Një vatër zjarri është aktivizuar mbrëmjen e sotme në malin e Shashicës, në zonën e Kaninës në Vlorë, ndërsa flakët po përhapen me shpejtësi të favorizuara nga erërat e forta. Një dëshmi e mbërritur në redaksinë e JOQ Albania sjell pamje nga zona, ku dallohen flakë të mëdha që po përparojnë në terren. Sipas raportimit të qytetarit, era e vazhdueshme po favorizon përhapjen e zjarrit, duke e bërë më të vështirë kontrollin e vatrës. Zjarri ka përfshirë bimësi dhe shkurre në zonën malore. Shërbimet zjarrfikëse janë angazhuar për ndërhyrjen dhe izolimin e flakëve, ndërsa puna në terren vijon për të parandaluar përhapjen e mëtejshme të zjarrit. Në këtë fazë nuk dihen ende shkaqet e rënies së zjarrit, ndërsa mbetet për t’u përcaktuar edhe sipërfaqja e prekur. Pamjet e mbërritura në redaksinë tonë tregojnë situatën në malin e Shashicës, ku era po favorizon përhapjen e flakëve.

10.7K views

Për të 87-ën ditë radhazi, qytetarët janë mbledhur në Tiranë për të vijuar protestën kundër qeverisë, kryeministrit Edi Rama dhe klasës politike. Pas fjalimeve përpara Kryeministrisë, protestuesit kanë nisur marshimin në rrugët e kryeqytetit, me flamuj kuq e zi në duar dhe thirrje për ndryshim politik. “Shqipëria kërkon revolucion”, “Shqipëria e shqiptarëve, vdekje tradhtarëve” dhe “Poshtë komunistët” janë ndër thirrjet që janë dëgjuar gjatë marshimit. Edhe këtë mbrëmje, në krye të turmës janë parë nënat, vajzat dhe gratë, të cilat prej ditësh i prijnë marshimit duke mbajtur flamujt kombëtarë. Protesta qytetare ka hyrë tashmë në ditën e 87-të, ndërsa qytetarët vijojnë të kërkojnë largimin e qeverisë dhe ndryshimin e klasës politike. 87 ditë në rrugë, mijëra thirrje në kor dhe një pyetje që mbetet ende pa përgjigje: A do të jetë kjo protestë ajo që do të sjellë ndryshimin e klasës politike? Po ju, si e shihni?

16.6K views

Një video e publikuar nga një eurodeputet grek, ku shfaqet një rrugë në Athinë me një prani të dukshme të emigrantëve, ka ndezur një debat të fortë në rrjetet sociale në Greqi. “Si përfundoi kështu vendi ynë?”, “Athina jonë nuk njihet më” dhe “Kemi humbur vendin tonë” janë disa nga komentet e përdoruesve, ndërsa të tjerë e lidhin situatën me politikat e qeverisë për emigracionin dhe integrimin. Në mesin e komenteve ka edhe reagime shumë më të ashpra, por debati kryesor që ngre videoja është më i gjerë: sa emigracion mund të përballojë një shtet dhe si menaxhohet ndryshimi demografik pa cenuar kohezionin shoqëror? Kjo është një pyetje që nuk i përket vetëm Greqisë. Shqipëria po hyn gjithashtu në një fazë të re. Ndërsa mijëra shqiptarë largohen çdo vit dhe numri i lindjeve është në nivele shumë të ulëta, vendi po tërheq gjithnjë e më shumë fuqi punëtore nga jashtë. Të dhënat më të fundit të INSTAT tregojnë se në fund të vitit 2025 në Shqipëri rezultonin 32,163 shtetas të huaj me leje qëndrimi, 46.6% më shumë se në vitin 2024. Punësimi ishte arsyeja kryesore e qëndrimit, me 55.1% të lejeve. Rritja më e madhe është regjistruar te shtetasit nga Azia: numri i tyre arriti në 9891 persona, duke u rritur me 117.6% brenda një viti. India dhe Filipinet janë ndër vendet që kanë shënuar rritjen më të fortë, teksa bizneset shqiptare po kërkojnë punonjës për shërbime, akomodim dhe punë të tjera ku ka mungesë fuqie punëtore. Në të njëjtën kohë, Shqipëria po tkurret demografikisht. Sipas INSTAT, popullsia në 1 janar 2025 ishte 2,363,314 banorë, 1.2% më pak se një vit më parë. Vetëm gjatë vitit 2024, migracioni neto ishte negativ me 28,836 persona. Kjo nuk do të thotë se çdo i huaj që vjen në Shqipëri për të punuar përbën problem. Përkundrazi, ekonomia shqiptare ka sektorë që realisht kanë nevojë për fuqi punëtore dhe emigracioni i rregullt mund të jetë pjesë e zgjidhjes. Por pikërisht këtu nis debati që Shqipëria nuk duhet ta shmangë. A po përdoret ardhja e punëtorëve të huaj si zgjidhje afatshkurtër për një krizë demografike që kërkon zgjidhje shumë më të thella? Një politikë serioze duhet të përfshijë njëkohësisht mbështetjen e familjeve shqiptare, rritjen e lindshmërisë, krijimin e kushteve që të rinjtë të mos largohen dhe një politikë të qartë për emigracionin: sa punëtorë nevojiten, në cilët sektorë, me çfarë kriteresh dhe si sigurohet integrimi i tyre. Videoja nga Athina mund të interpretohet në shumë mënyra, por një mësim është i qartë: ndryshimet demografike nuk ndodhin brenda natës. Ato menaxhohen me politika shumëvjeçare. Dhe Shqipëria, me popullsi në rënie dhe me numrin e të huajve që rritet me ritme të shpejta, ndoshta duhet ta nisë këtë debat tani, jo kur të jetë tepër vonë.

