Një aksident i rëndë rrugor ka ndodhur mbrëmjen e sotme në Divjakë, ku dy automjete janë përplasur me njëra-tjetrën. Si pasojë e përplasjes, një prej mjeteve ka përfunduar në kanal. Ngjarja është raportuar në redaksinë e JOQ Albania nga dëshmitarë në vendngjarje, të cilët kanë dërguar edhe pamje nga vendi i aksidentit. Sipas informacioneve të siguruara nga qytetarët, tre persona kanë mbetur të plagosur rëndë. Të lënduarit udhëtonin në automjetin që përfundoi në kanal dhe janë transportuar me urgjencë me ambulancë drejt spitalit të Lushnjës. Ende nuk dihen rrethanat e sakta të aksidentit dhe përgjegjësitë e palëve të përfshira. Një nga automjetet, sipas dëshmitarëve, kishte targa greke dhe personat në mjet kishin ardhur për pushime. Automjeti tjetër ndodhej në krahun e kundërt të rrugës në momentin e përplasjes. Një qytetar shprehet se aksidente të tilla ndodhin thuajse çdo natë në rrugën e Divjakës, por shumë prej tyre nuk raportohen. Sipas tij, automjetet që përfundojnë në kanal shpesh nxirren me traktorë, madje edhe me persona të bllokuar brenda. “Në rrugën e Divjakës bëhen përditë aksidente si këto dhe nuk dalin në lajme. Makinat nxirren nga kanali me traktor, me njerëz brenda. Situata është shumë e rëndë”, shprehet qytetari. Ai ngre gjithashtu shqetësime serioze për mungesën e kontrollit rrugor në zonë, duke theksuar se në këtë aks qarkullojnë automjete dhe motorë pa leje qarkullimi, ndërsa sipas tij edhe fëmijë shkojnë në shkollë me motorë, pa u ndaluar nga policia. Deri në këto momente nuk ka një reagim zyrtar nga autoritetet për këtë ngjarje. JOQ Albania i bën thirrje institucioneve përgjegjëse të sqarojnë rrethanat e aksidentit dhe të marrin masa konkrete për rritjen e sigurisë në rrugën e Divjakës, përpara se të ndodhë një tjetër tragjedi.

18.6K views

Videoja e zogut “Kiwi”, që po qarkullon prej vitesh në rrjet, është një pasqyrë tronditëse e asaj që quajmë varësi. Nuk ka nevojë për fjalë, zhurmë apo shpjegime. Heshtja e saj flet mjaftueshëm. Ajo tregon se si çdo rënie nis gjithmonë nga një hap i vogël: nga kureshtja, nga eksperimentimi, nga ajo gënjeshtër e njohur që i themi vetes, “vetëm këtë herë”. Spiralja e padukshme: Në pamje nuk ka një 'shpërthim të menjëhershëm', por një përkeqësim të ngadaltë, pothuajse të padukshëm. “Pikat e arta”, që në fillim të japin ndjesinë e fluturimit dhe lirisë, gradualisht kthehen në një barrë që të merr frymën. Ajo që dukej si kënaqësi, shndërrohet në nevojë. Dhe më pas, në varësi. Ky është mashtrimi më i madh i varësive: ato nuk vijnë me alarm. Maskohen si zgjedhje të përkohshme, si diçka që “ti e kontrollon”, derisa momenti vjen kur kontrolli nuk është më në duart e tua. Ngjyrat zbehen, bota bëhet gri. Hapi i sigurt kthehet në një zvarritje të dëshpëruar drejt diçkaje që nuk të sjell më kënaqësi, por vetëm shkatërrim. Askush nuk është imun: Mesazhi është i drejtpërdrejtë dhe i pamëshirshëm: varësia nuk zgjedh moshë, status apo karakter. Ajo nuk lidhet vetëm me substanca të ndaluara, por edhe me bixhozin, lojërat online, rrjetet sociale, apo çdo sjellje që fillimisht duket e padëmshme, por që me kohën të merr peng vullnetin dhe identitetin. Shumë njerëz që sot luftojnë me errësirën, dje ishin thjesht kureshtarë. Ata besonin se ishin përjashtim nga rregulli. Videoja na kujton se pas çdo fluturimi të rremë, goditja me tokën është e pashmangshme, dhe sa më lart të fluturosh, aq më e fortë është rënia. Koha për të reflektuar: Ky shkrim është një ftesë për të ndaluar dhe për të menduar. Ndihma nuk është dobësi, por forma më e lartë e forcës. Të thuash “JO” në kohën e duhur mund të jetë vendimi që të shpëton jetën. Hap sytë për ata që ke pranë. Dikush mund të jetë duke rrëshqitur ngadalë drejt një rruge pa kthim dhe ka nevojë për një dorë, përpara se të jetë vonë. Ndonjëherë, mjafton një video e thjeshtë për të na kujtuar se jeta është shumë e shtrenjtë për t’u shkëmbyer me “pika ari” të rreme. Mos lejo që fluturimi i radhës të jetë i fundit. Credits: Nuggets by Film Bilder Studio

