Pas ciklonit Harry në Itali, meteorologët italianë kanë lëshuar një paralajmërim të ri alarmi për një tjetër fenomen të fuqishëm atmosferik. Sipas meteoweb.eu, një mega-ciklon i ri, i quajtur Leoni II, pritet të godasë Italinë gjatë kësaj fundjave, duke përfshirë të gjithë territorin me mot ekstrem. Meteorologët kanë dhënë alarm SOS, pasi sistemi po formohet në det të hapur dhe do të shoqërohet me erëra shumë të forta, stuhi të dhunshme dhe reshje intensive, veçanërisht nga nata e së shtunës drejt së dielës. Në disa zona, shpejtësia e erës pritet të kalojë 100 km/h, ndërsa deti do të jetë shumë i trazuar. Të hënën, më 26 janar, Leoni II pritet të zhvendoset mbi Italinë jugore, duke u fuqizuar më tej për shkak të boshllëkut të presionit të lënë nga cikloni i mëparshëm. Mega-cikloni do të kalojë mbi Apenine dhe do të lëvizë drejt Salentos, në zonën mes Pulias, Shqipërisë dhe Greqisë. E hëna parashikohet të jetë dita më e ftohtë, pasi cikloni do të zhvendoset mbi Detin Jon, duke lejuar depërtimin e ajrit të ftohtë polar detar. Megjithatë, sipas meteorologëve, temperaturat do të jenë nën mesatare, por jo ekstreme. Zonat më të rrezikuara mbeten Sardenja, rajonet bregdetare tirrenike dhe Italia Veriore, ku priten reshje të dendura, stuhi të forta, borë edhe në zona të ulëta në Veri, si dhe dallgë të fuqishme detare.

26.1K views

Shqiptarët e Kosovës mbetën edhe gjatë vitit 2025 grupi kryesor i turistëve që vizituan Shqipërinë, duke konfirmuar rolin vendimtar të ashtuquajturit “turizëm patriotik” në bilancin e sektorit. Sipas të dhënave zyrtare të INSTAT mbi Lëvizjen e Shtetasve, nga gjithsej rreth 12.46 milionë hyrje në vend, 4.66 milionë ishin nga Kosova, ose 37.4 për qind e totalit. Italianët ruajtën pozicionin si grupi i dytë më i rëndësishëm i turistëve, me 1.29 milionë hyrje gjatë vitit 2025. Megjithatë, rritja vjetore ishte vetëm 3.17 për qind krahasuar me 2024-ën, një ngadalësim i ndjeshëm në raport me vitin e kaluar, kur rritja kishte qenë mbi 31 për qind. Turoperatorët pohojnë se gjatë sezonit veror të vitit 2025 u vu re një zbehje e interesit nga turistët italianë, sidomos për Jugun e Shqipërisë. Sipas tyre, shtrenjtimi i çmimeve në disa zona bregdetare bëri që Shqipëria të mos perceptohej më si destinacion “i lirë”, çka solli anulime rezervimesh ose ndryshim destinacionesh. Megjithatë, italianët mbeten të rëndësishëm për turizmin gjithëvjetor, veçanërisht për fundjavat në Tiranë dhe Durrës, si dhe për turizmin kulinar e rural. Operatorët theksojnë se çmimet në restorante dhe përvoja gastronomike vazhdojnë ta mbajnë Shqipërinë konkurruese për këtë treg. Në rënie gjatë 2025-ës ishin edhe turistët polakë, të cilët arritën në 288 mijë hyrje, ose 2.8 për qind të totalit. Sipas operatorëve, kjo rënie nuk lidhet me turizmin e organizuar, i cili vijon të rritet, por me turistët individualë, që pas një periudhe promovimi intensiv, kishin zgjedhur të udhëtonin në mënyrë të pavarur. Po ashtu, shënuan rënie edhe hyrjet nga Turqia dhe Spanja. Ndërkohë, Gjermania dhe Franca rezultojnë tregjet me rritjen më të fortë. Gjatë vitit 2025, hyrjet nga Gjermania u rritën me 17.27 për qind, duke arritur në 452 mijë vizitorë. Ky grup vjen kryesisht përmes tureve kulturore, por edhe gjatë sezonit veror. Edhe Franca shënoi një rritje të ndjeshme prej 25.39 për qind, me 293 mijë hyrje. Operatorët turistikë presin që ky trend të vijojë edhe gjatë këtij viti, madje për herë të parë turistët francezë pritet të vijnë në mënyrë të organizuar me kontrata garancie për sezonin veror. Në rritje ishin edhe turistët nga Shtetet e Bashkuara të Amerikës, me 241 mijë hyrje dhe një rritje rreth 8 për qind krahasuar me një vit më parë. Shqipëria vijoi edhe gjatë 2025-ës promovimin në media ndërkombëtare dhe rrjete sociale, por në një intensitet më të ulët krahasuar me tre vitet e mëparshme. Ndërkohë, ekspozimi i problematikave të turizmit në rrjetet sociale, nga mbetjet dhe infrastruktura, te çmimet dhe kafshët e braktisura, ka ndikuar që një pjesë e turistëve të huaj të shfaqin më shumë rezerva. Për vitin 2026, operatorët e turizmit presin vijim të rritjes së vizitorëve, por paralajmërojnë se ngadalësimi i ritmeve nga viti në vit është një sinjal alarmi. Sipas tyre, pa masa urgjente për qëndrueshmëri afatgjatë, rritja sasiore mund të mos përkthehet në zhvillim të qëndrueshëm të sektorit turistik.

