Shkencëtarët ukrainas nga Baza Kërkimore Vernadsky në Antarktidë kanë publikuar pamje të rralla dhe mbresëlënëse të jetës nënujore të pinguinëve, të filmuara nga vetë një pinguin. Me ndihmën e një gjurmuesi GPS dhe një kamere të vogël të vendosur në shpinën e tij, studiuesit arritën të regjistrojnë në kohë reale mënyrën se si këta zogj zhyten, gjuajnë ushqim dhe lëvizin me shpejtësi në ujë, duke përdorur ajrin nën krahët për të rritur shtytjen hidrodinamike. Pamjet tregojnë gjithashtu teknikat e tyre për të rregulluar pendët gjatë notit, duke dhënë një këndvështrim unik mbi sjelljen natyrore të pinguinëve. Videoja është autentike dhe e pamodifikuar, duke ofruar të dhëna të vlefshme për studiuesit mbi mënyrën se si pinguinët ndërveprojnë me mjedisin e tyre. Projekti u realizua në bashkëpunim me Institutin Polar Norvegjez dhe ndihmon në verifikimin e të dhënave të mbledhura përmes GPS-it, duke i lejuar shkencëtarët të kuptojnë më mirë sjelljen e kafshëve dhe strategjitë e tyre për të mbijetuar në kushtet ekstreme të Antarktidës.

1608 views

Astrit Hysenaj, 54 vjeç, u gjet i pajetë në një kanal kullues në zonën e ish-repartit ushtarak pranë Plepave, në ditën e tretë të përmbytjeve në Durrës, ndërsa familjarët i japin lamtumirën mes dyshimeve të forta se ai humbi jetën në krye të detyrës. Ndryshe nga deklarata e kryebashkiakes Emirjana Sako, e cila pretendon se në momentin fatal ai nuk ka qenë në punë, familja këmbëngul se Hysenaj kishte dalë si çdo ditë tjetër për të punuar, pavarësisht motit ekstrem dhe insistimit të tyre që të qëndronte në shtëpi. Sipas familjarëve, ekzistojnë pamje filmike që tregojnë momentet e fundit të 54-vjeçarit, teksa pastronte kanalet nga plehrat me ujin deri në gju. Kamerat e sigurisë e kanë fiksuar deri rreth orës 08:25–08:30, duke punuar pranë mbikalimit të këmbësorëve në aksin Plepa–Durrës, pak çaste përpara se të zhdukej. “Deri në momentin e fundit të jetës ka qenë në krye të detyrës”, thonë të afërmit, duke shtuar se rrjedha e ujit e ka marrë pikërisht nga zona ku u pa për herë të fundit dhe e ka nxjerrë trupin aty ku u gjet më vonë. Hysenaj la pas bashkëshorten e papunë, një djalë 21-vjeçar pa punë të qëndrueshme dhe nënën 85-vjeçare, ndërsa ishte i vetmi që siguronte të ardhura për familjen. Në xhepat e tij, në momentin e gjetjes së trupit, u gjetën vetëm 10 mijë lekë të vjetra. Familjarët i bëjnë apel institucioneve për ndihmë urgjente ekonomike ose një punë për djalin e tij, duke kërkuar njëkohësisht që të mos “hidhet baltë” mbi figurën e 54-vjeçarit dhe të pranohet se ai humbi jetën duke kryer detyrën.

11K views

Pamjet e siguruara me dron tregojnë qartë masivin e madh të dheut dhe inerteve që ka rrëshqitur mbi rrugë, duke e bërë të pamundur qarkullimin e automjeteve. Zona paraqet rrezik të vazhdueshëm, pasi rrëshqitjet e dherave përsëriten shpesh, veçanërisht pas reshjeve. Shembja më e fundit, e ndodhur tre ditë më parë, ishte vetëm një nga episodet e njëpasnjëshme të rrëshqitjeve që po godasin këtë segment. Një masiv inertesh ra mbi një automjet në lëvizje, duke rrezikuar seriozisht jetën e drejtuesit, i cili fatmirësisht arriti të shpëtojë. Sipas situatës në terren, ekziston rreziku që shembje të tjera të ndodhin në çdo moment. Aksi Qukës–Qafë Plloçë, i ndërtuar me një kosto rreth 260 milionë euro, po shndërrohet në një burim të vazhdueshëm rreziku për qytetarët. Pavarësisht deklaratave zyrtare se rrugët janë të hapura, realiteti dëshmon se ky segment mbetet i bllokuar, me shembje aktive dhe të përsëritura, duke ngritur pikëpyetje serioze mbi sigurinë dhe cilësinë e investimit.

