Një ngjarje e rëndë ka ndodhur në burgun famëkeq të Koridhalosit në Greqi, ku është vrarë Jani Aliaj, 49 vjeç nga Tepelena, i njohur me nofkën “Xheku i frikshëm”. Aliaj u godit për vdekje me mjet prerës nga një i burgosur grek, edhe ai i dënuar për vrasje, në sektorin 3 të burgut. Autoritetet greke kanë nisur hetimet dhe nuk përjashtojnë pistën e një vrasjeje me pagesë. Jani Aliaj ishte i shumëkërkuar në Shqipëri dhe i dënuar në mungesë me burgim të përjetshëm për ekzekutimin e Elton Çiços më 1 maj 2016 në zonën e ish-Bllokut në Tiranë. Ai ishte arrestuar në Greqi më 31 dhjetor 2024 me identitet të rremë dhe priste ekstradimin drejt Shqipërisë. Sipas prokurorisë, vrasja e Elton Çiços lidhej me një konflikt të gjatë hakmarrjeje mes dy personave, me zanafillë vite më parë në Greqi, kryesisht për çështje të aktivitetit kriminal dhe drogës. Dyshohet se kishte tentativa të ndërsjella eliminimi, ku të dy kishin mbetur të plagosur në episode të ndryshme. Aliaj rezultonte gjithashtu i dënuar në Greqi me burgim të përjetshëm për vrasje, plagosje të rëndë dhe armëmbajtje pa leje, si dhe ishte arratisur më herët nga burgu i Korfuzit. Pavarësisht provave të shumta të mbledhura ndër vite për vrasjen e Elton Çiços, çështja mbeti pa autorë të dënuar përfundimisht, ndërsa “Xheku i frikshëm” gjeti fundin e tij pas hekurave në një burg grek.

23.9K views

Interesi i shqiptarëve për mjetet elektrike ka shënuar një rritje të fortë gjatë vitit 2025, duke konfirmuar një kthesë të qartë drejt transportit të gjelbër. Sipas të dhënave zyrtare të Drejtorisë së Përgjithshme të Shërbimeve të Transportit Rrugor (DPShTRr), gjatë vitit që sapo u mbyll janë regjistruar 6.187 mjete “All-Electric”, gati dyfish më shumë krahasuar me vitin 2024. Shifrat tregojnë një rritje prej 98% të regjistrimeve të automjeteve plotësisht elektrike brenda një viti, një tregues i qartë i interesit në rritje të qytetarëve dhe bizneseve për mjete miqësore me mjedisin. Ky ritëm e bën vitin 2025 një nga më domethënësit për zhvillimin e mobilitetit elektrik në Shqipëri. Sipas ekspertëve, rritja lidhet me disa faktorë, përfshirë kostot më të ulëta të përdorimit krahasuar me mjetet me karburant, ndërgjegjësimin më të lartë mjedisor dhe interesin për teknologjitë e reja. Paralelisht, kjo prirje nxjerr në pah edhe nevojën për më shumë pika karikimi dhe politika publike që nxisin përdorimin e automjeteve elektrike.

4566 views

Greqia po ndërmerr një reformë të thellë në sistemin e emigracionit ligjor, duke ndryshuar rregullat për lejet e qëndrimit dhe punës. Projektligji i ri i Ministrisë së Imigracionit dhe Azilit synon t’i japë fund vonesave kronike dhe bllokimeve burokratike që kanë penalizuar prej vitesh emigrantët dhe bizneset. Sipas mediave greke, aktualisht në Greqi jetojnë rreth 793 mijë emigrantë të ligjshëm, ndërsa afro 293 mijë aplikime për leje qëndrimi mbeten në pritje. Me rregullat e reja, rreth 90 mijë leje pritet të zhbllokohen menjëherë, ndërsa edhe 90 mijë të tjera brenda dy viteve, duke prekur drejtpërdrejt mbi 180 mijë persona. Projektligji parashikon rinovim automatik të disa kategorive të lejeve, veçanërisht kur emigranti vijon të punojë për të njëjtin punëdhënës, si dhe vendos një afat minimal dyvjeçar për çdo leje të re. Qëllimi është shmangia e situatave kur lejet skadojnë për shkak të vonesave administrative, duke krijuar pasiguri ligjore për emigrantët. Një dispozitë e veçantë u jep mundësi emigrantëve që kanë jetuar ligjërisht në Greqi për më shumë se pesë vjet dhe që janë refuzuar më parë për arsye formale, të riparaqesin kërkesën dhe të pajisen me leje qëndrimi. Gjithashtu, për emigrantët mbi 65 vjeç, që kanë punuar ligjërisht për të paktën 20 vjet, parashikohet qëndrimi pa detyrim për punë, me kusht sigurimin shëndetësor dhe pension privat. Ndryshime të rëndësishme parashikohen edhe për punëtorët nga vendet e treta. Procedurat për sjelljen e fuqisë punëtore thjeshtohen, duke lejuar mbulimin e shpejtë të mungesave në sektorë si bujqësia, ndërtimi dhe turizmi. Për projekte të mëdha, parashikohet mundësia e rishpërndarjes së menjëhershme të deri në 500 punëtorëve, ndërsa lehtësohen edhe procedurat konsullore. Ministri i Imigracionit dhe Azilit, Thanos Plevris, thekson se Greqia mbetet e rreptë ndaj emigracionit të paligjshëm, por po “riformëson rrugën ligjore” për ata që duan të punojnë dhe të integrohen, duke krijuar një sistem më efikas që mbështet ekonominë dhe tregun e punës.