18.4K views

Nëse ende nuk e kishit marrë vesh, bankat shqiptare po kacafyten për toka në Zvërnec... Drejtori i bankës së parave ruse Raiffeisen Bank Lizandër Saraçi është bërë organizator i protestave kundër qeverisë, ndërsa synon t'i prishë punë kolegut të tij drejtorit të bankës së PS ABI Bank, Andi Balltës përfituesit të disa mijëra metra katrorë në tokën e lakmuar nga biznesmenët. Ndërkohë që SPAK-u numëron lekët dhe fshin djersët me to, fronti i bankave në Shqipëri është ndarë dysh: në njërën anë kemi Abi Bank që ka kapur e ka bërë çiflig gjithë Zvërnecin për llogari të padronëve të saj, dhe në krahun tjetër, shfaqet "kapiteni i revoltave", drejtori i parave ruse Raiffeisen Bank. Një bankier që bën sikur mbron popullin, ndërkohë që llogaritë i ka të zhytura në miliona euro transaksionesh të dyshimta. Përderisa ABI Bank ka kapur e ka bërë çiflig hektarë të tërë tokë në Zvërnec, fronti tjetër financiar ka gjetur një metodë edhe më kreative për të bërë opozitë: Protestën me telekomandë nga zyrat e bankës. Në qendër të këtij skenari figuron Lizandër Saraçi, Drejtor i Menaxhimit të Rrezikut në Raiffeisen Bank. I shfaqur herë si matematicien, herë si analist tregjesh, herë si aktivist politik e herë si strateg në hije, Saraçi rezulton të jetë dirigjenti i fshehtë i protestave në Bulevard. Ironia e fatit? Njeriu që del me megafon për të bërtitur kundër qeverisë dhe për të mbrojtur "drejtësinë e cenuar" nga ngjarjet e Zvërnecit fuke sulmuar kolegun që i rrëmbeu tokën nën këmbë. Mjeshtrat e "Overdraftit" dhe fshehjes së parave kineze Por historia e Raiffeisen nuk mbaron te protestat e natës. Kur bëhet fjalë për të ndihmuar klientë të veçantë t'i shmangen shtetit shqiptar, banka ka treguar aftësi akrobatike. Sipas hetimeve të SPAK dhe Prokurorisë së Fierit, teksa shteti dhe përmbaruesit sorollateshin me vendime gjykate në duar për t'i marrë detyrimet e prapambetura kompanisë kineze Bankers Petroleum, Raiffeisen i erdhi në ndihmë me një skemë prej 9 milionë dollarësh përmes një "overdrafti magjik". Kompania kineze harxhonte paratë e overdraftit për të bërë pagesa në Shqipëri dhe i zëvendësonte ato nga llogaritë në Vjenë, duke u kujdesur që llogaria të mos kalonte kurrë në shifra pozitive. Kështu, Bankers i shpëtoi sekuestrove tatimore dhe gjobës famoze 120 milionë euro të doganave, ndërsa miliona euro të pasurisë nëntokësore të Shqipërisë devijoheshin qetësisht përmes kanaleve austro-shqiptare.

