Nga Gazeta Si – “Futja e euros është gurthemeli i fundit në integrimin e Bullgarisë në Bashkimin Evropian,” tha presidenti, por opinioni publik nuk është aq i bindur.
Bullgaria iu bashkua eurozonës më 1 Janar, duke u bërë anëtarja e 21-të e unionit monetar.
Euro zëvendësoi levin bullgar, me kursin përfundimtar të këmbimit të caktuar në 1 euro = 1,96 leva, që nga 31 Dhjetori.
Presidenti Rumen Radev tha në mesazhin e tij të Vitit të Ri: “Futja e euros është gurthemeli i fundit në integrimin e Bullgarisë në Bashkimin Evropian — një vend që e meritojmë me arritjet e kulturës sonë mijëvjeçare dhe kontributin qytetërues të vendit tonë.”
“Guvernatori i Bankës Qendrore të Bullgarisë”, Dimitar Radev, ka zënë një vend në tryezën e “Këshillit Drejtues të Bankës Qendrore Evropiane”.
“E mirëpres ngrohtësisht Bullgarinë në familjen e euros dhe guvernatorin Radev në tryezën e Këshillit Drejtues të BQE-së në Frankfurt,” tha presidentja e BQE-së, Christine Lagarde, në një deklaratë të enjten.
Qytetarët do të mund të paguajnë ende me leva për rreth 1muaj, por do të fillojnë të marrin kusurin në euro.
Deri më 30 Qershor, paratë e vjetra mund të këmbehen pa tarifë në banka dhe zyra postare, ndërsa në Bankën Qendrore të Bullgarisë kjo do të jetë e mundur pa afat kohor.
Megjithatë, opinioni publik mbetet i ndarë. Sipas një sondazhi të Eurobarometrit nga muaji Mars, 53% e 1.017 bullgarëve të anketuar ishin kundër anëtarësimit në Eurozonë, ndërsa 45% ishin pro.
Shumica gjithashtu mendonte se Bullgaria nuk ishte gati për të futur euro-n. Frika kryesore lidhej me “vendosjen abuzive të çmimeve gjatë periudhës së kalimit”.
Bullgaria iu bashkua Bashkimit Evropian më 1 Janar 2007. Në një sondazh zyrtar të BE-së nga muaji Maj, 58% e bullgarëve thanë se vendi ka përfituar nga anëtarësimi në BE.
Nga Gazeta Si – Ish-zëvendëspresidenti i Komisionit Evropian, Joaquin Almunia, ka deklaruar se Shtetet e Bashkuara nuk janë më një aleat i Evropës, por janë shndërruar në një kundërshtar të hapur, duke fajësuar drejtpërdrejt presidentin amerikan Donald Trump për këtë ndryshim strategjik.
Në një intervistë për radion spanjolle “Cadena Ser”, Almunia tha se SHBA-ja ka kaluar nga një qëndrim pro-evropian në një politikë armiqësore ndaj Bashkimit Evropian.
“Kjo duhet të shqetësojë jo vetëm evropianët, por edhe vetë amerikanët,” theksoi ai.
Sipas Almunias, kërcënimi nuk vjen nga populli amerikan, por nga administrata e Trump-it, e cila – sipas tij – e konsideron BE-në si kundërshtarin kryesor strategjik, ndërsa presidentin rus, Vladimir Putin si një aleat.
Ai shprehu shqetësim të veçantë për dokumentin e fundit të Strategjisë së Sigurisë Kombëtare të SHBA-së, i cili mbështet partitë populiste të ekstremit të djathtë në Evropë, të cilat Trump i quan “parti patriotike”.
Almunia përgëzoi kryeministrin portugez, Antonio Costa për reagimin e tij kritik ndaj këtij dokumenti, i cili pretendon se Evropa po përballet me “zhdukje civilizimi” për shkak të migracionit dhe rregulloreve të shumta.
“Aleatët nuk kërcënojnë të ndërhyjnë në zgjedhjet demokratike të njëri-tjetrit,” deklaroi Costa.
Në të njëjtën kohë, Almunia shprehu shqetësim të thellë për heshtjen e liderëve të tjerë evropianë, përfshirë presidenten e Komisionit Evropian, Ursula von der Leyen, përballë këtij ndryshimi të politikës amerikane.
Ai kritikoi reagimin e Bashkimit Evropian ndaj genocidit në Gaza, duke e cilësuar atë si të paqartë dhe të p vendosur.
“Kur shohim shkelje të rënda të të drejtave themelore të njeriut, duhet të reagojmë me vendosmëri. Si evropianë, nuk mund të mbyllim sytë apo të gjejmë justifikime,” përfundoi Almunia.
Nga Gazeta Si – Zohran Mamdani është betuar si kryetari i ri i Bashkisë së Nju Jorkut, duke hyrë në histori si kryebashkiaku i parë mysliman i qytetit.
Ceremonia publike e inaugurimit do të transmetohet drejtpërdrejt dhe do të shikohet edhe në zona të organizuara përgjatë Broadway-t.
Kryebashkiaku i ri i Nju Jorkut u inaugurua zyrtarisht në një stacion metroje jashtë përdorimit, një ngjarje simbolike që e veçon këtë fillim mandati.
Socialisti demokrat u betua zyrtarisht në mesnatë në stacionin e vjetër të metrosë “Old City Hall”, i cili është i aksesueshëm vetëm disa herë në vit përmes tureve të organizuara.