24.5K views

I dyshuari për vrasjen e Jani Aliajt në burgun e sigurisë së lartë Korydallos, në Greqi, ka dhënë dëshminë e tij të parë para grupit hetimor, duke deklaruar se ka vepruar në kushtet e vetëmbrojtjes. Sipas mediave greke, 28-vjeçari me shtetësi greke ka pohuar se ndjehej i rrezikuar për jetën dhe ka pretenduar se ishte viktima ai që ishte paguar për ta eliminuar. Gjatë marrjes në pyetje, ai është shprehur se, sipas bindjes së tij, nëse nuk do të vepronte i pari, do të ishte vetë viktimë e sulmit. I dyshuari e ka lidhur ngjarjen me një konflikt të mëparshëm dhe me një vrasje të ndodhur disa muaj më parë në zonën e Agios Panteleimonas, duke pretenduar se kjo kishte krijuar një zinxhir hakmarrjeje mes palëve. Nga të dhënat e deritanishme të dosjes hetimore, Jani Aliaj humbi jetën si pasojë e plagosjeve të marra gjatë përplasjes, ndërsa në incident u lëndua edhe një tjetër i burgosur, i cili dyshohet se tentoi të ndërhynte për të ndarë palët. Autoritetet greke bëjnë me dije se 28-vjeçari ka precedentë të rëndë penalë dhe është i përfshirë edhe në hetime për vepra të tjera të rënda. Ngjarja dyshohet të ketë ndodhur në një sektor të burgut ku nuk kishte kamera sigurie, në një moment kur të burgosurit kishin liri lëvizjeje brenda ambienteve të institucionit. Sipas burimeve zyrtare, para incidentit nuk ishin raportuar konflikte të hapura apo sinjale paralajmëruese mes viktimës dhe autorit të dyshuar, çka ka shtuar pikëpyetjet mbi mënyrën se si situata degradoi deri në një ngjarje fatale. Pas dhënies së dëshmisë, i dyshuari është rikthyer në qelinë e tij dhe pritet të përballet me procesin gjyqësor në Greqi, ku rrezikon dënime të rënda, deri në burgim të përjetshëm. Jani Aliaj ishte dënuar më herët me burgim të përjetshëm nga drejtësia shqiptare për vrasjen e Elton Çiços, krim i ndodhur më 1 maj 2016 në zonën e ish-Bllokut në Tiranë. Autoritetet shqiptare kishin nisur procedurat për ekstradimin e tij, me qëllim që dënimi të vuhej në Shqipëri.

12.6K views

Policia Kombëtare spanjolle dhe Agjencia Tatimore kanë goditur një rrjet ndërkombëtar të trafikut të drogës, duke arrestuar tetë persona, disa prej tyre në momentin kur po hanin në një restorant në Vigo, pak para se të shkonin të merrnin një ngarkesë prej 200 kilogramësh kokainë të mbërritur nga Amerika e Jugut. Sipas autoriteteve spanjolle, bëhet fjalë për anëtarë të një klani me origjinë shqiptare, të specializuar në trafikun detar të lëndëve narkotike përmes anijeve tregtare me kontejnerë. Operacioni, i koduar “Monterrey”, pengoi importin e parë të kësaj organizate në Galici. Pesë të dyshuarit e parë u arrestuan më 12 janar në Vigo. Dy prej tyre u kapën në një banesë me qira, ndërsa tre të tjerë u arrestuan teksa po hanin në një restorant të qytetit, në pritje të momentit për të tërhequr katër pako kokaine me logon “Kia”, të futura në kontejner me metodën e njohur si “grepi i verbër”. Hetuesit i ndiqnin prej vitit 2024. Një javë më vonë, më 20 janar, u arrestuan edhe tre bashkëpunëtorë të tjerë në zona të ndryshme të Galicisë, si A Coruña, Lugo, Madridi dhe O Salnés. Gjatë operacionit u sekuestruan gjithashtu rreth 20 mijë euro cash, ndërsa droga e konfiskuar u ekspozua në komisariatin e Vigos. Sipas policisë, drejtuesi i këtij rrjeti ishte një bashkëpunëtor i ngushtë i Brian Colin Charrington, 68-vjeçarit britanik të njohur si “narkosi i Wikipedias”, i cili ndërroi jetë në korrik 2025 në Alicante. Charrington ishte bërë i njohur për publikimin e aktiviteteve dhe arrestimeve të tij në internet dhe konsiderohej një figurë kyçe e trafikut ndërkombëtar të kokainës mes Amerikës Latine dhe Spanjës. Autoritetet spanjolle theksojnë se grupi shqiptar kishte bashkëpunim me organizata galiciene për t’u vendosur në Galici dhe për të përdorur portin e Vigos si pikë të sigurt për nxjerrjen e drogës. Kjo ngarkesë e sekuestruar ishte përpjekja e parë e tyre për të futur kokainë përmes këtij porti. Në total, tetë persona janë arrestuar për pjesëmarrje në organizatë kriminale dhe trafik droge, ndërsa pesë prej tyre janë lënë në burg. Hetimet, që zgjatën rreth 17 muaj, u drejtuan nga Gjykata e Hetimit nr. 8 e Vigós. Sipas burimeve policore, bëhet fjalë për “profesionistë me degëzime në mbarë botën”, me kontakte në zonat e prodhimit të drogës në Amerikën Latine dhe me kapacitet të lartë financiar për të vepruar në porte strategjike si Vigo, i cili tashmë konsiderohet një nga nyjet kryesore të narkotrafikut detar në Spanjë.

