Frika mbi vaksinat po çon në një rënie të ndjeshme të vaksinimit të fëmijëve në Shqipëri. Pas pandemisë, gjithnjë e më shumë prindër po refuzojnë vaksinat, kryesisht për shkak të frikës se ato shkaktojnë autizëm. Sipas të dhënave të Institutit të Shëndetit Publik, numri më i lartë i prindërve që po refuzojnë vaksinat paraqitet në Vlorë, Lezhë dhe Tiranë. Vetëm në vitin 2024, në Qarkun e Vlorës rreth 18% e fëmijëve nuk janë vaksinuar. Prindërit pranojnë se lexojnë rrëfime personale dhe eksperienca të prindërve të tjerë në rrjet dhe shtyjnë vaksinimin e fëmijëve të tyre pavarësisht se shteti i ka bërë vaksinat të detyrueshme. Teksa autoritetet shëndetësore shqiptare paralajmërojnë se nëse kjo prirje vazhdon, vendi rrezikon përhapjen e epidemive e bëjnë thirrje për ndërgjegjësim dhe respektim të kalendarit të vaksinimit, në SHBA po ndodh totalisht e kundërta. Florida do i japë fund vaksinave të detyrueshme për fëmijët dhe të rriturit, sipas Guvernatorit Ron DeSantis dhe Shefi i Shëndetit Publik Joseph Ladapo, duke u bërë shteti i parë në SHBA që merr një hap të tillë. DeSantis gjithashtu njoftoi se po krijon një komision shtetëror “Bëjeni Amerikën të Shëndetshme Sërish” (Make America Healthy Again), siç është propozuar nga Sekretari Amerikan i Shëndetësisë, Robert F. Kennedy Jr. Ladapo tha në një konferencë për shtyp: “Departamenti i Shëndetit i Floridës, në partneritet me guvernatorin, do të punojë për të përfunduar të gjitha vaksinat e detyrueshme ligjërisht në Florida.”

1066 views

Në shërbimin e pediatrisë pranë QSUT-së, prindërit dhe fëmijët po përballen me kushte të papranueshme pritjeje. Për shkak të mungesës së stolave dhe hapësirave të mjaftueshme, dhjetëra prindër detyrohen të presin në këmbë, duke mbajtur fëmijët në krahë. Situata është rënduar edhe më shumë për shkak të rritjes së rasteve me viroza sezonale, që ka shtuar ndjeshëm fluksin e vizitave. Në ambientet e pritjes, mungesa e kushteve minimale e bën edhe më të vështirë përballimin e orëve të gjata të pritjes, veçanërisht për fëmijët e vegjël apo me temperaturë. Një foto e siguruar nga VNA tregon qartë prindër të lodhur, me fëmijë në krahë, të detyruar të qëndrojnë në këmbë për shkak të mungesës së ulëseve.

2415 views

Protesta kundër vizitës së kryeministrit Edi Rama në Izrael dhe qëndrimeve të tij në mbështetje të politikave izraelite ndaj Gazës u shoqërua me ndërhyrje të policisë mbrëmjen e sotme në Tiranë. Tubimi paqësor, i organizuar nga aktivistë dhe qytetarë në mbështetje të Palestinës, u pengua nga forcat e rendit të cilat ngritën kordon sigurie dhe nuk lejuan grumbullimin para Kryeministrisë. Gjatë ndërhyrjes, policia shoqëroi dy aktivistë, njëra prej tyre Eriselda Balliu, kjo e fundit nëna e vogëlushit Joni fotoja e të cilit duke pritur pas hekurave të komisariatit të ëmën ka shkaktuar reagime të forta në radhët e protestuesve dhe opinionit publik. Ndalimi i aktivistëve përbën një shkelje të së drejtës për tubim dhe shprehje të lirë sipas zërave kritikë në rrjet të cilët kanë kërkuar menjëherë lirimin e tyre.