8060 views

Një video e dërguar në redaksinë e JOQ Albania tregon një skenë të pazakontë në rrugët e Tiranës. Në pamje duket një motor i Policisë së Shtetit me dy efektivë mbi të, i cili ngrihet mbi rrotën e parë duke kryer manovra që nuk janë aspak të zakonshme për një mjet zyrtar. Skena dyshohet se ka ndodhur disa ditë më parë, në një rrugë të frekuentuar të kryeqytetit dhe vë në dyshim rregullat e qarkullimit dhe standardet e sjelljes së punonjësve të rendit publik. Ekspertët e sigurisë rrugore theksojnë se manovrat e tilla janë shumë të rrezikshme dhe mund të shkaktojnë aksidente serioze, sidomos kur kryhen në rrugë të hapura me trafik. Ata rekomandojnë që institucionet e rendit të jenë shembull për qytetarët dhe të shmangin çdo sjellje që mund të minojë besimin publik.

44.9K views

Një zjarr ka përfshirë një pallat në zonën e Shallvareve në Tiranë, duke shkaktuar panik te banorët e zonës. Ngjarja është raportuar nga një qytetar, i cili ka dërguar pamje video në redaksinë e JOQ Albania. Sipas tij, në video dëgjohen kercitje të forta dhe dyshohet se zjarri mund të jetë shkaktuar nga një shkëndijë ose masë elektrike e ndodhur te kabujt ajrorë që ndodhen pranë pallatit. Qytetari shprehet se situata është e rrezikshme dhe se banorët nuk po arrijnë të futen në banesat e tyre. “Nuk po hyjmë dot në shtëpi. Po rrezikohen banorët. Ato kabujt janë ajrorë, kjo punë është aty. Sidomos kur fillojnë pjekin për Vitin e Ri ose kur bën 40 gradë, marrin flakë. Duhen bërë investime tokësore, ai është rrjet ajror i viteve ’50. Filloi një kabull, pastaj një tjetër, nga ngarkesa. Aty po u këput kabulli, kur kalon të merr jetën. Janë tela pa fund mbi ne, elektrikë, interneti, telefonie, të gjitha në ajër lemsh”, shprehet qytetari. Deri në këto momente nuk ka një reagim zyrtar për shkakun e zjarrit apo për dëme të mundshme. JOQ Albania i bën thirrje institucioneve përgjegjëse të sqarojnë situatën dhe të marrin masa për sigurinë e banorëve, ndërsa qytetarët ftohen të tregojnë kujdes maksimal.