16.9K views

Një fermer i Bashkisë Dimal tregon hallin e madh pas përmbytjeve nga lumi Osum, që shkatërruan serat dhe fidanët e mbjellë me shumë mund. Ai thotë se humbjet janë të mëdha dhe nuk ka marrë asnjë ndihmë nga shteti, ndërkohë që fermerët anë të rrezikuar ekonomikisht dhe të pambrojtur. "Serat e përmbytura nga dalja e lumit Osum, Bashkia Dimal. Mua 2 milion më bënë vetëm fidani. Të paktën të na ndihmojë shteti, të lajme lekët e fidanit", shkruan fermeri. Fermerët kërkojnë reagim urgjent nga Kryeministri Edi Rama dhe Ministri i Bujqësisë, Andis Salla, për dëmshpërblime, por deri tani nuk ka asnjë informacion zyrtar. Situata mbetet kritike, ndërsa shumë fermerë janë të detyruar të përballojnë humbjet e mëdha pa mbështetje nga institucionet.

41.8K views

“Magjia” e borës ka zbukuruar rrugën që lidh Shëngjergjin me Martaneshin, duke ofruar pamje vërtet mbresëlënëse dimërore. Pamjet ajrore me dron tregojnë pyje dhe pemë të mbuluara nga bora, ndërsa në segmentet e rrugës shihen automjete të qytetarëve që lëvizin me kujdes në trasenë e zbardhur nga dëbora. Ky aks, i përfshirë nga qetësia dhe bukuria e natyrës, shfaqet si një panoramë e pastër dimërore, ku bora i jep zonës një hijeshi të veçantë.

27.7K views

Reshjet e dendura që kanë përfshirë Mirditën gjatë orëve të fundit po krijojnë një situatë problematike në disa zona, me pasoja të drejtpërdrejta për banorët dhe infrastrukturën. Rrjedha e lumit Fan i Vogël ka vijuar gërryerjen e tokave bujqësore, duke zhdukur 1 hektar sipërfaqe toke dhe duke rritur rrezikun për pronat pranë shtratit të lumit, veçanërisht në fshatin Kodër Rrëshen. Shtyllat u zhvendosën dhe energjia elektrike është rivënë në funksion, por rreziku mbetet i lartë pasi rrjedha vazhdon të kërcënojë edhe rrugën kryesore të fshatit. Probleme të ngjashme janë regjistruar edhe pranë fshatit Tarazh, ku gërryerja e shkaktuar nga lumi Zmeja ka nxjerrë mbi tokë tubacionin kryesor të ujësjellësit, duke vënë në rrezik edhe rrugën nacionale Rrëshen–Burrel. Bashkia Mirditë po përballet me mungesë mjetesh për të ndërhyrë në kohë, çka po e vështirëson menaxhimin e situatës. Ndërkohë, në fshatin Simon, në lagjen Preçaj, rruga është dëmtuar dhe kërkon rehabilitim urgjent, ndërsa në Kodër Rrëshen ekziston rreziku real që rrëshqitjet e tokës të prekin edhe rrugët e lagjeve. Situata mbetet shqetësuese për banorët, të cilët jetojnë nën frikën e përmbytjeve dhe rrëshqitjeve të reja nëse bashkia nuk merr masa në kohë. Problematika kryesore mbetet ndërhyrja e vonuar dhe mungesa e kapaciteteve lokale për të përballuar një emergjencë që rrezikon toka, infrastrukturë dhe sigurinë e komunitetit.

53.9K views

Personi që shihni në foto është 30-vjeçari Jurgen Karaj, i cili është zhdukur pasi makina ku ndodhej si pasagjer ra në një përruar në zonën e Klosit. Me të në mjet ndodhej edhe 24-vjeçari Andi Losha, i cili ishte drejtuesi i automjetit. Sipas policisë, Losha ka arritur të dalë nga makina dhe ka shpëtuar, ndërsa Karajin dyshohet se e ka marrë rrjedha e përroit. Pas ngjarjes, 24-vjeçari është arrestuar për shkak se nuk i ka dhënë ndihmë pasagjerit dhe është larguar nga vendngjarja. Gjithashtu, Losha iu nënshtrua testit të alkoolit, nga i cili rezultoi se ka drejtuar mjetin në gjendje të dehur. Ndërkohë, vijojnë kërkimet për gjetjen e Karajt, ndërsa materialet procedurale janë referuar Prokurorisë për veprime të mëtejshme.

