Një apartament është përfshirë nga flakët gjatë festimeve në natën ndërrimit të viteve në Tiranë. Shkak dyshohet të jetë bërë një fishekzjarr që ka përfunduar në ballkonin e apartamentit që ndodhet në zonën e Selvisë. Fatmirësisht, deri më tani, nuk raportohet për persona të lënduar nga ky incident. Bëni kujdes me mjetet piroteknike!
Qielli i Tiranës u ndez nga fishekzjarret në ndërrimin e viteve 🎆 Një ndjekëse ka ndarë me redaksinë e JOQ Albania pamje mbresëlënëse të festës, të filmuara nga kodrat mbi Liqenin e Thatë, ku ngjyrat dhe dritat pushtuan kryeqytetin në pritje të vitit 2026. Pamje që tregojnë gëzimin dhe energjinë me të cilën Tirana e priti Vitin e Ri.
Ndërsa edhe pak minuta na ndajnë nga mesnata dhe Shqipëria është vetëm një hap larg Vitit të Ri 2026, shumica prej nesh jemi ulur pranë tryezave festive, me njerëzit e zemrës. Por ka mijëra shqiptarë që sonte nuk e kanë mundësinë e kësaj ngrohtësie. Për ta, “shtëpia” e kësaj nate është vendi i punës, nën dritat e ftohta të spitaleve, reparteve, burgjeve apo rrugëve të zbrazura. Ky postim është për mjekët dhe infermierët në gatishmëri, për policët në patrullë, zjarrfikësit, ushtarakët, punonjësit e sistemit të burgjeve, elektriçistët dhe çdo punonjës tjetër që nata e ndërrimit të viteve i gjen në krye të detyrës. Ata lanë pas ngrohtësinë e familjes, përqafimet e fëmijëve dhe prindërve, që çdo vatër tjetër shqiptare të festojë e sigurt. Edhe pse sakrifica e tyre shpesh mbetet në hije, sonte zëri ynë i përbashkët është falënderimi më i madh për ta. Mirënjohja jonë u takon juve: Faleminderit që jeni në detyrë për ne! Gëzuar Vitin e Ri 2026 edhe për ju, heronjtë tanë të heshtur! U kthefshi shëndoshë e mirë pranë njerëzve tuaj sapo të përfundoni turnin. Një respekt i veçantë shkon edhe për elektriçistin e quajtur Deda, personi që shihni në këtë foto, i cili ndodhet mbi shtyllë në mes të errësirës dhe të ftohtit për të riparuar defektin që ka lënë zonën e Paskuqanit pa energji elektrike në këtë natë të ndërrimit të viteve.
Një qytetare i është drejtuar redaksisë së JOQ Albania për të raportuar humbjen e një të moshuari në qytetin e Elbasanit, i cili vuan nga demenca. Sipas familjarëve, Ali Avdolli, 82-vjeç, ka dalë nga banesa e tij në lagjen “5 Maji” rreth orës 10:00 të paradites së sotme dhe prej asaj kohe nuk është kthyer më në shtëpi. I moshuari ka qenë i veshur me xhup blu të errët dhe pantallona gri të errëta. Familjarët shprehen shumë të shqetësuar, pasi sot është nata e ndërrimit të viteve, temperaturat janë shumë të ulëta dhe jashtë është errësirë, çka e bën situatën edhe më shqetësuese. Sipas informacioneve të fundit, ai është parë për herë të fundit rreth orës 16:00 te 'Çesma e Kasinës'. Familjarët u bëjnë apel qytetarëve që kushdo që mund ta ketë parë ose ka informacion, është i lutur të kontaktojë menjëherë në numrin e telefonit: 067 201 2462.