5610 views

Një video prekëse nga Kina është bërë virale në rrjetet sociale, duke grumbulluar miliona shikime dhe mijëra komente emocionale, pasi tregon një moment që shumë e kanë quajtur “të pabesueshëm”. Ngjarja ka ndodhur në provincën Liaoning, ku gjatë ceremonisë së dasmës, një flutur u shfaq papritur dhe u ul fillimisht mbi buqetën e nuses. Në pamje duket momenti kur nusja mbetet e shtangur për disa sekonda, përpara se të kuptojë çfarë po ndodh. Pak çaste më vonë, flutura largohet nga buqeta dhe i ulet butë në sup, çast që e thyen emocionalisht nusen. Ajo shpërthen në lot, me buzët që i dridhen, ndërsa përpiqet të flasë. Emocioni përfshin edhe dhëndrin, i cili nuk i mban dot lotët duke parë reagimin e saj. Sipas mediave kineze dhe postimeve të vetë nuses në rrjetet sociale, babai i saj kishte ndërruar jetë papritur tre vite më parë, por i kishte premtuar se do të ishte i pranishëm në ditën e dasmës së saj. Në video dëgjohet nusja teksa thërret mes lotësh: “Bija jote e di që je ti. Nuk e theve premtimin. Tani kam një burrë që më do ashtu siç më doje ti.” Një detaj që e ka bërë historinë edhe më prekëse për publikun është fakti se dasma u zhvillua në katin e dytë të një godine, në temperatura nën zero, kushte ku shfaqja e një fluture konsiderohet thuajse e pamundur. “Ende nuk e besoj çfarë ndodhi,” ka shkruar nusja më pas. “Babai im erdhi… ai vërtet erdhi.” Në kulturën kineze, fluturat besohet se përfaqësojnë shpirtrat e të ndjerëve që vizitojnë të dashurit e tyre, një simbolikë që për nusen kishte një domethënie të jashtëzakonshme. Historia ka prekur miliona njerëz në mbarë botën, veçanërisht ata që kanë humbur prindërit ose njerëzit e dashur, duke rikujtuar idenë se lidhjet familjare nuk ndërpriten as nga vdekja. Një rast i ngjashëm ishte raportuar më herët në Kinë, kur një dhëndër shpërtheu në lot pasi një flutur iu ul mbi supe, menjëherë pasi ai kishte përmendur gjyshen e ndjerë në fjalimin e tij, duke i kërkuar që “të vinte nëse mundej”.

13.6K views

Një qytetar nga Shijaku i është drejtuar redaksisë së JOQ Albania duke raportuar një ngjarje të rëndë që ende nuk është konfirmuar zyrtarisht nga Policia, por për të cilën ekzistojnë pamje nga vendngjarja. Në videot e dërguara në redaksi shihen disa punonjës policie në hyrjen e një pallati, të cilët duken duke kqyrur zonën dhe duke mbajtur shënime, çka lë të kuptohet se në vendngjarje po kryhen veprime verifikuese. Nga pamjet nuk është e mundur të konfirmohet natyra e saktë e ngjarjes, as të identifikohet ndonjë person i dëmtuar. Sipas dëshmisë së qytetarit, bëhet fjalë për një dyshim për dhunim me sende të forta ndaj një burri rreth 45-vjeç, i njohur në zonë me nofkën “Noci”, i cili dyshohet se është gjetur me shenja jete në hyrje të pallatit ku banon dhe më pas është transportuar fillimisht në spitalin e Durrësit, e më pas në Tiranë, për shkak të gjendjes së rënduar shëndetësore. Qytetari thekson se informacionin e ka marrë nga njerëz të afërt të personit të plagosur, ndërsa shton se as vetë Policia, sipas tij, nuk ka ende një pistë konkrete për autorët, duke vijuar verifikimet përmes pamjeve të kamerave të sigurisë në zonë. Deri në këto momente, nuk ka asnjë njoftim zyrtar nga Policia e Shtetit që të konfirmojë apo të përgënjeshtrojë këtë ngjarje, ndërsa pamjet e mbërritura në redaksi dëshmojnë vetëm praninë e uniformave blu dhe kryerjen e veprimeve paraprake në terren. JOQ Albania i bën thirrje Policisë dhe institucioneve përkatëse që të reagojnë zyrtarisht dhe të sqarojnë publikun nëse kemi të bëjmë apo jo me një ngjarje kriminale, për të shmangur pasigurinë dhe keqinformimin në komunitet.

