Një aksident rrugor është regjistruar ditën e sotme në Unazën e Madhe, në zonën e Farkës në Tiranë, pranë xhamisë, ku një kamion me rimorkio, që transportonte një fadromë, është përmbysur në rrugë. Sipas informacioneve paraprake të mbërritura në redaksinë e JOQ, nga aksidenti kanë mbetur të plagosur dy persona. Njëri prej tyre ka marrë dëmtime në shpatull, ndërsa tjetri në fytyrë, por fatmirësisht ndodhen jashtë rrezikut për jetën. Një qytetar që ka dërguar pamjet në redaksi jep edhe një version paraprak mbi mënyrën se si mund të ketë ndodhur aksidenti. Sipas tij, fadroma që transportohej në rimorkio mund të ketë ndikuar në shpërndarjen e peshës së mjetit, duke e ç’ekuilibruar atë, veçanërisht në një pjesë të rrugës ku ka pjerrësi. “E pashë nga larg, kur u afrova autori iku, s’e di a nga frika apo s’e di. Por ka pas fadromën në rimorkio dhe e ka marrë pesha para dhe e ka ç’ekuilibruar. Është rrëzuar se vjen si dishezë aty”, shprehet qytetari. Për shkak të përmbysjes së mjetit, qarkullimi në këtë segment është vështirësuar ndjeshëm. Policia Rrugore ka ndërhyrë për menaxhimin e trafikut dhe ka devijuar lëvizjen e mjeteve që udhëtojnë në drejtim të TEG-ut, Elbasanit dhe zonave që lidhen me mbikalimin e Farkës. Në vendngjarje kanë mbërritur shërbimet e emergjencës mjekësore dhe forcat e Policisë, ndërsa grupi hetimor po kryen veprimet procedurale për të përcaktuar dinamikën dhe shkaqet e aksidentit. Deri në një njoftim zyrtar të Policisë së Tiranës, rrethanat e plota të ngjarjes mbeten ende për t’u sqaruar.

88.3K views

Geni, një 30-vjeçar nga Mirdita, i cili pas 10 vitesh emigrim në Angli është kthyer në Shqipëri, ka ndarë me JOQ Albania vështirësitë që ka hasur në kërkim të një partnereje për martesë. I zhgënjyer nga dy përvojat me lushnjaren dhe dibranen, i riu kërkon mendimin e ndjekësve se si duhet të veprojë më tej, duke e mbyllur se ka frikë se do të mbetet beqar pa i çuar nuse nënës në shtëpi. Halli i Genit: Përshëndetje JOQ! Jam Geni, një djalë emigrant. Pas 10 vitesh në Angli u ktheva në vendlindje, në Mirditë. Jam 30 vjeç. Më në fund u bëra mbarë të gjeja një nuse shqiptare, pa ndasi krahinore. Në qershor njoha në një pub në Tiranë një vajzë nga Lushnja. Pas flirtit nisëm të takoheshim dhe pyetjet e para ishin: Çfarë makine ke? Sa lekë ke kursyer? A do të jetosh me prindërit apo do të jetosh në Tiranë? Direkt donte martesë, pa u njohur mirë dhe pa shkëmbyer disa takime. Më preu gjunjët dhe e ndërpreva njohjen. Në gusht, në Velipojë, u njoha me një dibrane. E vëmendshme për pastërtinë, me shkollë, por edhe ajo më vuri kushte. Kërkonte që unë të kthehesha në Shqipëri, të jetoja në Tiranë, të hapja një biznes ose të punoja në ndërtim dhe të mos kisha rrjete sociale, pra t’i mbyllja. Për prindërit më tha se nuk e kishte problem, por donte që shtëpia jonë të kishte dhoma për ne, fëmijët dhe prindërit e mi, që të mos e bezdisnin as atë dhe as fëmijët. Kjo dibranja nisi të më kërkonte edhe llogari se ku i kisha çuar paratë e emigrimit. Më mërziti shumë edhe kjo vajzë, edhe pse ishte zemërmirë. Si ka mundësi, JOQ, të gjitha vajzat shqiptare qenkan bërë një prerje? O shok, ngela beqar! Publikojeni si hall, kërkoj mendim se çfarë të bëj, se ngela pa i çuar nuse mamit në shtëpi.