Viti i Ri 2026 ka mbërritur me festime spektakolare në Dubai, ku mijëra qytetarë dhe turistë janë mahnitur nga shfaqja madhështore e fishekzjarrëve pranë ndërtesës më të lartë në botë, Burj Khalifa. Spektakli përfshiu një kombinim unik fishekzjarrësh, imazhesh LED, lazerësh dhe muzike, duke e kthyer qendrën e qytetit në një skenë gjigante feste. Shfaqja vjen pas rreth 10 muajsh përgatitje intensive, ndërsa biletat për eventin u shitën në një kohë rekord. Dubai konfirmon edhe një herë reputacionin e tij si një nga qytetet që organizon festimet më madhështore në botë për ndërrimin e viteve.
Një aksident i rëndë rrugor është regjistruar ditën e djeshme në afërsi të tunelit të Skërficës, në segmentin rrugor Gjirokastër–Delvinë. Një mjet i rëndë (maune) është përmbysur pasi rruga dyshohet se ishte me naftë, duke e bërë të rrëshqitshme sipërfaqen. Drejtuesi i mjetit ka reaguar në kohë dhe ka shmangur përplasjen me automjetet që lëviznin përpara tij por ka përfunduar i përmbysur dhe i bllokuar në kabinën e kamionit. Fatmirësisht, drejtuesit e tjerë të mjeteve i kanë ardhur në ndihmë dhe e kanë nxjerrë në kohë nga kamioni i rrëzuar në rrugë. Në pamje mund të shihni se si një prej qytetarëve nxiton dhe godet me shkelma xhamin e kamionit deri sa thyhet dhe shoferi del. Ky i fundit ka arritur të dalë pa lëndime edhe pse i tronditur nga ajo që i kishte ndodhur, ndërkohë qytetarët i japin ujë dhe përpiqen t’i qëndrojnë afër.
Fryu era që përjashta Tundi perdet e mëndafshta Mos kujto se të harrova kartolinën ta dërgova Pjatat me meze Gotat me raki Ju uroj nga zemra Gëzuar Vitin e Ri Këto janë vargjet nostalgjike, që të kujtojnë fëmijërinë dhe emocionin e vërtetë, por që sot janë zëvëndësuar nga urimet fasadë. Dikur kartolinat ishin mbretëreshat e padiskutueshme të urimeve të fundvitit. Në prag të Vitit të Ri, kioskat dhe libraritë mbusheshin me njerëz që ndalonin me ngut për të zgjedhur një kartolinë të veçantë peizazhe të mbuluara me borë, pamje qytetesh, motive tradicionale apo simbole të kohës. Kartolina nuk ishte thjesht një copë letre, por një shenjë kujtese, një ndalesë e vogël emocionale mes nxitimit të ditëve të fundit të vitit. Shkrimi i urimit ishte ritual më vete. Fjalët zgjidheshin me kujdes, shpesh shoqëroheshin me vargje të thjeshta, të krijuara posaçërisht për atë kartolinë. Urohej shëndet, gëzim, mbarësi; përmendej familja, miqësia, largësia. Çdo rresht mbante gjurmën e dorës dhe mendimit, çdo gabim i vogël e bënte urimin edhe më njerëzor, më të ndjerë. Sot, kjo skenë nostalgjike duket se i përket një kohe tjetër. Urimet e Vitit të Ri udhëtojnë me shpejtësinë e një klikimi, shpesh të njëjta për të gjithë, të dërguara me “forward” në çaste simbolike. Mesazhe të gatshme, të krijuara nga teknologjia, qarkullojnë pa ndalesë, pa peshë emocionale, pa ndjesinë e pritjes apo të surprizës. Urimi bëhet formalitet, fasadë digjitale që plotëson një zakon, por rrallë prek.
Ndodh shpesh që automjete të ndryshme pësojnë defekte në rrugë dhe të bllokojnë qarkullimin rrugor për mjetet e tjera. Për këtë të parët që vijnë në ndihmë janë efektivët e Policisë Rrugore. Edhe ditën e djeshme, një efektiv i Rrugores i është gjendur pranë një shoferi që kishte probleme me makinën dhe kishte ngecur në rrugë pranë kryqëzimit te Rruga e Elbasanit. Ndërkohë edhe një qytetar që po lëvizte me motor ka dhënë kontributin e tij duke e shtyrë me këmbë makinën e ngecur në rrugë.