Ai është gjithashtu personi i parë me origjinë nga Azia Jugore dhe i pari i lindur në Afrikë që bëhet kryetar i bashkisë së Nju Jorkut, pasi ka lindur në Ugandë.
Pas betimit tradicional dhe të thjeshtë, Mamdani do të mbajë një ceremoni festive gjatë pasdites.
Sipas ekipit të tij, zgjedhja e stacionit të metrosë simbolizon “angazhimin e tij ndaj punëtorëve që e mbajnë qytetin në funksion çdo ditë.”
Ai u betua përpara Prokurores së përgjithshme të Nju Jorkut, Letitia James.
Prokurorja e Nju Jorkut, Leticia James (majtas), Zohran Mamdani (në qendër) dhe bashkëshortja e tij Rama Duwaji (djathtas)
Të pranishëm ishin bashkëshortja e tij, Rama Duwaji, anëtarë të familjes së ngushtë, përfshirë nënën, regjisoren e njohur Mira Nair, si dhe babain e tij, profesorin e Universitetit “Columbia”, Mahmood Mamdani.
34 vjeçari Mamdani, ish-anëtar i asamblesë shtetërore, fitoi zgjedhjet me një platformë të fortë kundër kostos së lartë të jetesës, duke premtuar ngrirje të qerave dhe transport publik falas me autobusë.
Ai nxiti një pjesëmarrje rekord prej më shumë se 2 milionë votuesish, duke marrë 50% të votave, gati 10 pikë përpara ish-guvernatorit demokrat të Nju Jorkut, Andrew Cuomo, i cili kandidoi si i pavarur, dhe shumë përpara republikanit, Curtis Sliwa.
Si qyteti më i populluar i SHBA-së, Nju Jorku ka rreth 8 milionë banorë.
Planet për inaugurimin publik gjatë ditës së Vitit të Ri përfshijnë një ceremoni në shkallët e “City Hall”, si dhe festën e parë ndonjëherë të inaugurimit të një kryetari bashkie, me muzikë dhe fjalime përpara rreth 4000 të ftuarve në “City Hall Plaza”.
Publiku do të ketë mundësinë të ndjekë transmetimin direkt të asaj që ekipi i Mamdanit e quan “Inaugurimi i një Epoke të Re”, në zona falas të vendosura përgjatë Broadway-t.
Komiteti i inaugurimit përfshin emra të njohur si shkrimtari Colson Whitehead, “youtube-rja” për fëmijë Ms Rachel, muzikanti Sonny Rollins, si dhe aktorët Luis Guzmán dhe Cynthia Nixon, kjo e fundit ish-kandidate për guvernatore të shtetit të Nju Jorkut.
Mamdani do të zhvendoset nga apartamenti i tij me një dhomë gjumi në Astoria në “Gracie Mansion”, rezidenca zyrtare e kryetarëve të bashkisë së Nju Jorkut në lagjen luksoze “Upper East Side”.
Ai nuk është kryebashkiaku i parë i qytetit i lidhur me socializmin demokratik, megjithëse David Dinkins nuk e theksoi shumë lidhjen e tij me Socialistët Demokratë të Amerikës (DSA) gjatë mandatit të tij nga 1990 deri më 1993.
Nga Gazeta Si – Enzo Maresca nuk është më trainer i Chelsea-t edhe pse klubi aktualisht ndodhet në vendin e 5-të në “Premier League”.
45-vjeçari italian largohet më pak se 6-të muaj pasi fitoi Kupën e Botës për Klube në fund të sezonit të parë në “Stamford Bridge”.
Blutë kanë fituar vetëm 1 nga 7-të ndeshjet e fundit në kampionat dhe morën vetëm 6-të pikë nga 6-të ndeshje në Dhjetor, duke mbetur 15 pikë pas kryesuesve të Arsenal.
Megjithatë, rezultatet janë vetëm një pjesë e historisë.
Maresca, kontrata e të cilit ishte e vlefshme deri në vitin 2029, kishte impresionuar figurat kyçe në “Stamford Bridge” – përfshirë drejtorët sportivë Paul Winstanley dhe Laurence Stewart, si dhe bashkëpronarin Behdad Eghbali – kur e udhëhoqi Chelsea-n drejt një vendi në “Big4” në kampionat, fitoi “UEFA Conference League” dhe Kupën e Botës për Klube sezonin e kaluar.
Megjithatë, suksesi u kthye shpejt në përplasje me drejtuesit. Maresca habiti edhe anëtarë të stafit të tij kur – pas fitores 2-0 ndaj Everton-it, e vetmja fitore e Chelsea-t në “Premier League” në Dhjetor – deklaroi se “shumë njerëz” ia kishin bërë ato “48 orët më të këqija” që nga ardhja e tij në klub.
Këto komente erdhën pa paralajmërim për stafin apo drejtuesit e lartë, të cilët do të kishin preferuar që diskutimet të mbeteshin private. Por tensionet kishin nisur prej muajsh.
Enzo Maresca
Maresca kishte shpresuar të rrite profilin e tij pas sukseseve me Chelsea-n përmes angazhimeve jashtë klubit.
Ai planifikonte të botonte një libër, por iu bllokua kjo mundësi, dhe foli në “Il Festival dello Sport” – event në Itali i organizuar nga gazeta “La Gazzetta dello Sport” – pa lejen e klubit.
