dënimit për kryerjen e dy veprave penale, i pandehuri Erjon Loci dënohet me një dënim të vetëm prej 12 (dymbëdhjetë) vjet burgim.
14. Në aplikim të nenit 406/1 të Kodit të Procedurës Penale masës së mësipërme të dënimit i zbritet 1/3 duke u dënuar përfundimisht i pandehuri Erjon Loci me një dënim të vetëm prej 8 (tetë) vjet burgim.
15. Vuajta e dënimit për të pandehurin Erjon Loci të fillojë nga dita e arrestimit të tij dhe të kryhet në një IEVP, burg i sigurisë së lartë.
16. Në lidhje me provat materiale të sekuestruara për llogari të procedimit penal në zbatim të nenit 190 të K.Pr.Penale të procedohet si më poshtë:

Dokument në disa gjuhë i shtetit zviceran; Pasaportë në gjuhë italiane me numër **** në emër të shtetases P.R; Pasaportë në gjuhë italiane me numër **** në emër të shtetasit A.A; Një palë syze të markës GUCCI ngjyrë e zezë e verdhë; Një varëse me ngjyrë të verdhë si ajo e floririt me një medalion; Një orë dore femrash e markës Hublot MD Geneve me numër serial **** në kuti me mbishkrimin Rolex sekuestruar në banesën e të pandehurit Gëzim Bakalli; Një telefon iPhone ngjyrë bezhë dhe flori model ****, IMEI ****, Një telefon iPhone 8 i bardhë, të sekuestruara të pandehurit Erjon Loci; Laptop MacBook Pro model ****, FCC ID: ****, IC: ****, ****, Serial number **** (Sektori ekspertizës), të qëndrojnë në fashikullin e hetimit të procedimit të ndarë nr. 108/1 të vitit 2025.

Dokumentet lejë drejtimi automjeti/patentë kosovare me nr. ****, e datës 13/1/2023; pasaportë kosovare me numër ****, e datës 27/2/2023, me vlefshmëri deri më datë 26.2.2033; kartë identiteti/Letërnjoftim i kosovës me numër ****, i datës 3/11/2022 për të cilat gjatë gjykimit rezultoi se janë të falsifikuara të asgjësohen.

15. Shpenzimet procedurale gjatë fazës së hetimit në shumën 43,630 lekë (dyzet e tremijë e gjashtëqind e tridhjetë) lekë si dhe shpenzimet gjyqësore i lihen në ngarkim të pandehurve në mënyrë solidare.
16. Kundër këtij vendimi mund të bëhet ankim nga palët brënda 15 (pesëmbedhjetë) ditëve në Gjykatën e Posaçme të Apelit për Korrupsionin dhe Krimin e Organizuar, afat i cili fillon nga dita e nesërme e njoftimit të vendimit.

Ju ka ndodhur ndonjëherë t’i keni rrëfyer një sekret një shoku ose shoqeje dhe të nesërmen ta kenë mësuar të gjithë? Me siguri i keni thënë vetes që kjo është hera e fundit që ndani diçka intime me të tjerët, dhe se pas kësaj nuk do i besoni më askujt, por ja që keni rënë sërish në të njëjtin kurth.

Për të ruajtur një sekret nuk mjafton vetëm një gojë e kyçur, por mbi të gjitha një shenjë horoskopi që dëshiron ta mbajë të kyçur. Living ju njeh me shenjat më të rezervuara të horoskopit që nuk çojnë fjalë lart-poshtë dhe mbajnë sekretin deri në varr.

1. Akrepi: Në qoftë se i tregoni një sekret një Akrepi dhe i thoni të mos i thotë askujt tjetër, jini të sigurtë që nuk do t’ju lërë në baltë. Të lindurit nën këtë shenjë janë shumë të rezervuar dhe të besueshëm. Ajo që flitet mes jush dhe tyre ngelët po aty.

2. Bricjapi: Personat e shenjës së Bricjapit jo vetëm që nuk do tregojnë kurrë një sekret që ju thonë, por ata as nuk do përdorin informacionet që kanë edhe nëse do ju duheshin. Ata janë transparentë, të organizuar dhe e dinë se nuk duhet abuzuar me besimin e dikujt.

Një aksident i rëndë rrugor ka ndodhur në orët e para të mëngjesit në autostradën Porrettana Nord në Itali, ku ka humbur jetën një shqiptar.

Sipas raportimeve të mediave italiane, një automjet që drejtohej nga një 32-vjeçar shqiptar është përplasur “kokë më kokë” me një kamion mbeturinash dhe ka shpërthyer në flakë.

Përplasja dyshohet se ka ndodhur teksa shqiptari po tentonte të parakalonte një tjetër automjet.

