Ministri i Mbrojtjes, Pirro Vengu, në A2CNN, bëri një pasqyrim të situatës nga përmbytjet në vend dhe theksoi se po monitorohen lumenjtë që rrezikojnë daljen nga shtrati.

“Siç e kishim parashikuar, patëm reshje intensive dhe sot kishim një agravim në zonën e Durrësit, Laçit dhe një pjesë të ultësirës perëndimore në Lezhë. Gjithashtu, pasdite pati agravim në Gjirokastër. Menaxhimi i kësaj situate ka nisur që të shtunën, duke u përqendruar në mirëmenaxhimin e kaskadës së Drinit, të treja hidrocentralet, duke komunikuar edhe me bashkitë që të kishim një nivel të qëndrueshëm shkarkimesh, për të parandaluar situata të këqija në Bunë. Sot u përqendruam edhe në zonën e Gjadrit, ku pati kuota maksimale. Aktualisht, gjendem në Bashkinë e Lezhës, ku kemi dislokuar forca që do qëndrojnë në gatishmëri gjatë natës. Në Durrës ka patur situatë shumë të vështirë me vërshime që kanë qenë në total 110 mm, të përqendruara në 6 orë. Edhe lumi Ishëm ka shkaktuar problematika, rrëshqitje dhe dëme në infrastrukturë. Kemi 100 forca të dislokuara, 4 pompa me kapacitet të lartë”, tha Vengu.

Sipas tij, “ka disa elementë që kanë shkaktuar këtë situatë”.

“Ka pasur shumë inerte nga prurjet e ditëve dhe muajve të kaluar, që kanë krijuar bllokime të kanaleve. Hidrovoret kanë punuar në kapacitet të plotë, por duhet të kuptojmë që situata të tilla ndodhin edhe nga fenomenet që lidhen me daljen nga shtrati të lumenjve. Ne si Forca të Armatosura jemi shumë të përqendruar në këtë komponent, që të parandalojmë dëme edhe më të mëdha. Kemi vëmendje të posaçme për lumin Erzen sepse nuk duam që të tejkalojë kuotat maksimale”, shtoi ministri.

Në një intervistë në “Studio24” në News 24, Jorida Tabaku u shpreh se sot Partia Demokratike duhet të jetë e bashkuar përballë kësaj qeverie që ka shkaktuar vetëm korrupsion për vendin.

E pyetur për lëvizjen e Ervin Salianjit, Tabaku u shpreh se vlerëson këdo që ka mendim ndryshe, megjithëse nënvizoi se Salianji do të duhet t’i kishte dhënë mendimet e tij në strukturat e PD.

Situata e përmbytjeve në qarkun e Durrësit mbetet kritike, pasi reshjet intensive kanë shkaktuar depërtim uji në qindra banesa dhe kanë detyruar autoritetet të evakuojnë dhjetëra qytetarë.

Pas mbledhjes së Komitetit të Emergjencave Civile, ministri i Mbrojtjes Pirro Vengu njoftoi se rreth 800 banesa janë prekur nga uji, ndërsa 180 banorë janë evakuuar për shkak të rrezikut të shtuar.

Sipas tij, zonat më problematike mbeten ish-Këneta, Shkozeti dhe ish-Nishtulla, ku niveli i ujit vijon të jetë i lartë. Në terren janë angazhuar strukturat civile dhe Forcat e Armatosura, të cilat po punojnë paralelisht me shërbimet e Bashkisë së Durrësit për largimin e ujërave dhe garantimin e sigurisë së banorëve.

“Situata mbetet dinamike. Nuk do të largohemi nga terreni derisa uji të tërhiqet plotësisht. Reshjet pritet të vazhdojnë edhe gjatë natës”, deklaroi Vengu.

Banorët e evakuuar janë strehuar në dy kavalishenca të Ministrisë së Brendshme dhe asaj të Mbrojtjes, ku po marrin ndihmë ushqimore dhe mjekësore sipas nevojës.

Autoritetet po monitorojnë me vëmendje edhe basenin e lumit Erzen, pasi prurjet e shtuara mund të sjellin përkeqësim të situatës edhe në zonën e Shijakut.

