Aktori amerikan Ben Jones, i njohur për rolin e mekanikut të dashur Cutter Davenport në serialin e famshëm “The Dukes of Hazzard”, ka ndërruar jetë në moshën 84-vjeçare. Lajmin e ka bërë të ditur bashkëshortja e tij, Alma Viator, e cila tha se aktori pësoi një atak të rëndë në zemër të dielën. “Humba dashurinë e jetës sime sot”, shkroi ajo në një mesazh prekës, duke kujtuar jetën e pasur dhe të plotë të bashkëshortit të saj. Jones u bë i njohur për publikun amerikan përmes rolit të Cutter Davenport, duke u shfaqur në të shtatë sezonet e “The Dukes of Hazzard”, serial i transmetuar nga CBS nga viti 1979 deri në vitin 1985. Përveç këtij produksioni, ai pati role edhe në filma e seriale të tjera, mes tyre “Smokey and the Bandit”, “Moonrunners” dhe “As the World Turns”. Pas karrierës në ekran, Ben Jones iu përkushtua politikës. Në vitin 1988 ai u zgjodh në Dhomën e Përfaqësuesve të SHBA-së për Distriktin e 4-t të Xhorxhias dhe u rizgjodh në vitin 1990, duke shërbyer për dy mandate në Kongres. Më vonë kandidoi pa sukses kundër republikanit Newt Gingrich. Vdekja e tij shënon ndarjen nga jeta të një figure të njohur të televizionit dhe politikës amerikane.

1882 views

Një video po qarkullon në rrjet, duke përcjellë një nga ato momente që të thyejnë zemrën. Në pamje, një baba përcjell fëmijët e tij, të cilët nisen sërish drejt emigrimit, pas vetëm tri javësh qëndrimi pranë familjes. Mes lotëve dhe ngashërimit, ai dëgjohet duke thënë: “Ikën 3 javët sikur të ishin 3 ditë… rrugë të mbarë, mirëardhshi…” Fjalët mezi dalin nga goja e tij, ndërsa dhimbja e ndarjes duket qartë në çdo moment. Për këtë baba, tri javët pranë fëmijëve kanë kaluar si një çast, ndërsa tani duhet t’i përcjellë sërish larg, me shpresën se do t’i ketë përsëri pranë. Një realitet i dhimbshëm që shumë familje shqiptare e përjetojnë çdo ditë për shkak të emigrimit. Pamjet kanë prekur zemrat e shumë njerëzve në rrjet, pasi pas urimit “rrugë të mbarë” fshihet një dhimbje e madhe. Fëmijët largohen për një jetë më të mirë, ndërsa prindërit mbeten pas me mallin dhe pritjen për takimin e radhës. Një ndarje e zakonshme për shumë familje, por që çdo herë dhemb njësoj.

18.7K views

Saranda po përballet me një situatë shqetësuese sa i përket menaxhimit të mbetjeve urbane. Pamjet e filmuara në orët e para të mëngjesit tregojnë kosha të tejmbushur, mbeturina të shpërndara dhe një erë të rëndë që përhapet në zona të qytetit. Banorët shprehen të revoltuar për gjendjen, veçanërisht në një periudhë kur Saranda është e mbushur me turistë. Problemi nuk lidhet vetëm me mbushjen e koshave, por edhe me pastrimin dhe dezinfektimin e tyre. Banorët kërkojnë më shumë përgjegjësi si nga qytetarët dhe turistët, që shpesh hedhin mbeturinat jashtë vendeve të përcaktuara, ashtu edhe nga institucionet përgjegjëse për pastrimin e qytetit. Pyetja që ngrihet është se sa shpesh pastrohen dhe dezinfektohen koshat pas zbrazjes së tyre. Në kulmin e sezonit turistik, kjo situatë dëmton jo vetëm cilësinë e jetës së banorëve, por edhe imazhin e Sarandës për turistët që e vizitojnë. Banorët kërkojnë ndërhyrje dhe masa konkrete për përmirësimin e situatës, duke theksuar se një qytet turistik i përmasave të Sarandës nuk mund ta konsiderojë këtë gjendje si normale.

