Pavarësisht të gjitha dallimeve të tyre politike dhe ekonomike, Bosnja dhe Hercegovina, Shqipëria, Kosova, Mali i Zi, Maqedonia e Veriut dhe Serbia ndajnë një sërë dobësish që i bëjnë ato një mjedis të favorshëm për krimin e organizuar, sipas Indeksit të Krimit të Organizuar 2025 të publikuar të hënën.

Raporti, i prodhuar nga OJQ-ja Iniciativa Globale Kundër Krimit të Organizuar Transnacional me seli në Gjenevë , thotë se të gjashtë vendet e Ballkanit Perëndimor veprojnë në mënyra të ndryshme si pika burimi, tranziti dhe destinacioni për trafikimin dhe kontrabandën e qenieve njerëzore, veçanërisht në rrugën e mirënjohur migratore nga Greqia në Evropën Qendrore.

Grupet kriminale shqiptare dhe rrjetet e tyre të diasporës vazhdojnë të lëvizin njerëz dhe mallra të paligjshme përtej Atlantikut.

 “Shqipëria mbetet si vend burimi ashtu edhe vend tranziti për trafikimin e qenieve njerëzore, me grupe të organizuara kriminale që mbajnë rrjete të gjera ndërkombëtare”, thuhet në raport.

Zonat kufitare në Maqedoninë e Veriut dhe në Kosovë me kontrolle të kufizuara janë një tjetër korridor kyç për migrantët, personat e trafikuar dhe mallrat që lëvizin drejt Serbisë.

 “Trafikimi i qenieve njerëzore në Serbi mbetet i përhapur, me vendin që vepron si origjinë, tranzit dhe destinacion”, thuhet në raport.

Shkalla e lartë e njerëzve që migrojnë nga gjashtë vendet e Ballkanit Perëndimor në Bashkimin Evropian e bën punën e detyruar dhe shfrytëzimin seksual më të lehtë për t’u organizuar – dhe më të vështirë për t’u luftuar. Viktimat gjenden midis punëtorëve në turizëm sezonal, ndërtim, mikpritje, bujqësi dhe në familje private.

Në Maqedoninë e Veriut dhe Bosnjë-Hercegovinë, pakicat etnike të cenueshme, siç janë gratë dhe fëmijët romë, janë veçanërisht në rrezik të lypjes së detyruar dhe martesës së hershme ose të detyruar. Në Mal të Zi dhe Shqipëri, shfrytëzimi shpesh lidhet me turizmin dhe jetën e natës.

Raporti nënvizon korrupsionin si një nga faktorët që e favorizojnë këtë, duke vënë në dukje se në Mal të Zi dhe Serbi, rrjetet e patronazhit të themeluara prej kohësh historikisht i kanë mbrojtur grupe të caktuara nga zbatimi i ligjit.

Në Maqedoninë e Veriut, koalicionet politike që ndryshojnë me radhë pengojnë vazhdimësinë në politikat kundër trafikimit të qenieve njerëzore.

Në të gjithë rajonin, policia, shërbimet doganore, autoritetet komunale dhe sistemet gjyqësore janë të ndjeshme ndaj ndikimit. Sistemi kompleks administrativ i Bosnjës e bën të vështirë zbulimin dhe ndjekjen penale të rasteve të tilla, veçanërisht në zonat afër kufirit kroat.

Mali i Zi nuk është në qendër të flukseve të migrantëve, por bregdeti dhe portet e tij luajnë role vendimtare në tregjet e tjera të paligjshme në rajon, veçanërisht në kontrabandën e drogës dhe duhanit.

Pjesa më e madhe e kokainës së trafikuar nga Amerika e Jugut kalon nëpër portin e Tivarit në Mal të Zi dhe nëpër Durres në Shqipëri, nga ku gjen rrugën për në Evropën Perëndimore. Një pjesë e vogël e saj qëndron në rajon për tregjet e brendshme.

“Trafikantët shqiptarë mbajnë lidhje të forta me furnizuesit në Kolumbi dhe Ekuador, duke i mundësuar atyre të zgjerojnë ndikimin e tyre në tregjet evropiane të kokainës”, thuhet në raport, ndërsa grupet kriminale nga Serbia dhe Mali i Zi shpesh janë të lidhura me tregtinë e kokainës në shkallë të gjerë, duke përdorur biznese të ligjshme në logjistikë, transport mallrash dhe mikpritje për të pastruar të ardhurat.

Prodhimi i kanabisit është ende i pranishëm në zonat malore të Shqipërisë me një prani të kufizuar të forcave të rendit. Kultivimi i kanabisit mbetet gjithashtu një problem në pjesë të Kosovës dhe Maqedonisë së Veriut, nga ku ai gjen rrugën për në Bosnjë dhe Serbi si vende tranziti ose kliente.

Raporti nënvizon se grupet kriminale shpesh janë të lidhura me strukturat shtetërore dhe madje veprojnë nën mbrojtjen e tyre, gjë që shpesh do të thotë se nuk ka hetime ose ndjekje penale të këtyre krimeve.

Raporti shton se shkalla e krimeve mjedisore, nga prerja e paligjshme e pyjeve deri te nxjerrja e mineraleve, është gjithashtu në rritje në rajon falë lidhjeve politike. /BIRN

Presidenti amerikan, Donald Trump, ka shprehur mbështetje për protestuesit që po përballen me shtypje brutale nga forcat e sigurisë në Iran, pesë ditë pasi nisën protestat për shkak të gjendjes ekonomikedhe që rezultuan me disa vdekje dhe dhjetëra të arrestuar.

Në një postim të shkurtër në rrjetet sociale, ai shkroi: “Jemi të armatosur, të pajisur me armë dhe gati për të filluar”, por nuk dha detaje të mëtejshme.

Një këshilltar i lartë i udhëheqësit suprem të Iranit, Ajatollah Ali Khamenei, u përgjigj duke thënë se Trump duhet të jetë “i kujdesshëm” nëse ai ndërhyn, duke paralajmëruar për kaos të mundshëm në të gjithë Lindjen e Mesme.

Të paktën tetë persona raportohet se janë vrarë në Iran pas pothuajse një jave protestash masive të shkaktuara nga përkeqësimi i kushteve ekonomike.