26.1K views

Në rrugën e Kapshticës janë realizuar murale të veçanta kushtuar disa prej figurave më të rëndësishme të historisë dhe kulturës shqiptare. Në këto piktura shfaqen Parashqevi dhe Sevasti Qiriazi, Naum Dhimitër Naçi, Çerçiz Topulli, Skënderbeu, Ismail Qemali, Isa Boletini dhe Haxhi Tasim i Çamërisë, duke sjellë në hapësirën publike portretet e personaliteteve që kanë dhënë kontribut të rëndësishëm për arsimin, gjuhën dhe çështjen kombëtare shqiptare. Këto vepra artistike janë realizuar nga artisti dhe atdhetari Bledar Çakalli, i cili përmes artit ka zgjedhur të përcjellë mesazhe historike dhe patriotike. Në muralet dallohen veçanërisht figurat e motrave Qiriazi, pionieret e arsimit shqip, si edhe Naum Dhimitër Naçi, i njohur për kontributin e tij si mësues i gjuhës shqipe. Krahas tyre, muralet nderojnë edhe figura të tjera të shquara të historisë shqiptare. Muralet në rrugën e Kapshticës përbëjnë një ndërthurje mes artit dhe historisë, duke e kthyer një hapësirë të zakonshme publike në një galeri të hapur në kujtim të personaliteteve kombëtare. Përmes këtyre portreteve, historia shqiptare bëhet më e pranishme në jetën e përditshme dhe brezat e rinj kanë mundësinë të njihen me figurat që kanë lënë gjurmë në rrugëtimin e vendit.

13.9K views

Një aksident është shënuar sot në zonën e Plazhit, në lagjen 13 të Durrësit, ku një këmbësor është përplasur nga një taksi teksa po kalonte në vijat e bardha. Nga përplasja, i moshuari ka përfunduar në trotuar dhe ka mbetur i plagosur. I plagosuri është transportuar me autoambulancë drejt spitalit, ku sipas burimeve zyrtare të Policisë ka marrë fraktura të shumta në gjymtyrë. Fatmirësisht, gjendja e tij raportohet jashtë rrezikut për jetën, ndërsa policia po vijon verifikimet për zbardhjen e rrethanave të aksidentit. Ndërkohë, sipas burimeve nga vendngjarja, autoambulanca është vonuar rreth 25 minuta për të mbërritur në vendin e aksidentit. Vonesa e shërbimit të urgjencës ka ngritur shqetësim, ndërsa priten të dhëna të tjera mbi shkaqet e aksidentit dhe ndërhyrjen e shërbimeve në vendngjarje. Informacion shtesë i përditësuar nga policia, ora 12: 44: Shtetasi F. D., 66 vjeç, i cili u përplas nga taksia, si pasojë e plagëve të marra, ka ndërruar jetë në spital. Drejtuesi i automjetit, shtetasi A. T., është shoqëruar në Komisariat dhe po kryhen veprimet procedurale për arrestimin e tij.

