Protesta kundër qeverisë u zhvillua edhe mbrëmjen e djeshme në Tiranë, duke shënuar ditën e 76-të të protestave kundër kryeministrit Edi Rama. Në protestë morën pjesë edhe shqiptarë të diasporës. Ata iu bashkuan qytetarëve para Kryeministrisë dhe mbajtën fjalime kundër qeverisë. Pas fjalimeve, protestuesit nisën marshimin në disa prej rrugëve kryesore të kryeqytetit. “Rama, jep dorëheqjen” ishte një nga thirrjet kryesore të protestuesve. Në duar u mbajtën edhe pankarta me mesazhe kundër qeverisë dhe mënyrës së qeverisjes. Protestuesit shprehen se do të vijojnë protestat, duke kërkuar dorëheqjen e kryeministrit Edi Rama. #voxnews #media #news @voxnews.al
Prodhimi industrial i Shqipërisë ra për të tretin vit radhazi gjatë vitit 2025, duke zgjeruar hendekun mes rritjes së përgjithshme të ekonomisë dhe ecurisë së industrisë. Të dhënat e fundit të Institutit të Vjenës (Vienna Institute for International Economic Studies, wiiw), tregojnë se prodhimi industrial bruto u tkurr me 2.6% më 2025, pas rënies me 7.5% në vitin 2024 dhe me 8.4% në 2023. E llogaritur mbi ndryshimet vjetore të publikuara nga instituti, rënia e akumuluar e prodhimit industrial gjatë këtyre tri viteve arrin në rreth 17.5%. Ritmi i tkurrjes është zbutur ndjeshëm më 2025, por treguesi mbetet në territor negativ, duke sinjalizuar se industria ende nuk ka hyrë në një fazë rimëkëmbjeje. Kontrasti me ekonominë në tërësi është i fortë. Prodhimi i Brendshëm Bruto u rrit me 4% në vitin 2023, me 4% në 2024 dhe me 3.7% në 2025. Kjo do të thotë se zgjerimi ekonomik i këtyre viteve është mbështetur nga sektorë të tjerë, ndërsa industria ka humbur terren edhe në periudha kur ekonomia regjistronte rritje relativisht të lartë. Instituti vlerëson se kërkesa e brendshme ishte nxitësi kryesor i ekonomisë gjatë vitit 2025, me kontributin më të fortë nga konsumi dhe investimet e qeverisë, ndërsa konsumi i familjeve dha një shtysë më modeste. Sipas raportit, rënia e vazhdueshme e prodhimit industrial përbën një sinjal problematik për strukturën e rritjes. Ndryshe nga shërbimet dhe konsumi, industria ka rol të drejtpërdrejtë në eksportet e mallrave, punësimin, produktivitetin dhe krijimin e një baze më të qëndrueshme prodhuese. Tkurrja trevjeçare tregon se rritja ekonomike nuk është shoqëruar nga një zgjerim i njëjtë i kapaciteteve industriale. Dobësia e industrisë shfaqet në një periudhë kur ekonomia shqiptare ka përfituar nga rritja e investimeve të huaja. Sipas wiiw, fluksi i investimeve të huaja direkte u rrit nga 1.498 miliardë euro në vitin 2023 në 1.581 miliardë euro më 2024 dhe në 1.635 miliardë euro në 2025. Megjithatë, të dhënat e prodhimit sugjerojnë se rritja e këtyre investimeve nuk është përkthyer në një kthesë të industrisë. Ndërkohë, paga mesatare mujore bruto u rrit nga 648 euro në 2023 në 769 euro më 2024 dhe në 860 euro në 2025. Rritja e pagave përmirëson të ardhurat e punonjësve, por, e kombinuar me tkurrjen e popullsisë dhe mungesën e fuqisë punëtore, mund të shtojë kostot dhe presionin konkurrues mbi ndërmarrjet prodhuese. Popullsia e Shqipërisë, sipas serisë së përdorur nga wiiw, zbriti nga 2.412 milionë banorë në 2023 në 2.377 milionë më 2024 dhe në 2.350 milionë në 2025. Brenda dy vjetësh, vendi humbi rreth 62 mijë banorë, një zhvillim që ngushton njëkohësisht ofertën e punës dhe tregun e brendshëm. Për vitet e ardhshme, Instituti i Vjenës parashikon ngadalësim të lehtë të ekonomisë. Rritja pritet të jetë 3.6% në 2026 dhe 3.5% në secilin prej viteve 2027 dhe 2028. /ekofin.al #voxnews #media #news
Policia e Durrësit ka goditur një rast trafiku armësh nga Kosova duke arrestuar një 34-vjeçar që po i transportonte. Gjatë kontrollit të makinës në Maminas, atij iu gjetën 3 pistoleta dhe 34 fishekë, kurse në shtëpi 1 dorezë hekuri. Në pranga përfundoi edhe pasagjerja 39-vjeçare nga Kosova për moskallëzim krimi. #voxnews #media #news @voxnews.al
