Një qytetar i është drejtuar redaksisë së JOQ Albania për të denoncuar problemin e parkimeve të automjeteve në një prej rrugëve të Vlorës, ku, sipas tij, qarkullimi është vështirësuar ndjeshëm. Bëhet fjalë për një rrugë me dy korsi, por automjetet e parkuara vazhdimisht në të dyja anët e rrugës bëjnë që në praktikë të mbetet vetëm një hapësirë e ngushtë për qarkullim. Në pamjet e dërguara në redaksi shihen automjetet e parkuara përgjatë rrugës, duke kufizuar hapësirën e lëvizjes dhe duke e bërë të vështirë kalimin, veçanërisht për autobusët, furgonët dhe automjetet e tjera të mëdha. “Kam vetëm një pyetje për kryetaren e Bashkisë Vlorë: Si mendon se mund të zgjidhet problemi i kësaj rruge?” Qytetari thotë se situata ka krijuar trafik dhe vështirësi të përditshme për banorët dhe drejtuesit e mjeteve, ndërsa pretendon se për këtë problem janë bërë ankesa të shumta. “Bëhet fjalë për një rrugë me dy korsi, por për shkak të makinave që parkohen vazhdimisht anash, në praktikë mbetet vetëm një korsi e lirë për qarkullim. Kjo krijon trafik, vështirësi në kalim dhe probleme çdo ditë.” Sipas denoncuesit, nuk bëhet fjalë për një problem të panjohur për institucionet vendore, ndaj ai kërkon një zgjidhje konkrete për parkimin dhe lirimin e korsive të qarkullimit. “Nuk kërkojmë shumë, vetëm një përgjigje dhe një zgjidhje konkrete: Çfarë duhet të bëjnë qytetarët që kjo situatë të marrë fund?” JOQ Albania publikon shqetësimin e qytetarit dhe pamjet e dërguara, ndërsa mbetet e hapur për një reagim nga Bashkia Vlorë lidhur me problematikën e parkimit dhe qarkullimit në këtë zonë.

12.3K views

Një ngjarje e rëndë ka ndodhur sot në burgun e Lleida Ponent në Katalonjë të Spanjës, ku sipas burimeve nga brenda burgut për JOQ Albania një djalë i ri shqiptar nga veriu i Shqipërisë, me inicialet J.B., ka humbur jetën. Paraprakisht dyshohet se i riu i ka dhënë fund jetës brenda qelisë. Në këto momente të vështira, i shprehim ngushëllimet më të sinqerta familjes dhe të afërmve të tij. Kjo tragjedi ka bërë që të shpërthejë revolta dhe shqetësimi te shqiptarët e tjerë që vuajnë dënimin në këtë institucion. Përmes një mesazhi të mbërritur në redaksinë e JOQ Albania, bashkëvuajtësit e J.B. ngrenë zërin për kushtet dhe braktisjen totale nga institucionet shqiptare. Sipas të dhënave nga brenda burgut, aktualisht në Lleida Ponent ndodhen rreth 50 shtetas shqiptarë, të cilët përballen çdo ditë me: Zvarritje ekstremisht të gjata të proceseve gjyqësore nga drejtësia vendase. Vonesa të pafundme dhe probleme procedurale gjatë procesit të dëbimit drejt Shqipërisë. Mungesë totale informacioni dhe mbrojtjeje për të drejtat e tyre elementare. Ajo që e rëndon edhe më shumë gjendjen e tyre psikologjike është mungesa e plotë e kontaktit me përfaqësitë diplomatike shqiptare në Spanjë. Të dënuarit theksojnë se nuk kërkojnë asnjë privilegj, por vetëm mbështetjen ligjore e konsullore që i takon çdo shtetasi shqiptar jashtë vendit. "Nuk po kërkojmë privilegje, kërkojmë vetëm të dëgjohemi e të informohemi. Ndoshta ky rast tragjik duhet të shërbejë si një moment reflektimi, që zëri i shqiptarëve në burgjet e huaja të mos dëgjohet vetëm kur ndodh një tragjedi," shkruajnë ata. JOQ Albania i bën thirrje publike organeve kompetente të reagojnë urgjentisht!

