Top Channel zbardh të tjera detaje nga dosja hetimore për vrasjen e turistit portugez në Ksamil, ku si autor akuzohet Sokrat Vata. Ky i fundit pas krimit i ka kërkuar DJ të klubit që ta çonte në spital, duke mos i treguar se çfarë kishte ndodhur. Në dosjen e siguruar nga gazetarja e Top Channel Anila Hoxha, ai thotë se e mori në makinë për ta çuar në spital, por pas disa minutash i ka kërkuar që të ndalojë makinë, nga ku ka zbritur dhe më pas e ka parë që të hedhë diçka me forcë. “Rreth orës 05:00 të datës 18.08.2026 pashë rojet e sigurisë që iknin me vrap në drejtim të hyrjes së klabit. Në vazhdim kur isha te pjesa e restorantit kanë ardhur një grup kolegësh pune të panikosur të cilët më thanë ‘merre Sokratin dhe çoje në spital se ti ke makinë këtu afër’. Në drejtimin tim ka ardhur Sokrat Vata i cili ishte i gjakosur kokë e këmbë dhe mbante dorën poshtë bluzës në pjesën e barkut dhe më ka thënë disa herë “ku e ke makinën, më ço në spital, nxito o…’. Unë njoftova menaxherin në lidhje me situatën dhe më pas ika me vrap për të marrë makinën te parkimi dhe kur dola jashtë pashë një grup turistësh të cilët po i jepnin ndihmë një personi të shtrirë në tokë. Kam marrë makinën dhe në pjesën e sipërme të lokalit ka dalë Sokrati i cili kishte hipur në pjesën e pasme të makinës dhe u nisa menjëherë në drejtim të qendrës shëndetësore të Ksamilit, ku Sokrati gjatë rrugës më tha ‘ik vetëm drejt’ dhe pas dy-tre minutash kur shkuan në një rrugë me kalldrëm, Sokrati më ka thënë ‘ndalo këtu’ dhe ka ikur zbathur. Disa metra pak larg makinës vura re që Sokrati hodhi diçka me forcë”, ka treguar ai para hetuesve./TCH #voxnews #media #news @voxnews.al

2133 views

Teksa beteja kundër flakëve vijon, një ushtar i Forcave të Armatosura ka mbetur i lënduar. 28-vjeçari është rrëzuar nga një shkëmb gjatë operacionit për shuarjen e zjarreve në Mirditë. Për pasojë, ka marrë plagë në kokë. Mësohet se ai po i nënshtrohet ekzaminimeve mjekësore, në spitalin e Traumës në kryeqytet. #voxnews #media #news @voxnews.al

2782 views

Një aksident i rëndë rrugor ndodhi në orët e para të mëngjesit të së premtes, ku babai i tre fëmijëve të mitur, Vasil Hasani, 41 vjeç, u përplas nga një makinë në aksin Shkozet-Shijak, në Rrashbull, ndërsa lëvizte me biçikletë. 41-vjeçari, pasi është përplasur me makinë rreth orës 02:00, është lënë në rrugë pa iu dhënë ndihma e parë, teksa shoferi është larguar nga vendi i ngjarjes. I riu është gjetur rreth orës 06:00 të mëngjesit nga një kalimtar, i cili ka njoftuar autoritetet, por ishte tepër vonë, pasi babai i tre fëmijëve kishte ndërruar jetë. Policia ende nuk e ka identifikuar autorin, i cili është larguar pa i dhënë ndihmën e parë 41-vjeçarit, i cili qëndroi për më shumë se katër orë në rrugë. Hasani ka qenë duke u kthyer nga puna në kohën kur është aksidentuar, ndërsa familja i bën thirrje autoriteteve që të zbardhin rastin dhe të vënë para drejtësisë shoferin e aksidentit. #voxnews #media #news @voxnews.al

7789 views

Në Portin e Durrësit u finalizua sot operacioni policor “Anchor”, kundër trafikimit ndërkombëtar të kanabisit. Policia sekuestroi rreth 80 kilogramë kanabis të llojit “Gelato”, me përmbajtje të lartë THC. Lënda narkotike, e ndarë në 127 pako, dyshohet se ishte siguruar në Ontario të Kanadasë dhe transportuar drejt Shqipërisë. Sipas hetimeve, droga ishte fshehur në një hapësirë të modifikuar të një automjeti të porositur në Kanada. Autoritetet vlerësojnë se vlera e saj në treg arrin rreth 1 milion euro. Gjatë operacionit u sekuestruan gjithashtu tre automjete, pesë telefona celularë dhe rreth 11 mijë euro cash. Në pranga kanë rënë tre shtetas kosovarë, Taulant Duraku, 32 vjeç, Luan Gashi, 26 vjeç dhe Besfort Jaka, 40 vjeç. Dy persona të tjerë, një nga Kukësi dhe një banues në Ontario të Kanadasë, janë shpallur në kërkim, ndërsa hetimet vijojnë për dokumentimin e plotë të rolit të secilit të dyshuar. #voxnews #media #news