5683 views

Rasti i parë me Ethet e Nilit Perëndimor në Shqipëri është konfirmuar zyrtarisht në qytetin e Korçës, ku një 72-vjeçar ka rezultuar i infektuar nga ky virus. I moshuari fillimisht ka shfaqur probleme shëndetësore dhe i është drejtuar spitalit rajonal, ku pas kryerjes së analizave mjekësore u konfirmua prania e virusit. Momentalisht ai ndodhet i shtruar në spital ku po merr trajtimin e nevojshëm mjekësor. Detaje lidhur me rastin ka dhënë epidemiologia e Institutit të Shëndetit Publik, e cila bëri me dije se deri më tani ky mbetet i vetmi rast i identifikuar dhe se nuk ka raste të tjera të konfirmuara apo të dyshuara në vend. Sipas ISHP-së, 72-vjeçari nuk ka udhëtuar jashtë Shqipërisë, ndaj dyshohet se infektimi ka ardhur si pasojë e pickimit të një mushkonje brenda territorit. Epidemiologia sqaroi se sëmundja transmetohet përmes mushkonjave bartëse të cilat e marrin virusin nga zogjtë apo kuajt e infektuar, duke theksuar gjithashtu se virusi transmetohet vetëm nga mushkonjat dhe nuk transmetohet nga njeriu tek njeriu.

5905 views

Një tjetër situatë shqetësuese raportohet këtë mbrëmje në malin e Dajtit, ndërsa zona është përballur me zjarre të përsëritura gjatë ditëve të fundit. Pamjet e dërguara pak minuta më parë në redaksinë e JOQ Albania tregojnë malin e Dajtit të përfshirë nga tymi, me disa zona të shpatit ku dallohet përhapja e zjarrit. Nga distanca, pamjet krijojnë përshtypjen e disa vatrave ose të një zjarri që është përhapur në disa pika të shpatit. “Përshëndetje JOQ, sapo ia vendosën zjarrin malit të Dajtit”, shkruan qytetari që ka dërguar videon. Pamjet marrin një tjetër rëndësi për shkak të situatës së krijuar në Dajt gjatë ditëve të fundit. Zjarri në këtë zonë ka vijuar prej disa ditësh dhe më 19 gusht autoritetet raportuan se në Dajt po vijonte operacioni me dhjetëra efektivë të Forcave të Armatosura, zjarrfikës dhe forca të zonave të mbrojtura. Më 23 gusht, Dajti vijonte të ishte ndër vatrat aktive të zjarrit në vend, ndërsa në operacion ishin angazhuar edhe 30 efektivë të Forcave të Armatosura. Më 24 gusht situata mbeti aktive në terren të vështirë, me 30 efektivë të FA-së, 30 zjarrfikës dhe një helikopter të angazhuar në zonë. Edhe dje, më 25 gusht, Ministria e Mbrojtjes raportoi se vatra në malin e Dajtit vijonte aktive, në zonën mbi tunelet e Qafë Mollës, ku po ndërhyhej me forca zjarrfikëse, efektivë të FA-së dhe helikopter. Tashmë, pamjet e reja të mbërritura në JOQ Albania ngrenë një pyetje të fortë: Kush po ia vë flakën Dajtit? Nëse bëhet fjalë për një vatër të re, në një zonë ku zjarri ka vijuar prej ditësh, mbetet për t’u përcaktuar nga autoritetet nëse kemi të bëjmë me riaktivizim të zjarrit apo me një tjetër vatër dhe cili ka qenë shkaku i saj. Për momentin, pamjet e qytetarit nuk mjaftojnë për të konfirmuar se zjarri është vendosur qëllimisht, por situata kërkon vëmendje dhe verifikim të menjëhershëm nga autoritetet.