45.1K views

Pavarësisht famës, pasurisë dhe vëmendjes së jashtëzakonshme që i shoqëron në çdo hap, Cristiano Ronaldo dhe Georgina Rodríguez vendosën që një nga momentet më të rëndësishme të jetës së tyre ta përjetonin në mënyrën më intime të mundshme. Çifti zgjodhi të martohej në dhomën e ndenjes së shtëpisë së tyre, në praninë e vetëm fëmijëve. Pa ceremoni madhështore, pa turma të ftuarish dhe pa nevojën për të impresionuar askënd. Georgina ka treguar për “Vogue” arsyen e veçantë pas këtij vendimi. Për ta, dhoma e ndenjes nuk ishte thjesht një hapësirë e shtëpisë, por vendi ku familja jeton përditshmërinë e saj. “Zgjodhëm dhomën e ndenjes ku hamë mëngjes, drekë dhe darkë, ku jetojmë përditshmërinë tonë”, ka rrëfyer Georgina. Ajo ka shtuar se dëshira e saj është që, pas shumë vitesh, fëmijët të rikthehen te ai moment me një kujtim të ngrohtë: “Pas 30 vitesh dua që fëmijët tanë të mendojnë: diçka e bukur ndodhi këtu, në këtë tavolinë, prindërit tanë shkëmbyen betimet e martesës.” Një zgjedhje që, në një kohë kur dasmat e personazheve të famshëm shpesh shndërrohen në spektakle luksoze, vjen si një mesazh i thjeshtë: për Ronaldon dhe Georginën, rëndësi kishte familja dhe jo madhështia e ceremonisë. Në fund, nuk kishte nevojë për një ambient luksoz apo qindra të ftuar. Mjaftonte shtëpia e tyre, fëmijët dhe tavolina rreth së cilës familja mblidhet çdo ditë. Ndonjëherë, momentet më të mëdha të jetës nuk kanë nevojë për një skenë të madhe. ❤️

10K views

Më 17 gusht 2022 raportuam për një tender të Bashkisë Tiranë për Përditësimin e Sistemit Telefonik dhe Modernizimin e Shërbimeve të Komunikimit, me numër reference REF-35653-07-06-2022. Dokumentet e prokurimit tregojnë se në garë morën pjesë tre operatorë: SYNAPSE ATS, bashkimi ADVANCED BUSINESS SOLUTIONS-ABS me INFORMATION BUSINESS SYSTEMS-IBS dhe COMMUNICATION PROGRESS. Fitues u shpall kjo e fundit, me ofertë 12,783,500 lekë pa TVSH dhe vlerë kontrate 13,294,469 lekë me TVSH, ndërsa kontrata u lidh më 7 shtator 2022. Afati parashikonte dy muaj për implementimin dhe 24 muaj mirëmbajtje. Në atë kohë, shkrimi ngrinte pikëpyetje mbi koston e tenderit dhe arsyetimin ekonomik të investimit, duke e lidhur atë me nevojën për modernizimin e komunikimit të Bashkisë dhe pajisjen e 115 përdoruesve. Por një verifikim i sotëm i dokumenteve zyrtare sjell edhe një korrigjim të rëndësishëm: fondi limit i publikuar në dokumentet e tenderit rezulton 13,294,469 lekë pa TVSH, ndërsa jo 160 milionë lekë të vjetra me TVSH siç u raportua në shkrimin e vitit 2022. Po ashtu, oferta fituese ishte më e ulët se oferta e SYNAPSE ATS prej 13,075,000 lekësh pa TVSH? Jo dokumenti i njoftimit të fituesit tregon se kjo ofertë ishte e dyta vetëm nëse krahasimi bëhet me operatorët e kualifikuar dhe kriteret e tenderit; dy ofertuesit e tjerë u skualifikuan për mosplotësim të kritereve të dokumentacionit dhe kushteve të procedurës. Katër vite më pas, nga verifikimi i burimeve publike të disponueshme nuk rezulton një hetim i posaçëm i bërë publik nga SPAK për këtë tender konkret.

7400 views

Një qytetar i është drejtuar redaksisë për të bërë një thirrje pas humbjes së një portofoli dje, pranë Big Market në Spitallë të Durrësit. Sipas tij, në pamjet filmike duken qartë personat që e kanë gjetur portofolin, si edhe targa e automjetit me të cilin ata janë larguar. Familja kërkon që personat që e kanë gjetur portofolin t’i kthejnë dokumentet dhe kartat, duke theksuar se paratë nuk i kërkojnë. Apeli i tyre është që portofoli dhe dokumentet të dorëzohen, pasi janë të nevojshme për personin që i ka humbur. Denoncim: Përshëndetje JOQ. Na ka humbur një portofol dje te Big Market në Spitallë të Durrësit. Në video shikohen qartë personat që e kanë gjetur, si edhe targa e makinës. Ju lutemi, nëpërmjet jush, t’u bëjmë thirrje që të na kthejnë kartat dhe dokumentet. Paratë nuk i duam.