Një aksident i frikshëm rrugor ka ndodhur pasditen e së martës në autostradën Tiranë–Durrës, ku dy automjete janë përplasur, duke shkaktuar dëme të konsiderueshme materiale. Një shtetas i huaj, i cili jeton në Shqipëri prej rreth katër vitesh, i ka dërguar redaksisë së JOQ Albania pamje nga aksidenti, ku shihet qartë momenti i përplasjes dhe dëmet e konsiderueshme materiale. Sipas dëshmisë, ai po udhëtonte drejt Tiranës së bashku me bashkëshorten, duke ndjekur normalisht rrjedhën e trafikut, kur një automjet tip Toyota ka kryer një manovër të papritur, duke e goditur anash. Si pasojë e përplasjes, mjeti i tij është përplasur fuqishëm drejt trafikndarëses prej betoni, ku ka përfunduar pjesërisht mbi të. “Po udhëtoja normalisht, kur makina tjetër u shfaq papritur nga e majta dhe më goditi. Pas goditjes, automjeti im u përplas me barrierën anësore prej betoni”, shprehet ai për JOQ Albania. Nga pamjet e siguruara, vërehet qartë se automjeti i shtetasit të huaj, një Volkswagen Passat gri i errët, ka pësuar dëme të rënda, veçanërisht në pjesën e përparme dhe anësore, ndërsa ka mbetur i ngritur mbi barrierën e betonit. Ai thekson se automjetin e kishte blerë vetëm tre muaj më parë dhe se pas aksidentit dëmet janë të tilla, sa mjeti është bërë pothuajse i papërdorshëm. Fatmirësisht, si ai ashtu edhe bashkëshortja e tij kanë pësuar vetëm lëndime të lehta. Shtetasi i huaj vlerëson edhe ndërhyrjen e policisë në vendngjarje, duke theksuar se efektivi i pranishëm i ndihmoi me procedurat dhe komunikimin, për shkak të barrierës gjuhësore. Sipas tij, nga pamjet dhe rrethanat e aksidentit, përgjegjësia dukej se i takonte mjetit tjetër. Megjithatë, këto mbeten vlerësime paraprake, ndërsa përcaktimi përfundimtar i përgjegjësisë pritet nga organet kompetente.
Pamjet që po qarkullojnë së fundmi pasqyrojnë një realitet të dhimbshëm: dhjetëra të rinj që gdhihen rrugëve të qyteteve moderne, duke fjetur mbi kartonë apo direkt në trotuar. Këto video kanë nxitur raportime të shumta në rrjetet sociale dhe media të huaja, të cilat flasin për një situatë shqetësuese në Kinë, ku dhjetëra mijëra të rinj pretendohet se po përballen me pasoja ekstreme pas futjes në të ashtuquajturën “listë e zezë” të Sistemit të Kreditit Social. Sipas këtyre raportimeve, personat që futen në listën e zezë përballen menjëherë me kufizime të rënda financiare: u bllokohen shërbimet bankare, pagesat digjitale dhe transaksionet online, duke e bërë pothuajse të pamundur pagesën e qirasë, blerjen e ushqimit apo marrjen e pagës. Në disa raste, këto kufizime thuhet se kanë çuar shumë individë kanë çuar individë drejt varfërisë ekstreme, duke i lënë pa kulm mbi kokë dhe jashtë çdo sistemi jetik për mbijetesë, pasi jeta e përditshme në Kinë është e lidhur pothuajse tërësisht me pagesat digjitale. Sipas pretendimeve që qarkullojnë online, futja në listën e zezë mund të ndodhë edhe për shkak të mospagimit në kohë të huave informale ose kredive me interesa shumë të larta, të cilat në disa raste raportohet se arrijnë deri në 25% ose më shumë. Megjithatë, këto mbeten pretendime që nuk janë konfirmuar zyrtarisht nga autoritetet kineze. Autoritetet në Pekin e kanë justifikuar Sistemin e Kreditit Social si një mekanizëm për të rritur besueshmërinë financiare dhe disiplinën shoqërore, por kritikët ndërkombëtarë prej vitesh kanë ngritur shqetësime se ky sistem mund të përdoret për ndëshkime disproporcionale dhe përjashtim social. Ndërkohë, debati ka kaluar kufijtë e Azisë, pasi ekzistojnë frika se sisteme të ngjashme të identitetit apo kontrollit digjital mund të tentohen të aplikohen edhe në Europë në vitet e ardhshme. Deri më tani, nuk ka të dhëna zyrtare që konfirmojnë shifrat e përmendura, ndërsa organizata të të drejtave të njeriut kanë kërkuar më shumë transparencë mbi mënyrën se si funksionon ky sistem dhe pasojat reale për qytetarët.