Karabienierët dhe ambulanca kanë mbërritur menjëherë në vendin e ngjarjes, por nuk kanë mund të shpëtojnë 32-vjeçarin, i cili dyshohet se është djegur brenda në automjet.

Ndërkohë shoferi i kamionit ka marrë vetëm lëndime të lehta.

Në dy komisione, te Ligjet dhe tek ai për të Drejtat e Njeriut, mazhoranca rrëzoi projektligjin e deputetes së PD-së, Jorida Tabaku për statusin e minatorit.

Drafti parashikon uljen e viteve të punës për pension të parakohshëm, rritje të pensionit suplementar, kompensim të plotë në aksidente dhe pension familjar sa 50% e pagës kur një punonjës i minierës humb jetën.

Kostoja për buxhetin e shtetit llogaritet rreth 1.2 miliardë lekë në vit për 13.300 përfitues. Sipas drejtorit të Institutit të Sigurimeve Shoqërore Astrit Hado, drafti nuk sjell përfitime të mëdha për minatorët nga trajtimi aktual me ligj.

Kryetari i Komisionit të ligjeve, Ulsi Manja veçoi se Shqipëria ka një skemë universale të pensioneve, e cila nuk e përballon nivelin e pensioneve në vend dhe po mbahet në këmbë nga buxheti i shtetit.

Sipas Manjës, të gjitha ligjet që krijojnë statuse e trajtimit të veçantë i krijojnë peshë buxhetit të shtetit dhe pranohen në shtete te cilat kanë financa të konsoliduara dhe jo ekonomi në zhvillim si vendi ynë.

Tabaku: Jam dakord ta përmirësojmë. Është gati qeveria ta bëjë këtë. Unë kam bërë proces kosultimi me sindikatat, me koncesionarët ua lë këtyre unë, se kanë 1 vit e gjysëm që protestojnë. Mos e votoni kundër, t’i lëmë kohë, kush ka propozime shtesë, të bëjmë konsultime. Hajde ulemi bashkë dhe përgatisim një ligj kuadër ku ne mund t’i rregullojmë. Por diferencimi i pagave i minatorëve shqiptarë me inxhinierët turq ishin të turpshme në minierën e Spaçit.

Manja: Të gjithë jemi dakord që çdo kategori kontributore ka të drejtë të kërkojë paga dhe pensione të larta në përputhje me cilësitë e veçanta dhe kushtet punës. Skema e pagave dhe skema e pensioneve përcakton politikat publike të shtetit.

Këto skema nuk duhet të jenë lista dëshirash. Ne kemi zgjedhur një skemë universale të pensioneve, tërësisht kontributive, por mbahet në këmbë edhe me financimin e buxhetit të shetit, spese skema e kontrinuteve nuk e përballon nivelin e pensioneve që kemi në vend.

Skeme e trajtimit nëpërmjet trajtimit suplementar të kategorive që kanë vështirësi të caktuar në profesion dhe jo skemë me statuse të posaçme, sepse këto skema prodhojnë oaze preferenciale.

Të gjitha ligjet që krijojnë statuse të trajtimt të vençatë krijojnë peshë mbi buxhetin e shtetit, por shteti ka përgjegjësi më të madhe mbi këto skema pagash dhe pensionesh. Ne jemi ekonomi në zhvillim dhe shtetet që kanë statuse për kategori të caktuar kanë financa të konsoliduara.

Ne kemi bërë herë pas herë përpjekje për të trajtuar ndryshe minatorët:

-Në 2014 me moshën e ulëm në 55 vjeç

-në 2019 pension i posaçëm suplementar

-VKM për aksidentet në punë

Është profesion në zhdukje, skemi asgjë për të fshehur, ka shumë profesione në zhdukje, hidrauliku, elektricistët, zanate qe oforojnë shërbime që janë në zhdukje. Por mbajtja në këmbë e profesioneve nuk zgjidhet me skema të posaçme.

Shumë faleminderit znj.Tabaku, se kam dashur ta bëj me kohë këtë diskutim, por askush në këtë tyrezë nuk janë kundër rritjes së pagave dhe pensioneve, por në finale kemi përgjegjësi ta mbajmë këtë skemë universale. Nëse favorizojmë një kategori të caktuar, mund të kemi disbalancë në një target grup tjetër dhe çdo gjë lidhet me financat dhe buxhetin e shtetit.

Në kushtet kur Gjykata Kushtetuese u nda 4 me 4 duke mos e dhënë një vendim për kërkesën e qeverisë nëse kërkesa e SPAK për pezullimin e Belinda Ballukut ishte ndërhyrje në punët e ekzekutivit, kryeministri Edi Rama të hënën paralajmëroi se “grupi parlamentar socialist do të angazhohet për zgjidhjen përmes ndërhyrjes në legjislacion”.