20K views

Në një kohë kur mijëra familje shqiptare përballen çdo ditë me rritjen marramendëse të çmimeve të pasurive të paluajtshme dhe normat e larta të interesave bankare, qeveria ka vendosur të preferojë sërish me para publike "të përzgjedhurit" e saj. Ministrja e Ekonomisë dhe Inovacionit, Delina Ibrahimaj, njoftoi hapjen e thirrjes për 300 kredi të lehtësuara me 0% interes për blerje banese, të destinuara ekskluzivisht për punonjësit e administratës publike. Thirrja hapet më 27 gusht dhe do të qëndrojë e hapur deri më 25 shtator. Sipas skemës së njoftuar, financimi do të bëhet sipas çmimeve të referencës, ndërsa sipërfaqja e banesës do të llogaritet mbi bazën e certifikatës familjare. Kuotat janë ndarë mes pesë institucioneve: Ministria e Shëndetësisë, Ministria e Mbrojtjes, Ministria e Arsimit dhe Ministria e Punëve të Brendshme marrin nga 70 kuota secila, ndërsa 20 kuota të tjera i lihen Policisë së Burgjeve (nën Ministrinë e Drejtësisë). Aplikimet do të kryhen përmes portalit e-Albania. Sipas kriterit të vendosur, aplikantët duhet të jenë pjesë e administratës publike, të mos kenë banesë në pronësi apo pasuri të tjera që kalojnë gjysmën e vlerës së shtëpisë që do të blejnë, si dhe të mos kenë përfituar më parë nga skemat sociale. Mirëpo, pas këtyre kritereve zyrtare fshihet një realitet mjaft diskriminues për qytetarët e thjeshtë. Ndërsa punonjësit e administratës, mes të cilëve operojnë edhe ushtritë e patronazhistëve të pushtetit, marrin kredi me zero interes të paguara nga taksat e të gjithëve, pjesa tjetër e popullsisë lihet në mëshirë të fatit. Qytetarët që punojnë në sektorin privat përballen çdo ditë me kushte të papërballueshme bankare, ndërsa ëndrra për të blerë një shtëpi po i shtyn gjithnjë e më shumë drejt emigrimit.

3267 views

Një 31-vjeçar nga India është arrestuar në orët e para të mëngjesit të 23 gushtit, pasi u kap nga policia mbi çatinë e një banese në zonën e Kombinatit, në Tiranë. I riu kishte tentuar të hynte në shtëpi përmes një dritareje të vogël në çati, me qëllim grabitjen e sendeve me vlerë. Bëhet fjalë për Manpreet Nanak Chand Manpreet, ndaj të cilit Gjykata e Tiranës ka caktuar masën e sigurisë “arrest në burg”, pas kërkesës së prokurorit Petrit Vukaj. 31-vjeçari po hetohet për veprën penale “Vjedhja”, e mbetur në tentativë. Sipas të dhënave të administruara në dosjen hetimore, prania e të riut në çatinë e banesës në rrugën “Veli Vraniqi” është konstatuar fillimisht nga pronari i shtëpisë, shtetasi me inicialet E.P., rreth orës 23:48 të 22 gushtit. Pronari ka deklaruar se ishte në gjumë kur dëgjoi një zhurmë që vinte nga jashtë, në pjesën perëndimore të banesës. Pasi doli për të parë se çfarë po ndodhte, ai ka vënë re mbi çati një person të panjohur, me flokë të zinj, trup të dobët dhe rreth 170 centimetra të gjatë. Sipas dëshmisë së tij, personi nuk kishte arritur të depërtonte në banesë. Ai kishte mbetur në çati, ndërsa pronari ka njoftuar menjëherë policinë. Pas mbërritjes së efektivëve të Komisariatit Nr. 6, 31-vjeçari është detyruar të zbresë nga çatia dhe më pas është shoqëruar nga shërbimet e policisë kriminale. Arrestimi i tij është kryer rreth orës 01:10 të 23 gushtit. Gjatë verifikimeve të kryera pas arrestimit, policia ka konstatuar se Manpreet Nanak Chand Manpreet ishte shoqëruar në komisariat edhe dy ditë më parë. Sipas hetimeve, ai ishte përfshirë në një konflikt me një qytetar, të cilit dyshohet se i kishte dëmtuar xhamin e automjetit. Për këtë ngjarje, 31-vjeçari ishte lënë i lirë dhe procedohej në gjendje të lirë. Pas arrestimit atij i është caktuar masa e sigurisë arrest me burg nga argumentet se ekziston rreziku që shtetasi i huaj të largohet nga Shqipëria gjatë procesit hetimor. Në seancë, Manpreet nuk ka pranuar të japë deklarime lidhur me ngjarjen. Ai ka pretenduar se do të flasë në një moment tjetër të procesit.

