Nga Gazeta ‘Si’- Kryeministri Edi Rama ka postuar dy fotografi nga Shkozeti, ku mbetjet kanë bllokuar kanalin, duke përmbytur zonën përreth.
Në reagimin e tij, Rama e lidh drejtpërdrejt situatën me mungesën e përgjegjshmërisë qytetare, duke theksuar se ndotja e përditshme kthehet në rrezik real gjatë reshjeve intensive.
Kjo është edhe arsyeja, pse sipas Ramës, ka ndodhur edhe përmbytja e fundit. Sipas tij, për shkak të mbetjeve në kanal, uji nuk ka arritur të kalojë dot për t’u derdhur më pas në det.
Sipas tij, qyetarët e duan atdheun vetëm në stadium.
Sigurisht që kur i hedhim plehrat e shishet plastike nëpër fusha e në anët e rrugëve të atdheut që e duam vetëm në stadium, vjen një ditë shiu me gjyma që i mbledh nga janë e nga s’janë dhe i dynd në det, po kur pastaj shiu është aq i furishëm sa ky i fundit, atëherë nuk e arrinë… pic.twitter.com/xJpxPdeCQq
“Sigurisht që kur i hedhim plehrat e shishet plastike nëpër fusha e në anët e rrugëve të atdheut që e duam vetëm në stadium, vjen një ditë shiu me gjyma që i mbledh nga janë e nga s’janë dhe i dynd në det, po kur pastaj shiu është aq i furishëm sa ky i fundit, atëherë nuk e arrin dot detin si zakonisht sepse gryka e kanalit taposet krejt, duke përmbytur dynjanë…”, shkruan Rama në X.
Më herët ai ironizoi akuzat e opozitës duke deklaruar se e njëjta gjë me përmbytje ka ndodhur edhe në disa vende të rajonit, por askush nuk ka fajësuar qeveritë e vendeve të tyre.
Nga Gazeta ‘Si’- Vendi ynë vijon të jetë i përfshirë nga moti i keq, por situata është drejt përmirësimit në disa qytete.
Mbrëmjen e kësaj të mërkure, për shkak të inerteve dhe dherave në aksin Qafë Plloçë-Qukës, aktualisht po mbyllet qarkullimi në këtë segment.
Mësohet nga informacionet më të fundit, se për të marrë masa lidhur me qarkullimin e mjeteve dhe për të shmangur rrezikun e aksidenteve, është mbyllur përkohësisht qarkullimi në këtë aks.
Policia e qarkullimit rrugor Korçë dhe ajo e Elbasanit po orientojnë mjetet drejt rrugës së vjetër duke vendosur patrulla në hyrje të Qafë Plloçës dhe në hyrje të Qukësit për të mos lejuar hyrjen në aksin e ri.
Aksi do të qëndrojë i mbyllur deri në momentin që firma kontraktore të pastrojë plotësisht të gjitha dherat e inertet që kanë rënë në rrugë dhe derisa të mos ketë më rrezik për qarkullimin e mjeteve.
Gjatë ditës, në Durrës, problematika është në zonën e ish-Kënetës e më konkretisht në bllokun rreth Burgut, ku dje të paraburgosurit u zhvendosën nga kati i parë tek i dyti.
Në Durrës, janë rreth 800 banesa të cilat kanë ujë në oborret dhe në brendësi të tyre dhe janë evakuuar 18 familje me 60 persona të cilët janë sistemuar në 2 shtëpitë e pushimit, në atë të Ministrisë së Brendshme dhe në atë të Mbrojtjes.
Po ashtu probleme ka në Shkozet Lagjja 14 sidomos në zonën që njihet si NISH tulla.
Një grup banorësh të zonës së Kënetës në Durrës kanë protestuar për të kërkuar vëmendjen e strukturave të shtetit pasi banesat e tyre janë ende nën ujë për shkak të reshjeve të dendura të shiut.
Banorë thonë se kanalet janë të bllokuar dhe se kanë mbi 30 cm ujë në oborret dhe banesat e tyre. Ata shprehen se ende nuk ka shkuar asnjë njeri për t’i ndihmuar.
“Uji nuk po tërhiqet dhe dëmet janë shumë të mëdha”, tha një banor ndërsa një tjetër banor kërkoj nga autoritetet që të shkojnë te kryejnë verifikimet.
“Jemi në mëshirë të fatit, nuk ka ardhur askush nga grupet e verifikimit për të parë situatën”, thotë ai.
Një tjetër thotë se edhe më herët janë përmbytur dhe nuk i kanë dëmshpërblyer pavarësisht premtimit.
“Kërkoj ndihmë. Jam i përmbytur, familje me 4 pjesëtar. Uji arrin deri në 30 cm. Nuk ka zgjidhje. Nuk është vetëm për veten time por edhe për të tjerët. Kjo është hera e dytë që përmbytemi, është hera e dytë. Nuk kemi marrë dëmshpërblim”, u shpreh një banor.
Gjatë natës në Lezhë dhe Kurbin ka patur reshje në intensitet të ulët, çka ka ndikuar në përmirësimin e situatës. Uji është tërhequr në pjesën më të madhe të zonave urbane.
Ndërkohë situata është ende problematike në Kurbin ku janë evakuuar rreth 8 familje, ndërsa sipërfaqja e përmbytur në të gjithë qarkun është 3010 ha dhe 150 banesa të rrethuara nga uji. Konkretisht në bashkinë Lezhë janë nën ujë 1010 ha tokë bujqësore dhe 2000 ha në bashkinë Kurbin. Në gjithë qarkun e Lezhës ka rifilluar procesi mësimor.
Lumi Vjosa ka dalë nga shtrati në zonën e pazarit, pranë Ura e Mifolit, si pasojë e prurjeve të larta të ujit. Sipas të dhënave të fundit, niveli i Vjosës ka arritur në 7.1 metra mbi nivelin e detit.
Autoritetet kanë njoftuar të gjitha familjet që jetojnë pranë lumit të marrin masa paraprake dhe të jenë të vëmendshme ndaj çdo rreziku të mundshëm.
Në fshatin Vajzë, ka pësuar çarje rruga nacionale që lidh fshatrat Kote- me fshatin Vajzë, Amantian Sevasterin, Plocen etj. Për shkak të shkarjes së dheut, dy banesa rrezikojnë të shemben po në fshatin Vajzë.
Aksi nacional Gjirokastër- Kakavijë është i bllokuar në zonën e Kordhoçes, përballë fshatit Lazarat. Ne vendngjarje janë punonjësit e firmës mirëmbajtëse të cilët po punojnë për hapjen e rrugës. Gjithashtu ka bllokim te rrugës Gjirokastër-Valare në vendin e quajtur Ura e Aznakut.
Në bashkinë Elbasan janë përmbytur 5 banesa në zonën e uzinës 12 te ish-Kombinatit Metalurgjik si pasojë e bllokimit të kanalit kullues. Raportohet edhe për disa shtëpi të përmbytura në Belsh.