Ai gjithashtu bëri publik mospajtimin e tij me vendimin e klubit për të mos transferuar një qendër mbrojtës pas dëmtimit të Levi Colwill në ligamentin kruciat përpara fillimit të sezonit.
Drejtuesit argumentuan se një transferim i tillë mund të shtynte talentin e akademisë Josh Acheampong të kërkonte largimin, gjë që e detyroi Marescan të tërhiqej.
Ish-trajneri i Leicester-it ka ndërruar përfaqësuesin e tij – nga agjencia “Wasserman” te Jorge Mendes – dhe u përfol si pasardhës i mundshëm i Pep Guardiolës te Manchester City, diçka që Maresca e mohoi.
Për më tepër, ai shmangu gjithnjë e më shumë veshjen e kostumeve sportive të klubit, duke zgjedhur rroba personale.
Pas ndeshjes së tij të fundit me Chelsea-n (barazimi 2-2 me Bournemouth më 30 Dhjetor) – ndihmëstrajneri Willy Caballero tha se Maresca ishte i sëmurë për të kryer detyrimet mediatike, por kuptohet se mungesa e tij lidhej më shumë me reflektimin mbi hapat e ardhshëm.
U vu re gjithashtu se në një video 52-sekondëshe të publikuar nga Chelsea në rrjetet sociale në prag të Vitit të Ri, që përmblidhte vitin e klubit, nuk kishte asnjë gjurmë të Maresca-s.
Nga ana e tij, italiani besonte se presioni ndaj tij ishte i padrejtë duke pasur parasysh kushtet e vështira të punës dhe se ishte kaluar kufiri në përpjekjet për të ndikuar në përzgjedhjen e formacionit.
Oliver Glasner (majtas) dhe Andoni Iraola (djathtas)
Edhe pse nuk ishte i zemëruar që po drejtonte një skuadër të re në moshë, ai mendonte se pritshmëritë e tifozëve duhej të menaxhoheshin më mirë, veçanërisht duke pasur parasysh dëmtimet e Colwill dhe sulmuesit Cole Palmer.
Chelsea fillimisht kishte planifikuar të vlerësonte situatën e tij në fund të sezonit nëse rezultatet përmirësoheshin, por pakënaqësia e Maresca-s ndikoi që ndarja të ndodhte më herët.
Çfarë e pret Chelsea-n?
Aktualisht, Blutë do të përballen me Manchester City-n të dielën pa trajner dhe nuk dihet kush do ti drejtojë stërvitjet deri atëherë.
Caballero, i cili u transferua nga Leicester së bashku me Maresca-n në vitin 2024, ka zëvendësuar italianin kur ky i fundit ka qenë i pezulluar dhe, pa një njoftim për të ardhmen e tij, ai mund të jetë një opsion i përkohshëm.
Chelsea ka qenë admirues i madhe i ish-trajnerit të Brighton, Roberto De Zerbi, i cili aktualisht është nën kontratë me Marsejën.
Klubi intervistoi trajnerin e Ipswich, Kieran McKenna dhe atë të Tottenham, Thomas Frank përpara se të firmoste me Maresca-n.
Gjithashtu, trajneri i Crystal Palace, Oliver Glasner dhe homologu i tij te Bournemouth, Andoni Iraola pritet të jenë në listën e kandidatëve.
Nga Gazeta Si – Ka pasur shumë sportistë të jashtëzakonshëm, madje edhe në këtë shekull, për të mos folur për të gjithë historinë, por të jesh kapiten ekipi kërkon një personalitet të veçantë.
Në sport, kapiteni i ekipit përfaqëson shumë cilësi të ndryshme, por faktori kryesor që i bashkon të gjitha është udhëheqja.
Gjatë historisë kanë ekzistuar shumë kapitenë frymëzues. Që nga kapiteni i Afrikës së Jugut në regbi, Siya Kolisi, që fitoi dy Kupa Bote rradhazi, deri te liderë të futbollit si Diego Maradona dhe Franz Beckenbauer.
Më poshtë janë 10 udhëheqësit më të mëdhenj në historinë e sportit.
Kriteret e renditjes – Trashëgimia: Sa të qëndrueshme janë (ose pritet të jenë) arritjet e tyre si kapitenë me kalimin e kohës – Jetëgjatësia: Kohëzgjatja dhe ndikimi i rolit të tyre si kapiten – Trofe dhe tituj: Çfarë kanë fituar dhe mënyra se si i kanë fituar
Tony Jacklin – Kapiten i “Europe Ryder Cup” 1983-1989
Bobby Moore – Kapiten i Anglisë në Botërorin e vitit 1966
Roy Keane – Kapiten i Manchester United: 1996-2003
Steve Waugh – Kapiten i Australisë në kriket: 1997-2004
Cafu – Kapiten i Brazilit në Botërorin e vitit 2002
Wayne Gretzky – Lojtari më i madh i të gjitha kohërave në hokejin në akull
Richie McCaw – Kapiten i Zelandës së Re në regbi: 2006-2015
Franz Beckenbauer – Kapiten i Gjermanisë Perëndimore në Botërorin e vitit 1974
Diego Maradona – Kapiten i Argjentinës dhe Napolit
Siya Kolisi – Prej vitit 2018 Kapiten i Afrikës së jugut në regbi
Nga Gazeta Si – Skiatorja me origjinë italiane që garon për Shqipërinë, la pas ditët e errëta duke vazhduar trajektoren në rritje.