11.7K views

Banorët e një pallati pranë zonës së Amerikan 2, denoncojnë zhurmën e shkaktuar nga punimet që zhvillohen ngjitur me banesat e tyre. Sipas tyre, punimet nisin në orare të papërshtatshme dhe vijojnë deri në mesnatë, ndërsa mëngjesin e sotëm kanë nisur që në orën 04:30, me fadroma dhe mjete të rënda, duke prishur qetësinë e banorëve. Banorët bëjnë me dije se kanë telefonuar tre herë Policinë e Shtetit, ku u është thënë se rasti do të raportohej dhe se një patrullë do të mbërrinte brenda pak minutash, por sipas tyre, askush nuk ka mbërritur në vendngjarje. Gjithashtu, është telefonuar edhe Policia Bashkiake, por pa marrë asnjë reagim. Videoja e dërguar nga banorët është regjistruar në orën 05:24 të mëngjesit, pas disa telefonatave në polici. “Një ditë pushimi na kthehet në makth. Nuk po kemi më as të drejta si njerëz, si individë”, shprehen banorët, të cilët kërkojnë ndërhyrjen e institucioneve për të garantuar respektimin e orareve dhe të drejtën për pushim. “Të krijohet përshtypja se shteti nuk ekziston aty ku ka lekë”, shprehen ata.

22.8K views

Në laboratorin e madh të tenderëve publikë, ku personazhet ndërrojnë zyrë, por nuk ndryshojnë kurrë reflekse, në krye të Operatorit të Blerjeve të Përqendruara (OBP) është ulur Jonaid Myzyri. Ish-kreu i Komisionit të Prokurimit Publik vjen në postin e ri me të njëjtat “bëma” mbi supe dhe me episode hetimore nga SPAK, ku një dosje ndaj tij u mbyll, ndërkohë që kallëzime të tjera vazhdojnë të flenë të qeta në sirtarët e verifikimit. Në këtë skenë shfaqet CLEAN FAST e Eriola Likajt, firma e themeluar në vitin 2016 me një kapital prej vetëm 100 mijë lekësh, të cilin e ka që nga dita e themelimit. Likaj zotëron 100% të kuotave, ndërsa aktiviteti i kompanisë është zgjeruar ndër vite nga pastrimi te shërbimet DDD, gjelbërimi, materialet dezinfektuese e deri te pajisjet mjekësore. Por këtu kris misteri i vërtetë, aty ku matematika e tregut dhe logjika e kursimit të parave të shtetit marrin pushimet përgjithmonë. CLEAN FAST rezulton fituese e tenderit për shërbimin në spitalin psikiatrik të Vlorës me një ofertë prej plot 113.286.359 lekësh. Oferta e saj nuk ishte as më e ulëta, as e dyta dhe as e treta: përpara saj ndodheshin plot katër oferta më ekonomike. Më e ulëta ishte 92.968.233 lekë, çka krijon një diferencë prej mbi 20 milionë lekësh të reja, ose rreth 200 mijë euro, me ofertën që në fund u shpall fituese. Me pak fjalë, katër oferta më të lira mbetën rrugës dhe kurora përfundoi te CLEAN FAST, e pesta sipas renditjes së çmimeve nga më i ulëti. Historia bëhet akoma më pikante kur ky do të jetë 4-vjeçari i dytë radhazi që CLEAN FAST fiton këtë tender në spitalin psikiatrik të Vlorës. Një kompani me kapital prej vetëm 100 mijë lekësh që nga themelimi në 2016, por me kontrata multimilionëshe në duar. Në çdo vend normal, një diferencë prej rreth 200 mijë eurosh do të ngrinte pikëpyetje serioze. Këtu katër ofertat më ekonomike mbetën jashtë dhe kurora përfundoi te e pesta. Pyetja është e thjeshtë: pse pikërisht CLEAN FAST?