Në postimin e së premtes në Truth Social, Trump shkroi: “Nëse Irani qëllon dhe vret me dhunë protestuesit paqësorë, gjë që është zakon i tyre, Shtetet e Bashkuara të Amerikës do t’i ndihmojnë.”

Në postimin e tij, presidenti amerikan nuk specifikoi se çfarë masash mund të ndërmarrë Uashingtoni kundër autoriteteve iraniane.

Në qershor, SHBA-të kryen sulme kundër centraleve bërthamore të Iranit me urdhër të Trump. Zyrtarët amerikanë më vonë argumentuan se sulmet kishin penguar ndjeshëm perspektivën e Teheranit për të ndërtuar një armë bërthamore – një pretendim i kundërshtuar nga Irani. Në shenjë hakmarrjeje, Irani nisi një sulm me raketa ndaj një baze të madhe ushtarake amerikane në Katar .

Protestat kanë qenë më të përhapurat që nga një kryengritje në vitin 2022 e shkaktuar nga vdekja gjatë paraburgimit e Mahsa Amini, një grua e re e akuzuar nga policia e moralit se nuk e mbante siç duhet vellon, por ato nuk kanë qenë në të njëjtën shkallë. Presidenti Masoud Pezeshkian ka thënë se do t’i dëgjojë “kërkesat legjitime” të protestuesve.

Por Prokurori i Përgjithshëm i vendit, Mohammad Movahedi-Azad, paralajmëroi se çdo përpjekje për të krijuar paqëndrueshmëri do të përballet me një “përgjigje vendimtare”.

Instituti i Gjeoshkencave, Energjisë, Ujit dhe Mjedisit (IGJEO) ka njoftuar qytetarët për reshje intensive sot pasdite (2 janar) dhe nesër (3 janar), kryesisht në veri dhe qendër të vendit. Në Shkodër dhe Kukës priten vërshime të shpejta të lumenjve të vegjël dhe rrëshqitje dherash, ndërsa në zonat urbane mund të ketë përmbytje të lokalizuara.

Reshje intensive priten gjithashtu në qarqet Lezhë, Dibër, Durrës, Tiranë dhe Elbasan, me mundësi shtrëngatash. Në zonat malore dhe Alpe do të bjerë dëborë.

Temperaturat më 3 janar:

Bregdeti: 10–16 °C

Vendet e ulëta: 7–15 °C

Vendet malore: 3–11 °C

Era pritet mesatare deri e fortë në bregdet. IGJEO u bën thirrje qytetarëve të tregohen të kujdesshëm dhe të ndjekin udhëzimet e autoriteteve lokale.

Shkaku i zjarrit tragjik në Crans Montana të Zvicrës ishin fishekzjarrët e vendosur në shishet e shampanjës, nga të cilat u përhapën më pas flakët.

Fishekzjarrët ishin në një moment shumë afër tavanit, gjë që çoi në incidentin tragjik, ku zjarri u përhap shumë shpejt.

Autoritetet konfirmuan se bari në resortin e skive kishte më shumë se një dalje emergjence, por shumë njerëz nuk ishin në gjendje t’i gjenin dhe krijuan kaos për në derën kryesore.

Nga zjarri tragjik humbën jetën të paktën 47 persona dhe 119 të tjerë janë nëpër spitale, ku po marrin trajtim për plagët e djegieve.

Autoritetet kanë filluar tashmë të identifikojnë viktimat, edhe pse për disa prej trye do të duhen ditë ose javë të tëra, për shkak të djegieve të shumta.

Viktima e parë që u identifikuar Emanuele Galeppini. Adoleshenti 17 vjeçar ishte një lojtar golfi, ndërsa shumë të rinj të tjerë mbetën të plagosur.

Disa nga të plagosurit janë në gjendje kritike për jetën, teksa zyrtarët e shëndetësisë kanë paralajmëruar se numri I viktimave mund të rritet.

Zvicra shpalli pesë ditë zie në kujtim të viktimave, jetët dhe ëndrrat e të cilëve u prenë në mes.

Rasti është një nga tragjeditë më të rënda me të cilat Zvicra është përballur dhe një hetim është duke vazhduar për të zbardhur rrethanat e plota të ngjarjes.

Shtetet Europiane kanë ofruar ndihmë për Zvicrën, teksa mes viktimave dhe të plagosurve ka edhe shtetas të huaj, ndër ta italiane dhe francezë.

Bullgaria shënoi të enjten hyrjen e saj në zonën euro me shfaqje simbolike në Bankën Qendrore në Sofje dhe fishekzjarre. Që nga mesnata, euro u bë monedha zyrtare e vendit, ndërsa leva doli nga qarkullimi.

Me këtë hap, Bullgaria u bë anëtarja e 21-të e eurozonës, duke e çuar numrin e përdoruesve të euros në mbi 350 milionë. Anëtarësimi i jep vendit edhe një vend në Këshillin Drejtues të Bankës Qendrore Evropiane.

Ndërsa bizneset janë kryesisht në favor të euros, opinioni publik mbetet i ndarë. Disa qytetarë shprehin shqetësime për rritjen e çmimeve, në një kohë kur vendi përballet edhe me pasiguri politike.

Problemi themelor i politikës së jashtme për qeverinë gjermane u përmblodh së fundmi nga historiani dhe shkencëtari politik Herfried Minkler: “Idealizmi liberal i një rendi ndërkombëtar të bazuar në rregulla ka rezultuar të jetë një iluzion.”

Kancelari Friedrich Merz është i bindur se sot rendi i bazuar në rregulla nuk po sfidohet vetëm nga sistemet politike autoritare. “Për fat të keq, kjo vlen edhe për Amerikën,” tha Merz, duke iu referuar Presidentit Donald Trump. Dokumenti i fundit i strategjisë së SHBA-së, me kritikat e tij të ashpra ndaj aleatëve evropianë dhe BE-së, e ka përforcuar më tej këtë përshtypje.

Tërheqja e SHBA-së nga Evropa ka filluar tashmë

Shqetësimi më i madh midis politikanëve dhe qarqeve ushtarake gjermane është mundësia që SHBA-të po largohen nga Evropa në aspektin politik dhe të sigurisë. Duket se ky proces është tashmë në zhvillim e sipër. Në fillim të dhjetorit, gjenerali Christian Freuding, një nga gjeneralët më të lartë të Gjermanisë, tha në një intervistë me revistën amerikane The Atlantic se kontakti i drejtpërdrejtë me kolegët amerikanë është “ndërprerë”.

