Ura e Rubikut në Mirditë, që lidh qytetin me disa fshatra përreth dhe me Rrugën e Kombit, është kthyer në një problem serioz për banorët. Struktura e urës mbi lumin Fan paraqet dëmtime të dukshme, ndërsa këmbët mbajtëse kanë dalë në sipërfaqe dhe janë anuar në disa pika, duke ngritur shqetësime për qëndrueshmërinë e saj. Banorët shprehen se gjendja e urës është përkeqësuar ndër vite për shkak të mungesës së ndërhyrjeve dhe mirëmbajtjes. E ndërtuar në vitet 1986–1987, ajo sot paraqet shenja të dukshme amortizimi, ndërsa dëmtimet e strukturës janë bërë më të dallueshme edhe për shkak të nivelit të ulët të ujit në lumin Fan. Ura është në varësi të Autoritetit Rrugor Shqiptar. Pas konstatimit të dëmtimeve, ARRSH i ka kërkuar Bashkisë Mirditë hapjen e unazës verilindore të Rubikut, në mënyrë që të krijohet mundësia për mbylljen e urës dhe kryerjen e rikonstruksionit. Pavarësisht dakordësimit mes institucioneve, deri tani punimet për hapjen e unazës nuk kanë nisur. Ndërkohë, ura vijon të përdoret çdo ditë nga banorët dhe drejtuesit e automjeteve. Për qytetin e Rubikut dhe fshatrat përreth, kjo nuk është thjesht një urë, por një lidhje jetike me Rrugën e Kombit. Çdo përkeqësim i mëtejshëm i gjendjes së saj rrezikon të sjellë pasoja të drejtpërdrejta për lëvizjen e banorëve dhe sigurinë e tyre.

6155 views

Një lajm i trishtë ka tronditur familjarët dhe të afërmit e Arlend Prend Gjonit, i njohur si Ledi, i cili është ndarë nga jeta në moshën vetëm 35-vjeçare. Sipas njoftimit të familjes, ai ka ndërruar jetë pas një ataku kardiak.Arlend Gjoni, me origjinë nga Berisha e Pukës, kishte ndërtuar një karrierë të suksesshme në biznes dhe sipërmarrje, fillimisht si emigrant dhe më pas duke investuar në ide, teknologji dhe inovacion.Vitet e fundit ai ishte zhvendosur në Emiratet e Bashkuara Arabe, ku ishte bashkëthemelues i Prepaire Labs, një kompani e angazhuar në zhvillimin e teknologjive në fushën e bioteknologjisë dhe inteligjencës artificiale. Ndër projektet e saj është edhe GenetiQ Digital Twin, një teknologji që synon të ndërthurë të dhëna gjenetike, metabolike, klinike, imazherike dhe biometrike për të ndihmuar në identifikimin e hershëm të rreziqeve shëndetësore dhe personalizimin e trajtimeve.Të afërmit e përshkruajnë Arlendin si një njeri me vizion dhe ambicie të mëdha, i cili pavarësisht moshës së re kishte arritur të investonte në projekte me synimin për të sjellë risi në fushën e teknologjisë dhe shëndetësisë.Pritja e të ndjerit do të bëhet pranë shtëpisë funerale “Alba 2000”, në rrugën e Durrësit, ndërsa ceremonia e varrimit do të zhvillohet të dielën, më 16 gusht, në orën 13:00, pranë varrezave të Prushit, Kombinat, Tiranë.Ngushëllime familjes Gjoni dhe të afërmve për këtë humbje të parakohshme.