77.9K views

Në mëngjes u raportua se një automjet ka rënë në rrjedhën e një përroi rreth orës 01:00 të natës në zonën e Klosit, duke shkaktuar një ngjarje të rëndë. Rrethanat në të cilat mjeti ka përfunduar në përrua mbeten ende të paqarta. në fillim u raportua se Jurgen Karaj është drejtuesi i mjetit që dyshohet se e ka marrë rrjedha e ujit, ndërkohë që dyshohej se në automjet ndodheshin 2 deri në 3 persona. Por pak minuta më parë, policia ka dalë me një njoftim zyrtar ku raporton se drejtuesi i mjetit është identifikuar si 24-vjeçari Andi Losha banues në fshatin Fullqet, i cili u arrestua pasi dyshohet se ka drejtuar automjetin në gjendje të dehur dhe nuk i ka dhënë ndihmë pasagjerit brenda mjetit i cili është identifikuar si Jurgen Karaj 30-vjeç. Polumbarët e RENEA-s, shërbimet e Policisë dhe zjarrfikësit vijojnë kërkimet në përroin e fshatit Dars për pasagjerin 30-vjeçar Jurgen Karaj i cili dyshohet se është marrë nga rrjedha e ujit. Materialet procedurale janë referuar në Prokurori për veprime të mëtejshme, ndërsa gjendja e pasagjerit mbetet e paqartë.

23.3K views

Një automjet ka rënë në rrjedhën e një përroi rreth orës 01:00 të natës në zonën e Klosit, duke shkaktuar një ngjarje të rëndë. Rrethanat në të cilat mjeti ka përfunduar në përrua mbeten ende të paqarta. Jurgen Karaj është drejtuesi i mjetit që dyshohet se e ka marrë rrjedha e ujit. Sipas burimeve nga vendngjarja, dyshohet se në automjet ndodheshin 2 deri në 3 persona në momentin e aksidentit. Autoritetet nuk kanë dhënë ende një informacion zyrtar lidhur me numrin e saktë të personave apo gjendjen e tyre. Në vendin e ngjarjes ndodhen forcat e policisë. Paralelisht, banorë të zonës janë angazhuar në ndihmë të kërkimeve, ndërsa priten detaje të tjera nga strukturat përgjegjëse.

71.8K views

Shtetet e Bashkuara kanë prezantuar udhëzimet e reja ushqimore për vitet 2025–2030, duke sjellë një ndryshim të fortë në filozofinë e të ushqyerit dhe duke përmbysur piramidën klasike të ushqimit të vitit 1992. Modeli i ri, i quajtur “Piramida e Ushqimit të Vërtetë”, vendos në qendër ushqimet e plota dhe kritikon hapur produktet “shumë të përpunuara”. Në modelin e ri, baza e ushqyerjes përbëhet nga proteinat, bulmeti me yndyrë të plotë dhe yndyrnat e shëndetshme, të cilat vendosen në të njëjtin nivel rëndësie me frutat dhe perimet. Më poshtë renditen drithërat integrale, ndërsa produktet e rafinuara dhe industriale këshillohet të shmangen sa më shumë. Ndryshe nga udhëzimet e mëparshme, ku karbohidratet kishin rol dominues, tani rekomandohet rritje e ndjeshme e konsumit të proteinave. Të rriturit këshillohen të marrin nga 1.2 deri në 1.6 gramë proteina për kilogram të peshës trupore në ditë, krahasuar me 0.8 gramë që ishte më parë. Udhëzimet nxisin konsumimin e mishit, peshkut, vezëve, bulmetit, bishtajoreve dhe arrorëve, duke sugjeruar që një burim proteinash të jetë pjesë e çdo vakti. Një tjetër element i ri është goditja direkte ndaj ushqimeve “shumë të përpunuara”, si produktet e gatshme, pijet me sheqer, ushqimet me ngjyrues artificialë, konservantë, aromatizues sintetikë dhe ëmbëlsues artificialë. Autoritetet shëndetësore amerikane këshillojnë ushqim të gatuar në shtëpi dhe sa më natyral, duke e lidhur ushqimin industrial me rritjen e sëmundjeve kronike. Për herë të parë, udhëzimet përmendin edhe shëndetin e zorrëve dhe mikrobiomën, duke theksuar rëndësinë e fibrave, ushqimeve të fermentuara, frutave dhe perimeve për një florë të shëndetshme bakteriale. Administrata amerikane argumenton se udhëzimet e reja bazohen në prova shkencore dhe synojnë të korrigjojnë dekada këshillash ushqimore që, sipas tyre, kanë përkuar me rritjen e obezitetit dhe diabetit. Të dhënat zyrtare tregojnë se rreth 75% e të rriturve amerikanë vuajnë nga sëmundje të lidhura me dietën. Mesazhi kryesor i autoriteteve është i thjeshtë: më pak ushqim industrial, më shumë ushqim i vërtetë, por debati mbi balancën dhe pasojat afatgjata mbetet i hapur.