Një qytetare i është drejtuar redaksisë së JOQ Albania për të falënderuar publikisht një çift të ri, të cilët gjetën dhe i dorëzuan portofolin që ajo kishte humbur në zonën e Pazarit të Ri në Tiranë. Ajo tregon se portofoli i kishte humbur pasditen e sotme dhe brenda tij ndodheshin rreth 300 mijë lekë të vjetra. Çifti që e gjeti portofolin nuk hezitoi aspak: ata kontaktuan bankën për të gjetur numrin e saj të telefonit dhe më pas e telefonuan për t’ia kthyer personalisht. Në videon e mbërritur në redaksinë tonë, qytetarja shpreh mirënjohjen e saj për këtë veprim të ndershëm: “Përshëndetje JOQ! Kjo është kuleta që mua më kishte humbur në zonën e Pazarit të Ri sot pasdite. Dua të falënderoj çiftin simpatik që më morën në telefon dhe ma sollën në shtëpi. Faleminderit dhe mirënjohje për këtë veprim kaq të ndershëm. Vërtet ekzistojnë njerëz kaq të mirë dhe duhet të ndërgjegjësohemi të gjithë, sepse nuk është vlera monetare ajo që na bën njerëz, por gjesti dhe veprimi.” Në prag të Vitit të Ri, ky gjest i thjeshtë, por shumë domethënës, është një kujtesë e bukur se ndershmëria, empatia dhe humanizmi ende ekzistojnë dhe meritojnë të vlerësohen publikisht. JOQ Albania i bashkohet falënderimit dhe uron që këto histori të vogla, por të mëdha në vlera, të shërbejnë si shembull për të gjithë shoqërinë.
Sot bëhen pesë ditë që qyteti i Vlorës përballet me mungesën e ujit të pijshëm, ndërsa pavarësisht deklaratave zyrtare se furnizimi ka nisur të rikthehet, dhjetëra qytetarë kanë kontaktuar redaksinë e JOQ Albania duke raportuar se shumë zona vijojnë të jenë pa ujë. Qytetarë të tjerë kanë dërguar pamje ku uji që ka ardhur në rubineta është i turbullt, me ngjyrë dhe me aromë të rëndë, duke theksuar se ai nuk është i konsumueshëm dhe paraqet rrezik për shëndetin. Në këtë situatë, një qytetare ka ngritur dyshime serioze mbi shkakun real të dëmtimit të tubacionit kryesor, i cili la Vlorën pa ujë për ditë të tëra. Në një video të mbërritur në redaksinë tonë, ajo ka shkuar vetë në vendin ku është çarë tubi dhe ka filmuar zonën përreth. Sipas saj, dëmtimi ka ndodhur brenda një kantieri ndërtimi, që ajo e identifikon si kantier të biznesmenit Arben Avduli. Qytetarja vë në dyshim deklaratën e kryetares së Bashkisë së Vlorës, Bruna Mersini, e cila një ditë më parë e cilësoi ngjarjen si “fatkeqësi natyrore”. “Nuk ka asnjë shenjë shkarjeje dherash këtu. Muri është në rregull. Pas murit është kanal. Nga kanë ardhur dherat? Si ka mundësi që shkarja të ketë ndodhur brenda kantierit? Ky është kantieri i Arben Avdulit”, shprehet ajo në video, duke ngritur