3019 views

Gjashtë muaj investigim i ka kushtuar tabloidit britanik Daily Mail për të zbuluar qindra shtëpi bari në Angli, ku të përfshirë janë të rinj shqiptarë. Në një artikull të gjatë, të publikuar këtë të shtunë, Daily Mail zbulon hap pas hapi të gjithë këtë ‘rrugëtim’, që nga mënyra sesi futen ilegalisht në Mbretërinë e Bashkuar, madje edhe pasi janë dënuar dhe deportuar, si marrin me qira shtëpi për banim për t’i kthyer në fabrikë droge, si punësohen, si reklamohet malli… Por ajo që tërheq edhe më tepër vëmendjen dhe duket si një ide ‘gjeniale’, por e paligjshme, është kompania që ka krijuar një shqiptar në Angli. Në dukje është një kompani pastrimi shtëpish… por në fakt ajo që kjo kompani ofron është pastrimi i shtëpive të barit, për të zhdukur çdo gjurmë ADN që mund të ketë mbetur aty nga punonjësit, në mënyrë që policia të mos i zbulojë. “Përpara se t’ia dorëzojnë çelësat agjentit të qiradhënies, organizatorët përpiqen ta rikthejnë pronën në gjendjen e saj origjinale, duke hequr çdo shenjë të dukshme të prodhimit të kanabisit dhe prova të mundshme mjeko-ligjore, siç janë gjurmët e ADN-së ose gjurmët e gishtërinjve që mund t’i identifikojnë më vonë. Është për të përmbushur këtë kërkesë që ka lindur një industri e tërë firmash për “pastrimin e fabrikave të kanabisit”. Njëra prej tyre, e quajtur “Punë Pastrimi Shtëpish” me logon e “Union Jack” dhe flamurin shqiptar dhe sloganin “ne kujdesemi për çdo detaj”, ka postuar pamje në mediat sociale të punëtorëve që pastrojnë dhjetëra shtëpi me kanabis në të gjithë vendin, duke përfshirë Maidenhead, Manchester, Leeds, Bedford, Londër, Doncaster dhe Leicester. I kontaktuar nga një gazetar i fshehtë i Daily Mail, pronari qeshi ndërsa përshkroi se si e ka drejtuar biznesin për tre vjet, pasi i lindi ideja kur drejtonte fabrikën e tij të kanabisit në Leicester. Duke dhënë emrin e tij si Tanushi, ai premtoi se ekipi i tij mund të pastronte dy shtëpi brenda pesë ditësh për t’u siguruar që të gjitha ADN-të dhe gjurmët e gishtërinjve do të fshiheshin ‘pa problem’ nga policia ose pronarët. Ai kërkoi të shihte shtëpinë përpara se të jepte aprovimin. Kur Tanushi u kontaktua më vonë nga Daily Mail për koment, ai mohoi të kishte bërë diçka të paligjshme. Ai tha se e bëri sepse ‘nuk më jepni asnjë shans tjetër për të punuar’ dhe kjo ishte një ‘mënyrë e lehtë’ për të fituar para për familjen e tij. ‘Më telefonojnë, shkoj, pastroj, lyej’, tha ai. Ai tha se nuk e kujtonte telefonatën me gazetarin e fshehtë, ku përshkroi se më parë drejtonte një fabrikë kanabisi dhe e mohoi këtë. Një faqe tjetër interneti, Repairs And Cleaning UK, e cila përfshin emoji të bimëve të kanabisit dhe krenohet me ‘asnjë punë shumë e madhe ose shumë e vogël’, ofron një listë të gjerë çmimesh të shkallëzuar sipas madhësisë së pronës. Kostot fillojnë nga 3,500 paund për një shtëpi me tre dhoma gjumi, duke u rritur në 4,500 paund për një me pesë dhoma gjumi dhe 6,500 paund për një pub. Shërbimi përfshin lyerjen dhe dekorimin, pastrimin e tapeteve dhe largimin e mbeturinave”, shkruan Daily Mail. #voxnews #media #news

11.3K views

Në pyjet e Greqisë pati kohët e fundit disa zjarre të mëdha. Tani autoritetet po marrin masa të rrepta kundër atyre që shkaktojnë zjarre, qoftë nga pakujdesia apo me qëllim. Javën e kaluar në ishullin grek të Kretës shpërtheu një zjarr, shkaku i cili të cilit sipas zjarrfikësve, ishte se një turist izraelit kishte bërë skarë me qymyr druri pranë pyllit. Sipas mediave turisti u tha autoriteteve se nuk e dinte që kur ka erë të fortë dhe mot të thatë skara në ambiente të hapura ishte e ndaluar. Rasti në Kretë nuk është i vetmi. Që nga fillimi i vitit në Greqi janë arrestuar 308 persona për shkak të zjarreve të shkaktuara nga pakujdesia ose me dashje. Sipas zëdhënësit të zjarrfikësve, Giorgos Artopoios, bëhet fjalë për 272 raste pakujdesie dhe 36 raste zjarrvënieje të qëllimshme. Sipas organeve të Mbrojtjes Civile për shkak të thatësirës dhe erërave të forta, rreziku i zjarreve është rritur sërish. Në të njëjtën kohë temperaturat po ngjiten në nivele shumë të larta: ditët e ardhshme në pjesën më të madhe të Greqisë priten temperatura mbi 40 gradë Celsius. Vala ekstreme e të nxehtit pritet të zgjasë deri mesin e javës së ardhshme. Këto kushte bëjnë që zjarret të përhapen me shpejtësi. Sistem sinjalizimi për zjarret në monumentet historike Për të mbrojtur monumentet dhe vendet e saj historike nga zjarret në pyje, Greqia po i pajis ato me një sistem modern zbulimi dhe sinjalizimi të zjarreve. Sipas Ministrisë së Kulturës mekanizmi i ri është testuar me sukses në kushte reale në rrëzë të Akropolit të Mikenës, në gadishullin e Peloponezit. Sistemi do të instalohet në 22 qendra historike. Pajisjet janë të pajisura me kamera optike dhe kamera termike, disa prej tyre edhe me pamje panoramike 360 gradë. Kamerat mund të lëvizin horizontalisht dhe vertikalisht dhe mundësojnë mbikëqyrjen e zonave të dyshimta. Në vende të përzgjedhura do të vendosen gjithashtu pompa lëvizëse për shuarjen e zjarreve, që do të mundësojnë ndërhyrjen e parë në rast shpërthimi zjarri. Deri në fund të gushtit pritet të vihen në funksion gjashtë sisteme të reja, ndër të tjera në Akropolin e Athinës, në Pallatin e Nestorit dhe në manastirin Hosios Lukas. Tetë sisteme të tjera do të pasojnë në shtator. Projekti është pjesë e programit grek të Mbrojtjes Civile "Aigis” dhe financohet nga Fondi i Rimëkëmbjes dhe i Rezistencës i Bashkimit Evropian. Qëllimi është që në vendet me vlerë të veçantë kulturore dhe natyrore zjarret të zbulohen sa më shpejt që të jetë e mundur, duke shkurtuar kështu kohën e reagimit të forcave të emergjencës. #voxnews #media #news