Nga Gazeta ‘Si’– Kreu i PD Sali Berisha bëri thirrje që të shpallet gjendja e fatkeqësisë natyrore për shkak të përmbytjeve në vend.
Ai akuzoi Ramën se po bën sehir në këtë situatë. Sipas tij, Rama po reagon me cinizëm ekstrem (duke iu referuar postimit të Ramës në mëngjes) dhe madje tha se po tallet ndaj qytetarëve të përmbytur.
Sipas tij, 42 milionë eurot e dhëna për mbrojtjen e Durrësit nga përmbytjet janë vjedhur.
Ai tha se pavarësisht se nga Vora gjer në bregdet shtrihet sistemi i kanalizimit që synon të mbrojë ato territore nga përmbytja, kanalet sipas tij janë fiktive dhe janë të bllokuara.
“Mijëra e mijëra familje shqiptare kanë pësuar pasoja shumë të rënda nga përmbytjet. Vetëm në rrethin e Durrësit përllogariten rreth 4 mijë banesa, biznese dhe objekte të tjera.
Dëmet janë jashtëzakonisht të mëdha.
Por nuk është vetëm rrethi i Durrësit me përmbytje, nga Gjirokastra gjer në Shkodër janë pra mijëra e mijëra familje të tjera, biznese, fabrika, të cilat kanë pësuar dëme të parikuperueshme.
Partia Demokratike kërkon menjëherë shpalljen e gjendjes së fatkeqësisë natyrore në këtë zonë.
Edi Rama apo Ramaduro që bën sehir, nuk shpallen gjendjen e fatkeqësisë natyrore në Durrës dhe në Lezhë, apo Shkodër dhe qarqet e tjera, vetëm e vetëm se ligji e detyron atë në këtë gjendje t’u përgjigjet një për një dëmet të krijuara nga fatkeqësia natyrore.
Ky qëndrim indiferent, cinik është një lloj krimi në vetvete. Kësaj katastrofe natyrore, me përmasa të papara ndonjëherë, Edi Rama ndaj saj reagon me një cinizëm ekstrem, me një paturpësi, me një tallje ndaj qytetarëve të përmbytur.
Ai në postimin e tij fajëson opozitën e cila nuk po e akuzon atë për shirat e rrëmbyera që kanë rënë.
Ky qëndrim cinik, tallës ndaj qytetarëve, turpëron çdo njeri që ka cipë”, tha Berisha.
Nga Gazeta ‘Si’- Të martën, i ashtuquajturi “Koalicioni i të Gatshmëve”, i përbërë kryesisht nga liderë europianë, u mblodh në Paris me përfaqësues të presidentit amerikan Donald Trump, në përpjekje për të bërë përparim drejt një marrëveshjeje të qëndrueshme paqeje për Ukrainën.
Me presidentin e Ukrainës, Volodymyr Zelensky, që këmbëngul se një plan për t’i dhënë fund luftës me Rusinë është “90% gati”, askush në atë sallë nuk donte të rrezikonte largimin e amerikanëve nga procesi.
Por mbi atë takim madhështor dhe plot shkëlqim në Paris rëndonte një elefant i madh në formë Groenlande.
Groenlanda është ishulli më i madh në botë – gjashtë herë më i madh se Gjermania. Ndodhet në Arktik, por është territor autonom i Danimarkës.
Dhe Donald Trump këmbëngul se e dëshiron atë; se i nevojitet për sigurinë kombëtare të SHBA-së.
Kryeministrja e Danimarkës, Mette Frederiksen, ishte e pranishme në takimin e Parisit. Ajo është një aleate kyçe e BE-së për shumë nga liderët e pranishëm, si dhe një aleate e rëndësishme e NATO-s për Mbretërinë e Bashkuar.
Asnjë nga këto vende nuk dëshiron të rrezikojë përplasjen me Donald Trump, por me rritjen e temperaturës politike si në Uashington ashtu edhe në Kopenhagë, gjashtë fuqi të mëdha europiane – përfshirë Britaninë e Madhe, Francën dhe Gjermaninë – nxorën një deklaratë të përbashkët në margjinat e bisedimeve për Ukrainën.
Ato deklaruan se siguria në Arktik duhet të garantohet kolektivisht, në bashkëpunim me aleatët e NATO-s, përfshirë Shtetet e Bashkuara, dhe se vetëm Danimarka dhe Grenlanda kanë të drejtën të vendosin për çështjet që lidhen me Grenlandën.
Por a mjaftonte kjo për të frenuar ambiciet e Trumpit?
Mette Frederiksen, kryeministrja e Danimarkës, ishte nën presion nga kolegët europianë që të mos armiqësonte SHBA-në për shkak të Grenlandës.
Përgjigjja erdhi brenda pak orësh: Jo.
Shtëpia e Bardhë publikoi deklaratën e saj, ku thuhej se po “diskutohen një sërë opsionesh” për të siguruar Grenlandën – të gjitha njëanshme, përfshirë blerjen e ishullit.
Në mënyrë shqetësuese për liderët europianë, komunikata e Shtëpisë së Bardhë, e shpërndarë nga zëdhënësja Karoline Leavitt, theksonte se “përdorimi i ushtrisë amerikane është gjithmonë një opsion në dispozicion të Komandantit të Përgjithshëm”.
Nuk është hera e parë që Trump shpreh dëshirën për Grenlandën, por sidomos gjatë mandatit të tij të parë, shumë në Europë – pas dyerve të mbyllura – talleshin me këtë ide.
Pas ndërhyrjes së diskutueshme ushtarake të administratës Trump në Venezuelë gjatë fundjavës, askush nuk po qesh më.
SHBA-të kanë hyrë ushtarakisht në Venezuelë
Europa rrezikon të shkelet nën këmbë
Kryeministrja daneze tha se qëllimet e Trumpit për Grenlandën duhet të merren seriozisht dhe liderët u larguan nga takimi për Ukrainën thellësisht të shqetësuar.
Ironia është e madhe: shumë liderë europianë, përfshirë ata të NATO-s dhe BE-së, po përpiqen të angazhojnë administratën Trump për të mbrojtur sovranitetin e një vendi europian (Ukrainës) nga ambiciet territoriale agresive të një fuqie të jashtme (Rusia), ndërkohë që SHBA sapo ka ndërhyrë ushtarakisht në Venezuelë, duke arrestuar presidentin e saj, dhe vazhdon të kërcënojë hapur sovranitetin e një tjetër vendi europian (Danimarkës).
Situata bëhet edhe më e rëndë nga fakti se Danimarka dhe SHBA janë të dyja anëtare të NATO-s.
Sipas Kopenhagës, ato janë aleate jashtëzakonisht të afërta. Ose të paktën, kanë qenë.