Nga ana e saj, kryetarja e Bashkisë së Durrësit, Emiriana Sako, bëri të ditur se një pjesë e banorëve fillimisht kanë refuzuar evakuimin, por ndërhyrja u bë e domosdoshme për shkak të intensitetit të reshjeve dhe rrezikut real për jetën.

Autoritetet u bëjnë thirrje qytetarëve të ndjekin udhëzimet e strukturave të emergjencës dhe të shmangin lëvizjet e panevojshme në zonat e rrezikuara.

gijotina.com/

Kosova ka pranuar një dërgesë me sisteme raketore kundërtanke OMTAS nga Turqia, thanë autoritetet më 6 janar. Ministri në detyrë i Mbrojtjes, Ejup Maqedonci, tha se kjo dërgesë ishte kontraktuar me prodhuesin shtetëror turk, Roktesan, në dhjetor të vitit 2023.

“OMTAS [Orta Menzilli Tanksavar Silah] është një sistem modern raketor antitank me rreze të mesme veprimi, i zhvilluar për të neutralizuar mjete të blinduara moderne, përfshirë tanke me mbrojtje reaktive, si dhe fortifikata mbrojtëse ushtarake”, tha Maqedonci.

Sipas tij, rritja e llojllojshmërisë dhe sasisë së sistemeve kundërtanke për Forcën e Sigurisë së Kosovës, synon “mbulimin e distancave të ndryshme të veprimit, terreneve dhe skenarëve të kërcënimit, duke rritur fleksibilitetin operacional”.

Maqedonci nuk tregoi se sa sisteme pranoi Kosova, as sa kushtuan ato. Sipas uebfaqes së Roktesanit, OMTAS është efektiv ndaj mjeteve të blinduara dhe mund të përdoret edhe ditën edhe natën, pavarësisht kushteve atmosferike.

Ai mund të lëshohet nga makinat ushtarake dhe nga platforma trekëmbësh. Ky sistem ka rreze veprimi nga 0.2 deri në 4 kilometra dhe peshon 35 kilogramë (raketa së bashku me tubin lëshues). Sistemi ka një diametër prej 160 milimetrash dhe një gjatësi prej 1.8 metrash.

Vitet e fundit Kosova e ka përshpejtuar armatosjen, duke blerë armë kryesisht nga Shtetet e Bashkuara edhe nga Turqia, përfshirë raketa dhe dronë. Kosova është në proces të shndërrimit të FSK-së në ushtri. Përpjekja nisi më 2018 dhe pritet të zgjasë dhjetë vjet.

Përroi i Ficos ka dalë nga shtrati duke përmbytur lagjen “Varrosh” në Gjirokastër. Rrugët janë kthyer në lumenj, ndërsa situate paraqitet shumë shqetësuese.

Biznese të shumta janë përmbytur si edhe automjete janë nën ujë.

gijotina.com/

Emisioni “Në Shënjestër” në News24 ka zbërthyer dëshminë kyçe të pronares së BMW-së, e cila çoi në identifikimin e hallkës së fundit të arratisjes pas vrasjes së Mondi Mëhallës.

Pamjet filmike dhe hetimet lidhin djegien e “Audit” me largimin e autorëve me një BMW tjetër, duke nxjerrë në pah emra konkretë dhe role të dyshuara.

Në fokus del edhe figura e Oklid Ndino El Ouejdit, roli i tij dhe konflikti i ashpër financiar që dyshohet se çoi në atentatin ndaj Mondi Mëhallës.

Dëshmia më interesante që çoi edhe në identifikimin e disa prej personave të dyshuar si organizatorë dhe pjesëmarrës në vrasjen e biznesmenit Mondi Mëhalla, është ajo e një shtetaseje nga fshati Rajcë e Përrenjasit.

Ajo që rezulton të jetë edhe pronarja e vërtetë e automjetit BMW X1, me të cilin udhëtonin tre personat që ndaluan në Tiranë për t’u takuar me shtetasin nga Lezha Rolando Gjoni.