Grupi politik “Demokratët Evropianë” (EDP/PDE) në Parlamentin Europian ka bërë një reagim të fortë lidhur me çështjen e Kryebashkiakut Erion Veliaj, i cili mbahet në paraburgim prej më shumë se 550 ditësh. Në deklaratën e tyre, ata shprehen se rasti i Veliajt është thellësisht shqetësues për demokracinë shqiptare dhe se i bashkohen thirrjes ndaj autoriteteve shqiptare që të respektojnë shtetin e së drejtës, prezumimin e pafajësisë dhe parimin e proporcionalitetit. Reagimi i plotë: Kryetari i Bashkisë së Tiranës, Erion Veliaj, ndodhet në paraburgim që prej 10 shkurtit 2025, prej pothuajse një viti e gjysmë. Akuzat zyrtare iu njoftuan vetëm në korrik 2025, pas 163 ditësh në paraburgim. Së fundmi, Gjykata Kushtetuese e Shqipërisë rrëzoi një vendim të Gjykatës së Lartë dhe urdhëroi rishqyrtimin e masës së paraburgimit ndaj tij, duke vënë në pikëpyetje proporcionalitetin e saj në lidhje me mandatin e tij si kryetar i Bashkisë së Tiranës, i zgjedhur në mënyrë demokratike. Ne i bashkohemi thirrjes ndaj autoriteteve shqiptare që të respektojnë shtetin e së drejtës, prezumimin e pafajësisë dhe parimin e proporcionalitetit. Ky rast vjen në një sfond thellësisht shqetësues për demokracinë shqiptare. Ne do të vazhdojmë ta mbajmë në vëmendje këtë çështje, sepse Shqipëria meriton një të ardhme evropiane – një të ardhme që të jetë plotësisht demokratike, transparente dhe e përkushtuar fort ndaj luftës kundër korrupsionit, duke garantuar njëkohësisht që drejtësia të ushtrohet gjithmonë me paanësi, pavarësi dhe respekt për të drejtat themelore. #voxnews #media #news
Donald Trump kundër Europës nuk ka të bëjë vetëm me Groenlandën dhe NATO-n. Ekziston edhe një garë tjetër që zhvillohet shumë më qetësisht: në Ballkan. Rajoni u rrënua nga luftërat e ish-Jugosllavisë së viteve 1990. Në të kaluarën SHBA-ja dhe Europa bashkëpunin për rindërtimin e rajonit. Ndërsa sot ata konkurrojnë për pushtet, para dhe ndikim. Si mund të ndikojë ky rivalitet në Ballkan? Ballkani Perëndimor është një term që Bashkimi Europian e përdor për gjashtë shtetet në kufijtë e tij: Bosnjë-Hercegovina, Serbia, Kosova, Maqedonia e Veriut, Shqipëria dhe Mali i Zi. BE-ja thotë se të gjithë këto shtete duhet të bëhen anëtarë, pas një sërë reformash të sundimit të ligjit dhe tregut. Por ata kanë ngecur në rrugën e tyre drejt anëtarësimit. Dhe ka disa pengesa të mëdha, si separatizmi që “vlon” në Bosnjë dhe Hercegovinë, ose mosmarrëveshja mes Serbisë dhe Kosovës. Për vite me radhë, SHBA-ja mbështeti integrimin e Ballkanit Perëndimor në BE. Ish-ministrja e Jashtme demokrate asokohe Hillary Clinton deklaronte, se “jemi të bashkuar në qëllimet tona për t’ju parë në NATO dhe BE sa më shpejt të jetë e mundur.” Aktualisht po dëgjohet një mesazh i ri: Donald Trump Jr.: “Nuk është politikisht korrekte, por është shumë e qartë se Europa është katastrofë.” Ky ndryshim kursi ka dy anë: interesat e sigurisë dhe interesat ekonomike. Lidhur me sigurinë, Departamenti Amerikan i Shtetit njoftoi së fundmi se “Epoka e ndërtimit të kombit, e udhëhequr nga SHBA-të, ka kaluar”. Por çfarë do të thotë kjo? Le të analizojmë Bosnjë dhe Hercegovinën, ose shkurt Bosnjën, një vend i shenjuar nga lufta brutale e viteve 1990. Është shtëpia e tre grupeve kryesore etnike: boshnjakëve, serbëve të Bosnjës dhe kroatëve të Bosnjës. Për t’i dhënë fund konflikteve të tyre, në vitin 1995 u krijua një sistem ndarjeje pushteti nën udhëheqjen e SHBA-së. Shpesh përshkruhet si sistemi politik më i ndërlikuar në botë. Tani, SHBA-ja dhe Europa kanë mosmarrëveshje për pozicionet më të fuqishme në atë sistem: Përfaqësuesin e Lartë për Bosnjë-Hercegovinën. Ai ka një rol unik. Është një zyrtar i huaj, zakonisht europian, me fuqi të mëdha për të ndërhyrë në politikën boshnjake. Detyra e tij është të sigurohet që vendi të mos rrëshqasë përsëri drejt konfliktit. Por ai zgjidhet nga shtete dhe organizata të tjera dhe jo nga populli i Bosnjës. Përfaqësuesi i Lartë i fundit ishte politikani gjerman Christian Schmidt. Ai dha dorëheqjen dhe tha se SHBA-ja e shtyu ta ndërmerrte këtë vendim. Administrata Trump dëshiron të kufizojë kompetencat e Përfaqësuesit të Lartë, por BE-ja ende dëshiron një diplomat që ta thotë fjalën e fundit në Bosnjë. Sipas Marko Prelec nga Grupi Ndërkombëtar i Krizave “qëndrimi i SHBA-së në këtë çështje është i saktë.” Eksperti Prelec shpjegon më tej, se 30 vjet pas ndërprerjes së armiqësive, është shumë e vështirë të shpjegohet pse duhet të ketë një zyrtar të emëruar ndërkombëtarisht me shkallën e pushtetit që përfaqësuesit e lartë kanë ushtruar në Bosnjë-Hercegovinë. Zyra e përfaqësuesit të lartë është bërë prej kohësh pjesë e konkurrencës gjeopolitike në Europë.Rusia ishte kundër Përfaqësuesit të Lartë të fundit dhe po kështu ishte edhe aleati i tyre lokal Milorad Dodik, udhëheqësi serb i Bosnjës. Dodik kërcënoi të shkëputej nga Bosnjë-Hercegovina dhe të bashkonte territoret serbe të Bosnjës me Serbinë fqinje: “Ne nuk e fshehim se i përkasim një kombi të vetëm serb. Ju nuk do ta shkatërroni thirrjen e këtij kombi për t’u bashkuar. Ky komb meriton të ketë një shtet të bashkuar. Ne nuk mund të ndalemi në këtë rrugë. Amerika dhe Europa dikur bashkëpunonin kundër këtyre kërcënimeve. Dodiku madje u sanksionua nga SHBA-të dhe gjykatat boshnjake e kishin në shenjestër. Por ai i shpëtoi arrestimit, qëndroi pranë MAGA-s dhe festoi fitoren e Trump. #voxnews #media #news
