Kryeministri i Mbretërisë së Bashkuar, Sir Keir Starmer, ka reaguar ashpër ndaj kërcënimit të presidentit amerikan Donald Trump për vendosjen e tarifave ndaj vendeve europiane në lidhje me Groenlandën, duke e cilësuar këtë qasje si plotësisht të gabuar. Reagimi i Starmer vjen pas deklaratave të përsëritura nga Shtëpia e Bardhë se Shtetet e Bashkuara po shqyrtojnë një sërë opsionesh për të rritur ndikimin e tyre mbi Groenlandën, përfshirë tarifat tregtare, blerjen e territorit apo edhe skenarë ekstremë të përdorimit të forcës. Në këtë kontekst, Sir Keir Starmer deklaroi qartë se qëndrimi i Mbretërisë së Bashkuar është i palëkundur. “Groenlanda është pjesë e Mbretërisë së Danimarkës dhe e ardhmja e saj është çështje e banorëve të ishullit dhe danezëve. Siguria në Arktik është e rëndësishme për të gjithë NATO-n dhe aleatët duhet të veprojnë së bashku për t’iu përgjigjur kërcënimit rus. Vendosja e tarifave ndaj aleatëve për shkak të sigurisë kolektive është plotësisht e gabuar”, tha Starmer. Reagime të forta kanë ardhur edhe nga liderë të tjerë europianë. Kryeministri suedez Ulf Kristersson deklaroi se Suedia nuk do të lejojë të shantazhohet dhe se vetëm Danimarka dhe Groenlanda kanë të drejtë të vendosin për çështjet e tyre. Ai theksoi se kjo është një çështje e Bashkimit Europian dhe se Suedia po zhvillon diskutime intensive me vendet e tjera të BE-së, si Norvegjinë dhe Mbretërinë e Bashkuar për një përgjigje të përbashkët. Presidenti francez Emmanuel Macron u shpreh se Franca mbetet e përkushtuar ndaj sovranitetit dhe pavarësisë së kombeve, duke i quajtur kërcënimet me tarifa si të papranueshme. Ai paralajmëroi se Europa do të reagojë në mënyrë të bashkuar dhe të koordinuar, nëse këto masa konfirmohen.
A ka pasur apo jo bashkëpunim mes Elvis Shkambi dhe xhaxhait të tij për të vrarë gjyqtarin e apelit Astrit Kalaja? Për të vërtetuar këtë dyshim ndaj dy të arrestuarve nën hetim për vrasje të funksionarit të drejtësisë në bashkëpunim, prokuroria ka dërguar dy aparate telefoni që ishin në përdorim të Elvis dhe Gjon Shkambit në burg nga dita e krimit në një sallë gjykate. Dy prokurorët e çështjes siç bëjnë me dije burime të sigurta të Top Channel kanë kërkuar kodin e telefonit nga 30-vjeçari Elvis Shkambi dhe xhaxhait të tij, por asnjëri prej tyre nuk e ka vendosur në dispozicion. Në këto kushte është kërkuar ekspertizë nga policia shkencore për të zbërthyer komunikimet në të dy aparatet, për të këqyrur bisedat mes nipit dhe xhaxhait dhe personave të tjerë, çka do të provojë rolin e Gjon Shkëmbit nëse ka pasur apo jo rol shtytës ose bashkëpunues ditën kur udhëtuan drejt Tiranës për procesin civil mbi pronësinë. Megjithëse Gjon Shkambi nga 6 tetori kërkon lirinë në mënyrë të përsëritur me pretendimin se nuk dinte asgjë për planet e nipit, gjykatat e kanë lënë në burg. Gjoni shprehet se kur nipi qëlloi për vdekje gjyqtarin që sapo kishte shpallur vendimin kundër, ai i tha nipit: Na fike. Ndërsa kërkesa e fundit për liri e Gjon Shkëmbit u shty për tu shqyrtuar në datën 27 janar. Provat e deritanishme tregojnë se 30=vjeçari kishte hyrë edhe herë tjetër gjatë procesit i armatosur dhe pa u vënë re, një situatë kjo e përsëritur edhe ditën e ngjarjes. Vrasësi nuk është ankuar për masën e burgut në gjykatë por ka dëshmuar para hetuesve se ndjeu urrejtje për vendimin sipas tij të padrejtë ndaj dhe qëlloi me armë ndaj gjyqtarit që e vrau në sallë dhe dy të tjerëve që ishin palë të cilët i la të plagosur. Prokuroria po shikon edhe pjesën e dëshmisë ku Elvis Shkambi thotë se për proceset e tejzgjatura ishte ankuar edhe pranë Inspektoriatit të lartë të drejtësisë dhe disa institucioneve të tjera Pas vrasjes së Astrit Kalasë, u vu në diskutim siguria e gjykatave dhe prokurorive. Por me gjithë deklaratat, ende çështja mbetet e pazgjidhur. #voxnews #media #lajme #news