54.3K views

Kjo fotografia nga Tirana flet më shumë se çdo raport zyrtar për urbanistikën e kryeqytetit. Pallate shumëkatëshe në ndërtim, vinça që dominojnë horizontin dhe një vijë malesh që po zhduket gradualisht pas betonit. Pamja natyrore e Dajtit, dikur një nga identitetet vizuale të qytetit, po shndërrohet në luks të rrallë. Ndërtimet intensive dhe shpesh pa kriter po e ngushtojnë qytetin jo vetëm fizikisht, por edhe estetikisht. Aty ku dikur hapej horizonti drejt malit, sot ngrihen fasada të dendura, të vendosura pranë njëra-tjetrës, pa distanca, pa korridore vizuale dhe pa respekt për relievin natyror. Qyteti po rritet në lartësi, por po varfërohet në cilësi. Fenomeni nuk është i ri, por ritmi është përshpejtuar ndjeshëm. Lejet e ndërtimit janë kthyer në instrument zhvillimi ekonomik afatshkurtër, ndërsa planifikimi urban afatgjatë mbetet i paqartë ose i nënshtruar ndaj interesave të momentit. Pyetja kryesore nuk është më “a duhet të ndërtohet?”, por “ku, sa dhe me çfarë kriteresh?”. Humbja e pamjes së malit të Dajtit nuk është thjesht çështje estetike. Ajo lidhet drejtpërdrejt me cilësinë e jetës, shëndetin mendor, ajrosjen natyrore të qytetit dhe raportin e banorëve me hapësirën ku jetojnë. Një qytet që mbyllet nga betoni rrezikon të kthehet në një mjedis të rëndë, të pabanueshëm dhe socialisht të fragmentuar. Në mungesë të korridoreve të gjelbra, planeve të qarta rregulluese dhe kontrollit real mbi densitetin e ndërtimeve, Tirana po humbet gradualisht një nga asetet e saj më të rëndësishme: pamjen dhe frymëmarrjen natyrore. Mali i Dajtit, që për dekada ka qenë sfond i përditshëm i jetës urbane, sot thuajse nuk duket më. Nëse kjo prirje vijon, rreziku është i qartë: shumë shpejt nuk do të flasim më për qytet me pamje nga mali, por për qytet ku mali shihet vetëm në fotografi të vjetra. Dhe atëherë do të jetë vonë për analiza, sepse betoni, ndryshe nga natyra, nuk të fal.

12.3K views

Ndërkohë që Bashkia e Tiranës promovon projekte urbane, evente dhe fasada publike, realiteti në Tufinë tregon një tjetër fytyrë të qeverisjes vendore: mungesë kontrolli, mungesë shërbimi dhe indiferencë ndaj hapësirave publike që nuk prodhojnë imazh, por kërkojnë përgjegjësi.

22.2K views

Në lumin Starovë, në zonën e Volorekës, Pogradec po ndodh një ndotje e rëndë mjedisore. Në këtë lumë janë derdhur mbetje nga gjaku i bagëtive të prera dhe aktualisht, lumi nuk ka më ujë të pastër, por është i mbushur me gjak dhe papastërti. Banorët e zonës thonë se ky është një problem shumë shqetësues, pasi lumi Starovë ka derdhje direkte në Liqenin e Pogradecit, duke rrezikuar seriozisht ndotjen e tij. Ata shprehen se situata paraqet rrezik të lartë për përhapjen e infeksioneve, ndotjen e mjedisit dhe cenimin e shëndetit të banorëve dhe gjallesave. Banorët i bëjnë thirrje institucioneve përgjegjëse për të ndaluar këtë ndotje, për të identifikuar përgjegjësit dhe për të marrë masa urgjente për pastrimin dhe mbrojtjen e mjedisit.

89K views

Një tjetër aksident zinxhir ka ndodhur ditën e sotme në autostradën Durrës-Tiranë. 4 makina janë përplasur njëra pas tjetrës te mbikalimi i Fllakës duke shkaktuar trafik kilometrik në të gjithë aksin. Për momentin raportohet vetëm për dëme materiale, pa pasoja në njerëz. Drejtuesit e mjeteve duhet të tregojnë kujdes duke respektuar rregullat e qarkullimit rrugor për të shmangur aksidente të tilla, që sa vijnë e shtohen në këto ditë të ngarkuara fundviti.