Më parë, thotë ai, shkëmbimi i informacionit ishte i mundur “ditë e natë”. Humbja e kanaleve të shpejta të komunikimit është pra një “paralajmërim alarmues”, veçanërisht në dritën e një sulmi të mundshëm rus ndaj anëtarëve lindorë të NATO-s.

Evropianët aktualisht po e ndiejnë distancimin e SHBA-së në mënyrën më të drejtpërdrejtë në çështjen e Ukrainës. Trump po shtyn përpara një marrëveshje paqeje që do të ndihmonte shumë në përmbushjen e kërkesave të Presidentit rus Vladimir Putin.

Henning Hoff i Shoqatës Gjermane të Politikës së Jashtme i tha DW: “Nëse amerikanët tërhiqen disi, presioni mbi evropianët për të qenë në gjendje të veprojnë dhe të ndërtojnë një kundërpeshë të fortë do të jetë edhe më i madh.”

Merz po përpiqet, së bashku me Presidentin Francez Emmanuel Macron dhe Kryeministrin Britanik Keir Starmer, të zbusë rënien e mbështetjes së SHBA-së. “Askush nuk duhet të dyshojë në mbështetjen tonë për Ukrainën”, tha Merz në një takim trepalësh në Londër në fillim të dhjetorit. Por të tre udhëheqësit përballen me buxhete të shtrënguara, presion nga e djathta në politikën e brendshme dhe dobësim të mbështetjes publike për Ukrainën.

Gjermania bëhet një lutëse në Kinë

Në marrëdhëniet e saj me Kinën, Gjermania tani po përpiqet të riparojë marrëdhënien e dëmtuar. Ministri i Jashtëm Wadephul anuloi papritur një udhëtim në Kinë në vjeshtë kur u bë e qartë se pala kineze, përveç kolegut të tij ministër, nuk do t’i ofronte atij asnjë bashkëbisedues tjetër të rëndësishëm.

Kritika e tij për “sjelljen gjithnjë e më agresive” në Ngushticën e Tajvanit dhe Detet e Kinës Lindore dhe Jugore shkaktoi një reagim të zemëruar nga Pekini. Wadephul kompensoi udhëtimin në dhjetor, ndërsa Zëvendëskryeministri Lars Klingbeil ishte përpjekur tashmë të qetësonte tensionet në Pekin.

Kina është një partner tregtar shumë i rëndësishëm për Gjermaninë për të lejuar një konfrontim të hapur. Sidomos për shkak të pozicionit pothuajse monopolist të Kinës në fushën e metaleve të rralla, industria gjermane është shumë e varur nga furnizimet kineze.

Henning Hoff shpjegon ekuilibrin e ndryshuar të pushtetit: “Kinezët kanë qenë jashtëzakonisht të suksesshëm në marrjen e pozicioneve udhëheqëse në shumë sektorë të teknologjisë, në fusha që tradicionalisht mbaheshin nga industria gjermane. Në një situatë të tillë, Gjermania thjesht nuk është më aq e rëndësishme.”

Kancelari më në fund po planifikon një vizitë në Kinë në fillim të vitit 2026.

Solidariteti kritik me Izraelin

“Po vij si një mik i Izraelit, i cili e di se miqësia midis Gjermanisë dhe Izraelit është pafundësisht e vlefshme dhe e çmuar”, tha Merz gjatë vizitës së tij në Izrael në dhjetor. Këto fjalë të ngrohta nuk ishin krejtësisht të papritura nga perspektiva e kryeministrit izraelit Benjamin Netanyahu.

Në gusht, Merz pezulloi dërgesat e armëve në Izrael që mund të përdoren në Rripin e Gazës. Në nëntor, ai e hoqi përsëri embargon, duke hapur rrugën për vizitën e tij.

Veprimi i ashpër ushtarak i Izraelit në Gaza, në përgjigje të sulmit terrorist nga Hamasi islamist në tetor 2023, i ka paraqitur qeverisë gjermane “disa dilema”, tha Merz në prani të Netanyahut. Qeveria dëshiron të sigurojë sigurinë e Izraelit – si nga përgjegjësia që rrjedh nga Holokausti – por edhe të kritikojë kur e sheh të nevojshme.

Dy qeveritë nuk mund të afrohen në disa çështje kyçe, veçanërisht kur Gjermania këmbëngul në një zgjidhje me dy shtete – krijimin e një shteti palestinez përkrah Izraelit. Netanyahu tha: “Qëllimi i shtetit palestinez është të shkatërrojë të vetmin shtet hebre”.

Netanyahu nuk është thirrur në Gjermani. Ekziston një urdhër arresti kundër tij nga Gjykata Ndërkombëtare Penale dhe qeveria gjermane, në parim, do të ishte e detyruar ta arrestonte atë.

Në Berlin, ata duan të shmangin një situatë “në të cilën do të duhej të thoshin: Në rregull, për arsye diplomatike nuk mund ta arrestojmë z. Netanyahu, nuk e duam këtë, por nuk duam të dëmtojmë as reputacionin e Gjykatës Ndërkombëtare Penale”, tha për DW Hans-Jakob Schindler, një ekspert i Lindjes së Mesme dhe drejtor i organizatës ndërkombëtare “Projekti Kundër Ekstremizmit”.

Si ndërmjetës në konfliktin e Lindjes së Mesme, qeveria gjermane, ashtu si BE-ja në tërësi, ka një rol shumë të kufizuar, thotë Schindler. “Është e qartë se si palestinezët ashtu edhe izraelitët e shohin Uashingtonin si ndërmjetësin kryesor, jo Evropën”, thotë ai.

Evropa do të luajë një rol të rëndësishëm në rindërtimin e Gazës dhe ndihmën humanitare, “por si ndërmjetës qendror për dhjetë vitet e fundit ajo praktikisht e ka përjashtuar veten”.