9129 views

Një qytetar i është drejtuar redaksisë së JOQ Albania për të denoncuar një situatë të përsëritur në Paskuqan, ku mjete të rënda të një kantieri ndërtimi bllokojnë rrugën kryesore gjatë punimeve. Sipas denoncuesit, dy betonierë kanë qëndruar në mes të rrugës gjatë orëve të ditës, duke vështirësuar ndjeshëm kalimin e automjeteve dhe këmbësorëve. Në pamjet e dërguara në redaksi shihen betonierët pranë kantierit, ndërsa automjetet e tjera detyrohen të kalojnë në një hapësirë të ngushtë mes mjeteve të rënda dhe zonës së punimeve. Qytetari pretendon se në vendngjarje nuk kishte persona që të koordinonin trafikun apo të orientonin qytetarët gjatë kalimit. “Në Paskuqan as nuk pyesin fare. Në mes të drekës betonierët në mes të rrugës, as komandim nga dikush që të udhëzojë qytetarët. Dy betonierë bllokojnë rrugën sikur ta kenë pronë të vet.” Sipas tij, situata krijon rrezik për drejtuesit e automjeteve dhe këmbësorët, veçanërisht për shkak të mungesës së sinjalistikës dhe koordinimit me trafikun. Denoncuesi shpreh gjithashtu shqetësimin për mënyrën se si zhvillohen punimet në zonat urbane, duke pretenduar se interesat e kantierëve shpesh vendosen përpara sigurisë dhe qarkullimit të qytetarëve. JOQ Albania publikon pamjet dhe shqetësimin e qytetarit, ndërsa mbetet e hapur për një reagim nga subjektet përgjegjëse për punimet dhe institucionet që mbikëqyrin menaxhimin e trafikut dhe sigurinë në këtë zonë.

20.7K views

Oligarku shqiptar 53-vjeçar i fushës së ndërtimit dhe energjisë, Ilir Shtufi, i arrestuar më 12 qershor në Selanik, ka hedhur poshtë akuzat e SPAK-ut për pastrim parash dhe ka bërë një deklaratë të fortë në lidhje me çështjen. Sipas tij, procedimi penal ndaj tij nuk lidhet me aktivitetin kriminal, por është i motivuar politikisht nga kryeministri Edi Rama dhe se është në shënjestrën e tij. Gjatë seancës në gjykatën e apelit në Selanik, biznesmeni ka kundërshtuar akuzat dhe ka pretenduar se është vënë në shënjestër për arsye politike. Ai ka deklaruar se kishte udhëtuar drejt Greqisë për të marrë pjesë në një festë dhe se nuk ishte përpjekur t’i fshihej drejtësisë, pavarësisht urdhërarrestit ndërkombëtar të lëshuar nga autoritetet shqiptare. Sipas SPAK-ut, 53-vjeçari dyshohet se ka qenë pjesë e një rrjeti që gjatë viteve 2018–2023 ka pastruar miliona euro, dollarë dhe peso, ndërsa hetimi lidhet me një grup të dyshuar për trafikimin e kokainës nga Amerika Latine drejt Europës. Pretendimet e biznesmenit për motivim politik mbeten pjesë e deklarimeve të tij dhe do të duhet të vlerësohen nga organet gjyqësore. Kompanitë e lidhura me Shtufin janë përmendur për tendera dhe marrëdhënie biznesi gjatë viteve të qeverisjes së Sali Berishës. Një element që është raportuar është lidhja e tij me Shkëlzen Berishën, ndërsa kompania “Euroteorema Peqin”, me të cilën Shtufi u bashkua për Lotin 4 të Unazës. Kompanitë e Shtufit kanë marrë tendera të rëndësishëm nga institucionet publike. Një prej rasteve më të mëdha është Loti 4 i Unazës së Madhe, me vlerë rreth 20–22 milionë euro, i fituar në vitin 2021 nga bashkimi “Euroteorema Peqin – Nova Construction 2012 – PE-VLA-KU”. Ky tender është aktualisht pjesë e hetimeve të SPAK, ku dyshohet se procedura është orientuar dhe se Shtufit i është kërkuar të bashkëpunojë me një kompani të caktuar.