11K views

Eksportet e Shqipërisë vazhdojnë të shënojnë rënie për vitin e tretë radhazi, duke treguar vështirësi të thella në tregjet ndërkombëtare. Sipas INSTAT, gjatë vitit 2025 eksportet e mallrave u ulën me 6,1%, duke arritur vlerën 346 miliardë lekë. Ndërkohë, importet ranë me 0,8%, në 887 miliardë lekë, por deficiti tregtar u rrit me 3%, në 541 miliardë lekë. Grupet më të prekura nga tkurrja janë “Materiale ndërtimi dhe metale” (-25,4%) dhe “Minerale, lëndë djegëse dhe energji” (-6,7%), ndërsa sektorët e vetëmbrojtur, si ushqimet, pijet dhe makineritë, shënuan rritje modeste. Eksportet e tekstileve dhe këpucëve ranë lehtë (-1,1%), por prodhuesit presin përmirësim gradual në 2026. Një faktor i rëndësishëm që ka ndikuar në performancën e eksporteve është rënia e vazhdueshme e euros, e cila u ul për herë të parë nën 100 lekë në vitin 2024 dhe mbylli vitin 2025 me një mesatare prej 97,8 lekë, duke reflektuar një nënçmim prej rreth 30%. Ekspertët ekonomike theksojnë se pjesë e kësaj dobësie lidhet edhe me hyrjen e një sasi të madhe eurosh të padeklaruara në vend, të dyshuara si produkt i pastrimit të parave, e cila ka rritur presionin mbi kursin dhe stabilitetin e tregut valutor. Sipas analizës, pas tre viteve të vështira, disa sektorë me fokus në prodhimin bujqësor dhe industri mbështetëse, si makineritë dhe pjesët këmbimi për automjetet, po shfaqin shenja rimëkëmbjeje. Megjithatë, sfidat kryesore mbeten fuqia punëtore, konkurrenca globale dhe ndikimi i dobësimit të euros mbi kontratat ndërkombëtare.