Presidenti amerikan Donald Trump u tërhoq në minutën e fundit nga urdhri për të sulmuar Iranin, siç raporton gazeta “Wall Street Journal”. Edhe pse Pentagoni ishte në gatishmëri të plotë për të goditur të mërkurën, presidenti amerikan “shtypi frenat” pas paralajmërimeve se një sulm i shkallës së gjerë nuk do të garantonte rënien e regjimit, por mund të ndizte një luftë të pakontrollueshme rajonale. Vendimtar në këtë prapakthesë ishte edhe lobimi i ethshëm i Izraelit dhe vendeve arabe, të cilët i druheshin një hakmarrjeje direkte në territoret e tyre. Në terren, bilanci i shtypjes së protestave ka marrë përmasa masakre, duke kapërcyer tashmë shifrën e 3 mijë e 400 të vrarëve. Makthi i familjarëve vazhdon edhe pas vdekjes, pasi autoritetet akuzohen se po kërkojnë shuma deri në 7 mijë dollarë si “shërbim” për dorëzimin e trupave. Shumë prindër të dëshpëruar po detyrohen të braktisin trupat e fëmijëve të tyre në morgje, pasi nuk kanë mundësi të paguajnë gjobat marramendëse që u vendos shteti për varrosjen. #voxnews #media #lajme #donaldtrump
Në mbyllje të protestës të thirrur nga kreu i Lëvizjes ‘Shqipëria Bëhet’, Adriatik Lapaj, ka pasur përplasje mes protestuesve dhe Policisë. Mbështetësit e Lapajt fillimisht kanë hedhur miell para Kryeministrisë dhe ndaj Policisë, për të simbolizuar se pushteti i kryeministrit Edi Rama është i kapur nga droga. Më pas ka pasur përplasje mes qytetarëve dhe Policisë, ku nuk kanë munguar as shoqërimet e demonstruesve në Komisariat. Lapaj tha se mielli që u hodh drejt policëve ishte simbolikë për drogën dhe kartelet që mbështet qeveria dhe që Shqipëria u penalizua duke u futur në mes të 75 vendeve që iu anuluan vizat e emigrimit, punësimit dhe lotaria amerikane. #voxnews #media #edirama #adriatiklapaj #protest
Unioni i Gazetarëve Shqiptarë ka reaguar për paralajmërimin e kryeministrit Edi Rama për mbylljen e Radio Televizionit Publik Shqiptar. UGSH thotë se do të dalë të hënën me një qëndrim zyrtar ndaj projektit apo propozimit te Kryeministrit duke qenë kategorikisht kundër mbylljes se medias publike në Republikën e Shqipërisë. Sakaq, UGSh ka publikuar edhe një peticion të punonjësve të RTSH që i kërkojnë politikës që t’i rikthejë autonominë reale të medias publike shqiptare dhe në këtë mënyrë, ta ringrejnë vetë nga brenda këtë institucion. #voxnews #media #news #edirama
Lëvizja Shqipëria Bëhet ka zhvilluar protestën e radhës para Kryeministrisë, ku disa dhjetëra qytetarë i janë bashkuar tubimit. Gjatë fjalës së tij, kryetari i Lëvizjes Shqipëria Bëhet, Adriatik Lapaj, është shprehur se qeveria e kryeministrit Edi Rama është në luftë me qytetarët. Kjo pasi sipas Lapajt, qeveria Rama ka mbjellë frikë, varfëri dhe drogë. Ai shtoi se shteti në Shqipëri është vënë në shërbim të grupeve kriminale. Teksa kërkoi largimin e gjithë klasës politike shqiptare, Lapaj shtoi se duhet një aleancë e gjerë kombëtare e ndërkombëtare për të rrëzuar qeverinë Rama. “Nuk ka asnjë komb në botë që droga dhe krimi i organizuar kanë kapur shtetin. Përkundrazi, kur droga dhe krimi i organizuar kthehen në sistem, varfëria mbizotëron, korrupsioni mbizotëron, keqqeverisja mbizotëron, sepse shteti vendoset në shërbim të krimit dhe kjo duhet luftuar. Droga, qoftë e bardhë apo e kuqe, prodhon vuajtje për kombet, prandaj ata që i vendosin shtetet në funksion të drogës, meritojnë një luftë të madhe të një aleancë ndërkombëtare kundër tyre. Kjo qeveri do të mbahet mend si qeveria që mbolli drogë, varfëri dhe frikë, ndaj duhet ta presim nga rrënjët. Një pjesë e policëve janë zgjatim i krimit. Sot jemi këtu për të dëshmuar se ne nuk kemi frikë. Mbrëmjen e 4 janarit pasi arrestoi djemtë dhe vajzat më të zellshëm të kësaj proteste, duke më gjetur vetëm në shesh, më dërguan vetëm në shesh dhe pastaj më dërgonin njerëz duke më thënë ‘tërhiqu, sepse nuk e vazhdon dot gjatë kështu’. Por vazhduam dhe do të vazhdojmë. Ne ose do të heqim këtë klasë politike, ose do të largohemi të gjithë. Nuk ka rrugë të mesme”, tha mes të tjerash Lapaj. #voxnews #media #news