2841 views

Në Qendrën Spitalore Universitare “Nënë Tereza”, kryerja e analizave laboratorike nuk përcaktohet më nga nevoja mjekësore, por nga kufijtë financiarë të një kontrate koncesionare. Në praktikë, shëndeti i pacientëve është kthyer në një çështje kalendari dhe bilanci mujor. Shërbimi laboratorik në spitalin më të madh publik të vendit ofrohet përmes Partneritetit Publik-Privat koncesionit të laboratorëve dhënë oligarkut të Shëndetësisë Janis Karathanos, i cili parashikon qartë se sapo të arrihet kufiri mujor i shpenzimeve, kompania private nuk ka më detyrim të kryejë analiza rutinë. Burime nga brenda QSUT bëjnë me dije se ky limit arrihet pothuajse rregullisht rreth datës 20 të çdo muaji. Pas kësaj date, pacientët përballen me të njëjtën përgjigje standarde: "Fondi ka mbaruar!". Pasoja është zinxhir... analiza të shtyra, diagnoza të vonuara, trajtime të pezulluara dhe rritje e rrezikut për shëndetin e pacientëve, të cilët detyrohen ose të presin muajin tjetër, ose të drejtohen drejt shërbimeve private, e deri në atë moment mund të kenë ndërruar jetë... Kontrata koncesionare parashikon që kompania të njoftojë institucionin kur shpenzimet arrijnë 50%, 75% dhe 100% të buxhetit. Pas tejkalimit të tavanit, lejohen vetëm analiza urgjente, dhe edhe ato nuk duhet të kalojnë 5% të volumit mujor. Në letër, gjithçka duket e rregulluar. Në praktikë, sistemi shndërrohet në një mekanizëm kufizues për mjekët dhe pacientët. Burime spitalore tregojnë se janë zhvilluar takime ku drejtues shërbimesh janë thirrur për të dhënë shpjegime pse në një repart janë kryer “shumë” analiza dhe në një tjetër “pak”. Në vend që vendimmarrja të mbështetet në nevojat klinike, ajo duket se ndikohet nga llogaritë financiare të koncesionarit. Kjo situatë krijon një precedent të rrezikshëm. Autonomia mjekësore zëvendësohet nga logjika e bilancit, ndërsa QSUT, institucioni që duhet të garantojë shërbim publik shëndetësor, shfaqet më tepër si garant i disiplinës financiare të kontratës sesa si mbrojtës i pacientit. Skema përsëritet çdo muaj, pa përjashtim. Fillimisht analizat kryhen normalisht, më pas vijnë paralajmërimet për tejkalim fondi dhe në fund vendoset bllokada për pacientët jo-urgjentë. Një cikël i njohur, i parashikueshëm dhe i pranuar në heshtje. Në thelb, problemi është i qartë: në këtë sistem, buxheti dikton shëndetin, jo e kundërta. Dhe ndërsa pacientët presin, kontrata vazhdon të zbatohet me përpikmëri. Pyetja që mbetet pa përgjigje është thelbësore: A është QSUT një spital publik në shërbim të qytetarëve, apo një mekanizëm për zbatimin strikt të kufijve financiarë të një koncesioni?

9655 views

Një qytetar nga lagjja Bregu i Lumit, Tiranë ka ngritur shqetësimin për mungesën e theksuar të koshave të plehrave në këtë zonë, duke e cilësuar situatën si problem serioz për mjedisin dhe jetën e përditshme të banorëve. Sipas qytetarit, pretendimet se banorët i hedhin mbeturinat rrugëve nuk qëndrojnë. Ai thekson se qytetarët përpiqen t’i depozitojnë mbeturinat në vende të caktuara, por mungesa e infrastrukturës bazë e bën të pamundur menaxhimin normal të mbetjeve. Qytetari shton se përgjatë gjithë bregut të lumit ndodhen vetëm katër kosha plehrash, të vendosur në dy pika të ndryshme, çka është krejtësisht e pamjaftueshme për një lagje të tërë. Si pasojë, mbeturinat shpesh grumbullohen pranë lumit, duke krijuar ndotje dhe rrezik për shëndetin publik. Banorët e zonës kërkojnë nga institucionet përgjegjëse që të ndërhyjnë sa më parë me vendosjen e koshave shtesë dhe me një plan më të mirë për menaxhimin e mbetjeve, në mënyrë që të parandalohet ndotja dhe të përmirësohen kushtet e jetesës në këtë lagje. Denoncimi i qytetarit: Ketu jemi te lagjja bregu o lumit,nuk eshte se ne i hedhim paguret rrugeve sic thot kryeministri i pakices shqiptare,ne nje vend i hedhim por problemi eshte se ska kosha plehra e gjith bregu i lumit 4 kosha plehrash ka ne dy vende

15.6K views

Një 25-vjeçar me origjinë nga Egjipti, i quajtur Mahmoud, i është drejtuar redaksisë tonë për të kërkuar ndihmë. I riu i cili prej 6 muajsh ndodhet në Shqipëri me vizë pune po kërkon një punë të re pasi puna e fundit në Vlorë s’ka shkuar mirë. Ai ka treguar se në portin e Vlorës ka punuar si peshkatar por punëdhënësi s’e ka paguar për punën e kryer dhe i ka mbajtur peng dokumentet, pasaportë dhe vizë pune. Pas shumë tentativave, Mahmoud ka arritur t’ia marrë dhe tani po kërkon një punë të re. Ai thotë se ka aftësi për të punuar në disa fusha: bujqësi (ferma), punë kuzhine, zdrukthtari (marangoz), ndërtim dhe punë krahu në kantier, është serioz dhe i gatshëm të mësojë shpejt dhe të punojë me përkushtim. Kontrata e tij e punës është e rinovueshme prandaj duke qenë i vetëm në Shqipëri po kërkon një mundësi për punë për të ndërtuar një të ardhme më të mirë. Mesazhi i plotë: Përshëndetje, Ju kërkoj ndjesë për shqetësimin. Po ju shkruaj sepse jam në vështirësi. Jam një djalë nga Egjipti dhe kam ardhur në Shqipëri për të punuar. Kam qëndruar në Shqipëri për 3 muaj dhe kam punuar në portin e Vlorës si peshkatar. Pas shumë vështirësish dhe keqtrajtimesh nga punëdhënësi, më në fund arrita të marr mbrapsht pasaportën dhe vizën time të punës, pasi nuk më lejonte t’i mbaja. Kam dëgjuar se shqiptarët janë zemërmirë dhe mikpritës, ndaj po e shkruaj këtë mesazh me shpresën se dikush mund të ketë nevojë për një punëtor. Jam 25 vjeç dhe kam aftësi për të punuar në disa fusha, si: bujqësi (ferma), punë kuzhine, zdrukthtari (marangoz), ndërtim dhe punë krahu në kantier. Jam i gatshëm të mësoj shpejt dhe të punoj seriozisht. Kontrata ime e punës është e rinovueshme. Arsyeja pse po ju drejtohem është sepse jam i vetëm në një vend të huaj dhe kam ardhur këtu për shkak të vështirësive ekonomike. Nuk mund të kthehem në Egjipt sepse dua të punoj, dhe ardhja ime në Shqipëri më pelqen