29.4K views

Një qytetar ka denoncuar një situatë shqetësuese në pikën turistike “Uji i Zi”, një prej bukurive natyrore të Këlcyrës. Sipas raportimit, në këtë zonë janë vendosur tuba dhe kabllo të varura, përmes të cilave dyshohet se merret ujë në drejtim të një lokali për përdorim në lavazh. Kjo ndërhyrje ka shkaktuar shqetësim te qytetarët dhe turistët që vizitojnë këtë pikë turistike, pasi sipas tyre dëmton rëndë pamjen dhe natyrën e këtij destinacioni. Pyetjet që ngrihen janë të shumta: Kush e ka lejuar këtë ndërhyrje? A është i ligjshëm shfrytëzimi i ujit në këtë mënyrë dhe a janë marrë lejet përkatëse? Qytetarët kërkojnë që institucionet përgjegjëse të verifikojnë sa më parë situatën dhe, nëse konstatohen shkelje, të marrin masat e nevojshme. Denoncimi i qytetarit: Në pikën turistike Uji i Zi, një nga bukuritë e Këlcyrës, janë vendosur tuba dhe kabllo të varura për të marrë ujë drejt një lokali për lavazh. Kjo është e papranueshme dhe prish rëndë pamjen e këtij vendi të mrekullueshëm. Kush e ka lejuar këtë? A është i ligjshëm shfrytëzimi i ujit në këtë mënyrë? Institucionet përgjegjëse duhet të verifikojnë menjëherë situatën dhe të marrin masa. Uji i Zi duhet mbrojtur, jo shëmtuar! Shume turista jane shqetesuar per kete problem

26.7K views

Cristiano Ronaldo dhe Georgina Rodriguez kanë nënshkruar një marrëveshje paramartesore vetëm një ditë para dasmës së tyre sekrete. Çifti u martua në një ceremoni intime në rezidencën e tyre luksoze në Quinta da Marinha, në Cascais, ku morën pjesë vetëm katër dëshmitarë dhe fëmijët e tyre. As nëna e Ronaldos, Dolores, nuk ishte e pranishme në këtë moment të veçantë. Sipas certifikatës së martesës, Ronaldo dhe Georgina kanë zgjedhur një “regjim të ndarjes së pasurisë”. Kjo do të thotë se, në rast divorci, secili do të ruajë pasurinë e tij individuale dhe Georgina nuk do të përfitojë automatikisht gjysmën e pasurisë së Ronaldos. Megjithatë, sipas raportimeve, marrëveshja parashikon që Georgina të marrë rreth 100 mijë euro në muaj në rast ndarjeje, me synimin për të garantuar sigurinë e saj dhe të fëmijëve. Një tjetër detaj që ka tërhequr vëmendjen është pasuria e paluajtshme. Pretendohet se një rezidencë luksoze në zonën prestigjioze La Finca të Madridit, me vlerë rreth 5 milionë paund, është regjistruar në emër të Georginës. Ndërkohë, pasuria e Ronaldos vlerësohet në rreth 1.2 miliardë euro, duke e bërë marrëveshjen financiare të çiftit një nga detajet më të komentuara të martesës së tyre.

21.5K views

Një studim i ri ndërkombëtar sjell një zbulim interesant mbi ndryshimet mes trurit të grave dhe burrave. Testet e kryera gjatë rizgjimit nga anestezia me ketaminë treguan se truri i femrës mund të shfaqë plasticitet më të lartë, pra një aftësi më të madhe për të ndryshuar, për t’u përshtatur dhe për të rimodeluar lidhjet mes qelizave nervore. Në qendër të këtij zbulimi janë qelizat imunitare të trurit, të cilat sipas studiuesve nga Austria dhe Seattle luajnë një rol të rëndësishëm në mënyrën se si truri reagon ndaj ketaminës. Nën efektin e kësaj substance, dallimet mes dy gjinive bëhen më të dukshme, duke sugjeruar se truri femëror mund të ketë një mekanizëm më fleksibël përshtatjeje në situata të caktuara. Sipas autorëve, kjo veçori mund të jetë formësuar gjatë evolucionit për t’iu përgjigjur kërkesave të mëdha sociale dhe emocionale, përfshirë kujdesin ndaj fëmijëve, kërkimin e ushqimit dhe koordinimin e aktiviteteve në grup.