9174 views

Pak ditë më parë, një qytetar iu drejtua redaksisë së JOQ Albania për të denoncuar gjendjen e një segmenti të Unazës së Madhe, në pjesën veriore, pranë Urës së Paskuqanit. Në pamjet e dërguara, dukej nyja metalike e zgjerimit në pjesën e urës, e cila ishte dëmtuar dhe paraqiste hapësira e sipërfaqe të pabarabarta. Automjetet që kalonin mbi të pësonin goditje të forta, duke shkaktuar shqetësim për drejtuesit dhe pasagjerët. Pas publikimit të denoncimit nga JOQ Albania, sot kanë mbërritur punonjësit për të ndërhyrë dhe për të riparuar pjesën e dëmtuar. Shpresojmë që ndërhyrja të përfundojë siç duhet dhe segmenti të rikthehet në një gjendje të sigurt për qarkullimin.

34.5K views

Vrasja e turistit portugez Luis Miguel Varela Mendes në Ksamil po merr përmasa të reja, ndërsa hetimet e autoriteteve janë shtrirë edhe te personat që lidhen me lokalin ku ndodhi ngjarja. Në kërkim është shpallur Bekim Bulica, i cili rezulton i lidhur me lokalin “Principotes”, ku ndodhi konflikti fatal. Krahas tij, policia ka shoqëruar 42 persona, mes tyre punonjës dhe klientë të kompleksit luksoz, me qëllim zbardhjen e plotë të rrethanave dhe të dinamikës së ngjarjes. Për vrasjen e 20-vjeçarit portugez është arrestuar 29-vjeçari Sokrat Vata. Ai u kap disa orë pas krimit në aksin Levan-Fier, teksa dyshohet se ishte fshehur në bagazhin e një automjeti. Bulica rezulton të jetë pronari në hije i hotelit të njohur në Ksamil, ndërsa në dokumentet zyrtare pronare figuron nëna e tij, Kade Bulica, 72 vjeçe. Por pas vrasjes, emri i Bekim Bulicës rikthehet në vëmendje edhe për shkak të raportimeve të mëparshme mbi aktivitetin kriminal që i atribuohet rrjetit të tij. Raportime mediatike kanë ngritur dyshime për lidhje me trafikun ndërkombëtar të drogës dhe pastrimin e parave, ndërsa janë përmendur edhe informacione të përcjella nga autoritetet franceze te strukturat shqiptare. Më 24 prill 2025, gazeta franceze “Le Parisien” raportoi për një rrjet shqiptar që operonte dy struktura të shpërndarjes së drogës në Paris dhe periferi. Tetë persona, shtatë shqiptarë dhe një francez, u vunë nën akuzë për trafik narkotikësh, pastrim parash dhe organizatë kriminale. Më 20 shkurt 2026, “Le Parisien” raportoi një tjetër operacion në Paris dhe Hauts-de-Seine, ku tre shtetas shqiptarë u vunë nën akuzë për trafik kokaine dhe organizatë kriminale. Hetuesit sekuestruan rreth 2 kilogramë kokainë, ndërsa grupi dyshohej se funksiononte si një lloj “centrale porosish”, me shpërndarje të drogës në banesa. Këto hetime franceze lidhen me një rrjet më të gjerë ku përmendet edhe emri i Bekim Bulicës, duke ngritur pikëpyetje mbi aktivitetin e tij dhe mbi informacionet që dyshohet se kanë mbërritur në Shqipëri.