76.1K views

Gjendja e rrugës “Albavia – Çerkezë – Morinë”, e njohur nga banorët si “Argjinatura”, është kthyer në një sfidë të përditshme për qytetarët. Çdo ditë, redaksia e JOQ ALBANIA merr dhjetëra denoncime nga banorët e Kamzës dhe zonave përreth për gjendjen e mjerueshme të rrugëve dhe mungesën totale të ndërhyrjeve nga Bashkia Kamëz. Sipas qytetarëve, rruga është pothuajse e pakalueshme, jo vetëm për automjetet, por edhe për këmbësorët. Balta, pluhuri dhe gropat e shumta e kanë kthyer këtë segment në një terren të rrezikshëm që dëmton çdo ditë automjetet dhe pengon lëvizjen e qytetarëve. Banorët akuzojnë gjithashtu ndotjen e vazhdueshme që shkaktohet nga ndërtimet e shumta në zonë. Mjetet e rënda dhe trajlerët që transportojnë materiale ndërtimi hedhin baltë dhe pluhur, pa marrë asnjë masë për pastrimin e rrugës dhe mjedisit përreth. Sipas tyre, kjo situatë nuk vetëm që dëmton pronat dhe automjetet, por përbën rrezik për shëndetin e fëmijëve dhe të moshuarve. Pavarësisht denoncimeve të shumta, autoritetet nuk kanë ndërmarrë asnjë veprim konkret për të përmirësuar gjendjen. Banorët e Kamzës kërkojnë ndërhyrje të menjëhershme, duke apeluar për përgjegjësinë e Bashkisë për sigurinë dhe mirëqenien e qytetarëve të saj.

55.8K views

Sipas një parashikimi të publikuar nga banka amerikane Morgan Stanley, deri në vitin 2030 rreth 45% e grave të moshës 25 deri në 44 vjeç pritet të jenë beqare dhe pa fëmijë, një shifër që tregon një ndryshim të madh krahasuar me dekadat e mëparshme. Ky trend sinjalizon një transformim të thellë në mënyrën se si po strukturohet familja moderne dhe shoqëria në tërësi. Sipas analizës, gjithnjë e më shumë gra po i japin përparësi arsimit të lartë dhe karrierës profesionale, duke shtyrë martesën dhe lindjen e fëmijëve për më vonë ose duke i shmangur fare. Një tjetër faktor i rëndësishëm lidhet me rritjen e kostos së jetesës dhe pagat që, sipas ekspertëve, nuk po ecin në të njëjtin ritëm. Kjo e ka bërë modelin tradicional të familjes më pak të përballueshëm financiarisht për shumë njerëz. Ndërkohë, me rritjen e pavarësisë ekonomike të grave, martesa nuk shihet më si domosdoshmëri për siguri financiare. Ekonomistët e përkufizojnë këtë kategori si “gratë beqare në moshë aktive”, një grup që po ndikon gjithnjë e më shumë në atë që quhet “Sheconomy”, pra fuqia ekonomike e grave në treg. Sipas parashikimeve, kjo shtresë do të ketë një peshë gjithnjë e më të madhe në shpenzime, duke ndikuar drejtpërdrejt sektorë si pasuritë e paluajtshme, udhëtimet, shëndetësia dhe mallrat e konsumit. Ky ndryshim pritet të detyrojë bizneset dhe politikëbërësit të përshtaten me një realitet të ri, ku familjet me një person po kthehen gradualisht në normë dhe jo më në përjashtim.

102.3K views

Kursi i këmbimit Euro-Lek ka shënuar një tjetër rënie gjatë ditëve të fundit, duke arritur një minimum të ri historik. Sipas kursit zyrtar të Bankës së Shqipërisë, euro u këmbye sot me 96.46 lekë, niveli më i ulët i regjistruar ndonjëherë. Agjentët e këmbimit valutor shpjegojnë se rënia lidhet me ofertën e shtuar të valutës në treg, një fenomen sezonal i zakonshëm për periudhën e fundvitit. Kthimi i emigrantëve për festat sjell flukse më të larta të euros, duke ushtruar presion rënës mbi kursin. Në terma vjetorë, euro rezulton rreth 2.1% më e dobët krahasuar me të njëjtën periudhë të vitit të kaluar. Megjithatë, sipas ekspertëve, stabiliteti relativ i kursit gjatë vitit 2025 nuk i detyrohet vetëm tregut, por edhe ndërhyrjeve të Bankës së Shqipërisë. Banka Qendrore ka vijuar blerjet e valutës edhe gjatë këtij viti. Deri në fund të 9-mujorit 2025, ajo ka blerë rreth 800 milionë euro, ndërsa gjatë vitit 2024 kishte blerë 933 milionë euro. Pa këto ndërhyrje, euro pritet të kishte rënë edhe më tej ndaj lekut. Ndërkohë, Banka e Shqipërisë ka bërë të ditur se në vitin 2026 do të rrisë blerjet e planifikuara të valutës në tregun e brendshëm, duke synuar deri në 450 milionë euro përmes ankandeve, me qëllim forcimin e rezervës valutore të vendit.