7076 views

Ai nuk ka dashur të identifikohet nga media dhe ka vënë dorën para fytyrës 🙌🏻 Vlonjati është kthyer në heroin e ditës me këtë gjest sublim për kafshët e pambrojtura 😢❤️

4524 views

Kryeministri Edi Rama, në mbledhjen e sotme me Komitetin Ndërministror të Emergjencave Civile, ia faturroi përmbytjet vetëm reshjeve intensive të shiut, duke deklaruar se në tre ditë ka rënë sa për gjithë muajin janar. Por, përtej shiut, mbetet një fakt në shumë zona të prekura,mungesa totale e kanalizimeve dhe kanaleve funksionale të kullimit, problem që nuk u pranua dhe as u adresua qartë nga kryeministri. Ndërsa Rama foli për miliona euro investime dhe qindra kanale të rindërtuara, banorët në terren thonë të kundërtën, uji nuk kishte ku të shkonte, sepse kanalizime nuk ka, ose janë të bllokuara prej vitesh. Në këtë panoramë, kryeministri sërish nuk dha një qëndrim të qartë për dëmshpërblimin e plotë të qytetarëve të dëmtuar, duke e lënë dramën e tyre mes premtimeve të përgjithshme dhe fjalimeve vetëlavdëruese. Për familjet që panë shtëpitë dhe gjënë e gjallë të përmbytur, deklaratat për “dinjitet shtetëror” tingëllojnë larg realitetit. Pa kanalizime, pa infrastrukturë bazë dhe pa garanci për kompensim, përmbytjet nuk janë thjesht vepër e shiut, por pasojë e neglizhencës së gjatë. Dhe në këtë histori, banorët mbeten të vetëm, ndërsa përgjegjësia vazhdon të mbytet në ujëra deklaratash qeveritare. “Do të investohen 11 mln euro apo 8% më shumë se vitin e shkuar. Investimet kanë rindërtuar 536 kanale ujitëse dhe kullimi që ishin të përgjysmuara. Investimi më i madh ka qenë transformi i trupave të emergjencave, nga trupa pa kokë dhe të vështirë s’ka më keq, nga trupa që vihen në punë. Nëse reshjet e pazakonta të ditëve të fundit ranë dhe përmbytën njësoj vendet e rajonit, sot Shqipëria krejt tjetër. Kur ne erdhëm në qeveri me malin e borxheve i shlyem një më një dhe kemi përballuar me dinjitet njerëzor e shtetëror, jo vetëm detyrimet ndaj përmbytjeve. Sot dua t’i siguroj të dëmtuarit që do të qëndrojmë me të njëjtin dinjitet, qoftë për banesat dhe gjënë e gjallë”-u shpreh Rama.