Me qëllim për t’i marrë këtij të fundit makinën ‘Audi’ A4 me ngjyrë të zezë që u përdor një ditë më pas në vrasjen e Mondi Mëhallës në Elbasan. Shtetasja Sh.T e cila tha se auutomjeti ‘BMW’ X1 që del nga garazhi i një pallati në Tiranë, më datë 29 nëntor 2025, është në pronësi të saj. Dhe ia kishte lënë në përdorim nipit të saj, Nevzat Spaho.

Nevzat Spaho që është pikërisht një nga personat që bashkë me Marsel Aranin dhe El Ouejd, ndodhen në këtë makinë.

Nga kqyrja e pamjeve filmike, nga rruga që të çon në vendin ku u dogj makina, vihet re të dalë një automjet në ngjyrë të errët, i cili largohet në drejtim të aksit rrugor Mirakë-Librazhd.

Nga ana jonë u arrit të identifikohet automjeti në fjalë dhe konkretisht ka rezultuar se është i markës ‘BMW’, Model 118 I, ngjyrë e zezë, me targa AB 686 VG, në pronësi të shtetases Sh.T, banuese në fshatin Rrajcë, Prrenjas.

Që rezulton të jetë gjyshja e shtetasit Nevzat Spaho.

E cila në deklarimin e saj dhënë për grupin hetues tha se ka në pronësi një automjet me të dhënat e mësipërme të cilin e ka blerë në qytetin e Pogradecit para disa kohësh, ku ka shkuar me nipin e saj, shtetasin Nevzat Spaho.

Po kështu kjo shtetase tha se që nga momenti i blerjes së automjetit dhe deri aktualisht, makina është përdorur gjatë gjithë kohës nga nipi i saj, Nevzat Spaho.

Pra sipas hetimeve doli se autori i vrasjes së Mondi Mëhallës dhe bashkëpunëtori i tij, pasi  kryen krimin dhe dogjën automjetin ‘Audi’ A4, që rezulton në pronësi të Xhino Agos, në fshatin Mirakë, u larguan nga aty me anë të makinës ‘BMW’ X1 në pronësi të gjyshes së Nevzat Spaho.

Spaho, që bashkë me Marsel Aranin dhe shtetasin Oklid Ndino EL Ouejdi. ishte edhe një nga personat që u takua për të marrë më datë 29 Nëntor, në Tiranë, me porosi të Armando Kolës, nga Rolando Gjoni, automjetin ‘Audi’ A4 me ngjyrë të zezë, që u përdor një ditë më pas për të vrarë Mondi Mëhallën.

Nga hetimet paraprake ka rezultuar se më datë 30 Nëntor 2025, rreth orës 20:27, në vendin e quajtur Karburanti ‘Xhaxhi Oil’, një person i paidentifikuar ka qëlluar me armë zjarri shtetasin Mondi Mëhalla dhe më pas është larguar në drejtim të aksit rrugor Elbasan- Librazhd me automjetin e markës ‘Audi’ A4, ngjyrë e zezë, me portobagazh, me targa AB 977 GE. Ky automjet është gjetur i djegur në vendin e quajtur fshati Mirakë, të qytetit të Librazhdit.

Nga pamjet filmike të marra pranë aksit rrugor në vendin ku është gjetur automjeti i djegur, konstatohet një dritë si ato të shpërthimit.

Po kështu, në vazhdim të kqyrjes së pamjeve filmike, nga rruga që të çon në vendin ku është djegur makina, vihet re të dalë një automjet në ngjyrë të errët, i cili largohet në drejtim të aksit rrugor Mirakë-Librazhd.

Nga ana jonë është arritur të identifikohet automjeti në fjalë që ka rezultuar të jetë i markës ‘BMW’, Model 118 I, ngjyrë e zezë, me targa AB 686 VG, në pronësi të shtetases Sh. T, banuese në fshatin Rrajcë, Prrenjas.

E identifikuar si gjyshja e shtetasit Nevzat Spaho.

Vetë ky shtetas, së bashku me automjetin janë shoqëruar për kryerjen e veprimeve proceduriale në ambientet e DVP Elbasan.

Ku gjatë kontrollit në banesën e tij është sekuestruar në cilësinë e provës materiale edhe një triko me kapuç, në ngjyrë të zezë, e gjetur e nderë në telin e rrobave.