34.4K views

Ylli Zalla është arrestuar nga Policia e Shtetit gjatë një operacioni të zhvilluar në Krujë. Sipas Ministrisë së Brendshme, operacioni i koduar “Fundi i Arratisë” u finalizua nga Forcat Speciale RENEA, Drejtoria e Forcës së Posaçme Operacionale, strukturat operacionale të Tiranës dhe Komisariati i Policisë Krujë. Zalla ishte shpallur në kërkim pas zbulimit të një arsenali armësh më 20 shkurt të këtij viti dhe dyshohet si bashkëpunëtor në atentatin e Rinasit. Një ditë para arrestimit, banesa e tij ishte sulmuar me tritol, ndërsa si pasojë e shpërthimit ishte shkrumbuar edhe automjeti i tij tip “Benz”. Zalla konsiderohej person shumë i kërkuar dhe me rrezikshmëri të lartë shoqërore, ndërsa prej kohësh i shmangej drejtësisë. Arrestimi i tij është cilësuar nga Policia e Shtetit si finalizim me sukses i operacionit “Fundi i Arratisë”, ndërsa hetimet pritet të vijojnë për të zbardhur rolin e tij në ngjarjet për të cilat është vënë në kërkim.

26.6K views

Aleksandri, një i ri shqiptar i është drejtuar redaksisë me një kërkesë për të përcjellë një mesazh për ish-partneren e tij, Anisën, me të cilën thotë se nuk ka pasur kontakt prej rreth një viti e gjysmë. Duke shkruar nga Islanda, ai shpreson që mesazhi i tij të arrijë tek ajo dhe të mundësojë një rikthim të kontaktit mes tyre. Në mesazhin e tij, i riu i kërkon falje Anisës për çdo fjalë të keqe që mund t’i ketë thënë dhe për çdo moment kur e ka lënduar. Ai shprehet se është penduar për të kaluarën dhe se mungesa e saj ka qenë e madhe gjatë kësaj periudhe pa komunikim. Mesazhi Përshëndetje, JOQ Albania. Jam Aleksandri, doja të bëja një thirrje për ish-in tim, quhet Anisa, dhe doja t’ia dërgoja këtë mesazh nga Islanda. Kisha dëshirë që ajo ta shikonte këtë mesazh që kam shkruar. I kërkoj falje për çdo fjalë të keqe që i kam thënë dhe për çdo fjalë që e ka bërë të ndihet e lënduar. Po bëhet gati një vit e gjysmë që nuk kam më kontakt me Anisën dhe do të doja shumë që ajo të rikthehej, sepse më mungon shumë. Do të jepja edhe shpirtin për të.

8353 views

Një qytetar nga Ksamili ka denoncuar mungesën e ujit të pijshëm në zonë, duke pretenduar se prej rreth një muaji e gjysmë furnizimi nga rrjeti është thuajse i papërfillshëm. Sipas tij, nga rrjeti vijnë vetëm rreth 10 litra ujë, duke e bërë situatën veçanërisht të vështirë për banorët dhe bizneset në këtë periudhë të sezonit turistik. Qytetari, i cili menaxhon një hotel, thotë se deri tani ka shpenzuar rreth 2 milionë lekë për autobote, ndërsa vetëm për shtëpinë ku banon ka harxhuar rreth 200 mijë lekë. Ai e cilëson situatën skandaloze, duke theksuar se Bistrica ndodhet shumë pranë zonës, dhe kërkon ndërhyrjen e institucioneve për të zgjidhur problemin e furnizimit me ujë. Denoncim: Kjo është situata e ujit në Ksamil. Kaq ujë vjen nga rrjeti. Jemi me fat po të bëjmë 10 litra ujë në total. Kemi rreth një muaj e gjysmë pa ujë. Menaxhoj një hotel dhe kemi harxhuar rreth 2 milionë lekë për autobotet deri tani. Vetëm në shtëpinë ku banoj kemi harxhuar 200 mijë lekë. Është skandaloze, duke pasur Bistricën fare pranë. Ju lutem, postojeni anonim.