8 vatra zjarri mbeten aktive në vend, nga 35 të raportuara gjatë 24 orëve të fundit. Në terren po operojnë 120 efektivë të Forcave të Armatosura, 2 helikopterë dhe 2 avionë Air Tractor, thotë Ministria e Mbrojtjes. Në Parkun Kombëtar të Lurës janë aktivizuar 2 avionë Air Tractor dhe 1 autobot uji. Banesat janë të sigurta për shkak të korridoreve që janë hapur për të penguar avancimin e flakëve. Në Dajt 2 helikopterë po punojnë për shuarjen e vatrës mbi tunelet e Qafë-Mollës, por s’ka rrezik për zonat e banuara. Edhe në Priskë e Farkë zjarri është nën kontroll. Në Krujë po ndërhyhet për shuarjen e vatrave në Abaz e Zidoll, por pa rrezik për zonat e banuara. Vatrat e tjera janë në Lufaj të Lezhës, Dardhë të Elbasanit, pyjet e Tërbunit në Shkodër në Qafë Helmes dhe Bulqizë-Selishtë të Dibrës. #voxnews #media #news @voxnews.al
Një tërmet me magnitudë 7.7 goditi Indonezinë, në det të hapur pranë ishullit Flores. Tërmeti ndodhi të premten, më 14 gusht, në orën 21:58, në një thellësi prej 10. Epiqendra u lokalizua 68 kilometra nga qyteti Ende, në provincën Nusa Tenggara Lindore, në ishullin Flores. Në zonën bregdetare, dhjetëra ndërtesa janë shkatërruar ose dëmtuar. Gjatë natës, bilanci i viktimave u rrit nga ora në orë. Sipas raportimeve, viktimat janë “të paktën 20”. “Dy viktimat e para të raportuara ishin një burrë dhe një grua, më pas u konfirmuan edhe vdekje të tjera”, deklaroi për mediat në Xhakartë Berton Suar Pelita Panjaitan, zëdhënës i agjencisë përgjegjëse për menaxhimin e katastrofave. “Do të njoftojmë zyrtarisht numrin përfundimtar të viktimave dhe shkallën e dëmeve të shkaktuara në ndërtesa nga tërmeti sapo të kemi të dhënat.” Në orët e para u dha gjithashtu alarmi për cunami, i cili më pas u anulua. Autoritetet indoneziane kishin bërë edhe një thirrje për evakuim, përmes deklaratave të Abdul Muharit, një tjetër zyrtar i së njëjtës agjenci: “U bëjmë thirrje të forta komuniteteve tona përgjatë bregdetit verior të Floresit dhe në zonat jugore që të kryejnë menjëherë vetevakuimin.” Banorëve iu kërkua të “largohen nga bregu, duke u zhvendosur më shumë se dy kilometra në brendësi të territorit ose duke shkuar në zona kodrinore mbi 10 metra lartësi.” Megjithatë, alarmi për cunami u hoq rreth 5 orë më vonë. #voxnews #media #news
Shtatë pseudonime, një kartë identiteti e falsifikuar dhe arrati që zgjati pothuajse katër vjet në malet në lindje të Shqipërisë. Kështu mori fund arratia e 42-vjeçarit shqiptar i dënuar me vendim të prerë për një sërë vjedhjesh në Itali. Pas ekstradimit në Itali, ai duhet të vuajë 5 vjet, 9 muaj dhe 5 ditë burg, si dhe të paguajë një gjobë prej 1.640 eurosh. 42-vjeçari mbërriti në aeroportin Roma Fiumicino me një fluturim nga Rinasi, i shoqëruar nga personeli i Shërbimit për Bashkëpunimin Ndërkombëtar të Policisë. Pas mbërritjes, ai iu dorëzua agjentëve të Policisë Kufitare Ajrore dhe, pasi u përfunduan procedurat përkatëse, u transferua në burgun e Viterbos. Kërkimet kishin nisur në vitin 2022, kur një vendim për bashkimin e dënimeve, i nxjerrë nga Prokuroria e Republikës së Pordenones, nuk mundi të ekzekutohej pasi i dënuari nuk gjendej. Që nga ai moment, hetuesit nisën të ndiqnin gjurmët e tij, duke rindërtuar gradualisht lëvizjet e shënjestrës së tyre. Hetimet çuan në lokalizimin e tij në një zonë malore jo shumë larg kufirit të Shqipërisë me Maqedoninë e Veriut. Më 11 mars 42-vjeçari u identifikua dhe u ndalua nga autoritetet shqiptare në portin e Durrësit. Gjatë kontrolleve në pikën kufitare, policia konstatoi se personi Armando Valchizan përdorte edhe emrat Armando Dervishi, Armando Gheorghe, Altin Dervishi dhe Martin Dervishi. Që nga ajo kohë nisi procedura e nevojshme për dorëzimin e tij te autoritetet italiane, e cila përfundoi me transferimin e tij në Fiumicino më 12 gusht. Operacioni u bë i mundur falë bashkëpunimit ndërmjet forcave të rendit italiane dhe shqiptare, si dhe koordinimit të zyrave Interpol të Romës dhe Tiranës. Vjedhjet janë kryer gjatë viteve 2013–2016. Ai është dënuar për gjashtë