103.7K views

Lidhjet e tij me Francën duket të jenë të forta. Klubi i natës në Principotes, mban një emër francez “La Guerre” (Lufta), ndërsa çdo të hënë, sipas njoftimeve në rrjetet sociale, organizohen “Netët franceze”. Pikërisht mbrëmjen e djeshme, ishte ftuar një DJ francez. “Principotes” rezulton e regjistruar në emër të Kade Bulicës, 71-vjeçare nga Kukësi, e cila është nëna e Bekim Bulicës. Emri i këtij të fundit është përmendur më herët në kronikat kriminale. Në shkurt 2021, Bulica u ekstradua nga Franca, pasi ishte shpallur në kërkim ndërkombëtar në lidhje me një vendim të Gjykatës së Rrethit Gjyqësor Kukës, e cila më 14 tetor 2019 i kishte caktuar masën “Arrest në burg” për veprat penale “Kanosja” dhe “Mbajtja pa leje e armëve dhe municioneve luftarake”, pas një ngjarjeje të ndodhur më 19 shtator 2019 në Kukës, ku ishte qëlluar me armë në drejtim të automjetit të shtetasit F. C. Në shtator 2023, emri i tij u përfshi sërish në një ngjarje të dhunshme në Tiranë, ku së bashku me disa familjarë dhe një person tjetër dyshohet se i zunë pritë një polici dhe vëllait të tij, duke i goditur me shkopinj gome. Për këtë ngjarje, policia arrestoi Blerim Bulicën, ndërsa Bekim Bulica dhe tre persona të tjerë u shpallën në kërkim. Emri i Bekim Bulicës është përmendur edhe në mediat franceze. Në maj 2024, “Le Monde” publikoi një artikull ku përshkruhej aktiviteti i një shqiptari me pseudonimin “Zamir”, i cili drejtonte një prej rrjeteve të shpërndarjes së kokainës në Paris. Sipas artikullit, “Zamir” kishte rrëmbyer dhe dhunuar një shpërndarës që ishte larguar me një pjesë të klientelës, ndërsa videoja e dhunës ishte përdorur për të frikësuar persona të tjerë.

47.7K views

Në Licata, në provincën e Agrigentos në Siçili, gjashtë qen të mëdhenj endacakë u strehuan në hyrje të një supermarketi, në një hapësirë me ajër të kondicionuar, për t’u mbrojtur nga temperaturat e larta. Pamjet u filmuan nga qytetarë dhe turistë gjermanë që kishin shkuar për të bërë pazar dhe më pas u publikuan në rrjetet sociale. Në video, qentë shihen duke fjetur të qetë pranë hyrjes, ndërsa përfitojnë nga freskia. Por rasti ka ngjallur debate online. Shumë njerëz kanë falënderuar drejtuesit e supermarketit që nuk i larguan kafshët, ndërsa të tjerë e kanë cilësuar situatën si problem higjienik dhe si pasojë të menaxhimit të dobët të qenve endacakë. Organizata për Mbrojtjen e Kafshëve (OIPA) thekson se temperaturat e larta rikthejnë vëmendjen te problemi i qenve endacakë, braktisjes dhe keqtrajtimit të kafshëve. OIPA kërkon më shumë masa për sterilizimin, identifikimin me mikroçip dhe njohjen zyrtare të të ashtuquajturve “qen të lagjes”, të cilët jetojnë të lirë në zonat urbane, por duhet të jenë të vaksinuar, të identifikuar dhe të monitoruar. Ekspertët paralajmërojnë gjithashtu për rritjen e rasteve të braktisjes dhe keqtrajtimit gjatë verës, kur kafshët shpesh lihen për orë të tëra në ambiente të nxehta, në makina, banesa ose ballkone.

5134 views

Tre tendera, miliona lekë dhe të njëjtat pikëpyetje që vazhdojnë të mbeten pa përgjigje, kush kontrollon paratë e shqiptarëve? Nga software-t te sistemet e monitorimit dhe rrugët, faturat paguhen nga taksapaguesit, ndërsa përgjegjësia duket se humbet mes dokumenteve të tenderave. Vite më vonë, këto histori rikthehen si një kujtesë e hidhur, kur paratë janë publike, transparenca nuk është luks, por detyrim.

8721 views

Më shumë se një e katërta e përdoruesve të Gen Z po ndërveprojnë me inteligjencën artificiale sikur të komunikojnë me një mik, duke e përdorur atë jo vetëm për detyra, por edhe për mbështetje emocionale dhe çështje personale. Sipas një studimi global të Kaspersky, ku morën pjesë 7,200 persona, 27% e të rinjve deklaruan se e përdorin AI si një mik, ndërsa 28% konsultohen me të për probleme personale që hezitojnë t’ua tregojnë njerëzve të tjerë. Gjithashtu, 47% thanë se përdorin AI çdo ditë ose rregullisht. Përdorimi i teknologjisë nga Gen Z është i larmishëm: 56% e të anketuarve e përdorin për të kërkuar informacion, 49% për studime, 47% për gjenerim idesh dhe 39% për punë. Megjithatë, pavarësisht këtij përdorimi të gjerë, vetëm 42% zbatojnë rregullisht masa sigurie, si verifikimi i informacionit në burime të besueshme dhe shmangia e ndarjes së të dhënave konfidenciale. Ndërkohë, 52% marrin masa mbrojtëse vetëm herë pas here, ndërsa 6% nuk zbatojnë fare masa sigurie. Ekspertët paralajmërojnë se përdoruesit duhet të jenë të kujdesshëm kur ndajnë informacione personale me sistemet e AI. Vladislav Tushkanov, menaxher në Qendrën Kërkimore të Teknologjisë AI të Kaspersky, thekson se Gen Z po gjen mënyra të reja për ta integruar AI-në në jetën e përditshme, por një bisedë që duket personale nuk duhet konsideruar automatikisht private apo plotësisht e besueshme. Sipas tij, të rinjtë duhet të kombinojnë përdorimin e teknologjisë me verifikimin e informacionit dhe mbrojtjen e të dhënave personale.