2913 views

Presidenti i Serbisë, Aleksandar Vuçiç, ka lëshuar akuza të forta duke pretenduar se Shtetet e Bashkuara të Amerikës dhe Turqia janë të përfshira drejtpërdrejt në armatosjen e shqiptarëve në Kosovë, me qëllim, sipas tij, kërcënimin e Serbisë dhe cenimin e integritetit të saj territorial. Gjatë një fjalimi përpara ambasadorëve të huaj, Vuçiç deklaroi se “amerikanët po i armatosin hapur dhe pa asnjë mëdyshje shqiptarët në Kosovë dhe Metohi”, ndërsa shtoi se edhe Turqia po dërgon armë të rënda dhe pajisje të tjera ushtarake. Sipas tij, ekziston “një qëllim i vetëm: kërcënimi i drejtpërdrejtë i Republikës së Serbisë, popullsisë civile dhe strukturave ushtarako-policore”. Në të njëjtën dalje publike, Vuçiç akuzoi Shqipërinë, Kosovën dhe Kroacinë se po krijojnë një “aleancë ushtarake” kundër Serbisë. Ai vuri në pikëpyetje të drejtën e këtyre shteteve për bashkëpunim në fushën e mbrojtjes, duke pretenduar se marrëveshjet ushtarake janë zgjeruar edhe me Slloveninë dhe se po tentohet përfshirja e Bullgarisë. Deklaratat e Vuçiç vijnë në një kohë kur Serbia, sipas të dhënave të Institutit Ndërkombëtar të Kërkimeve për Paqen në Stokholm (SIPRI), ka shpenzuar rreth 2.2 miliardë dollarë për ushtrinë vetëm gjatë vitit 2024, ose 2.6% të Prodhimit të Brendshëm Bruto, duke qenë vendi me investimin më të madh ushtarak në rajon. Kujtojmë këtu se tensionet në rajon janë përshkallëzuar ndjeshëm vitet e fundit. Ngjarja më e rëndë mbetet sulmi i armatosur në Banjskë më shtator 2023, ku mbeti i vrarë një rreshter i Policisë së Kosovës. Përgjegjësinë e mori Milan Radoiçiç, i cili ende nuk është ndjekur penalisht në Serbi. Paralelisht, Prokuroria Speciale e Kosovës ka ngritur aktakuzë për terrorizëm ndaj vëllezërve Viqentijeviç dhe Igor Dimoviç, të dyshuar për shpërthimin në kanalin 'Ibër-Lepenc' Sipas aktakuzës, vëllezërit Viqentijeviç dyshohet se kanë vendosur eksplozivin që dëmtoi kanalin, një vepër e konsideruar akt terrorist.