3171 views

Presidenti amerikan Donald Trump ka deklaruar se Europa duhet të përqendrohet te lufta mes Rusisë dhe Ukrainës, dhe jo te çështja e Groenlandës, mes rritjes së tensioneve për përpjekjet e tij për ta vënë territorin nën kontrollin e SHBA-ve. “Europa duhet të fokusohet te lufta me Rusinë dhe Ukrainën, sepse sinqerisht po shihni çfarë u ka sjellë ajo. Kjo është ajo ku Europa duhet të përqendrohet, jo te Groenlanda,” u shpreh Trump në një intervistë për NBC News. I pyetur nëse do të përdorte forcë për të marrë Groenlandën, territori gjysmë-autonom i Danimarkës, Trump u përgjigj shkurt: “Pa koment”. Presidenti ka intensifikuar presionin ndaj Danimarkës dhe disa vendeve europiane, duke paralajmëruar vendosjen e tarifave 10% ndaj Danimarkës dhe shtatë vendeve të tjera europiane, nëse nuk arrihet një marrëveshje për blerjen e Groenlandës. Sipas tij, tarifat do të hyjnë në fuqi më 1 shkurt. Një tjetër element që ka shtuar polemikat është lidhja që Trump i ka bërë kësaj çështjeje me Çmimin Nobel për Paqe. Në një mesazh drejtuar kryeministrit norvegjez Jonas Gahr Støre, Trump shprehej se, pasi Norvegjia nuk i dha Nobelin për, sipas tij, ndalimin e tetë luftërave, ai nuk ndihej më i detyruar të mendonte vetëm për paqen, por edhe për interesin e SHBA-ve. Kryeministri norvegjez reagoi duke theksuar se qëndrimi i Norvegjisë për Groenlandën është i qartë dhe se ajo është pjesë e Mbretërisë së Danimarkës, të cilën Norvegjia e mbështet plotësisht. Trump, nga ana e tij, ka hedhur poshtë pretendimet se Norvegjia nuk ka ndikim në dhënien e Çmimit Nobel për Paqe, duke deklaruar se vendi “e kontrollon plotësisht” procesin, pavarësisht se vendimi merret nga një komitet i pavarur i emëruar nga parlamenti norvegjez. Ndërkohë, ish-diplomatë amerikanë kanë shprehur skepticizëm ndaj pretendimeve të Trump, duke theksuar se qeveria norvegjeze nuk ka rol në vendimmarrjen për Çmimin Nobel. Trump ka përsëritur se nuk i intereson çmimi Nobel, duke deklaruar se ndalimi i konflikteve dhe shpëtimi i jetëve, sipas tij, është një shpërblim më i madh. Ai ka konfirmuar gjithashtu se do të zbatojë tarifat ndaj vendeve europiane nëse nuk arrihet një marrëveshje për Groenlandën, duke thënë: “Po, 100%”.

21.5K views

Denoncimet e qytetarëve për gjendjen e amortizuar të infrastrukturës rrugore shtohen çdo ditë. Rrugët e degraduara dhe pa asnjë standard sigurie, po kthehen në burim aksidentesh dhe po shkaktojnë dëme të vazhdueshme materiale për drejtuesit e mjeteve. Çdo ditë, dhjetëra qytetarë i drejtohen redaksisë sonë për të denoncuar gjendjen skandaloze të rrugëve. Së fundmi, një qytetar nga Shijaku, i vetëquajtur “Gjysh Ujku”, ka ngritur një shqetësim serioz për zonën ku banon. Ai tregon se gjatë ditës së sotme, teksa po qarkullonte me automjetin e tij tip “Benz”, i është çarë goma për shkak të gropave të shumta dhe rrugës së paasfaltuar prej dekadash, “që nga koha e italianit”, siç shprehet vetë ai. I indinjuar nga kjo situatë, qytetari i bën thirrje ministres së Infrastrukturës, Belinda Balluku, që të kthejë sytë edhe nga kjo zonë, pasi rruga shërben si dalje për në autostradën Durrës–Tiranë dhe ka një fluks të lartë automjetesh gjatë gjithë kohës. Për të shmangur dëme të tjera për drejtuesit e mjeteve dhe që qytetarë të tjerë të mos përballen me të njëjtin fat, “Gjysh Ujku” ka marrë vetë një lopatë dhe ka nisur të mbushë gropat me dhe dhe zhavorr, edhe pse kjo nuk është detyra e tij dhe ekzistojnë institucione të paguara për mirëmbajtjen e rrugëve. Ky rast ngre edhe një herë alarmin për neglizhencën ndaj infrastrukturës rrugore dhe nevojën për ndërhyrje të menjëhershme nga institucionet përgjegjëse.

43.9K views

Kryeministri Edi Rama inspektoi sot parkun e ri pranë liqenit të Paskuqanit, në territorin e bashkisë Kamëz, një hapësirë që duket gati për fotografi dhe superlativa: kënde lojërash, amfiteatër, mol dhe 84 hektarë të mbushur me pemë. Kryebashkiaku Rakip Suli prezantoi projektin me entuziazëm, por nuk la pa përmendur planet për ndërtime private pranë parkut, “vetëm” deri në tre kate, që i japin një shije të veçantë gjelbërimit që, duket se, do t’i rezistojë vetëm kaq pak kohë betoni. Teksa Suli fliste për parkun si magnet për fëmijë dhe të rinj, Rama nuk la pa ironinë e tij të zakonshme, duke iu drejtuar me nofkën “o Kipe o Kipe”, një ironi tallëse që banorët përdorin për kryebashkiakun. “Kemi 20 mijë fëmijë, plot të rinj,” shtoi Suli, ndërsa numrat, tingëllojnë më shumë si slogan se si statistika. Rama e mori Kamzën si shembull kombëtar, duke deklaruar se parku i jep kryeqytetit një “aset të gjelbër të paçmueshëm” dhe se duhet “të mësojmë nga Kamza”. Por ironia qëndron tek e vërteta më e thellë, shumë prej të rinjve të zonës nuk do ta shijojnë këtë aset për shumë kohë. Pjesa më e madhe emigrojnë drejt vendeve të BE-së, kryesisht Anglisë, sapo mbarojnë gjimnazin, për shkak të mungesës së mundësive të punësimit dhe zhvillimit në vend. Ndërsa liqeni zbukurohet dhe pedonalet shtrihen, ndërsa këndet e lojërave mbushen, dhe betonet me dy-tri kate presin të ngrihen, tabloja reale është më e dhimbshme, gjelbërimi është përkohësisht i bukur, por perspektiva e të rinjve duket larg, shumë larg, diku andej nga Anglia.