Gjatë intervistimit paraprak, Nevzat Spaho, ka mbajtur qëndrim mohues dhe nuk ka pranuar të japë të dhëna në lidhje me ngjarjen.

Por kush është Oklid Ndino EL Ouejdi, I njohur në Elbasan si ‘Kiço’.

Personi që sot është në kërkim për vrasjen e biznesmenit Mondi Mëhalla më datë 30 Nëntor 2025 në sipërmarrjen e këtij të fundit në qytet.

Cilat janë konfliktet midis të dyve, që përfunduan me plumba ndaj ortakut?

Sipas të dhënave të siguaruara nga emisioni ‘Në Shënjestër’ pavarësisht se në dukje mban një mbiemër nga Magrebi, Oklid Ndino El Ouejd, është një shtetas shqiptar me banim në Elbasan, i moshës 35 vjeç.

I cili në rrethin e tij të ngushtë edhe atë të biznesit, njihet me dy pseudonime ‘Kiço’ dhe ‘Oliver’.

Dhe menjëherë pas krimit të vrasjes së Mondi Mëhallës thuhet se është larguar nga pika kufitare e Qafë Thanës, pa u ditur destinacioni i tij përfundimtar.

Por ajo që çon dyshimet te policia dhe familjarët e viktimës se ai është organizatori dhe vrasësi i njeriut të tyre të afërm është përplasja që Mondi Mëhalla kishte me atë që pretendohet të jetë strumbullari i krimit.

Oklid El Ouejdi i cili rezulton se në vitin 2018 ka të regjistruar në qytetin e Elbasanit një pikë import-eksporti dhe tregtim të automjeteve si dhe dhënies së tyre me qira, biznes që quhet Auto ‘Soleil’, por që në mënyrë ende të panjohur kishte hyrë në një konflikt me biznesmenin Mondi Mëhalla.

Sipas personave rreth tyre kulmi i kësaj përplasje kishte ndodhur 10 ditë përpara se biznesmeni Mëhalla të qëllohej për vdekje dhe pikërisht në karburantin ‘Xhaxhi Oil’ ku edhe ndodhi vrasja, mbrëmjen e datës 30 Nëntor 2025.

Këto dëshmi rrëfejnë se Mondi Mëhalla e kishte dhunuar fizikisht Oklid El Ouejdin brenda ambienteve të karburantit, për një prishje pazari në biznes që thuhet se kap shifrën e 700 mijë eurove, ku në pamundësi të shlyerjes së kësaj shume Oklid El Ouejd i kishte ofruar Mondi Mëhallës, katër apartamente në Tiranë, por që kishin probleme me pronësinë.

Kjo gjë thuhet se ka shkaktuar edhe zemërimin e biznesmenit Mëhalla, i cili zgjodhi ta dhunojë atë që ishte ortaku i tij në biznes. Por ajo që mbetet ende e paqartë është naiviteti që ka shoqëruar një pjesë të grupit të dyshuar si pjesëmarrës në krim.

Të cilët kanë përdorur automjete lehtësisht të identifikueshme nga grupi hetues. Ndërkohë që është ende e paqartë përfshirja e Xhino Agos, që është njëri nga ortakët e Mondi Mëhallës.

Makina ‘Audi’ A4 në pronësi të cilit u përdor në krim. Se si mund të kryesh një krim me makinën e atij që është ortaku yt në biznes./Në Shënjestër, BW

Kreu i PD Sali Berisha më herët ka ftuar në takim partitë politike, shoqëritë civile e sindikatat për bashkëpunim.

Tryeza “Zgjidhja për Shqipërinë”, theksohet se do të mbahet më 9 janar në orën 11:00. Kujtojmë se me një emër të tillë ka qenë partia e drejtuar nga Koco Kokëdhima.

I pyetur për ftesën e Berishës për tu ulur në tryezë, Adriatik Lapaj tha se është me rëndësi që qytetarët të dalin në shesh, përtej logove të partive. Në fund, ai theksoi se thelbi i protestës është të ndërgjegjësojë qytetarët për zgjedhje të lira e të ndershme dhe të vendoset diskursi publik si dorëheqja e Ramës si një nga njerëzit e korruptuar.