Udhëheqësi suprem i Iranit, Ayatollah Ali Khamenei, e quajti presidentin e SHBA-së, Donald Trump, “kriminel” për mbështetjen e protestave në Iran dhe e fajësoi për mijëra viktima, duke pranuar se janë vrarë mijëra njerëz. Në një fjalim të transmetuar nga televizioni shtetëror, Khamenei tha se protestat kishin shkaktuar disa mijëra të vdekur. Kjo është hera e parë që një udhëheqës iranian jep një indikacion të shkallës së viktimave, nga vala e protestave që filloi më 28 dhjetor dhe u shoqërua me një shtypje të ashpër dhe të përgjakshme. “Në këtë kryengritje, presidenti i SHBA-së bëri deklarata personale, inkurajoi njerëzit që të vepronin dhe tha se ‘Ne ju mbështesim, ne ju mbështesim ushtarakisht’, u shpreh Khamenei, i cili ka fjalën përfundimtare për të gjitha çështjet e shtetit. Ai përsëriti akuza se SHBA-ja kërkon dominim mbi burimet ekonomike dhe politike të Iranit. “Ne e konsiderojmë presidentin e SHBA-së një kriminel, për shkak të viktimave dhe dëmeve, për shkak të akuzave ndaj popullit iranian”, shtoi ai. Ai i përshkroi protestuesit si “ushtarë këmbësorie” të Shteteve të Bashkuara dhe tha se ata kishin shkatërruar xhami dhe qendra arsimore. “Duke i bërë dëm njerëzve, ata vranë disa mijëra prej tyre”, tha ai. Komentet e Khameneit vijnë një ditë pasi Trump kishte marrë pasur ton më të zbutur, duke thënë se Irani anuloi varjen e mbi 800 personave dhe shtoi se respekton shumë faktin që ata anuluan ekzekutimet. Ai nuk sqaroi me kë kishte biseduar në Iran për të konfirmuar nëse vrasjet ishin anuluar. Deklaratat e Trump ishin një shenjë se mund të tërhiqej nga një sulm ushtarak. Ditët e fundit, Trump u kishte thënë protestuesve iranianë se “ndihma po vjen” dhe se administrata e tij do të vepronte në përputhje me rrethanat, nëse vrasjet e protestuesve do të vazhdonin ose nëse autoritetet iraniane do të ekzekutonin protestuesit e arrestuar. Në fjalimin e tij, Khamenei tha se kryengritësit ishin të armatosur me armë të të importuara nga jashtë, pa përmendur ndonjë vend të veçantë. “Ne nuk planifikojmë, nuk çojmë vendin drejt luftës. Por nuk lirojmë as shkelësit e brendshëm; më keq se shkelësit e brendshëm, ka shkelës ndërkombëtarë. Nuk i lëmë as ata”, tha ai dhe u bëri thirrje zyrtarëve të ndjekin çështjet përkatëse. Irani ka rikthyer një qetësi në vend, pas shtypjes së ashpër të protestave që filluan më 28 dhjetor, për shkak të ekonomisë së rënduar të vendit. Shtypja nga regjimi ka lënë të paktën 3,090 persona të vrarë, sipas Agjencisë së Lajmeve për Aktivistët e të Drejtave të Njeriut me bazë në SHBA, duke tejkaluar çdo valë tjetër protestash ose trazirash në Iran në dekada dhe duke kujtuar kaosin e kaluar me revolucionin e vitit 1979. Agjencia ka qenë e saktë gjatë viteve të demonstratave, duke u mbështetur në një rrjet aktivistësh brenda Iranit, që konfirmon të gjitha viktimat e raportuara. AP nuk ka arritur të konfirmojë në mënyrë të pavarur numrin e viktimave. Zyrtarët iranianë kanë akuzuar përsëri SHBA-në dhe Izraelin për nxitjen e trazirave në vend. Të premten, presidenti iranian Masoud Pezeshkian, në një bisedë telefonike me presidentin rus Vladimir Putin, akuzoi SHBA-në dhe Izraelin për ndërhyrje në trazira. Nuk ka pasur shenja protestash për disa ditë në Teheran, ku aktiviteti tregtar dhe jeta e rrugës janë rikthyer në dukje normale, dhe mediat shtetërore iraniane nuk kanë raportuar për ndonjë trazirë të re. Gjatë trazirave, autoritetet bllokuan të gjithë aksesin në internet më 8 janar. Të shtunën, dërgimi i mesazheve dhe shërbimet shumë të kufizuara të internetit filluan të funksionojnë sërish përkohësisht në disa pjesë të Iranit. Mesazhet me tekst filluan të funksionojnë gjatë natës, ndërsa përdoruesit mund të qasen në faqet lokale përmes një shërbimi të brendshëm të internetit. Disa raportuan gjithashtu akses të kufizuar në internetin ndërkombëtar përmes përdorimit të një VPN-je. #voxnews #media #news #donaldtrump