Merz – Kancelar për politikën e jashtme

Kancelari i ka vënë një theks të fortë politikës së jashtme që nga fillimi. Për shkak të udhëtimeve të tij të shumta, ai është quajtur, disi me tallje, “Kancelari i jashtëm”. Henning Hoff i Shoqërisë Gjermane të Politikës së Jashtme përfundon: “Në përgjithësi, mund të flitet për njëfarë ringjalljeje.”

Por ai shton gjithashtu: “Politika e jashtme e Berlinit është ende shumë e ngadaltë për t’iu përgjigjur situatës së re globale.”

Sidoqoftë, është planifikuar një reformë e Ministrisë së Jashtme. Vitin e ardhshëm, një komision do të trajtojë, për shembull, çështjen e varësisë nga Kina. “E gjithë kjo është mirë, por vjen dy, tre, katër, pesë vjet me vonesë. Nëse ritmi nuk përshpejtohet, do të jetë e vështirë.”/DW

Një aksident rrugor është regjistruar në rrugën hyrëse të Sarandës, në afërsi të fshatit Metoq, ku si pasojë e përplasjes së dy automjeteve ka mbetur e plagosur një grua.

Sipas informacioneve paraprake, në aksident janë përfshirë një automjet tip “Volkswagen”, me drejtuese shtetasen Dhimitra Harizi, dhe një mjet tip “Toyota” me drejtues shtetasin Sokrat Muço.

Si pasojë e përplasjes, ka mbetur e plagosur drejtuesja e mjetit “Volkswagen”, e cila është transportuar menjëherë drejt Urgjencës së Spitalit të Sarandës për ekzaminime mjekësore.

Bëhet me dije se e plagosura ndodhet nën kujdesin e mjekëve, ndërsa nuk raportohet për rrezik për jetën.

Policia ndodhet në vendin e ngjarjes dhe ka nisur hetimet për të zbardhur shkaqet dhe rrethanat e këtij aksidenti, ndërkohë që qarkullimi në zonë ka vijuar me kujdes të shtuar.

Gjykata e Korçës ka lënë në masën “arrest në burg” 67 vjeçarin, Rushan Selko, i cili u arrestua nën akuzën se ka përdhunuar dhe lënë shtatzënë një 12-vjeçare në Pogradec.

Selko abuzoi seksualisht me fqinjën e tij të mitur në muajin gusht. Ngjarja e rëndë ndodhi në banesën e 67 vjeçarit në fshatin Piskupat.

Gjatë kësaj periudhe, ai e kërcënonte të miturën që të mos tregonte për atë çfarë kishte ndodhur ndërkohë që rasti u zbulua nga prindërit e të miturës të cilët vunë re ndryshimet fizike të saj. Ekzaminimi mjekësor zbuloi se vajza ishte 22 javëshe shtatzanë dhe më pas ajo rrëfeu të gjithë ngjarjen e rëndë.

Organi i akuzës ka kërkuar masën e sigurisë arrest në burg për 67 vjeçarin çka është pranuar edhe nga gjykata. Seanca e zhvilluar me dyer të mbyllura ka zgjatur më tepër se dy orë.

Burimet brenda seancës gjyqësore bëjnë me dije se 67 vjeçari nuk e ka pranuar që ka abuzuar seksualisht me të miturën. Ndërkohë, mësohet se vajzës i është marrë kampioni i fetusit për të kryer analizën e ADN-së për të vërtetuar atësinë e fëmijës.

Pritet që pas 2-3 javësh të dalë përgjigja e analizës, e cila do hedhë dritë mbi ngjarjen e rëndë.

Futbollistët shqiptarë që aktivizohen në kampionatet e huaja e kanë nisur vitin 2026 në mënyrën më të mirë të mundshme, duke lënë gjurmë me paraqitje vendimtare dhe gola të rëndësishëm për skuadrat e tyre.

Në Iran, Jasir Asani u shndërrua në heroin e Esteghlal në transfertën ndaj kryesuesve të Sephan. Sulmuesi kuqezi zhbllokoi rezultatin që në minutën e 10-të, duke u treguar i saktë nga pika e penalltisë. Pas barazimit të vendasve, që erdhi si pasojë e një autogoli, Esteghlal arriti të rrëmbejë fitoren në sekondat e fundit falë golit të Gholizadeh në minutën 90+3, duke triumfuar 1-2.

Ky sukses i çmuar i ka lejuar skuadrës së Asanit të ngushtojë diferencën në vetëm 5 pikë nga kreu i renditjes. Për vetë futbollistin shqiptar, goli ndaj Sephan ishte i 7-ti në 10 javë kampionat, shifër që e rendit aktualisht të dytin në listën e golashënuesve dhe konfirmon formën e tij të shkëlqyer.

Paraqitje mbresëlënëse po vijon të zhvillojë edhe Anis Mehmeti në futbollin anglez. Mesfushori ofensiv e nisi vitin me gol për Bristol City, në përballjen ndaj Portsmouth. Në minutën e 24-t, Mehmeti realizoi një supergol nga jashtë zone, duke dyfishuar avantazhin për skuadrën e tij.

Ky ishte goli i 8-të sezonal për Mehmetin në Championship, kampionat ku ai numëron gjithashtu edhe 6 asistime. Me këto statistika, shqiptari është shndërruar në një nga lojtarët më produktivë të kategorisë dhe ka tërhequr vëmendjen e disa klubeve të njohura angleze.

Muaji janar konsiderohet si muaji më depresiv në kalendar. Sipas statistikave në këtë muaj ndodhin numri më i madh i vetëvrasjeve, divorceve e shumë njerëz janë keq financiarisht në këtë muaj.

Por cilat janë arsyet që e bëjnë këtë muaj më depresiv dhe si mund të tejkalohet depresioni?

Në depresionin e janarit ndikon e gjithë festa që bëhet në dhjetor për fundvit.

Entuziazmi që ndjejmë ne gjatë muajit dhjetor për të festuar, për të bërë dhurata, për ta marrë pjesë në evente, për ta mbyllur vitin, qoftë në punë qoftë ne jetën personale, na merr shumë energji dhe mungesa e energjisë së shpenzuar fillon të vërehet në janar.

Gjithashtu janari është muaji ku dita është me e shkurtër dhe nata më e gjatë dhe mungesa e dritës ndikon në çlirimin e menatoninës që është një hormon që na bën të ndihemi me të lodhur dhe më të përgjumur.

Në depresionin e janarit ndikon edhe gjendja ekonomike.