7984 views

Një video e mbërritur në redaksinë e JOQ Albania sjell një tjetër version lidhur me konfliktin e regjistruar në Sarandë, ku u përfshi shefi i Krimeve, Mateo Bakalli. Sipas personit që ka dërguar pamjet, ngjarja ka nisur brenda një lokali, ku shefi i Krimeve dyshohet se ka ngacmuar një vajzë. Pas këtij episodi, badigardët e lokalit e kanë nxjerrë atë jashtë ambienteve. Sipas këtij versioni, pikërisht jashtë lokalit ka nisur konflikti fizik dhe më pas në situatë janë përfshirë edhe efektivë të tjerë të policisë. Në videon e siguruar nga JOQ, shihet një person duke u goditur me grushte, ndërsa pranë tij ndodhet një tjetër i prangosur. Sipas qytetarit, në pamje janë shefi i Krimeve dhe një efektiv i forcave “Shqiponja”, të cilët shfaqen duke goditur badigardin. Ky version ndryshon ndjeshëm nga informacioni fillestar i bërë publik, sipas të cilit shefi i Krimeve ishte personi i dhunuar gjatë një konflikti me disa persona. Pamjet e siguruara nga redaksia ngrenë pikëpyetje mbi dinamikën e ngjarjes dhe mënyrën se si ka nisur përplasja. Pretendimi se konflikti ka nisur pas ngacmimit të një vajze është pjesë e dëshmisë së personit që ka dërguar videon dhe nuk është konfirmuar zyrtarisht. Hetimet pritet të përcaktojnë se çfarë ka ndodhur në të vërtetë dhe përgjegjësinë e secilit prej personave të përfshirë.

22.6K views

Një shpërthim me lëndë të dyshuar plasëse është regjistruar gjatë natës në fshatin Zallë të Fushë-Krujës, ku objektiv ka qenë banesa e Ylli Zallës. Sipas informacioneve paraprake, lënda e dyshuar plasëse është vendosur në derën e banesës, duke shkaktuar dëme materiale. Nga shpërthimi ka marrë flakë edhe automjeti në pronësi të Zallës, i cili ishte parkuar pranë banesës dhe është djegur. Në vendngjarje ka mbërritur grupi hetimor, i cili po punon për dokumentimin e plotë të rastit, identifikimin dhe kapjen e autorit. Për momentin nuk raportohet për persona të lënduar, ndërsa hetuesit po mbledhin prova dhe po verifikojnë rrethanat në të cilat është kryer sulmi. Policia po heton për të zbardhur edhe motivet e mundshme të ngjarjes. Ylli Zalla ndodhet në arrati dhe është një person i kërkuar nga autoritetet. Në qershor të këtij viti, një operacion i Policisë së Tiranës, në bashkëpunim me forcat speciale RENEA, u zhvillua në fshatin Zallë për kapjen e 49-vjeçarit, por operacioni përfundoi pa arrestimin e tij.

18.5K views

Shefi i Krimeve në Sarandë, Mateo Bakalli, është dhunuar në orët e para të mëngjesit pas një konflikti fizik me disa persona. Sipas informacioneve paraprake, përplasja ka nisur mes Bakallit dhe disa personave të tjerë dhe më pas ka përshkallëzuar në dhunë fizike. Pas ngjarjes ku u dhunua shefi i Krimeve në Sarandë, Mateo Bakalli, avokati Arben Llangozi ka reaguar publikisht duke ngritur një sërë akuzash dhe pikëpyetjesh mbi mënyrën se si funksionon Komisariati i Policisë në Sarandë. Llangozi e nis reagimin me pyetjen “Kush është ‘padrinoja’ i Sarandës?” dhe pretendon se qytetarë të ndryshëm janë shoqëruar në komisariat pa motiv, duke u vendosur nën presion. Në reagimin e tij, avokati përmend drejtuesin e Komisariatit të Sarandës, Feliks Hoda, duke pretenduar se autoriteti policor mund të jetë përdorur për interesa private, presion apo konflikte të ndryshme. Llangozi thekson se policia duhet të veprojë vetëm brenda kufijve të ligjit dhe se uniforma dhe autoriteti shtetëror nuk mund të përdoren për të frikësuar apo shantazhuar qytetarët. Ai kërkon që këto pretendime të verifikohen nga institucionet përgjegjëse. Avokati i drejton pyetjet e tij ndaj Agjencisë së Mbikëqyrjes Policore, Prokurorisë dhe drejtuesve të Policisë së Shtetit, duke kërkuar të sqarohet se kush kontrollon strukturat policore kur ndaj tyre ngrihen akuza të tilla.