141.6K views

Media spanjolle CONFILEGAL i ka kushtuar një artikull një skeme të dyshuar mashtrimi dhe pastrimi parash, ku Shqipëria përmendet si një nga destinacionet kryesore ku janë kanalizuar fondet e paligjshme. Sipas raportimit, Gjykata e Tiranës ka urdhëruar sekuestrimin e pasurive me vlerë rreth 30 milionë euro, që i përkasin shtetasit spanjoll Álvaro Romillo Castillo, i njohur me pseudonimin “CryptoSpain”. Vendimi është marrë në kuadër të hetimeve për pastrim parash, pas dyshimeve se një pjesë e konsiderueshme e të ardhurave kriminale është investuar në Shqipëri. Autoritetet shqiptare bëjnë me dije se fondet, të përfituara nga një skemë mashtrimi që në Spanjë arrin vlerën mbi 250 milionë euro, janë kanalizuar kryesisht në zonën e Dhërmiut, përmes blerjes së tokave, automjeteve luksoze, hapjes së llogarive bankare dhe krijimit të tre kompanive të lidhura me sektorin e turizmit dhe pasurive të paluajtshme. Hetimet zbulojnë se këto kompani janë përdorur për blerjen e pronave me çmime nën vlerën reale të tregut, një metodë e njohur për pastrimin e parave. Ndërkohë, Romillo ndodhet aktualisht në paraburgim në Spanjë, i akuzuar si organizator i një skeme mashtruese investimesh në kriptomonedha, me mbi 3 mijë viktima dhe shtrirje ndërkombëtare.

13.3K views

Rasti i influencieres shqiptare Dajana Kalo, vetëm 25 vjeçe, ka nxjerrë edhe një herë në pah mosdhënien e shërbimit jetik nga QSUT dhe dështimin e shëndetësisë publike. E reja ka pësuar një hemorragji cerebrale si pasojë e një Malformacioni Arteriovenoz (MAV) dhe ndodhet në gjendje serioze shëndetësore, e paralizuar në anën e djathtë. Pavarësisht urgjencës, familjarët denoncojnë në rrjete sociale se për javë të tëra janë përballur me zvarritje, mungesë përgjegjësie dhe justifikime absurde nga spitali, duke e lënë Dajanën të luftojë për jetën pa ndërhyrjen e nevojshme në kohë. 25-vjeçarja ndodhet e shtruar që prej 29 dhjetorit në pavionin e neurokirurgjisë në QSUT dhe është diagnostikuar me Malformacion Arteriovenoz (MAV). Ajo ka pësuar një goditje në tru dhe aktualisht është e paralizuar në njërin krah dhe njërën këmbë. Pavarësisht gjendjes së rëndë, mjekët nuk kanë ndërhyrë ende, pasi për të vendosur për kirurgjinë, përfshirë edhe trombectominë, duhet më parë të kryhet ekzaminimi Arteriografi (DSA). Edhe pse në QSUT ndodhen dy pajisje për këtë ekzaminim, pas tre javësh për të renë nuk ka pasur asnjë zgjidhje: njëra pajisje pretendohet se nuk funksionon, ndërsa për tjetrën kërkohet miratimi i një mjeku që nuk e merr përsipër. Mjeku që duhet të japë miratimin për ekzaminimin punon gjithashtu në një spital privat, i cili është e vetmja strukturë jo publike në vend që ofron këtë shërbim, me kosto që nisin nga 25 mijë euro. Në këto rrethana, sorollatja e 25-vjeçares në QSUT merr kuptim të plotë, duke krijuar dyshime serioze për klientelizëm, monopol dhe konflikt të hapur interesi mes shëndetësisë publike dhe asaj private. Familjarët e Dajanës janë detyruar të hapin GOFUNDME, pasi shteti si gjithmonë dështon të shpëtojë jetën e qytetarëve të saj, duke nxjerrë në pah dështimin e shëndetësisë në Shqipëri. Kryeministri Edi Rama, ministrja e Shëndetësisë, Evis Sala, drejtoresha e QSUNT, Anxhela Paparizo mbajnë përgjegjësi të drejtpërdrejtë për një sistem që lë pacientët shqiptarë, në rastin konkretë edhe Dajanën, të presin mes jetës dhe vdekjes.