20K views

Një qytetare nga Elbasani i është drejtuar redaksisë së JOQ Albania për të denoncuar një rast të pazakontë vjedhjeje. Sipas denoncimit, një burrë në moshë shihet në pamjet e kamerave të sigurisë teksa qëndron për disa çaste përpara dyqanit të saj, duke vëzhguar ambientin me qetësi. Më pas, ai afrohet drejt kafazit ku mbahej një zog dhe, brenda pak sekondash, arrin ta marrë zogun dhe të largohet qetësisht sikur të mos kishte ndodhur asgjë. E gjithë ngjarja zhvillohet pa zhurmë, pa nxitim dhe me një “qetësi olimpike”, sikur bëhej fjalë për një veprim krejt normal. Zogu merret, kafazi mbetet bosh dhe personi largohet nga dyqani. Qytetarja shprehet e shqetësuar jo vetëm për humbjen e zogut, por edhe nga frika se i njëjti person mund të rikthehet sërish dhe të vjedhë produkte në dyqan. Ajo thotë se nuk e njeh autorin dhe nuk e ka parë më parë në zonë, ndërsa biznesi ndodhet në lagjen Haxhias, pranë kryqëzimit të banesave në Elbasan. “Kam hall se mos vjen prapë dhe më vjedh ndonjë gjë tjetër,” shprehet ajo. JOQ Albania publikon këtë denoncim për të sensibilizuar qytetarët dhe për të ndihmuar në identifikimin e personit në fjalë. Nëse dikush e njeh ose ka informacion mbi rastin, mund të kontaktojë redaksinë. Mesa duket, në Elbasan nuk vidhen vetëm biçikleta apo sende me vlerë… tashmë edhe zogjtë në kafaz duhen ruajtur me sy hapur.

24.4K views

Ndryshimet në Kodin Penal që pritej të miratoheshin sot në seancën plenare, përfshijnë dekriminalizimin e pjesshëm të veprës penale të shpifjes për gazetarët. Qeveria e ka përpiluar në mënyrë të tillë që nga ky ligj të shpëtojnë vetëm lëpirësit e pushtetit ata që i thurin lajka Ramës dhe Rilindasve. Nisma, e propozuar nga mazhoranca socialiste me arsyetimin e përafrimit me direktivat e Bashkimit Evropian, ka hasur në kundërshtime të forta nga organizatat e medias dhe shoqëria civile. Këto të fundit kërkojnë dekriminalizim të plotë të shpifjes, duke e konsideruar projektin aktual të pamjaftueshëm dhe të rrezikshëm për lirinë e shprehjes. Sipas paketës së depozituar në Kuvend, përjashtimi nga ndjekja penale vlen vetëm për veprën e shpifjes dhe vetëm për gazetarët “e regjistruar dhe të njohur”, me pak fjalë për zarat e qeverisë... Ndërkohë, vepra e fyerjes mbetet ende penale, çka sipas kritikëve krijon një mekanizëm alternativ presioni dhe ruan efektin frenues ndaj shprehjes së lirë në publik. Qeveria ofron dekriminalizim të pjesshëm dhe sinjalizon qartë për kufizim “me regjistër” të profesionit të gazetarit. Paketa e dërguar në parlament parashikon përjashtim penal vetëm për shpifjen. Ai vlen për gazetarë “të regjistruar dhe të njohur” teksa fyerja mbetet vepër penale si një rrugë alternative përndjekjeje dhe që ruan ende efektin frenues mbi shprehjen publike.