5538 views

Situata është tensionuar gjatë natës në kufirin mes Marokut dhe Ceutës, enklavës spanjolle në Afrikën e Veriut, ku qindra migrantë kanë tentuar t’i afrohen kufirit dhe të kalojnë ilegalisht në territorin spanjoll. Sipas raportimeve të mediave spanjolle, autoritetet marokene kanë ndërhyrë për të ndaluar grupet që po lëviznin drejt zonës kufitare. Operacioni i sigurisë është zhvilluar me forca të shumta policore, ndërsa janë përdorur edhe mjete ajrore për monitorimin e lëvizjeve pranë kufirit. Raportimet flasin për rreth 300 persona të bllokuar nga autoritetet marokene gjatë përpjekjeve për t’iu afruar Ceutës. Një pjesë e tyre janë larguar nga zona me autobusë, ndërsa disa persona janë arrestuar nën dyshimin se kanë organizuar ose nxitur përpjekjet për kalim të paligjshëm. Përpjekja e fundit ka rikthyer vëmendjen te situata e brishtë në kufirin e Ceutës, një nga pikat më të ndjeshme të emigracionit drejt territorit të Bashkimit Europian. Autoritetet spanjolle dhe marokene kanë shtuar kontrollet përgjatë kufirit, ndërsa forcat e sigurisë vijojnë të monitorojnë situatën për të parandaluar grumbullime të tjera dhe tentativa për kalim. Ceuta, së bashku me Melillën, përbën një nga dy territoret spanjolle në Afrikën e Veriut dhe prej vitesh është një nga pikat kryesore ku migrantët tentojnë të hyjnë në territorin e BE-së nga Afrika.

14.5K views

Një zjarr i fuqishëm ka përfshirë rreth orës 05:30 të mëngjesit të kësaj të diele, një resort, përgjatë rrugës Sarandë–Syri i Kaltër. Flakët kanë përfshirë të gjithë resortin, duke e shkrumbuar thuajse plotësisht. Deri tani nuk raportohet për persona të lënduar, ndërsa përmasat e dëmeve materiale janë të konsiderueshme. Për momentin nuk dihen shkaqet e rënies së zjarrit. Pritet që hetimet dhe verifikimet në vendngjarje të përcaktojnë rrethanat e ngjarjes dhe origjinën e flakëve. Resorti ishte ndërtuar rreth tre vite më parë dhe konsiderohej një prej investimeve të rëndësishme turistike në zonën e Mesopotamit, duke u kthyer në një pikë të njohur përgjatë aksit që lidh Sarandën me Syrin e Kaltër. Zjarri në resortin e Sarandës vjen në një mëngjes të shoqëruar nga një tjetër incident i rëndë, ai në një hotel në Lungomaren e Vlorës. Nga zjarri në Vlorë janë lënduar 6 persona, 5 prej të cilëve janë transportuar për trajtim në Tiranë, ndërsa dy prej tyre raportohen me djegie të rënda. Ndërkohë, autoritetet po vijojnë hetimet për të zbardhur shkaqet e të dyja ngjarjeve.