Presidenti i Shteteve të Bashkuara, Donald Trump, të shtunën premtoi të vendosë një valë tarifash në rritje ndaj aleatëve europianë, derisa Shtetet e Bashkuara të lejohen të blejnë Groenlandën. Në një postim në rrjetin social Truth Social, Trump njoftoi se një tarifë fillestare prej 10% që do të hyjë në fuqi më 1 shkurt për Danimarkën, Norvegjinë, Suedinë, Francën, Gjermaninë, Britaninë e Madhe, Holandën dhe Finlandën. Ai shtoi se këto tarifa do të rriten në 25% më 1 qershor dhe do të vazhdojnë derisa të arrihet një marrëveshje për blerjen e Groenlandës nga SHBA-ja. Deklarata e Trump erdhi në një kohë kur marrëdhëniet transatlantike janë tensionuar për shkak të çështjeve tregtare dhe politikave të sigurisë. Groenlanda, një territor autonom i Danimarkës, ka tërhequr vëmendjen e administratës amerikane, për shkak të vendndodhjes së saj strategjike dhe burimeve natyrore. Sipas ekspertëve, kërkesa e Trump për të blerë Groenlandën është unike dhe e paparë në historinë bashkëkohore diplomatike. Megjithatë, autoritetet daneze dhe vetë popullsia e Groenlandës kanë shprehur dyshime dhe refuzime të qarta ndaj një blerjeje të mundshme. Kryeministrja daneze ka theksuar se Groenlanda nuk është në shitje dhe se çështjet e saj janë të brendshme dhe autonome. Analistët politikë theksojnë se politika e Trump për tarifat mund të ketë ndikime serioze ekonomike, duke rritur çmimet e produkteve europiane në SHBA dhe duke tensionuar marrëdhëniet me aleatët historikë. Sidoqoftë, presidenti ka bërë të qartë se strategjia e tij e tregtisë është pjesë e një vizioni më të gjerë për të rritur fuqinë ekonomike amerikane dhe për të negociuar marrëveshje më të favorshme. Vendimi për të vendosur tarifa ndaj vendeve si Gjermania, Franca dhe Britania e Madhe mund të ketë pasoja edhe në nivel global, duke prekur tregtinë ndërkombëtare dhe stabilitetin ekonomik të Evropës. Analistët paralajmërojnë se tensionet tregtare mund të shkaktojnë përgjigje reciproke nga vendet e prekura, duke rritur pasigurinë për eksportuesit amerikanë dhe për ekonominë globale. Ndërkohë, Groenlanda mbetet një territor i pasur me minerale dhe burime natyrore, përfshirë minerale të rralla dhe burime energjetike, që mund të kenë rëndësi strategjike për SHBA-të në një epokë të rritjes së rivaliteteve gjeopolitike në Arktik. Çështja ka tërhequr gjithashtu vëmendjen e mediave dhe opinionit publik amerikan, duke hapur debat për legjitimitetin dhe mundësitë e blerjes. #voxnews #media #news #donaldtrump
Kryeministri Edi Rama njoftoi sot përmes rrjeteve sociale se Shqipëria është ftuar të bëhet pjesë e Bordit të Paqes për Gazën, një iniciativë ndërkombëtare e ideuar nga presidenti amerikan Donald Trump. Në postimin e tij, Rama shprehet se ndihet tepër i nderuar nga ftesa personale e Trump dhe e konsideron këtë një hap të rëndësishëm për vendin në arenën ndërkombëtare. Sipas tij, Shqipëria përfaqësohet si anëtar themelues, duke ngjitur sipas “një tjetër majë të paimagjinueshme vetëm pak vite më parë”, dhe kjo pasqyron edhe rritjen e ndikimit të vendit në arenën ndërkombëtare. Rama thekson gjithashtu se kjo ftesë është një reflektim i marrëdhënieve të thella të partneritetit strategjik mes Shqipërisë dhe Shteteve të Bashkuara të Amerikës, që janë forcuar ndjeshëm gjatë viteve të fundit. “Shumë i nderuar nga ftesa personale e presidentit Trump, për ta përfaqësuar Shqipërinë në bordin e paqes, një organizatë e re ndërkombëtare e ideuar prej tij, ku Shqipëria ftohet si anëtar themelues, duke ngjitur kështu ndërkombëtarisht një tjetër majë krejt të paimagjinueshme vetëm deri pak vite më parë. Nuk mund të jem dot më krenar për Shqipërinë, për gjithçka kemi bërë në këto vite duke e kthyer në një Shqipëri tjetër, të dinjitetshme e të respektuar botërisht si asnjëherë, e padiskutim edhe për nivelin ku e kemi ngritur marrëdhënien e partneritetit tonë strategjik me Shtetet e Bashkuara të Amerikës, duke u ftuar me një respekt e vlerësim krejt të posaçëm nga presidenti Donald J. Trump, për t’u bërë pjesë e një bordi ndërkombëtar të krijuar e kryesuar prej atij vetë dhe për të punuar së bashku me të. Thank you, Mr. President. God bless Albania and the United States”, shkruan Rama. #voxnews #media #news #edirama #donaldtrump