8797 views

Gent Gazheli nuk është më në krye të Doganave shqiptare. Pas vitesh denoncimesh për kontrabandë, abuzime dhe skandale financiare me vlera marramendëse, ai është larguar nga drejtimi i një prej institucioneve më të rëndësishme dhe më problematike të shtetit. Lajmi për largimin e tij është raportuar nga mediat, në një moment kur emri i Gazhelit përmendet gjithnjë e më shpesh në lidhje me hetime të mundshme nga SPAK. Deri më tani nuk ka një reagim zyrtar nga vetë ai apo nga Ministria e Financave, por koha e këtij largimi nuk është aspak rastësore. Gazheli ka drejtuar Doganat që prej vitit 2020, një periudhë që përkon me shpërthimin e një sërë skandalesh të rënda: kontrabandë cigaresh, shmangie masive detyrimesh doganore, ryshfete në pika kufitare dhe dhjetëra punonjës të arrestuar ose nën hetim. Dëmi ekonomik i përllogaritur në disa prej këtyre çështjeve shkon në dhjetëra miliona euro. JOQ Albania ka denoncuar prej vitesh Gent Gazhelin për abuzime të rënda në Dogana. Nga nepotizmi flagrant, te punësimet familjare në shkelje të ligjit, deri te skemat e dyshuara të korrupsionit dhe pasurimit të pashpjegueshëm. Një nga rastet më të bujshme të publikuara nga JOQ Albania ishte punësimi i nënës dhe vajzës në të njëjtin institucion, në pozicione kyçe, në kundërshtim të hapur me ligjin për administratën publike. Denoncime të tjera kanë zbuluar letra të brendshme ku ish-punonjës të Doganave akuzonin drejtpërdrejt Gazhelin për mbulim të abuzimeve, ndëshkim të denoncuesve dhe mbrojtje të personave të përfshirë në shkelje. Paralelisht me këto skandale, Gazheli është shfaqur në publik me veshje luksoze që kapin vlera marramendëse, përfshirë xhupa mbi 7 mijë euro, duke nxitur reagim të fortë publik në një vend me paga minimale dhe varfëri në rritje. Media kanë ngritur vazhdimisht pikëpyetje mbi burimin e këtij luksi, në një kohë kur borxhi doganor i vendit ka arritur në mbi 48 miliardë lekë dhe mekanizmat e mbledhjes së detyrimeve kanë dështuar. Një tjetër dosje e rëndë që rëndon mbi emrin e Gazhelit lidhet me gjobën ndaj kompanisë “Bankers Petroleum”, fillimisht 30 milionë euro e më pas e rritur në 130 milionë euro. Sipas raportimeve mediatike, kjo gjobë ka mbetur e pezulluar për vite me radhë përmes mosveprimit administrativ, ndonëse drejtuesit përkatës ishin njoftuar zyrtarisht. Vetëm pas transferimit të çështjes në SPAK dhe ekspozimit publik, dosja u rikthye në vëmendje. Gjatë gjithë mandatit të tij, një model është përsëritur vazhdimisht: vartësit arrestohen, hetimet zvarriten, ndërsa drejtori mbetet i paprekshëm. Në çdo shtet normal, një situatë e tillë do të sillte të paktën përgjegjësi politike. Në Shqipëri, Gent Gazheli jo vetëm që mbijetoi, por vijoi të ushtronte pushtet mbi një sistem ku, sipas denoncimeve, kalonin miliona euro kontrabandë. Largimi i tij nga detyra shënon një kapitull të ri, por jo mbylljen e historisë. Pyetja që mbetet është nëse ky largim do të pasohet nga hetime reale dhe përgjegjësi ligjore, apo nëse do të jetë thjesht një zhvendosje tjetër në heshtje, siç ka ndodhur edhe më parë me figura të ekspozuara për abuzime. JOQ Albania do të vijojë të ndjekë këtë çështje dhe të publikojë çdo zhvillim të ri, ashtu siç ka bërë prej vitesh, duke denoncuar atë që shumëkush ka preferuar ta mbajë të fshehur.

10.3K views

Gazeta prestigjioze amerikane New York Times i ka kushtuar një artikull të gjatë situatës së korrupsionit në Shqipëri, duke vënë në qendër të vëmendjes një paradoks që, sipas saj, përmbledh kontradiktat e reformave shqiptare: krijimin e ministres virtuale “Diella”, si simbol i transparencës dhe luftës kundër korrupsionit, ndërkohë që drejtuesit e institucionit që e zhvilloi janë përfshirë në hetime penale për korrupsion. Në shkrimin me tone të theksuara ironike, New York Times përshkruan Diellën, avatarin e krijuar nga inteligjenca artificiale dhe të promovuar si “ministrja e parë AI në botë”, si një element kyç të narrativës së qeverisë shqiptare për modernizim dhe përafrim me standardet e Bashkimit Evropian. Por kjo narrativë, sipas gazetës, bie ndesh me realitetin institucional, pasi Agjencia Kombëtare e Shoqërisë së Informacionit (AKSHI), institucioni që menaxhon sistemet digjitale të qeverisë dhe vetë Diellën, është nën hetim nga Prokuroria e Posaçme. Sipas New York Times, drejtues të lartë të AKSHI-t janë vendosur nën masa sigurie për dyshime mbi manipulimin e tenderëve publikë, duke krijuar një kontrast të fortë mes retorikës zyrtare për teknologjinë si armë kundër korrupsionit dhe akuzave që rëndojnë mbi arkitektët e këtij sistemi. LAJMI I PLOTË GJENDET NË STORY DHE NË FAQEN WEB.