11.3K views

Tregu i pasurive të paluajtshme në Kroaci po kalon një ftohje të ndjeshme, me rënie të vazhdueshme të shitjeve dhe çmime që vijojnë të mbeten në nivele të larta. Paralajmërimi u dha në Forumin e 40-të të Biznesit të Pasurive të Paluajtshme, ku ekspertët konfirmuan se ngadalësimi është tashmë i përgjithshëm në të gjithë vendin. Sipas Dhomës Kroate të Ekonomisë (HGK), transaksionet kanë rënë për tre vite radhazi. Vetëm në gjysmën e parë të vitit 2025, shitjet kanë pësuar një rënie prej rreth 15% në nivel kombëtar, ndërsa në zonat bregdetare, ku tradicionalisht dominojnë blerësit e huaj, rënia kalon 20%. Ekspertët theksojnë se çmimet, veçanërisht për pronat e përdorura, kanë arritur nivele të papërballueshme, duke lënë shumë prona të pashitura për më shumë se një vit. Edhe projektet e reja po shfaqin shenja ngadalësimi, pasi zhvilluesit vazhdojnë të rrisin çmimet. Një faktor kyç është tërheqja e blerësve të huaj, sidomos nga Gjermania, të cilët dikur ishin ndër aktorët kryesorë në tregun bregdetar. Megjithatë, interes vijon të ketë nga blerës në Poloni, Çeki, Sllovaki dhe Ukrainë. Në Zagreb, situata është ndryshe: mungesa e projekteve të reja dhe çmimet e larta kanë sjellë një rënie mbi 20% të shitjeve, me çmime mesatare nga 2 800 deri në 2 900 euro për metër katror. Analistët presin që ftohja e tregut të vazhdojë, duke parashikuar një korrigjim gradual të çmimeve të pronave të përdorura gjatë vitit 2026. Në të njëjtën kohë, ekonomia kroate përballet me presione inflacioniste. Inflacioni arriti në 3.8% në nëntor, niveli i dytë më i lartë në Eurozonë, duke ushtruar presion shtesë mbi fuqinë blerëse dhe duke ndikuar drejtpërdrejt edhe në tregun e pasurive të paluajtshme.

13K views

"Ndonjëherë leksionet më të mëdha vijnë nga më të vegjlit tanë. Dea dhe Dilesia, dy vogëlushe 10-vjeçare, na kujtojnë sot se çfarë do të thotë të jetosh vërtet. Një mesazh që çdo shqiptar duhet ta dëgjojë këtë fundviti. ❤" Në mes të zhurmës së festave dhe nxitimit të përditshëm, shpesh harrojmë të ndalojmë dhe të pyesim veten: çfarë mbetet vërtet në fund? Përgjigjen më të bukur dhe më empatike nuk e dhanë filozofët, por dy vogëlushe 10-vjeçare nga Poliçani, Dea dhe Dilesia. Në një video tejet emocionuese, e realizuar nga Qendra Kulturore e Fëmijëve në Poliçan dhe që ka mbërritur në redaksinë tonë, dy nxënëset e klasës së katërt ndajnë një reflektim që po prek zemrat e mijëra shqiptarëve. Nuk është thjesht një urim për Vitin e Ri, por një mesazh i pastër, i sinqertë dhe i thellë, që tejkalon moshën e tyre. Me një pjekuri të rrallë, Dea dhe Dilesia e përshkruajnë vitin që po lëmë pas si një rrugëtim të mbushur me sfida e lodhje, por edhe me gabime që të mësojnë e fitore të vogla që të gëzojnë. Ato na kujtojnë se gabimet janë mësonjës, se jeta është më shumë sesa nxitimi i përditshëm dhe se shpesh vrapojmë pas gjërave që nesër nuk do të kenë më asnjë vlerë. “Ndoshta ky është gabimi më i madh i njeriut: të harxhojë ditët e tij me gjëra që nuk mbeten, duke harruar ato që nuk harrohen kurrë”, thonë vogëlushet, duke e zhvendosur vëmendjen tonë nga “lodrat e botës” te ajo që ka vërtet rëndësi: njeriu, fjala e mirë, falja dhe dashuria. Përmes fjalëve që rrjedhin si melodi, ato na kujtojnë se kur dritat e festës të fiken dhe zhurma të shuhet, nuk janë dhuratat apo ushqimet ato që mbeten, por njerëzit që na qëndrojnë pranë. Ata janë pasuria më e madhe që mund të na japë jeta. Në mbyllje të këtij viti, Dea dhe Dilesia na lënë me një pyetje që të detyron të ndalosh dhe të reflektosh: në fund të vitit, nuk ka rëndësi se çfarë kemi mësuar, por çfarë njeriu jemi bërë. Ky nuk është thjesht një urim. Është një leksion jete nga dy fëmijë, që na kujtojnë se sa kohë kemi njëri-tjetrin, kemi gjithçka.