78.3K views

Teksa pak ditë më parë një paciente e dializës denoncoi haptazi oligarkun Klodian Allajbeu për kushtet mizerable ku koncesionari u jep shërbimin të sëmurëve e për të është paguar 80 Milionë € nga Buxheti i Shtetit...Ditën e sotme, Glauk Olldashi, djali i të ndjerit Sokol Olldashi ka kritikuar Berishën. Ai ka thënë se në foltore përzgjidhen njerëz që flasin pallavra ose janë tapë... “Nuk e di kush i zgjedh… personi ose personat që zgjedhin disa nga personat që dalin aty, po bëjnë faj ndaj nesh, jo gabim. Sepse të dalin aty njerëz që flasin kuturu… Disa kanë qenë dhe tapë, iu merret goja kur flasin… na dëmton të gjithëve ne!” Sipas tij, daljet publike pa përgatitje dhe pa përgjegjësi po e dëmtojnë seriozisht kauzën dhe perceptimin publik, duke kërkuar më shumë filtër dhe përgjegjësi në përzgjedhjen e folësve.

21.3K views

Një tjetër procedurë prokurimi publik po ngre dyshime të forta për abuzim me fondet e shtetit dhe paracaktim të fituesit. Operatori i Blerjeve të Përqendruara ka mbyllur së fundmi tenderin me numër reference REF-66192-10-22-2025, i cili ka si objekt rikonstruksionin e godinës së Institucionit të Ekzekutimit të Vendimeve Penale (IEVP) në Fushë Krujë. Ndonëse bëhet fjalë për një shumë të konsiderueshme që kap vlerën e 1.4 miliardë lekëve të vjetra me TVSH, hulumtimi i dokumentacionit tregon se gara ka qenë vetëm formale, pasi fituesi është përzgjedhur në kundërshtim me parimin e kursimit të parave publike. Në këtë tender morën pjesë gjithsej gjashtë kompani, të cilat paraqitën ofertat e tyre për të marrë përsipër punimet në godinën e burgut. Megjithatë, ajo që bie në sy dhe përbën skandalin kryesor është fakti se institucioni shtetëror ka skualifikuar pesë konkurrentët e tjerë, për të shpallur fitues bashkimin e kompanive që kishte dhënë ofertën më të kripur në tavolinë. Bashkimi i operatorëve ekonomikë i përbërë nga firmat “2Z KONSTRUKSION” në pronësi të Zani Zogës, “TOTILA” në pronësi të Jemin Totos dhe “ASI-2A CO” në pronësi të Andrea dhe Astrit Gjikondajt, arriti të rrëmbejë kontratën me vlerën 117,499,290 lekë të reja pa TVSH. Pyetja që lind natyrshëm është se përse Operatori i Blerjeve të Përqendruara vendosi të zgjedhë pikërisht bashkimin e kompanive Zoga, Toto dhe Gjikondaj, kur operatorët e tjerë kishin ofruar të kryenin të njëjtat punime me një kosto shumë më të ulët për buxhetin e shtetit. Diferenca mes fondit limit prej rreth 125 milionë lekësh të reja dhe ofertës fituese është minimale, duke treguar se fituesit kanë shkuar direkt tek paratë e vëna në dispozicion, pa tentuar asnjë kursim real. Kjo praktikë, ku oferta më e lartë shpallet fituese ndërkohë që ofertat më ekonomike flaken tej me argumente teknike shpeshherë të diskutueshme, është shndërruar në një fenomen shqetësues në prokurimet publike shqiptare. Në rastin e IEVP Fushë Krujë, transparenca duket se ka mbetur në hije, ndërkohë që rreth 1.5 miliardë lekë nga taksat e qytetarëve do të shkojnë për llogari të katër pronarëve të kompanive fituese, në një garë ku kursimi i lekut publik ishte objektivi i fundit në listë.

30.2K views

Një qytetare ka denoncuar për redaksinë tonë një rast të rëndë mashtrimi që ka ndodhur në një klinikë që ofron shërbime me lazer në kryeqytet. Ajo tregon se së bashku me një mikeshë kanë kërkuar një paketë shërbimi me vlerë 500 euro, por pas pagesës, klinika ka zhdukur çdo gjurmë, duke i lënë ato të pa shërbim dhe pa asnjë përgjigje. Vajza dhe mikeshja e saj janë paraqitur në klinikë dhe kanë paguar një kapar prej 250 euro secila, duke u premtuar se pjesa tjetër e pagesës do të bëhej pas seancave të lazerit. Por sapo paratë u dorëzuan, gjërat morën një kthesë të papritur. Faqja e klinikës në rrjetet sociale “avulloi” dhe çdo përpjekje për të kontaktuar rezultoi e kotë. Telefonatat dhe mesazhet e vajzave kanë mbetur pa përgjigje. Pasi nuk arritën të lidhen me klinikën përmes telefonit, vajzat kanë shkuar në ambientet ku ndodhej klinika, por edhe aty janë përballur me të njëjtën situatë. Dera ka qenë e mbyllur, ndërsa askush nuk e ka hapur për të sqaruar vajzat. Të njëjtin skenar kanë treguar edhe komentet në postimet e kësaj klinike, ku persona të tjerë denoncojnë se janë mashtruar në të njëjtën mënyrë: faqja merr paratë dhe zhduket. Kjo situatë ngre dyshime të forta se kemi të bëjmë me një skemë të organizuar mashtrimi, ku klientët tërhiqen me premtime për shërbime me lazer, paguajnë një kapar të konsiderueshëm dhe më pas mbeten të braktisur. Përveç humbjes së parave, klientët mbeten të ekspozuara dhe të pafuqishme për të kërkuar drejtësi, pasi çdo mundësi kontakti me “klinikën” është shuar.