Danimarka thotë se nëse administrata Trump e merr Grenlandën në mënyrë të njëanshme, kjo do të shënonte fundin e aleancës transatlantike të mbrojtjes, mbi të cilën Europa është mbështetur që nga fundi i Luftës së Dytë Botërore.
Trump, për të qenë të sinqertë, nuk ka qenë kurrë një adhurues i madh i NATO-s.
Kopenhaga ka tentuar të angazhohet me administratën Trump për Grenlandën.
Sipas një marrëveshjeje dypalëshe, SHBA tashmë ka një bazë ushtarake në Grenlandë, e ngritur në fillim të Luftës së Ftohtë. Numri i personelit amerikan aty është ulur nga rreth 10 mijë në kulmin e Luftës së Ftohtë, në rreth 200 sot, dhe prej vitesh SHBA është akuzuar se ka neglizhuar sigurinë e Arktikut – deri tani.
Nga ana e saj, Danimarka ka premtuar së fundmi një investim prej 4 miliardë dollarësh në mbrojtjen e Grenlandës, duke përfshirë anije, dronë dhe avionë.
Por administrata Trump nuk ka treguar interes për të biseduar me danezët.
Të dielën, Trump këmbënguli se Grenlanda është “jashtëzakonisht strategjike”, duke pretenduar se ajo është “e mbushur me anije ruse dhe kineze”, dhe se SHBA ka nevojë për të nga pikëpamja e sigurisë kombëtare, sepse “Danimarka nuk është në gjendje ta mbrojë”.
Danimarka e hedh poshtë këtë pretendim.
Një zyrtar i BE-së, duke folur në kushte anonimiteti, më tha: “Kjo situatë ka theksuar edhe një herë dobësinë themelore të Europës përballë Trumpit.”
Ndërsa fqinjët nordikë të Danimarkës u nxituan menjëherë ta mbështesnin verbalisht pas komenteve të Trumpit, fillimisht pati një heshtje të plotë nga “treshja e madhe” europiane: Londra, Parisi dhe Berlini.
Më vonë, kryeministri britanik Sir Keir Starmer deklaroi se vetëm Danimarka dhe Grenlanda mund të vendosin për të ardhmen e ishullit. Kancelari gjerman Friedrich Merz ka shprehur më parë qëndrime të ngjashme. Emmanuel Macron vizitoi Grenlandën në dhjetor, në shenjë solidariteti me Kopenhagenën.
Por kritika e drejtpërdrejtë ndaj SHBA-së mungoi dukshëm nga deklarata e përbashkët.
“Një deklaratë e përbashkët nga të 27 vendet e BE-së, plus Britania si aleate e NATO-s, do të kishte dërguar një mesazh shumë të fortë në Uashington,” më tha Camille Grande nga Këshilli Europian për Marrëdhëniet me Jashtë.
Por vetëm gjashtë aleatë europianë të Danimarkës dolën me një deklaratë të tillë.
Dhe këtu qëndron thelbi i problemit: stili i drejtpërdrejtë – disa do ta quanin bullizues – i Trumpit, i ka bërë liderët europianë jashtëzakonisht nervozë.
Ata kanë zgjedhur zakonisht ta “menaxhojnë” presidentin amerikan, për të ruajtur marrëdhëniet dypalëshe, në vend që të përballen me të hapur, individualisht apo kolektivisht, nga frika e pasojave.
Në botën e re të politikës së fuqive të mëdha, ku dominojnë SHBA, Kina, Rusia dhe India, Europa duket më së shumti si një spektatore, me rrezikun të shkelet nën këmbë.
Një komunikatë e Shtëpisë së Bardhë, e dhënë nga sekretarja e shtypit Karoline Leavitt të martën, tha se “përdorimi i ushtrisë amerikane është gjithmonë një opsion në dispozicion të Komandantit të Përgjithshëm”.
Nëse kthehemi te gjeografia, Danimarka është një nga aleatët më të vegjël të NATO-s, megjithëse shumë aktivë. SHBA-të janë anëtari më i madh dhe më i fuqishëm i NATO-s. Deri tani.
Nervozizmi i thellë në Europë tani është i dukshëm.
Fuqitë e mëdha europiane mund të kenë lëshuar deklaratën e tyre të përbashkët duke nënvizuar NATO-n si një forum për të diskutuar sigurinë e Arktikut dhe duke këmbëngulur se vetëm Danimarka dhe Groenlanda mund të vendosin për të ardhmen e ishujve, por sa larg do të shkonin në të vërtetë Mbretëria e Bashkuar, Franca, Gjermania dhe të tjerët për të garantuar atë sovranitet?
“Askush nuk do të luftojë ushtarakisht kundër Shteteve të Bashkuara për të ardhmen e Groenlandës”, tha zëvendësshefi i stafit të Shtëpisë së Bardhë, Stephen Miller, i cili tingëllonte i sigurt, në një intervistë me CNN të hënën.
Trump i bindi të gjithë aleatët e NATO-s – përveç Spanjës – verën e kaluar që të angazhoheshin për të rritur masivisht shpenzimet për mbrojtjen e tyre.
Por Europa është ende shumë e varur nga SHBA-ja në shumë fusha, duke përfshirë mbledhjen e inteligjencës, komandën dhe kontrollin dhe aftësitë ajrore. Uashingtoni është shumë i vetëdijshëm për këtë.
Persona të brendshëm në NATO thonë se, tani për tani, edhe në takimet me dyer të mbyllura, shtetet anëtare europiane të aleancës mezi arrijnë të mendojnë se çfarë mund të ndodhë nëse Uashingtoni do të ndërhynte ushtarakisht në Groenlandë.
Nga Gazeta ‘Si’- Presidenti amerikan Donald Trump, ka njoftuar se Venezuela do të dorëzojë deri në 50 milionë fuçi naftë të cilësisë së lartë, me vlerë rreth 2.8 miliardë dollarë, tek SHBA-të pas largimit të presidentit Nicolás Maduro nga pushteti.
Trump deklaroi në një postim në rrjetin social Truth Social se kjo naftë do të shitet me çmimin e tregut dhe të ardhurat do të kontrollohen prej tij, për t’u përdorur në dobi të popullit venezuelian dhe amerikan.
“Jam i kënaqur të njoftoj se Autoritetet e Përkohshme në Venezuelë do të dorëzojnë midis 30 dhe 50 milionë fuçi naftë të cilësisë së lartë, të sanksionuar, tek Shtetet e Bashkuara të Amerikës.
Kjo naftë do të shitet me çmimin e saj të tregut, dhe ato para do të kontrollohen nga unë, si President i Shteteve të Bashkuara të Amerikës, për të siguruar që të përdoren për të përfituar populli i Venezuelës dhe i Shteteve të Bashkuara!”, shkroi Trump.
Trump shtoi se i ka kërkuar Sekretarit të Energjisë, Chris Wright, ta zbatojë këtë plan “menjëherë”. Nafta sipas tij, do të transportohet me anije magazinuese dhe do të dërgohet drejtpërdrejt në portet e shkarkimit në Shtetet e Bashkuara.
