Ndërsa për shumë familje Krishtlindjet dhe Viti i Ri janë ditë gëzimi, tryezash festive dhe bashkimi familjar, për mijëra qytetarë në Shqipëri festat kalojnë në vetmi. Emigrimi masiv i të rinjve ka lënë pas prindër të moshuar, të cilët i përjetojnë këto ditë pa praninë e fëmijëve. Disa emigrantë arrijnë të kthehen për festat, por jo të gjithë e kanë këtë mundësi. Për shumë familje, distanca, kostot dhe angazhimet jashtë vendit e bëjnë të pamundur rikthimin, duke i kthyer festat në ditë pritjeje dhe malli për prindërit që kanë mbetur në Shqipëri. Mes tyre është edhe Veli Jaci, i cili jeton vetëm me bashkëshorten, ndërsa fëmijët i ka të shpërndarë jashtë vendit. Në një prononcim për mediat, ai tregoi se vajza e tij prej 10 vitesh jeton në Shtetet e Bashkuara të Amerikës dhe se festat i kalojnë larg njëri-tjetrit. Si Veliu, janë të shumtë të moshuarit që presin Krishtlindjen dhe Vitin e Ri pa zërat dhe praninë e fëmijëve. Ka edhe nga ata që mezi presin ditët festive me shpresën se do të takojnë familjarët, por për shumë të tjerë kjo mbetet vetëm një dëshirë. Sipas të dhënave zyrtare, rreth 103 mijë persona në Shqipëri jetojnë të vetëm, dhe mbi 62 për qind e tyre janë mbi moshën 60 vjeç. Për këtë kategori, festat jo rrallë thellojnë ndjesinë e vetmisë dhe mungesës së mbështetjes familjare. Në një ditë që simbolizon dashurinë, ngrohtësinë dhe bashkimin, Krishtlindja për shumë të moshuar mbetet një ditë e heshtur. Një realitet që rikujton nevojën për më shumë vëmendje, solidaritet dhe kujdes ndaj atyre që i kanë dhënë shoqërisë, por sot festojnë në vetmi.
Një denoncim i pazakontë ka mbërritur pasditen e sotme në redaksinë e JOQ Albania nga një besimtare ortodokse, e cila raporton një situatë që sipas saj nuk e kishte përjetuar asnjëherë më parë. Sipas qytetares, rreth orës 16:57, ajo dhe disa besimtarë të tjerë janë paraqitur në Katedralen Ortodokse “Ngjallja e Krishtit” në Tiranë, me qëllimin për të ndezur qirinj, një praktikë që, sipas saj, kryhet prej vitesh në këtë orar, veçanërisht gjatë festave. Në videon e dërguar në redaksi dallohet qartë momenti kur besimtarët nuk lejohen të futen brenda kishës, ndërsa një person i stafit u kërkon të qëndrojnë jashtë, duke u thënë se mund t’u japë qirinj për t’i ndezur, por pa hyrë në ambientet e brendshme. Besimtarja shprehet e revoltuar, duke theksuar se nuk kishte asnjë njoftim paraprak që kisha do të ishte e mbyllur në atë orar, ndërkohë që edhe në faqen zyrtare online rezultonte ende si “hapur”. Sipas saj, personi i kishës që nuk i lejoi të hynin është shprehur se 'ishin të lodhur', pasi kishin qenë në shërbim që prej mesnatës. Qytetarja thekson se ky justifikim nuk qëndron, duke qenë se shumë njerëz punojnë me turne edhe gjatë festave dhe se dera e kishës nuk i është mbyllur kurrë më parë në këto orare, gjatë 35 viteve që ajo e frekuenton. Denoncimi i qytetares: “Në orën 16:57 kam shkuar te Katedralja Ortodokse ‘Ngjallja e Krishtit’ e Tiranës. Si unë, edhe shumë besimtarë pasdite shkojmë për të ndezur qirinj. Në internet figuron ‘hapur’, ndërkohë që u mbyll në atë orë. Si unë dhe shumë besimtarë të tjerë, të revoltuar, u lutëm të hynim vetëm sa për të ndezur qirinj, por përgjigjja ishte: ‘Mbaruat xhiron ju dhe tani vini ju? Kemi qenë që në orën 12 të natës dhe jemi lodhur’. Kam 35 vite që shkoj në këto orare dhe kurrë nuk ka ndodhur kjo situatë. Sot ishte edhe 25 dhjetor. Uroj besimtarët ‘Gëzuar Krishtlindjet dhe mbarësi në familjet e tyre’. Për ata të kishës, Zoti pastë mëshirë.” E kontaktuar nga JOQ Albania, qytetarja konfirmoi se nuk kishte asnjë njoftim zyrtar në rrjetet sociale për ndryshim orari dhe se shumë besimtarë të tjerë ndodheshin pranë derës së kishës, të habitur dhe të shqetësuar nga situata. JOQ Albania e publikon këtë denoncim për transparencë publike, duke theksuar se bëhet fjalë për pretendime të një qytetareje, ndërsa nga pamjet video konfirmohet vetëm fakti se besimtarët nuk u lejuan të hynin në ambientet e brendshme të kishës. Institucionet përkatëse apo përfaqësuesit e kishës mbeten të hapur për një sqarim zyrtar mbi këtë situatë.