3919 views

Një ish-agjent i CIA-s ka bërë deklarata alarmante lidhur me atë se çfarë mund të dëgjojnë dhe kontrollojnë pajisjet që përdorim çdo ditë, nga telefonat inteligjentë te televizorët, dhe madje edhe makinat. John Kiriakou, ish-operativ i CIA-s dhe i ftuar këtë javë në podcast-in “The Diary of a CEO”, u shpreh se pajisjet digjitale nuk janë aspak të sigurta, duke rrëzuar idenë se privatësia jonë është e mbrojtur. “Nuk janë të sigurta fare. Dhe nuk është vetëm SHBA-ja. Britanikët, francezët, gjermanët, rusët, kinezët, izraelitët, iranianët; të gjithë i kanë këto kapacitete. Duhet të jemi shumë, shumë të kujdesshëm,” – tha Kiriakou. Ai kujtoi edhe skandalin e vitit 2017, të njohur si “Vault 7”, kur dokumente tepër sekrete të CIA-s u publikuan nga WikiLeaks. Sipas tij, këto dokumente zbuluan se agjencia amerikane kishte aftësinë të shndërronte televizorët smart në mikrofonë, edhe kur ata ishin të fikur. “Televizori mund të dëgjojë gjithçka që thuhet në dhomë dhe ta transmetojë më pas. Kjo teknologji ekzistonte që në vitet ’80,” – u shpreh ish-agjenti. Por deklarata më shqetësuese lidhej me kontrollin e makinave nga distanca. Sipas Kiriakou, shërbimet sekrete janë në gjendje të marrin kontrollin e sistemit kompjuterik të një automjeti, duke shkaktuar aksidente fatale. “Mund ta nxjerrin makinën nga rruga, ta përplasin, ta hedhin nga ura. Po, kjo është e mundur,” – tha ai. John Kiriakou është i njohur edhe për faktin se u dënua me burg pasi ekspozoi programin sekret të CIA-s për marrje në pyetje, përfshirë praktika të tilla si “waterboarding”, duke u bërë i vetmi punonjës i agjencisë i dënuar për këtë çështje. Waterboarding është një teknikë e ndaluar e marrjes në pyetje, ku personi i lidhur simulohet sikur po mbytet, duke i hedhur ujë mbi fytyrë dhe duke i shkaktuar ndjesinë ekstreme të mbytjes, frikës dhe panikut. Deklaratat e tij kanë ndezur debat në rrjetet sociale, duke ngritur sërish pikëpyetje serioze mbi privatësinë, sigurinë digjitale dhe kontrollin që teknologjia ka mbi jetën tonë të përditshme.

3917 views

Një qytetar nga Durrësi i është drejtuar redaksisë së JOQ Albania për të denoncuar një rast vjedhjeje të ndodhur në banesën ku ai jeton me qira, në zonën ish-Kënetës, lagjja 17. Sipas denoncimit, vjedhja ka ndodhur në një banesë që ndodhet në katin e parë, ku autori është futur fillimisht nga muri i ballkonit dhe më pas ka hyrë nga dritarja, e cila ndodhej përballë vendit ku ka kapërcyer. Qytetari bën me dije se nga banesa i është marrë një shumë prej 1 milion lekësh të vjetra. Momenti kur personi futet dhe del nga banesa është filmuar qartë nga kamerat e sigurisë. “Kam video dhe foto më të qarta të momentit të vjedhjes, por për momentin nuk dua t’i publikoj. Dua vetëm që personi që ka kryer vjedhjen t’i kthejë paratë, t’i hedhë brenda murit dhe ta mbyllim këtu, pa e bërë më të madhe,” – shprehet qytetari. Ai shton se fillimisht ka zgjedhur të mos bëjë denoncim në polici, duke i dhënë mundësi autorit të reflektojë dhe të kthejë shumën e marrë. Megjithatë, thekson se nëse nuk do të ketë asnjë reagim, rasti do të ndiqet në rrugë ligjore dhe materialet filmike do t’u dorëzohen autoriteteve. JOQ Albania e publikon këtë rast si denoncim anonim të qytetarit, duke shpresuar në zgjidhjen e situatës pa përshkallëzim të mëtejshëm dhe mbetet e hapur për çdo reagim.

11.8K views

LAJM I MIRË/ Gjendet 66-vjeçarja e raportuar e humbur në Tiranë, ndodhet në QSUT në gjendje të stabilizuar Pak minuta pasi JOQ Albania publikoi apelin për gjetjen e zonjës Nazmije Peqini, e raportuar e humbur në zonën e Treshit në Tiranë, mësohet se ajo është gjetur dhe ndodhet e shtruar në Urgjencën e QSUT. Lajmi është konfirmuar për redaksinë tonë nga një infermier pranë QSUT, i cili bëri me dije se 66-vjeçarja ndodhet në gjendje shëndetësore të stabilizuar, ndërsa po i nënshtrohet ekzaminimeve laboratorike dhe imazherike. Familjarët janë njoftuar dhe janë nisur drejt QSUT, duke i dhënë fund ankthit që kishte përfshirë të afërmit që prej pasdites së sotme. JOQ Albania falënderon stafin mjekësor të QSUT, qytetarin ose qytetarët që mund ta kenë ndihmuar dhe transportuar zonjën drejt spitalit në momentin kur ajo është ndier keq, si edhe të gjithë ata që shpërndanë apelin, duke kontribuar në gjetjen e saj sa më shpejt. Një lajm i mirë që tregon edhe një herë se reagimi i shpejtë dhe solidariteti bëjnë diferencën.