Ajo mund të jetë ende në kërkim të fitores së parë historike të Shqipërisë në Kupën e Botës por vitin kalendarik e mbylli me podiumin e 7-të, dhe të 4 në 5 gara – duke ju afruar fitores gjithnjë e më shumë.
Në ditën kur Shiffrin arriti fitoren e saj të 69-të në Slalom, Colturi startoi garën e 67-të në Kupën e Botës.
Ajo dha gjithçka dhe në fund siguroi një vend të tretë në garën e fundit të këtij viti.
“Në garat e fundit kam bërë shumë më tepër dhe thjesht po provoja limitin tim. Por ishte e pamundur të fitoja, kështu që u përpoqa të bëja maksimumin” – tha ajo.
Klasifikimi në dy zbritjet e Slalom-it në Semmering, Austri.
“Dëbora ishte pak më e mirë në zbritjen e dytë, kështu që mentaliteti ishte të skijoja shpejt dhe të bëja atë që bëj në stërvitje, por zbritja e dytë ishte shumë e vështirë” – tregoi Lara
“Është fantastike ta mbyllësh vitin me një podium dhe tani do t’i zhvilloj garat e ardhshme me të njëjtin mentalitet. Po afrohem në çdo garë, ndihem shumë mirë në stërvitje. Jam shumë e shpejtë, me mentalitet dhe forcë” – vazhdoi Colturi.
Te Mikaela Shiffrin Lara ka një model ideal nga i cili mund të mësojë. “Ajo është vërtet e jashtëzakonshme,” – tha Colturi për Shiffrin. “Po përpiqem të kopjoj gjithçka nga ajo. Që kur isha 5 vjeçe jam përpjekur ta bëj këtë, kështu që jam mësuar” – përfundoi skiatorja jonë
Slalomi i parë i Vitit të Ri do të zhvillohet më 4 Janar në Kranjska Gora në Slloveni dhe do të ofrojë mundësinë e rradhës që Lara të provojë të mposhtë më të mirën e të gjitha kohërave.
Nga Gazeta Si – Me përmbysjen ndaj Chelsea-t, Aston Villa regjistroi fitoren e 11-të rradhazi në të gjitha kompeticionet.
Por si krahasohet kjo seri mbresëlënëse me arritjet e mëparshme të klubeve të Premier League?
Kur të dielën e 21 Shtatorit, vërshëllima e fundit u dëgjua në “Stadium of Light”, për çudi kishte njerëz që mendonin se koha e Unai Emery si trajner i Aston Villa-s po shkonte drejt fundit.
Për herë të 4 në historinë e saj, skuadra nuk fitoi asnjë nga 5 ndeshjet e para të sezonit, duke patur startin më të dobët në 56 vite, si dhe më të keqin në elitë që nga sezoni 1964-65.
Vetëm 5 ditë para humbjes ndaj Sunderland-it, Villa ishte eliminuar nga Kupa e Ligës që në raundin e parë.
Ndërsa goli i Matty Cash në barazimin 1-1 ndaj Sunderland-it me 10 lojtarë ishte i pari në Premier League për këtë sezon.
Aston Villa-s iu deshën 427 minuta për të shënuar golin e parë në kampionat.
Më pas erdhi fitorja në UEFA Europa League në shtëpi ndaj Bologna-s më 25 Shtator dhe gjithçka ndryshoi.
Ajo ishte fitorja e parë e sezonit dhe nisi një seri e jashtëzakonshme prej 17 fitoresh në 19 ndeshje në të gjitha kompeticionet.
11 nga këto fitore kanë ardhur në 11 ndeshjet e fundit zyrtare, duke barazuar një rekord të klubit, i arritur më parë vetëm në Shtator 1897 dhe Mars 1914.
Tetë fitore gjatë kësaj serie kanë ardhur në “Premier League”, që do të thotë se Villa ka fituar 8 ndeshje radhazi në elitë për herë të parë që nga seria prej 9 fitoresh mes Tetor-Dhjetorit 1910.
Një përballje në krye të tabelës ndaj Arsenal-it sot, ofron mundësinë për ta zgjatur këtë seri fitoreje dhe për ta mbyllur vitin 2025 në mënyrën më të mirë të mundshme – por sa larg janë të besuarit e Emery, nga rekordet historike të Premier League?