9111 views

Darka e Vitit të Ri do t’u kushtojë më shumë familjeve shqiptare këtë vit, pasi çmimet e produkteve bazë janë rritur ndjeshëm krahasuar me vitin e kaluar. Në tregje, gjeli dhe pula e detit shiten nga 1 000 deri në 1 200 lekë/kg, ndërsa mishi është 50–200 lekë më i shtrenjtë se një vit më parë. Sipas INSTAT, djathi i bardhë ka kaluar 900 lekë/kg, ndërsa qumështi dhe kosi arrijnë deri në 200 lekë. Edhe frutat e perimet janë shtrenjtuar, madje deri në 20% më shumë krahasuar me një muaj më parë. Qytetarët thonë se çmimet janë të papërballueshme në raport me pagat dhe pensionet, pasi një darkë familjare e thjeshtë mund të kushtojë mbi 200 euro, gati gjysma e pagës minimale. Ekspertët e lidhin rritjen e çmimeve me mungesën e prodhimit vendas, veçanërisht në blegtori, ndërsa theksojnë se tregtarët po abuzojnë me kërkesën e lartë festive, pa reflektuar as zhvlerësimin e euros në çmimet e produkteve të importuara. Sipas ekspertëve, çmimet ushqimore janë rritur mesatarisht 5–6% krahasuar me vitin e kaluar, duke e bërë shportën e fundvitit më të shtrenjtë. Ata kërkojnë kontrolle të vazhdueshme gjatë gjithë vitit dhe jo vetëm në periudhën e festave, për të mbrojtur konsumatorët nga abuzimet.

10.4K views

Një i moshuar është raportuar i humbur në Tiranë dhe familjarët janë në ankth për fatin e tij. Djali i 72-vjeçarit ka kontaktuar redaksinë e JOQ Albania duke kërkuar ndihmën e qytetarëve për gjetjen e babait të tij, Halim Shimo, i cili ka humbur që prej ditës së djeshme. Sipas të birit, Halim Shimo është parë për herë të fundit në zonën e 5 Majit në kryeqytet dhe prej atëherë nuk ka më asnjë gjurmë të tij. Rasti është raportuar edhe në polici, por deri në këto momente nuk ka asnjë informacion mbi vendndodhjen e të moshuarit. Familjarët bëjnë me dije se 72-vjeçari kishte probleme me shikimin dhe për të lëvizur përdorte një tricikël, çka rrit edhe më shumë shqetësimin për sigurinë e tij. Kushdo që mund të ketë informacion ose e ka parë Halim Shimon, lutet të kontaktojë menjëherë në numrin e telefonit: +355 68 632 4800. Çdo informacion, sado i vogël, mund të ndihmojë në gjetjen e tij.

22.3K views

Ndërsa njerëzit presin përgjigje për miliona euro, zonja Balluku zgjedh të tregojë qetësi dhe buzëqeshje, si të mos kishte asnjë problem. Ky ndryshim nga serioziteti i hetimeve në atmosferën festive nuk ka kaluar pa u vënë re nga komentuesit, të cilët e shohin si një mënyrë për t’i treguar SPAK-ut se po e sfidon. Në vend që t’i japë llogari drejtësisë, ajo duket sikur thotë, “Festojmë dhe bëjmë sikur s’ka ndodhur gjë”. Në një kohë kur skandalet e mëdha po trondisin vendin, kjo sjellje po duket si një tallje me qytetarët dhe drejtësinë, një mënyrë për t’i ikur përgjegjësisë me buzëqeshje dhe dhurata festive. Me këtë ritëm të drejtësisë, Balluku do të konsumojë bakllavanë e Vitit të Ri jashtë burgut, duke gëzuar e buzëqeshur me lekët e shqiptarëve që i vodhi natë e ditë!

