Pretendimi: Nicole Schwab, vajza e ish kreut të Forumit Ekonomik Botëror (WEF) Klaus Schwab, ka rrëfyer se WEF planifikon të vrasë miliarda.

Verdikti: E pavërtetë

———————————————

Në rrjetet konspiracioniste po qarkullon pretendimi i pazakontë se Nicole Schwab, vajza e ish kreut të Forumit Ekonomik Botëror (WEF) Klaus Schwab, ka rrëfyer se WEF planifikon të vrasë miliarda.

Si zakonisht, postimi i mësipërm nuk përmban ndonjë referencë apo ndonjë burim për të mbështetur pretendimin e jashtëzakonshëm.

Postimi duket se i referohet një artikulli të botuar më 29 prill 2024 në portalin amerikan “The People’s Voice”, i njohur më parë si “News Punch”. 

Ky i fundit është etiketuar si një portal burim lajmesh të rreme. Sipas një raporti të vitit 2017 nga Buzzfeed, “NewsPunch” ishte burimi i dytë më i madh i lajmeve të rreme që ishin shpërndarë në Facebook atë vit.

Forumi Ekonomik Botëror, në veçanti, është një nga objektivat e tij të preferuar, siç e ka treguar vazhdimisht Faktoje.

Sipas postimit në Facebook, Nicole Schwab dyshohet se zbuloi një plan të supozuar sekret nga WEF për të “vrarë miliarda njerëz”. Këto zbulime të supozuara erdhën si pjesë e një hetimi nga Gjykata Ndërkombëtare Penale (ICC), e cila pretendohet se dyshon Forumin Ekonomik Botëror për krime kundër njerëzimit.

Por kjo histori nuk ka kuptim. Asnjë nga njerëzit e akuzuar për krime kundër njerëzimit nga ICC, e cila gjykon individë, jo organizata, nuk është anëtar i WEF. As shtypi ndërkombëtar nuk ka raportuar ndonjë rast të tillë.

Më 22 prill 2025, ëall Street Journal zbuloi hapjen e një hetimi të pavarur ndaj Klaus Schwab nga Forumi Ekonomik Botëror.

Një ditë më parë, ekonomisti gjerman kishte njoftuar dorëheqjen e tij nga pozicionet e tij si president dhe anëtar i bordit të drejtorëve të organizatës, pa përmendur hetimin.

Ky hetim, i konfirmuar më vonë nga WEF për media të tjera, nisi pas akuzave për keqpërdorim financiar, të bëra në mënyrë anonime. Rasti përfshin gjithashtu Hilde Schwab, gruan e Klaus Schwab, e cila është gjithashtu aktive në Forumin e Davosit.

Çifti akuzohet për përdorimin e fondeve të organizatës për përfitime personale. Sipas ëall Street Journal, Schwab, i cili i mohon akuzat, dyshohet se i udhëzoi punonjësit të tërhiqnin “mijëra dollarë” nga llogaritë e WEF në emër të tij, të cilat dyshohet se i përdori për të paguar masazhet e hoteleve.

Megjithatë, ky është një hetim i brendshëm nga Forumi Ekonomik Botëror dhe jo një hetim ndërkombëtar për krime kundër njerëzimit, siç pretendohet në postimet e rrjeteve sociale.

The post Vajza e ish-kreut të Forumit Ekonomik Botëror nuk zbuloi komplotin për vrasjen e miliardave appeared first on Faktoje.al.

Pretendimi: Ish-kreu i Forumit Ekonomik Botëror, Klaus Schwab, u arrestua në prill të vitit 2025.

Verdikti: E pavërtetë

———————————————————————

Në rrjete sociale, përfshi ato shqipfolëse, po riqarkullon lajmi i arrestimit të 

Klaus Schwab, tashmë ish-kreu i Forumit Ekonomik Botëror (WEF).

Si zakonisht, postimi i mësipërm nuk shoqërohet me ndonjë provë apo burim të besueshëm që mbështet pretendimin se Schwab është arrestuar.

Klaus Schwab, subjekt i shumë teorive konspiracioni, u tërhoq nga pozicioni i tij si kreu i WEF më 21 prill 2025.

Dy ditë më vonë, Forumi Ekonomik Botëror deklaroi se bordi i tij kishte dhënë miratimin unanim për një hetim të pavarur mbi akuzat për sjellje të pahijshme nga Schwab. 

Deklarata erdhi pas një artikulli nga The Wall Street Journal që citonte një letër sinjalizuesi që pretendonte sjellje të pahijshme financiare dhe etike nga 87 vjeçari Schwab dhe gruaja e tij, Hilde. Gazeta raportoi se akuzat iu dërguan në një letër anonime bordit javën e kaluar dhe përfshinin pretendime se familja Schwab i kishte përzier punët e tyre personale me burimet e Forumit.

“Ndërsa Forumi i merr seriozisht këto akuza, ai thekson se ato mbeten të pavërtetuara dhe do të presë rezultatin e hetimit për të komentuar më tej”, tha Forumi për Associated Press.

Sipas WSJ, letra, që thuhet se është dërguar nga stafi aktual dhe ish-staf anonim i WEF, “përfshinte akuza se Klaus Schwab u kërkoi punonjësve të rinj të tërhiqnin mijëra dollarë nga bankomatët në emër të tij dhe përdori fondet e Forumit për të paguar masazhe private në dhoma në hotele.” Gjithashtu pretendohej se gruaja e tij përdori takime të financuara nga Forumi “për të justifikuar udhëtimet luksoze të pushimeve me shpenzimet e organizatës”.