6490 views

Një grup punëtorësh ndërtimi kanë bërë një zbulim të jashtëzakonshëm gjatë rinovimit të një banese në Sint-Gillis-Dendermonde, në Flandrën Lindore të Belgjikës. Ata kanë gjetur një sasi të madhe ari, me vlerë të përllogaritur rreth 9 milionë euro, të fshehur në një arkë të murosur në një nga muret e bodrumit. Thesari u zbulua rastësisht në fillim të kësaj jave, teksa punëtorët po shponin muret për të vendosur tubacione të reja të ujërave të zeza. Brenda arkës ndodheshin më shumë se 40 shufra ari dhe të paktën 4 mijë monedha, sipas raportimeve të mediave belge. Mes punëtorëve ishte edhe një 18-vjeçar që po punonte gjatë pushimeve verore. Ai tregoi se në fillim nuk e kuptuan se çfarë kishin gjetur. “Reagimi ynë i parë ishte mosbesimi dhe habia. Në fillim mendova se ishin monedha 1-euroshe. Por më pas pamë edhe një copë ari dhe kuptuam se bëhej fjalë për diçka shumë më të madhe”, tha i riu për transmetuesin publik belg VRT. Pas zbulimit, punëtorët njoftuan menjëherë porositësin e punimeve dhe policinë. Autoritetet e kanë zhvendosur arin në një vend të sigurt, ndërsa ka nisur hetimi për të përcaktuar origjinën e thesarit dhe pronarin e tij ligjor. Prona aktualisht është në pronësi të CAW Oost-Vlaanderen, një organizatë që ofron shërbime dhe mbështetje sociale në rajon. Sipas të dhënave të para, ndërtesa ka qenë e banuar nga një prodhues birre që prej rreth vitit 1900. Drejtori i përgjithshëm i organizatës e cilësoi zbulimin si një ngjarje të jashtëzakonshme. “Është një përvojë që ndodh një herë në jetë”, deklaroi ai. Megjithatë, për momentin mbetet e paqartë se kujt i përket ari. Prokuroria belge ka nisur verifikimet për të zbardhur historinë e thesarit dhe për të përcaktuar nëse ekziston një pronar ose trashëgimtar i ligjshëm. Nëse në fund CAW Oost-Vlaanderen shpallet pronare e arit, organizata ka bërë të ditur se të ardhurat do të përdoren për krijimin e vendeve shtesë të strehimit për personat e pastrehë në provincë, ku sipas saj ka një mungesë të madhe të kapaciteteve të tilla.

24.9K views

Një aksident rrugor është regjistruar rreth sot në hyrje të rrugës “Onhezmi” në Sarandë. Një automjet ka humbur kontrollin dhe është përplasur fillimisht me kazanët e mbeturinave në anë të rrugës dhe më pas me dy pemë. Fatmirësisht, nga aksidenti nuk raportohet për persona të lënduar. Megjithatë, përplasja ka shkaktuar dëme të konsiderueshme materiale në automjet dhe në objektet e prekura. Në vendngjarje ka mbërritur policia, e cila po punon për të zbardhur rrethanat e aksidentit. Ndërkohë, punonjësit e shërbimeve kanë prerë dhe larguar dy pemët e dëmtuara, me qëllim shmangien e rrezikut për kalimtarët dhe automjetet e tjera.