pikëpyetje mbi versionin zyrtar. Edhe një tjetër qytetar i është drejtuar redaksisë sonë, duke pretenduar se dëmtimi i tubacionit ndodhet brenda të njëjtit kantier ndërtimi dhe se, sipas tij, askush nuk po flet publikisht për këtë çështje për shkak të lidhjeve politike që ai pretendon se ka biznesmeni në fjalë ka me Partinë Socialiste. Ndërkohë, kryetarja e Bashkisë së Vlorës, Bruna Mersini, në një deklaratë për mediat, u shpreh se problemi nuk është në përgjegjësi të bashkisë dhe se dëmtimi i tubacionit ishte pasojë e një “fatkeqësie natyrore”. “Kjo është një fatkeqësi natyrore, nuk duhet përdorur për politikë. Nuk është momenti të bëjmë analiza dhe të gjejmë fajtorin, por të japim zgjidhjen”, deklaroi ajo, duke shtuar se pjesët rezervë po vinin nga Turqia dhe se po aplikohej një zgjidhje e përkohshme me furnizim të pjesshëm dhe shpërndarje uji përmes autobotëve. Megjithatë, pesë ditë pa ujë në festat e fundvitit dhe raportimet e shumta nga qytetarët për mungesë totale ose ujë të papijshëm, kanë shtuar indinjatën dhe dyshimet në qytet. Sa i përket biznesmenit Arben Avduli, ai njihet si pronar dhe administrator i kompanisë së ndërtimit “Avduli shpk”, e cila ka përfituar miliona euro nga tendera publikë ndër vite. Çdo lidhje mes aktivitetit të kësaj kompanie dhe dëmtimit të tubacionit mbetet, në këtë fazë, për t’u verifikuar nga institucionet përgjegjëse. Redaksia e JOQ Albania i bën thirrje autoriteteve që të sqarojnë publikisht dhe me transparencë të plotë shkakun real të dëmtimit të tubacionit, si dhe të garantojnë furnizim të sigurt dhe të pijshëm me ujë për qytetarët e Vlorës.
Një ngjarje e rëndë ka tronditur fshatin Piskupat në Pogradec. Një vajzë 12-vjeçare është përdhunuar katër muaj më parë nga një 67-vjeçar nga i njëjti fshat. Rasti u bë i ditur vetëm tani, pasi vajza rezultoi shtatzënë katër muajshe. Viktima nuk kishte treguar ngjarjen më parë për prindërit, pasi autori e kishte kërcënuar se do ta vriste nëse fliste. Ngjarja ka ndodhur brenda banesës së 67-vjeçarit, ku autori e ka lidhur dhe përdhunuar me forcë. E mitura është pyetur nga prokuroria në praninë e psikologut, duke rrëfyer detajet e ngjarjes. Prindërit e vajzës e dërguan për vizitë mjekësore pasi vunë re ndryshime në trupin e saj, dhe mjekët konfirmuan shtatzëninë. Policia ka arrestuar autorin, i cili është baba i katër fëmijëve dhe gjysh. Vajza ndodhet nën kujdesin e familjes dhe psikologëve për mbështetje psikologjike. Rasti po hetohet nga organet kompetente, ndërsa autoritetet janë duke ndjekur procedurat për ndjekjen penale të plotë të autorit.