Kjo nuk është një foto e inskenuar, as një realizim artistik dhe as propagandë politike. Është një pamje reale nga bulevardi i Vlorës, ku një grua e moshuar ka përfunduar e rrëzuar në mes të rrugës, e ndihmuar nga kalimtarë të rastit, pasi është penguar nga bordurat prej guri dhe pllakat e rrëshqitshme të vendosura nga Bashkia. Gruaja në foto nuk është “statistikë”. Ajo është nënë, bashkëshorte dhe banore e këtij qyteti, ashtu si dhjetëra të tjerë që çdo ditë rrezikojnë shëndetin në emër të një “investimi estetik” të quajtur Rilindje Urbane. Bordurat e larta prej guri dhe pllakat e lëmuara, të cilat bëhen jashtëzakonisht të rrëshqitshme në ditë me shi apo lagështi, po kthehen në kurthe të përditshme për këmbësorët. Sipas banorëve dhe dëshmive të shumta në rrjete sociale, rastet e rrëzimeve janë shtuar ndjeshëm. Të moshuar, gra, fëmijë, por edhe persona me aftësi të kufizuara, e kanë pothuajse të pamundur të ecin normalisht në disa segmente të bulevardit. Megjithatë, bashkia vijon të heshtë, ndërsa investimi mbetet i pandryshuar. Ironia qëndron në faktin se këto punime janë prezantuar si përmirësim i hapësirave publike dhe rritje e sigurisë urbane. Në praktikë, ato po prodhojnë të kundërtën: dëmtime, fraktura, trauma dhe frikë për të dalë në rrugë. Gurët dekorativë dhe pllakat e rrëshqitshme nuk janë luks urban, por rrezik real. Pyetja që shtrohet është e thjeshtë: sa qytetarë duhet të rrëzohen, sa duar e këmbë duhet të thyhen, që Bashkia e Vlorës të pranojë se ky “investim” ka dështuar? Heqja e këtyre bordurave dhe zëvendësimi i pllakave me materiale të sigurta nuk është çështje shijeje, por detyrim minimal ndaj qytetarëve. Derisa të ketë reagim institucional, pamje si kjo do të vazhdojnë të përsëriten. Dhe përgjegjësia nuk është e “fatit të keq”, por e vendimeve të gabuara që po sakatojnë çdo ditë vlonjatët.
Kryetari i Bashkisë së Sarandës, Oltion Çaçi, rezulton të ketë kryer një numër të lartë transaksionesh me pasuri të paluajtshme që prej marrjes së detyrës publike. Të dhënat dalin nga deklarimet e pasurisë të dorëzuara nga vetë ai pranë Inspektoratit të Lartë të Deklarimit dhe Kontrollit të Pasurive (ILDKP) për vitet 2023 dhe 2024. Sipas këtyre deklarimeve, Çaçi ka shitur ose këmbyer gjithsej 13 pasuri të paluajtshme, përfshirë apartamente, njësi tregtare dhe garazhe, ku figuron bashkëpronar me kuotë 16.667% në secilën prej tyre. Viti 2023: 6 apartamente “largohen” nga pronësia Në deklarimin për vitin 2023, kryebashkiaku raporton largimin nga pronësia e 6 apartamenteve, me sipërfaqe që variojnë nga 43 deri në 95 metra katrorë. Në të gjitha rastet, vlera e përfituar është deklaruar 0 lekë, me shënimin “nuk e zotëroj – tjetër”, pa sqarime të mëtejshme mbi formën konkrete të transferimit apo shkëmbimit të këtyre pasurive. Ky fakt ngre pikëpyetje mbi mënyrën se si janë kryer këto lëvizje pronësie dhe mbi çmimet reale të transaksioneve, në një treg ku pasuritë e paluajtshme, veçanërisht në Sarandë, kanë pësuar rritje të ndjeshme vlerash. Viti 2024: ritëm edhe më i lartë transaksionesh Edhe në vitin 2024, sipas deklarimit zyrtar, Çaçi ka vijuar me shitjen e pasurive. Këtë herë bëhet fjalë për 7 pasuri të tjera, përfshirë: 5 apartamente 1 njësi tregtare 1 garazh Edhe këto pasuri janë deklaruar me kuotë pronësie 16.667%, ndërsa vlerat e raportuara si përfitime janë, në disa raste, simbolike. Për shembull: një njësi tregtare prej 70 m² është shitur për 16,753 lekë një apartament prej 71.1 m² për 43,178 lekë një tjetër apartament prej 63.8 m² për 38,739 lekë Shuma të tilla janë dukshëm larg çmimeve reale të tregut imobiliar në zonat bregdetare. Pyetje mbi përputhshmërinë me funksionin publik Intensiteti i lartë i këtyre transaksioneve ka sjellë që emri i Oltion Çaçit të përflitet publikisht si “Sheiku i Sarandës”, për shkak të rolit aktiv në lëvizjen e pronave, në një kohë kur ai ushtron një funksion të lartë publik. Megjithëse deklarimet janë formalisht të regjistruara në ILDKP, ritmi i shitblerjeve dhe vlerat e raportuara ngrenë pikëpyetje mbi transparencën, konfliktin e mundshëm të interesit dhe përputhshmërinë e kësaj veprimtarie me detyrën e kryetarit të bashkisë. Deri më tani, nuk ka një reagim zyrtar nga vetë Oltion Çaçi lidhur me këto të dhëna dhe me mënyrën e realizimit të këtyre transaksioneve.