8126 views

Një moment i rrallë dhe thellësisht prekës ka emocionuar këdo që e ka parë këtë video. Një nënë 102-vjeçe, e rrethuar nga fëmijët e saj, ngrihet mbi krahët e tyre mes duartrokitjeve e buzëqeshjeve, nis të kërcejë valle shqiptare. Në sytë e saj lexohet lodhja e një shekulli jete, por edhe drita e një force që nuk shuhet kurrë. Fëmijët e mbajnë me kujdes në krahë, jo vetëm për ta mbështetur fizikisht, por si një shenjë mirënjohjeje për sakrificat, netët pa gjumë dhe dashurinë e pakushtëzuar që i ka rritur brez pas brezi. Muzika ngrihet, duart bashkohen, dhe për disa çaste koha duket sikur ndalon. Nuk është thjesht një valle; është një histori e gjallë, një kujtesë se rrënjët tona jetojnë përmes nënave dhe familjes. Emocioni shpërthen në lot gëzimi, ndërsa të pranishmit bëhen dëshmitarë të një pamjeje që flet më shumë se fjalët. Kjo skenë është një homazh për nënën shqiptare, për jetën që triumfon mbi vitet dhe për familjen që mbetet streha më e sigurt, pavarësisht kohës që kalon.

39.3K views

Një qytetar nga Shkodra i është drejtuar redaksisë së JOQ Albania për të denoncuar një rast të ndodhur në vendin e tij të punës, një lavazh në qytet, ku një punëtor ka marrë para nga arka dhe është larguar nga puna. Sipas denoncimit, punëtori kishte vetëm dy ditë që kishte nisur punë, ndërsa ngjarja është e dokumentuar nga kamerat e sigurisë, ku shihet qartë momenti kur ai merr një pjesë të parave, i fut në xhep dhe largohet nga ambientet e lavazhit. “Punëtori kishte dy ditë që kishte filluar punë. Pa pikë turpi merr paratë nga arka dhe ikën. Më pas më bën bllok në numrin e telefonit,” – shprehet pronari në mesazhin e dërguar. I kontaktuar nga redaksia jonë për më shumë detaje, qytetari bën me dije se shuma e marrë është 35 mijë lekë të vjetra, ndërsa sqaron se fillimisht nuk ka dashur ta denoncojë rastin në polici, pasi shuma nuk ishte e madhe. “S’doja ta denoncoja për 35 mijë lekë të vjetra, nuk është se më prish punë. Por më vjen inat sepse e respektova, i lashë rrogën aq sa e kërkoi dhe i thashë që për çdo hall të më tregonte,” – tregon ai. Pronari shton se pasi punëtori i kishte bërë bllok atij dhe menaxherit të punës, ai ka tentuar ta kontaktojë nga një numër tjetër, duke i dërguar edhe videon ku shihet momenti i marrjes së parave. Pas kësaj, sipas tij, punëtori ka nisur të justifikohet dhe t’i kërkojë falje. “Filloi të justifikohej, u betua disa herë, madje edhe për një vajzë që tha se kishte, por prapë nuk më bindi,” – shprehet qytetari. Ai thekson se nuk e ka çuar rastin në polici për arsye njerëzore, por ka vendosur ta bëjë publik vetëm për të paralajmëruar bizneset e tjera, që të tregojnë kujdes ndaj personave të tillë. JOQ Albania e publikon këtë rast si denoncim të qytetarit dhe mbetet e hapur për çdo reagim apo sqarim nga pala e përmendur.