1788 views

Top Channel ka zbardhur dosjen e prokurorisë së Sarandës, lidhur me krimin e rëndë ndodhur pak ditë më parë në Ksamil ku u vra me thikë turisti 20-vjeçar Luis Miguel Varela Mendes. Gazetarja e Top Channel Anila Hoxha ka siguruar dosjen, në të cilën zbulohet ndër të tjera edhe gjithë dinamika e plotë e sherrit që përfundoi në vrasje, me autor të akuzuar Sokrat Vatën. Ngjarja ndodhi rreth orës 05:15 të 18 gushtit, kur mes grupit të turistëve dhe disa personave të tjerë nisi një konflikt fizik. Nga pamjet e kamerave rezulton se përleshja u përshkallëzua me goditje me grushte dhe ndjekje mes personave të përfshirë, duke vijuar edhe në zonën e plazhit. Gjatë përleshjes, 20-vjeçari Mendes u godit fillimisht me grushte nga disa persona. Në vijim, Sokrat Lipan alias Sokrat Vata u afrua pranë të riut dhe e goditi disa herë me thikë në trup. Edhe David Heurtevent dyshohet se e ka goditur me grushte viktimën gjatë konfliktit. Por çfarë kanë kapur kamerat e sigurisë: Në orën 05:14:24 të datës 18.08.2026 vërehet se nga ambientet e lokalit “Principotes” vërehet se dalin disa shtetas dhe qëndrojnë tek rëra e ambienteve të jashtme të subjektit “Paradise”, ku ndër ta janë të identifikuar shtetasit Ibrahim Lemoie, Sudae Akmahmat, Florian Cetina dhe Luis Mendes, i veshur me një bluzë të bardhë me një shkrim me ngjyrë të zezë nga mbrapa. Në orën 05:15:22 të datës 18.08.2026, nga ana e parkimit në anën jugore të Principotes vërejmë që afrohen dy shtetas, konkretisht Davit Heuertvent përpara dhe Sokrat Lipan (Vata), i veshur me një këmishë të bardhë, në vendin ku ndodheshin shtetasit e huaj. Në orën 05:16:39 shtetasi Sokrat Lipan (Vata) vërehet se shtyhet me një person të veshur me bluzë me ngjyrë të bardhë dhe Sokrati vërehet se largohet prej tij dhe shkon në drejtim të shezlloneve. Në orën 05:16:47 shtetasi Sokrat Lipan ndjek një nga personat, i cili është i veshur me të bardha, dhe Sokrati e ndjek nga mbrapa në drejtim të parkimit. Në orën 05:16:54 shtetasi Sokrat Lipan (Vata) vërehet se vjen me vrap në drejtim të shtetasit Ibrahim Lemoie, i cili përplaset në shezllone dhe bie në tokë dhe Sokrati e godet në drejtim të tij. Në orën 05:17:14, në këto momente afrohet shtetasi Luis Mendes dhe shtyn me trup shtetasin Sokrat Lipan, i cili bie në tokë. Shtetasi Sokrat Lipan (Vata) ngrihet nga toka dhe i afrohet shtetasit Luis Mendes dhe fillon dhe godet në drejtim të tij. Në orën 05:17:20 shtetasi Davit Heuertvent, i veshur me tuta të shkurtra dhe një si në këmishë me ngjyrë të errët, së bashku me shtetasin Sokrat Lipan (Vata), godasin shtetasin Luis Mendes dhe gjatë kësaj kohe vjen shtetasi Sudae Akhmat për të ndihmuar shokun e tij, shtetasin Luis Mendes, dhe godet shtetasin Sokrat Lipan. Në orën 05:17:35-05:17:46 shtetasi Serxhi Selimi godet shtetasin francez Ibrahim Lemoie me grushta, gjatë kësaj kohe shtetasi Luis Mendes, për t’u larguar nga goditjet që po merrte nga Sokrat Lipan dhe David Heurtevent, largohet me nxitim duke u futur brenda në det. Në orën 05:17:53 shtetasi Luis Mendes afrohet nga ana jugore e plazhit në vendin ku ndodhen kamarieret dhe goditet nga shtetasi Serxhi Ademi me grushta dhe e ata e shtyjnë në det. Në orën 05:18:04 shtetasi Luis Mendes del nga uji dhe ecën në drejtim të shezlloneve të plazhit Paradise, ku vërehet se bluzën e bardhë e ka të gjakosur. Në orën 05:18:24 shtetasi Davit Heuertvent vërehet se largohet në drejtim të ambienteve të brendshme të Principotes, i cili dallohet që është i gjakosur tek pjesa e përparme e teshave dhe po fshihet. Në orën 05:20:28 largohet shtetasi Sokrat Lipan, i cili bluzën e bardhë e ka të gjakosur dhe mbas tij është kamarieri Ildi Cekani, i cili e shoqëron nga mbrapa në drejtim të lokalit të “Principotes”. #voxnews #media #news

