Lideri i Partisë Demokratike të Kosovës, Bedri Hamza, pas takimit me kryeministrin në detyrë, Albin Kurti, ka deklaruar se PDK-ja do të qëndrojë në opozitë gjatë këtij mandate, raporton Ekonomia Online.

“Ne posa e përfunduam takimin me zotin Kurti. Ju e dini qëndrimin tim që ka qenë publik, që Partia Demokratike e Kosovës në këto zgjedhje ka garu me një program. Ka garu me prioritete, të cilat kanë të bëjnë me fushën e ekonomisë, me fushën e mirëqenies sociale, tu përfshi rritjen e pagave, pensioneve, dhe të gjitha pagesave të tjera, me projekte në energji, në infrastrukturë, dhe ky ka qenë projekti jonë. Ky ka qenë prioriteti jonë. Që ne me bë punë, me bë veprime, qysh me e përmirësu këtë vend, e qysh me e përmirësu jetën e qytetarëve të Kosovës”, tha ai.

“Pastaj për me u zbatu këto prioritete, kemi thënë që Partia Demokratike e Kosovës nuk ka vija të kuqe. Është e hapur, dhe është e hapur për të biseduar, pa u imponuar, për marrëveshje gjithëpërfshirëse politike, tu i përfshi të gjitha institucionet. Bazuar në bisedat që i kemi pasë, dhe në diskutimet që i kemi pasë, normalisht korrekte, normalisht korrekte, qëndrimi jonë është që Partia Demokratike e Kosovës për këtë mandat është parti në opozitë. Dhe ne i dëshirojmë sukses zotit Kurti dhe të gjithë atyre që takohen, bisedojnë, t’i japin vendit institucione, tu i përfshi të gjitha institucionet, se përveç Partisë Demokratike të Kosovës në Kuvendin e Republikës së Kosovës janë edhe 98 deputetë të tjerë, kështu që matematikisht ka mundësi me u bë kompletimi i të gjitha institucioneve, dhe këtu do të thotë është pozita e Partisë Demokratike të Kosovës”, tha ai.

“Ne do të bashkëpunojmë me të gjitha forcat politike brenda Kuvendit të Republikës së Kosovës, do të vijmë edhe në interes të qytetarëve të Kosovës, të Kosovës dhe për të gjitha ato çështje ku është interesi i Kosovës. Partia Demokratike e Kosovës ka dëshmu edhe unë kam qëndru, kam insistu, kam premtu që vota e Partisë Demokratike të Kosovës do të jetë votë pro, tu përfshi marrëveshje financiare ndërkombëtare dhe marrëveshje të tjera që kërkojnë dy të tretat e votave edhe që janë në interes të Kosovës”, tha ai.

Sinjali – aty ku e vërteta flet para lajmit!

/GazetaSinjali/

The post Hamza: PDK në këtë mandat është në opozitë, i dëshirojmë suksese Kurtit appeared first on Sinjali.

Kryesia e Partisë Demokratike të Kosovës ka mbajtur mbledhjen e radhës, ku ka diskutuar për zhvillimet politike në vend, prioritetet organizative si dhe procesin e zgjedhjeve të brendshme.

Sipas një njoftimi, në mbledhje është theksuar se PDK po hyn në një fazë të rëndësishme të konsolidimit organizativ përmes zgjedhjeve të brendshme, të cilat do të zhvillohen në përputhje me Statutin e partisë dhe mbi parimet e demokracisë së brendshme, transparencës, garës së ndershme dhe respektimit të vullnetit të anëtarësisë.

“Kryesia vlerësoi se ky proces zgjedhor përbën një mundësi të rëndësishme për fuqizimin e strukturave, përfshirjen e energjive të reja dhe ndërtimin e një PDK-je më të fortë, më të bashkuar dhe më të përgatitur për sfidat politike dhe përgjegjësitë që e presin Kosovën”, thuhet në njoftim.

Po ashtu, Kryesia ka diskutuar edhe për zhvillimet që lidhen me procesin gjyqësor në Dhomat e Specializuara në Hagë, duke shprehur pritjen që vendimi të jetë lirues për ish-krerët e UÇK-së.