184.1K views

Një skandal i rëndë financiar dyshohet se ka përfshirë Bankers Petroleum dhe Raiffeisen Bank në Tiranë, në një skemë që sipas burimeve hetimore ka pasur si qëllim shmangien e detyrimeve të papaguara ndaj shtetit shqiptar dhe kreditorëve të tjerë privatë. Sipas të dhënave që janë bërë pjesë e një dosjeje në SPAK, dyshohet se Raiffeisen Bank ka ndihmuar Bankers Petroleum të fshehë qarkullimin e parave përmes një mekanizmi financiar, në një kohë kur kompania kineze ishte e zhytur në borxhe të mëdha dhe llogaritë e saj në Shqipëri rrezikonin të sekuestroheshin nga Tatimet dhe përmbaruesit. Burime pranë çështjes bëjnë me dije se Bankers Petroleum praktikisht nuk mund të kryente pagesa përmes llogarive të zakonshme bankare në vend, pasi çdo fond do të bllokohej menjëherë për shkak të detyrimeve të prapambetura. Në këto rrethana, dyshohet se është ngritur një skemë përmes një overdrafti të hapur nga Raiffeisen Bank. Sipas pretendimeve, Bankers përdorte overdraftin për të kryer pagesa brenda Shqipërisë dhe më pas e mbulonte shumën e shpenzuar duke transferuar fonde nga llogaritë e saj jashtë vendit, konkretisht nga Vjena, duke u kujdesur që overdrafti të mos rezultonte kurrë me bilanc pozitiv. Limiti i këtij overdrafti dyshohet se ishte rreth 9 milionë dollarë, çka i lejonte kompanisë të operonte pa rrezikun e sekuestrimeve. Për shkak se overdrafti konsiderohet borxh ndaj bankës dhe jo para të subjektit, legjislacioni aktual nuk lejon bllokimin apo ekzekutimin e tij, një fakt që sipas përmbaruesve është shfrytëzuar për të shmangur detyrimet ligjore. Skema dyshohet se është konstatuar nga disa përmbarues, të cilët nuk arrinin të ekzekutonin vendimet gjyqësore ndaj Bankers Petroleum. Njëri prej tyre, Altin Latifi, i është drejtuar me shkresë zyrtare Raiffeisen Bank, duke e paralajmëruar se veprimet e pretenduara përbëjnë shkelje të ligjit dhe mund të klasifikohen si vepër penale, sipas nenit 320 të Kodit Penal. Në shkresën zyrtare, përmbaruesi dyshohet se ka theksuar se banka ishte në dijeni të humbjes së proceseve të arbitrazhit nga Bankers Petroleum dhe se veprimet e saj po pengonin ekzekutimin e detyrimeve ndaj shtetit shqiptar. Ai ka paralajmëruar se në rast të vijimit të këtyre transaksioneve, çështja do t’u referohej organeve ligjzbatuese. Burime bëjnë me dije se kjo praktikë dyshohet se ka vijuar për një periudhë të gjatë kohe, edhe pasi është sinjalizuar, ndërsa vetëm së fundmi overdrafti është mbyllur, në një kohë që u rihap debati publik për gjobën e famshme prej 120 milionë eurosh të vendosur nga doganat ndaj Bankers Petroleum. Hetimet për këtë çështje janë në vijim, ndërsa autoritetet pritet të sqarojnë nëse kemi të bëjmë me shkelje ligjore apo me përdorim të instrumenteve financiare brenda kufijve të ligjit.

64K views

Kjo është nëna Xana, rreth 75 vjeçe, e cila jeton në kushte shumë të vështira së bashku me nipin e saj 12-vjeçar, në një banesë në katin -1, në zonën e rrugës së Burgut në Tiranë. Rasti është bërë publik nga një i ri, i cili ka realizuar një video dhe ia ka dërguar redaksisë sonë, me qëllim që të kërkojë ndihmë për të moshuarën. Ai tregon se nëna Xana kujdeset e vetme për nipin e saj të mitur, i cili nuk e ka nënën, ndërsa babai i tij vuan nga probleme të shëndetit mendor dhe nuk është në gjendje të kujdeset për të. I riu shprehet se do ta ndihmojë në mundësitë që ka, duke siguruar mobilie, një derë të jashtme dhe veshmbathje, por bën apel për ndihmë më të gjerë, pasi nëna Xana nuk përfiton as pension dhe nuk ka asnjë burim të ardhurash. Ajo ka nevojë urgjente për ushqime dhe mbështetje bazë. “Nëna jeton me nipin e saj 12-vjeçar dhe është rreth 75 vjeçe. Nipi nuk e ka nënën, ndërsa babai është i sëmurë psikikisht dhe nuk ndodhet aty. Unë do ta ndihmoj me mobilie, një derë të jashtme dhe rroba, aq sa kam mundësi. Nëna nuk merr as pension, asgjë. Ka nevojë për ushqime dhe ndihmë. Banesa ndodhet në rrugën ‘Bajram Preza’, te rruga e Burgut. Emri i saj është Xana. Numri im i telefonit është 069 84 38 090,” shkruan qytetari. Të gjithë ata që kanë mundësi dhe dëshirë për të ndihmuar nënë Xanën, mund të kontaktojnë drejtpërdrejt me qytetarin që denoncoi rastin, i cili do t’i orientojë për më tej.

43.9K views

Sa ironik dhe skandaloz ishte injorimi që i bëri Sali Berisha demokrates gjatë takimit në foltore, kur kjo e fundit nisi t'i rrëfente se po luftonte me vdekjen si paciente e dializës në Spitalin Amerikan të Klodian Allajbeut... Kur demokratja e gjorë denoncoi publikisht kushtet mizerable në Spitalin Amerikan ku zhvillohej Hemodializa, Berisha kaloi radhën duke bërë sikur asgjë të mos kishte ndodhur. Videoja u shpërnda nga JOQ dhe bëri bujë në rrjet. Sot do ju bëjmë të qartë arsyen pse Berisha mbron Allajbeun dhe lidhjet që ka me të. Dy nga koncesionet më të mëdha në shëndetësi, ai i Hemodializës i Klodian Allajbeut dhe i Laboratorëve Mjekësorë të Janis Karathanos, u nxorën jashtë nga opozita, jashtë hetimit të komisionit parlamentar, pavarësisht vlerës së tyre që arrin rreth 240 MILIONË €. Sipas burimeve për mediat një vit më parë, pagat e deputetëve të “Foltores” për një periudhë 3-mujore janë financuar nga dy emra të rëndësishëm të sektorit privat shëndetësor... Allajbeu, pronari i Spitalit Amerikan që mban koncesionin e Hemodializës, dhe Janis Karathanos, pronari i kompanisë “Pegasus”, e cila ka në dorë koncesionin e laboratorëve mjekësorë. Pagesat janë kryer më 25 mars 2024, pikërisht në ditën kur nisi zyrtarisht puna e komisionit hetimor parlamentar. Një përkim që ka ngritur dyshime të forta, pasi në përfundim të diskutimeve, dy koncesionet në fjalë u lanë jashtë objektit të hetimit. Sipas burimeve politike, vendimi për të mos përfshirë këto kontrata është marrë pas një marrëveshjeje të heshtur mes Sali Berishës dhe kryeministrit Edi Rama, ndërsa më herët është zhvilluar edhe një pazar me vetë përfituesit e koncesioneve. Në këtë kontekst, fondet e dhëna nga Allajbeu dhe Karathano dyshohet se janë përdorur si “shpërblim” për mbylljen e hetimeve ndaj kontratave shumë milionëshe. Deri tani, nuk ka një sqarim zyrtar për kohëzgjatjen e marrëveshjes financiare mes Sali Berishës, Klodjan Allajbeut dhe Janis Karathanos, as për shumën totale të përfshirë në këtë skemë. Ajo që mbetet e qartë është se përjashtimi i dy koncesioneve nga hetimi parlamentar ka ngritur pikëpyetje serioze mbi transparencën, konfliktin e interesit dhe ndikimin e biznesit në vendimmarrjen politike.