Ky zhvillim vjen pas betimit të Delcy Rodríguez si presidente e përkohshme e Venezuelës, ndërsa Maduro është transferuar në SHBA për t’u përballur me akuza për trafik droge dhe armësh.
Trump ka shtuar se industria amerikane e naftës do të rikthehet në Venezuelë brenda 18 muajve, duke pritur investime të mëdha në vend.
Megjithatë, siç shkruan BBC në një artikull, analistët paralajmërojnë se rikthimi i prodhimit të dikurshëm të Venezuelës mund të kërkojë dhjetëra miliarda dollarë dhe deri një dekadë kohë.
Ndërkohë, përfaqësues të kompanive të mëdha amerikane të naftës pritet të takohen këtë javë me administratën Trump për të diskutuar mundësitë e investimeve. Ekspertët mbeten skeptikë se këto plane do të kenë ndikim të menjëhershëm në furnizimin global dhe çmimin e naftës, duke theksuar se kompanitë kërkojnë garanci për stabilitet politik përpara se të angazhohen në projekte afatgjata.
Nga Gazeta ‘Si’-Kryeministri Edi Rama ka reaguar pas përmbytjeve në disa qytete të vendit.
Përmes një reagimi në rrjetet sociale, kreu i qeverisë ka ndarë pamje të vendeve të tjera të Europës, si Italia, Greqia, Kroacia dhe Mali i Zi që janë përmbytur si pasojë e reshjeve.
Në postim Rama ka ironizuar opozitën, duke deklaruar se e njëjta gjë me përmbytje ka ndodhur edhe në disa vende të rajonit, por askush nuk ka fajësuar qeveritë e vendeve të tyre.
Krahas pamjeve, ai shkruan: “Nuk e kuptoj pse nuk po më fajësojnë akoma mua, qeverinë dhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, po hiç, asnjë llaf, s’e kuptojnë që aleanca me shiun të çon në fitore.”
Nuk e kuptoj pse nuk po më fajësojnë akoma mua, qeverinë apo qoftë edhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, por hiç, asnjë llaf, s’e… pic.twitter.com/sCleOghzIh
Nga Gazeta ‘Si’– Udhëheqësit europianë që morën pjesë në takimin e “Koalicionit të të Vullnetshmëve” në Paris kanë premtuar garanci “ligjërisht dhe politikisht detyruese” për Ukrainën, tha presidenti i Këshillit të BE-së, Antonio Costa.
Në një postim në platformën amerikane X, Costa e përshkroi takimin si “produktiv dhe të rëndësishëm” për avancimin e mbështetjes së koordinuar për Ukrainën.
“Ne jemi gati të angazhohemi për një sistem garancish politikisht dhe ligjërisht detyruese që do të aktivizohet sapo të hyjë në fuqi një armëpushim. BE-ja do të kontribuojë në përpjekjet për të siguruar garancitë e sigurisë që Ukraina ka nevojë për çdo marrëveshje për një paqe afatgjatë”, tha ai.
Costa shtoi se BE-ja do të vazhdojë të mbështesë rrugëtimin e Ukrainës drejt anëtarësimit në BE, do të mbulojë nevojat e saj financiare për dy vitet e ardhshme përmes kredisë prej 90 miliardë eurosh të rënë dakord dhjetorin e kaluar dhe do ta ndihmojë përmes misioneve civile dhe ushtarake në terren.
Presidentja e Komisionit Evropian, Ursula von der Leyen, e përshkroi takimin si një shfaqje të fortë uniteti me vendet anëtare të BE-së, aleatët e NATO-s dhe partnerët.
“Deklarata jonë e përbashkët dërgon një mesazh të qartë. Ne qëndrojmë kolektivisht pranë Ukrainës dhe një e ardhme e sigurt, e mbrojtur dhe e begatë është përpara”, shkroi ajo në X.
Më herët sot, presidenti francez Emmanuel Macron priti në Pallatin Elysee një samit të nivelit të lartë të “Koalicionit të të Vullnetshmëve” për Ukrainën, duke bashkuar vendet që e mbështesin Ukrainën dhe janë të gatshme të ofrojnë garanci sigurie nëse arrihet një armëpushim me Rusinë.
Nga Gazeta ‘Si’– Ambasada amerikane në Tiranë, ka reaguar lidhur me sulmin e SHBA-së në Venezuelë dhe arrestimin e presidentit Nicolas Maduro.
Në faqen zyrtare të ambasadës është shpërndarë mesazhi i Donald Trump, i cili shprehet seSHBA do të sigurohet që Venezuela të drejtohet siç duhet.
“Do të sigurohemi që Venezuela të drejtohet siç duhet. Do të rindërtojmë infrastrukturën e naftës… Do të sigurohemi që edhe njerëzit që u detyruan të largoheshin nga Venezuela nga ky bandit të jenë nën kujdes.” – Presidenti i Shteteve të Bashkuara Donald J. Trump.
Nga Gazeta ‘Si’- Ndërsa foli për protestën e radhës, Berisha i shtriu dorën e bashkëpunimit të gjitha forcave opozitare, nga Agron Shehaj tek Adriatik Lapaj dhe Arlind Qori.
Ai tha se në protestën e radhës do të ftojë të gjithë partitë pasi sipas tij, ka ardhur moment që të krijohet një front i gjerë i opozitës.
Sipas Berishës, flamujt e partive të tjera në protestë nuk të jenë pengesë për bashkimin.
‘Ne nuk kemi asnjë pretendim që partia Mundësia të mos vijë në protestë me flamurin e vet. Të gjitha partitë të vijnë me simbolet e tyre”, tha Berisha.
I pyetur nëse protesta e radhës do të mbahet para 20 shkurtit, ai u shpreh se kjo do të vendoset në vijim.
“Të gjitha partitë pa përjashtim do ftohen. Ne mendojmë se është koha për të krijuar një front të gjerë opozitar, në mënyrë që me shkallën më të lartë të përgjegjësisë, forcat politike opozitare të qëndrojnë në lartësinë e kërkesës së kësaj kohe, të bashkërendojnë të gjitha përpjekjet për t’i dhënë goditjen përfundimtare narko-regjimit të Edi Ramës. Janë të ftuara pa përjashtim të gjitha.
Data e radhës do të përcaktohet por ka shumë mundësi që të mbahet para datës 20 shkurt. Konsultimet nisin sot. Ne nuk heqim dorë, strategjia jonë është protesta”, tha ai.
Pritet për t’u parë nëse Lapaj, Shehaj dhe Qori do t’i përgjigjen ftesës së Berishës, ngase deri më sot ata kanë kundërshtuar çdo bashkëpunim të mundshëm me të.