Kina ka zhvilluar këtë javë stërvitjen më të gjerë ushtarake të regjistruar ndonjëherë rreth Tajvanit, duke rrethuar ishullin me forca detare dhe ajrore, duke lëshuar raketa në ujërat përreth dhe duke simuluar një bllokadë të plotë ushtarake. Gjatë ushtrimeve, të quajtura “Justice Mission 2025”, Komanda Lindore e Ushtrisë Çlirimtare Popullore kreu për rreth 10 orë ushtrime me zjarr real, duke lëshuar raketa në veri dhe jug të Tajvanit. Njësi detare dhe ajrore kineze simuluan goditje ndaj objektivave detare dhe ajrore, si edhe operacione kundër-nëndetëseje. Për herë të parë, Pekini deklaroi hapur se stërvitjet synojnë të pengojnë çdo ndërhyrje të jashtme, përfshirë SHBA-në dhe aleatët e saj. Zyra Kineze për Çështjet e Tajvanit paralajmëroi se çdo forcë e jashtme që ndërhyn do të “përplaset me muret e hekurt të ushtrisë kineze”. Stërvitjet nisën 11 ditë pasi SHBA njoftoi një paketë rekord armësh prej 11.1 miliardë dollarësh për Tajvanin, vendim që ka irrituar ashpër Pekinin. Mediat shtetërore kineze publikuan pamje propagandistike, duke theksuar epërsinë teknologjike dhe ushtarake të Kinës dhe aftësinë për ta marrë Tajvanin me forcë nëse do të jetë e nevojshme. Autoritetet tajvaneze raportuan se të martën rreth ishullit po operonin 71 avionë ushtarakë kinezë dhe 24 anije luftarake dhe të rojës bregdetare. Sipas Ministrisë së Mbrojtjes së Tajvanit, Kina ka lëshuar gjithsej 27 raketa në ujërat përreth ishullit. Një zyrtar i lartë i sigurisë në Tajvan deklaroi se ushtria kineze duket se po simulon goditje ndaj objektivave tokësore, përfshirë sistemet raketore amerikane HIMARS që Tajvani ka blerë së fundmi. Ndërkohë, presidenti i Tajvanit, Lai Ching-te, tha se trupat janë të gatshme për mbrojtje, por theksoi se Tajpej nuk synon përshkallëzim të situatës. Ushtrimet e kësaj jave janë raundi i gjashtë i madh i stërvitjeve që nga viti 2022 dhe konsiderohen më të gjërat për nga shtrirja dhe më të afërtat ndonjëherë me territorin tajvanez. Një raport i fundit i Pentagonit vlerëson se Kina po përgatitet të jetë gati ushtarakisht për të fituar një konflikt për Tajvanin deri në vitin 2027, në 100-vjetorin e krijimit të Ushtrisë Çlirimtare Popullore.
Një emigrant shqiptar, i cili prej 25 vitesh jeton në Gjermani, ka realizuar një gjest humanitar dhe me shumë vlerë për Spitalin Rajonal të Kukësit. Xhevahir Ferati me origjinë nga fshati Bardhoc, ka dhuruar një ambulancë e re për spitalin, e cila do t’i shërbejë qytetit dhe banorëve të Kukësit. Falë këtij gjesti, spitali i Kukësit pasuron më tej flotën e ambulancave, duke rritur cilësinë e shërbimit shëndetësor për komunitetin. Duhet thënë se ky veprim përcjell një mesazh të fortë në këtë prag fundviti ku shëndetësia është në pikë të hallit dhe qytetarët s’marrin shërbimin që meritojnë.
Personi në foto është Hysni Ymeri, 67-vjeçari nga Shkodra, i cili u vra një ditë më parë pas një shpërthimi të fuqishëm në pallatin ku banonte. Ngjarja ndodhi sapo ai mbërriti në hyrjen e ndërtesës për t’u ngjitur në katin e katërt, ndërsa policia ende nuk ka zbardhur nëse shpërthimi shkaktohej nga lëndë eksplozive me telekomandë apo nga paneli i matësve të energjisë elektrike. Hetuesit po ndjekin dy pista kryesore dhe nuk kanë dhënë asnjë konfirmim për momentin. Hysni Ymeri ka pasur lidhje me një histori të gjatë konflikti mes familjeve në Shkodër. Në vitin 1995, vëllai i tij vrau Shefqet Çekorjen, dhe disa vite më vonë familjet arritën pajtimin. Përveç kësaj, disa kushërinj të tij kanë qenë të përfshirë në ngjarje të tjera të dhunshme dhe vrasje, duke përfshirë mjekun Ilir Aliaj në vitin 2017. Hetuesit nuk përjashtojnë mundësinë e një atentati si shkak të ngjarjes, duke marrë parasysh historikun e konflikteve mes fisve Bajri-Lici dhe të tjerëve. Deri në përfundimin e ekspertizës dhe zbardhjen e plotë nga policia, rrethanat mbeten të paqarta.