10.9K views

Zbardhen detaje të reja nga aksidenti tragjik i ndodhur të martën në Rumani, ku humbën jetën shtatë tifozë të klubit grek PAOK. Autoritetet kanë konfirmuar identitetin e viktimës së dytë shqiptare, duke e çuar në dy numrin e shtetasve shqiptarë që humbën jetën në këtë ngjarje të rëndë. Pas Vasil Pilos, viktima tjetër shqiptare është identifikuar si Genci Sadiku. Dy të rinjtë shqiptarë udhëtonin në të njëjtin mjet, i cili u përplas drejtpërdrejt me një kamion, duke rezultuar fatal për të gjithë personat që ndodheshin në furgon. Pamjet e publikuara nga vendngjarja hedhin dritë mbi dinamikën e aksidentit. Nga videot rezulton se furgoni me të cilin udhëtonin shtatë tifozët po lëvizte në korsinë e gabuar, çka solli përplasjen “kokë më kokë” me mjetin e tonazhit të rëndë. Autoritetet rumune vijojnë hetimet për të përcaktuar rrethanat e plota të aksidentit, ndërsa ngjarja ka tronditur jo vetëm komunitetin e tifozëve të PAOK, por edhe opinionin publik në Shqipëri dhe Greqi.

66.8K views

Autoritetet amerikane kanë sekuestruar një Range Rover me vlerë 125 mijë dollarë në pronësi të Alexander Soofer, drejtues i një fondacioni për të pastrehët në Los Angeles, i cili akuzohet se ka përvetësuar miliona dollarë nga fondet publike, të destinuara për strehimin dhe ushqimin e personave në nevojë. Sipas prokurorëve federalë, Soofer dyshohet se ka përfituar rreth 23 milionë dollarë fonde shtetërore, nga të cilat të paktën 10 milionë i ka përdorur për luks personal. Ai akuzohet se ka blerë një vilë 7 milionë dollarëshe, ka paguar shkolla private për fëmijët, udhëtime me avion privat dhe pushime në resorte luksoze, përfshirë edhe një hotel të famshëm në Hawaii. Autoritetet thonë se ai ka mashtruar institucionet shtetërore duke deklaruar shpenzime fiktive për shërbime strehimi dhe ushqimi, ndërsa në realitet paratë përfundonin në llogaritë e tij personale. Ndërkohë që në dokumente premtoheshin tre vakte të shëndetshme në ditë, hetimet zbuluan se personave të pastrehë u shërbeheshin ushqime minimale si makarona të thata dhe ushqime të konservuara. Soofer përballet me akuza për mashtrim financiar, ndërsa prokuroria ka nisur sekuestrimin e pasurive të përfituara nga fondet e dyshuara të vjedhura. Zyrtarët amerikanë e cilësuan rastin si një shembull flagrant të abuzimit me paratë publike dhe mungesës së ndjeshmërisë ndaj shtresave më vulnerabël të shoqërisë. Një histori që ngre sërish pyetjen se sa larg shkon drejtësia kur preken fondet publike dhe pasuritë e përfituara nga korrupsioni, dhe se kur do të shohim edhe në Shqipëri raste ku pasuritë e përfituara në mënyrë të paligjshme jo vetëm denoncohen, por edhe sekuestrohen realisht.