vjedhje të kryera në Lignano Sabbiadoro, në provincën e Udines, dhe në Caorle, në Venecia. Objektivat ishin kryesisht shtëpi pushimesh dhe dhoma hotelesh, në zona që gjatë sezonit turistik karakterizohen nga një fluks i madh dhe i vazhdueshëm turistësh. Këtyre rasteve u shtohet edhe një tjetër vjedhje në një shtëpi në Romë, e kryer në shtator të vitit 2015. Një nga elementët që e komplikoi identifikimin e 42-vjeçarit ishte përdorimi sistematik i identiteteve të ndryshme. Gjatë viteve, burri kishte përdorur të paktën shtatë pseudonime, në përpjekje për t’iu shmangur kontrolleve dhe për ta bërë më të vështirë lidhjen me identitetin e tij. Në vitin 2016, pikërisht në Caorle, karabinierët e kishin ndaluar dhe i kishin gjetur një kartë identiteti rumune të falsifikuar. Nga ai kontroll kishte nisur edhe procedimi penal për falsifikimin e dokumenteve. Shumëllojshmëria e identiteteve të përdorura e bëri veçanërisht të ndërlikuar edhe procesin për të vërtetuar pa asnjë dyshim se personi i gjetur në Shqipëri ishte pikërisht personi të cilit i referohej vendimi i autoriteteve italiane. #voxnews #media #news
Zjarret në pyje po kthehen në një nga rreziqet klimatike me pasojat më të mëdha për Shqipërinë, të nxitura nga rritja e temperaturave, thatësirat më të gjata dhe pakësimi i reshjeve gjatë verës. Sipas Planit Kombëtar të Përshtatjes ndaj Ndryshimeve Klimatike 2026–2036, zjarret, së bashku me përmbytjet, thatësirat dhe rrëshqitjet e dherave, përbëjnë mbi 90% të dëmeve të regjistruara nga fatkeqësitë klimatike në vend. Gjatë dy dekadave të fundit, fatkeqësitë natyrore dhe klimatike kanë prekur 95% të bashkive shqiptare. Rritja e temperaturave dhe ulja e lagështisë së tokës pritet ta bëjnë bimësinë më të ndezshme, duke zgjatur sezonin e zjarreve dhe duke rritur mundësinë që flakët të përhapen në sipërfaqe më të mëdha. Parashikimet klimatike tregojnë se deri në vitin 2050, temperatura mesatare mund të rritet me 0.9–2 gradë Celsius, ndërsa reshjet verore mund të bien me 8.1–17.6%. Zjarret dëmtojnë biodiversitetin, degradojnë dhe ekspozojnë tokën ndaj erozionit, cenojnë burimet ujore dhe kullotat, si dhe ulin aftësinë e pyjeve për të përthithur karbonin. Dëmet transmetohen edhe në bujqësi, blegtori dhe turizëm, ndërsa komunitetet rurale humbasin burime të ardhurash nga druri, bimët mjekësore dhe produktet e tjera pyjore. Plani parashikon se dëmet ekonomike nga ndryshimet klimatike në tërësi mund të arrijnë deri në 7% të Prodhimit të Brendshëm Bruto të Shqipërisë në vitin 2050, në mungesë të masave të përshtatjes. Për të kufizuar rrezikun, Plani Kombëtar ndër të tjera synon krijimin e katër fidanishteve dhe ripyllëzimin e sipërfaqeve pyjore të zhveshura, të dëmtuara nga erozioni, zjarret dhe prerjet. Parashikohet gjithashtu monitorimi i mbijetesës së fidanëve dhe përdorimi i specieve më të përshtatshme për kushtet e reja klimatike. Masat e tjera përfshijnë përmirësimin e menaxhimit të pyjeve dhe zonave të mbrojtura, restaurimin e ekosistemeve të dëmtuara, kontrollin e erozionit dhe krijimin e skemave të pagesës për shërbimet e ekosistemit, me synimin që një pjesë e financimit të ruajtjes dhe rehabilitimit të pyjeve të sigurohet nga përfituesit e këtyre shërbimeve. Në total, Plani Kombëtar përmban 13 masa prioritare për sektorin e pylltarisë. Zbatimi i tyre do të shtrihet gjatë periudhës 2026–2036, ndërsa disa ndërhyrje afatgjata parashikohet të vijojnë deri në vitin 2042. #voxnews #media #news
Në fund të muajit të kaluar, qeveria shqiptare njoftoi shtetëzimin e shërbimit të dializës pas përfundimit të konçesionit 10 vjeçar. Përmes një vendimi të posaçëm, Këshilli i Ministrave ngarkoi Operatorin e Shërbimeve të Integruara të Sterilizimit për të ofruar jo vetëm dializën, por edhe kontrollin bazë mjekësor të popullatës, që ndryshe njihet si check up. “Shërbimi i check-up-it dhe ai i dializës do të merren në dorëzim dhe do të ofrohen nga shteti,” deklaroi ministrja e Shëndetësisë, Evis Sala, menjëherë pas mbledhjes së qeverisë në datën 30 korrik. Por qeveria ka vendosur sërish nënkontraktimin e shërbimit, këtë herë për katër vjet. Operatori i Shërbimeve të Integruara të Sterilizimit shpalli në regjistrin e parashikimeve të Agjencisë së Prokurimit Publik, një tender me vlerë 4.6 miliardë lekë ose rreth 49 milionë euro për ofrimin e shërbimit të dializës në pesë spitalet publike, Shkodër, Lezhë, Korçë, Vlorë dhe Elbasan për një periudhë 4 vjeçare. Përmes kësaj proçedure, qeveria privatizon sërish shërbimin e dializës duke zgjedhur një privat, i cili do ta ofrojë këtë shërbim për 4 vitet e ardhshme, kundrejt 49 milionë eurove./kapitali.al #voxnews #media #news @voxnews.al