2845 views

Reagimi i Ujësjellës Kanalizime Durrës për ujin e bërë kaf në Gjirin e Lalëzit është kthyer në një situatë sa qesharake, aq edhe absurde, ku institucioni duket se jeton në një kalendar krejt tjetër nga ne të tjerët. Pas denoncimit ku deti kishte marrë një ngjyrë të dyshimtë, Ujësjellësi doli me një deklaratë zyrtare për të na mbushur mendjen se nuk bëhet fjalë për ujëra të zeza, por për një shfaqje natyrore, ku baticat, zbatica dhe erërat e forta kishin trazuar baltën dhe sedimentet e kanalit. Sipas tyre, impianti punon shkëlqyeshëm 24 orë në 24 dhe gjithçka është nën kontroll të plotë. Por problemi më i madh nuk është ajo që shkruajnë në letër, por fotot që kanë zgjedhur për të vërtetuar pafajësinë e tyre, të cilat i rrëzojnë poshtë me faqen e parë. Për të treguar se si po monitorojnë situatën në këtë vapë gushti, ata kanë publikuar pamje ku tekniko-shkencorët e tyre janë veshur me pallto të trasha, xhaketa laboratorike dhe me trupin të mbështjellë mirë nga i ftohti, ndërsa në sfond pemët janë krejtësisht të zhveshura dhe të thara, fiks si në mes të dimrit. Kështu, ndërkohë që qytetarët dhe turistët po digjen nga dielli në plazh dhe përballen me ujëra të dyshimta, Ujësjellësi i Durrësit na sjell prova me xhaketa dimri dhe peizazhe ngricash, duke na lënë të kuptojmë se, për ta, sezoni turistik dhe pastërtia e detit mund të zgjidhen fare mirë duke kthyer orën e kohës pas, në muajin janar.

17.3K views

Një tjetër denoncim ka mbërritur në redaksinë e JOQ Albania për problematika me kompaninë ajrore Wizz Air, këtë herë nga pasagjerë që ndodhen në aeroportin London Luton dhe presin prej rreth 12 orësh për të udhëtuar drejt Tiranës. Sipas denoncuesit, fluturimi London Luton–Tiranë është shtyrë vazhdimisht, me intervale prej 3-4 orësh, ndërsa pasagjerët kanë mbetur në aeroport pa një informacion të qartë se çfarë po ndodh. Pritja, sipas tij, ka nisur që prej orës 13:00 dhe fluturimi është shtyrë vazhdimisht, duke e çuar kohën e qëndrimit në aeroport në rreth 12 orë. Situata është edhe më e vështirë për familjet që ndodhen mes pasagjerëve. “Këtu ka fëmijë të vegjël me prindër dhe 12 orë po kthehen në torturë në aeroport”, shkruan qytetari. Denoncuesi pretendon gjithashtu se në aeroport nuk ka një sportel të Wizz Air ku pasagjerët të mund të marrin informacion mbi situatën. “Askush nuk jep shpjegim për asgjë”, shprehet ai, duke shtuar se në aeroport ndodhen edhe pasagjerë të tjerë shqiptarë dhe se dy fluturime drejt Shqipërisë janë devijuar. Sipas tij, edhe përmes numrit të kontaktit të kompanisë nuk ka mundur të marrë një përgjigje konkrete. Telefonata e orienton drejt një sistemi automatik dhe më pas drejt chat-it, ndërsa përgjigjet që ka marrë aty, sipas tij, kanë qenë automatike. “Chati dërgon përgjigje robotike”, pretendon denoncuesi. Ky është një tjetër rast i raportuar në redaksinë e JOQ Albania për probleme me fluturimet e Wizz Air, përfshirë vonesa dhe anulime, ku pasagjerët shprehen të pakënaqur me mënyrën e komunikimit dhe informimit nga kompania. Në rastin konkret, qytetarët pretendojnë se kanë kaluar orë të tëra në aeroport, mes tyre edhe familje me fëmijë të vegjël, pa marrë një sqarim të qartë mbi arsyen e vonesës dhe kohën e nisjes. JOQ Albania mbetet në pritje të një reagimi nga Wizz Air për arsyen e situatës së krijuar me fluturimin London Luton–Tiranë dhe për informacionin që u është dhënë pasagjerëve.