Seritë më të gjata të fitoreve në “Premier League” Liverpool – 18 fitore rradhazi (27/10/2019 – 24/02/2020) Manchester City – 18 fitore rradhazi (26/08/2017 – 27/12/2017) Liverpool – 17 fitore rradhazi (10/03/2019 – 05/10/2019) Manchester City – 15 fitore rradhazi (03/02/2019 – 10/08/2019) Manchester City – 15 fitore rradhazi (19/12/2020 – 02/03/2021) Arsenal – 14 fitore rradhazi (10/02/2002 – 18/08/2002) Chelsea – 13 fitore rradhazi (01/10/2016 – 31/12/2016) Manchester City – 13 fitore rradhazi (03/04/2024 – 14/09/2024) Manchester City – 12 fitore rradhazi (06/11/2021 – 15/01/2022) Manchester City – 12 fitore rradhazi (25/02/2023 – 21/05/2023) Manchester United – 12 fitore rradhazi (11/03/2000 – 20/08/2000)
Seritë më të gjata të fitoreve nga klubet e “Premier League” në të gjitha kompeticionet Manchester City – 21 fitore rradhazi (19/12/2020 – 02/03/2021) Arsenal – 13 fitore rradhazi (23/03/2002 – 18/08/2002) Arsenal – 12 fitore rradhazi (25/08/2007 – 23/10/2007) Arsenal – 12 fitore rradhazi (16/03/2000 – 06/05/2000) Aston Villa – 11 fitore rradhazi (në vazhdim – prej 06/11/2025) Manchester City – 11 fitore rradhazi (19/12/2023 – 13/02/2024) Arsenal – 11 fitore rradhazi (25/08/2018 – 25/10/2018) Manchester City – 11 fitore rradhazi (26/08/2017 – 21/10/2017) Manchester City – 11 fitore rradhazi (19/04/2015 – 12/09/2015) Manchester United – 11 fitore rradhazi (11/01/2009 – 21/02/2009) Liverpool – 11 fitore rradhazi (15/03/2006 – 07/05/2006)
Nga Gazeta Si – Ish mbrojtësi i Partizanit dhe ish basketbollisti i Dinamos nuk janë më mes familjes, miqve dhe tifozëve që i ndoqën prej vitesh në karrierën e pasur dhe pas saj.
Prej kohësh në shtrat si një pasojë e një sëmundjeje të pashërueshme, Eksarko la plot kujtime pwr aktivizimin te Partizani deri në vitin 1985, por jo vetëm.
Ai ishte pjesë e Kombëtares në vitet 1983-1984, ku luaji 4 ndeshje si kuqezi.
Eksarko u nda nga jeta në moshën 66 vjecare ndërsa ishte shpallur Kampion me Partizanin ne sezonin 1980-1981.
Gjithashtu kishte fituar Kupën e Republikës po me Partizanin në vitin 1980 dhe kishte humbur Finalen e të njëjtit kompeticion, përballë Flamurtarit në vitin 1985.
Ndërsa në moshen 54-vjecare e në mënyrë krejt të papritur, po sot u nda nga jeta edhe Enea Andrea.
Lojtar i bluve të koshit në kryeqytet deri në vitin 2005, pjesë e një brezi të artë me Carcanin, Memën, Mucën, Rushajn, Bilalin, që në stol drejtohesin nga i ndjeri Arben Fagu.
Ky grup lojtarësh e shndërroi Dinamon në rivale të denjë të Tiranës, Vllaznisë dhe Valbonës.
Në fund të karrierës si basketbollist, Enea Andrea ishte një ndër komentatorët më të mirë të sportit të tij, në “NBA” dhe “Euroleague”.
Nga Gazeta Si – Loja e bukur, siç njihet ndryshe futbolli, nuk do të ishte aty ku është sot pa një numër të vogël individësh të veçantë.
Këta janë njerëz vendosën rregulla që revolucionarizuan sportin, figura shumë të fuqishme që zbatuan ligje dhe drejtuan rrjedhën e zhvillimit të futbollit.
Lojtarë, trashëgimia e të cilëve shkon përtej një karriere të madhe, duke përfshirë momente të paharrueshme që edhe sot ndikojnë në mënyrën se si luan brezi aktual.
Sigurisht, statusi i këtyre personave ka ndryshuar me kalimin e viteve.
Lojtarët mund të mos jenë më në kulmin e formës së tyre, ndërsa drejtuesit mund të jenë larguar.
Por kur bëhet fjalë për ata që kanë pasur ndikimin më të madh në historinë e sportit, këta janë 10 emra që formësuan futbollin dhe që rrjedhimisht, meritojnë të jenë pjesë e diskutimit për njerëzit më me ndikim në historinë e futbollit.
1. Johan Cruyff 2. Lionel Messi 3. Jean-Marc Bosman 4. Sepp Blatter 5. Cristiano Ronaldo 6. Sir Alex Ferguson 7. Michel Platini 8. Antonin Panenka 9. Jules Rimet 10. Greg Dyke
Nga Gazeta Si – Gala-ja vjetore mblodhi edhe një herë emrat më të mëdhenj të futbollit, duke ofruar një mbrëmje çmimesh, emocionesh dhe paraqitjesh të spikatura.
“Globe Soccer Awards 2025” ishte sërish në qendër të vëmendjes, duke vazhduar një traditë që prej vitit 2010 nderon elitën e futbollit botëror.
E organizuar nga Këshilli Sportiv i Dubait, ceremonia u mbajt edhe këtë herë në Emiratet e Bashkuara Arabe, duke forcuar statusin e saj si një ngjarje kyçe në kalendarin global të futbollit.
Gjatë mbrëmjes u ndanë çmime për Lojtarin e Vitit (meshkuj), Lojtaren e Vitit (femra), Klubin e Vitit, Trajnerin e Vitit, si dhe një gamë e gjerë çmimesh individuale që mbulojnë çdo aspekt të lojës.
– Barcelona vendos tonin nga La Liga
Mbrëmja u hap me çmime të lidhura me La Liga-n, ku Barcelona ishte qartësisht në qendër të vëmendjes.
Klubi katalanas u shpall “Klubi më i Mirë”, ndërsa Hansi Flick fitoi çmimin për “Trajnerin më të Mirë”.
Nuk mund të mungonin vlerësimet individuale:Jan Oblak u shpall “Portieri më i Mirë”, Raphinha u kurorëzua si “Lojtari më i Mirë”nëLa Liga.