9139 views

Një aksident rrugor është regjistruar ditën e sotme në Unazën e Madhe, në zonën e Farkës në Tiranë, pranë xhamisë, ku një kamion me rimorkio, që transportonte një fadromë, është përmbysur në rrugë. Sipas informacioneve paraprake të mbërritura në redaksinë e JOQ, nga aksidenti kanë mbetur të plagosur dy persona. Njëri prej tyre ka marrë dëmtime në shpatull, ndërsa tjetri në fytyrë, por fatmirësisht ndodhen jashtë rrezikut për jetën. Një qytetar që ka dërguar pamjet në redaksi jep edhe një version paraprak mbi mënyrën se si mund të ketë ndodhur aksidenti. Sipas tij, fadroma që transportohej në rimorkio mund të ketë ndikuar në shpërndarjen e peshës së mjetit, duke e ç’ekuilibruar atë, veçanërisht në një pjesë të rrugës ku ka pjerrësi. “E pashë nga larg, kur u afrova autori iku, s’e di a nga frika apo s’e di. Por ka pas fadromën në rimorkio dhe e ka marrë pesha para dhe e ka ç’ekuilibruar. Është rrëzuar se vjen si dishezë aty”, shprehet qytetari. Për shkak të përmbysjes së mjetit, qarkullimi në këtë segment është vështirësuar ndjeshëm. Policia Rrugore ka ndërhyrë për menaxhimin e trafikut dhe ka devijuar lëvizjen e mjeteve që udhëtojnë në drejtim të TEG-ut, Elbasanit dhe zonave që lidhen me mbikalimin e Farkës. Në vendngjarje kanë mbërritur shërbimet e emergjencës mjekësore dhe forcat e Policisë, ndërsa grupi hetimor po kryen veprimet procedurale për të përcaktuar dinamikën dhe shkaqet e aksidentit. Deri në një njoftim zyrtar të Policisë së Tiranës, rrethanat e plota të ngjarjes mbeten ende për t’u sqaruar.

88.3K views

Geni, një 30-vjeçar nga Mirdita, i cili pas 10 vitesh emigrim në Angli është kthyer në Shqipëri, ka ndarë me JOQ Albania vështirësitë që ka hasur në kërkim të një partnereje për martesë. I zhgënjyer nga dy përvojat me lushnjaren dhe dibranen, i riu kërkon mendimin e ndjekësve se si duhet të veprojë më tej, duke e mbyllur se ka frikë se do të mbetet beqar pa i çuar nuse nënës në shtëpi. Halli i Genit: Përshëndetje JOQ! Jam Geni, një djalë emigrant. Pas 10 vitesh në Angli u ktheva në vendlindje, në Mirditë. Jam 30 vjeç. Më në fund u bëra mbarë të gjeja një nuse shqiptare, pa ndasi krahinore. Në qershor njoha në një pub në Tiranë një vajzë nga Lushnja. Pas flirtit nisëm të takoheshim dhe pyetjet e para ishin: Çfarë makine ke? Sa lekë ke kursyer? A do të jetosh me prindërit apo do të jetosh në Tiranë? Direkt donte martesë, pa u njohur mirë dhe pa shkëmbyer disa takime. Më preu gjunjët dhe e ndërpreva njohjen. Në gusht, në Velipojë, u njoha me një dibrane. E vëmendshme për pastërtinë, me shkollë, por edhe ajo më vuri kushte. Kërkonte që unë të kthehesha në Shqipëri, të jetoja në Tiranë, të hapja një biznes ose të punoja në ndërtim dhe të mos kisha rrjete sociale, pra t’i mbyllja. Për prindërit më tha se nuk e kishte problem, por donte që shtëpia jonë të kishte dhoma për ne, fëmijët dhe prindërit e mi, që të mos e bezdisnin as atë dhe as fëmijët. Kjo dibranja nisi të më kërkonte edhe llogari se ku i kisha çuar paratë e emigrimit. Më mërziti shumë edhe kjo vajzë, edhe pse ishte zemërmirë. Si ka mundësi, JOQ, të gjitha vajzat shqiptare qenkan bërë një prerje? O shok, ngela beqar! Publikojeni si hall, kërkoj mendim se çfarë të bëj, se ngela pa i çuar nuse mamit në shtëpi.