74.1K views

Një ditë vere që po e kalonte me familjen në plazhin e Long Branch në New Jersey, për Xhemal Lanicën u shndërrua papritur në një moment që, siç tregon vetë, do ta kujtojë gjatë gjithë jetës. Shqiptari nga Ulqini, i cili jeton prej vitesh në Shtetet e Bashkuara të Amerikës, ndodhej në plazh me familjen kur dëgjoi britma që vinin nga deti. “HELP! HELP!”, dëgjoi ai të thërriste një burrë që ndodhej në vështirësi në ujë. Lanica tregon se menjëherë pa drejtimin e britmave dhe vuri re një burrë rreth të 50-ave, i cili po përballej me rrezikun e mbytjes. Pa humbur kohë, ai u fut në det për t’i ardhur në ndihmë, ndërsa pak çaste më vonë në operacionin e shpëtimit u përfshinë edhe rojet bregdetare të Long Branch Beach. Ajo që pasoi zgjati më shumë se 10 minuta, gjatë të cilave Lanica dhe ekipet e shpëtimit punuan së bashku për ta nxjerrë burrin në breg. Në fund, përpjekja rezultoi e suksesshme. Burri u nxor në breg i gjallë dhe jashtë rrezikut. Lanica ka ndarë me JOQ Albania edhe videon e momentit të shpëtimit, ndërsa në rrëfimin e tij shprehet se kjo ngjarje i kujtoi edhe një herë se sa e paparashikueshme mund të jetë jeta. Ai vlerëson veçanërisht reagimin e rojeve bregdetare, të cilët iu bashkuan menjëherë përpjekjes për shpëtimin e burrit. “Jam mirënjohës që u gjenda aty në atë moment, që munda të veproja kur dikush kishte më së shumti nevojë për ndihmë dhe që pata mundësinë të isha pjesë e atij ekipi shpëtimi”, shprehet Lanica. Xhemal Lanica është kryetar i Shoqatës Shqiptaro-Amerikane të Ulqinit në New York dhe është vlerësuar më herët nga Këshilli Bashkiak i New York-ut me titullin “Qytetar Nderi” në moshën 26-vjeçare, duke u bërë shqiptari më i ri në SHBA me këtë titull prestigjoz. I ardhur në SHBA nga Ulqini në vitin 2018, Lanica është angazhuar në përfaqësimin e komunitetit shqiptar dhe në aktivitete në mbështetje të shqiptarëve në Mal të Zi. Këtë herë, megjithatë, historia e tij vjen nga një tjetër moment: një ditë e zakonshme në plazh, e cila për pak minuta u kthye në një përpjekje për të shpëtuar jetën e një njeriu.

46.7K views

Edhe pas protestave dhe ngritjes qytetare për një Shqipëri me kushte dinjitoze, në një kohë kur pushteti nuk resht së premtuari një vend gjithnjë e më “europian”, realiteti në zemër të kryeqytetit vazhdon të tregojë tjetër gjë. Rruga e Elbasanit dhe Rruga e Kavajës zhyten në errësirë, ndërsa dritat ikin në mes të Tiranës. Europa premtohet me fjalë, por Tirana fiket me një çelës.

23.7K views

Një qytetar i është drejtuar sërish redaksisë sonë me pamje nga Krasta e Krujës, ku denoncon një situatë që, sipas tij, po përsëritet prej kohësh pranë guroreve të zonës. Në videot e fundit të dërguara prej tij shihen vatra zjarri aktive dhe tym që ngrihet nga terreni, ndërsa qytetari ngre dyshime serioze se zjarret mund të lidhen me aktivitetin e guroreve dhe mënyrën se si po shfrytëzohet zona. Ai thotë se zjarri ka qenë aktiv prej rreth dy orësh dhe se zjarrfikësja nuk ka mundur të hyjë në zonë, për shkak të terrenit të vështirë. Sipas tij, vatra ndodhet pranë guroreve në Krastë dhe situata është veçanërisht shqetësuese për shkak të përmasave që mund të marrë zjarri në një territor të thatë dhe të ekspozuar. Por denoncimi bëhet edhe më serioz nga fakti se nuk bëhet fjalë për rastin e parë. I njëjti qytetar na ka dërguar edhe rreth dy muaj më parë pamje nga e njëjta zonë, ku, sipas pretendimeve të tij, pranë guroreve ndizeshin sërish zjarre. Pra, qytetari pretendon se kemi të bëjmë me një problem të përsëritur dhe jo me një vatër të rastësishme të shfaqur vetëm sot. Kjo situatë merr një tjetër peshë sidomos pas zjarrit të rëndë që përfshiu dje Krujën, duke djegur sipërfaqe të konsiderueshme dhe duke vënë në alarm banorët dhe strukturat e emergjencës. Vetëm një ditë më pas, shfaqja e një tjetër vatre në zonën e Krastës, pranë guroreve, e bën situatën shumë më delikate dhe kërkon reagim të menjëhershëm. Qytetari kërkon që autoritetet të mos mjaftohen vetëm me shuarjen e flakëve, por të verifikojnë edhe shkaqet e përsëritjes së zjarreve, aktivitetin e guroreve në zonë dhe pretendimet se terreni po dëmtohet për t’u shfrytëzuar më tej. Ai shprehet i revoltuar se, sipas tij, zona po “masakrohet” dhe kërkon që institucionet përgjegjëse të kontrollojnë çfarë po ndodh konkretisht në terren.