65.4K views

Luan Salihu, 21 vjeç, ia doli t’u shpëtonte flakëve që përfshinë hotelin në Lungomaren e Vlorës duke u hedhur nga ballkoni i dhomës së tij në katin e dytë. I riu nga Lipjani ndodhej në gjumë bashkë me të fejuarën, e cila e zgjoi pasi dëgjoi zhurma dhe kuptoi se diçka nuk shkonte. Para tyre u shfaq një skenë paniku, me tym që kishte mbushur korridorin dhe flakë që kishin mbërritur në pjesën e ballkonit. “Jam nga Lipjani. Ishim në gjumë, ora 3, gati 4. Kërcitje, e fejuara u çua e para, më tha çohu nga gjumi se s’di ç’ka ndodhur. U çuam të dilnim nga dera, ishte tym, hyri tymi brenda. Dolëm nga ballkoni, ishte flakë e tym, kishte një mburojë, hipëm sipër saj dhe kërcyem poshtë”, rrëfen 21-vjeçari. Ai tregon se nuk pësoi djegie, ndërsa gjatë hedhjes u dëmtua në këmbë pasi ra mbi një cep hekuri. Në gjendje të mirë shëndetësore është edhe e fejuara e tij. Salihu tregon se gjatë momentit të arratisjes nga hoteli ka parë edhe persona të tjerë që përpiqeshin të shpëtonin nga flakët, mes tyre një familje me një fëmijë të vogël dhe një burrë. “Ishte dita e dytë në hotel”, thotë i riu nga Lipjani, duke përshkruar momentet e frikshme që përjetoi gjatë zjarrit.

126.5K views

Lihtenshtejni ka ndryshuar rregullat e trashëgimisë së fronit, duke i hapur rrugën grave për t’u ngjitur në fron. Njoftimi u bë në Ditën Kombëtare të principatës, e cila ka një popullsi prej rreth 44 mijë banorësh. Sundimtari aktual, Princi Hans-Adam II, është në krye të familjes princërore që prej vitit 1989, ndërsa ndryshimi i ri nuk prek linjën aktuale të trashëgimisë, pasi trashëgimtari i fronit mbetet djali i tij i madh, Princi i Kurorës Alois. Sipas Shtëpisë së Lihtenshtejnit, rendi i trashëgimisë do të kalojë nga parimi i trashëgimisë mashkullore në trashëgiminë absolute sipas rendit të lindjes. Kjo do të thotë se në të ardhmen fëmija i parë, pavarësisht nëse është djalë apo vajzë, do të ketë përparësi në trashëgiminë e fronit dhe mund të bëhet princ ose princeshë e Lihtenshtejnit. Ndryshimi do të zbatohet vetëm për pasardhësit e katër fëmijëve të Princit të Kurorës Alois dhe bashkëshortes së tij, Princeshës së Kurorës Sophie. Alois ka kryer pjesën më të madhe të detyrave zyrtare të familjes princërore gjatë dy dekadave të fundit. “Me këtë ndryshim të ligjit, duam të sigurojmë që si Principata e Lihtenshtejnit, ashtu edhe Shtëpia Princërore, të udhëhiqen nga personi që është përgatitur më së miri për këtë përgjegjësi”, deklaroi Alois. Lihtenshtejni është një shtet i vogël pa dalje në det, i vendosur mes Zvicrës dhe Austrisë, ndërsa sundimtari i tij ka kompetenca të konsiderueshme politike, ndryshe nga shumë monarkë të tjerë evropianë. Ndryshimi i rregullave synon që trashëgimia të përcaktohet nga rendi i lindjes dhe jo më nga gjinia e pasardhësit.