7588 views

Një pushues i është drejtuar redaksisë së JOQ Albania për të denoncuar gjendjen e ujit të detit në Vlorë. Sipas tij, uji në këtë zonë ka një ngjyrë të pazakontë, është i turbullt dhe shoqërohet edhe me një erë të rëndë. “Po jua dërgoj edhe një video, po nuk e di a shihet mirë ngjyra e ujit. Po ngjyra e ujit është shumë e keqe edhe kundërmon”, shkruan qytetari. Në pamjet e dërguara në redaksi, uji pranë bregut duket i turbullt dhe me ngjyrë të gjelbër-kafe, ndërsa në sipërfaqe dallohen edhe mbetje bimore apo alga. Shqetësimi është edhe më i madh për shkak se bëhet fjalë për një plazh të frekuentuar nga pushues, të cilët vijojnë të futen në det pavarësisht situatës së konstatuar në pamje. Nuk mund të përcaktohet vetëm nga pamjet shkaku i ndryshimit të ngjyrës së ujit apo nëse bëhet fjalë për ndotje, ndaj situata kërkon verifikim dhe analiza nga institucionet përgjegjëse. JOQ Albania publikon pamjet e dërguara nga pushuesi për të sjellë shqetësimin në vëmendje të autoriteteve dhe për të kërkuar verifikimin e cilësisë së ujit në këtë zonë të bregdetit të Vlorës.

2814 views

Një qytetar i është drejtuar redaksisë së JOQ Albania për të ndarë një pamje të pazakontë të filmuar në një rrugë interurbane. Në video shfaqet një automjet tip Mercedes-Benz SUV, mbi çatinë e të cilit është vendosur një dele e gjallë, së bashku me bagazhe dhe sende të tjera. Kafsha duket se është lidhur mbi pjesën e sipërme të automjetit dhe transportohet në këtë mënyrë gjatë lëvizjes në rrugë. Pamja ka ngjallur shqetësim për sigurinë e kafshës, por edhe për rrezikun që një transport i tillë mund të krijojë për përdoruesit e tjerë të rrugës. JOQ Albania publikon pamjet e dërguara nga qytetari, duke sjellë në vëmendje këtë mënyrë të pazakontë transporti.

13.1K views

Ndërsa debati politik për performancën e ligjvënësve vijon, faturat financiare që ata i kushtojnë buxhetit të shtetit mbeten një nga çështjet me interesin më të madh publik. Pasqyrat financiare të Kuvendit të Shqipërisë zbulojnë shifrat e detajuara të shpenzimeve për deputetët gjatë muajit korrik 2026. Përveç pagës bazë prej afro 2,000 eurosh në muaj, ligjvënësit përfitojnë edhe paketa të majme shtesë. Këto përfitime përfshijnë deri në 400 euro në muaj për karburant, 170 euro për shpenzime telefonike, si dhe shuma të konsiderueshme për dieta udhëtimesh brenda vendit, rimbursim qira banese dhe fatura hoteli. Lista e ligjvënësve që kanë arkëtuar shumat më të larta të përfitimeve dytësore (pa përfshirë pagën bazë) kryesohet nga emra që në pjesën më të madhe mbeten figura kryesisht anonime në sferën publike, me pak ose aspak prani në debatin parlamentar: Antoneta Dhima: 2,812 € Elton Korreshi: 2,812 € Zamira Sinaj: 2,812 € Erjo Mile: 2,794 € Bledi Çomo: 2,794 € Ledina Alolli: 2,757 € Zegjine Çaushi: 2,738 € Ilirjan Pendavinji: 2,720 € Fadil Nasufi: 2,702 € Kiduina Zaka: 2,702 € Struktura e shpenzimeve dytësore Në total, Kuvendi ka shpenzuar 250,997 euro vetëm për përfitimet dytësore të deputetëve gjatë muajit korrik, të ndara si më poshtë: Dieta për udhëtimet brenda vendit: 156,243 € Rimbursim për karburant: 49,512 € Rimbursim për shpenzime telefonie: 23,991 € Honorare për mbledhjet e komisioneve: 14,484 € Rimbursim për qira banese: 6,570 € Rimbursim faturë hoteli: 194 € Fatura totale për buxhetin e shtetit Duke mbledhur të gjithë zërat financiarë: 290,000 euro për pagat bazë dhe 250,997 euro për përfitimet ekstra. Rezulton se vetëm gjatë muajit korrik deputetët i kanë kushtuar buxhetit të shtetit një shumë totale prej 540,997.15 eurosh (afro 541 mijë euro).