25.7K views

Nëse duhet patjetër të ndërtohet pranë shtëpisë time, më mirë një central bërthamor se një qendër të dhënash. Gjithnjë e më shumë njerëz po mendojnë në këtë mënyrë. Ndoshta ishte e pashmangshme: kemi hyrë në fazën në të cilën Inteligjenca Artificiale dhe strukturat që e bëjnë atë të funksionojë përballen me pengesën më të vështirë: kundërshtimin popullor. Kjo veçanërisht e vërtetë në Shtetet e Bashkuara, ku IA tani është çështja qendrore në shoqëri, komunitetin shkencor, ekonominë, në Wall Street dhe në fushatat për zgjedhjet e mesit të mandatit nëntorin e ardhshëm. Por lëvizjet opozitare po rriten edhe në Evropë. Ankthi për një "të ardhme artificiale" të pakuptueshme po shndërrohet në mobilizim: qendrat e të dhënave janë prania konkrete - jo dixhitale, por më në fund fizike - që mund të kundërshtohet. Këto janë ndërtesa që strehojnë sasi të mëdha serverash të lidhur në rrjete për të përpunuar dhe ruajtur informacionin. Ato janë gjithnjë e më të mëdha: Meta po planifikon një në Luiziana, që kushton dhjetë miliardë dollarë, i cili do të mbulojë një sipërfaqe të barabartë me 70 fusha futbolli. Përveçse paralelepipedë të zymtë, qendrat e të dhënave nuk pëlqehen nga komunitetet lokale sepse kërkojnë sasi të mëdha energjie për të funksionuar dhe konsumojnë miliona litra ujë për të parandaluar mbinxehjen e serverave. Qytetarët e prekur nga këto projekte po organizohen për t'i ndaluar ato: një sondazh i kohëve të fundit i Gallup zbuloi se 71% e amerikanëve kundërshtojnë qendrat e të dhënave të inteligjencës artificiale. Gjatë 12 muajve të fundit, ky kundërshtim popullor në Shtetet e Bashkuara ka rezultuar në anulimin ose pezullimin e të paktën 100 miliardë dollarëve në investime. Inteligjenca artificiale është një çështje kyçe në 40% të fushatave zgjedhore të SHBA-së në nëntor. Në Francë, komuniteti i Wissous, në jug të Parisit, u mobilizua kundër një qendre të të dhënave të Amazon, dhe protestat në periferitë e Marsejës janë në rritje. Në Irlandë, demonstratat po synojnë qendrat e të dhënave që konsumojnë më shumë se 20% të furnizimeve me energji elektrike dhe rrisin faturat e shërbimeve. Pas refuzimit të këtyre mega-kutive qëndron ankthi për Inteligjencën Artificiale në përgjithësi, për vendet e punës që ekziston frika se do të shkatërrojë, për ndryshimin shoqëror që po vjen dhe për vështirësinë e kontrollit të rreziqeve të saj. Në fund të fundit, po ndodh e njëjta gjë si në revolucionet e tjera në të kaluarën: një luftë midis teknologjisë transformuese dhe atyre që kanë frikë se do të transformohen. (Corriere della Sera) #voxnews #media #news

1524 views

Prokuroria e Qarkut në Split ka ngritur aktakuzë për spiunazh ndaj një ish-piloti ushtarak të Forcave Ajrore të Kroacisë dhe partneres së tij, një shtetase serbe nga Kosova. Të dy ishin arrestuar në gusht të vitit të kaluar nën dyshimin për spiunazh, ndërsa me ngritjen e aktakuzës hetimet ndaj tyre kanë përfunduar dhe çështja kalon në fazën tjetër të procedurës penale. Sipas Prokurorisë kroate, piloti J.I., gjatë kohës sa shërbente në Forcat e Armatosura të Kroacisë, dyshohet se nga shkurti deri në dhjetor të vitit 2022 i ka dhënë vazhdimisht partneres së tij, A.M., informacione të klasifikuara që i kishte siguruar ose në të cilat kishte qasje për shkak të detyrës. Prokuroria pretendon se ai ishte në dijeni se partnerja po i mblidhte informacionet për një shtet të huaj. Ajo akuzohet se më pas të dhënat e siguruara ua ka përcjellë disa adresave jashtë Kroacisë. Një pjesë e rëndësishme e dyshimeve lidhet me Kosovën dhe periudhën kur piloti kroat kishte shërbyer në kuadër të KFOR-it. Ai dyshohet se partneres së tij i kishte dhënë informacione për lëvizjet e trupave të KFOR-it, situatën e sigurisë dhe zhvillimet në veri të Kosovës. Sipas raportimeve të mediave kroate, këto informacione më pas dyshohet se i janë përcjellë Listës Serbe. Në mesin e të dhënave të zbuluara dyshohet se kishte edhe informacione për lëvizjet e serbëve në veri të Kosovës nga fundi i vitit 2022, periudhë e karakterizuar nga tensione të shtuara në atë pjesë të vendit. Prokuroria në Split i ka kërkuar Gjykatës vazhdimin e masave ndaj të akuzuarës për shkak të rrezikut të arratisjes. Ish-piloti, ndërkaq, ishte liruar nga paraburgimi në fund të tetorit të vitit të kaluar, me masa paraprake dhe ndalim kontakti me njërin prej dëshmitarëve. Pas nisjes së rastit ndaj tij, ai ishte larguar edhe nga shërbimi ushtarak. #voxnews #media #news @voxnews.al