50K views

Ditën e sotme në stadiumin e Vorës po zhvillohet ndeshja e vendasve të Vorës me Tiranën, e vlefshme për Kategorinë Superiore. Ndeshja e cila ka startuar në orën 13:30, po ndiqet në stadium nga një numër i konsiderueshëm tifozësh që kanë arritur të sigurojnë bileta. Por tri tifozë të vegjël, që mesa duket s’kanë arritur dot të sigurojnë bileta, kanë tërhequr vëmendjen e të gjithëve. Fëmijët po e ndjekin ndeshjen nga jashtë stadiumit, në një kodër ku kanë vendosur 3 karrige, pa u shqetësuar fare për biletat, çmimet e tyre apo telefonat e video lojërat online si të gjithë bashkëmoshatarët.

19.7K views

Kjo është gjendja aktuale e rrugës Ersekë–Leskovik, konkretisht në aksin Borovë–Barmash, e cila prej disa muajsh paraqet rrezik serioz për qarkullimin e automjeteve. Sipas raportimeve të qytetarëve, rruga është restauruar vetëm një vit më parë, por sot është shembur pothuajse plotësisht, duke u kthyer në një rrezik të madh për drejtuesit e mjeteve dhe banorët e zonës. Banorët shprehen të alarmuar, pasi çdo kalim në këtë aks përbën rrezik real, sidomos gjatë natës dhe në kushte të pafavorshme atmosferike. Sipas tyre, rruga ndodhet në këtë gjendje prej rreth dy muajsh, pa asnjë ndërhyrje nga institucionet përgjegjëse. Ky aks është pjesë e rrugës Korçë–Ersekë, e cila i ka kushtuar buxhetit të shtetit rreth 50 milionë euro, ndërkohë që për restaurimin janë shpenzuar miliona euro të tjera. Sipas të dhënave publike, tenderi është fituar nga kompania A.N.K., ndërsa janë akorduar edhe rreth 4 milionë euro shtesë për punime të paparashikuara. Mësohet se kostoja për 1 kilometër rrugë ka arritur deri në 3 milionë euro. Qytetarët ngrenë pikëpyetje serioze mbi cilësinë e punimeve dhe kërkojnë ndërhyrje urgjente nga institucionet përgjegjëse, përpara se kjo situatë të sjellë pasoja të rënda për jetën dhe sigurinë e përdoruesve të rrugës. Denoncimi i qytetarit: Pershendetje, Këto janë te rruga Ersekë Leskovik shumë e rrezikshme. Ka nje vit qe eshte restauruar. Ka shume rrezik si rruge. Aksi Borove Barmash. Ka dy muaj ne kete gjendje, askush s kujtohet per te

41.2K views

Banorët e lagjes Sinoballa, nr. 4, në Kamëz, kanë ngritur shqetësimin për gjendjen e rrugës, e cila prej rreth katër muajsh është lënë përgjysmë nga Bashkia Kamëz. Sipas tyre, është shtruar vetëm gjysma e rrugës, ndërsa pjesa tjetër ka mbetur me baltë dhe zhavorr, duke u bërë e pakalueshme sidomos gjatë reshjeve të shiut. Banorët shprehen se detyrohen ta rregullojnë vetë me shpenzimet e tyre, edhe pse paguajnë taksa. Qytetarët thonë se kanë bërë ankesa të shumta pranë bashkisë Kamëz me kryetar Rakip Sulin, por pa asnjë zgjidhje konkrete, ndërsa janë mashtruar me premtime se rruga do të asfaltohej më 20 dhjetor. Edhe pse ka kaluar 20 janari, punimet nuk kanë përfunduar, duke e bërë jetën e përditshme të vështirë për banorët, fëmijët dhe automjetet që shpesh mbeten të bllokuara.