26.1K views

Në rrugën e Kapshticës janë realizuar murale të veçanta kushtuar disa prej figurave më të rëndësishme të historisë dhe kulturës shqiptare. Në këto piktura shfaqen Parashqevi dhe Sevasti Qiriazi, Naum Dhimitër Naçi, Çerçiz Topulli, Skënderbeu, Ismail Qemali, Isa Boletini dhe Haxhi Tasim i Çamërisë, duke sjellë në hapësirën publike portretet e personaliteteve që kanë dhënë kontribut të rëndësishëm për arsimin, gjuhën dhe çështjen kombëtare shqiptare. Këto vepra artistike janë realizuar nga artisti dhe atdhetari Bledar Çakalli, i cili përmes artit ka zgjedhur të përcjellë mesazhe historike dhe patriotike. Në muralet dallohen veçanërisht figurat e motrave Qiriazi, pionieret e arsimit shqip, si edhe Naum Dhimitër Naçi, i njohur për kontributin e tij si mësues i gjuhës shqipe. Krahas tyre, muralet nderojnë edhe figura të tjera të shquara të historisë shqiptare. Muralet në rrugën e Kapshticës përbëjnë një ndërthurje mes artit dhe historisë, duke e kthyer një hapësirë të zakonshme publike në një galeri të hapur në kujtim të personaliteteve kombëtare. Përmes këtyre portreteve, historia shqiptare bëhet më e pranishme në jetën e përditshme dhe brezat e rinj kanë mundësinë të njihen me figurat që kanë lënë gjurmë në rrugëtimin e vendit.

13.9K views

Një aksident është shënuar sot në zonën e Plazhit, në lagjen 13 të Durrësit, ku një këmbësor është përplasur nga një taksi teksa po kalonte në vijat e bardha. Nga përplasja, i moshuari ka përfunduar në trotuar dhe ka mbetur i plagosur. I plagosuri është transportuar me autoambulancë drejt spitalit, ku sipas burimeve zyrtare të Policisë ka marrë fraktura të shumta në gjymtyrë. Fatmirësisht, gjendja e tij raportohet jashtë rrezikut për jetën, ndërsa policia po vijon verifikimet për zbardhjen e rrethanave të aksidentit. Ndërkohë, sipas burimeve nga vendngjarja, autoambulanca është vonuar rreth 25 minuta për të mbërritur në vendin e aksidentit. Vonesa e shërbimit të urgjencës ka ngritur shqetësim, ndërsa priten të dhëna të tjera mbi shkaqet e aksidentit dhe ndërhyrjen e shërbimeve në vendngjarje. Informacion shtesë i përditësuar nga policia, ora 12: 44: Shtetasi F. D., 66 vjeç, i cili u përplas nga taksia, si pasojë e plagëve të marra, ka ndërruar jetë në spital. Drejtuesi i automjetit, shtetasi A. T., është shoqëruar në Komisariat dhe po kryhen veprimet procedurale për arrestimin e tij.