Fondi Monetar Ndërkombëtar thotë se bankat në Shqipëri po japin gjithnjë e më shumë kredi, sidomos për blerje apartamentesh dhe ndërtime, dhe kjo po krijon rrezik që tregu të “nxehët” më shumë seç duhet. Sipas FMN-së, në vitet 2023 dhe 2024 kreditë janë rritur me ritme të larta. Pjesa më e madhe e këtyre kredive ka shkuar për pasuri të paluajtshme. Kjo ndihmon ekonominë për momentin, sepse ka më shumë ndërtim dhe qarkullim parash, por nëse vazhdon me këtë ritëm, mund të krijohen probleme më vonë. FMN vëren se bankat aktualisht janë në gjendje të mirë financiare. Ato kanë fitime të larta dhe kapital të mjaftueshëm për të përballuar vështirësi të mundshme. Megjithatë, kjo nuk do të thotë se rreziqet nuk ekzistojnë. Sipas FMN-së, Banka e Shqipërisë reagon vonë ndaj problemeve financiare, sepse pret që kriza të duket qartë, si për shembull kur shtohen kreditë e këqija ose bankat fillojnë të kenë humbje. Në këto raste, ndihma ose masat mbrojtëse vijnë me vonesë. Për këtë arsye, FMN këshillon që Banka e Shqipërisë të veprojë më herët dhe të marrë masa parandaluese, para se problemet të bëhen serioze. Një nga këto masa është që bankat të mbajnë më shumë para rezervë për kohë të vështira. Shqipëria ka nisur ta zbatojë këtë qasje në vitin 2025, duke vendosur që bankat të mbajnë një rezervë shtesë: 0.25 për qind nga qershori dhe 0.5 për qind nga dhjetori. FMN thekson se rritja e shpejtë e kredive, e shtyrë kryesisht nga ndërtimi dhe turizmi, tregon se ekonomia po hyn në një fazë ku rreziqet po shtohen. Nëse situata nuk monitorohet me kujdes, kjo mund të sjellë pasoja për bankat dhe për qytetarët. Sipas vlerësimeve të FMN-së, do të ishte më e sigurt që bankat të kenë një rezervë mbrojtëse edhe më të lartë, në mënyrë që sistemi financiar të jetë më i qëndrueshëm në rast goditjesh të brendshme apo të jashtme.
Një tjetër episod “qyl” duket se po i shtohet dosjes publike të Presidentit të Republikës, Bajram Begaj. Këtë herë, jo për ndonjë faturë të papaguar apo ndonjë favor simbolik, por për një dyshim shumë më serioz: ndërtimin e tre vilave pa leje në zonën e njohur si “Barka Resort”. Dyshimet janë ngritur publikisht nga avokati Llangozi, i cili, duke iu referuar informacioneve konfidenciale, ka denoncuar në rrjetet sociale se pranë hyrjes së kompleksit “Barka Resort” po ndërtohen tre vila që dyshohet se i përkasin familjes së Presidentit Begaj. Sipas këtyre pretendimeve, dy vila janë për djemtë e Presidentit, ndërsa një tjetër për përdorim personal. Ironia qëndron në faktin se, sipas të njëjtave burime, këto ndërtime dyshohet se po realizohen në vend të një fushe basketbolli, e cila ishte parashikuar në projektin fillestar të miratuar për resortin. Pra, nga koshi në kosh… nga fusha sportive në vila luksi. Avokati Llangozi ngre disa pikëpyetje që, nëse rezultojnë të vërteta, kërkojnë patjetër transparencë institucionale: – Pse nuk po ndërtohet fusha e basketbollit e parashikuar në projekt? – A kemi të bëjmë me ndërtim pa leje? – Nga cili burim janë siguruar fondet për këto vila? – A janë deklaruar këto pasuri në ILDKPI dhe a përputhen me të ardhurat e deklaruara? Postimi i plotë i avokatit