Një operacion antidrogë i finalizuar në Tiranë ka çuar në pranga dy të rinj, të dyshuar për shitblerje të kokainës. Policia ndërhyri në rrugën “Egnatia”, ku Darlin Shahinas u kap duke i dorëzuar Donaldo Frates një çantë me mbi 200 gramë kokainë. Në total, gjatë operacionit “Momenti” u sekuestruan 252 gramë lëndë narkotike, një automjet dhe tre telefona celularë. “Tiranë/Finalizohet si rezultat i punës operative, operacioni antidrogë, i koduar “Momenti”. Goditet në flagrancë, një rast i shitblerjes së drogave të forta. Arrestohen në rrugën “Egnantia”, të dy shtetasit e përfshirë në këtë rast. Sekuestrohen 252 gramë lëndë narkotike Kokainë, 1 automjet tip “BMW” dhe 3 celularë. Specialistët e Seksionit për Hetimin e Narkotikëve, si rezultat i administrimit të shpejtë të një informacioni të siguruar në rrugë operative, për përfshirjen e 2 shtetasve në veprimtari kriminale në fushën e narkotikëve, finalizuan operacionin e koduar “Momenti”, gjatë të cilit u arrestuan në flagrancë shtetasit D. Sh., 19 vjeç dhe D. F., 26 vjeç. 19-vjeçari u kap në flagrancë në rrugën “Egnantia”, duke i dorëzuar 26-vjeçarit, një çantë me 211 gramë lëndë të dyshuar narkotike Kokainë. Më tej, nga kontrolli i banesës i 19-vjeçarit, u sekuestruan 41 gramë të tjerë të kësaj lënde. Materialet procedurale iu referuan Prokurorisë, për veprime të mëtejshme”, shkruan Policia. #voxnews #media #news
Kryeministri izraelit Benjamin Netanyahu ka kritikuar ashpër Britaninë e Madhe, duke e cilësuar atë si një Republikë Islamike gjatë një interviste në podkastin e Radios së Ushtrisë. Duke folur për familjen Churchill, Netanyahu përmendi Randolph Churchill dhe djalin e tij, Winston Spencer Churchill, të cilët kishin punuar si gazetarë dhe kishin raportuar për Luftën Gjashtëditore të vitit 1967. Sipas Netanyahut, të dy e kishin mbuluar konfliktin në një mënyrë që ishte shumë pozitive për Izraelin. Deklarata e tij vjen në një kohë tensionesh të shtuara mes Izraelit dhe Britanisë së Madhe lidhur me luftën në Gaza dhe qëndrimin britanik ndaj Izraelit. “Përpiquni të gjeni diçka të tillë tani në Britani, të cilën mund ta quani ‘Republika Islamike e Britanisë”, tha ai duke qeshur. Më pas ai u përgjigj ‘po’ kur gazetari e pyeti nëse ‘e gjithë Evropa është kështu’, me sa duket duke iu referuar komuniteteve myslimane në vendet evropiane dhe qëndrimit gjithnjë e më kritik të shumë qeverive evropiane ndaj Izraelit në vitet e fundit. “Republika e parë islamike bërthamore do të jetë Republika Islamike e Britanisë. Ne po sigurohemi që të mos ketë një tjetër në Iran”, shtoi Netanyahu me shaka. #voxnews #media #news @voxnews.al
Qytetarët shqiptarë do të mund të udhëtojnë drejt Marokut pa pasur nevojë për vizë për qëndrime afatshkurtra. Vendimi është marrë nga autoritetet marokene dhe do të hyjë në fuqi më 15 gusht 2026, duke i dhënë fund regjimit të vizave për shtetasit e Republikës së Shqipërisë që vizitojnë vendin për periudha të shkurtra. Heqja e vizave pritet të lehtësojë ndjeshëm udhëtimet e shqiptarëve drejt Marokut, qoftë për qëllime turistike apo vizita të shkurtra. Njoftimi për vendimin i është përcjellë palës shqiptare nga Ambasada e Mbretërisë së Marokut, e akredituar për Shqipërinë me seli në Romë. Kështu, duke nisur nga 15 gushti, shqiptarët do të kenë mundësi të udhëtojnë drejt Marokut pa procedurat e aplikimit për vizë për qëndrime afatshkurtra. #voxnews #media #news @voxnews.al
Korporata Elektroenergjitike Shqiptare (KESH) ka hapur një procedurë të re prokurimi me vlerë rreth 23 milionë dollarë për operimin dhe mirëmbajtjen për dy vitet e ardhshme të aseteve gjeneruese termike të vendosura në Vlorë, të njohura si dy TEC-et lundruese apo “dy tigrat”. Sipas njoftimit të publikuar, procedura është e hapur, mbi kufirin e lartë monetar, dhe ka si objekt “Operim dhe Mirëmbajtje e Asetit Gjenerues Termik, Vlorë”. Fondi limit është përcaktuar në 1.855 miliardë lekë pa TVSH, ose 23.026 milionë dollarë, duke përdorur kursin zyrtar prej 80.58 lekësh për dollar të datës 13 gusht 2026. Kontrata parashikohet të ketë një kohëzgjatje prej 731 ditësh, pra dy vite, ndërsa kompanitë e interesuara do të kenë afat deri më 15 shtator 2026, ora 10:00, për paraqitjen e ofertave. Dokumentet teknike