12.5K views

Një tërmet i fuqishëm me magnitudë 7.7 goditi të premten, më 14 gusht, zonën detare pranë ishullit Flores në Indonezi. Lëkundjet u regjistruan në orën 21:58, në një thellësi prej rreth 10 kilometrash, ndërsa epiqendra u lokalizua 68 kilometra nga qyteti Ende, në provincën Nusa Tenggara Lindore. Dhjetëra ndërtesa në zonat bregdetare u shkatërruan ose pësuan dëmtime. Bilanci i viktimave u rrit gjatë natës dhe, sipas raportimeve, të paktën 20 persona kanë humbur jetën. Zëdhënësi i agjencisë indoneziane për menaxhimin e katastrofave deklaroi se autoritetet po mbledhin të dhënat për të përcaktuar numrin përfundimtar të viktimave dhe shkallën e dëmeve. Operacionet e vlerësimit dhe kërkim-shpëtimit vijojnë në zonat e prekura. Pas tërmetit u dha alarmi për cunami dhe autoritetet u bënë thirrje banorëve të largoheshin menjëherë nga bregdeti. Komunitetet përgjatë bregut verior të Floresit dhe zonave jugore u këshilluan të zhvendoseshin të paktën dy kilometra në brendësi ose në zona kodrinore mbi 10 metra lartësi. Rreth pesë orë më vonë, alarmi për cunami u anulua nga autoritetet.

6505 views

Një tërmet i fuqishëm me magnitudë 7.7 la goditur të shtunën lindjen e Indonezisë, duke shkaktuar të paktën 20 viktima, disa të plagosur dhe dëme të mëdha në ndërtesa e banesa. Epiqendra e tërmetit ishte në brigjet veriore të ishullit Flores, në një thellësi prej rreth 15 kilometrash. Lëkundjet u ndjenë në pjesën më të madhe të ishullit, ndërsa në disa zona u raportuan ndërtesa të shembura dhe dëmtime të shumta. Autoritetet lëshuan një paralajmërim për cunami, i cili u hoq më vonë pasi nuk u konstatuan ndryshime të rrezikshme të nivelit të detit. Megjithatë, në disa zona u regjistruan valë cunami me lartësi nën një metër. Rreth 2 mijë banorë u evakuuan në rajonin e Nagekeos, ndërsa banorët u drejtuan drejt kodrave dhe zonave më të larta nga frika e lëkundjeve të tjera. Pas tërmetit kryesor janë regjistruar dhjetëra pasgoditje, përfshirë një me magnitudë 6.1. Ekipet e shpëtimit po vijojnë kërkimet për persona të bllokuar nën rrënoja. Në disa zona, operacionet janë vështirësuar nga rrëshqitjet e dheut, ndërprerjet e energjisë dhe problemet me komunikimet. Indonezia është një nga vendet më të prekura nga tërmetet dhe aktiviteti vullkanik, pasi ndodhet në “Unazën e Zjarrit” të Paqësorit, një zonë me aktivitet të lartë tektonik dhe vullkanik.

38.1K views

Një qytetar i është drejtuar redaksisë së JOQ Albania për të treguar situatën e hapësirave publike dhe private në një prej plazheve të Korfuzit, Greqi. Në videon e dërguar, qytetari tregon me kamerë pjesët e bregdetit, duke evidentuar hapësirat publike dhe private. “Plazhi publik, plazh privat, plazh publik, privat, pastaj ke publik. Deri në fund është publik”, shprehet ai, ndërsa vijon të tregojë zonat përgjatë bregut. Sipas tij, në këtë zonë ka më shumë hapësira publike sesa private në plazh, duke e paraqitur situatën si një kontrast me problematikat që shpesh raportohen për aksesin në hapësirat publike bregdetare. “Nga Shqipëria, ndodhemi në Korfuz këtu”, thotë qytetari në fund të videos. JOQ Albania publikon pamjet e dërguara për të treguar situatën e evidentuar nga qytetari gjatë qëndrimit të tij në Korfuz.

19.9K views

Qytetarët shqiptarë do të mund të udhëtojnë drejt Marokut pa pasur nevojë për vizë për qëndrime afatshkurtra. Vendimi është marrë nga autoritetet marokene dhe do të hyjë në fuqi më 15 gusht 2026, duke i dhënë fund regjimit të vizave për shtetasit e Republikës së Shqipërisë që vizitojnë vendin për periudha të shkurtra. Heqja e vizave pritet të lehtësojë ndjeshëm udhëtimet e shqiptarëve drejt Marokut, qoftë për qëllime turistike apo vizita të shkurtra. Njoftimi për vendimin i është përcjellë palës shqiptare nga Ambasada e Mbretërisë së Marokut, e akredituar për Shqipërinë me seli në Romë. Kështu, duke nisur nga 15 gushti, shqiptarët do të kenë mundësi të udhëtojnë drejt Marokut pa procedurat e aplikimit për vizë për qëndrime afatshkurtra.