Llangozi: “Tre vila të familjes së Presidentit Begaj po ndërtohen pa leje në zonën e ‘Barka Resort’, në vend të fushës së basketbollit Sipas informacioneve konfidenciale, në zonën pranë hyrjes së kompleksit të njohur si ‘Barka Resort’ po ndërtohen tre vila që dyshohet se i përkasin familjes së Presidentit të Republikës, Bajram Begaj. Burimet konfidenciale pohojnë se dy nga vilat janë duke u ndërtuar për djemtë e Presidentit, ndërsa një vilë tjetër për përdorim personal. Sipas të njëjtave pretendime, ndërtimet po realizohen në hapësirën ku, sipas projektit fillestar të miratuar, ishte parashikuar të ndërtohej një fushë basketbolli në kuadër të resortit. Dy janë pyetjet kryesore që, sipas juristëve dhe zërave kritikë, mund të ngrejnë dyshime për shkelje penale: së pari, pse ‘Barka Resort’ nuk po ndërton fushën e basketbollit të parashikuar në projektin e miratuar dhe nëse në vend të saj po realizohet apo jo ndërtim pa leje. Së dyti, nga cili burim janë siguruar fondet për ndërtimin e vilave që i atribuohen familjes së Presidentit Bajram Begaj, nëse këto pasuri janë deklaruar sipas ligjit në ILDKPI dhe nëse ekziston përputhje mes të ardhurave të deklaruara dhe investimeve të kryera, çështje për të cilat pritet transparencë dhe reagim nga institucionet përgjegjëse.” Natyrisht, deri në një verifikim zyrtar, gjithçka mbetet në nivel dyshimi. Por ironia lind vetvetiu: nëse këto pretendime rezultojnë të vërteta, a kemi të bëjmë me “qylin” e radhës të Presidentit Begaj? Një “qyl” luksoz, me vila në vend të fushave sportive. Kujtojmë se kjo nuk do të ishte hera e parë që emri i Presidentit lidhet me histori “qyl”. Vetëm pak javë më parë, JOQ Albania publikoi një denoncim ku pretendohej se Begaj kishte detyrime të papaguara në kompleksin “Rezidenca Diell” në Qerret. Pa harruar as episodet e tjera të përfolura publikisht, nga rroga si mjek në privat, te “lëmosha” e famshme ndaj Erdoganit. Në këtë panoramë, pyetja që shtrohet me ironi, por edhe me shqetësim qytetar, është kjo: Nëse Presidenti i Republikës dyshohet se përfiton gjithçka “qyl”, çfarë mesazhi u jep kjo qytetarëve të zakonshëm? Topi tani është në fushën e institucioneve, të cilat, nëse pretendojnë seriozitet, duhet të sqarojnë publikisht nëse kemi apo jo një tjetër “qyl” presidencial nën hijen e “padronit” Edi Rama dhe “Rilindjes”.
Hetimet e Prokurorisë së Posaçme (SPAK) mbi dosjen e Agjencisë Kombëtare të Shoqërisë së Informacionit (AKSHI) kanë zbuluar materiale të reja komprometuese, përfshirë regjistrime audio të realizuara fshehurazi në ambientet e biznesmenit Ergys Agasi. Nga bisedat mes Agasit dhe ortakut të tij, Ermal Beqiri, sipas SPAK, dalin dyshime për ndërhyrje dhe manipulim të procedurave të tenderimit në favor të kompanisë së tyre, si dhe referenca për veprimtari të paligjshme. Në kuadër të hetimit, GJKKO ka caktuar masa sigurie për disa persona, “arrest shtëpie” për drejtoreshën e AKSHI-t, Mirlinda Karçanaj, dhe “arrest me burg” për Ergys Agasin dhe Ermal Beqirin. Më 16 dhjetor, agjentë të BKH-së, të shoqëruar nga Policia e Shtetit, zhvilluan kontrolle në disa banesa dhe biznese në pronësi të Agasit në Tiranë dhe Durrës.