të tenderit, të konsultuara nga ekofin.al, tregojnë se kontrata nuk kufizohet vetëm te mirëmbajtja e zakonshme e dy anijeve termocentrale. Operatori që do të përzgjidhet duhet të ofrojë një shërbim gjithëpërfshirës të operimit dhe mirëmbajtjes, në mënyrë që asetet të jenë të disponueshme dhe të gatshme për prodhim sa herë që kjo do të kërkohet. Në termat e referencës përcaktohen ndër të tjera mirëmbajtja e planifikuar dhe e paplanifikuar, sigurimi i materialeve të konsumit dhe pjesëve të këmbimit, raportimi, si dhe ndërhyrjet emergjente. Operatori duhet të garantojë reagim emergjent 24 orë në 7 ditë të javës, mobilizim të menjëhershëm të stafit në rast avarie dhe rikthim sa më të shpejtë të centralit në operim. Dokumentacioni përcakton gjithashtu detyrimin për monitorim dhe kontroll në kohë reale të pajisjeve, rikthimin në funksionim në distancë ose në vend të pajisjeve pas alarmeve, si dhe riparimin ose zëvendësimin e komponentëve që mund të ndikojnë në performancën e centraleve. KESH kërkon po ashtu raportim periodik mbi operimin, performancën, mirëmbajtjen, incidentet dhe vetë operimin e mirëmbajtjen (O&M), duke e kthyer kontratën praktikisht në një paketë të plotë për mbajtjen në gatishmëri të aseteve. 23 milionë dollarë për “dy tigrat” që mezi Dy TEC-et lundruese janë vendosur në zonën e Triportit, pranë TEC-it të Vlorës. Dokumentet teknike tregojnë se bëhet fjalë për dy anije termocentrale, ndërsa fuqia e instaluar neto e aseteve gjeneruese termike është rreth 110 MW. Tenderi i ri vjen në një moment kur roli faktik i “dy tigrave” në prodhimin e energjisë elektrike gjatë vitit 2026 ka qenë minimal. Sipas të dhënave më të fundit, dy termocentralet lundruese nuk janë vënë thuajse fare në punë përgjatë këtij viti, pasi nevoja për prodhim termik është reduktuar ndjeshëm. Në këtë situatë kanë ndikuar kushtet më të favorshme të prodhimit vendas të energjisë. Rritja e prodhimit nga hidrocentralet, e kombinuar me zgjerimin e shpejtë të kapaciteteve fotovoltaike, ka shtuar ofertën e energjisë nga burimet e rinovueshme dhe ka ulur nevojën për aktivizimin e centraleve termike lundruese. Kjo është veçanërisht e rëndësishme për “dy tigrat”, pasi prodhimi i tyre lidhet me përdorimin e karburantit dhe, për rrjedhojë, me një kosto relativisht të lartë. Në këto kushte, dy asetet po duken më shumë si një barrë dhe mbajtja në gjendje pune e tyre do t’i kushtojë KESH-it deri në 1.85 miliardë lekë pa TVSH për dy vitet e ardhshme, nëse tenderi kontraktohet në nivelin e fondit limit. Kjo do të thotë se edhe në një periudhë kur “dy tigrat” prodhojnë pak ose aspak energji, mirëmbajtja, personeli, monitorimi dhe gatishmëria teknike e tyre vazhdojnë të krijojnë një faturë të konsiderueshme për kompaninë publike të energjisë. ekofin.al #voxnews #media #news
Dokumentet mbi të cilat mbështetet reforma e re territoriale e propozuar nga mazhoranca ofrojnë një fotografi të polarizimit demografik të Shqipërisë, se si emigracioni dhe lëvizjet e brendshme kanë zbrazur qytetet e vogla dhe zonat rurale dhe popullsia është përqendruar në pak qendra urbane. “Reforma Administrativo-Territoriale 2.0”, dokumenti i hartuar nga ekspertët e PS-së në Komisionin e Posaçëm Parlamentar, identifikon një grup njësish vendore që shfaqin dobësi të përsëritura në funksionalitet, ekonomi, demografi dhe financa për të justifikuar nevojën e rikonfigurimit të hartë së ndarjes territoriale. Analiza bazohet mbi tre indekse që tregojnë një tablo thellësisht të polarizuar demografike, ekonomike dhe funksionale të bashkive, ku në njërën anë janë disa qendra urbane ku përqendrohet jo vetëm popullsia, por ka dhe zhvillim ekonomik, dhe në anën tjetër është periferia, sidomos verilindja, juglindja dhe zonat malore, të cilat vuajnë një rreth vicioz tkurrje dhe plakje të popullsisë, ekonomi mbijetese me pak vende pune formale dhe buxhete bashkiake që mbijetojnë vetëm nga qeveria qendrore, duke i përdorur fondet vetëm për pagat e administratës vendore. Indeksi i Masës Urbane (IMU), një nga tre dokumentet analitike mbi të cilat është bazuar propozimi i hartës së re me 46 bashki, duke shkrirë 15 njësi vendore me bashkitë më të mëdha brenda qarkut, dokumenton transformimin territorial të Shqipërisë pas viteve ’90, me më pak qendra që rriten dhe gjithnjë e më shumë bashki që humbasin banorë. Të dhënat e përpunuara nxjerrin në pah një Shqipëri të ndarë në tre realitete: një grup shumë të vogël bashkish që