22.9K views

Pushteti vendor po përdor paratë e qytetarëve si letra bixhozi. Në prag të reformës territoriale dhe zgjedhjeve të vitit të ardhshëm, bashkitë e vendit kanë hedhur në treg një lumë tenderësh, por paratë e investimeve nuk duken askund në terren. Shifrat e gjashtëmujorit të parë të 2026-ës janë dëshmia më e qartë e paaftësisë dhe e abuzimit me fondet publike pasi mbi 79% e projekteve të buxhetuara kanë ngelur vetëm në letër. Pushteti vendor po shpenzon më shumë para se kurrë, por terreni mbetet bosh. Sipas Ministrisë së Financave, shpenzimet e bashkive në gjashtëmujorin e parë të 2026-ës arritën në 422 miliardë lekë (15.3% më shumë se vjet). Vetëm në qershor u derdhën 87 miliardë lekë, 20% më shumë se qershori i kaluar dhe 4% mbi planifikimin e muajit. Kjo etje për shpenzime pasqyrohet qartë edhe te tenderët. Open Procurement Albania raporton se bashkitë shpallën 1,877 tenderë me një fond limit prej 249 miliardë lekësh. Këtu shfaqet një paradoks i frikshëm! Megjithëse numri i procedurave ra me 35 tenderë krahasuar me vitin 2025, fondi limit u rrit me plot 79.2% (ose 110 miliardë lekë më shumë se 139 miliardët e vitit të kaluar). Por, pavarësisht kësaj vale marramendëse parash të vëna në lëvizje në letër, realizimi në praktikë është një dështim kolosal. Nga një buxhet operativ prej 548 miliardë lekësh, bashkitë kanë investuar realisht vetëm 79 miliardë lekë. Kjo përkthehet në një normë realizimi prej vetëm 14.4%, një distancë e humbur krahasuar me ritmin teorik prej 50% që do t'i korrespondonte gjysmës së vitit. ARTIKULLI I PLOTË NË STORY

6676 views

Në zemër të Alpeve zvicerane, në Lungern të kantonit Obwalden, po ndërtohet një kompleks i sigurisë së lartë i projektuar për ruajtjen e pasurive të klientëve ultra të pasur. Objekti po ndërtohet thellë në shkëmbinjtë e masivit të Brüni dhe pritet të jetë funksional gjatë vitit të ardhshëm. Projekti parashikon rreth 20 dhoma nëntokësore, të konceptuara për ruajtjen e aseteve me vlerë të madhe dhe me një nivel sigurie të krahasueshëm me atë të Bankës Kombëtare Zvicerane. Vendndodhja brenda malit synon të ofrojë mbrojtje të lartë dhe izolim, duke e kthyer objektin në një alternativë të pazakontë ndaj kasafortave tradicionale. Zvicra, e njohur prej dekadash për sektorin financiar dhe menaxhimin e pasurisë, mund të pasurojë kështu ofertën e saj për klientët më të pasur të botës. Me përfundimin e punimeve, Lungern pritet të bëhet shtëpia e një prej objekteve më të veçanta të sigurisë private në vend, një “kasafortë gjigante” e fshehur në thellësi të Alpeve.