Detaje të reja kanë dalë në dritë nga dosja voluminoze e Prokurorisë së Posaçme (SPAK), ku përfshihet zv/kryeministrja dhe ministrja e Infrastrukturës dhe Energjisë, Belinda Balluku. Në materialet e administruara nga hetimi përfshihen edhe komunikime elektronike mes saj dhe drejtorit të Autoritetit Rrugor Shqiptar (ARRSH), Evis Berberi. Sipas aktit të ekspertimit nr. 195, datë 26.09.2024, të një aparati celular “BlackBerry” model BBF100-6, të sekuestruar shtetasit Evis Berberi, janë konstatuar komunikime në aplikacionin “Signal Private Messenger” ndërmjet tij dhe shtetases Belinda Balluku. Në këto komunikime, të datës 15 qershor 2021, referohen takime, zhvillime dhe pritshmëri që, sipas hetimit, lidhen me projektin rrugor Thumanë–Kashar. Në një nga mesazhet, Balluku citohet të ketë shkruar: “Unë po i bëj nderin e jetës me Thumanë-Kasharin…”, frazë e cila në dosje interpretohet si referencë ndaj rëndësisë së projektit dhe ndikimit të tij te palë të treta. Nga hetimi rezulton se në biseda përmendet edhe shtetasi Bashkim Ulaj, pronar i shoqërisë “Gener 2” sh.p.k., e cila është shpallur fituese e procedurës koncesionare (PPP) për ndërtimin dhe mirëmbajtjen e rrugës Thumanë–Fushë Krujë–Vorë–Kashar. Kontrata e koncesionit, me vlerë të parashikuar rreth 245 milionë euro, është lidhur në maj të vitit 2022 ndërmjet Ministrisë së Infrastrukturës dhe Energjisë dhe shoqërive “Gener 2” sh.p.k. dhe “G2 Infra” sh.p.k. Por edhe pse sipas dokumenteve zyrtare, ndërtimi fillestar kapte 245 milionë euro, vendime të mëvonshme të ARRSH-së dhe Ministrisë së Infrastrukturës e çuan këtë shifër në 330 milionë euro, duke krijuar një diferencë prej 60 milionë eurosh që shërben për përfitime të padrejta. Koncesionari pritet të arkëtojë gjatë 35 viteve rreth 1.3 miliardë euro, gjysmë miliardi më shumë se projekti fillestar, duke ngritur pyetje serioze mbi avantazhet që i janë dhënë familjes Ulaj në kurriz të buxhetit të shtetit dhe përdoruesve të rrugës. Kjo autostradë me pagesë, është një nga katër autostradat më të shtrenjta në Europë sa i përket tarifës, ndërsa e krahasuar me fuqinë blerëse është më e shtrenjta në Europë. Në një listë ku janë renditur tarifat për kilometër të 59 autostradave me pagesë në të gjithë Europën, Thumanë-Kashar renditet në vendin e katërt. Kjo autostradë ka një gjatësi 21 kilometër, me një tarifë 2.1 euro pa TVSH ose 2.53 euro me TVSH ose 0.12 euro për kilometër. Autoritetet hetimore theksojnë se këto materiale janë pjesë e një procesi në vijim dhe se çdo konkluzion përfundimtar do t’i takojë drejtësisë, në përfundim të hetimeve dhe shqyrtimit gjyqësor të çështjes.
Skandali i asaj kohe ngriti dyshime të forta për kontrolle fiktive, certifikime vetëm në letra dhe përjashtimin real të AKU-së nga roli i saj ligjor. Sipas denoncimeve, bashkëpunimi mes biznesit të Vullnet Sinajt dhe laboratorit privat të Petrit Mahos, nën hijen e mbështetjes politike të mazhorancës socialiste, krijonte një situatë ku siguria ushqimore sakrifikohej, ndërsa konsumatorët rrezikonin shëndetin e tyre, në një periudhë pandemie dhe krize të rëndë për vendin. Sot, më 25 dhjetor 2025, pesë vite më pas, ky skandal rikujtohet si një problem që vijon. JOQ Albania vazhdon edhe sot të publikojë denoncime për produkte të skaduara apo të mykura në rrjetin e supermarketeve Big Market, duke treguar se shqetësimet e qytetarëve për sigurinë ushqimore dhe mungesën e përgjegjësisë mbeten ende aktuale. Me këto raste të shumta denoncimesh të përsëritura ndër vite, institucione si AKU, Prokuroria, Kuvendi i Shqipërisë dhe strukturat kundër korrupsionit kanë detyrimin ligjor dhe moral të reagojnë pa vonesa dhe pa ndikime politike. Heshtja apo mosveprimi përballë skandaleve të tilla jo vetëm që dëmton besimin e qytetarëve, por rrezikon drejtpërdrejt shëndetin publik. Kontrolli real, hetimi i plotë dhe ndëshkimi i përgjegjësve janë masa të domosdoshme për të garantuar që siguria ushqimore të mos mbetet vetëm në letra, por të zbatohet realisht në mbrojtje të konsumatorëve.
Festat e fundvitit kanë shtuar fluksin e automjeteve që qarkullojnë në vendin tonë, por bashkë me to është shtuar edhe trafiku, në shumë zona i rënduar dhe i papërballueshëm. Për shkak të mungesës së Bypass-eve, semaforëve dhe patrullave të Policisë Rrugore, shumë drejtues mjetesh shkelin rregullat e qarkullimit rrugor duke u bërë burim aksidenti për të tjerët. Në pamje mund të shihni se si disa shoferë, në qytete të ndryshme, kryejnë manovra të rrezikshme që përkthehen në rrezik real aksidentesh. Por për të shmangur incidente të tilla, drejtuesit e mjeteve duhet të respektojnë Kodin Rrugor dhe pse jo të dalin më herët nga shtëpitë e tyre për të mbërritur në kohë në destinacionet që synojnë.