6633 views

Deputeti i Aleancës, Ramush Haradinaj ka kritikuar kryeministrin në detyrë, Albin Kurti, duke e akuzuar se po i shtyn qëllimisht proceset për formimin e institucioneve të reja. Ai ka propozuar ish-presidentin Hashim Thaçi për një mandat të ri si president i Kosovës. Haradinaj e ka cilësuar si “nder” për këtë legjislaturë që mandati i presidentit t’i jepet Thaçit. Gjykata Speciale në Hagë pritet të shpallë më 16 shtator aktgjykimin në rastin ndaj Hashim Thaçit, Kadri Veselit, Jakup Krasniqit dhe Rexhep Selimit. “Është në nderin e kësaj legjislature, por edhe çdo legjislature, që t’ia vazhdojmë mandatin presidentit Thaçi. Atij i është marrë mandati nga një ndërhyrje ligjore dhe me kthimin e tij është nderi ynë si komb, jo për shkak të ndonjë afërsie politike, por për shkak të një kundërpërgjigjeje të armiqve të Kosovës që kurrë nuk flenë, që t’ia vazhdojmë mandatin. Ka edhe ‘x’ opsione të tjera, mos me mbajtë peng Kosovën”, ka deklaruar Haradinaj. Haradinaj ka kritikuar edhe Lëvizjen Vetëvendosje për mos thirrjen e seancës konstituive të Kuvendit. Duke komentuar incidentin ku deputetja e Aleancës, Time Kadrijaj, hodhi vezë në drejtim të Kurtit, Haradinaj tha se ky veprim erdhi si pasojë e mospropozimit të kandidatit për kryetar të Kuvendit. “Ai e ka instaluar veten mbi Kushtetutën, mbi institucionet, mbi çdo obligim kushtetues e ligjor. Mos thirrja e seancës, me arsyetimin se nëse s’ka marrëveshje ndodh dhunë në seancë, është vetëm alibi. Dhuna ka ndodhur, gjuajtja me vezë për Kurtin, jo pse e ka thirrë seancën, por pse nuk po kandidon kryetarin e Kuvendit, që është detyrë e tij”, u shpreh Ramush Haradinaj para mediave. #voxnews #media #news

3933 views

Peshkatarët bëhen heronj, shpëtojnë qenin e bllokuar në mes të detit në Meksikë @voxnewsalbania

7316 views

Principote Mykonos në Greqi ka reaguar pas vrasjes së 20-vjeçarit portugez Luis Miguel Varela Mendes nga 29-vjeçari shqiptar Sokrat Vata në ‘Principotes’ Ksamil. Përmes një reagimi, ‘Principote’ Mykonos ka sqaruar se nuk kanë asnjë marrëdhënie biznesi apo ndonjë lloj tjetër marrëdhënie me beach-barin në Shqipëri ku ndodhi incidenti. Siç thuhet në një deklaratë, kompleksi në Ksamil po përdor në mënyrë të paligjshme emrin e markës së tij ‘Principote’, ndërsa ndaj tij tashmë kanë nisur edhe procedurat ligjore. "Në dritën e një incidenti tragjik që ndodhi së fundmi në qytetin shqiptar të Ksamilit dhe në një dyqan që po përdor ilegalisht emrin tonë të biznesit, sqarojmë, për të shmangur konfuzionin, se PRINCIPOTE MYKONOS nuk ka absolutisht asnjë marrëdhënie biznesi apo tjetër me lokalin e mësipërm shqiptar, i cili po përdor ilegalisht emrin tonë dhe kundër të cilit kemi ndërmarrë veprime ligjore, me qëllim që ta ndalojmë atë të përfshihet në konkurrencë të padrejtë në dëmin tonë, duke ‘korrur’ ilegalisht reputacionin ndërkombëtar që PRINCIPOTE MYKONOS ka fituar gjatë shumë viteve të ofrimit të shërbimeve të nivelit më të lartë", thuhet në reagimin e ‘Principote’ Mykonos. Reagimi vjen ndërsa autoritetet shqiptare vazhdojnë hetimet e tyre për sherrin vdekjeprurës në Ksamil, në të cilin 20-vjeçari portugez humbi jetën. Për më shumë klikoni ne STORY👆🏻 #voxnews #media #news @voxnews.al

3342 views

Tërmet i fuqishëm godet Perunë, dy të plagosur dhe dhjetëra ndërtesa të dëmtuara @voxnewsalbania

9604 views

Turqia i ka kërkuar Interpolit të lëshojë një njoftim të kuq për kryeministrin izraelit Benjamin Netanyahu, në kuadër të një procesi gjyqësor në vazhdim lidhur me një sulm ndaj aktivistëve në bordin e flotiljes "Global Sumud", e cila transportonte ndihma humanitare për në Gaza, tha ministri turk i Drejtësisë, Akin Gurlek. Në një deklaratë të publikuar në platformën turke të rrjeteve sociale NSosyal, Gurlek tha se procedurat gjyqësore po vijojnë në Gjykatën e 11-të të Rënde Penale të Stambollit ndaj 35 të pandehurve, mes tyre Netanyahu dhe Afek Moskovitch, lidhur me incidentin në ujërat ndërkombëtare. Ai tha se urdhër-arrestet e lëshuara për Netanyahun dhe Moskovitch më 14 korrik 2026, me akuzën për “gjenocid”, e kanë shtyrë Ministrinë e Drejtësisë t’i kërkojë Ministrisë së Brendshme që të kërkojë nga Interpoli njoftime të kuqe për dy të dyshuarit. Dokumentet përkatëse i janë përcjellë gjithashtu Ministrisë së Jashtme, tha Gurlek. Sipas tij, Netanyahu dhe Moskovitch po ndiqen penalisht për veprime të dyshuara që lidhen me “ndërhyrjen e armatosur ndaj civilëve që transportonin ndihma humanitare për në Gaza në ujërat ndërkombëtare dhe ndalimin e aktivistëve”. Akuzat përfshijnë “krime kundër njerëzimit”, “gjenocid”, “privim të agravuar të lirisë”, “plagosje të qëllimshme”, “torturë”, “dëmtim të pronës”, “grabitje të agravuar” dhe “rrëmbim të mjeteve të transportit”, shtoi ai. “Ne nuk do të lejojmë që krimet e kryera në Gaza të mbulohen apo që përgjegjësit të mbrohen nga një mburojë pandëshkueshmërie”, tha Gurlek. “Do të përdorim me vendosmëri të gjitha mjetet që na ofrohen nga ligji kombëtar dhe ndërkombëtar”, shtoi ai. #voxnews #media #news