Ndërsa Lamine Yamal u shpall “Lojtari më i Mirë U-23”, duke theksuar praninë e fortë të Barcelonës në kategoritë vendase.
Prindërit e Diogo Jota-s (majtas) – Novak Djokovic dhe Cristiano Ronaldo (djathtas)
– Dembélé, më i miri në Botë për vitin 2025
Çmimi më prestigjioz i mbrëmjes, Lojtari i Vitit (meshkuj) në “Globe Soccer Awards 2025”, iu dha Ousmane Dembélé.
Sulmuesi francez la pas emra elitarë si Kylian Mbappé, Raphinha,Vitinha dhe Lamine Yamal.
Ndërkohë, Cristiano Ronaldo u vlerësua si “Lojtari i Vitit në Lindjen e Mesme”, duke forcuar edhe më tej ndikimin e tij sportiv dhe kulturor në rajon.
Aitana Bonmatí kryeson futbollin e femrave
Në kategorinë e femrave, Aitana Bonmatí u shpall “Lojtarja e Vitit” në “Globe Soccer Awards 2025”.
Ylli spanjoll triumfoi në një garë shumë të fortë ku përfshiheshin Mariona Caldentey, Melchie Dumornay, Alexia Putellas dhe Alessia Russo.
Ky çmim kurorëzoi një vit të jashtëzakonshëm për Bonmatín, e cila edhe një herë spikati mes figurave kryesore të futbollit të femrave.
Një natë emocionesh dhe homazhesh Një nga momentet më prekëse të ceremonisë ishte homazhi special për Diogo Jota-n.
Në një atmosferë të ngarkuar emocionalisht, prindërit e André dhe Diogo Jota-s morën cmimin, duke krijuar një nga skenat më prekëse të mbrëmjes.
Fituesit nga Paris Saint Germain
Lista e plotë e fituesve të Globe Soccer Awards 2025
Lojtari i Vitit (meshkuj): Ousmane Dembélé
Lojtarja e Vitit (femra): Aitana Bonmatí
Klubi i Vitit (meshkuj): PSG
Klubi i Vitit (femra): Barcelona
Trajneri i Vitit: Luis Enrique (PSG)
Mesfushori më i Mirë: Vitinha (PSG)
Sulmuesi më i Mirë: Lamine Yamal (Barcelona)
Lojtari në Ngjitje: Désiré Doué (PSG)
Agjenti më i Mirë: Jorge Mendes
Drejtori Sportiv më i Mirë: Luis Campos (PSG)
Presidenti më i Mirë: Nasser Al-Khelaïfi (PSG)
Lojtari i Vitit në Lindjen e Mesme: Cristiano Ronaldo
Krijuesi më i Mirë: Bilal Halal
Akademia më e Mirë: “Right to Dream”
Çmimi për Arritje në Karrierë: Hidetoshi Nakata dhe Andrés Iniesta
Nga Gazeta Si – Pas Kupës së Shqipërisë, blutë fituan edhe Superkupën në Finalen e zhvilluar në “Air Albania” në Tiranë.
Skuadrës së Ilir Dajës i mjaftoi pjesa e dytë ku përmbysi fituesit në fuqi që zhbllokuan me Rucin në 8′.
Bregu në 54′ dhe Nani në 59′ kthyen Dinamo City-n në rrugën e duhur ndërsa fitoren e vulosi Qefalija në 90’+6.
Ky ishte trofeu i 35 në historinë e klubit dinamovit, i dyti pas rikthimit në Kategorinë Superiore, i dyti në këtë vit kalendarik dhe i dyti në Presidencën e Bardhit.
Për këtë shërbyen 45’ e dyta kur Dinamo City reagoi dhe përmbysi shifrat e pjesës së parë.
Egnatia e nisi më mirë sfidën të cilën e zhbllokoi me Flamur Ruçin duke shkuar në pushim me avantazhin 1-0.
Pas pushimit, Bregu mendoi për barazimin në 55’. Vetëm 4 minuta më pas ishte Nani që shënoi golin e përmbysjes së bluve.
Avantazh që mbeti në fuqi edhe pas fundit të kohës së rregullt porn ë minutat shtesë ishte Klevi Qefalia që shndërroi në gol penalltinë e akorduar për Dinamo City-n.
Përfundimisht 3-1 për blutë kryeqytetas që rrëmbyen trofeun e fundit të vitit.
Superkupën e parë pas suksesit të fundit në vitin 2008 dhe trofeun e parë Finales së humbur në vitin 2010.
Fituesit e Superkupës së Shqipërisë 12 – Tirana 3 – Dinamo City, Skënderbeu, Partizani 2 – Vllaznia, Teuta, Flamurtari 1 – Kukësi, Egnatia, Laçi, Elbasani, Besa
Nga Gazeta Si – Nick Kyrgios mposhti Aryna Sabalenka-n 6-3, 6-3 në një ndeshje ekzibicioni të quajtur “Beteja e Gjinive”, promovuar si një version modern i fitores së famshme të Billie Jean King ndaj ish-fituesit të Grand Slam-it Bobby Riggs, më shumë se 50 vite më parë.
Duke luajtur përpara një audience të ezauruar në “Coca-Cola Arena” në Dubai, Kyrgios u përshtat me fushën pak më të vogël në anën e numrit 1 të Botës te femrat, për të siguruar fitoren pas një përballjeje të ekuilibruar dhe argëtuese, të zhvilluar sipas rregullave të modifikuara.