Letra ngrinte shqetësime rreth mënyrës se si Schwab i trajtonte punonjëset femra dhe se si udhëheqja e tij dyshohet se lejoi që rastet e ngacmimit seksual dhe sjelljes diskriminuese të kalonin pa ndëshkim.

Kështu, megjithëse veprimtaritë e ish-kreut të WEF do të shqyrtohen nga një hetim i pavarur i porositur nga WEF, nuk ka asnjë provë se Schwab është arrestuar. 

The post Ish-kreu i Forumit Ekonomik Botëror nuk është nën arrest appeared first on Faktoje.al.

Pretendimi: Forumi Ekonomik Botëror ka premtuar të falë këdo që do t’ja dalë të vrasë presidentin amerikan Donald Trump

Verdikti: E paprovuar

————————————————————————-

Lajmi i pazakontë se Forumi Ekonomik Botëror (wEF) ka premtuar se do të falë këdo që do të arrijë të vrasë presidentin amerikan Donald Trump po qarkullon në rrjet pas zhvillimit të forumit në Davos të Zvicrës. 

Postimi duket se i referohet një artikulli të botuar më 27 janar në portalin amerikan The People’s Voice, i njohur më parë si News Punch. 

Ky i fundit është etiketuar si një portal burim lajmesh të rreme. Sipas një raporti të vitit 2017 nga Buzzfeed, NewsPunch ishte burimi i dytë më i madh i lajmeve të rreme që ishin shpërndarë në Facebook atë vit.

Sipas artikullit të The People’s Voice, kreu i WEF “Schwab premton të falë këdo që do të vrasë me sukses Trump, sapo globalistët të marrin kontrollin e Shteteve të Bashkuara.”

Si zakonisht, artikulli nuk ofron asnjë lloj prove për këtë pretendim të pazakontë, por vetëm citon një “njeri të brendshëm të WEF”. 

Eshtë e paqartë se si Forumi Ekonomik Botëror mund të ofrojë amnisti për dikë që mund të organizojë një vrasje kaq e rëndësishme duke qënë se është vetëm një organizatë joqeveritare. I themeluar në 1971, WEF e përshkruan veten si një fondacion dhe grup mendimi, që ka si mision “përmirësimin e gjendjes së botës duke angazhuar liderë të biznesit, politikë, akademikë dhe të tjerë të shoqërisë për të formësuar axhendat globale, rajonale dhe të industrisë”. 

Fondacioni është më së shumti i njohur për takimin e tij vjetor në fund të janarit në Davos, një vendpushim malor në rajonin lindor të Alpeve të Zvicrës. Takimi mbledh së bashku rreth 3,000 anëtarë që paguajnë kuotën e anëtarësisë dhe pjesëmarrës të përzgjedhur – mes të cilëve janë investitorë, udhëheqës biznesi, udhëheqës politikë, ekonomistë, njerëz të famshëm dhe gazetarë.

Në të njejtën mënyrë, duke mos ofruar asnjë provë apo burim veçse “njerëzve të brendshëm” anonimë, The People’s Voice ka botuar një numër artikujsh me pretendime të pazakonta përfshi pretendimin se WEF ka udhëzuar liderët botërore të vendosin ligje të “Moshës së Vdekjes”, WEF po përpiqet të vrasë politikanin rumun Calin Georgescu, dhe se presidenti rus Vladimir Putin ka ekspozuar shpërblimin prej 45 miliardë dollarësh nga WEF për kokën e Donald Trump.

The post Asnjë bazë për amnistinë e premtuar nga Forumi i Davosit për vrasjen e Trump appeared first on Faktoje.al.

Pretendimi: Forumi Ekonomik Botëror (WEF) ka udhëzuar liderët botërore të vendosin ligje të “Moshës së Vdekjes”

Verdikti: E paprovuar

—————————————————-

Në rrjetet konspiracioniste po qarkullon pretendimi i jashtëzakonshëm se Forumi Ekonomik Botëror (WEF) ka udhëzuar qeveritë botërore që të vendosin ligjet e “Moshës së Vdekjes”. Sipas këtij pretendimi, qeveritë do të përcaktojnë nëse qytetarët e tyre të moshuar mund të jetojnë apo jo pas një moshe të caktuar duke lehtësuar kostot e shoqërive për mbajtjen e tyre.  

Postimi i mësipërm duket se i referohet një artikulli të portalit amerikan The People’s Voice, i njohur më parë si News Punch. 

Ky i fundit është etiketuar si një portal burim lajmesh të rreme. Sipas një raporti të vitit 2017 nga Buzzfeed, NewsPunch ishte burimi i dytë më i madh i lajmeve të rreme që ishin shpërndarë në Facebook atë vit.

Duke mos ofruar asnjë provë, artikulli përshkruan një komplot të supozuar për të kontrolluar se sa gjatë mund të jetojnë njerëzit. Ai nuk shpjegon se si e di se çfarë po “planifikohej pas dyerve të mbyllura”.

Nuk ka asnjë provë që WEF ka bërë një propozim të tillë. Një kërkim në faqen e internetit të WEF me termat “Mosha e vdekjes” nuk dha ndonjë rezultat.

Në fakt, më 8 shkurt 2024, WEF propozoi gjashtë parime për të “ndihmuar një popullsi të plakur të jetojë mirë”. Këto parime kanë për synim të nxisin politika që përmirësojnë jetesën e të moshuarëve për shkak të rritjes së jetëgjatësisë në botë dhe jo të caktojnë ndonjë kufi jetese të kontrolluar nga qeveritë. 

The post Forumi Ekonomik Botëror nuk rekomandoi kontrollin e jetës për të moshuarit appeared first on Faktoje.al.