6651 views

Një debat i fortë politik ka shpërthyer në Slloveni, ku presidentja Nataša Pirc Musar po përballet me pikëpyetje mbi lidhjet e rrethit të saj të afërt me persona me lidhje të dyshuara me Rusinë. Çështja mori përmasa pas një aksidenti automobilistik, ku në automjetin me të cilin udhëtonte presidentja ndodhej edhe një mike ruse. Mediat sllovene kanë raportuar për lidhjet e saj me një ish-zyrtar të inteligjencës sllovene, i cili u largua drejt Rusisë në vitet ’90. Zhvillimet kanë nxitur reagim në parlamentin slloven. Komisioni parlamentar për sigurinë ka kërkuar informacion nga shërbimet e inteligjencës për të vlerësuar nëse ekziston ndonjë ndikim apo rrezik i mundshëm rus në rrethin e presidentes. Në qendër të vëmendjes janë vendosur edhe udhëtimet e Pirc Musar në Rusi. Sipas raportimeve mediatike, ajo ka vizituar disa herë Moskën dhe Shën Petersburgun, përfshirë një udhëtim pak muaj para nisjes së pushtimit të plotë rus të Ukrainës në shkurt 2022. Partia opozitare SDS ka kërkuar masa më të forta, përfshirë shqyrtimin e aksesit të presidentes në informacionet e klasifikuara të inteligjencës, deri në përfundimin e verifikimeve të sigurisë. Nga ana tjetër, shërbimi slloven i inteligjencës dhe sigurisë, SOVA, ka deklaruar se një verifikim i mëparshëm i personit në fjalë nuk kishte evidentuar rrethana që përbënin kërcënim për sigurinë. #voxnews #media #news @voxnews.al

3982 views

Petrit Ndoci, i dënuar për vjedhje me dhunë dhe armëmbajtje pa leje, është shpallur në kërkim pasi nuk është kthyer në burgun e Reçit pas përfundimit të lejes. Siç raporton gazetarja e Top Channel Dorjana Bezat, Ndoci duhej të kthehej sot në orën 12:30 në institucionin e vuajtjes së dënimit, por nuk është paraqitur. Sipas informacioneve paraprake të siguruara nga korrespondenti i Top Channel, Klodian Zhivani, vëllai i tij ka deklaruar se Petrit Ndoci kishte lënë një letër për familjarët, ku shkruante: “Po largohem, ju dua shumë.” Ndoci po vuante dënimin për veprat penale “vjedhje me dhunë” dhe “armëmbajtje pa leje”. Mësohet se atij i kishin mbetur rreth dy vite burgim për të përfunduar dënimin. #voxnews #media #news @voxnews.al

12.5K views

Gjermania po përballet gjithnjë e më hapur me një luftë të fshehtë ruse. Por në Berlin dhe në kryeqytetet e tjera europiane ende hezitohet të thuhet ajo që po ndodh në të vërtetë: Moska nuk po zhvillon luftë vetëm kundër Ukrainës, por edhe kundër Europës. Gjermania gjithnjë e më shumë po vihet në shënjestër nga shërbimet sekrete ruse. Rasti më i ri: sipas një raporti mediatik, autoritetet gjermane të sigurisë kanë gjetur një depo të fshehtë armësh në afërsi të Berlinit. Zyra Federale për Mbrojtjen e Kushtetutës, siç quhet në Gjermani shërbimi i brendshëm sekret, supozon se depoja është ngritur me urdhër të shërbimeve sekrete ruse, njoftuan të premten mediumet gjermane Norddeutscher Rundfunk, Westdeutscher Rundfunk dhe "Süddeutsche Zeitung“. Në depon, në një pyll në landin e Brandenburgut, ishin ruajtur dy armë zjarri të lehta. Sipas raportit, Prokuroria Federale e Gjermanisë tashmë po kryen hetime me dyshimin për përgatitjen e një vepre të rëndë dhune që rrezikon shtetin. Një i dyshuar është arrestuar disa kohë më parë në Rumani. Sipas raportit, ai mund të ketë ngritur depon e armëve. Mediat raportojnë se zyrtarët kishin marrë një informacion për vendstrehimin dhe e kishin gjetur atë që në fund të verës së kaluar. Autoritetet gjermane të sigurisë tashmë janë të bindura se armët u fshehën për agjentë, të cilët me urdhër të Rusisë duhej të kryenin vrasje politike. Sipas mediave gjermane, drejtori i shërbimit të brendshëm sekret të Gjermanisë, Sinan Selen, ka paralajmëruar prej muajsh se shërbimet sekrete të Rusisë kanë ashpërsuar linjën e tyre dhe po planifikojnë gjithashtu atentate edhe në Gjermani. Ky nuk është rasti i vetëm. Këtë javë një gjykatë në Stuttgart e dënoi një ukrainas me një vit e tre muaj burg për shkak të veprimtarisë agjenturore në shërbim të Rusisë. Ukrainasi, i cili banon në Zvicër, akuzohej se kishte planifikuar akte sabotazhi dhe atentate në Gjermani. Me urdhër të shërbimit të fshehtë rus, ai kishte hulumtuar rrugët e transportit për pako me bomba. Dy persona të tjerë u liruan nga akuzat. Të tre personat u arrestuan në maj të vitit të kaluar në Gjermani dhe në Zvicër. Keqbërësit si ukrainasi i dënuar në mediat gjermane quhen “Wegwerfagenten”: agjentë për përdorim të njëhershëm, të cilët pastaj flaken tutje. Ky nocion, sipas gazetës zvicerane “Tages-Anzeiger”, nisi të përdorej nga viti 2022. “Që nga sulmi ndaj Ukrainës, shërbimet e fshehta të Rusisë kanë intensifikuar aktivitetet e tyre të fshehta në Evropë, duke zhvilluar me këtë rast edhe metoda krejtësisht të reja. Për forma të thjeshta të spiunazhit, sabotimit, vandalizmit, zjarrvënies, dezinformimit apo propagandës, ato përdorin gjithnjë e më shpesh të rinj që jetojnë në vendngjarje. Rekrutimi bëhet gjithandej dhe nëpërmjet rrjeteve sociale”. Në fillim të këtij muaji aeroporti në Leipzig për pak i shpëtoi një katastrofe. Sipas hetuesve gjermanë, një dron i mbushur me lëndë shpërthyese kishte për qëllim hedhjen në erë të një aeroplani ukrainas. Autoritetet gjermane dyshojnë se pas kësaj vepre qëndrojnë shërbimet sekrete ruse. Policia zbuloi se droni ishte i pajisur me lëndë shpërthyese ushtarake. „E gjithë kjo nuk tregon për taktika amatore. Po flasim për një situatë kërcënimi profesional dhe hibrid me të cilën duhet të vazhdojmë të përballemi”, tha ministri i Brendshëm gjerman Alexander Dobrindt. As Dobrindt, as kancelari Friedrich Merz nuk e akuzuan drejtpërdrejt Rusinë për sulmin e dështuar me dron në Leipzig. Merz ka tri javë që nuk është shfaqur në publik, pasi ka njoftuar se do të shkojë për pushime. Nuk dihet se ku është duke pushuar shefi i qeverisë gjermane, por në Gjermani disa media kanë filluar të pyesin me ton kritik se si është e mundur që kancelari të mos shfaqet publikisht për tri javë përballë zhvillimeve që prekin edhe çështje të sigurisë. Aeroporti i Leipzigut është një pikë kyçe logjistike për Ukrainën dhe NATO-n. #voxnews #media #news