Kina ka kaluar në kundërsulm dhe projektohet në “oborrin e shtëpisë” së Shteteve të Bashkuara. Pas tronditjes nga kapja e Nicolás Maduro, që rrezikon të komprometojë shumë interesa të Pekinit në Venezuelë, Xi Jinping priti me të gjitha nderimet Mark Carney-n. Kjo është vizita e parë në Kinë pas më shumë se tetë vitesh nga një kryeministër i Kanadasë, e shtyrë të afrohet me Pekinin nga agresiviteti tregtar dhe politik i Donald Trump-it. “Pas Groenlandës, do t’i vijë radha Kanadasë”, shkruajnë mediat kineze, të cilat e shohin vendimin e Otavës për t’i dhënë fund viteve të gjata të ftohtësisë si një “model” për të gjitha vendet e tjera perëndimore të “bullizuara” nga Shtëpia e Bardhë. Jo rastësisht, Xi shmangu krejtësisht marrëdhëniet e trazuara të së kaluarës së afërt: arrestimi në Vancouver i Meng Wanzhou-t, vajza e pronarit të Huawei, kishte nisur një seri hakmarrjesh nga Pekini. Në vitin 2024, Justin Trudeau kishte vendosur tarifa shumë të larta mbi një gamë të gjerë produktesh kineze. “Të krijojmë së bashku një partneritet strategjik”, i tha Xi Carney-t, një propozim edhe më domethënës duke qenë se i drejtohet fqinjit kryesor të SHBA-ve. Kryeministri kanadez u përgjigj duke shpresuar për një “epokë të re” në marrëdhëniet me Pekinin, shkruan La Stampa. Vizita dukej se ishte thjesht për të rihapur dialogun, por prodhoi menjëherë rezultate konkrete. Kanadaja do të importojë rreth 50 mijë makina elektrike kineze, duke ulur tarifat 100% të vendosura nga Trudeau në nivelin preferencial prej 6.1%. Në këmbim, Pekini do të ulë tarifat mbi canola-n kanadeze (një lloj vaji bimor) në 15% dhe do të eliminojë ato mbi bizelet, karavidhet dhe gaforret. Kina do të lejojë gjithashtu hyrjen pa vizë për qytetarët kanadezë. Jo vetëm kaq. U nënshkrua edhe një memorandum bashkëpunimi për energjinë, që hap rrugën për një rritje të ndjeshme të shkëmbimeve të naftës dhe gazit. Për Kanadanë, kjo nënkupton tërheqje kapitalesh dhe reduktim të varësisë pothuajse ekskluzive nga tregu amerikan. Për Kinën, është gjithashtu një sinjal politik. Duke marrë kontrollin e naftës venezueliane, ku Pekini është importuesi kryesor, Trump synonte të fitonte një armë të re negociuese në përplasjen e tij me Xi-në. Duke afruar Kanadanë, Kina duket se vë në pikëpyetje edhe efektivitetin e Doktrinës së re Monroe. Diskutimi shtrihet edhe më në veri. “E drejta dhe liria e të gjitha vendeve për të zhvilluar aktivitete në Arktik duhet të respektohen plotësisht”, përsërit prej javësh qeveria kineze në përgjigje të synimeve të Trump mbi Groenlandën. Pekini synon burimet natyrore: jo vetëm rezervat e gazit, por edhe mineralet e rralla si uraniumi, zinku, nikeli, grafiti dhe palladiumi, të gjitha të dobishme për aplikime në zhvillimin teknologjik, kapitull themelor i përplasjes mes Kinës dhe Shteteve të Bashkuara. Prania mes Groenlandës (ku ka shfaqur interes për të financuar infrastrukturë si porte dhe aeroporte) dhe arkipelagëve si Svalbard në Norvegji është e konsoliduar. Midis viteve 2012 dhe 2021, Kina ka investuar 89.4 miliardë dollarë në rajonin arktik. Ambiciet janë të forta, duke qenë se me shkrirjen e akullnajave zhvillimi i Rrugës së Mëndafshit Polar është ndër objektivat strategjikë të Xi-së. #voxnews #media #news
Shënohet një përvjetor i veçantë për një nga figurat më të njohura dhe diskutueshme të botës së edukimit seksual në Shqipëri: doktori Adem Harxhi mbush 90 vjeç. Ai njihet gjerësisht si “doktori i seksit”, për aktivitetin e tij të gjatë si edukator, autor dhe komentues publik në çështje intime dhe marrëdhënie njerëzore. Adem Harxhi ka ndërtuar një karrierë të pasur duke filluar si mjek okulist dhe më pas duke kaluar në fushën e edukimit seksual, një temë që shpesh konsiderohet tabu në shoqëri. Ai ka botuar libra si “Seksualiteti dhe seksi” dhe “Fëmijët duan të dinë për seksin”, ka mbajtur leksione dhe ka qenë një zë publik për shëndetin seksual dhe artin e marrëdhënieve. Përmes një postimi në profilin e tij personal në rrjetet sociale, Harxhi falënderon të gjithë ata që e kanë mbështetur në gjithë këto vite: “Sot, 90 vjeç. Falënderoj të gjithë, familjarë, miq e shokë, që në tërë këto vite më ndihmuan të jem ky që jam,” shprehet ai në mesazhin e ndjerë për ditëlindjen.