58.8K views

Një banor i fshatit Priskë e Madhe i është drejtuar redaksisë duke ngritur një shqetësim serioz në lidhje me sigurinë elektrike pranë banesës së tij. Sipas tij, prej rreth një viti në zonë është vendosur një linjë elektrike kabllore trefazore, por pa shtylla mbajtëse, duke bërë që kabulli të kalojë drejtpërdrejt mbi hardhitë e rrushit në oborrin e shtëpisë. Banori shprehet se, për të shmangur rrezikun, është detyruar të vendosë vetë një shtyllë të improvizuar, por edhe ajo është përkulur nga pesha e madhe e kabullit. Ai tregon se ka bërë kërkesa të vazhdueshme pranë institucioneve përkatëse për vendosjen e një shtylle zyrtare, por prej një viti, sipas tij, vetëm është sorollatur pa asnjë zgjidhje konkrete. Ai apelon për ndërhyrje urgjente nga institucionet përgjegjëse, përpara se kjo situatë e rrezikshme të përfundojë në pasoja të rënda. Denoncimi i qytetarit: Pershendetje JOQ. Jam je banor i fshatit prisk e madhe kam je problem me lijen elektrike kan bo lijen kabllore para 1 viti lij 3 fazore dhe skan vu shtyll po e kan ven kabllin siper tones rrushit kam vendos je shtyll te sajuar vet po dhe ajo esht ktutur nga pesha e kabllit kam ber kerkes per je shtyll po kan 1 vit qe me sorollasin kam korentin mbi hekrat e rrushit kam 3 fmij te vegjel qe lozin jasht ju lutem bejeni publike se mos na e sjellin 1 shtyll para se te ndodhi noi gje flm

14.2K views

SPAK ka dhënë një pasqyrë të detajuar mbi mënyrën se si u dekonspirua operacioni kundër Call Center-ave mashtrues në Tiranë, duke konfirmuar se pronarët dhe drejtuesit e aktivitetit të paligjshëm janë paralajmëruar paraprakisht për një kontroll të mundshëm. Sipas Prokurorisë së Posaçme, Call Center-i kryesor operonte në godinën “Atti Tower”, në rrugën “Ibrahim Rugova”, pranë Katedrales Ortodokse, dhe ishte nën hetim për mashtrimin e shtetasve italianë përmes platformave të rreme të investimeve në kriptomonedha. Hetimet, të nisura më 9 janar 2026 pas provave të dorëzuara nga gazetarët e emisionit italian “Le Iene” dhe denoncimeve të qytetarëve italianë, zbuluan se drejtuesit e Call Center-it kishin vendosur kamera sigurie dhe persona për vëzhgim të vazhdueshëm të ambienteve, për të sinjalizuar çdo rrezik. SPAK thekson se mbrëmjen e 15 janarit 2026, pasi dyshohet se morën informacion për një ndërhyrje të afërt, drejtuesit boshatisën zyrat, hoqën pajisjet kompjuterike dhe nisën zhvendosjen e tyre gjatë natës, duke tentuar të fshihnin provat e aktivitetit kriminal. Në orët e para të 16 janarit 2026, hetuesit e Byrosë Kombëtare të Hetimit kapën 6 persona në flagrancë teksa transportonin pajisje drejt një ambienti tjetër në godinën “Downtown One”, në Bulevardin “Bajram Curri”, ku një pjesë e pajisjeve po tentoheshin të asgjësoheshin. Më pas, SPAK ndaloi edhe 2 persona të tjerë dhe shpalli në kërkim 3 të dyshuar, mes tyre vëllezërit Alfred, Agim dhe Arjan Prekaj, ku Alfred Prekaj rezulton pronar i kompanisë “Balkanspro”. Gjatë kontrolleve në 28 ambiente janë sekuestruar qindra pajisje kompjuterike, serverë, telefona, laptopë, karta SIM, dokumente, kamera sigurie, automjete dhe një Ferrari, ndërsa SPAK po heton intensivisht për të zbuluar se kush e dekonspiroi operacionin dhe nëse ka persona apo struktura të përfshira në nxjerrjen e informacionit.

16.4K views

Një qytetar ka raportuar një situatë shqetësuese që ka ndodhur në një nga rrugët kryesore të qytetit të Elbasanit ditën e sotme. Ai ka treguar se një i moshuar ka bllokuar rrugën me biçikletën e tij, duke shkaktuar një ngërç të madh trafiku. Sipas tij, i moshuari është zhveshur dhe ka bllokuar rrugën duke i penguar të gjithë kalimtarët dhe automjetet. Ai thotë se kjo situatë ka zgjatur për disa minuta dhe policia ka mbërritur me vonesë në vendnngjarje.