2081 views

Parlamenti i Kenias ka nisur një hetim mbi Mogo Auto, kompaninë motër të Kredo Albania, për mashtrim, kredi grabitqare dhe praktika kriminale të huadhënies. Hetimi nisi pas një peticioni të Shoqatës së Motorëve Taksi. Shoqata i ka kërkuar Parlamentit të investigojë ato që i përshkruan si praktika të padrejta kreditimi dhe financimi nga ana e Mogo Auto Limited. Peticioni pretendon se disa huamarrës janë përballur me norma të larta interesi dhe tarifa shtesë, mosbërje publike në mënyrë adekuate të kushteve të kredisë, si dhe vështirësi në marrjen e dokumenteve të pronësisë së mjetit edhe pasi kanë shlyer shuma të konsiderueshme. Ai gjithashtu ngre pikëpyetje mbi sekuestrimin e motorëve pas mospagimit të kësteve, përdorimin e pajisjeve gjurmuese (GPS), pretendimet për siguracionet dhe menaxhimin e të dhënave personale të klientëve. Mogo dhe Kredo zotërohen nga grupi Eleving, ku i pari shërben si krahu i financimit të mjeteve, ndërsa i dyti si institucioni i kredive konsumatore. Nga krimi në krim Në tetor të vitit 2024, Autoriteti i Konkurrencës në Kenia (CAK) gjeti se Mogo Auto kishte shkelur Aktin e Konkurrencës pas hetimit të ankesave nga katër klientë. Autoriteti doli në përfundimin se kompania ishte përfshirë në paraqitje të rreme dhe mashtruese, si dhe në sjellje të pandërgjegjshme gjatë lëshimit dhe administrimit të produkteve të kredisë duke e gjobitur atë me 72 mijë euro. Ndërsa akuzat e fundit nga operatorët e motorëve "boda boda" mbeten vetëm pretendime që kërkojnë hetim parlamentar, ekziston tashmë një rekord rregullator i dokumentuar që tregon se disa klientë kanë pasur më parë shqetësime mjaft serioze, të cilat çuan në masa ndëshkimore. Skema e zhvatjes është e njëjtë me atë që kjo kompani aplikon në çdo vend të botës. Dhënien e kredive grabitqare për të varfrit dhe më pas sekuestrimin e aseteve të tyre të mbijetesës ose zhytjen në spiralen e pafundmë të borxheve. Për mijëra drejtues të motorëve taksi në Kenia, financimi i një mjeti nuk është thjesht një vendim i zakonshëm për kredi konsumatore. Motorri është shpesh mjeti i vetëm përmes të cilit huamarrësi gjeneron të arvhurat e nevojshme për të paguar vetë kredinë në radhë të parë. Nëse motori sekuestrohet pas një mospagimi kësti, huamarrësi mund të humbasë jo vetëm mjetin, por edhe vetë mundësinë për të gjeneruar paratë që duhen për të shlyer borxhin e mbetur. Sekuestrimet sipas mediave keniane janë duke shkatërruar me mijëra familje të varfra duke i zhytur ato më thellë në varfëri dhe në ciklin e borxheve të pafundme. (Kapitali.al) #voxnews #media #news