4698 views

Një sherr që ka degraduar në përplasje fizike është regjistruar paraditen e kësaj të premteje në zonën e “5 Majit” në Tiranë. Një tregtar është konfliktuar me përgjegjësin e tregut të rrobave, i cili u përfshi nga flakët mbrëmjen e kaluar, duke shkaktuar dëme të konsiderueshme. Sipas raportimeve, tregtari e ka akuzuar përgjegjësin e tregut se mban përgjegjësi për zjarrin e madh. Debati verbal ka agravuar në përplasje fizike, duke sjellë ndërhyrjen e policisë, e cila ka shoqëruar tregtarin për veprime të mëtejshme. Ndërkohë, tregtarë të tjerë kanë shprehur revoltë ndaj policisë dhe zjarrfikësve, duke pretenduar se nuk ishin të pajisur me mjetet e duhura për shuarjen e flakëve. Ata deklarojnë se dëmet janë të mëdha dhe kanë ngritur dyshime se në zonën ku ra zjarri mund të jetë planifikuar ndërtimi i një pallati.

4258 views

Sot është dita e katërt që ura e Orgjostit, në Qarkun e Kukësit, është shkatërruar, duke lënë fshatin tërësisht të izoluar nga pjesa tjetër e zonës. Prej katër ditësh, dhjetëra banorë po përballen me vështirësi të mëdha, pa asnjë zgjidhje konkrete nga institucionet përgjegjëse. Si pasojë e bllokimit total, fëmijët kanë mbetur pa shkuar në shkollë, ndërsa të moshuarit dhe personat e sëmurë janë të izoluar, pa akses në shërbime shëndetësore apo ndihmë emergjente. Situata është rënduar edhe më tej nga reshjet e borës dhe përkeqësimi i kushteve të motit. Por pavarësisht situatës, banorët shprehen se nuk ka pasur asnjë ndërhyrje konkrete nga Bashkia Kukës, Prefektura apo Shtabi i Emergjencave Civile, përtej deklaratave formale dhe premtimeve që, sipas tyre, nuk janë shoqëruar me veprime reale. Banorët e Orgjostit i bëjnë thirrje urgjente Ministrisë së Brendshme, Ministrisë së Infrastrukturës dhe Energjisë, Prefekturës së Qarkut Kukës dhe Shtabit të Emergjencave Civile që të ndërhyjnë menjëherë për rivendosjen e kalueshmërisë së urës dhe garantimin e sigurisë së jetës së qytetarëve. Çdo vonesë e mëtejshme, paralajmërojnë ata, përbën rrezik serioz për shëndetin dhe jetën e banorëve dhe sjell përgjegjësi të drejtpërdrejtë institucionale. Denoncimi 1: Sot është dita e katert që ura e Orgjostit (Qarku Kukës) është e shkatërruar, duke lënë fshatin plotësisht të izoluar. Si pasojë: Fëmijët kanë mbetur prej 4 ditësh pa shkollë Të moshuar dhe persona të sëmurë janë të izoluar, pa akses në shërbime Situata është rënduar më tej nga reshjet e borës dhe përkeqësimi i motit dimëror Pavarësisht gravitetit të situatës, nuk ka asnjë ndërhyrje konkrete nga Bashkia Kukës, Prefektura apo Shtabi i Emergjencave, përtej deklaratave formale. I bëjmë thirrje urgjente: Ministrisë së Brendshme Ministrisë së Infrastrukturës dhe Energjisë Prefekturës së Qarkut Kukës Shtabit të Emergjencave Civile të ndërhyjnë menjëherë për rivendosjen e kalueshmërisë dhe garantimin e sigurisë së banorëve. Çdo vonesë përbën rrezik serioz për jetën dhe shëndetin e qytetarëve dhe mban përgjegjësi institucionale. Denoncimi 2: Fshati orgjost I bllokuar totalisht mashtrojn asigjo nuk kan ber tamam