Hetimet e SPAK për aferën e tenderave në Agjencinë Kombëtare të Shoqërisë së Informacionit (AKSHI) kanë zbuluar “pa dashur” edhe elementë kyç të përfshirë në vjedhjen e databazës së sistemit TIMS të Policisë së Shtetit, ngjarje e ndodhur më 2 gusht 2023.
Festat e fundvitit kanë sjellë trafik kilometrik në aksin rrugor Tiranë–Elbasan. Dhjetëra automjete janë bllokuar mbrëmjen e sotme në dalje të autostradës, ndërsa qarkullimi është rënduar ndjeshëm edhe në rrethrrotullimin e Bradasheshit. Prej disa ditësh kjo situatë përsëritet pothuajse çdo ditë në qytetin e Elbasanit, duke u përkeqësuar edhe më tej nga kthimi i emigrantëve për festat e fundvitit. Mungesa e një By-pass-i vijon të mbetet problematike, ndërsa trafiku është i bllokuar nga zona e Metalurgjisë deri në Labinot. Policia ka shtuar patrullimet në terren për të menaxhuar qarkullimin e automjeteve, por pavarësisht kësaj, situata vijon të mbetet e rënduar.
Gjatë ditës së sotme, pikat doganore që lidhin Shqipërinë me Greqinë janë përballur me fluks të lartë automjetesh, pasi shumë emigrantë shqiptarë po kthehen nga vendet ku jetojnë dhe punojnë për të festuar Krishtlindjen dhe Vitin e Ri pranë familjeve të tyre. Ndërkohë, qytetarët që ndodhen në Tiranë duket se kanë zgjedhur Korçën si destinacionin kryesor për festat. Pamjet vijnë nga dalja e autostradës Tiranë–Elbasan, pranë Bradasheshit, ku trafiku është rënduar ndjeshëm dhe radha e automjeteve shtrihet për disa kilometra. Mbetet e paqartë nëse udhëtarët që janë nisur drejt Korçës do të arrijnë në kohë për të festuar Krishtlindjen, apo festat do t’i gjejnë ende në rrugë duke qëndruar të bllokuar nga trafiku. Ky segment rrugor përballet shpesh me trafik të rënduar, pasi autostrada me dy korsi ngushtohet në një rrugë me vetëm një korsi për secilin sens. Pavarësisht ankesave të vazhdueshme të qytetarëve dhe kërkesave për zgjidhje, problemi mbetet ende i pazgjidhur.
Një aksident i shumëfishtë ka ndodhur pasditen e sotme në autostradën Durrës-Tiranë. Në aksident janë përfshirë 6 automjete dhe kjo ka bërë që autostrada të mbetet e bllokuar për disa minuta. Fatmirësisht mësohet se deri më tani nuk të lënduar në njerëz, ndërsa raportohet se ka vetëm dëme materiale nga përplasja e automjeteve. Fluksi i shtuar i këtyre ditëve ka shtuar trafikun por drejtuesit e mjeteve duhet të tregojnë më kujdes kur udhëtojnë.
Gentian Gjyli është larguar nga drejtimi i Autoritetit Rrugor Shqiptar pas masës “arrest shtëpie” të vendosur nga GJKKO, në kuadër të hetimeve të SPAK për shkelje të barazisë në tendera. Në krye të ARRSH-së është emëruar Ami Kozeli, i cili është liruar nga posti i zëvendësministrit të Infrastrukturës dhe Energjisë. Ndryshimi vjen në një moment kur disa institucione kyçe po përballen me hetime për procedurat e prokurimeve publike. Ndërkohë, në krye të Korporatës Elektroenergjetike Shqiptare (KESH) është emëruar Viola Haxhiademi, duke zëvendësuar Erald Elezin, i cili gjithashtu ndodhet në arrest shtëpie për akuza të ngjashme. Haxhiademi ka pasur një rol të rëndësishëm prej vitesh në Ministrinë e Infrastrukturës dhe Energjisë, fillimisht si drejtoreshë e kabinetit dhe më pas si sekretare e përgjithshme. Pavarësisht këtyre lëvizjeve, si Kozeli ashtu edhe Haxhiademi do të vijojnë të jenë në varësi të zv.kryeministres Belinda Balluku. Sipas SPAK, Gentian Gjyli dyshohet se ka qenë pjesë e skemave që favorizonin kompani të caktuara në tendera, përmes kritereve të ndërtuara në mënyrë selektive dhe përjashtimit të ofertave të tjera. Ndërsa Erald Elezi akuzohet se ka përgatitur dhe miratuar dokumentacion teknik që nuk përputhej me situatën reale të punimeve, duke justifikuar pagesa dhe ndryshime kontraktuale të pajustifikuara. Hetimet sugjerojnë se këto veprime kanë qenë të koordinuara dhe jo të izoluara, duke përfshirë një zinxhir vendimmarrjeje në nivele të ndryshme institucionale.