Edhe më 22 dhjetor, kur Berisha i ftoi që t’i bashkoheshin protestës pavarësisht dallimeve, si Lapaj, ashtu dhe Qori e Shehaj e refuzuan ftesën e tij.
Qori deklaroise ai protestën e tij e bën në Parlament dhe tha se personi që thërret protestën, duke iu referuar Berishës, duhet të ketë reputacionin moral për t’u besuar.
Edhe Shehaj në një studio televizive, tha se vetë opozita nuk është e besueshme dhe se me Berishën kanë qëndrime të ndryshme se përse protestojnë.
Ndërkohë Lapaj, i cili ishte në shesh duke zhvilluar protestën e tij para Kryeministrisë kur Berisha i bëri thirrje, deklaroi se ai e refuzoi ftesën e Berishës duke theksuar se kur ai ka ofruar që të gjitha partitë opozitare të bashkoheshin në shesh kundër qeverisë Rama, pa logo, PD nuk ka qenë prezente.
Ai la të kuptohej se nëse PD do t’i ishte bashkuar thirrjes së tij, edhe Lapaj do të ishte me demokratët për ta bërë protestën më masive.
“Unë kam ofruar vizionin për një protestë kombëtare me flamurin kombëtar, përtej logove të partive. Nëse PD do ta pranonte këtë, do të isha edhe unë së bashku me ta aty, për ta bërë masive, që askush të mos na ndalojë. Duhet ta kuptojmë se nuk duhet të jetë miting, por revoltë qytetare me qëndresë, revoltë e njerëzve që vijnë në shesh dhe nuk ikin më. Ai nuk ikën me mitingje, është provuar për 13 vite dhe nuk ka ikur. Prandaj duhet flamuri kombëtar që na udhëheq dhe një bashkim i madh i të gjithë shqiptarëve, të majtë e të djathtë, me parti apo pa parti. Sot është momenti, është koha që demokratët e ndershëm, socialistët e ndershëm, të krishterët, myslimanët, të gjithë ata që vidhen dhe që mendojnë se jemi nën një regjim nga më të korruptuarit në botë, të bashkohen”,- tha Lapaj.
Kujtojmë se ai që prej datës 8 dhjetor, qëndron në shenjë proteste para Kryeministrisë, ku kërkon largimin e kryeministrit Edi Rama, së bashku me një grup aktivistësh të subjektit “Shqipëria Bëhet”
Nga Gazeta ‘Si’- Kreu i PD Sali Berisha e krahasoi situatën në vendin tonë me Venezuelën.
Ndonëse tha se Shqipëria nuk ka naftën e Venezuelës, ai shtoi se sipas tij Rama dhe Maduro janë si ‘një pikë uji të pistë të ndarë në mes.’
Berisha akuzoi Ramën së udhëheq kartelet më të fuqishme të kokainës në Europë, ku përmendi kartelin Çopja dhe kartelin Troplini.
Sipas tij, Rama është faktuar se njëlloj si Maduro arreston kundërshtarët politikë, përdor institucionet për shtypjen e pluralizmit.
“Edi Rama, njëlloj si Ramaduro, i ka familjarët e zhytur në drogë. Ai të shoqen, ky vëllain. Olsin, me dokumente.
Rama, njëlloj si Ramaduro ka varfëruar shqiptarët në shkallë të pabesueshme. Nga njerëzit më të paguar në vitin 2013 në rajon, janë sot njerëzit më të keqpaguar në rajon.
Ramaduro njëlloj si Maduro përzë qytetarët nga vendi i vet. 40 përqind e shqiptarëve kanë ikur gjatë regjimit të Ramës kundrejt 20 përqind në rastin e Venezuelës.
Pra, vërtet gjeografia është krejt tjetër, vërtet përmasat janë të ndryshme, vërtet rezervat e naftës janë të ndryshme, por ngjashmëria midis Ramaduros dhe Maduros janë identike, vëllezër siamezë, në raport me drogën, me demokracinë, me shtypjen, në raport me qytetarët dhe grabitjen e tyre”, tha Berisha ndërsa i bëri thirrje të japë dorëheqjen.
Nga Gazeta ‘Si’- Kreu i Partisë Demokratike Sali Berisha akuzoi sërish kryeministrin Edi Rama dhe zv.kryeministren Balluku se sipas tij, po falsifikojnë dokumente për të manipuluar procesin gjyqësor.
Sipas Sali Berishës, shqyrtimi i dosjeve të deritanishme nxjerr ‘vjedhjen e 1.2 mld euro nga Rama dhe Balluku në sektorin e infrastrukturës dhe të paktën 700 mln euro në kopshtin privat të Edi Ramës’
“Edi Rama me makinërinë e tij të shkatërrimit të dokumenteve, falsifikimit dhe manipulimit, nuk mund të fshehë kurrë mbi 500 e sa kontrata sekrete të firmosura nga Linda e AKSHI-t me porosi të Lindës së Surrelit për kunatin e florinjtë.
Nuk fshihen ato. Nuk fshihen dot sepse janë 800 transaksione sa për asnjë shqiptar tjetër në historinë e thesarit brenda një viti për Armand Frangun.
Dielli me shoshë nuk mbulohet. Përpjekja që bën Edi Rama me Lubi Ballukun për të bllokuar procesin e drejtësisë përbën një krim permanent, krim në vazhdim për të dy ata”, tha ai.
Berisha komentoi edhe bojkotin e socialistëve në Mbledhjen e Këshillit të Mandateve të thirrur nga PD.
Sipas tij, pretendimet e Ramës se nuk kanë lexuar dosjen në një afat prej tre javësh, janë të pavërteta.
‘Po, se këta tejkalojnë çdo gjë vije të kuqe, janë të pacipë, tejkalojnë çdo kufi. Ç’do të thotë ajo nuk i kemi lexuar? Çfarë nuk ka lexuar? Ajo ka marrë motrën avokate.
Çfarë ka mbetur pa lexuar aty? Por ka ngelur vetëm koha që u duhet për të shkatërruar qindra e qindra dokumente.
Kjo po ndodh para syve të shqiptarëve, kjo po ndodh para syve të komunitetit ndërkombëtar të gjithë Europës dhe botës.
Po ndodh një ngjarje që nuk ka ndodhur ndonjëherë në histori”, tha Berisha ndërsa shtoi se PD do t’i përgjigjet kësaj situate si me rrugë ligjorë, ashtu edhe me protesta të ligjshme.
Nga Gazeta ‘Si’- Presidenti serb Aleksander Vuçiç akuzoi Kroacinë se sipas tij, po punon së bashku me Kosovën dhe Shqipërinë për shkatërrimin e Serbisë dhe për krijimin e një kërcënimi ushtarak.
“Për këtë arsye, qeveria jonë, do të vazhdojë të forcojë kapacitetet e saj ushtarake”, tha Vuçiç.