3276 views

Një pushues nga Polonia ka rrëfyer momentet e panikut gjatë zjarrit që përfshiu hotelin Brooklyn në Lungomaren e Vlorës. Ai tregon se gjithçka ndodhi rreth orës 04:00 të mëngjesit, kur pushuesit u zgjuan pasi nuhatën një erë të çuditshme dhe dëgjuan të bërtitura brenda godinës. “U zgjuam natën, nuhatëm diçka të çuditshme, dëgjuam të bërtitura. U hodhëm nga dritarja, thirrëm për ndihmë. Kaq. Jam nga Polonia. Ora ishte rreth 4 e mëngjesit”, tregon pushuesi, duke përshkruar momentet e frikshme kur ai dhe të tjerë u përpoqën të shpëtonin nga flakët dhe tymi. Zjarri përfshiu godinën në Lungomare, ku ndodhej edhe hoteli, ndërsa disa prej pushuesve u detyruan të dilnin nga dritaret për t’i shpëtuar rrezikut. Si pasojë e ngjarjes, 7 persona u transportuan në Spitalin e Vlorës, ndërsa autoritetet kanë nisur hetimet për të përcaktuar shkaqet dhe rrethanat e zjarrit.

17.1K views

JOQ ka siguruar pamjet e dërguara nga një qytetar, ku shihen momentet e panikut gjatë zjarrit që përfshiu hotelin Brooklyn në Lungomaren e Vlorës këtë mëngjes. Në video duket tymi i dendur që del nga godina, ndërsa pushuesit përpiqen të largohen nga hoteli dhe të shpëtojnë nga flakët. Në pamje shihen disa prej pushuesve teksa dalin në ballkone dhe, të gjendur përballë tymit dhe zjarrit, kalojnë bordurat mbrojtëse dhe hidhen poshtë. Pamjet tregojnë momentet e frikshme të evakuimit, ndërsa personat përpiqen të shpëtojnë në çdo mënyrë të mundshme. Zjarri ka shkaktuar disa të plagosur, ndërsa 7 persona janë transportuar në Spitalin e Vlorës. Tre prej tyre janë nisur drejt Tiranës për trajtim më të specializuar, ndërsa katër të tjerë ndodhen në sallën e operacionit. Autoritetet kanë nisur hetimet për zbardhjen e shkaqeve dhe rrethanave të ngjarjes.

79K views

Një zjarr i përmasave të mëdha ka përfshirë një godinë në zonën e Lungomares në Vlorë, ku ndodhej edhe një hotel. Sipas informacioneve paraprake, flakët nisën në lokalin në katin e parë, ndërsa dy frigoriferë të vendosur në hyrje të lokalit dyshohet se pësuan defekt në qarkun elektrik dhe mund të kenë shkaktuar zjarrin. Flakët u përhapën më pas në katin e dytë, ku ndodhej hoteli, si dhe në fasadën e pallatit. Në vendngjarje mbërritën menjëherë Policia dhe shërbimet zjarrfikëse, ndërsa godina u evakuua për shkak të rrezikut. Pavarësisht ndërhyrjes, e gjithë godina është dëmtuar rëndë dhe është shkrumbuar thuajse plotësisht. Si pasojë e zjarrit dhe tymit të dendur, 7 persona kanë mbetur të plagosur dhe janë transportuar në Spitalin e Vlorës. Tre prej tyre janë nisur drejt Tiranës për trajtim më të specializuar, ndërsa katër të tjerë ndodhen në sallën e operacionit. Gjashtë prej të dëmtuarve janë shtetas të Kosovës, ndërsa një tjetër është nga Rrësheni. Në godinë ndodheshin gjithashtu turistë të huaj nga Polonia dhe Ukraina. Për t’u shpëtuar flakëve, disa prej personave kanë dalë nga dritaret dhe janë detyruar të hidhen prej tyre, ndërsa një pjesë e të evakuuarve kanë dalë nga godina përmes rrugëve të tjera të mundshme të shpëtimit. Pas lokalizimit të flakëve, shërbimet e Policisë dhe strukturat përkatëse kanë nisur hetimet për të përcaktuar me saktësi shkaqet dhe rrethanat e zjarrit. Dyshimet e para lidhen me një defekt elektrik në dy frigoriferët në hyrje të lokalit, por shkaku përfundimtar do të përcaktohet nga hetimi. Autoritetet po vijojnë veprimet për dokumentimin e ngjarjes, ndërsa mbetet për t’u përcaktuar edhe shkalla e plotë e dëmeve materiale të shkaktuara nga zjarri.

19.5K views