11.5K views

Para se të niste lufta në Ukrainë dhe para se emri i tij të lidhej me një nga konfliktet më të rënda në Evropë pas Luftës së Ftohtë, Vladimir Putin shfaqej shpesh në publik me një imazh krejt tjetër. Në tetor të vitit 2017, gjatë një takimi diplomatik në Sochi, presidenti rus mori si dhuratë për ditëlindjen e 65-të një këlysh të racës Central Asian Shepherd, i dhuruar nga presidenti i atëhershëm i Turkmenistanit, Gurbanguly Berdymukhamedov. Gjatë momentit ceremonial, Berdymukhamedov e ngriti këlyshin në mënyrë të pakujdesshme, duke e kapur nga qafa. Në atë çast, Putin ndërhyri menjëherë, e mori qenin me kujdes në krahë dhe e përqafoi, madje duke e puthur para kamerave. Pamjet u përhapën me shpejtësi në rrjetet sociale dhe u kthyen në një nga memet më të njohura politike të asaj kohe, me mbishkrimin ironik: “Edhe Vladimir Putin e di si duhet mbajtur një qen.” Në sipërfaqe, videoja u perceptua si një moment njerëzor dhe i ngrohtë, që e paraqiste liderin rus si dashamirës të kafshëve. Por për shumë analistë, ky episod ishte pjesë e një ndërtimi më të gjerë të imazhit publik të Putinit, ku gjestet e vogla shërbenin si 'taktikë', për të zbutur perceptimin ndërkombëtar ndaj figurës së tij. Sot, pas nisjes së luftës në Ukrainë, kjo video shihet ndryshe: si një kujtesë se si imazhi i një lideri mund të ndërtohet me kujdes përmes momenteve simbolike, shumë kohë përpara se historia të marrë një kthesë dramatike. Një video e vogël, një gjest i butë, një narrativë e kuruar, dhe një kontrast i fortë me realitetin që pasoi vite më vonë.

6509 views

Nëse dikush kishte ende dyshime se ku përfundon vetëbesimi monumental i Edi Ramës, sot mori përgjigjen zyrtare: përfundon në Knesset, me gjunjë që dridhen dhe zë që kërkon miratim. Kryeministri i Shqipërisë, i vetëshpallur herë si artist, herë si filozof, herë si “lider global”, u shfaq në Parlamentin e Izraelit në një rol të ri: nxënësi i emocionuar që jep provim para profesor Netanyahut. Dhe jo, kjo nuk është metaforë gazetarësh dashakeqë. Janë fjalët e tij. “Nëse Mossadi nuk ju ka informuar, po ju informoj unë: po më dridhen gjunjët,” tha Rama, duke e futur shërbimin sekret izraelit në punë… për të monitoruar stabilitetin e gjunjëve të tij. I njëjti njeri që në Tiranë ulet si pedagog mbi kokën e gazetarëve, i njëjti që i flet popullit me ironi superiori, sot u vetëportretizua si 'student i ndrojtur', që pret notën e profesorit “Bibi”. Të shohësh këtë metamorfozë është si të shohësh rrugaçin e lagjes që këtu na bën ligjin, por sapo sheh të fortin e qytetit, ulet në bisht dhe fillon t’i lustrojë këpucët me gjuhë. Në Shqipëri, Rama flet nga lart-poshtë. Në Izrael, nga poshtë-lart. Një transformim që s’e bën dot as Photoshop-i. Kulmi i performancës erdhi kur kryeministri vendosi të na japë edhe renditjen botërore të oratorëve, sipas mendjes së tij: Netanyahu – top 5. Trump – i pari. Rama – i dyti (natyrisht). Edhe kur përkulet, Edi Rama arrin të lavdërojë veten. Një talent i rrallë: servilizëm me vetëreklamë të integruar. “I dashur Bibi,” i tha ai Netanyahut, me një intimitet që do ta bënte xheloz çdo diplomat karriere. Në atë moment mungonte vetëm një karrige e vogël, që Rama të ulej përpara bankës dhe të priste verdiktin: “Kalove” apo “eja në shtator”. Ndërkohë që shqiptarët përballen me rritje çmimesh që s’ndalen, paga që s’rriten dhe shërbime që s’punojnë, lideri ynë global merret me dridhjen e gjunjëve dhe me mbijetesën e egos së tij para liderëve të tjerë. Bravo Edi! Vazhdo të dridhesh atje, se këtu na ke lënë prej kohësh të mpirë. Vetëm një lutje kemi: kur të kthehesh në Rinas, provo të ecësh drejt realitetit shqiptar me të njëjtën përulësi që pate sot para “Bibit”. Populli yt s’është audiencë provimi! Është fatura finale!