Me nisjen e Kuvendit të ri në shtator, duket se disa deputetë e kanë nisur mandatin me një ngrohje xhepash”mjaft efikase. Përveç pagës mujore që shkon rreth 3 000–3 500 euro, dhjetë deputetë të rinj kanë përfituar edhe rimbursimin e pasaportave diplomatike, nga 75 euro secili, të paguara jo nga paga e tyre, por nga buxheti i Kuvendit. Lista e përfituesve përfshin Ani Dyrmishin, Arian Ndojën, Eno Bozdon, Erion Milen, Kiduina Zakën, Klevis Balliun, Marjana Koçekun, Skënder Pashajn, Zegjine Çaushin dhe Zija Ismailajn. Ndërkohë, një grup tjetër deputetësh ka gjetur zgjidhje edhe për strehimin në kryeqytet, gjithmonë me para publike. Antoneta Dhima, Fadil Nasufi, Hatixhe Konomi, Agron Gjekmarkaj, Erion Mile, Niko Peleshi dhe Gerta Bardeli përfitojnë nga 350 euro në muaj për qira, ndërsa Zegjine Çaushi merr 361 euro, Ramion Kurti 338 euro, Genti Lakollari 300 euro, Erjona Ismaili 290 euro, Ledina Alolli 210 euro dhe Bledi Çomo 116 euro. Ironia qëndron në faktin se mes përfituesve gjenden edhe drejtues të lartë të Kuvendit, për të cilët qiraja duket se është po aq “sfiduese” sa për çdo qytetar të zakonshëm. E gjithë kjo vjen krahas paketës së zakonshme të privilegjeve: 170 euro në muaj për telefon, 300–400 euro për karburant, pagesa për komisione dhe dieta udhëtimi brenda e jashtë vendit. Vetëm gjatë tetorit, deputetët shpenzuan rreth 44 mijë euro për karburant, 19 mijë euro për telefoninë, 139 mijë euro për dieta, 4 mijë euro për qira dhe 750 euro për pasaporta diplomatike. Me pak fjalë, Kuvendi i ri nisi punën me ritëm të lartë… të shpenzimeve, duke dëshmuar se për disa përfaqësues të popullit, mandati është mbi të gjitha një investim i sigurt. Në të njëjtën kohë, qytetarët dëgjojnë se nuk ka fonde për rritje dinjitoze pensionesh apo ndihmë reale për familjet në nevojë. Një Kuvend që nis punën duke u kujdesur me përpikëri për komoditetin e vet, ndërsa pensionistëve u kërkohet durim dhe mirëkuptim se buxheti, siç duket zgjedh gjithmonë pushtetarët që vetëm ngrohin karriget në Kuvend. Listën e plotë të deputetëve dhe përfitimet e tyre e gjeni në web
Një aksident i rëndë ka ndodhur ditën e sotme në Skrapar për shkak të rrugës që është shembur para 3 javësh, por që askujt s’i ka interesuar për të ndërhyrë dhe rregulluar. Një mjet ku udhëtonin tre të rinj ka dalë nga rruga, për shkak të mungesës së sinjalistikës, dhe për pak ka qenë duke rënë në lumë. Një kamionist që po udhëtonte në këtë aks në momentin e aksidentit ka ndërhyrë dhe shpëtuar të rinjtë. Kamionisti Jetnor Merko ka lidhur një litar të fortë në kamionin e tij dhe ka mbajtur pezull makinën e të rinjve deri sa kanë ardhur zjarrfikësit dhe kanë ndërhyrë për t’i shpëtuar. Falë veprimit të tij heroik u shpëtuan 3 jetë njerëzish me një mesazh të qartë: kur institucionet heshtin, njerëz si Jetnori tregojnë se guximi dhe solidariteti mund të bëjnë diferencën mes jetës dhe tragjedisë.