5122 views

Gazetari dhe publicisti Arjan Konomi ka denoncuar se është përplasur me truprojat dhe forcat e policisë që shoqëronin kryeministrin Edi Rama. Këtë të enjte në këtë fshat kishte ndalur për të pirë kafe kryeministri Edi Rama dhe Konomi tha se eskorta e tij kishte qëndruar në vendin ku ndalohet për qytetarët. Sipas një rrëfimi që ai ka bërë në rrjetet sociale, Rama e ka thirrur për t’u sqaruar, por është përballur me një sjellje agresive nga bashkëshortja e tij Linda Rama. Më pas Konomi thotë se është shoqëruar në komisariatin e policisë së Himarës ku është mbajtur disa orë. “Sapo dola nga komisariati i Himarës pas një përballjeje me Edi Ramën. “Maskara …. merreni” – u tha Rama policëve. Asnjë ofendim dhe asnjë kërcënim ndaj familjes së tij, thjesht pyeta policët pse nuk i gjobitnin makinat që ishin parkuar pas tabelës së ndalimit, kur ndëkohë pak orë më parë gjobitën tërë fshatin dhe turistët. Natyrisht makina e kryeministrit dhe të eskortës së tij”, shkruan Konomi, teksa ka publikuar dhe një video denoncuese. Kryeministri Edi Rama ndërkohë, ka nxjerrë ka një tjetër version, ndërsa ka publikuar videon e përplasjes. Ai thotë se e vërteta është krejt ndryshe nga sa thotë Konomi. Sipas Ramës, gazetari ka ofenduar gruan e tij, Linda Rama, bashkë me të birin. “JA QË PËR FAT TË MIRË KA EDHE NJË VIDEO TJETËR, e cila tregon krejt të kundërtën e videos që një dhunues i lirisë së të tjerëve paska vrapuar të tregojë botërisht, duke bërë para pasqyrës së tij viktimën e dhunuar, duke shfrenuar fantazinë dhe duke sharë si i përdalë një grua e një nënë, të cilën e bullizoi bashkë me fëmijën e saj në mes të rrugës – ku ngjarja u zhvillua krejt ndryshe nga rrëfimi në pasqyrë dhe u përhap pastaj në kanalet sociale si një tjetër gënjeshtër e madhe e luftës liridashëse kundër regjimit imagjinar. Fatmirësisht këtë herë ka një video demaskuese të gënjeshtrës, po imagjinojeni se sa herë të tjera gënjeshtra bën kërdinë mbi të vërtetën nëpër pasqyrat ku kujtojmë se informohemi”, shkruan Rama. (Vox News) #voxnews #media #news

256.6K views

Hapet rruga gjyqësore për operatorët e naftës që kanë paditur shtetin për mënyrën e përcaktimit të çmimeve nga Bordi i Transparencës. Burime nga tregu i hidrokarbureve konfirmuan për Monitor se më 19 shtator, në Gjykatën Administrative pritet të zhvillohet seanca e parë për shqyrtimin e padisë së një prej kompanive. Nga Gjykata Administrative shqyrtimi i padive do të bëhet veçmas për secilin operator, pasi edhe paditë janë depozituar individualisht pranë gjykatës. Paditë janë depozituar pranë Gjykatës Administrative në mesin e muajit korrik. Në total janë 8 operatorë të importit dhe tregtimit të karburanteve që kërkojnë rreth 11,8 mln euro dëmshpërblim për humbjet që pretendojnë se u janë shkaktuar nga llogaritja e çmimeve nën kosto nga Bordi i Transparencës. Në muajin maj rreth 2 muaj pas riaktivizimit të Bordit të Transparencës, që vijoi të rillogarisë çmimet e karburanteve me të njëjtën formulë të përdorur në vitin 2022 në krizën e luftës në Ukrainë, importuesit paralajmëruan qeverinë se do ta hedhin në gjyq dhe do të kërkojnë dëmshpërblim për llogaritjen nën kosto të çmimit të naftës. Sipas tyre, qeveria vijoi të përdorë të njëjtën metodologji të gabuar, duke përllogaritur bëhet në bazë të çmimit FOB (Free on Board), që nuk merr në konsideratë transportin dhe sigurimin, dhe jo të çmimit CIF, që përfshin transport e sigurim dhe që e rrisin edhe me 45-50 dollarë për ton çmimin e blerjes (që nga viti 2024, kompanitë e tregtimit ndërkombëtar nuk operojnë më mbi bazën e kontratave FOB, por mbi bazën e kontratave CIF). Ndërsa çmimi i vendosur nga Bordi bazohej në treguesin FOB, doganat kanë llogaritur TVSH-në mbi treguesin CIF. Por kjo diferencë krijon humbje te operatorët me 4.7 lekë për litër. Ndërsa në tregun e pakicës në vend çmimet e naftës vijojnë të shtrenjtohen për shkak të përshkallëzimeve të luftës në Lindjen e Mesme dhe bllokimit të ngushticës së Hormuzit ku kalon rreth 1/5 e prodhimit botëror të naftës. Kjo ka sjellë rritje të ndjeshme të çmimit të naftës Platts me të cilën llogaritet çmimi i naftës për zhdoganim në tregun vendas. Nga 1300 USD/ton që ishte 6 ditë më parë, çmimi arriti në 1,450 USD për ton. Luhatja e çmimit në bursat e huaja solli shtrenjtim të çmimit të naftës dhe benzinës, ku të dyja u tregtuan me çmime mbi 200 lekë për litër. Importuesit vendas parashikuan se nëse përshkallëzimet e luftës do të vijojnë çmimet e naftës me shumicë do të vijojnë të rriten. Në këtë situatë sipas tyre e vetmja masa që do të përmbante çmimet është ulja e taksave për naftën nga qeveria shqiptare. (Monitor) #voxnews #media #news

6007 views