Kryesia ka ritheksuar se, pavarësisht sfidave politike, PDK ka ruajtur unitetin, organizimin dhe pozitën si partia kryesore opozitare në vend, duke mbetur forca me numrin më të madh të deputetëve në opozitë.

Partia Demokratike e Kosovës ka deklaruar se mbetet e përkushtuar të respektojë vullnetin e anëtarësisë, të forcojë demokracinë e brendshme dhe të vazhdojë angazhimin për një Kosovë më të zhvilluar, më të sigurt dhe të integruar në institucionet euroatlantike.

Sinjali – aty ku e vërteta flet para lajmit!

/GazetaSinjali/

The post PDK diskuton zgjedhjet e brendshme dhe zhvillimet politike appeared first on Sinjali.

Kryesia e Partisë Demokratike të Kosovës ka mbajtur të martën mbledhjen e radhës, ku është diskutuar rezultati i zgjedhjeve dhe hapat e ardhshëm politikë e organizativë të partisë, përfshirë edhe paralajmërimin për zgjedhje të brendshme në të ardhmen e afërt.

Sipas njoftimit të PDK-së, kryesia ka vlerësuar se pjesëmarrja më e ulët në procesin zgjedhor, krahasuar me ciklet e kaluara me rreth 200 mijë votues më pak, përbën një sinjal serioz që reflekton lodhjen e qytetarëve nga krizat e njëpasnjëshme politike, polarizimin e madh shoqëror dhe zhgënjimin e akumuluar gjatë viteve të fundit.

Gjithashtu, në takim është diskutuar edhe ndikimi i rrethanave të përgjithshme politike dhe ekonomike në rezultatin zgjedhor.

“Masat financiare dhe subvencionet e shpërndara nga Qeveria në prag të zgjedhjeve u vlerësua se kanë ndikuar në krijimin e perceptimit te një pjesë e elektoratit opozitar se rezultati zgjedhor ishte i paracaktuar, duke ndikuar në dekurajimin e tyre për të dalë në votime”, vijon njoftimi.

Pavarësisht këtyre rrethanave, kryesia ka vlerësuar se PDK-ja mbetet subjekti më i madh opozitar, duke ruajtur përqindjen e përfaqësimit politik, me mundësi rritjeje të lehtë të numrit të deputetëve në Kuvend.

Kryetari i PDK-së, Bedri Hamza, ka theksuar se gjatë periudhës së fundit partia është përballur me procese të shumta zgjedhore të njëpasnjëshme, duke mos pasur hapësirën dhe kohën e nevojshme për riorganizim dhe konsolidim të strukturave të saj.

“Në këtë mbledhje, Kryesia diskutoi edhe proceset e ardhshme, përfshirë zgjedhjet e brendshme partiake, të cilat do të jenë të hapura, fer dhe gjithëpërfshirëse, me synim krijimin e hapësirës për ide të reja, energji të reja dhe përfshirje më të madhe të gjeneratave të reja në strukturat drejtuese të PDK-së. Kryesia diskutoi mundësinë që procesi i brendshëm zgjedhor të fillojë në shtator 2026”, thotë tutje njoftimi.

Po ashtu, është ritheksuar edhe rëndësia e përmbylljes së procesit gjyqësor në Hagë ndaj ish-liderëve të PDK-së, si një proces me rëndësi të veçantë për lirinë, pavarësinë dhe të ardhmen e Kosovës.

“Partia Demokratike e Kosovës mbetet e përkushtuar për të reflektuar mbi secilin mësim të nxjerrë nga procesi zgjedhor dhe për të vazhduar punën në shërbim të qytetarëve dhe interesit shtetëror të Republikës së Kosovës”, përfundon njoftimi.

Sinjali – aty ku e vërteta flet para lajmit!

/GazetaSinjali/

The post Pas rezultatit të 7 qershorit, PDK-ja paralajmëron zgjedhje të brendshme këtë vit appeared first on Sinjali.