8028 views

Banorët e Pallatit Melrosë në Lagjen nr.13, janë përballur me kushte të papranueshme për jetën e tyre. Kabina elektrike e përmbytur nga reshjet ka lënë pallatin pa energji elektrike, ndërsa furnizimi me ujë mungon prej ditësh. Banorët raportojnë rrezik serioz për sigurinë e tyre, ndërsa institucionet përgjegjëse nuk kanë ndërmarrë masa efektive për normalizimin e situatës, duke krijuar një gjendje emergjente dhe të papranueshme për komunitetin. Sipas qytetarëve, u është thënë se “nuk ka ku të çohet uji”, një deklaratë që tregon neglizhencë flagrante dhe shpërdorim detyre. Banorët kërkojnë ndërhyrje urgjente, përfshirë pompim industrial dhe autobote, si dhe një zgjidhje përfundimtare dhe parandaluese për të shmangur përsëritjen e kësaj situate të rrezikshme. "Përshëndetje JOQ! Në Lagjen nr.13 të Durrësit, përballë Kompleksit Florida, Pallati Melrosë ndodhet në një situatë tejet të rrezikshme. Kabina elektrike është përmbytur nga reshjet. Banorët janë pa ujë dhe pa drita. Rrezik serioz për jetën dhe sigurinë. Institucionet janë njoftuar prej ditësh, por zgjidhja mungon. Banorëve u është thënë: “Nuk ka ku të çohet uji”, me neglizhencë totale flagrante për shpërdorim detyre. Kjo është e papranueshme dhe e rrezikshme. Nuk mund të normalizohet fakti që njerëzit detyrimisht të largohen nga shtëpitë e tyre. Kërkojmë ndërhyrje URGJENTE, pompim industrial dhe autobote, zgjidhje përfundimtare dhe parandaluese", shkruajnë banorët.

11.8K views

Reshjet e dendura kanë shkaktuar përmbytje të konsiderueshme në zonën e Durrësit, ku niveli i ujit në disa lagje ka arritur deri në gju prej disa ditësh. Përballë kësaj situate, ku autoritetet nuk japin asnjë lloj ndihme dhe niveli i ujit mbetet i pandryshuar, një qytetar ka nxjerrë grepin për të peshkuar në rrugë dhe oborr. Lumi Erzen ka dalë nga shtrati në grykëderdhjen në Jubë, ndërsa niveli i ujit është rritur ndjeshëm deri në orët e para të mëngjesit të kësaj të premteje. Si pasojë e përmbytjeve, në Durrës janë evakuuar gjithsej 356 banorë. Në fshatin Vadardhë janë evakuuar 322 persona, nga të cilët 76 janë akomoduar në hotele, ndërsa 246 të tjerë janë strehuar pranë familjarëve. Ndërkohë, nga zona e Katundit të Ri janë larguar 73 banorë; 53 prej tyre janë sistemuar te të afërmit dhe 20 janë akomoduar në hotele.

11.3K views

Një zjarr i madh përfshiu mbrëmjen e djeshme ambientet e tregut te “5 Maji”, duke shkrumbuar mbi 50 dyqane dhe duke shkaktuar dëme të konsiderueshme materiale. Një prej tregtarëve të prekur, Ferdinant Martaneshi, tregon për mediat sa është dëmi i shkaktuar ndaj tij. “Unë kam pasur dyqanin më të vogël këtu. Malli është më tepër se 200 milionë lekë, unë më i vogli, po të tjerët që kanë më shumë. Unë tregtoja çorape dhe geta, streçe, veshmbathje. Unë kisha një, vajza kishte dy, u dogj komplet, ka katër kontejnerë brenda” u shpreh Martaneshi. Sipas tij, tregtarët janë zhvendosur në këtë zonë pas ndërtimit të pallateve pranë qendrës tregtare “Emerald” dhe janë vendosur në kapanonet e tregut, që siç tha ai, nuk mund të siguroheshin. “Nuk na i siguronin, kemi shkuar te sigurimet nuk e merrnin përsipër me këtë lloj ndërtimi këtu. Unë paguaja 517 mijë lekë qira, vajza mbi 1 milionë lekë. Nga shteti kërkojmë të verifikojë, nuk ka ardhur zjarri nga ne, por për faj të këtyre, te panelet e këtyre”, tha ai. I pyetur nëse ka pasur interes për ndërtim të ndonjë pallati në këtë zonë, Martaneshi tha se nuk ka informacion, por theksoi se ka dëgjuar fjalë për diçka të tillë.  “Asgjë nuk di. Llafe qarkullojnë, por që ta dish kështu realisht, asnjëri nuk e di”, tha ai, ndërsa shtoi se dëmi që ka pësuar është gati 200 milionë lekë.