6524 views

Kompania koncesionare "Vlora International Airport" (VIA) po përgatit një padi kundër qeverisë shqiptare në Gjytatën e Arbitrazhit të Londrës, pas vendimit të Ministrisë së Infrastrukturës për të anuluar kontratën koncesionare. Ndryshe nga paditë e zakonshme, kjo kërkesë nuk lidhet me dëmshpërblim financiar, por synon marrjen e një mase sigurimi për të bllokuar procedurën e zgjidhjes së kontratës. Përplasja mes palëve nisi pasi VIA aktivizoi nenin 21 të kontratës për zgjidhjen e mosmarrëveshjeve me mirëkuptim. Egzekutivi e refuzoi këtë kërkesë duke deklaruar se pretendimet e kompanisë bien ndesh me raportimet zyrtare dhe punimet e konfirmuara në terren, duke vijuar zyrtarisht me procedurën e anulimit. Aktualisht, VIA drejtohet nga administratori Vegim Hoxha (i vendosur nga kompania "2A Group"), pas ngrirjes së aksioneve të shoqërisë "Mabco". Nga ana tjetër, "Mabco" e Behgjet Pacollit ka paralajmëruar padi për dëmshpërblim dhe fitim të munguar, ndonëse Pacolli i ka bërë thirrje publike qeverisë për zgjidhje me mirëkuptim. Gjykata e Arbitrazhit në Londër pritet të marrë një vendim për masën e sigurimit brenda një muaji e gjysmë.

4564 views

Një turist i huaj në Sarandë është filmuar teksa ndihmon në lehtësimin e trafikut, pasi një aks rrugor ishte bllokuar për më shumë se gjysmë ore. Pamjet e dërguara në redaksinë e JOQ Albania tregojnë turistin në mes të rrugës, teksa orienton drejtuesit e automjeteve dhe përpiqet të ndihmojë në normalizimin e qarkullimit në një prej segmenteve të rënduara nga trafiku. Sipas qytetarit që ka dërguar videon, situata kishte zgjatur për më shumë se 30 minuta, duke shkaktuar bllokim dhe vështirësi në lëvizjen e automjeteve. Në vend që të vazhdonte pushimet e tij, turisti duket se ka vendosur të ndërhyjë vetë për të ndihmuar në zhbllokimin e rrugës. “Përshëndetje. Pas bllokimit të rrugës për më tepër se gjysmë ore në rrugën 5 të Sarandës, ky turist i ktheu pushimet e tij në detyrën që Policia e Shtetit duhet të kryejë”, shkruan qytetari në mesazhin e dërguar në redaksi. Pamjet sjellin një situatë sa të pazakontë, aq edhe ironike: një turist që ka ardhur në Sarandë për pushime përfundon duke dalë në rrugë për të ndihmuar në menaxhimin e trafikut. Në kulmin e sezonit turistik, kur qarkullimi në Sarandë rëndohet ndjeshëm, ndërhyrja e një turisti për të orientuar automjetet ka bërë që qytetari ta shohë situatën si një tjetër rast që ngre pikëpyetje mbi menaxhimin e trafikut në qytet.

32.1K views

Një qytetar i është drejtuar redaksisë së JOQ Albania lidhur me aktivitetin online të një shtetasi të huaj që jeton dhe punon në Durrës. Sipas denoncimit, personi dyshohet se regjistron në mënyrë të përsëritur gra, vajza dhe në disa raste edhe fëmijë në hapësira publike, pa pëlqimin e tyre. Materialet e dërguara tregojnë se ai ka realizuar video në zona të ndryshme të Durrësit, përfshirë Golemin, Plazhin, Bulevardin dhe Vollgën, ndërsa sipas denoncuesit, ka qenë aktiv edhe në Tiranë. Në disa prej videove, kamera fokusohet te vajza dhe gra që kalojnë në rrugë apo shëtitore, ndërsa personi i regjistron gjatë lëvizjes. Denoncuesi pretendon gjithashtu se disa prej këtyre pamjeve janë shoqëruar me komente dhe publikime në rrjetet sociale, duke iu treguar personave jashtë Shqipërisë pamje të grave shqiptare. Për këtë arsye, denoncuesi kërkon që aktiviteti i tij të verifikohet nga autoritetet kompetente, veçanërisht për të përcaktuar mënyrën se si janë realizuar dhe përdorur këto materiale. JOQ Albania publikon shqetësimin për ndërgjegjësim dhe parandalim, pa synuar nxitjen e urrejtjes apo diskriminimit ndaj asnjë komuniteti. Çdo pretendim lidhur me personin dhe aktivitetin e tij duhet të verifikohet nga autoritetet përkatëse. Qëllimi është që sjellje potencialisht problematike të verifikohen në kohë dhe të merren masat e nevojshme nëse konstatohet shkelje e ligjit.