Kyrgios realizoi “break”-un për avantazhin 4-3 dhe më pas fitoi setin e parë.
Australiani i njohur për stilin e tij të veçantë, dukej i lodhur në setin e dytë pasi u gjend në disavantazhin 1-3.
Ndërsa kundërshtarja e tij vallëzonte nën ritmet e muzikës, Kyrgios barazoi në 3-3.
Kyrgios mbylli diferencën me topa të shkurtër plot finesë dhe përdori variacione efektive në shërbim.
Ai u shkëput për të siguruar fitoren me shërbimin e tij.
Nga Gazeta Si – Sporti mund të ndryshojë jetën. Qoftë duke e luajtur atë, apo duke parë disa nga atletët më të mëdhenj të të gjitha kohërave që shfaqin mjeshtërinë e tyre elegante, duke qënë gjithmonë në qendër të vëmendjes në çdo cep të Botës.
Pa sportin, Globi do të ishte një vend shumë më i varfër, me shumë pak argëtim. Natyrisht, sportet ndryshojnë nga njëri-tjetri sa iu përket rregullave dhe procedurave.
Futbolli është krejtësisht ndryshe nga “rugby”, ashtu si bejsbolli është i kundërt me basketbollin.
Megjithatë, në çdo sport kanë ekzistuar Legjenda, të cilat e kanë çimentuar vendin e tyre në histori falë vazhdimësisë dhe suksesit, shpesh edhe kundër të gjitha gjasave.
Më poshtë ju njohim me 15 skuadrat më të mëdha të të gjitha kohërave. Përzgjedhja tregon sa konkurruese ka qenë Bota e sportit ndër vite dhe çdo ekip në këtë listë mund të ishte shumë mire në vendin e parë; të gjitha janë të klasit botëror.
Faktorët e renditjes • Trofe/tituj të fituar – Janë përfshirë vetëm skuadrat që kanë fituar trofe madhorë. • Cilësia e sportistëve – Nëse ata sot konsiderohen si Legjenda. • Stili i lojës – Nëse ishin tërheqës dhe emocionues për t’u ndjekur në sportin e tyre përkatës.
15.AC Milan (1989–1990) Futboll -Trofetë: European Cup 2x, UEFA Super Cup 2x, Italian Super Cup -Trainer: Arrigo Sacchi -Shënuesi më i mirë: Marco van Basten (25)
14.New England Patriots (2001–2017) Futboll amerikan -Trofetë: Super Bowl 5x, AFC Conference Championship 8x, AFC East Division Title 15x -Trainer: Bill Belichick -Kapiteni i skuadrës: Tom Brady
13.Real Madrid (2016–2018) Futboll -Trofetë: Champions League 3x, La Liga, UEFA Super Cup 2x, FIFA Club World Cup 2x -Trainer: Zinedine Zidane -Shënuesi më i mirë: Cristiano Ronaldo
12.Miami Dolphins (1972) Futboll amerikan -Rekordi: 17-0 -Kapiteni i skuadrës: Jake Scott -Super Bowl: 14-7 vs Washington Redskins
11.Golden State Warriors (2014–2019) Basketboll -Sezoni 2016 -Fitore: 73 -Humbje: 9 -Lojtari më i mirë: Stephen Curry
10.Pittsburgh Steelers (1974–1980) Futboll amerikan -Sezoni 1974 -Rekordi: 10-3-1 -Kapiteni i skuadrës: Glen Edwards -Super Bowl: 16-6 vs Minnesota Vikings
9.Bashkimi Sovietik (1981–1984) Hokej në akull -Botërori i vitit 1981 1.Bashkimi Sovjetik 10 2.Suedia 7 3.Çekosllovakia 6
8.Chicago Bulls (1990-1998) Basketboll -Sezoni 1995/96 -Fitore: 72 -Humbje: 10 -Finalja në NBA: 4-2 vs Seattle SuperSonics
7.Real Madrid (1955–1960) Futboll -Sezoni 1956/57 -Tituj: La Liga, European Cup -Trainer: Jose Villalonga -Shënuesi më i mirë: Alfredo Di Stefano (31 gola)
6.Boston Celtics (1956–1969) Basketboll -Sezoni 1960/61 -Fitore: 57 -Humbje: 22 Finalja në NBA: 4-1 vs St. Louis Hawks
5.Ajax (1969–1972) Futboll -Sezoni 1971/72 -Trofetë: Eredivisie, European Cup, KNVB Cup -Trainer: Stefan Kovacs -Shënuesi më i mirë: Johan Cruyff (33 gola)
4.Brazil (1970) Futboll -Botërori i vitit 1970 -Titulli: Kampion -Trainer: Mario Zagallo -Shënuesi më i mirë: Jairzinho (7 gola) -Golevarazhi: 19-7
3.Zelandë e Re, “All Blacks” (2011–2015) Rugby -Kupa e Botës 2011 -Faza e grupeve Zelandë e Re 41-10 Tonga Zelandë e Re 83-7 Japon Zelandë e Re 37-17 Francë Zelandë e Re 79-15 Kanada -¼ finale Zelandë e Re 33-10 Argjentinë -½ finale Zelandë e Re 20-6 Australi -Finale Zelandë e Re 8-7 Francë
2.Barcelona (2008–2011) Futboll -Sezoni 2008/09 -Trofetë: La Liga, Champions League, Copa del Rey -Trainer: Pep Guardiola -Shënuesi më i mirë – Samuel Eto’o (30 gola)
1.New York Yankees (1949–1954) Bejzboll -Viti 1950 -Fitore: 98 -Humbje: 56 -World Series Final: 4-0 vs Philadelphia Phillies
Nga Gazeta Si – Jo Kategoria Superiore, por Superkupa do ta mbyllë vitin kalendarik dhe futbollistik 2025.