“Për çfarë na duhen tryezat? Ne na duhen qytetarët në shesh. Përfaqësues nga të gjitha organizatat, një komitet që selinë ta ketë në Bulevard duke marrë vendimin për largimin e Ramës. Unë jam i gatshëm të bëj një hap pas dhe të jem qytetar i thjeshtë. Unë jam i gatshëm të bëj hap pas nëse ky detyrohet të ikë. Thelbi i protestës është të ndërgjegjësojë qytetarët për zgjedhje të lira e të ndershme dhe të vendoset diskursi publik si dorëheqja e Ramës si një nga njerëzit e korruptuar. Sheshet do të duhet të jenë plot, por e kuptoj edhe humbjen e shpresës. Pasi njerëzit kanë parë si rrugë ikjen”, deklaroi Lapaj.

gijotina.com/

Partia Demokratike e mbylli vitin 2025 me SPAK-un dhe e hapi sërish me dosjen e Belinda Ballukut, duke lënë mënjanë shqetësimet e qytetarëve dhe të biznesit. Për hir të së vërtetës, opozita nuk fiton asnjë votë më tepër nga Foltoret për Belindën, sepse ky është një produkt i Drejtësisë dhe të gjithë e dinë se hetimi po ndodh nga presioni i SHBA dhe BE. Pra, opozita nuk ka ndonjë rol për të luajtur tek dera e SPAK-ut.

Përkundrazi PD duhet të rikthehet tek njerëzit, të ngrejë zërin për problemet e përditëshme.

Për shembull, rritja nga 1 janari 2026, e kostove të biznesit për kontributet e sigurimeve nuk gjen vend në ligjërimin e PD-së.

Mashtrimi i Ramës

Nga fillimi i vitit, paga bazë minimale mujore, e detyrueshme për çdo punëdhënës, do të jetë 50,000 lekë (nga 40,000 lekë që ishte më parë).

Vitin e kaluar, gjatë fushatës elektorale, kryeministri Edi Rama reklamoi rritjen e pagës minimale në 500 euro nga viti 2026 dhe bëri një premtim për bizneset, që preken direkt nga ky vendim. Këtë e përsëriti edhe në nisje të diskutimeve për buxhetin e shtetit për vitin 2026.

“Siç e kemi premtuar qeveria do të subvencionojë për një periudhë nëntë mujore me 90 milionë euro edhe shtesën e kostos të sigurimeve për të punësuarit në sektorin privat”, deklaroi Rama më 5 nëntor.

Në fakt, premtimi fillestar për subvencionimin e bizneseve ishte për një periudhë 18 mujore. Gjatë fushatës për zgjedhjet e përgjithshme parlamentare, Rama u kishte premtuar sipërmarrësve këtë lehtësi për një vit e gjysmë.

“Sipërmarrësit do të jenë detyruar të rrisin pagën minimale, por ne do t’u japim një lehtësi që gjatë 18 muajve pas pagës së parë, shteti atyre nuk do t’u kërkojë asnjë detyrim tatimor mbi shtesën prej 100 eurosh”, premtoi Rama më 29 mars 2025.

Ndërkohë PD vazhdonte të merrej herë me SPAK dhe herë me “SKAP”, duke lodhur edhe mbështetësit më besnik të saj, që janë biznesi i vogël dhe i mësëm. Kryetari i Shoqatës së Eksportuesve, Alban Zusi, në një prononcim mediatik paralajmëroi në fund të vitit të kaluar rritje të vështirësive për bizneset pas përgjysmimit të periudhës së subvencionit. Ai thekson se periudha 18-mujore ishte e domosdoshme për të amortizuar ndikimin e rritjes së pagës minimale.

“Afati 18 muaj ishte si një amortizator që biznesi të përshtasë kostot e tija dhe çmimet e shitjes me këtë rritje të detyruar. Veçanërisht kjo është shumë e ndjeshme për bizneset prodhuese dhe ato eksportuese,” thotë Zusi.