Të gjithë e dimë që shpenzimet e pakontrolluara në dhjetor reflektohen në janar dhe të gjitha këto e bëjnë pastaj janarin që të duket shumë i gjatë, që do të thotë se nuk kemi financa të mira, nuk kemi energji, po fillojmë një vit ku nuk e kemi të qartë se çfarë duam prej vetes, na duhet edhe një vetëreflektim.

Megjithatë kjo nuk përjetohet nga të gjithë njësoj, por pë rata që e përjetojnë duhet të bëjnë diçka që të mos e ndiejnë janarin depresiv.

Për të shmangur depresionin duhet që njerëzit të jenë sa më shumë aktivë.

Për Partinë Demokratike, viti 2025 ishte i vështirë, i karakterizuar nga rezultati në zgjedhjet parlamentare dhe akuzat e shumta ndaj qeverisë dhe drejtësisë.

Fillimin e vitit, PD e nisi me një protestë në 8 shkurt para Kryeministrisë, ku u bllokuan disa nga rrugët kryesore të qytetit për orë të caktuara gjatë protestës.

Partia Socialiste, nën udhëheqjen e Edi Ramës, kishte shumicën dhe nisi përgatitjet për buxhetin dhe agjendën e legjislacionit të vitit, ndërsa opozita ishte në pozicion kritik kundër shumicës.

PD dhe deputetë të tjerë opozitarë akuzuan shumicën për mënyrën si po trajtoheshin çështjet e rëndësishme, duke e cilësuar si një ngutshmëri të njëanshme dhe pa konsultime të duhura me opozitën në Kuvend.

Sidoqoftë, shumica socialiste shpesh rrëzonte amendamentet dhe propozimet e opozitës, duke miratuar vendimet me shumicë votash, gjë që krijoi pakënaqësi brenda radhëve opozitare.

Më tej, Partia Demokratike përqendroi aktivitetin e saj opozitar te përgatitja për zgjedhjet parlamentare të 11 majit. PD filloi fushatën e brendshme për listat e kandidatëve, duke zhvilluar debate brenda partisë mbi strategjinë dhe zgjedhjen e figurave më të besueshme për të përfaqësuar opozitën në çdo qark. Nga radhët e PD-së pati pakënaqësi dhe largime pas vendosjes në lista të hapura më të votuarit e primareve.

PD zhvilloi takime me qytetarët në qarqe të ndryshme, nga veriu në jug dhe intensifikoi fushatën zgjedhore për zgjedhjet e 11 majit. Aktiviteti kombinoi mobilizimin e bazës, takimet me qytetarët dhe aksionin parlamentar.

Pavarësisht se morën strategun e fushtës së presidentit amerikan Donald Trump, Chris LaCivita nuk prodhoi fitore për demokratët.

Në zgjedhjet e 11 majit, PD mori një rezultat thellësisht të dobët, krahasuar edhe me zgjedhjet e mëparshme dhe shënoi humbjen e thellë të pozicioneve parlamentare, rezultati më i keq në dekada për PD-në.

Partia Demokratike kontestoi rezultatet dhe theksoi parregullsitë në procesin zgjedhor, duke kërkuar përgjegjësi politike nga qeveria dhe transparencë në administrimin e votave. Sali Berisha deklaroi se PD nuk njeh rezultatin e zgjedhjeve dhe e cilësoi procesin si “farsë elektorale” dhe manipulim masiv.

Gjatë korrikut dhe gushtit 2025, pavarësisht se Kuvendi kishte periudhën e ndërprerjes, Berisha vijoi konferencat me gazetarët duke denoncuar atë që ai e quajti ‘farsë zgjedhore’. Gjatë shtatorit, PD u rikthye në kuvend me të njëjtat ide për farsën elektorale dhe akuzat ndaj qeverisë.

Berisha, i akuzuar për çështjen ‘Partizani’, vijoi me shënjestrimin e drejtësisë. Në çdo dalje nga SPAK-u, Berisha vijoi sulmet ndaj ish-kreut të Prokurorisë së Posaçme, Altin Dumanit, dhe akuzoi qeverinë për kapje të drejtësisë.

Në nëntor, PD nisi foltoret e përjavshme para Kryeministrisë, me kërkesë largimin nga detyra të kryeministrit Edi Rama. Prej disa javësh, opozita protestoi duke akuzuar qeverinë për votimin e disa ligjeve pa konsensus me opozitën.

Pasi doli nga qelia, Ervin Salianji kërkoi në nëntor që të “vlerësohej” për burgun që bëri me një post në PD, por u përball me zhgënjim, pasi kryedemokrati Sali Berisha nuk i ndryshoi postet e demokratëve.

Në këto kushte, Salianji zgjodhi të mbante foltore paralele me ato të Berishës dhe PD-së zyrtare, duke synuar përçarje brenda partisë, njësoj si ish-kryetari i tij, Lulzim Basha. Me këtë lëvizje, Salianji nuk mundi të mbledhë mbështetës të shumtë pas vetes. Lëvizja e tij u duk si një shërbim ndaj qeverisë Rama, për ta mbajtur sa më gjatë në pushtet.

Në dhjetor, Kuvendi u shndërrua në një arenë debati të fortë, ku opozita kërkoi transparencë, përgjegjësi dhe zbatim të ligjit nga mazhoranca.

Aksioni opozitar u kulmua me protestën Kombëtare të 22 dhjetorit, ku PD paralajmëroi të tjera protesta në vijim, si dhe artikuloi kërkesat e kahershme, largimin e Ramës, qeverinë teknike dhe zgjedhje të lira dhe të ndershme.

Partia Demokratike, pavarësisht debateve, akuzave dhe protestave nuk arriti të rrëzonte qeverinë. Mbetet për t’u parë se çfarë do të prodhojë viti 2026 për partinë më të madhe opozitare dhe nëse synimet e saj do të arrijnë të konkretizohen./CNA 

Ushtria ukrainase deklaroi më 2 janar se forcat e saj godasin vetëm caqe ushtarake, një ditë pasi Rusia akuzoi Kievin për një sulm me dronë ndaj një hoteli dhe një kafeneje në jugun e pushtuar të Ukrainës, ku sipas Moskës mbetën të vrarë 27 persona.