vazhdojnë të tërheqin popullsi dhe aktivitet ekonomik, një grup bashkish me potencial të ndërmjetëm dhe një shumicë territori që po humbet masën kritike të popullsisë. Analiza është ndërtuar mbi të dhënat e Censusit 2023 dhe, e përfshirë në raportin teknik që shoqëron reformën, sugjeron se vendi po përjeton një përqendrim të popullsisë në gjithnjë e më pak qendra urbane, ndërsa pjesa tjetër e territorit po humbet banorë, funksione dhe kapacitete zhvillimi. Rezultatet e indeksit tregojnë se vetëm 13 bashki klasifikohen me nivel të lartë të masës urbane, por në to jeton 62.5% e popullsisë së vendit. Në anën tjetër, 30 bashki, pothuajse gjysma e hartës administrative, klasifikohen në nivel të ulët dhe përbëjnë vetëm 14.2% të popullsisë, ndërsa 18 bashki renditen në kategorinë e ndërmjetme ose mesatare. Sipas të dhënave, popullsia e vendit është përqendruar në kryeqytet, ku banojnë mbi gjysmë milioni banorë, e ndjekur me shumë pikë pas nga bashkitë Durrës, Vlorë, Elbasan, Shkodër, Fier, Kamëz dhe Berat. Në skajin tjetër, me më pak banorë, renditen bashki si Pusteci, Libohova, Himara, Këlcyra, Memaliaj, Selenica, Dropulli, Finiqi, Delvina dhe Kolonja, të cilat kanë humbur peshë demografike dhe urbane, sipas indeksit. Analiza e ekspertëve të mazhorancës nuk e ndërton indeksin vetëm mbi numrin e banorëve, por kombinon tregues të tjerë si: madhësia e popullsisë, dendësia reale e banimit, mënyra si shpërndahet popullsia në territor, raporti i varësisë demografike dhe niveli i urbanizimit. Kjo do të thotë se një bashki mund të ketë sipërfaqe të madhe, por nëse popullsia është e përqendruar në një qytet të vogël dhe pjesa tjetër e territorit është bosh, ajo konsiderohet strukturalisht e dobët. Një nga gjetjet më domethënëse është se mesatarisht 57% e territorit është i pabanuar. Në nivel kombëtar, koeficienti ‘Gini’ që mat raportin banorë për km katror është 0,86, çka tregon se banorët janë të përqendruar në pak zona, ndërsa pjesë të mëdha të territorit mbeten bosh. Kjo duket veçanërisht në Kolonjë dhe Korçë, ku treguesi arrin 0,97, duke treguar se popullsia është mbledhur në pak zona urbane dhe pse bashkitë kanë shtrirje të gjërë në territor. Ndërkohë Bashkia e Kamzës ka vlerën më të ulët, 0,42, që tregon se territori i kësaj bashkie është i banuar. Në përgjithësi, mesatarisht rreth 57% e territorit të një bashkie rezulton bosh. #media #voxnews
Hetuesit amerikanë kanë përcaktuar se çfarë shkoi keq muajin e kaluar gjatë fluturimit të Ryanair, ku një pasagjer 61-vjeçar u tërhoq pjesërisht jashtë përmes një dritareje të avionit. Sipas një raporti paraprak të hetimit, pjesë të shkëputura nga motori i djathtë goditën dhe thyen një xham të kabinës. Pasagjeri serb Ljubisa Karovi? mbeti i plagosur rëndë. Ngjarja ndodhi më 10 korrik, gjatë një fluturimi nga Selaniku në Greqi drejt Memmingenit në Gjermani. Nga raporti paraprak amerikan i National Transportation Safety Board (NTSB) rezulton se, pak pas ngritjes, u shkëput një fletë e ventilatorit të motorit të djathtë. Pjesët që u shkëputën goditën më pas një dritare të trupit të avionit dhe e thyen atë. Karovi?, i cili ishte ulur pranë dritares, u tërhoq jashtë përmes hapjes me kokën dhe shpatullën e djathtë. Incidenti shkaktoi panik në bord. Bashkëshortja e Karovi?, Svetlana Grkovi? Maksimovi?, kishte treguar më herët se ajo, së bashku me dy pasagjerë të tjerë, e mbajtën bashkëshortin e saj për këmbësh për disa minuta. “Një burrë, me sa duket shqiptar, bëri gjithçka për ta tërhequr bashkëshortin tim përsëri brenda”, tregoi ajo. “Fillimisht u përpoq ta mbulonte vrimën me një çantë, por ajo u tërhoq menjëherë jashtë. Më pas përdori një valixhe dhe kjo funksionoi. Do t’i jemi mirënjohës përgjithmonë.” Një shpërthim i fortë Sipas raportit, pak pas ngritjes, ndërsa avioni ishte ende duke fituar lartësi, ekuipazhi i kabinës së pilotimit mori një paralajmërim për dridhje të forta në motorin e djathtë. Pilotët ulën fuqinë e motorit dhe kryen disa kontrolle. Kur dridhjet u zhdukën përkohësisht, ata vazhduan fluturimin me autopilot të aktivizuar. Pak më vonë, dridhjet u shtuan përsëri dhe u dëgjua një shpërthim i fortë. Pilotët shpallën menjëherë emergjencën dhe u kthyen drejt aeroportit të Selanikut, ku avioni u ul përfundimisht në mënyrë të sigurt. Edhe ekuipazhi i kabinës dëgjoi dhe ndjeu dridhjet e forta. Sipas raportit, stjuardët dhe stjuardesat vunë re gjithashtu një sasi të vogël tymi, pas së cilës maskat e oksigjenit ranë automatikisht nga panelet. Nuk u gjetën defekte Autoritetet greke ia kaluan hetimin pas incidentit NTSB-së. Raporti paraprak tregon gjithashtu se motori në fjalë ishte kontrolluar me ultratinguj në muajin maj, por gjatë këtij inspektimi nuk ishin konstatuar defekte. #media #media #news