31.4K views

Një pushuese ka përjetuar një surprizë krejtësisht të papritur gjatë pushimeve të saj në plazhet e Zanzibarit, duke marrë me vete një kujtim që vështirë se do ta harrojë ndonjëherë. E reja po relaksohej në ujë, kur pa u vënë re, nga prapa i është afruar një breshkë detare. Pa asnjë paralajmërim, krijesa ujore e ka kafshuar atë direkt në të ndenjura. Pavarësisht tronditjes së momentit dhe dhimbjes së lehtë, ngjarja ka kaluar pa pasoja të rënda, por me siguri mbetet një nga "suveniret" më të pazakonta e më të paharrueshme që mund të marrësh nga një udhëtim tropikal.

13.6K views

Një qytetare i është drejtuar redaksisë së JOQ Albania për të denoncuar sjelljen e disa drejtuesve të mjeteve në trafik. “Shihni si hyjnë, ne presim në radhë në trafik”, shprehet denoncuesja, duke treguar automjetet që futen në radhë ndërsa pjesa tjetër e drejtuesve presin. Pamjet tregojnë një trafik të rënduar, ku lëvizja e mjeteve është e ngadaltë dhe krijohen radhë të gjata. JOQ Albania publikon pamjet e dërguara nga qytetari, duke sjellë në vëmendje një tjetër situatë të përditshme në trafikun e rrugëve shqiptare.

47.9K views

Një 70-vjeçar në Tiranë është bërë pre e një skeme mashtrimi, ku tre të rinj dyshohet se kanë përdorur Inteligjencën Artificiale për ta bindur që t’u dorëzonte 100 mijë euro. Policia ka arrestuar dy prej të dyshuarve, ndërsa një tjetër është shpallur në kërkim. Në pranga kanë rënë Brian Serica, 31-vjeç, dhe Skerdi Meta, 23-vjeç. Ndërkohë, në kërkim është shpallur R. H., 31-vjeç. Sipas autoriteteve, të rinjtë kanë komunikuar me 70-vjeçarin përmes mesazheve, duke u paraqitur si persona të njohur të tij. Dyshohet se, përmes përdorimit të Inteligjencës Artificiale, ata kanë arritur ta bindin 70-vjeçarin se bëhej fjalë për një person që ai e njihte. I moshuari, i cili ushtronte aktivitetin e këmbimit valutor, është bindur që t’u dorëzonte shumën prej 100 mijë eurosh, me pretendimin se paratë do t’i ktheheshin pas disa orësh. Por koha kaloi dhe shuma nuk iu kthye. Pas kësaj, 70-vjeçari ka denoncuar rastin pranë Policisë, duke bërë të mundur nisjen e hetimeve. Uniformat blu kanë arrestuar dy të dyshuarit, ndërsa vijojnë kërkimet për kapjen e R. H. Paralelisht, hetuesit po punojnë për identifikimin e personit që shkoi pranë subjektit të 70-vjeçarit dhe mori shumën prej 100 mijë eurosh. Rasti po hetohet nga autoritetet, ndërsa mbetet për t’u përcaktuar roli i secilit prej personave të dyshuar në skemën e mashtrimit.