Autoritetet e instaluara nga Rusia në rajonin e Hersonit thanë se viktimat po festonin Vitin e Ri dhe se mes të vrarëve ndodheshin edhe dy fëmijë, duke e cilësuar sulmin si “akt terrorist”.

Sipas pretendimeve ruse, objekti i goditur ndodhet në Horli, një qytezë pranë Detit të Zi, e pushtuar nga ushtria ruse që në fillim të pushtimit të Ukrainës në vitin 2022.

Guvernatori rajonal i emëruar nga Moska, Vladimir Saldo, publikoi fotografi që, sipas tij, tregojnë brendësinë e një ndërtese të djegur dhe trupa të pajetë, pa dhënë prova të pavarura për rrethanat e sulmit.

Nga ana tjetër, zëdhënësi i ushtrisë ukrainase, Dmytro Lykhoviy, i tha agjencisë AFP se Rusia po përdor “dezinformata dhe deklarata të rreme”.

“Forcat mbrojtëse të Ukrainës respektojnë plotësisht të drejtën humanitare ndërkombëtare dhe godasin ekskluzivisht objektiva ushtarake të armikut,” deklaroi ai.

Më herët, shërbimi ukrainas i inteligjencës paralajmëroi se Rusia mund të jetë duke tentuar të organizojë “një provokim në shkallë të gjerë me humbje njerëzore”, pa ofruar prova konkrete për këtë pretendim.

Akuzat vijnë në një moment kritik të konfliktit, i cili po hyn në vitin e katërt dhe konsiderohet më i përgjakshmi në Evropë që nga Lufta e Dytë Botërore.

Ndërkohë, presidenti ukrainas Volodymyr Zelensky deklaroi në fjalimin e Vitit të Ri se një marrëveshje paqeje, e ndërmjetësuar nga Shtetet e Bashkuara, është “90 për qind” e gatshme, por se çështjet territoriale mbeten ende të pazgjidhura.

Rusia nisi pushtimin e plotë të Ukrainës në vitin 2022 dhe që atëherë ka zaptuar zona të gjera në lindje dhe jug të vendit, ndërsa sulmet e përditshme me raketa dhe dronë kanë shkaktuar viktima të shumta civile.

Gjatë vitit 2025, procesi gjyqësor ndaj ish-krerëve të Ushtrisë Çlirimtare të Kosovës në Dhomat e Specializuara në Hagë është shoqëruar me kritika të shumta për shkelje të standardeve të drejtësisë.

Monitorues dhe ekspertë vlerësojnë se kjo gjykatë ka shfaqur mungesë transparence, trajtim jo të barabartë të palëve dhe përdorim të pyetjeve paragjykuese ndaj dëshmitarëve.

Naim Qelaj, Avokati i Popullit:

“Kam parë mungesë të llogaridhënies, mungesë të raportimit dhe të mbikëqyrjes. Procedurat nuk janë në përputhje me standardet e sistemit të drejtësisë në Kosovë, ka probleme me përkthim dhe me të drejtat e të akuzuarve.”

Si element pozitiv të këtij procesi janë vlerësuar dëshmitë e diplomatëve ndërkombëtarë si James Rubin, Christopher Hill dhe gjenerali Wesley Clark, të cilët kanë ndihmuar në sqarimin e rolit dhe funksionimit të UÇK-së.

Ardian Bajraktari, avokat:

“Dëshmitarët e mbrojtjes kanë qenë shumë kredibilë dhe dëshmitë e tyre kanë ndihmuar në zbardhjen e së vërtetës për mënyrën e funksionimit të UÇK-së. Trupi gjykues, megjithatë, nuk është treguar gjithmonë objektiv ndaj palëve.”

Instituti i Kosovës për Drejtësi konfirmon se prokuroria ka përfunduar paraqitjen e provave, ndërsa mbrojtja është në fazën përfundimtare të dorëzimit të saj.

Blendina Veliqi, IKD:

“Procesi i mbrojtjes pritet të përfundojë në janar 2026, pas së cilës do të mbahen deklaratat përmbyllëse dhe brenda rreth 90 ditësh pritet shpallja e aktgjykimit.”

Sipas afateve procedurale, viti 2026 pritet të sjellë vendimin përfundimtar për ish-krerët e UÇK-së, një vendim që pritet të ketë ndikim të thellë politik, juridik dhe historik për Kosovën.

Ambasada zvicerane në Tiranë ka reaguar për ngjarjen e rëndë të ndodhur në Crans Montana në Zvicër, ku si pasojë e zjarrit në një bar humbën jetën 40 të rinj, dhe u plagosën rreth 115 të tjerë.

Duke e cilësuar një nga tragjeditë më të këqija që ka përjetuar vendi, gjithashtu ambasada zvicerane në Shqipëri shpreh ngushëllime për familjet dhe uron shërim të shpejtë për të plagosurit.

Në këtë fillim të Vitit të Ri, ndalemi për të kujtuar 40 të rinjtë që humbën jetën në një zjarr shkatërrues gjatë festimeve në Crans Montana, Zvicër.

Siç deklaroi Presidenti i Zvicrës, kjo është “një nga tragjeditë më të këqija që ka përjetuar vendi ynë”.

U shprehim ngushëllimet tona më të thella familjeve të tyre dhe urime të përzemërta për shërim dhe rikuperim të plagosurve.

Falënderime të sinqerta të gjithë atyre që kanë shprehur ngushëllimet dhe solidaritetin e tyre.

‘Numër alarmant aksidentesh në rrugën e Kombit’, PD denoncon papërgjegjshmërinë e qeverisë: Nuk u mor asnjë masë parandaluese.

Partia Demokratike denoncon me forcë papërgjegjshmërinë e plotë të institucioneve shtetërore, të cilat, edhe pse ishin të paralajmëruara për motin e keq, nuk morën asnjë masë parandaluese në Rrugën e Kombit. Mos hedhja e kripës dhe neglizhenca e plotë e qeverisë kanë sjellë kaos në qarkullim dhe një numër alarmant aksidentesh, duke vënë në rrezik serioz jetën e qytetarëve.

Në emër të Partisë Demokratike, u bëjmë thirrje qytetarëve të tregojnë kujdes maksimal, pasi qeveria ka treguar edhe një herë se është e paaftë dhe e pavullnetshme për të përmbushur detyrimet e saj më minimale ndaj sigurisë së qytetarëve!