Kryeministri Edi Rama ka zgjedhur ta mbrojë drejtoreshën e AKSHI-t, Mirlinda Karçajan, e cila ndodhet në masë “arrest shtëpie” me vendim të SPAK për shkelje të barazisë në tendera, duke vënë theksin jo te akuzat, por te qiraja. Në konferencën e fundit për mediat, Rama theksoi se Karçajan jeton në një banesë me qira dhe se më parë ka banuar në shtëpinë e prindërve, një detaj që duket se, sipas tij, shërben si provë karakteri dhe integriteti. Sipas Kryeministrit, fakti që drejtuesja e një institucioni kyç si AKSHI nuk ka shtëpi në pronësi është i mjaftueshëm për të rrëzuar dyshimet e SPAK. Rama deklaroi se Karçajan ka “respektin maksimal” të tij, se e njeh prej 20 vitesh dhe se është një figurë e njohur ndërkombëtarisht, duke lënë në plan të dytë hetimin penal dhe akuzat për tendera. Në këtë logjikë, duket se qiraja shndërrohet në argument mbrojtës më të fortë se çdo dokument hetimor. “Kjo është pjesë e hetimeve. Nuk kam dijeni për këtë dhe nuk mund të bëj asnjë koment për gjysmë të vërtetat që dalin lart e poshtë. Është proces, do bëhen hetime. Në krye të skuadrës së AKSHIT është një grua që ka respektin e padiskutueshëm. Linda Karçajan, që ka një masë sigurie, me një shtëpi me qira ku jeton, pasi më parë jetonte në një shtëpi të postkomunizmit në banesën e prindërve të tij. E njoh prej 20 vitesh dhe ka respektimin tim. E njohur ndërkombëtarisht dhe ka respektim tim maksimal. Çfarë thoni ju sot, bazuar në copëza të nxjerra rrugëve nga ata që duhet të ruajnë sekretin hetimor, nuk është e mjaftueshme për të dalë në përfundime për të fajësuar njerëzit. Nxirret një copë këtu dhe një copë atje, ushqehet publiku për të dënuar në sytë e opinionit njerëz që kanë të drejtën që të prezumohen të pafajshëm. Degjenerohen në publik që; këta janë llum. Dalin dhe kapakët e tenxheret që marrin paga marramendëse të padeklaruara, dhe pastaj flasin për pensionistet. Unë thjesht dhe vetëm jam në dispozicionin tuaj që të më fusni në tenxhere. Por sa të më sulmoni, vetëm më forconi. Po të doni të më dëmtoni, mos më fusni në tenxhere, se më i fortë do jem", tha Rama
Një situatë tejet shqetësuese është regjistruar mbrëmjen e sotme në fshatin Rrenas, Bashkia Belsh, ku një transformator i tensionit të lartë ka marrë flakë dhe ka pësuar shpërthime të njëpasnjëshme, duke rrezikuar jetën e banorëve të zonës. Në redaksinë e JOQ Albania kanë mbërritur pamje video nga vendngjarja, ku dallohet qartë transformatori teksa shkakton shpërthime dhe flakë në kabllot elektrike. Sipas denoncuesit, transformatori ndodhet shumë pranë banesave, madje i vendosur brenda një ndërtese, ndërsa shtëpi të tjera ndodhen vetëm pak metra larg. “Është hera e disatë që ndodhin shpërthime të tilla. Rrezikohet jeta e shumë banorëve, pasi transformatori është vendosur brenda një shtëpie dhe shumë afër banesave të tjera,” – shprehet qytetari. Sipas tij, pas shpërthimeve, banorët janë detyruar të njoftojnë për ndalimin e energjisë elektrike, e cila furnizohet nga zona e Kajanit. Vetëm pasi u ndërpre rryma, banorët e fshatit