Një qytetare, banore e një pallati në Tiranë, në rrugën “Ferit Xhajko”, i është drejtuar redaksisë tonë me një apel të veçantë në këtë prag festash fundviti. Ajo ka treguar se në pallatin e saj, një grup të moshuarish kanë krijuar një organizatë bamirësie për të ndihmuar familjet në nevojë. Sipas saj grupmosha e tretë e pallatit ka marrë iniciativën për të mbledhur ushqime dhe të tjera ndihma për të shpërndarë tek njerëzit që janë regjistruar pranë zyrës së shoqatës. Sipas saj përpjekjet për të mbledhur ndihma nga bizneset dhe individët kanë qenë të limituara dhe deri tani janë mbledhur pak ushqime. Aktualisht, rreth 400 persona janë regjistruar dhe presin që ndihmat të shpërndahen. Qytetarja shpreh dëshirën që më shumë individë dhe biznese të përfshihen në këtë iniciativë pasi kontribut i vogël mund të bëjë diferencën për familjet në nevojë. Mesazhi i qytetares: Pershendetje, jam banore ne tirane tek rruga ferit xhajko, tek pallati ku banoj jane nje grup te moshuarish qe kane nje organizate bamiresie, me cfare me kane shpjeguar perpiqen te lidhen me biznese te ndryshme per te mbledhur ushqime per familje ne nevoje, por kane arritur shime pak deri tani, po ju shkruaj duke qene se jeni faqja me e ndjekur, nese eshte e mundur ndoshta edhe te vij dikush te diskutoje me zotrerinjte dhe kush ka mundesi te sjellin ushqime, keta jane moshe e trete qe kane menduar kete forme per te ndihumar, kane nje liste te njerezve qe jane regjistruar dhe presin kush ti sjelli ndihma tjua shperndajne, faleminderit 🙂 Atehere ky zotria eshte sekretar tek shoqata, njerezit qe jane ne nevoje vijne tek zyra qe kane ketu. Rregistrohen me ID dhe presin derisa keta te mbeldhin ndihma per tjua shperndare Por me cfare po me tregonte zoteria kete here thuajse nuk kane mundur te mledhin ushqime. Keto jane cfare kane arritur te mbledhin deri tani, ndera me thone qe jane diku tek 400 persona te regjistruar. Elmaz quhet zotëria, numri i tij eshte +355 68 235 2300
Në dhjetor të vitit 2021, JOQ Albania publikoi një investigim që denonconte një nga skandalet më të rënda të zbuluara nga rrjedhja e listë-pagesave të institucioneve shtetërore dhe private. Në fokus të atij lajmi ishte ish-kreu i KESH-it, Benet Beci, i cili rezultonte se kishte paguar me fonde publike dy këshilltarë të huaj, Bassam Abdulibdeh dhe Calvin Tiessen, secilin me rreth 2.3 milionë lekë në muaj. Të dhënat e QKB-së tregonin se këta shtetas ishin ortakë në biznesin “Tirana Training Center” me bashkëshorten e Becit, Fitore Beci, duke ngritur dyshime serioze për konflikt të hapur interesi dhe abuzim me detyrën. Në denoncimin e asaj kohe theksohej se dy shtetasit e huaj kishin ekspertizë në certifikime të gjuhës angleze (TOEFL), ndërkohë që mbetej e paqartë se çfarë kontributi real mund të kishin dhënë si këshilltarë në Korporatën Elektroenergjetike Shqiptare. Rasti u konsiderua si shembull i përdorimit të fondeve publike për interesa personale dhe familjare, në një institucion kyç të sektorit energjetik, i përfshirë prej vitesh në tendera të diskutueshëm. Katër vite më vonë, në dhjetor 2025, Benet Beci u paraqit për herë të fundit në SPAK, ku u informua se hetimet ndaj tij janë mbyllur dhe ai është marrë zyrtarisht i pandehur për shpërdorim detyre lidhur me një tender të KESH-it me vlerë 832 mijë euro. Hetimet nisën nga sekuestrimi i telefonave të ish-kreut të ARRSH-së, Evis Berberi, ku u zbuluan komunikime komprometuese. Në një prej telefonatave flitej për ndarjen e parave të tenderit,, “500 mijë euro për Harvardin, 320 mijë për ne me dy klasë shkollë”, një deklaratë që hedh dritë mbi dyshimet për manipulim fondesh publike dhe i jep peshë denoncimeve të bëra që në vitin 2021 nga JOQ Albania.
Një qytetar nga Lushnja i është drejtuar redaksisë së JOQ Albania duke dërguar pamje filmike që ngrenë dyshime serioze mbi veprimet e efektivëve të Policisë gjatë ndalimit të një automjeti me targa të huaja. Në video shihet momenti kur automjeti ndalohet për një manovër kundërvajtje dhe efektivët i marrin drejtuesit dokumentet e mjetit. Pas disa minutash pritjeje, drejtuesi kthehet pranë automjetit të tij, hap derën dhe duket qartë se merr diçka nga brenda. Pak çaste më pas, ai rikthehet te furgoni i policisë, ku me njërën dorë merr dokumentet, ndërsa me dorën tjetër kryen një veprim dorëzimi drejt efektivit. Objekti që dorëzohet nuk dallohet qartë në pamje, megjithatë veprimi është i ndarë dhe i dallueshëm nga marrja e dokumenteve. Menjëherë pas këtij momenti, procedura mbyllet dhe automjeti largohet, pa u vërejtur veprime të tjera standarde si gjobë apo masa shtesë. Edhe pse pamjet nuk provojnë përfundimisht se bëhet fjalë për ryshfet, sekuenca e veprimeve dhe mbyllja e menjëhershme e situatës kanë ngritur dyshime tek qytetari që ka dërguar videon, i cili kërkon transparencë dhe reagim nga autoritetet. JOQ Albania e publikon këtë material pa ngritur akuza, duke ia lënë vlerësimin institucioneve përkatëse dhe opinionit publik, ndërsa mbetet në pritje të një reagimi zyrtar për të zbardhur të vërtetën e këtij episodi.
Login