16.8K views

Një qytetar i është drejtuar redaksisë së JOQ Albania me një denoncim për gjendjen e rënduar të higjienës në Kavajë. Në hapësirat përpara pallateve, në rrugë dhe në oborre mungojnë koshat e mbeturinave, ndërsa plehrat janë grumbulluar në sasi të mëdha. Pamjet e dërguara në redaksi tregojnë mbetje të shpërndara në ambientet përreth, në një periudhë kur temperaturat e larta e bëjnë situatën edhe më shqetësuese. Në kulmin e sezonit turistik, kur zona frekuentohet nga banorë dhe pushues, grumbujt e mbetjeve jo vetëm dëmtojnë rëndë pamjen e qytetit, por krijojnë edhe kushte të papërshtatshme higjieno-sanitare. Në temperatura ekstreme, mbeturinat e lëna për ditë me radhë mund të kthehen në burim aromash të rënda dhe të favorizojnë praninë e insekteve dhe brejtësve, duke e bërë problemin edhe më shqetësues për banorët dhe pushuesit. “Këto pamje janë para një pallati përballë Ramses Hotel dhe afër Bonita Hotel SPA. Nuk ka kosha mbeturinash dhe rrugët dhe oborret e pallateve janë plot me mbeturina, siç e shihni në video. I bëj thirrje Bashkisë Kavajë të marrë masa për situatën e rënduar në kulmin e sezonit. Ju lutem ta publikoni”, shkruan qytetari. Tashmë mbetet për t’u parë nëse Bashkia Kavajë me kryetar demokratin Fisnik Qosja do të ndërhyjë për pastrimin e zonës dhe vendosjen e koshave të mbeturinave, apo do t’i lërë plehrat të vazhdojnë të bëjnë “sehir” mes temperaturave përvëluese dhe sezonit turistik.

4909 views

Një qytetare ka kontaktuar redaksinë tonë për të raportuar humbjen e një unaze me vlerë të rëndësishme sentimentale, e cila, sipas saj, është marrë nga një grua në ambientet e Rossmann, në qendrën tregtare Ring Center. Ngjarja ka ndodhur ditën e martë, rreth orës 19:15–19:30. Sipas qytetares, ndërsa ishte duke kryer pagesën, i ka rënë aksidentalisht unaza në momentin që ka hequr çelësin e sirtarit ku kishte vendosur çantën. Ajo thotë se rreth 5–10 minuta më vonë, një grua e ka gjetur unazën poshtë kasës, por, në vend që ta dorëzonte te kasa apo te sigurimi i qendrës e ka marrë dhe është larguar. Qytetarja kërkon që personi që e ka gjetur unazën të kontaktojë për ta kthyer atë. Ajo shprehet se disponon faturën e blerjes dhe certifikatën e unazës, ndërsa paralajmëron se çështja mund të ndiqet në rrugë ligjore. Nëse dikush e njeh personin në fjalë ose ka informacion mbi ngjarjen, lutemi të kontaktojë qytetaren ose redaksinë. Mesazhi i qytetares: Ju lutem kam nevoje te me postoni nje grua e cila ka vjedhur unazen time ne Rossman, ne qendren Ring Center diten e marte rreth ores 19:15 -19:30. Eshte unaze me vlere te rendesishme sentimentale dhe personi te kontaktoje per ta kthyer unazen sepse do ndiqet ne menyre penale. Kam qene duke paguar tek Rossmani ne qendren tregtare Ring Center dhe ne gishtin e unazes kam pasur celsin e sirtarit qe vendos canten kur futesh te Rossmani Kur kam terhequr celsin me ka rene dhe unaza, 5-10 minuta me vone poshte kases e ka marre zonja Nuk ka njoftuar te kasa, as te sigurimi i qendres por ka pervetesuar unazen time dhe eshte larguar duke buzeqeshur Cdo dite qe kalon eshte mundesia qe ajo mund ta shese si unaze Une disponoj faturen qe e kam blere dhe certifikaten e unazes