kanë hyrë vetë për të fikur zjarrin, i cili kishte përfshirë kabllot e rrymës, duke rrezikuar jetën e tyre për të shmangur një tragjedi më të madhe. Denoncuesi thekson se problemi është i përsëritur dhe i njohur prej vitesh, pasi transformatori nuk është ndërruar kurrë, por vetëm janë bërë ndërhyrje të pjesshme. “Sa herë prishet, ndërrojnë vetëm ndonjë kabllo apo ndonjë pjesë të vogël. Asnjëherë nuk është ndërruar i gjithë transformatori. Ai është shumë i vjetër, madje po bie komplet nga vendi. Shtyllat janë të shtrembëruara prej vitesh,” – shprehet qytetari. Ai shton se shpërthime të tilla ndodhin edhe kur nuk ka mot të keq, çka tregon gjendjen e amortizuar dhe rrezikun konstant që paraqet ky transformator. Banorët i bëjnë thirrje urgjente kryebashkiakut të Belshit, Arif Tafani, dhe institucioneve përgjegjëse që të marrin masa të menjëhershme për zgjidhjen e këtij problemi, përpara se të ndodhë ndonjë ngjarje tragjike. JOQ Albania e publikon këtë denoncim për të ngritur alarmin dhe për të kërkuar ndërhyrje urgjente, pasi situata e përshkruar paraqet rrezik real për jetën dhe pronën e banorëve të zonës.
Një qytetar nga Kamza i është drejtuar redaksisë së JOQ Albania për të denoncuar një rast të pazakontë dhe shqetësues, i cili ngre pikëpyetje serioze mbi sjelljen qytetare dhe respektin ndaj komunitetit. Ai ka dërguar një video të kapur nga kamerat e sigurisë, ku shihet një zonjë që ndalon makinën, zbret së bashku me një fëmijë të vogël dhe shkon drejt portës së shtëpisë së tij, ku hedh mbeturinat, duke i lënë aty, sikur të ishte një kosh plehrash. Sipas denoncuesit, ajo që e bën situatën edhe më shqetësuese është fakti se veprimi kryhet pa asnjë shqetësim, sikur të ishte diçka krejt normale, ndërkohë që koshat e mbeturinave ndodhen jo më shumë se 100 metra larg portës së banesës së tij. “Dje, në orën 09:25, përpara shtëpisë sime, një zonjë ndaloi makinën, zbriti me fëmijën dhe hodhi mbeturina në rrugë, sikur të ishte kosh plehrash. Veprimi është i regjistruar me video. Turp që në vitin 2025 ende ka njerëz që nuk respektojnë as mjedisin, as komunitetin ku jetojnë”, shprehet qytetari. Ai shton se mes mbeturinave kishte peceta të lagura dhe një qese, përmbajtja e së cilës nuk është hapur, por sipas tij dyshohet se ishte mbeturinë shtëpiake. Qytetari thekson se zonja duket se e ka vënë re kamerën e sigurisë, por pavarësisht kësaj, nuk ka shfaqur asnjë shqetësim dhe është larguar normalisht. “Pse duhet t’i hidhte mbeturinat pikërisht te porta ime, kur pak më lart janë koshat e plehrave?” – pyet qytetari, duke kërkuar që këto sjellje të mos normalizohen. Ky rast nuk është thjesht një akt papërgjegjshmërie individuale, por një pasqyrim i një mentaliteti që dëmton mjedisin dhe bashkëjetesën në komunitet. Respekti për hapësirën publike dhe private është detyrim minimal qytetar, jo zgjedhje personale. JOQ Albania e publikon këtë denoncim për të sensibilizuar dhe për të nxitur reflektim, me shpresën se raste të tilla të mos përsëriten dhe të marrin vëmendjen që meritojnë.
Login