4640 views

Shqipëria po shndërrohet gjithnjë e më shumë nga një vend që eksporton fuqi punëtore, në një treg që po tërheq punonjës nga jashtë. Të dhënat më të fundit të INSTAT konfirmojnë se mungesa e fuqisë punëtore në vend po mbushet me ritme të shpejta nga shtetas të huaj, ku Azia po zë një peshë gjithnjë e më të madhe. Në fund të vitit 2025, në Shqipëri rezultonin 32.163 të huaj me leje qëndrimi, duke shënuar një rritje prej 46,6% krahasuar me vitin 2024, ku numri i tyre ishte rreth 21,9 mijë. Në vetëm katër vjet, ky numër është më shumë se dyfishuar (nga 14,9 mijë në vitin 2021). Sipas shifrave zyrtare, 55,1% e lejeve të qëndrimit janë dhënë për arsye punësimi. Pas tij renditet bashkimi familjar me 19,8%, ndërsa qëllimet humanitare dhe studimet zënë përkatësisht 7,9% dhe 3,1%. Sa i përket profilit demografik, 65% e të huajve janë meshkuj dhe 35% femra, ndërsa grupmosha më e përfaqësuar është ajo 30-39 vjeç (24,5%). Edhe pse Evropa mban ende peshën kryesore me 52,9% të totalit (ku Kosova me 6.284 persona dhe Italia me 4.065 persona kryesojnë), dinamika më e fortë vjen nga Azia. Prania nga Azia: Arriti në 9.891 persona në fund të 2025-ës, me një rritje prej 117,6% brenda një viti. India: Renditet e treta në total me 2.886 persona (9% të totalit), duke pësuar një rritje prej 87,6%. Filipinet: Renditen të katërtat me 2.401 persona (7,5% të totalit), me një rritje prej 136,1% krahasuar me vitin 2024. Fluksi pritet të vijojë me ritme të larta, pasi gjatë vitit 2025 aplikimet për leje qëndrimi u rritën me 43,5%, ku vetëm kërkesat nga India dhe Filipinet përbënin mbi 1 në çdo 4 aplikime (26,6%). Paralelisht me emigracionin e rregullt, gjatë vitit 2025 janë identifikuar 1.926 të huaj me qëndrim të parregullt, nga 1.540 që ishin në vitin 2024 (një rritje prej 25%).

4386 views

Një pushues i është drejtuar redaksisë së JOQ Albania për të denoncuar ndotjen e ujërave në bregdetin e Vlorës, pranë zonës së hoteleve dhe bizneseve. Sipas tij, ujërat e ndotura derdhen vazhdimisht në det, ndërsa situata shoqërohet edhe me një erë të rëndë dhe kundërmim, që sipas pushuesit është i vështirë për t'u përballuar. Në videon e dërguar në redaksi shihet një kanal me ujë të turbullt që rrjedh drejt bregut dhe përfundon në det. Në pamje dallohen gjithashtu mbetje dhe shkumë në sipërfaqen e ujit. “Uji është shumë i ndotur edhe kundërmon. Siç duket, ujërat e zeza derdhen pa pushim”, shprehet pushuesi. Ai shton se edhe uji i detit ka qenë shumë i ndotur, duke ngritur shqetësimin për pushuesit që frekuentojnë këtë pjesë të bregdetit. Nga pamjet nuk mund të konfirmohet nëse bëhet fjalë për ujëra të zeza, ndaj situata kërkon verifikim nga institucionet përgjegjëse. JOQ Albania publikon pamjet dhe denoncimin e pushuesit, duke kërkuar që autoritetet të verifikojnë burimin e shkarkimit, cilësinë e ujit dhe të marrin masat përkatëse nëse konstatohen shkelje.

10.2K views

Një qytetar i është drejtuar redaksisë së JOQ Albania për të denoncuar një rast që, sipas tij, ka ndodhur sot në ambientet e një lavazhi. Denoncuesi pretendon se ka punuar gjatë gjithë ditës në “Lavazho Speciale”, por në fund të orarit pronari nuk i ka dhënë pagesën prej 10 mijë lekësh që, sipas tij, i takonte për ditën e punës. Sipas qytetarit, pas kërkesës për pagesën, pronari e ka fyer dhe i ka thënë të largohet, ndërsa më pas, pretendon ai, e ka goditur me grusht pas shpine. “Punova sot tek ai, më mbajti ditën e punës 10 mijë lekë. Më goditi me boks pas shpine**”, shkruan denoncuesi. Ai thotë se kishte rreth dy vite që punonte pranë këtij subjekti dhe se kjo ishte hera e parë që, sipas tij, përballej me një situatë të tillë. Në videon e dërguar në redaksi shfaqet vetë denoncuesi duke punuar në lavazh, ndërsa pamjet nuk përmbajnë momentin e pretenduar të konfliktit dhe goditjes. Qytetari kërkon që rasti të bëhet publik, duke pretenduar se krahas mospagesës, është përballur edhe me dhunë fizike. JOQ Albania publikon denoncimin dhe pamjet e dërguara nga qytetari, ndërsa mbetet e hapur për reagimin dhe versionin e pronarit të subjektit lidhur me pretendimet e ngritura.

27.3K views