2746 views

Familja e Flamur Lulos, 68 vjeç, ka bërë apel për ndihmë për gjetjen e tij, pasi ai rezulton i humbur që prej ditës së djeshme në zonën e Kombinatit, në Tiranë. Sipas familjarëve, 68-vjeçari është parë për herë të fundit rreth orës 15:00, pranë pallateve në Kombinat. Të afërmit shprehen të shqetësuar për fatin e tij, ndërsa bëjnë me dije se Flamur Lulo vuan nga demenca, çka e bën edhe më të rëndësishëm lokalizimin e tij sa më shpejt. Në momentin e largimit, ai kishte veshur kanotierë gri, pantallona të shkurtra blu dhe shapka blu. Familjarët thonë se janë interesuar pranë Policisë, ndërsa kërkojnë ndihmën e qytetarëve për çdo informacion që mund të çojë në gjetjen e 68-vjeçarit. Kushdo që e ka parë Flamur Lulon ose ka informacion mbi vendndodhjen e tij, lutet të telefonojë në numrin: 068 329 2174.

6859 views

Vizita e Volodymyr Zelenskyt në Beograd ka sjellë në vëmendje një qëndrim të Ukrainës që për Kosovën mbetet i pandryshuar. Pas takimit me Aleksandër Vuçiç, presidenti ukrainas konfirmoi se Kievi nuk e njeh pavarësinë e Kosovës dhe vazhdon të respektojë integritetin territorial të Serbisë. Një deklaratë që vjen në një moment kur Beogradi përpiqet të ruajë ekuilibrat mes Moskës, Kievit dhe Brukselit, ndërsa marrëdhëniet me Ukrainën po marrin një dimension të ri diplomatik. Por deklarata e Zelenskyt ngre një pyetje të pashmangshme për Tiranën zyrtare: çfarë do të thotë kjo për gjithë entuziazmin shqiptar ndaj presidentit ukrainas? Shqipëria e ka mbështetur fuqishëm Ukrainën, ndërsa Zelensky është pritur në Tiranë me tapet të kuq, fotografi, buzëqeshje dhe deklarata për miqësinë mes dy vendeve. Por kur i njëjti president shkon në Beograd dhe përsërit një qëndrim që i shkon për shtat Serbisë, duket se në Tiranë kamerat heshtin dhe diplomacia bëhet papritur më e kursyer. Mbështetja për Ukrainën në luftën kundër agresionit rus është një çështje më vete, por kjo nuk e pengon Shqipërinë të ketë një qëndrim të qartë për Kosovën. Nëse Tirana di të organizojë pritje madhështore dhe të fotografohet me Zelenskyn, ndoshta duhet të dijë edhe të bëjë pyetjet e pakëndshme. Sepse miqësia diplomatike nuk duhet të nënkuptojë heshtje sa herë që Kievi përsërit një qëndrim që Beogradi e konsideron dhuratë. Tani mbetet për t’u parë nëse Tirana do të reagojë apo do të zgjedhë, edhe këtë herë, të mos prishë fotografinë.

5742 views

Pak ditë më parë, kryeministri Edi Rama shprehu solidaritetin e Shqipërisë me zjarrfikësit e Spanjës dhe Francës. Ai u u qau hallin zjarrfikësve atje që kanë rroga më të mira në Shqipëri, duke shprehur se po të jetë nevoja do tu shkojë në ndihmë. Ndërkohë, vetëm pak ditë më pas, në Krujë ishin zjarrfikësit shqiptarë ata që u përballën me “flakët e ferrit” për rreth 16 orë, duke luftuar për të mbrojtur banesat dhe qytetarët nga një zjarr që kërcënoi zona të banuara, një pikë shpërndarjeje gazi dhe madje edhe Spitalin e Krujës. Mes tymit, temperaturave të larta dhe terrenit të vështirë, zjarrfikësit qëndruan në vijën e parë pa u tërhequr. Pa luksin e mjeteve dhe kushteve ideale, por me përgjegjësinë e madhe përballë tyre, ata luftuan orë pas ore që flakët të mos merrnin shtëpitë e qytetarëve. Ndonëse zjarrfikësit ishin heronjtë e ferrit në Krujë, Rama nuk denjoi të ngrihet nga shezlloni dhe të lërë pushimet për tu qarë hallin zjarrfikësve shqiptarë. Qindra banorë u evakuuan, pacientët e spitalit u dërguan drejt Tiranës, ndërsa forcat zjarrfikëse dhe të tjera vijuan betejën gjatë gjithë natës. Në fund, fotografitë e tyre nga terreni tregojnë më shumë se çdo deklaratë, fytyra të lodhura, uniforma të mbuluara nga tymi dhe njerëz që nuk e kishin luksin të dorëzoheshin. Prandaj, sot vëmendja duhet të jetë te heronjtë që ishin këtu, ata që për 16 orë u përballën me zjarrin për të mbrojtur jetën dhe pronën e qytetarëve. Është e drejtë që Shqipëria të solidarizohet me zjarrfikësit e vendeve europiane, por po aq e drejtë është që zjarrfikësit shqiptarë të kenë pajisjet, mjetet, kushtet dhe vlerësimin që meritojnë. Sepse kur flakët mbërritën në Krujë, nuk ishte Rama që u fut në zjarr. Ishin ata, zjarrfikësit hero më të keqpaguarit në Shqipëri.