139.3K views

Kanë dalë pamjet e para nga momenti i shpërthimit të zjarrit në tregun e rrobave të përdorura në zonën e “5 Majit” në Tiranë. Sipas dyshimeve paraprake, flakët janë shkaktuar nga një shkëndijë elektrike, e cila u përhap me shpejtësi, duke shkaktuar një katastrofë të vërtetë. Dëmet nga zjarri i mbrëmshëm janë të konsiderueshme. Dhjetëra njësi tregtare dhe magazina janë shkrumbuar plotësisht, duke lënë shumë tregtarë pa burimin e tyre të vetëm të të ardhurave. Ndërkohë, gjatë ditës së sotme është riaktivizuar një vatër tjetër zjarri në të njëjtën zonë. Forcat zjarrfikëse kanë ndërhyrë menjëherë dhe ndodhen në vendngjarje, duke mbajtur situatën nën monitorim për të parandaluar përhapjen e mëtejshme të flakëve. Autoritetet pritet të kryejnë verifikime të detajuara për të konfirmuar zyrtarisht shkakun e zjarrit, ndërsa zona vijon të konsiderohet e rrezikuar.

67K views

Zjarri që shkatërroi tregun e rrobave në zonën e “5 Majit” në Tiranë që nga ora 17:00 deri në orën 23:00 mbeti i pakontrolluar për 6 orë rresht, duke djegur 50 magazina dhe një numër të konsiderueshme të mallrave. Për këtë periudhë, tregu i madh u përball vetëm me 11 mjete zjarrfikëse nga MZSH dhe dy zjarrfikëse nga Ushtria, një kapacitet qesharak për një vatër të kësaj madhësie. Forcat nuk u shtuan në kohë, ndërsa flakët kaluan lirshëm nga një kapanon te tjetri, duke treguar qartë se menaxhimi i emergjencës ishte jo vetëm i pamjaftueshëm, por edhe i papërgjegjshëm. Mungesa më shqetësuese ishte mosaktivizimi i mjeteve zjarrfikëse nga ajri të Forcave të Armatosura, të cilat mund të kishin frenuar përhapjen e flakëve dhe të kishin parandaluar dëmet kolosale. Për këtë përgjegjësinë e kanë Drejtori i Përgjithshëm i MZSH-së, Arben Cara, dhe Ministria e Mbrojtjes me në krye Pirro Vengu, të cilët nuk përdorën kapacitete shtesë që kishin në dispozicion. Një vatër zjarri urbane, e ndezur për 6 orë rresht me 50 magazina me rroba të shumta, nuk mund të trajtohej me mjete minimale në terren kjo është një dështim i qartë operativ dhe planifikues. Pas shuarjes së flakëve pas 6 orësh zjarr, në terren, mungesa e mbikëqyrjes ishte e dukshme, zona nuk u izolua siç duhej, nuk u krye ftohje e thellë e vatrës dhe nuk u pastruan menjëherë mbetjet e rrezikshme. Materialet e djegura mbetën në vend, ndërsa nuk dihet nëse rrjeti elektrik u çaktivizua plotësisht, një neglizhencë që rriti rrezikun e riaktivizimit të flakëve gjatë ditës së sotme. Pse nuk u izolua totalisht zona pas zjarrit? Pse nuk u monitorua pas shuarjes së flakëve mbrëmë, kjo vatër zjarri me dëme kolosale? Pse në vendin e ngjarjes punuan 11 zjarrfikës të MZSH e 2 të ushtrisë? Zjarri në “5 Maj” nuk ishte thjesht një fatkeqësi, por një provë e dështuar e mënyrës se si u administrua një emergjencë e madhe, duke lënë pas jo vetëm dëme kolosale ekonomike, por edhe një sërë përgjegjësish që kërkojnë llogari dhe duke shtuar dyshimet se ngjarja mund të ketë qenë e qëllimshme për t'u hapur vend kullave.

19.9K views

Një anije transporti ka mbetur e bllokuar në det, pranë brigjeve të Tales në Lezhë. Sipas burimeve, mjeti lundrues ishte ndalur për shkak të kushteve të vështira atmosferike dhe detit të trazuar, ndërsa gjatë manovrimit ka prekur cekëtinën, duke mbetur i bllokuar. Anija mban flamurin e Tanzanisë dhe kishte nisur lundrimin nga porti i Durrësit. Burimet konfirmojnë se anija quhet “BESART”. Aktualisht, ajo ndodhet në një pozicion të vështirë dhe, nëse nuk ndërhyhet në kohë nga autoritetet përkatëse, ekziston rreziku që të mbetet e bllokuar për një periudhë të gjatë. Situata po monitorohet nga strukturat përgjegjëse, ndërsa pritet ndërhyrja për zhbllokimin e anijes.

5025 views