Sipas mediave kroate, këto pohime Vuçiç i bëri në Trebinje në Bosnjë dhe Hercegovinë, ku udhëtoi për të marrë pjesë në hapjen e një spitali të ri, por ku shumë pak foli për kujdesin shëndetësor.
Referuar, Index.hr, kreu i shtetit serb u përqendrua tek analizat gjeostrategjike, duke parashikuar ardhjen e “kohërave të vështira”, përfshirë rreziqet e reja të luftës në juglindje të Europës.
Ai e bëri të qartë se shqetësimi i tij është në mënyrë të veçante Kroacia, dhe bashkëpunimi i saj në mbrojtje me Kosovën dhe Shqipërinë.
“Në Beograd, ne e kuptojmë shumë mirë aleancën e re ushtarake të krijuar midis Zagrebit, Prishtinës dhe Tiranës. Ajo nuk u krijua kundër askujt tjetër, por kundër popullit serb”, citohet të ketë thënë Vuçiç.
“Ne jemi të dytët në botë për sa i përket përparimit të kapaciteteve tona ushtarake dhe brenda dy vjetësh do t’i dyfishojmë kapacitetet tona ushtarake”, shtoi ai.
Megjithatë, ai theksoi se Serbia nuk do të sulmojë askënd.
Vuçiç kritikoi edhe krahasimet me ish-presidentin Slobodan Millosheviç, duke thënë: “Unë nuk jam Millosheviçi juaj, nuk jam as naiv dhe as budalla që t’ju besoj. Serbia ka mësuar nga historia dhe do të ruajë lirinë e saj pa rrezikuar askënd.”
Nga Gazeta ‘Si’- Socialistët bojkotuan Mbledhjen e Këshillit të Mandateve dhe Imunitetit të thirrur nga anëtarët e PD.
Në një deklaratë për mediat, kreu i grupit parlamentar të PD, Gazment Bardhi tha se afati 3 javë për t’i dhënë kohë Ballukut ka skaduar.
Sipas tij kryetari i Kuvendit, Niko Peleshi duhet të sqarojë se përse nuk po e mbledh Këshillin me qëllim shqyrtimin e kërkesës së SPAK që kërkon arrestimin e Belinda Ballukut.
Bardhi gjithashtu shtoi se PD do të bëjë një kallëzim penal ndaj kryetarit të Kuvendit Niko Peleshi, të cilin e quajti ushtar i zv.kryeministres Belinda Balluku.
Ai u shpreh se për shkak të mungesës së thirrjes së Këshillit të Mandateve ku do të shqyrtohet kërkesa e Prokurorisë së Posaçme për arrestimin e Belinda Ballukut, Paleshi është në kushtet e shpërdorimit të detyrës.
“Kryetari i Kuvendit nuk mund të tallet me Kuvendin, ai nuk merr urdhra nga të korruptuar. Ai nuk është ushtar i Ballukut, edhe pse ajo e ka ndihmuar që ai të jetë kryetar i ri kuvendit, sepse ka qenë zgjedhje e saj personale.
Është guxim i madh të marrësh në mbrojtje një të korruptuar që ka abuzuar me 1.1 mld euro”, tha Bardhi.
Ai tha se këshilli mblidhet përmes dy formave: me kërkesën e kryetarit të Kuvendit ose të ½ të anëtarëve të këshillit.
“Sot mbushen tre javë nga dita kur prokuroria ka kërkuar lejimin e arrestimit për krahun e djathtë të Edi Ramës, bashkëpunëtoren e tij në krim, Belinda Balluku. Po sot mbushen tre javë ku kryetari i kuvendit dhe katër deputetët e PS në këshill fshihen siç fshihen ata që shkelin ligjin”, tha Bardhi sipas të cilit “ky është një akt i paprecedentë“.
Ai theksoi se edhe para reformës në drejtësi nuk ka ndodhur që një kërkesë e prokurorisë të marrë kaq kohë për t’u shqyrtuar.
“Me përgjegjshmëri të plotë që na dikton situata dhe si anëtarë të Këshillit të Mandateve, 5 anëtarët të këtij këshilli kërkuan mbledhjen e këshillit për të vijuar kërkesën e SPAK për heqjen e imunitetit të Belinda Ballukut.
Kërkesa jonë është e bazuar në rregulloren e Kuvendit që do të duhet të jetë i vetmi dokument ligjor.
Kryetari ka për detyrë të njoftojë mbledhjen e Këshillit dhe rendin e ditës. Sot mbushen tre javë kur SPAK ka kërkuar lejimin e arrestimit të Ballukut dhe po sot mbushen 3 javë kur anëtaret e PS fshihen si ata që kanë shkelur ligjin.
Ky është një akt i paprecedent, ku këshilli merr 3 javë kohë për të shqyrtuar një kërkesë.
E pandehura Balluku ka kërkuar 3 javë kohë për të shqyrtuar provat. Ndërkohë vetë Rama tha që avokati dhe Balluku nuk i kanë marrë materialet.
Nga njëra anë thoshte një pjesë se çfarë kishte USB-ja, nga ana tjetër thoshte se asnjë prej nesh nuk i ka tërhequr materialet.
Afati 3 javë që donin t’i jepnin Ballukut kohë që të hante vitin e ri në shtëpi dhe jo në Burgun e Pojskës skadoi. Kryetari i Kuvendit duhet të shpjegojë pse nuk thërret këshillin e mandateve”, tha Bardhi.
Ai tha se Balluku ka vjedhur 1.1 mld euro, ndërsa shtoi se ajo po hetohet për 9 procedura.
Nga Gazeta ‘Si’- Presidenti i SHBA-së, Donald Trump, ka deklaruar se industria amerikane e naftës mund të nisë operacione në shkallë të gjerë në Venezuelë në më pak se 18 muaj, duke pasur parasysh “shumën e madhe të parave” që do të investonin kompanitë amerikane, të cilat mund të rikuperoheshin përmes të ardhurave ose rimbursimeve nga administrata amerikane.
Në një intervistë me NBC News, Trump theksoi se do të ishte një “investim i madh”, por nuk dha një afat kohor specifik për kostot. Sipas presidentit, një prodhues nafte nga Venezuela do të ishte përsëri i dobishëm për Shtetet e Bashkuara sepse do të ndihmonte në mbajtjen e çmimeve të ulëta të energjisë.
Trump deklaroi gjithashtu se kompanitë e naftës, pavarësisht se nuk ishin njoftuar paraprakisht për operacionin që çoi në kapjen e Nicolás Maduro, e dinin se diçka ishte duke u zhvilluar dhe do të ishin gati të ndërhynin.
Presidenti përsëriti se përparësia e tij mbetet “rregullimi” i vendit dhe ringjallja e sektorit të naftës, në vend që të promovojë menjëherë një tranzicion demokratik.
Më herët, Trump është shprehur se Shtetet e Bashkuara nuk janë në luftë me Venezuelën.
Megjithatë, Trump nuk e përjashtoi një sulm të dytë dhe shpjegoi se nuk beson se miratimi i Kongresit është i nevojshëm.