5634 views

Familjarët e 80-vjeçares Mude Kazia kanë bërë një apel të ndjerë për ndihmë, pasi prej ditës së djeshme nuk kanë mundur të gjejnë nënën e tyre. Sipas tyre, nëna Mude është larguar nga banesa rreth orës 15:00 dhe nuk është kthyer më. Denoncimi është bërë pranë policisë, ndërsa familja vijon kërkimet me shpresën për ta gjetur sa më shpejt. Ajo është parë për herë të fundit pranë Kopshtit Zoologjik në Tiranë. Familjarët janë të shqetësuar për fatin e saj dhe u bëjnë thirrje qytetarëve që të tregojnë kujdes dhe të njoftojnë menjëherë nëse e kanë parë apo e hasin diku. Kushdo që ka informacion për Mude Kazian, mund të kontaktojë familjarët në numrin 068 253 1933. Çdo informacion, sado i vogël, mund të jetë vendimtar për kthimin e saj pranë familjes.

9113 views

Tregu i hidrokarbureve në vendin tonë vazhdon të përballet me mungesë stabiliteti, duke shënuar një tjetër rritje të ndjeshme të kostove për konsumatorët. Sipas vëzhgimeve në pikat e shitjes me pakicë, vlera e naftës ka pësuar një rritje të fortë prej 16 lekësh, duke kapërcyer nga 199 lekë që ishte së fundmi, në plot 215 lekë për litër. Ky rikthim në nivelet e larta vjen pas një tendence të mëparshme rënieje. Qeveria e justifikon çmimin kacafiu me rritjen e çmimeve në bursat ndërkombëtare që po reflektohet menjëherë në tregun vendas, duke sjellë luhatje të shpeshta në tabelat e karburanteve në Shqipëri. Kujtojmë se përballë një situate të ngjashme me luhatje ekstreme të çmimeve gjatë periudhës mars-qershor, në vend u ngrit dhe operoi Bordi i Transparencës. Ky mekanizëm shtetëror mori përsipër të përcaktonte kufirin maksimal të çmimeve të shitjes së karburanteve për të mbajtur nën kontroll tregun.

4144 views

Lega Serie A ka nisur një betejë ndaj Tring Sport, platformës shqiptare që transmeton ligjërisht kampionatin italian në Shqipëri, por që rezulton e aksesueshme edhe nga Italia. Tring, e themeluar në vitin 2004, ka një marrëveshje me Lega Serie A për të drejtat e transmetimit në Shqipëri, me një vlerë që raportohet rreth 4 milionë euro. Platforma ofron gjithashtu Champions League, Bundesliga, NBA, MotoGP dhe një sërë kompeticionesh të tjera sportive, me një kosto prej rreth 250 eurosh në vit. Por pikërisht këtu nis problemi për italianët. Sinjali i Tring nuk bllokohet jashtë Shqipërisë dhe, sipas mediave italiane, platforma mund të aksesohet nga Italia edhe pa VPN. Për shkak të çmimit dukshëm më të ulët, kjo krijon një problem me të drejtat televizive të shitura për territorin italian. Sipas FCInterNews, Lega Serie A i ka dërguar Tring letrat e para të kundërshtimit, me synimin që sinjali i platformës shqiptare të mos jetë më i aksesueshëm nga Italia deri më 22 gusht, ditën e nisjes së kampionatit.

8574 views

Në fillim të korrikut, çmimi mesatar i apartamenteve me qira në Tiranë arriti në 721 euro në muaj, duke e bërë strehimin gjithnjë e më të vështirë për familjet e shtresës së mesme. Sipas të dhënave të transaksioneve të qirave të agjencisë CPM, një individ duhet të shpenzojë rreth 77% të pagës mesatare mujore bruto ose 97% të të ardhurave neto vetëm për qiranë. Përballë kostove të larta të ushqimeve, transportit, energjisë dhe shpenzimeve të tjera, shumë familje të reja po zgjedhin të largohen nga Tirana dhe të vendosen në qytete më të përballueshme. Ekspertja e tregut të pasurive të paluajtshme, Stela Dhami nga Colliers International Albania, thotë se Elbasani dhe Durrësi janë ndër alternativat kryesore për familjet që vazhdojnë të punojnë në kryeqytet. Sipas Dhamit, qiratë në Elbasan janë rreth 30–40% më të ulëta se në Tiranë, ndërsa Durrësi ka çmime më të larta për shkak të turizmit dhe kërkesës së madhe. Ajo vlerëson se kostoja e banimit po ndryshon hartën e zgjedhjeve të strehimit, ndërsa transporti dhe trafiku mbeten sfida për ata që udhëtojnë çdo ditë drejt Tiranës. Megjithatë, për shumë familje, kursimi nga qiraja më e ulët po e bën këtë kompromis gjithnjë e më të pranueshëm.