45.1K views

Pavarësisht famës, pasurisë dhe vëmendjes së jashtëzakonshme që i shoqëron në çdo hap, Cristiano Ronaldo dhe Georgina Rodríguez vendosën që një nga momentet më të rëndësishme të jetës së tyre ta përjetonin në mënyrën më intime të mundshme. Çifti zgjodhi të martohej në dhomën e ndenjes së shtëpisë së tyre, në praninë e vetëm fëmijëve. Pa ceremoni madhështore, pa turma të ftuarish dhe pa nevojën për të impresionuar askënd. Georgina ka treguar për “Vogue” arsyen e veçantë pas këtij vendimi. Për ta, dhoma e ndenjes nuk ishte thjesht një hapësirë e shtëpisë, por vendi ku familja jeton përditshmërinë e saj. “Zgjodhëm dhomën e ndenjes ku hamë mëngjes, drekë dhe darkë, ku jetojmë përditshmërinë tonë”, ka rrëfyer Georgina. Ajo ka shtuar se dëshira e saj është që, pas shumë vitesh, fëmijët të rikthehen te ai moment me një kujtim të ngrohtë: “Pas 30 vitesh dua që fëmijët tanë të mendojnë: diçka e bukur ndodhi këtu, në këtë tavolinë, prindërit tanë shkëmbyen betimet e martesës.” Një zgjedhje që, në një kohë kur dasmat e personazheve të famshëm shpesh shndërrohen në spektakle luksoze, vjen si një mesazh i thjeshtë: për Ronaldon dhe Georginën, rëndësi kishte familja dhe jo madhështia e ceremonisë. Në fund, nuk kishte nevojë për një ambient luksoz apo qindra të ftuar. Mjaftonte shtëpia e tyre, fëmijët dhe tavolina rreth së cilës familja mblidhet çdo ditë. Ndonjëherë, momentet më të mëdha të jetës nuk kanë nevojë për një skenë të madhe. ❤️

10K views

Më 17 gusht 2022 raportuam për një tender të Bashkisë Tiranë për Përditësimin e Sistemit Telefonik dhe Modernizimin e Shërbimeve të Komunikimit, me numër reference REF-35653-07-06-2022. Dokumentet e prokurimit tregojnë se në garë morën pjesë tre operatorë: SYNAPSE ATS, bashkimi ADVANCED BUSINESS SOLUTIONS-ABS me INFORMATION BUSINESS SYSTEMS-IBS dhe COMMUNICATION PROGRESS. Fitues u shpall kjo e fundit, me ofertë 12,783,500 lekë pa TVSH dhe vlerë kontrate 13,294,469 lekë me TVSH, ndërsa kontrata u lidh më 7 shtator 2022. Afati parashikonte dy muaj për implementimin dhe 24 muaj mirëmbajtje. Në atë kohë, shkrimi ngrinte pikëpyetje mbi koston e tenderit dhe arsyetimin ekonomik të investimit, duke e lidhur atë me nevojën për modernizimin e komunikimit të Bashkisë dhe pajisjen e 115 përdoruesve. Por një verifikim i sotëm i dokumenteve zyrtare sjell edhe një korrigjim të rëndësishëm: fondi limit i publikuar në dokumentet e tenderit rezulton 13,294,469 lekë pa TVSH, ndërsa jo 160 milionë lekë të vjetra me TVSH siç u raportua në shkrimin e vitit 2022. Po ashtu, oferta fituese ishte më e ulët se oferta e SYNAPSE ATS prej 13,075,000 lekësh pa TVSH? Jo dokumenti i njoftimit të fituesit tregon se kjo ofertë ishte e dyta vetëm nëse krahasimi bëhet me operatorët e kualifikuar dhe kriteret e tenderit; dy ofertuesit e tjerë u skualifikuan për mosplotësim të kritereve të dokumentacionit dhe kushteve të procedurës. Katër vite më pas, nga verifikimi i burimeve publike të disponueshme nuk rezulton një hetim i posaçëm i bërë publik nga SPAK për këtë tender konkret.

7400 views

Një qytetar i është drejtuar redaksisë për të bërë një thirrje pas humbjes së një portofoli dje, pranë Big Market në Spitallë të Durrësit. Sipas tij, në pamjet filmike duken qartë personat që e kanë gjetur portofolin, si edhe targa e automjetit me të cilin ata janë larguar. Familja kërkon që personat që e kanë gjetur portofolin t’i kthejnë dokumentet dhe kartat, duke theksuar se paratë nuk i kërkojnë. Apeli i tyre është që portofoli dhe dokumentet të dorëzohen, pasi janë të nevojshme për personin që i ka humbur. Denoncim: Përshëndetje JOQ. Na ka humbur një portofol dje te Big Market në Spitallë të Durrësit. Në video shikohen qartë personat që e kanë gjetur, si edhe targa e makinës. Ju lutemi, nëpërmjet jush, t’u bëjmë thirrje që të na kthejnë kartat dhe dokumentet. Paratë nuk i duam.