103.8K views

Një situatë alarmante u regjistrua këtë të shtunë në fshatin Spatharë, Njësia Administrative Qendër, Bashkia Librazhd, ku rrëshqitje masive të tokës shkaktuan dëme të konsiderueshme në banesa dhe infrastrukturë. Sipas burimeve nga terreni, lëvizjet e para të dheut u vunë re dje rreth orës 14:30, ndërsa rreth një orë më vonë fenomeni u riaktivizua me intensitet më të madh, duke zhvendosur sipërfaqe të tëra toke dhe duke krijuar panik te banorët e zonës. Në orët e vona të pasdites, situata u përkeqësua ndjeshëm, kur rrëshqitja përfshiu një bllok të tërë banimi, kryesisht në Lagjen Hoxha. Sipas Emergjencave Civile, dhjetëra shtëpi kanë pësuar dëmtime të lehta, ndërsa shtatë banesa janë dëmtuar rëndë dhe konsiderohen të pabanueshme. Zona pranë ish-depos së furnizimit me ujë të qytetit të Librazhdit mbetet ndër më të rrezikuarat, duke shtuar frikën për ndërprerje shërbimesh dhe rrezik për jetën e banorëve. Banorët e Spatharës kanë kritikuar institucionet vendore për mungesë masash parandaluese, duke theksuar se rrëshqitjet janë një problem i përsëritur prej vitesh.

69.5K views

Një qytetar amerikan që po planifikon të jetojë në Vlorë, së bashku me gruan dhe fëmijët e tij, kanë marrë në dorë pastrimin e bregut të detit, duke mbledhur mbeturinat që ndotnin zonën turistike. Ndryshe nga shqiptarët që në një ditë të dielë e me diell shëtisin mes mbeturinave të bregut të detit, amerikani dhe familja e tij janë të shqetësuar për këtë ndotje. Duke parë se Bashkia e Vlorës, me në krye Bruna Mersinin, nuk merr asnjë lloj mase para kësaj ndotje edhe pse kjo detyrë u takon atyre, amerikani ka përveshur mëngët dhe ka nisur të mbledhë mbeturinat. Ai shpreh zhgënjimin e tij për menaxhimin e mbeturinave nga bashkia duke theksuar se qyteti ka nevojë për veprime konkrete dhe të qëndrueshme për të ruajtur ambientin dhe imazhin turistik. Veprimi i familjes amerikane tregon një qasje aktive dhe qytetare, duke nxjerrë në pah mungesën e përgjegjësisë institucionale dhe nevojën për veprime reale për pastrimin dhe mirëmbajtjen e hapësirave publike.

32.1K views

Një rast i rëndë dhe thellësisht shqetësues është denoncuar pranë redaksisë sonë nga një banore e lagjes “Todi Shkurti”, pranë ish-tregut elektrik, ku një nënë e moshuar dyshohet se prej vitesh jeton nën dhunë sistematike nga vajza e saj, e cila vuan nga probleme të shëndetit mendor. Sipas denoncimit, dhuna ka qenë e përsëritur ndër vite, duke i shkaktuar të moshuarës plagë të rënda në kokë dhe në trup, për të cilat ajo ka marrë ndihmë mjekësore. Megjithatë, pavarësisht gjendjes së saj të rënduar, e moshuara është rikthyer sërish në banesë, në kushte tërësisht të papranueshme për jetesë. Aktualisht, ajo ndodhet e vetme, pa ushqim, pa ngrohje dhe pa asnjë person që të kujdeset për të. Situata bëhet edhe më alarmante nga fakti se e moshuara është e verbër, e pafuqishme për të lëvizur dhe, sipas denoncueses, dyshohet se vuan edhe nga demenca, gjë që e bën të pamundur komunikimin dhe kërkimin e ndihmës. Vajza e saj, e cila dyshohet si autore e dhunës, është dërguar në institucion psikiatrik, ndërsa në banesë nuk ka mbetur asnjë strukturë mbështetëse për të garantuar sigurinë dhe kujdesin minimal të të moshuarës. Banorët e zonës dhe denoncuesja i bëjnë thirrje institucioneve përgjegjëse, përfshirë shërbimet sociale, policinë dhe strukturat shëndetësore, që të ndërhyjnë urgjentisht për të marrë masa konkrete, duke garantuar mbrojtjen, trajtimin dhe dinjitetin njerëzor të saj. Ky rast ngre shqetësime serioze për mënyrën se si trajtohen rastet e dhunës në familje, veçanërisht kur viktimat janë persona të moshuar, të pafuqishëm dhe pa zë, dhe kërkon reagim të menjëhershëm përpara se kjo situatë të përfundojë në një tragjedi të paralajmëruar.