Ndërkohë që institucionet publike duhet të jenë garantët e administrimit me kursim të parave të shqiptarëve, Autoriteti i Komunikimeve Elektronike dhe Postare (AKEP), nën drejtimin e Gentian Salës, ka vendosur të shpërndajë miliona lekë për komoditetin e zyrave të veta, pa u munduar as të krijojë dukjen e një gare të ndershme. Një garë me një pjesëmarrës: Vetëm një ofertë, një fitues! Sipas dokumenteve të siguruara nga JOQ, AKEP ka mbyllur tenderin me numër reference REF-72383-12-16-2025 me objekt: "Riparimi i sistemit të kondicionimit në zyrat e QKMF dhe zëvendësimi i sistemit të ftohjes në dhomën e serverave". Ajo që bie në sy menjëherë është mungesa totale e konkurrencës. Në këtë procedurë ka marrë pjesë vetëm një kompani: "COMFORT" sh.p.k., në pronësi të Rezart dhe Luftulla Stërmasit. Pa asnjë rival në garë, fitorja ka qenë e sigurt, duke ngritur dyshime të forta për një tender të qepur sipas masës së fituesit. Fondi limit i vendosur nga AKEP ishte 5,033,200 lekë (të reja) pa TVSH. Kompania "COMFORT" ka paraqitur ofertën prej 4,238,375 lekësh. Pas llogaritjes, rezulton se vlera fituese është 84.2% e fondit limit. Në një treg me konkurrencë reale, oferta fituese zakonisht ulet ndjeshëm për të mposhtur rivalët, por në zyrat e Gentian Salës, mjafton të paraqitet vetëm një firmë për të rrëmbyer rreth 50 milionë lekë (me TVSH) nga taksat tona. Ky tender tregon edhe një herë lehtësinë me të cilën hidhen paratë për riparime sistemesh kondicionimi, ndërkohë që procedurat "me një ofertues të vetëm" janë shndërruar në rrugën më të shpejtë për të kaluar fondet publike në xhepat e privatëve. Pyetja që mbetet për organet e kontrollit: Pse nuk kishte asnjë kompani tjetër në garë dhe a ishin kriteret e tenderit të hartuara në mënyrë që vetëm "COMFORT" të kualifikohej?
Konfliktet rreth projektit të Aeroportit të Vlorës po thellohen, ndërsa kompania “Mabco Construction”, e drejtuar nga biznesmeni Behgjet Pacolli dhe aksionere mazhoritare në shoqërinë koncensionare VIA, akuzon hapur Ministrinë e Infrastrukturës dhe Energjisë për qëndrim të njëanshëm dhe përjashtim të paligjshëm nga vendimmarrja. Në një letër drejtuar zëvendëskryeministres dhe ministres së Infrastrukturës Belinda Balluku, me dijeni edhe kryeministrin Edi Rama, Mabco denoncon një takim të zhvilluar më 12 janar 2026 në kantierin e aeroportit të Vlorës, ku kanë marrë pjesë përfaqësues të MIE-s, Autoritetit të Aviacionit Civil, Albcontrol dhe kompania “2A Group” e Valon Ademit, aksionerit të pakicës me 2% në VIA. Sipas Mabco-s, takimi përbën “një akt të rëndë dhe të paprecedentë”, pasi është zhvilluar në mënyrë të njëanshme, duke përjashtuar qëllimisht aksionerin mazhoritar që zotëron 98% të projektit dhe që deri më tani ka investuar rreth 80 milionë euro. Në letër thuhet se përfaqësuesi i Mabco-s dhe konsulent për certifikimin e aeroportit, Afrim Aziri, është penguar fizikisht të marrë pjesë në takim, me pretendimin se ishte “i padëshirueshëm” pasi konsiderohej “njeri i Mabco-s”. E njëjta situatë, sipas kompanisë, ka ndodhur edhe me drejtorin e projektit për Mabco, Fadil Neziri, i cili pavarësisht se dispononte prokurë përfaqësimi, u largua nga mbledhja me miratimin e heshtur të përfaqësuesve të ministrisë dhe institucioneve shtetërore të pranishme. Mabco e cilëson këtë sjellje si shkelje flagrante të ligjit dhe të kontratës së koncesionit, duke akuzuar Ministrinë e Infrastrukturës për bashkëpunim të drejtpërdrejtë me ortakun e minorancës. Sipas saj, fakti që takimi u zhvillua në ambientet e 2A Group në kantier tregon qartë një qasje të paragjykuar dhe përjashtuese ndaj investitorit kryesor. Kompania e Pacollit kërkon përsëritjen e menjëhershme të mbledhjes me praninë e të gjithë aksionerëve dhe rivendosjen e marrëdhënieve transparente në përputhje me ligjin. Në të kundërt, Mabco paralajmëron se do të ndjekë të gjitha rrugët ligjore, administrative, civile dhe penale, për të mbrojtur investimin dhe interesin publik. Nga Ministria e Infrastrukturës dhe Energjisë nuk ka pasur asnjë reagim zyrtar lidhur me akuzat. Ndërkohë, konflikti mes ortakëve vijon prej muajsh edhe në rrugë gjyqësore. Aktualisht, struktura e pronësisë së aeroportit parashikon 98% të aksioneve për Mabco dhe 2% për Valon Ademin, i cili pretendon se i takon një pjesë më e madhe e aksioneve, deri në 47%, për shkak të investimeve të kryera. Për këtë çështje ka nisur hetim nga Prokuroria e Tiranës, ndërsa SPAK ka bërë me dije se po verifikon procedurat e koncesionit të Aeroportit të Vlorës.