10.4K views

Kruja kaloi orë të tmerrshme nën pushtetin e flakëve, teksa zjarri u përhap me shpejtësi drejt zonave të banuara, hyri në oborret e shtëpive dhe iu afrua magazinave, një pike të shpërndarjes së gazit dhe vetë Spitalit të Krujës. Qindra banorë u evakuuan, ndërsa disa u nxorën me forcë nga banesat pasi refuzuan të largoheshin. Zjarri u afrua deri në rreth 50 metra nga spitali, duke detyruar evakuimin e pacientëve drejt Tiranës. Përballë kësaj situate, frika pushtoi qytetin, ndërsa flakët kërcënuan banesat dhe jetën e banorëve. Por në mes të kësaj panorame, heronjtë e vërtetë të kësaj beteje ishin zjarrfikësit, të cilët luftuan për rreth 16 orë pa pushim për të mbajtur flakët larg banesave dhe për të shpëtuar pasuritë e qytetarëve. Në terren të vështirë, mes temperaturave të larta, tymit dhe rrezikut të drejtpërdrejtë për jetën e tyre, ata vijuan punën bashkë me Forcat e Armatosura dhe strukturat e tjera të angazhuara. Burra që përballen çdo ditë me rrezikun, shpesh me paga që nuk pasqyrojnë peshën e përgjegjësisë që mbajnë mbi supe, u gjendën sërish të parët përballë flakëve. Zjarri tashmë është vënë nën kontroll, por ngjarja ngre pikëpyetje të forta për kapacitetet dhe gatishmërinë e shtetit për t’u përballur me emergjenca të tilla. Për ngjarjen është arrestuar Qemal Berhami, i dyshuar se kishte ndezur barishte pranë banesës së tij dhe më pas flakët dolën jashtë kontrollit. Fatmirësisht nuk raportohet për persona të lënduar. Në fund të kësaj beteje, ndërsa përgjegjësitë institucionale duhen hetuar, një gjë mbetet e padiskutueshme: kur qyteti u vu në rrezik, ishin zjarrfikësit ata që për 16 orë u përballën me “flakët e ferrit” për të mbrojtur jetën dhe shtëpitë e qytetarëve.

6953 views

Një situatë shqetësuese është denoncuar nga një banore e Gradishtës, e cila thotë se prej kohësh po përballet me sulmet e vazhdueshme të dhelprave ndaj minifermës së saj. Sipas saj, vetëm gjatë këtij viti kafshët e egra i kanë vrarë më shumë se 600 zogj, duke i shkaktuar një dëm të konsiderueshëm ekonomik familjes. Banorja thotë se minifermën e vogël e mban për të siguruar të ardhurat dhe ushqimin e familjes, ndërsa tashmë ndihet e pafuqishme përballë situatës. Problemi, sipas denoncimit, nuk është thjesht humbja e shpendëve, por edhe mungesa e një zgjidhjeje konkrete për banorët. Familja kërkon që institucionet përgjegjëse të verifikojnë situatën në terren dhe të përcaktojnë se çfarë masash mund të merren për mbrojtjen e fermave, pa cenuar faunën e egër. Rasti i është drejtuar redaksisë si një apel për Bashkinë Divjakë dhe strukturat përgjegjëse për faunën e egër, që të ndërhyjnë dhe t’u japin banorëve një zgjidhje ligjore dhe praktike. “Përshëndetje JOQ, ju lutem e publikoni pak këtë video. Jam një banore e Mehallës Gradishtë. Kam një minifermë të vogël ku mundohemi të mbijetojmë, sepse të themi që po jetojmë, gënjejmë. Çfarë të bëjmë me dhelprat që janë bërë si të buta? Më kanë ngrënë sivjet më shumë se 600 zogj, gati për t’i therur. Ku të ankohemi ne, ku të trokasim? Ju lutem, i bëjmë thirrje shtetit të kthejë ndonjëherë kokën nga fshatrat që po braktisen çdo ditë e më shumë”, shkruan qytetarja në mesazhin e dërguar në redaksi.