11.2K views

Kjo video rikthen në vëmendje një nga momentet më drithëruese të historisë moderne: çastin kur Presidenti George W. Bush mëson se bota sapo ka ndryshuar përgjithmonë. Është mëngjesi i 11 shtatorit 2001. Bush ndodhet në shkollën fillore “Emma E. Booker” në Florida, i ulur përballë një klase me fëmijë që po lexonin përrallën “The Pet Goat”. Në video shihet qartë momenti kur Shefi i Stafit i afrohet dhe i pëshpërit në vesh fjalët që do të nisnin një epokë të re frike: “Një avion i dytë ka goditur kullën tjetër. Amerika është nën sulm”. Për rreth shtatë minuta, Bush qëndroi i ulur në heshtje, me një vështrim të ngrirë dhe shprehje që reflektonte një peshë të jashtëzakonshme. Për vite me radhë, kjo heshtje u kritikua si "humbje kontrolli" apo pasiguri. Megjithatë, e vërteta pas asaj fytyre të gurtë ishte një vendim i vetëdijshëm lideri. Në dëshmitë e tij të mëvonshme, Bush ka shpjeguar se reagimi i parë ishte zemërimi i pastër, por kontrasti mes tmerrit që po ndodhte jashtë dhe pafajësisë së fëmijëve para tij, e detyroi të ruante qetësinë. Ai pa gazetarët në fund të klasës që po merrnin lajmin në telefonat e tyre dhe e kuptoi se sytë e gjithë botës ishin mbi të. “Nuk doja të krijoja panik. Si udhëheqës, gjëja e parë që duhet të bësh në krizë është të projektosh stabilitet,” ka treguar ai. Ai qëndroi ulur deri në fund të leximit, duke përjetuar minutat më të rënda të presidencës së tij, përpara se të largohej për t’u përballur me realitetin tragjik ku humbën jetën gati 3 mijë persona. Sulmet e 11 shtatorit ndryshuan rrënjësisht sigurinë globale dhe politikën botërore, duke e ndarë historinë në "para" dhe "pas". Por për njeriun më të fuqishëm të botës, ajo dritë nisi mes asaj qetësie të rreme: në një klasë fillore, përballë fëmijëve që nuk e kishin idenë se jashtë atyre mureve, historia sapo kishte marrë një kthesë dramatike.

47.5K views

Në kuadër të 107-vjetorit të ndarjes nga jeta të Ismail Qemalit në Vlorë u zhvilluan homazhe përkujtimore pranë varrit monumental të themeluesit të shtetit shqiptar. Në ceremoninë solemne morën pjesë ministri i Mbrojtjes Pirro Vengu, deputeti Ardit Bido, prefektja e qarkut Evis Allushi, kryetarja e Bashkisë Bruna Mersini, si edhe përfaqësues të tjerë të institucioneve dhe personalitete të jetës publike, të cilët nderuan figurën dhe veprën e Ismail Qemalit. Kjo e fundit i ka bërë një homazh special Ismail Qemalit, personazhit që shefi ia personifikon me veten dhe i detyron t'ia varin fotografinë në zyra... Nëse Emirjana Sako e Durrësit shkon të inspektojë përmbytjet e atlete të bardha, Mersini i kryen homazhet për Ismail Qemalin me papuçe. Veshja e kryebashkiakes së Vlorës është komentuar gjerësisht në rrjet dhe ky detaj s'ka kaluar pa u vënë re...

607 views

https://www.tiktok.com/@joq/video/7599804483710848287

17 views

Pak ditë më parë në Selanik, disa vajza dhe gra greke nga një grup muzikor dolën në një nga sheshet kryesore të qytetit dhe kënduan… në shqip! Performanca e tyre krijoi një atmosferë magjike, duke tërhequr kalimtarët dhe duke treguar se muzika dhe gjuha nuk njohin kufij. Shikoni këtë moment unik ku kultura dhe ritmi bashkohen në zemër të Selanikut.

17.6K views

Një ngjarje e rëndë ka tronditur familjen Togu, pasi 23-vjeçari Albert Togu ndërroi jetë mëngjesin e sotëm, disa ditë pas një aksidenti të rëndë rrugor. Prindërit e të riut kanë depozituar kallëzim penal në Prokurori ndaj mjekëve të Spitalit të Traumës, duke i akuzuar për neglizhencë mjekësore dhe duke i bërë përgjegjës për vdekjen e djalit të tyre. Familjarët bëjnë me dije se Alberti ndodhej i shtruar në Spitalin e Traumës pas aksidentit dhe se gjendja e tij, sipas tyre, nuk u trajtua siç duhet nga stafi mjekësor. Babai i të riut, Kujtim Togu, i tronditur nga humbja, deklaron se djali i tij nuk humbi jetën si pasojë e drejtpërdrejtë e aksidentit, por për shkak të neglizhencës gjatë trajtimit në spital. Sipas tij, pas vdekjes, trupi i 23-vjeçarit është dërguar në morg, por ende nuk është kryer autopsia. Ai thekson se mjekësia ligjore nuk mund të vijojë procedurën pa kartelën klinike të pacientit, e cila, sipas familjes, nuk është lëshuar ende nga Spitali i Traumës. Albert Togu u aksidentua rreth një javë më parë në Gjorm të Kurbinit, teksa udhëtonte në një automjet tip “Audi” bashkë me dy persona të tjerë. Automjeti dyshohet se doli nga rruga dhe u përplas me barrierat anësore, duke lënë të plagosur të rinjtë që ndodheshin brenda. Ndërkohë, Prokuroria pritet të nisë verifikimet për rrethanat e vdekjes së 23-vjeçarit dhe për akuzat e ngritura nga familjarët ndaj stafit mjekësor, për të përcaktuar nëse ka pasur apo jo neglizhencë në trajtimin e tij.