Punëtori me bukë në dorë humb jetën në kantier, fadroma e goditi nga pas për vdekje Një ngjarje e rëndë është shënuar këtë të shtunë në zonën e Palasës, ku një punëtor ka humbur jetën në një kantier ndërtimi, pasi është goditur për vdekje nga një fadromë gjatë orarit të punës. Burime për JOQ bëjnë me dije se viktima me iniciale K.H ndodhej në ambientet e kantierit dhe në momentin e aksidentit kishte bukën në dorë, të cilën e kishte marrë nga mensa. Ai po shkonte drejt fabrikës së betonit, aty ku punonte, kur fadroma dyshohet se ka lëvizur mbrapsht dhe e ka shtypur. Dëshmitarët në vendngjarje pretendojnë se drejtuesi i mjetit të rëndë ishte pa leje drejtimi për këtë kategori mjetesh, megjithëse, sipas tyre, i përdorte shpesh fadromat. Gjithashtu ato ngrejnë shqetësime për mungesë të kushteve të sigurisë në punë në këtë kantier. Ngjarja ka ndodhur në një kantier që dyshohet se i përket kompanisë “Anchori Beton”. Autoritetet kanë nisur hetimet për të zbardhur rrethanat e plota të aksidentit dhe për të përcaktuar përgjegjësitë ligjore.
Një ngjarje e rëndë është shënuar në fshatin Spathohori të Agrinjos, në Greqi, ku një 44-vjeçar me shtetësi shqiptare dyshohet se ka vrarë me armë gjahu një 51-vjeçar, Kostas Alexandris, kryeplak i fshatit dhe baba i një fëmije të mitur. Viktima raportohet se ishte bashkëshorti i gruas me të cilën autori dyshohet të kishte një lidhje intime. Krimi dyshohet të ketë prapaskenë erotike dhe nuk lidhet me detyrën e viktimës. Autori i kishte ngritur pritë 51-vjeçarit dhe e ka qëlluar me çifte në momentin që ai po afrohej me automjetin e tij, duke e lënë të vdekur në vend. Më pas, automjeti i viktimës ka përfunduar në një greminë, ku u gjet nga banorët e zonës. Disa orë pas ngjarjes, autori ka telefonuar policinë dhe ka pranuar autorësinë e krimit, duke shprehur dëshirën për t’u dorëzuar pasi ishte i penduar. Gjatë hetimeve, policia ka sekuestruar edhe armën e krimit, e cila rezulton se mbahej me leje.
Kryeministri Edi Rama ka vijuar edhe këtë herë të distancohet nga përgjegjësia për përmbytjet masive që përfshinë vendin pak ditë më parë, duke gjetur fajtorë të rinj larg institucioneve dhe investimeve shtetërore. Gjatë një takimi me krerët e njësive vendore, Rama la të kuptohet se problemi kryesor nuk janë kanalizimet e amortizuara apo hidrovorët jashtë funksionit apo inceneratorët që djegin paratë e shqiptarëve, por qytetarët që hedhin qese dhe shishe plastike. Sipas kryeministrit, situata u përkeqësua nga “papërgjegjshmëria rrëqethëse” e atyre që e trajtojnë ambientin si landfill, ndërsa milionat e shpenzuara për sistemet e kullimit duket se nuk patën asnjë rol në përballimin e reshjeve. Kanalizimet e copëtuara, hidrovorët që nuk punojnë dhe investimet që ekzistojnë vetëm në letra, u lanë sërish jashtë diskutimit. Rama përmendi edhe ndryshimet klimatike si një tjetër shkak madhor, duke e kompletuar panoramën ku faji ndahet mes motit, vorbullave të ajrit dhe shisheve plastike. “Dua ta nis me faktin që viti nisi me një situatë të vështirë atmosferike që preku një pjesë jo të vogël të komuniteteve dhe që na përballi me sfidën e emergjencës në kushtet që emergjencat poo bëhen sistematike epo marrin një profil tjetër si rezultat i ndryshimeve klimatike. Kemi më shumë thatësirë e zjarre e më shumë befasira në aspektin e atmosferës ku krijohen vorbulla si ajo e ditëve të para të vitit që sipas ekspertëve janë vorbulla që janë ngërçe në qarkullimin e flukseve të ajrit. Situata u ndërlikua nga papërgjegjshmëria rrëqethëse e dikujt prej nesh që e trajtojnë ambientin si landfill dhe hedhin shishe e qese plastike”, tha Rama
Agjentët e Antidrogës së Tiranës kanë arrestuar Ervin Kaftirajn gjatë një operacioni të zhvilluar mëngjesin e kësaj të shtune në një restorant të njohur në periferi të kryeqytetit. Kaftiraj, i njohur për aktivitetin e tij me makina me qira luksoze dhe mjete retro, ishte prej disa muajsh në përgjim nga autoritetet për dyshimet e përfshirjes në trafikun e drogës. Gjatë kontrollit fizik, Kaftiraj iu gjet mbi 1 kilogram kokainë, e cila është sekuestruar si provë materiale. Operacioni vjen pas hetimeve intensive nga sektori i Antidrogës, i cili kishte ndjekur dhe mbikëqyrur aktivitetet e dyshimta të të arrestuarit për të identifikuar rrjetin kriminal. Autoritetet njoftojnë se operacioni është ende në vijim, ndërsa agjentët e Antidrogës po punojnë për të zbuluar personat e tjerë të përfshirë në këtë rrjet të trafikut të drogës dhe për të ndërprerë aktivitetet kriminale që lidhen me të.