Pas më shumë se pesë vitesh, Prokuroria e Posaçme (SPAK) duket se ka arritur në fazën finale të hetimeve mbi tenderin 15 milionë euro për ndërtimin e një Eco-Parku në zonën e Porto Romanos, aty ku dikur ishte një fushë e rrezikshme mbetjesh urbane.

Drejtuesi i SPAK-ut, Altin Dumani, deklaroi pak javë më parë në një seancë raportuese në Parlament se “hetimi për rastin e Eco-Parkut është drejt fundit dhe prokurori i çështjes do të konkludojë mbi materialet e administruara”.

Ndërkohë që Dumani u kujdes të mos japë publikisht asnjë konsideratë për ecurinë e hetimeve, “Boldnews.al” ka mësuar se procedimi penal është në fazën përfundimtare dhe, me shumë mundësi, do të ketë edhe persona përgjegjës për aferën e rëndë financiare.

Një ndër personat që besohet se do të duhet të japë llogari për tenderin e dyshimtë 15 milionë euro është Flauers Shoshi, drejtori aktual i Agjencisë Kombëtare të Ujësjellës-Kanalizimeve (AKUK), institucioni që ka kryer procedurat prokuruese për Eco-Parkun.

Shoshi ka mbajtur postin e zv.drejtorit të AKUK-ut në vitet 2019-2020, strukturë e cila në atë kohë quhej Agjencia Kombëtare e Ujësjellës-Kanalizimeve dhe Mbetjeve (AKUM). Ai rezulton të jetë personi kryesor përgjegjës që ka firmosur për dorëzimin e tenderit 15 milionë euro në duart e kompanisë italiane “De Mare srl”, e lidhur ngushtë me kompanitë e aferës së inceneratorëve, si edhe kompanisë shqiptare, “Victoria Invest”.

Në kohën e kryerjes së procedurave, në fund të vitit 2019 dhe në fillim të vitit 2020, Agjencia Kombëtare e Ujësjellës Kanalizimeve (dhe Mbetjeve Urbane), drejtohej nga Alqi Bllako, i cili u arrestua sapo mori mandatin e deputetit, në kuadë të hetimeve të Prokurorisë së Posaçme për çështjen e inceneratorit të Fierit dhe Tiranës.

Megjithatë, “Boldnews.al” ka mësuar se veprimet për tenderin e “Eco Parkut” janë drejtuar nga zëvendësi i Bllakos në atë kohë, Flauers Shoshi, pasi titullari i institucionit nuk ka qenë ato kohë në detyrë.

Sipas një biografie publike, Flauers Shoshi është në profesion inxhinier dhe ka punuar për shumë vite në ndërmarrjen e ujësjellës-kanalizimeve të Malësisë së Madhe. Në vitin 2019, ai u emërua zv.drejtor i Agjencisë Kombëtare të Ujësjellësave (AKUK) dhe, prej qershorit 2025, ai ka marrë emërimin si drejtor i kësaj strukture të rëndësishme shtetërore.

Hetimi për “Eco Park”, pas raportimit të “Boldnews.al”

Në shkurt të vitit 2020, Prokuroria e Posaçme nisi hetimin për procedurën me fond 15 milionë euro të Eco-Parkut të Porto Romanos, bazuar në një raportim të “Boldnews.al”, të datës 30 janar 2020, me titull: “Skandali/ Fituesi i tenderit 15 milion euro në Porto Romano u regjistrua në QKB 3 ditë para procedures”.

Në bazë të të dhënave zyrtare të siguruara nga redaksia, rezultonte se Agjencia Kombëtare e Ujësjellës-Kanalizimeve, e drejtuar në atë kohë nga Alqi Bllako, në datë 27 janar 2020 shpalli fitues të tenderit “Mbyllja e venddepozitimit ekzistues të mbetjeve të ngurta EKO-Park, Durrës”, bashkimin e dy operatorëve, konkretisht: kompaninë italiane “De Mare” srl, e regjistruar në QKR vetëm 3 ditë para tenderit, si dhe kompaninë shqiptare “Viktoria Invest International”.

Sipas njoftimit zyrtar të AKUM, tenderi ishte zhvilluar pa garë, më saktë me procedurën e “negociimit paraprak, pa shpallje”, nën argumentin e situatës emergjente të krijuar pas tërmetit të 26 Nëntorit 2019.

Megjithatë, “Boldnews.al” krijoi dyshime se procedura e ndjekur nga AKUM-i u aplikua, me qëllim që të shmangte garën në tenderin me fond limit 16 miliardë lekë të vjetra (pa TVSH), afërsisht 15 milionë euro.

Dyshimet

Në 18 Tetor 2019, regjistrohet në QKR “De Mare-Albania”, si dega e huaj e kompanisë e “De Mare” srl.

Në objektin e kësaj kompanie janë “drejtimi teknik dhe testimi, ndërtimi e menaxhimi i impianteve për llogari të vetën dhe të palëve të treta, private dhe publike, për ruajtjen dhe trajtimin e mbetjeve inerte urbane…., impiant të shkatërrimit termik dhe impianteve të rivlerësimit termik të mbeturinave, landfilleve, bonifikime…”.

Vetëm 3 ditë pas regjistrimit të “De Mare-Albania” si “degë e huaj” e “De Mare srl”, konkretisht në 21 Tetor 2019, Agjencia Kombëtare e Ujësjellës-Kanalizimeve dhe Infrastrukturës së Mbetjeve (AKUM) shpall tenderin për “mbylljen e vend-depozitimit të ngurta EKO-Park, Durrës”.

Tenderi u parashikua të mbyllej në datë 19 Nëntor 2019. Por, në kohën kur duhej të shpallej fituesi, Agjencia Kombëtare e Ujësjellës-Kanalizime njoftoi se tenderi ishte anuluar, për shkak të “gjendjes së fatkeqësisë natyrore”, të shpallur me Vendim të Këshillit të Ministrave më 27 Nëntor 2019, një ditë pas tërmetit tragjik.