Tch shkruan se, përjashtohet ngritja e një grupi pune me juristët e grupit parlamentar socialist.

Ndryshimet ligjore e më konkretisht të nenit 242 të Kodit të Procedurës Penale, kryeministri Rama duket se ia ka besuar ministrit të drejtësisë, Besford Lamallari.

Të njëjtat burime kanë treguar ndryshimet e mundshme të këtij neni.

Por fillimisht le të shikojmë se çfarë parashikon neni 242 i Kodit të Procedurës Penale, për “Pezullimin e ushtrimit të një detyre a shërbimi publik”  të cilin e përdori për herë të parë SPAK, kur kërkoi  pezullimin e Belinda Ballukut nga postet që mbante.

“Me vendimin që disponon pezullimin e ushtrimit të një detyre a shërbimi publik, gjykata i ndalon përkohësisht të pandehurit, plotësisht ose pjesërisht, veprimtarinë që lidhet me to. Kjo masë nuk zbatohet ndaj personave të zgjedhur sipas ligjit elektoral”.

Ndryshimet e pritshme të këtij neni parashikojnë moslejimin e pezullimit nga detyra të të gjithë funksionarëve, funksionet e të cilëve burojnë nga kushtetuta.

“Me vendimin që disponon pezullimin e ushtrimit të një detyre a shërbimi publik, gjykata i ndalon përkohësisht të pandehurit, plotësisht ose pjesërisht, veprimtarinë që lidhet me to. Kjo masë nuk zbatohet ndaj personave të zgjedhur sipas ligjit elektoral përfshi, Presidentin e Republikës, Kryeministrin, Anëtarët e Kabinetit Qeverisës, Avokatin e Popullit, Kreun e KLSH-së dhe Guvernatorin e Bankës së Shqipërisë”.

Me këtë ndryshim mazhoranca synon ti japë fund debatit sa politik dhe juridik nëse SPAK e më pas me miratimin e GJKKO ndërhynë në kompetencat e qeverisë.

Mbetet e paqartë koha se kur ky ndryshim do të shkojë për diskutim dhe miratim në parlament.

Ministrja e Punëve të Brendshme, Albana Koçiu mori pjesë në ceremoninë e certifikimit të 36 punonjësve të Agjencisë së Mbikëqyrjes Policore (AMP), të trajnuar në kuadër të Programit ICITAP, si dhe në nënshkrimin e marrëveshjes së bashkëpunimit ndërmjet Akademisë së Sigurisë dhe AMP-së.

Në fjalën e saj, ministrja vlerësoi bashkëpunimin mbi 25-vjeçar me Shtetet e Bashkuara të Amerikës përmes Programit ICITAP, duke theksuar se ky partneritet ka qenë thelbësor në rritjen e profesionalizmit, integritetit dhe transparencës së institucioneve ligjzbatuese shqiptare. Gjatë këtyre viteve, mbi 380 oficerë dhe agjentë janë trajnuar, duke kontribuar drejtpërdrejt në forcimin e kapaciteteve institucionale.

Duke u ndalur te roli i AMP-së, ajo theksoi se aplikimi i metodave të avancuara hetimore, lufta e sofistikuar kundër krimit të organizuar, si dhe rritja e integritetit personal dhe profesional të oficerëve janë kushte të panegociueshme për funksionimin e shtetit të së drejtës.

Sipas saj, ndonëse progresi i arritur është i dukshëm dhe i vlerësuar nga partnerët ndërkombëtarë, mbetet ende hapësirë për përmirësim, veçanërisht në drejtim të transparencës dhe forcimit të mekanizmave të llogaridhënies.

Në këtë kontekst, marrëveshja e bashkëpunimit u cilësua si një hap i rëndësishëm drejt ndërtimit të një arkitekture të re institucionale, ku parandalimi, trajnimi dhe mbikëqyrja funksionojnë si një zinxhir i vetëm dhe i koordinuar.

Ministrja përgëzoi klasën e re të punonjësve të AMP-së për përfundimin me sukses të trajnimit, duke theksuar se njohuritë e përfituara duhet të përkthehen në veprim konkret, përgjegjësi të përditshme dhe politika më efikase në shërbim të ligjit dhe qytetarëve.

Në përfundim, ajo falënderoi përfaqësuesit e lartë amerikanë të zbatimit të ligjit, për mbështetjen e vazhdueshme, duke nënvizuar se mbështetja e Shteteve të Bashkuara ka qenë dhe mbetet një nga garancitë më të forta për suksesin e reformave dhe forcimin e institucioneve në Shqipëri.