34.4K views

Ylli Zalla është arrestuar nga Policia e Shtetit gjatë një operacioni të zhvilluar në Krujë. Sipas Ministrisë së Brendshme, operacioni i koduar “Fundi i Arratisë” u finalizua nga Forcat Speciale RENEA, Drejtoria e Forcës së Posaçme Operacionale, strukturat operacionale të Tiranës dhe Komisariati i Policisë Krujë. Zalla ishte shpallur në kërkim pas zbulimit të një arsenali armësh më 20 shkurt të këtij viti dhe dyshohet si bashkëpunëtor në atentatin e Rinasit. Një ditë para arrestimit, banesa e tij ishte sulmuar me tritol, ndërsa si pasojë e shpërthimit ishte shkrumbuar edhe automjeti i tij tip “Benz”. Zalla konsiderohej person shumë i kërkuar dhe me rrezikshmëri të lartë shoqërore, ndërsa prej kohësh i shmangej drejtësisë. Arrestimi i tij është cilësuar nga Policia e Shtetit si finalizim me sukses i operacionit “Fundi i Arratisë”, ndërsa hetimet pritet të vijojnë për të zbardhur rolin e tij në ngjarjet për të cilat është vënë në kërkim.

26.6K views

Aleksandri, një i ri shqiptar i është drejtuar redaksisë me një kërkesë për të përcjellë një mesazh për ish-partneren e tij, Anisën, me të cilën thotë se nuk ka pasur kontakt prej rreth një viti e gjysmë. Duke shkruar nga Islanda, ai shpreson që mesazhi i tij të arrijë tek ajo dhe të mundësojë një rikthim të kontaktit mes tyre. Në mesazhin e tij, i riu i kërkon falje Anisës për çdo fjalë të keqe që mund t’i ketë thënë dhe për çdo moment kur e ka lënduar. Ai shprehet se është penduar për të kaluarën dhe se mungesa e saj ka qenë e madhe gjatë kësaj periudhe pa komunikim. Mesazhi Përshëndetje, JOQ Albania. Jam Aleksandri, doja të bëja një thirrje për ish-in tim, quhet Anisa, dhe doja t’ia dërgoja këtë mesazh nga Islanda. Kisha dëshirë që ajo ta shikonte këtë mesazh që kam shkruar. I kërkoj falje për çdo fjalë të keqe që i kam thënë dhe për çdo fjalë që e ka bërë të ndihet e lënduar. Po bëhet gati një vit e gjysmë që nuk kam më kontakt me Anisën dhe do të doja shumë që ajo të rikthehej, sepse më mungon shumë. Do të jepja edhe shpirtin për të.

8353 views

Një qytetar nga Ksamili ka denoncuar mungesën e ujit të pijshëm në zonë, duke pretenduar se prej rreth një muaji e gjysmë furnizimi nga rrjeti është thuajse i papërfillshëm. Sipas tij, nga rrjeti vijnë vetëm rreth 10 litra ujë, duke e bërë situatën veçanërisht të vështirë për banorët dhe bizneset në këtë periudhë të sezonit turistik. Qytetari, i cili menaxhon një hotel, thotë se deri tani ka shpenzuar rreth 2 milionë lekë për autobote, ndërsa vetëm për shtëpinë ku banon ka harxhuar rreth 200 mijë lekë. Ai e cilëson situatën skandaloze, duke theksuar se Bistrica ndodhet shumë pranë zonës, dhe kërkon ndërhyrjen e institucioneve për të zgjidhur problemin e furnizimit me ujë. Denoncim: Kjo është situata e ujit në Ksamil. Kaq ujë vjen nga rrjeti. Jemi me fat po të bëjmë 10 litra ujë në total. Kemi rreth një muaj e gjysmë pa ujë. Menaxhoj një hotel dhe kemi harxhuar rreth 2 milionë lekë për autobotet deri tani. Vetëm në shtëpinë ku banoj kemi harxhuar 200 mijë lekë. Është skandaloze, duke pasur Bistricën fare pranë. Ju lutem, postojeni anonim.

7984 views