Pas anulimit të tenderit të parë, Agjencia Kombëtare e Ujësjellës-Kanalizime e ka rishpallur procedurën e prokurimit publik. Por, kësaj radhe, ka ndjekur procedurën e “mbyllur”, atë që quhet “procedurë me negociim paraprak, pa shpallje”, duke shpallur fitues bashkimin e operatorëve “De Mare” srl. dhe “Victoria Invest International”.

Autoriteti kontraktor, Agjencia Kombëtare e Ujësjellës-Kanalizime e ka argumentuar këtë procedurë “të veçantë” tenderi “për shkak të nevojës ekstreme pas ngjarjeve të shkaktuara nga tërmeti i dates 26.11.2019”.

Ky argument duket se “çalon” për disa arsye, referuar të dhënave publike të mëparshme, të cilat sugjerojnë që mbyllja e landfillit të Porto-Romanos nuk lidhet me “emergjencën e tërmetit të 26 nëntorit 2019”.

Landfilli i Porto-Romanos konsiderohet një nga pikat më të nxehta në Shqipëri, me nevojë urgjente për mbylljen e tij. Në vitin 2016, Bashkia e Durrësit hartoi një plan-studimi, ku parashikohej mënyrë se si duhej mbyllur ky landfill.

Në Qershor 2018, kryeministri Edi Rama deklaroi se “Ne kemi marrë një angazhim që ta mbyllim zonën kanceroze të fushës së mbetjeve. Besoj deri në vjeshtën e vitit të ardhshëm”.

Por, megjithë premtimet politike, land-filli i Porto-Romanos nuk u arrit të mbyllej në vitin 2019. Megjithatë, deklarimet e zyrtarë të lartë dëshmojnë se land-filli i Porto Romanos ishte shndërruar në emergjencë për shkak të ndotjes alaramente. Dhe kjo gjë nuk kishte lidhje me tërmetin e 26 Nëntorit.

Që mbyllja e land-fillit të Porto Romanos ishte shndërruar në “emergjencë” konfirmohet edhe nga fakti që Agjencia Kombëtare e Ujësjellës-Kanalizimeve, administruese e asaj zone, kishte shpallur tenderin në Tetor 2019, pra rreth një muaj para tërmetit tragjik të 26 Nëntorit.

Gjithashtu, për shkak të shtrirjes dhe specifikës së zonës, land-filli i Porto Romanos nuk pësoi dëme strukturore (pasi nuk ka të tilla) nga tërmeti i 26 Nëntorit, që të mund të justifikonte ndërhyrjen “me negociim, pa shpallje paraprake” për shkak të pasojave të lëvizjeve sizmike.

Një ngjarje e rëndë ka ndodhur këtë të diel në Orikum, në qytetin e Vlorës. Sipas burimeve paraprake, një burrë ka ushtruar dhunë ndaj bashkëshortes së tij, duke i shkaktuar vdekjen, dhe më pas ka kryer vetëvrasje.

Gruaja u transportua fillimisht në spital në gjendje të rëndë shëndetësore, por nuk arriti të mbijetojë. Autori është gjetur pa shenja jete në banesën e tij, duke dyshuar se i dha fund jetës.

Policia ndodhet në vendngjarje dhe po vijon hetimet për zbardhjen e plotë të ngjarjes.

‘Paqja Fiskale’, një nga 5 pikat kryesore të paketës fiskale dhe më e debatuara fundvitin që lamë pas, ka hyrë në fuqi nga 1 janari.

Skema u jep mundësi bizneseve të mëdha, me të ardhura mbi 14 milionë lekë në vit, të lidhin një marrëveshje 1 vjeçare me të drejta rinovimi deri 2 herë, me administratën tatimore për parapagimin e tatimfitimit, në këmbim të moskryerjes së kontrolleve tatimore.

Gjatë kësaj marrveshjeje njëvjeçare, me mundësi rinovimi deri në dy herë, bizneset me të ardhura bruto mbi 14 milionë lekë në vit do të paguajnë paraprakisht tatimin mbi një bazë tatimore të rritur.

Ky parapagim nuk do të jetë i rastësishëm, por do të llogaritet mbi fitimin e tatueshëm të vitit të mëparshëm, të rritur paraprakisht me 18%.

Në fund të vitit, fitimi real do të krahasohet me këtë nivel të vlerësuar. Nëse fitimi real e tejkalon fitimin e vitit të kaluar të rritur me marzhin 18%, atëherë vetëm për pjesën që e tejkalon këtë kufi do të aplikohet një tatim shtesë prej 5%

Marrveshja ëahtë vullnetare dhe përjashton subjektet që janë nën hetim penal për mashtrim apo evazion fiskal. Aplikimi do të bëhet online përmes platformës e-Filing, ndrsa procedurat do të zbatohen nga drejtoritë rajonale tatimore pas miratimit të udhzimeve pëkatse nga Ministria e Financave

Një tjetër element i rëndësishëm i Paqes Fiskale është mundësia për rideklarimin e pasqyrave financiare të 5 viteve të fundit, me një tatim të sheshtë 5% dhe pa gjoba apo interesa, për sa kohë deklarimi bëhet paraprakisht

Drejtori i Përgjithshëm i Policisë së Shtetit, Drejtues Madhor Ilir Proda, përgëzon strukturat hetimore të DVP Shkodër për zbardhjen e vrasjes me lëndë eksplozive të komanduar në distancë dhe për bashkëpunimin dhe koordinimin mjaft efikas me Prokurorinë e Shkodrës.

ILIR PRODA:

“Falënderoj dhe përgëzoj publikisht Drejtorinë Vendore të Policisë Shkodër, strukturat hetimore dhe të gjitha forcat e angazhuara, si dhe Prokurorinë, për bashkëpunimin e ngushtë dhe profesional që çoi në zbardhjen e një ngjarjeje të rëndë kriminale, të kryer me përdorimin e lëndës eksplozive të komanduar në distancë.

Ky është një nga rastet ku pasqyrohet puna serioze dhe profesionale, e koordinuar dhe këmbëngulëse e Policisë së Shtetit, në bashkëpunim të plotë me organin e akuzës.

Këto rezultate dekurajojnë veprimtarinë kriminale dhe forcojnë më tej besimin e qytetarëve te Policia e Shtetit, e cila do të vijojë të jetë e vendosur në misionin e saj për garantimin e rendit, sigurisë, jetës, dhe pronës së qytetarëve.”