Lidhur me mundësinë e zgjedhjeve, ai sqaroi se nuk do të ketë zgjedhje në 30 ditët e ardhshme, sepse duhet kohë.
Nga Gazeta ‘Si’– Zyrtarë nga më shumë se 30 vende perëndimore ose ndryshe “Koalicioni i të Gatshmëve”, që mbështesin Kievin në luftën e tij me Rusinë do të takohen me presidentin ukrainas, Volodymyr Zelensky, ndërsa vazhdojnë të përsosin një propozim paqeje që synon t’i japë fund konfliktit më të madh dhe më vdekjeprurës në Europë që nga Lufta e Dytë Botërore.
Në takimin e 6 janarit do të ketë gjithashtu një prani amerikane, me kryenegociatorët e presidentit Donald Trump, Steve Witkoff dhe Jared Kushner, të pranishëm në kryeqytetin francez, megjithëse sekretari i Shtetit, Marco Rubio, nuk ka gjasa të vijë, pavarësisht shpresave në disa kryeqytete evropiane se ai do të merrte pjesë gjithashtu.
Zyrtarë europianë i thanë Radios Evropa e Lirë se ka “një ndjenjë të ripërtërirë urgjence” pas një takimi gjatë fundjavës të këshilltarëve për sigurinë kombëtare dhe një mbledhjeje të planifikuesve ushtarakë më 5 janar.
Ata shpresojnë se takimi në Paris do të sigurojë që Shtetet e Bashkuara, Ukraina dhe vendet e tjera europiane “të jenë në të njëjtën linjë”.
Presidenti francez, Emmanuel Macron, tha se shpreson të paraqesë “angazhime konkrete” për sigurinë e Ukrainës pas bisedimeve. Ideja është që të ketë qartësi mbi përbërjen dhe dislokimin e një force paqeruajtëse në rast të një armëpushimi.
Disa zyrtarë thonë se shifra që qarkullon në disa kryeqytete europiane është që forca të përbëhet nga 15.000 deri në 20.000 trupa, megjithëse disa shpresojnë që niveli të jetë më afër 30.000, duke vepruar nën moton “det, qiell dhe tokë të sigurta”.
Nuk janë zbuluar plane ushtarake, por pjesa më e madhe e trupave do të vinte nga Franca dhe Mbretëria e Bashkuar, të cilat do të udhëhiqnin komponentët tokësorë dhe ajrorë, ndërsa Turqia ka treguar se do të ishte përgjegjëse për sigurimin e korridoreve të transportit në Detin e Zi.
Megjithatë, ende nuk ka qartësi se sa afër vijës së kontaktit do të vendosej një forcë e mundshme e Koalicionit të të Gatshmëve. Shumica e zyrtarëve europianë me të cilët ka qenë në kontakt REL-i besojnë se dislokimi i mundshëm do të bëhej në Ukrainën Perëndimore për të mbështetur dhe trajnuar trupat ukrainase.
Ndërsa kornizat e një pranie perëndimore në Ukrainë po marrin formë, ka ende disa pikëpyetje për t’u sqaruar, përfshirë rregullat e angazhimit dhe garancitë e sigurisë nga SHBA.
Një diplomat europian pranoi se një çështje që ende nuk është zgjidhur është se si duhet reaguar ndaj një sulmi të mundshëm rus. “Në thelb ende po diskutojmë nëse do të kundërpërgjigjemi me zjarr apo do të largohemi”, tha ai.
Sa i përket garancive të sigurisë nga SHBA-ja, si Brukseli ashtu edhe Kievi po bëhen gjithnjë e më optimistë se Uashingtoni do të ofrojë “një mbështetje të fortë”, edhe pse ende nuk është e qartë saktësisht se çfarë forme do të marrë kjo. Zyrtarë evropianë i thanë REL-it, në kushte anonimiteti, se mund të ketë trupa amerikane në terren në një rol jo-luftarak për të vëzhguar armëpushimin.
Por koalicioni gjithashtu shpreson që Uashingtoni të vazhdojë të ofrojë “mbështetje nga prapavija”, siç janë logjistika dhe inteligjenca.
Në nëntor 2025, Trump e shtyu Zelenskyn të pranonte një propozim paqeje me 28 pika, të cilin shumë e panë si dukshëm në favor të Rusisë.
Ukraina dhe aleatët e saj evropianë — të udhëhequr nga Britania, Franca dhe Gjermania — u përpoqën me nguti të zhvillonin një kundërpropozim, duke paraqitur përfundimisht një plan me 20 pika që përfshinte më shumë interesat e Kievit, veçanërisht në lidhje me garancitë e sigurisë dhe integritetin territorial.
Në takimet e tij me evropianët, Zelensky ka të ngjarë të theksojë nevojën për garanci sigurie — nga Europa, por edhe në bashkëpunim me sigurime të forta të dëshiruara nga Shtetet e Bashkuara.
Kryenegociatori i Ukrainës, Ruslan Umerov, deklaroi së fundmi se “shumica e pozicioneve — 90 për qind e planit të paqes — tashmë janë rënë dakord, dhe puna vazhdon mbi detajet”.
Këto detaje, që pritet të diskutohen në Paris, përfshijnë çështjen e ndërlikuar të lëshimeve territoriale, me Ukrainën që kërkon që vija e kontaktit të ngrihet ose që i gjithë rajoni i Donbasit të bëhet një zonë e çmilitarizuar. Një çështje tjetër është pronësia e centralit bërthamor të Zaporizhias, me Kievin që hedh poshtë idenë e menaxhimit të përbashkët nga Ukraina dhe Rusia, duke preferuar që Shtetet e Bashkuara të ndërhyjnë për të shitur energjinë e tij në Moskë.
Megjithatë, pak njerëz në Bruksel mendojnë se Rusia do të pranonte ndonjë nga këto çështje, me vlerësimin se Kremlini ende mendon se po fiton në fushëbetejë.
Presidenti rus, Vladimir Putin, ka thënë disa herë javët e fundit se Moska do t’i arrijë qëllimet e asaj që e quan “operacion i posaçëm ushtarak”, qoftë përmes marrëveshjes apo forcës.
Me këtë në mendje, BE-ja po përgatit veçmas një rund të ri sanksionesh, të 20-in që nga pushtimi i plotë gati katër vjet më parë, i cili pritet t’u paraqitet shteteve anëtare për miratim më vonë gjatë janarit.
Nga Gazeta ‘Si’- Anëtarët e grupit parlamentar të Partisë Demokratike, do të mblidhen sot në Kryesinë e Kuvendit për mbledhjen e Këshillit të Imuniteteve dhe të Mandateve sa i takon kërkesës së SPAK për arrestimin e Belinda Ballukut.
Mbledhja është njoftuar në orën 11:00.