Kampionët e fundit në Superiore dhe fituesit në fuqi të Superkupës do të luajnë përballë fituesve të Kupës së Shqipërisë.
Ndryshe, Egnatia do të presë Dinamo City-n në “Air Albania” në sfidën që do të dorëzojë trofeun e parë sezonal.
Pas 18 javëve të luajtura në kampionat, Egnatia kryeson me 37 pikë, 5 më shumë se blutë e kryeqytetit në vendin e 3.
Katër fitore dhe 1 humbje për të besuarit e Tetovës në 5 ndeshjet e fundit. E njëjta ecuri edhe për “bandën” e Dajës që kërkon trofeun e dytë pas kthimit në krye të bluve.
Nëse për tifozët e futbollit mund të jetë thjeshtë një ndeshje, për ata të Egnatias dhe Dinamo City-t do të jetë emocioni i rradhës, ndërsa për vetë skuadrat, trofeu do të jetë dhurata më e mirë e fundvitit.
Ky është edicioni i 3 rradhazi për Egnatian që në 2023 u mund nga Partizani. Ndërsa për Dinamo City-n, është edicioni 7 që merr pjesë.
Fituese në vitet 1989 dhe 2008. Ndërsa është mundur në vitet 1990, 2002, 2003 dhe 2010.
Nga Gazeta Si – Chelsea synon t’i godasë ambiciet e Aston Villa-s për titullin në Premier League, kur skuadrat të përballen sot në mbrëmje në “Stamford Bridge”.
Vetëm një vend i ndan në klasifikim por skuadra nga West Midlands ka 7 pikë më shumë se vendasit.
Unai Emery ka orkestruar një tjetër seri mbresëlënëse, pasi fitorja e 10-të rradhazi u sigurua pas suksesit 2–1 ndaj Manchester United fundjavën e kaluar, çka do të thotë se “Villans” janë vetëm 3 pikë larg kryesuesve të Arsenal.
Pas një serie zhgënjyese në “Premier League”, Chelsea nuk është realisht në garën për titull. Blutë kanë arritur vetëm 1 fitore në 5 ndeshjet e fundit.
Një paraqitje e dobët në pjesën e parë në barazimin 2–2 me Newcastle United fundjavën e kaluar u pasua nga një pjesë e dytë shumë e mirë, duke theksuar mungesën e vazhdimësisë brenda ndeshjeve, për të mos përmendur atë nga java në javë.
“Blutë” e dinë se nuk mund të lejojnë rënie niveli në asnjë moment përballë Villa-s, e cila ka shmangur humbjen në 3 nga 4 vizitat e fundit në “Stamford Bridge”.
Nëse të dyja skuadrat luajnë në potencialin e tyre maksimal, sfida do të jetë një spektakël i vërtetë futbolli.
Statistikat kryesore • Sipas superkompjuterit të Opta-s, Chelsea ka 42.7% shanse për të mposhtur Aston Villa-n në ndeshjen e parë pas Krishtlindjes.
• Blutë kanë humbur 2 nga 3 ndeshjet e fundit në shtëpi në Premier League kundër Aston Villa-s.
• Morgan Rogers ka qenë i përfshirë drejtpërdrejt në më shumë gola në Premier League se çdo lojtar tjetër anglez gjatë 17 javëve të para të sezonit (10 gola & asist).
Përballjet direkte • Të dyja skuadrat fituan ndeshjet e tyre në shtëpi në përballjet direkte të Premier League sezonin e kaluar. Fitorja 3-0 e Chelsea-t në Stamford Bridge erdhi falë golave të Nicolas Jackson, Fernández dhe Palmer.
• Megjithatë, Villa ishte e pamposhtur në 4 udhëtime rradhazi në të gjitha garat para asaj humbjeje. Edhe Chelsea kishte qenë e pamposhtur në 4 ndeshje rradhazi në “Villa Park” para sezonit të kaluar. Ky duel rrallëherë ka favorizuar ekipin vendas kohët e fundit.
• Çelësi është Unai Emery. Aston Villa ka fituar 3 nga 5 ndeshjet e Premier League kundër Chelsea-t nën drejtimin e tij (vetëm një humbje), po aq fitore sa kishte në 20 ndeshjet e mëparshme kundër Bluve para ardhjes së spanjollit (nga të cilat 14 ishin humbje).
Chelsea: Robert Sánchez, Malo Gusto, Wesley Fofana, Trevoh Chalobah, Marc Cucurella, Reece James, Moisés Caicedo, Pedro Neto, Cole Palmer, Alejandro Garnacho, João Pedro. Trainer: Enzo Maresca
Aston Villa: Emiliano Martínez, Matty Cash, Victor Lindelöf, Ezri Konsa, Ian Maatsen, Amadou Onana, Boubacar Kamara, John McGinn, Youri Tielemans, Morgan Rogers, Ollie Watkins. Trainer: Unai Emery
Login