“Ulja në 9 muaj, shto këtu edhe rënien e pandalshme të euros që e rrit në tërësi koston e pagës së punonjesit duke i shtuar pas 9 muajsh edhe gjithë barrën fiskale që e shoqëron këtë rritje çfarë do prodhojë tjetër veçse rënie të mëtejshme të prodhimit vendas e veçanërisht vazhdimin e trendit rënës të eksporteve të viteve të fundit”, ka argumentuar Zusi.

Rritja e masës së kontributeve të sigurimeve shoqërore

Për punonjësit paga bruto rritet me 10,000 lekë (+25%). Tatimi mbi të ardhurat personale për këtë nivel page është minimal, ndaj pjesa më e madhe e rritjes reflektohet në pagën neto. Le të marrim një shembull konkret: Në dhjetor 2025: paga bruto 40,000 lekë → kontribute personale ~4,480 lekë → paga neto ~35,520 lekë. Në janar 2026: paga bruto 50,000 lekë → kontribute personale ~5,600 lekë → paga neto ~44,400 lekë. Pra rritja neto është +8,880 lekë/muaj. Kontributet e sigurimeve shoqërore dhe shëndetësore rriten me 1,670 lekë për çdo punonjës me pagë minimale. Kjo shtesë reflekton diferencën prej 10,000 lekësh në bazën e llogaritjes së kontributeve. Konkretisht për të punësuari, sigurimi minimal do të jetë 13.950 lekë në muaj nga 11.160 që paguhej deri më tani, të cilat i korrespondojnë pagës minimale bruto.

Për të vetëpunësuarit, totali i sigurimeve do të jetë 14.900 lekë në muaj nga 11.920 lekë që paguhej deri më tani. Për këtë kategori kostot e biznesit do të rriten ndjeshëm. Nga ana tjetër, rritja e pagës minimale nuk prek vetëm të punësuarit me të ardhura të ulëta pasi njëkohësisht rritet edhe paga maksimale për efekt kontributesh nga 176.416 lekë në 198.416 lekë, çka sjell një efekt të drejtpërdrejtë negativ mbi të gjithë të punësuarit me paga bruto mbi këtë prag, pasi përkthehet në rritje të bazës së kontributeve dhe ulje të pagës neto për të punësuarit me pagë mbi 176 mijë lekë në muaj.

Kosto shtesë për punëdhënësit

Për punëdhënësit, rritja e pagës minimale nënkupton një kosto më të lartë në pagimin e kontributeve të sigurimeve shoqërore e shëndetësore për çdo punonjës me pagë minimale. Për çdo të tillë, kontributet e punëdhënësit do të rriten me rreth 1,670 lekë në muaj (15% sigurime shoqërore + 1.7% sigurime shëndetësore mbi diferencën 10,000 lekë).

Pozicioni i PD-së për këtë shqetësim

Për rritjen e kostove të biznesit në pagesat e kontributeve të sigurimeve, ka munguar zëri institucional i PD-së në Kuvend. Zero deklarata për këtë çështje nga kryetari i grupit parlamentar të PD-së. Asnjë diskutim në komisionin e ekonomisë. E gjithë strategjia dhe energjia e opozitës u fokusua tek “paqja fiskale”, ku PD më tepër humbi pikë se sa fitoi. Opozita ishte e përgatitur për ta kundërshtuar amnistinë e Ramës. Duke u kapur pas aspekteve anësore, duke këmbëngulur në kërkesa të tilla si “na jepni listën e biznesmenëve që përfitojnë”, PD tregonte se thjesht po lante gojën.

I vetmi deputet i PD që propozoi amendament për këtë çështje ishte Igli Cara. “Fondi prej 1 000 milionë lekësh, i parashikuar në programin buxhetor “Tregu i punës” që përdoret për kompensimin e kontributeve të punëdhënësit për koston shtesë, që krijohet si rezultat i rritjes së pagës minimale, propozojmë ta shtojmë në 9 miliardë lekë”. PS e hodhi propozimin në kosh, por nëse PD ngre zërin fort, kjo mund të ndryshojë.