Me anë të një shkrese, grupi parlamentar i PD-së i ka kërkuar mbledhje kryeparlamentarit Niko Peleshi, ndërsa nuk pati reagim nga ky i fundit.
Kujtojmë se anëtarët e PD-së kanë njoftuar mbledhjen e Këshillit disa herë, por pa arritur rezultate, pasi socialistët nuk kanë qenë të pranishëm.
Nga Gazeta ‘Si’- Policia ka bërë apel për kujdes në rrugë pas përmbytjes në autostradën Tiranë-Durrës. Pranë hyrjes së qytetit bregdetar, ka prezencë të lartë të ujit në të dyja anët e lëvizjes çka e bën të pamundur qarkullimin normal të makinave.
Për këtë arsye për të shmangur trafikun dhe aksidentet, Policia Rrugore njofton se do të ketë një devijim të lëvizjes.
•Automjetet që vijnë nga jugu në drejtim të Tiranës, të qarkullojnë nga Rruga e Plepave për në Ndroq dhe nga rruga Rrogozhinë–Elbasan–Tiranë.
•Për në Durrës, kalimi do të bëhet nga rruga e universitetit, në drejtim të Spitallës dhe në rrugën Tiranë–Elbasan–Rrogozhinë.
Prej mëngjesit të sotëm Shqipëria është përfshirë nga një mot i keq me reshje të shumta shiu çka ka krijuar probleme të shumta sidomos në Durrës dhe Lezhë.
Një grabitje e armatosur ka ndodhur pasditen e sotme në Fushë-Krujë, në një pikë karburanti.
Sipas burimeve policore, një person që ndodhej në drejtimin e një taksie, ka kërcënuar me armë punonjësit e karburantit dhe ka marrë xhiron ditore.
Sipas burimeve policore dyshohet se autori ka kryer të paktën 2 grabitje përgjatë pak orëve. Ai pasi ka marrë një taksi në Tiranë, ka kërkuar të shkojë në Fushë-Krujë.
Në afërsi të Tapizës ka kërcënuar taksistin duke marrë vetë drejtimin e makinës, ndërsa taksistin e ka lënë në një zonë të largët duke i marrë paratë dhe celularin.
Pasi ka vjedhur taksistin autori ka shkuar pranë një pike karburanti në afërsi të Milotit dhe me kërcënimin e armës i ka marrë punonjësit paratë e xhiros ditore.
Më pas ka lënë mjetin e grabitur në afërsi të një xhamie në Fushë-Krujë dhe është zhdukur duke humbur gjurmët.
Nga Gazeta ‘Si’- Qeveria e Venezuelës publikoi të hënën dekretin e Gjendjes së Trazirës së Jashtme, i cili i jep kompetenca të gjera presidencës dhe urdhëron forcat e sigurisë të kapin “çdo person të përfshirë në promovimin ose mbështetjen” e sulmit të Shteteve të Bashkuara kundër vendit të Amerikës së Jugut.
Dokumenti, që sipas CNN mban datën 3 janar, është nënshkruar nga presidenti tashmë i rrëzuar Nicolás Maduro, i cili u kap atë mëngjes nga forcat ushtarake amerikane dhe aktualisht ndodhet i burgosur në New York.
“Agjencitë e policisë kombëtare, shtetërore dhe komunale duhet menjëherë të ndërmarrin kërkimin dhe kapjen në gjithë territorin kombëtar të çdo personi të përfshirë në promovimin ose mbështetjen e sulmit të armatosur nga Shtetet e Bashkuara të Amerikës kundër territorit të Republikës (…) me synim ndjekjen e tyre penale”, thuhet në tekstin e dekretit, i miratuar nga presidentja e përkohshme Delcy Rodríguez.
Dekreti ishte përgatitur dhe shpallur në fund të shtatorit, javë pas nisjes së dislokimit të flotës amerikane në Karaibe, por përmbajtja e tij ishte e panjohur, duke u përditësuar me ngjarjet e fundjavës. Masa ka fuqinë e ligjit dhe do të mbetet në fuqi për 90 ditë, me mundësi zgjatjeje edhe për 90 ditë të tjera.
Kushtetuta e Venezuelës përcakton se, në gjendje emergjence, një dekret i garanton presidentit pothuajse pushtet të plotë politik, ekonomik dhe social mbi vendin.
Kjo është hera e parë që ky dispozitiv është përdorur që nga miratimi i Kushtetutës aktuale në vitin 1999, e cila parashikon se mund të shpallet në rast konflikti që “rrezikon seriozisht sigurinë e kombit, qytetarëve ose institucioneve të tij.”
Nga Gazeta ‘Si’- Partia Demokratike iu rikthye protestës para godinës së Kryeministrisë.
Kjo ishte foltorja e shtatë në radhë e demokratëve kundër qeverisë, ndërsa Berisha nuk ka përjashtuar forma të tjera të aksionit politik, përfshirë nisma paralele apo akte ekstreme të ngujimit.
Duke folur, Berisha theksoi se sipas tij kryeministri Edi Rama do të ketë të njëjtin ‘fat’ si Nicolas Maduro në Venezuelë.
Sipas tij operacioni që ndërmorri SHBA në Venezuelë, kundër regjimit të Maduros, shkaktoi tmerr e terror në Surrel.
“Trump gjer sot ka përsëritur se këtij Maduroje do t’i vijnë të tjerë pas. Dhe iu ka dërguar mesazhe. E vërteta është se ky akt solli ngricë të madhe, tmerr dhe terror në Surrel. Edi Rama ngriu. E kyçi dje podcastin e tij Mashtrojmë. Publikoi një artikull me emrin e dy mashtruesve ordiner të tij, Endri Kajsiu, në të cilin thoshte mos kujtoni se jam Maduro se Shqipëria nuk ka naftë si Venezuela.
Ky është Ramaduro, se njëlloj si Maduro, ka shndërruar zgjedhjet në farsë elektorale. Mandatet e tij qëndrojnë mbi krimin, ka marrë mandatet e opozitës”, tha Berisha.
“Për një betejë politike deri në largimin e qeverisë”, theksoi Berisha, pasi sipas tij “vendi ynë duhet të shpëtohet”.
Në këtë protestë nuk kanë munguar edhe mesazhet nga qytetarët, të cilët janë shfaqur edhe me pankarta me mesazhe pikante.
Ndërkohë, në protestë foli edhe deputeti Luçiano Boçi i cili theksoi para Kryeministrisë, se sipas tij kryeministri Edi Rama ka krijuar një “parajsë” për veten, por një “ferr” për qytetarët me qeverisjen e tij.
Boçi tha se sipas tij qeveria i ka ngulur “thikën e mjerimit” popullit, duke theksuar se edhe një pjesë e madhe janë në rrezik varfërie.
Ai hodhi edhe akuza ndaj zëvendëskryeministres, teksa shtoi se kryeministri Rama po e mbron sepse është i frikësuar për vetë fatin e tij.
Login