11.9K views

Në një seancë në Knessetin izraelit, kryeministri Benjamin Netanyahu e përshkroi Edi Ramën si një lider që “qëndron mbi të tjerët në kuptimin moral”, një vlerësim që jashtë Shqipërisë tingëllon si medalje nderi, ndërsa brenda saj si material i gatshëm për satirë politike. Teksa në Izrael flitej për empati të rrallë, kurajo dhe miqësi të thellë, në Tiranë debati publik vazhdon të sillet rreth akuzave për korrupsion, abuzim me fondet publike dhe afera qeveritare që prej vitesh shoqërojnë emrin e kryeministrit. Një kontrast i fortë mes imazhit ndërkombëtar dhe realitetit vendas, ku morali politik matet më shumë me tenderë sesa me fjalime. Ironia bëhet edhe më e theksuar kur në sfond qëndrojnë raste të përfolura si ai i Belinda Ballukut, ku opozita dhe kritikët flasin për menaxhim klientelist të sektorëve strategjikë, ndërsa qeveria përgjigjet me heshtje ose me ceremoni të tjera jashtë vendit. Në këtë panoramë, “qëndrimi mbi të tjerët” duket se funksionon më mirë në podiume ndërkombëtare sesa në raportet e institucioneve të brendshme. Në Knesset, Rama u përshkrua si lider që “rrjedh empati nga zemra” dhe që përfaqëson një Shqipëri që “hap krahët si shqiponja”. Në Shqipëri, për një pjesë të madhe të publikut, e njëjta shqiponjë duket se hap krahët vetëm për tenderë, koncesione dhe projekte miliardëshe, ku pyetja kryesore mbetet gjithmonë e njëjtë: kush përfiton realisht?

6290 views

Në fokusin inaugurues të krijuesve digjitalë, vëmendja po drejtohet drejt një prej talenteve më premtuese në skenën kreative. Një krijues i ri po tërheq gjithnjë e më shumë vëmendje falë videove të tij inovative, të realizuara me përdorimin e teknologjive të avancuara të inteligjencës artificiale. Gjatë muajve të fundit, ai është bërë i njohur për një seri veprash që eksplorojnë nostalgjinë në një mënyrë të fuqishme dhe emocionale. Përmes pamjeve realiste dhe skenarëve melankolikë, paraqiten personazhe të dashur të fëmijërisë, të transformuar nga koha dhe të vendosur në gjendje degradimi, të konsumuar, të harruar, si një figurë që ngjan me Sid Përtacin nga filmi i animuar Ice Age, Epoka e Akullnajave. Jo vetëm këto, krijuesi i ri falë Inteligjencës artificiale ka rikthyer në vëmendje edhe Tomi dhe Xherrin, Elsën dhe Anën, Madakaskarën, Aladinin, Boo dhe Kiti, Kung Fu Panda, Maçoku me çzime, Shreku dhe Fiona, Masha dhe Ariu e shumë filma të tjerë të animuar. Imazhet dhe videot janë krijime digjitale të gjeneruara nga inteligjenca artificiale, të realizuara përmes kombinimit të programeve profesionale të editimit, teknologjisë 3D dhe AI-së. Kjo përmbajtje është shpërndarë gjerësisht në rrjete sociale si Instagram dhe LinkedIn, duke ngjallur reagime emocionale dhe nostalgji tek audienca, si dhe duke hapur diskutime mbi ndikimin e teknologjisë në artin bashkëkohor.

4195 views