3590 views

Një vatër e re zjarri me përmasa të mëdha është raportuar pak minuta më parë në Malin e Dajtit. Pamjet e dërguara në redaksinë e JOQ Albania tregojnë flakët që kanë përfshirë një pjesë të malit gjatë orëve të natës, ndërsa intensiteti i tyre duket qartë nga larg. Për momentin nuk dihen shkaqet e rënies së zjarrit dhe nuk ka të dhëna të konfirmuara nëse flakët rrezikojnë zonat e banuara. Mbetet për t’u parë nëse do të ketë ndërhyrje nga shërbimet zjarrfikëse për vënien nën kontroll të situatës. JOQ Albania publikon pamjet e mbërritura në redaksi për të sjellë në vëmendje të autoriteteve situatën e krijuar në Malin e Dajtit.

41.1K views

Një tabakino në zonën e Freskut, në Tiranë, është bërë objekt i një vjedhjeje gjatë orëve të para të mëngjesit të kësaj të enjteje. Pamjet e kamerave të sigurisë, të mbërritura në redaksinë e JOQ Albania, tregojnë momentin kur një person hyn me forcë në ambientet e tabakinos. Sipas pronarit të biznesit, i riu ka marrë një shumë prej rreth 250 mijë lekësh. Në pamjet e kamerave shihet personi brenda ambientit, ndërsa veprimet e tij janë regjistruar nga sistemi i sigurisë së tabakinos. Pronari thotë se rastin e ka denoncuar në polici, por deri tani, sipas tij, nuk ka pasur rezultat dhe personi i dyshuar nuk është kapur. Për këtë arsye, ai ka vendosur të publikojë pamjet me shpresën se dikush mund ta njohë personin dhe të ndihmojë në identifikimin e tij. “Nëse e njeh dikush, ju lutem na njoftoni”, është apeli i pronarit. Ngjarja ka ndodhur në zonën e Freskut, ndërsa mbetet për t'u parë nëse pamjet e kamerave do t'u shërbejnë autoriteteve për identifikimin dhe kapjen e autorit të dyshuar. JOQ Albania publikon pamjet në funksion të denoncimit të qytetarit dhe sensibilizimit për rastin.

21.8K views

Një situatë e vështirë me zjarret vijon në rrethin e Mallakastrës, ku dhjetëra efektivë zjarrfikës dhe punonjës të Emergjencave Civile po përballen pa pushim me flakët në masivin pyjor Lofkënd–Ngraçije. Terreni i thyer malor nuk lejon ndërhyrjen e mjeteve motorike, duke e kthyer operacionin në një betejë të vështirë. Në mungesë të mjeteve që mund të depërtojnë në zonat e thella, “arsenali” për neutralizimin e zjarrit mbetet tradicional, lopata dhe kazma. Me këto mjete në duar, efektivët hapin vija për izolimin e flakëve dhe përpiqen të frenojnë përhapjen e tyre, ndërsa zjarri vijon të djegë masivin pyjor. Në një kohë kur flitet për propagandë, mjete moderne, teknologji dhe ndërhyrje nga ajri, në terrenet e thepisura të Mallakastrës beteja me flakët po zhvillohet me mjetet më të thjeshta të mundshme. Lopata dhe kazma janë kthyer në “mjetet speciale” që po përdoren për të neutralizuar zjarrin, ndërsa zjarrfikësit dhe punonjësit në terren vijojnë punën mes vapës, tymit dhe lodhjes.

10.2K views