Rreth 1.2 milionë persona nga e gjithë bota kanë marrë pjesë në testimin ndërkombëtar të IQ-së, i zhvilluar në dhjetëra shtete të ndryshme, me qëllim matjen e nivelit mesatar të inteligjencës sipas vendeve. Të dhënat tregojnë se në 84.8% të shteteve, rezultati mesatar i IQ-së ka ndryshuar me më pak se 2 pikë nga viti në vit, duke reflektuar një stabilitet relativ të këtij treguesi. Sipas të dhënave të publikuara nga International IQ Test, Shqipëria renditet në vendin e 19-të nga 137 shtete të përfshira në studim, me një mesatare prej 101 pikësh, rreth 4 pikë më shumë krahasuar me vitin e kaluar. Ky rezultat e bën Shqipërinë vendin me IQ-në më të lartë në Ballkan dhe në rajon. Pas Shqipërisë renditet Serbia, në vendin e 32-të me 99.8 pikë, ndërsa Maqedonia e Veriut dhe Mali i Zi renditen përkatësisht në vendin e 45-të dhe 51-të. Bosnje-Hercegovina mbyll listën e rajonit, në vendin e 67-të. Në skenën globale, vendet aziatike dominojnë renditjen e IQ-së. Koreja e Jugut kryeson listën, e ndjekur nga Kina dhe Japonia, të cilat njihen për investimet e mëdha në arsim, teknologji dhe kërkim shkencor, si dhe për ritmin e lartë të zhvillimit ekonomik dhe inovativ. Në Evropë, rezultatet më të larta regjistrohen nga Rusia dhe Spanja. Në fund të renditjes globale ndodhen disa shtete të Afrikës dhe Azisë Juglindore. Ruanda, Timor Leste dhe Somalia shënojnë IQ-në mesatare më të ulët, një gjendje e lidhur ngushtë me faktorë si varfëria, qasja e kufizuar në arsim, konfliktet e gjata dhe mungesa e investimeve në shëndetësi dhe zhvillim social.
Sot shënohen 558 vjet nga vdekja e Heroit tonë Kombëtar, Gjergj Kastrioti Skënderbeu (1405–17 janar 1468), figura më e madhe e historisë shqiptare dhe simbol i lirisë dhe qëndresës. Skënderbeu udhëhoqi shqiptarët për më shumë se 25 vite në luftën kundër pushtimit osman, duke mbrojtur trojet dhe identitetin kombëtar në një nga periudhat më të vështira të historisë. I lindur në një familje fisnike, biri i Gjon Kastriotit dhe Vojsavës, Gjergj Kastrioti u dërgua i ri në oborrin osman, ku u arsimua dhe u përgatit ushtarakisht. Këto njohuri ai i përdori më vonë për të udhëhequr me sukses kryengritjen shqiptare. Pas kthimit në atdhe, ai bashkoi principatat shqiptare dhe u shndërrua në udhëheqësin kryesor të luftës për liri. Sot, pas 558 vitesh, figura e Skënderbeut mbetet një frymëzim për shqiptarët kudo që ndodhen. Ai përfaqëson guximin, bashkimin dhe dashurinë për atdheun, ndërsa vepra e tij vazhdon të kujtojë se liria dhe dinjiteti mbrohen me sakrificë dhe vendosmëri. Sot, 558 vjet pas vdekjes së Heroit tonë Kombëtar, a do të ndihej krenar Skënderbeu për Shqipërinë e sotme, ku korrupsioni, papunësia dhe problemet sociale sfidojnë çdo ditë shqiptarët?
Gjykata e Shkallës së Parë e Juridiksionit të Përgjithshëm Durrës vendosi masën e sigurisë “arrest në burg” për 26-vjeçarin Arbër Xhaxhaj, i cili shkaktoi aksidentin tragjik te ura e Dajlanit, ku humbi jetën 18-vjeçarja Vikena Greku. Xhaxhaj u arrestua natën e 15 janarit, pas testit të alkoolit që tregoi se ishte i dehur gjatë drejtimit të mjetit. Ai akuzohet për kryerjen e veprave penale “Drejtimi i mjetit në mënyrë të parregullt” dhe “Shkelja e rregullave të qarkullimit rrugor”. Sipas policisë, 26-vjeçari ka humbur kontrollin mbi automjetin, i cili u përplas me barrierat anësore të urës dhe ra nga ajo, duke shkaktuar vdekjen e të miturës. I riu ka qenë me shpejtësi mbi 130 km në orë. Nga aksidenti kanë mbetur të plagosur dhe dy këmbësorë. Ngjarja ka tronditur komunitetin e Durrësit dhe rrit sërish shqetësimet për sigurinë rrugore dhe respektimin e rregullave të qarkullimit.
Login