18.6K views

Gjykata Kushtetuese përfundoi këtë të enjte shqyrtimin e njërës prej çështjeve më të nxehta të ndarjes së pushteteve në Shqipëri: ligjshmërinë e pezullimit nga detyra të zv.kryeministres Belinda Balluku. Seanca u karakterizua nga një rreshtim i paprecedentë i institucioneve më të larta të shtetit kundër vendimmarrjes së Prokurorisë së Posaçme (SPAK) dhe Gjykatës së Posaçme (GJKKO). Përplasja për kompetencat: Ekzekutivi vs. Drejtësia Çështja nisi pas kërkesës së Kryeministrit Edi Rama, i cili pretendon se GJKKO ka tejkaluar kompetencat duke pezulluar Ballukun, e marrë e pandehur për "shkelje të barazisë në tendera". Sipas Ramës, ky vendim cenon imunitetin kushtetues dhe kompetencat e tij për të emëruar e shkarkuar kabinetin. Në një lëvizje të koordinuar, përfaqësuesit ligjorë të Kuvendit dhe Presidencës mbështetën qëndrimin e Kryeministrisë. Kuvendi: Argumentoi se pezullimi i një ministri kërkon autorizim paraprak nga Parlamenti, pasi cenon imunitetin e deputetit dhe rolin e Kuvendit që ka votuar ministrin. Presidenca: Përmes këshilltarit Ilirjan Rusmali, paralajmëroi një skenar "apokaliptik" ku drejtësia mund të pezullonte të gjithë qeverinë njëherësh, duke e lënë vendin pa ekzekutiv. SPAK: "Rrezik për asgjësim të provave dhe krim të përsëritur" Në anën tjetër, prokurorët e SPAK, Dritan Prençi dhe Dorina Bejko, mbrojtën me forcë masën e sigurimit. Sipas tyre, qëndrimi i Ballukut në krye të një ministrie me buxhet gjigant përbën rrezik për "helmimin e provave" dhe intimidimin e dëshmitarëve. "Hetimet kanë zbuluar prova se ajo mund të ketë kryer edhe vepra të tjera penale. Ekziston rreziku që të pengojë hetimin ose të largohet," deklaroi prokurori Prençi, duke e cilësuar ankesën e Ramës si një "konflikt artificial kompetencash". Ndërkohë, GJKKO refuzoi të merrte pjesë në seancë, duke deklaruar se një gjykatë nuk mund të jetë palë në një proces që shqyrton vendimet e veta, pasi kjo do të rrëzonte pavarësinë e pushtetit gjyqësor. Akuza të reja dhe zvarritje në Kuvend Debati në Kushtetuese zhvillohet në një moment kritik. Prej dy muajsh, SPAK ka dërguar në Kuvend kërkesën për një masë më të rëndë ndaj Ballukut, me akuzën e re për "intimidim të dëshmitarëve" pas rikthimit të saj të përkohshëm në detyrë (falë një vendimi pezullues të mëparshëm të Kushtetueses). Megjithatë, shumica socialiste po e mban kërkesën "në sirtar", duke zvarritur dhënien e autorizimit për SPAK-un. Çfarë pritet? Gjykata Kushtetuese tashmë është tërhequr për të marrë një vendim që do të përcaktojë kufijtë e rinj mes drejtësisë së re dhe ekzekutivit. Një vendim pro Kryeministrit do të mund të shfuqizonte përfundimisht pezullimin e Ballukut, por sipas SPAK, kjo do të krijonte një precedent të rrezikshëm ku politika mund të diktojë mbarëvajtjen e hetimeve penale.

38.9K views

Në një rreth grash të komunitetit Ju/’hoansi, në zemër të Afrikës, një grua ulet e qetë, ndërsa duar të buta prekin barkun e saj. Nuk ka aparate, nuk ka analiza laboratorike, nuk ka ekrane. Vetëm përvojë, ndjeshmëri dhe një dije e trashëguar brez pas brezi. Kjo është mënyra se si ky komunitet konfirmon shtatzëninë: përmes prekjes, intuitës dhe kujdesit kolektiv. Gratë më të moshuara përdorin duart për të ndjerë jetën që po formohet, duke i ofruar gruas siguri, udhëzim dhe mbështetje emocionale. Videoja e këtij momenti është bërë virale në rrjetet sociale, duke grumbulluar miliona shikime brenda pak orësh dhe duke ngjallur reagime të forta emocionale nga përdoruesit anembanë botës. Në kulturën Ju/’hoansi, shtatzënia nuk është një ngjarje private. Ajo është një përvojë e përbashkët, e mbajtur nga komuniteti, e thurur me dije të lashta që ekzistonin shumë kohë përpara kufijve, hartave dhe teknologjisë moderne. Pamjet tregojnë jo vetëm një mënyrë ndryshe të të kuptuarit të jetës, por edhe një mesazh të fortë: se kujdesi, lidhja njerëzore dhe përvoja e përbashkët mund të jenë po aq të fuqishme sa çdo teknologji. Një video e thjeshtë, por me një domethënie të thellë, që ka bërë miliona njerëz të ndalen dhe të reflektojnë.

2735 views