Oqeani mbulon pjesën më të madhe të planetit tonë, megjithatë kemi eksploruar vetëm një pjesë të vogël të tij. Nën sipërfaqe fshihet një botë me errësirë të pafundme, male gjigante nënujore, krijesa rekordmadhësie dhe vende aq të thella sa vetëm pak njerëz kanë mundur t’i arrijnë. Çdo vit, shkencëtarët vazhdojnë të zbulojnë specie të reja dhe mistere të fshehura nën valë. #voxnews #media #news @voxnews.al
Cristiano Ronaldo ka surprizuar tifozët duke u shfaqur me një model të ri flokësh, vetëm pak ditë pas martesës me Georgina Rodriguez në një ceremoni private në Cascais të Portugalisë. Futbollisti portugez ka hequr dorë nga modeli i tij tradicional i flokëve, duke zgjedhur një prerje shumë të shkurtër me ngjyrë më të çelët. 41-vjeçari u fotografua në stërvitjen e parë me Al-Nassr, ndërsa përgatitet për sezonin e ri nën drejtimin e trajnerit Ange Postecoglou. Ronaldo numëron aktualisht 976 gola në karrierë dhe synon të arrijë shifrën historike prej 1,000 golash. Vetëm pak ditë më parë, Ronaldo dhe Georgina Rodriguez kurorëzuan lidhjen e tyre 10-vjeçare me martesë në një ceremoni civile private, ku ishin të pranishëm pesë fëmijët e tyre. Lajmi u konfirmua edhe nga përfaqësuesit e futbollistit. Çifti u njoh në vitin 2016, kur Georgina punonte në një dyqan Gucci në Madrid. Pas gati një dekade së bashku dhe pas fejesës vitin e kaluar, ata vendosën të martoheshin në një ceremoni larg vëmendjes së publikut. #cristianoronaldo #voxnews #media #news @voxnews.al
Ministria e Mbrojtjes informon se, gjatë 24 orëve të fundit, janë raportuar 29 vatra zjarri nga të cilat 11 vatra aktive, 3 monitorim dhe 4 nën kontroll. Për përballimin e situatës vijon një angazhim i gjerë i strukturave të Mbrojtjes Civile, me 249 efektivë të MZSH-së, 48 forca policore, 233 forca bashkiake/AdZM/Shërbimi Pyjor/ASHP, 206 vullnetarë dhe 118 efektivë të Forcave të Armatosura. Janë angazhuar gjithashtu 43 automjete zjarrfikëse, ndërsa FA ka vënë në dispozicion 9 automjete zjarrfikëse, 4 autobote, 3 ambulanca, 3 helikopterë dhe 2 avionë Air Tractor. Vatrat kryesore aktive dhe angazhimi: * Dajt, Tiranë – Vijon puna në zonën mbi tunelet e Qafë-Mollës. Nuk ka rrezik për zonat e banuara. Edhe në Priskë e Madhe nuk raportohet rrezik për banesat. * Përmet, Gjirokastër – Mbeten aktive vatrat në malin e Nëmerçkës dhe në malin Dhëmbel. Terreni paraqitet i vështirë, ndërsa forcat zjarrfikëse, punonjësit e sektorit pyjor dhe vullnetarët po vijojnë punën për izolimin e tyre. Nuk ka rrezik për zonat e banuara. * Gurë-Lurë, Dibër – Vijon një nga operacionet më të rëndësishme, me 120 forca të bashkisë, 57 efektivë të FA-së, 15 forca policore, 15 vullnetarë dhe 9 punonjës të AdZM-së. Falë ndërhyrjes së forcave është vendosur nën kontroll perimetri pranë banesave dhe është evituar rreziku për djegien e tyre. Nga ajri kanë operuar 2 avionë Air Tractor, ndërsa puna vijon në dy drejtimet e tjera ku zjarri ruan intensitet. * Qafa e Helmes, Bulqizë–Dibër – Vatra vijon aktive në terren pyjor, me angazhimin e 10 efektivëve të MZSH-së, 6 forcave bashkiake dhe 6 forcave nga njësia administrative Selishtë. * Trojë, Mirditë – Për izolimin e vatrës janë angazhuar 13 efektivë të MZSH-së me 3 automjete zjarrfikëse, 36 forca bashkiake, 3 policë, 20 vullnetarë, si dhe 2 automjete zjarrfikëse dhe 30 efektivë të FA-së. * Shkodër – Vijojnë aktive vatrat në Rrencë dhe Goraj-Budishtë. Forcat e MZSH-së dhe Shërbimit Pyjor po punojnë për izolimin dhe shuarjen e tyre; në Goraj-Budishtë nuk ka rrezik për banesat dhe vatra po shkon drejt izolimit. * Elbasan – Mbeten aktive vatrat në Dardhë, bashkia Librazhd, ku operojnë MZSH, forcat pyjore dhe bashkiake, si dhe në Shalës, bashkia Cërrik. Në Dardhë nuk ka rrezik për zonat e banuara. Në tërësi, operacionet vijojnë me angazhim të koordinuar nga toka dhe ajri, ndërsa në disa prej zonave më të ekspozuara është bërë e mundur mbrojtja e banesave dhe kufizimi i përhapjes së zjarrit. AKMC, përmes Qendrës Kombëtare Operacionale të Emergjencave Civile, vijon të ndjekë në mënyrë të pandërprerë situatën dhe të koordinojë angazhimin e kapaciteteve sipas nevojës. #voxnews #media #news
Login