13.6K views

Një qytetar ka dërguar në redaksinë e JOQ Albania një video ku shihet një drejtues automjeti tip Audi duke kryer manovra të rrezikshme në rrugë, në hyrje të Lushnjës. Në pamje, shoferi lëviz në mënyrë të përsëritur në formë zig-zag, duke krijuar situata të rrezikshme për automjetet e tjera që qarkullojnë në rrugë. Manovrat e tij mund të shkaktojnë një aksident të rëndë, duke vënë në rrezik jo vetëm drejtuesit e tjerë, por edhe jetën e tij. “Shikoni çfarë bën ky autostrada në hyrje të Lushnjës”, shkruan qytetari që ka dërguar videon. Sjellje të tilla në rrugë përbëjnë një rrezik serioz për sigurinë e të gjithë përdoruesve të rrugës dhe kërkojnë ndërhyrjen e autoriteteve.

20.6K views

Një qytetar i është drejtuar redaksisë së JOQ Albania për të denoncuar gjendjen e krijuar në lagjen e tyre, ku një sasi e madhe mbeturinash është grumbulluar prej ditësh në një hapësirë pranë zonave të banuara. Në pamjet e dërguara në redaksi shihet një grumbull i konsiderueshëm mbetjesh, mes tyre qese plastike, mbeturina shtëpiake, kartona dhe materiale të tjera të hedhura në ambient të hapur. Pranë tyre shihet edhe një qen. Sipas banorëve, situata është bërë e padurueshme për shkak të erës së rëndë dhe papastërtisë, ndërsa shqetësimi është edhe më i madh për fëmijët dhe të moshuarit që jetojnë në zonë. “Në lagje janë grumbulluar shumë mbeturina dhe situata është bërë e padurueshme. Mbeturinat qëndrojnë prej ditësh, era e keqe dhe papastërtia janë bërë shqetësim për të gjithë banorët, sidomos për fëmijët dhe të moshuarit.”, shkruan qytetari. Banorët kërkojnë ndërhyrjen e institucioneve përgjegjëse për largimin e mbeturinave dhe pastrimin e zonës, duke ngritur edhe shqetësimin se paguajnë taksa dhe tarifa për shërbime publike, por përballen me një situatë të tillë. Në Shqipëri, organizimi i shërbimit të grumbullimit, transportit dhe trajtimit të mbetjeve urbane është përgjegjësi e njësive të qeverisjes vendore. Banorët shpresojnë që publikimi i denoncimit të sjellë reagimin e institucioneve dhe ndërhyrjen për pastrimin e hapësirës. JOQ Albania publikon shqetësimin e qytetarëve dhe mbetet e hapur për një reagim nga institucionet përgjegjëse.

9934 views

Një sherr mes disa të rinjve ka ndodhur mbrëmjen e kësaj të shtune në qendër të Durrësit, në sheshin “Iliria”. Dëshmitarë nga vendngjarja raportojnë për JOQ Albania se disa të rinj kanë zbritur nga automjetet dhe janë përfshirë në një përleshje fizike në mes të rrugës. Të rinjtë konfrontohen fizikisht me njëri-tjetrin për disa momente, ndërsa në një moment njëri prej tyre shihet i shtrirë në tokë, teksa tjetri e godet. Nuk dihen ende shkaqet e konfliktit, ndërsa mbetet e paqartë nëse ka persona të lënduar si pasojë e përplasjes. Ngjarja ka ndodhur në një nga zonat më të frekuentuara të qytetit, duke krijuar shqetësim për qytetarët dhe pushuesit që ndodheshin në qendër të Durrësit.

15K views