73.3K views

Ndryshimet e fundit ligjore, të publikuara në Fletoren Zyrtare si pjesë e paketës fiskale, shpjegojnë qartë tani edhe aktivitetin ekonomik në internet. Çdo person që gjeneron të ardhura online, nga blogerët te influencerët, konsiderohet subjekt tregtar dhe duhet të publikojë në faqen ose profilin e tij të dhënat bazë, përfshirë NIPT-in, emrin e subjektit, adresën dhe kontaktin. Administrata tatimore do të identifikojë këta individë kryesisht përmes të ardhurave të depozituara në llogaritë bankare dhe përmes monitorimit të aktivitetit online. Sipas ndryshimeve në ligjin për procedurat tatimore, pas marrjes së njoftimit zyrtar nga administrata, influencerët dhe personat publikë do të jenë të detyruar të formalizojnë aktivitetin e tyre në rrjete sociale. Ligji parashikon ashpërsim të masave në rast të moszbatimit. Nëse brenda 15 ditëve nga marrja e njoftimit nuk publikohet informacioni i kërkuar, AKEP mund të bllokojë llogarinë e influencerit në rrjetet sociale dhe të shqiptojë gjobë. Nevoja për këto ndryshime u diktua nga monitorimet e administratës tatimore. Sipas të dhënave zyrtare, vetëm nga kontrollet vjetore janë identifikuar rreth 100 profile në rrjete sociale që gjatë vitit 2025 gjeneruan mbi 33 milionë euro të ardhura të depozituara në llogari bankare individuale. Ekspertët theksojnë se këto shifra tregojnë rritje të ekonomisë online, por edhe nivele të larta informaliteti, që tani synohet të integrohen në sistemin tatimor.

30K views

Motra e Altin Meçajt, Xhuli, ka reaguar publikisht lidhur me ngjarjen e ndodhur në fshatin Vjosë, duke mohuar vërtetësinë e mesazheve të publikuara nga motra e punonjësit të policisë, Fredi Lamaj. Ajo deklaroi se mesazhet janë të sajuara dhe se familja e saj po përballet padrejtësisht me akuza që kanë sjellë përshkallëzim të konfliktit. Sipas saj, familja Meçaj ka pasur gjithmonë respekt për familjen Lamaj dhe nuk kërkon hakmarrje, por vetëm që drejtësia të hetojë ngjarjen dhe të ndalojë përhapjen e sajesave. Ajo e cilësoi të papranueshme dhunën ndaj një të moshuari dhe theksoi se situata nuk duhet të ishte kthyer në “telenovelë” mediatike. Ngjarja ndodhi mbrëmjen e 10 janarit, kur Altin Meçaj dhe babai i tij, Ylli Meçaj, u dhunuan pranë banesës së tyre. Sipas deklarimeve të familjes, Altini u thirr jashtë në orët e vona dhe më pas u godit nga disa persona, mes të cilëve pretendohet se ishte edhe Fredi Lamaj. Ylli Meçaj tregoi se u përpoq të mbronte djalin, por edhe ai u dhunua, duke pësuar plagë në kokë dhe duke marrë trajtim mjekësor në spital. Familja kërkon që autorët të mbajnë përgjegjësi ligjore për dhunën e ushtruar. Në qendër të konfliktit janë edhe mesazhet në rrjete sociale, të cilat motra e Fredi Lamajt i bëri publike, duke pretenduar se Altin Meçaj e kishte bezdisur vazhdimisht me shkrime të padëshiruara. Ajo deklaroi se komunikimi ka qenë i njëanshëm dhe se nuk ka dhënë asnjë përgjigje, duke theksuar se situata i ka shkaktuar shqetësim emocional dhe familjar. Nga ana tjetër, motra e Meçajt këmbëngul se mesazhet nuk janë të vërteta dhe se, nëse do të kishte pasur shqetësim, çështja mund të ishte zgjidhur pa dhunë dhe pa përfshirje publike.

128K views