36.5K views

Prej disa vitesh tanimë, zona e Golemit përballet me një situatë shqetësuese ujërat e zeza të hoteleve derdhen drejtpërdrejt në det, pa asnjë filtër apo masë mbrojtëse. Pamjet e siguruara tregojnë qartë se pushuesit janë të detyruar të shëtisin mes ujërave të ndotura, duke u përballur me kushte aspak të denja për një zonë turistike. Në rërën pranë vijës bregdetare dallohet një tub që shkarkon ujëra të zeza direkt në det. Videoja është realizuar ditën e djeshme, në një kohë kur shumë turistë vendas dhe të huaj i janë drejtuar bregdetit të Adriatikut për të shfrytëzuar ditët e nxehta të kësaj periudhe. Zona e Golemit dhe ajo e Durrësit janë përfolur edhe më herët për problematikën e ndotjes së ujit të detit, duke ngritur shqetësime të vazhdueshme për shëndetin publik dhe imazhin e turizmit shqiptar. Sipas ligjit, derdhja e ujërave të zeza në det është e ndaluar rreptësisht. Subjektet që shkelin këtë rregull përballen me gjoba, ndërsa në rast përsëritjeje, ndëshkimi parashikon deri edhe mbylljen e aktivitetit. Aktualisht, pika e shkarkimit të ujërave të zeza ndodhet vetëm pak metra larg një hoteli, duke shtuar dyshimet për shkelje të rënda mjedisore dhe nevojën për ndërhyrje të menjëhershme nga institucionet përgjegjëse.

55.5K views

Mëngjesin e sotëm janë regjistruar reshje bore në fshatin turistik të Dardhës, në lartësi 1200 metra mbi nivelin e detit dhe në Voskopojë e Vithkuq ku firmat nënkontraktore po punojnë për hapjen e rrugëve dhe kriposjen e tyre. Edhe pse policia rrugore apelon për kujdes të shtuar dhe përdorimin e gomave dimërore, një qytetar ka denoncuar një situatë më problematike. Ai shprehet se në rrugën e Voskopojës kanë hedhur vaj, gjë që rrezikon drejtuesit e mjeteve, veçanërisht në kthesat e rrugës ku koncentrimi i vajit është më i madh. Drejtuesit e mjeteve duhet të tregojnë kujdes të shtuar në këtë aks pasi mundësitë për aksidente janë të mëdha. Sipas sinoptikanëve, temperaturat ditën e sotme në zonat malore do të shkojnë deri në -5°C, ndërsa gjatë kësaj jave priten reshje dëbore me intensitet të lartë dhe temperatura deri në -10°C. Denoncimi i qytetarit: Pershendetje joq Sot ne rrugen e Voskopojes kishin hedhur vaj qe rezikon aksidente. Po ishte vaj dhe neper kthesa kishte me shum

227.6K views

Llixhat e Bënjës në Përmet dita ditës po shndërrohen nga pasuri natyrore unike në hapësirë artificiale dhe të betonizuara. Vaskat natyrore, të cilat tërhiqnin vizitorë nga e gjithë vendi dhe bota për bukurinë dhe autenticitetin e tyre, po betonohen, duke zhdukur ekosistemet dhe organizmat që jetonin aty. Në një video të mbërritur në redaksinë tonë mund të shihni se si fadromat e kamionët vijojnë punën e tyre për gërryerjen dhe betonzimin e një prej ekosistemeve natyrore më të bukura që ka vendi, ndërkohë që pushuesit lahen në vaska. Ekspertët paralajmërojnë se kjo nuk është vetëm një ndërhyrje infrastrukturore: betonimi i vaskave po shkatërron ekuilibrin natyror të ujit, po rrezikon cilësinë e ujit termal dhe po krijon nevojën për riparime të shpeshta. Forma natyrore e ujit, që ndihmonte në ngadalësimin e rrjedhës dhe ruajtjen e ekosistemit, po zëvendësohet me struktura që favorizojnë erozionin dhe degradimin afatgjatë. Qytetarët shprehin shqetësim se kjo ndërhyrje nuk është mbrojtje apo zhvillim, por një dëmtim i qëllimshëm i një pasurie natyrore, me pasoja të rënda afatgjata për natyrën, turizmin dhe ekonominë lokale.

48.9K views