Opozita nuk e kupton se me këtë lëvizje mbi 200 mijë biznese qindra mijëra të punësuar në sektorin privat do të rreshtoheshin në krah të saj. Ka kohë për ta ndryshuar. Buxheti ndryshon me akte normative, nëse ka presion. Për momentin zëri i opozitës është i mekur!

gijotina.com/

Megjithëse ulja e temperaturave ishte paralajmëruar, ka munguar ndërhyrja në kohë për hedhjen e kripës në Rrugën e Kombit. Kompania që ka marrë përsipër mirëmbajtjen e autostradës “Salillari” shpk është kaq meglizhente sa “kursen” edhe kripën. Nga data 2 janar 2026 deri më sot, si pasojë e kësaj papërgjegjshmërie janë shkaktuar disa  aksidente të rënda.

Për shkak të prezencës së akullit, përgjatë segmentit Milot-Kalimash u regjistrun tre aksidente rrugore, ku janë përfshirë rreth 15 automjete, mes tyre një mikrobus me pasagjer dhe një automjet i koncesionarit.

Nga aksidentet u dëmtuan gjashtë persona, të cilët kanë marrë ndihmën e nevojshme mjekësore në spitalin e Rrëshenit dhe fatmiresisht ndodhen jashtë rrezikut për jetën.

Njësia e Autostradave po monitoron situatën dhe lëvizjen e mjeteve, duke u kërkuar drejtuesve të automjeteve që të jenë të pajisur me goma dimërore. Ndërkohë, disa mjete të firmës mirëmbajtëse më në fund, janë shfaqur për hedhjen e kripës në rrugë, me qëllim përmirësimin e kushteve të qarkullimit dhe shmangien e aksidenteve.

Numri i aksidenteve mund të jetë më i madh se sa raporton policia. Sipas denoncimeve të  qytetarëve në segmentin Rrëshen Kukës janë regjistruar mbi 20 aksidente, kryesisht për shkak të ngricave dhe rrugës jashtëzakonisht të rrëshqitshme. Qytetarët shprehen të shqetësuar dhe kërkojnë ndërhyrje të menjëhershme nga institucionet përgjegjëse për mirëmbajtjen e rrugës.

Redaksia ju rekomandon qytetarëve që të bëjnë padi kundër firmës së oligarkut Pëllumb Salillari për shkaktimin e traumave fizike, psikologjike dhe dëmeve materiale. Ata që kanë pasur fëmijë në makinë marrin dëshpërblim më të madh.

“Lajmëroni pak që Rruga e Kombit është e gjitha akull. Janë bërë mbi 20 aksidente, s’kemi parë ndonjëherë kaq shumë”, shkruan një qytetar.

Ndërsa një qytetare tjetër apelonte tek JOQ për kujdes maksimal: “Përshëndetje dhe gëzuar Vitin e Ri! Dua që nëpërmjet jush të lajmëroj të gjithë udhëtarët që bëjnë sot rrugën për Kukës, kujdes se rruga është shumë e rrëshqitshme. Kanë hedhur vaj në rrugë. Isha dëshmitare ku një makinë përpara meje rrëshqiti dhe, falë Zotit, nuk ndodhi gjë se e manovroi shumë mirë shoferi makinën!”

Deri në përmirësimin e situatës, drejtuesit e mjeteve këshillohen të lëvizin me shpejtësi të ulët, të ruajnë distancën dhe, nëse është e mundur, të shmangin udhëtimet e panevojshme në këtë aks rrugor.

gijotina.com/

Rreth 600 banorë të fshatit Oreshkë në Kukës kanë mbetur të bllokuar si pasojë e reshjeve masive që kanë pushtuar vendin këtë të martë.

Sipas raportimeve, reshjet kanë bërë që në rrugët e fshatit të ketë rënie gurësh dhe inertësh duke bllokuar thuajse totalisht lëvizjen e mjeteve dhe këmbësorëve.

Ndërkohë, probleme serioze janë evidentuar edhe në fshatin Grykë Çaje dhe në rrugët e qytetit të Kukësit, ku rrëshqitjet e dherave, gurëve dhe pemët e rrëzuara po rrezikojnë kalimtarët dhe mjetet.

Banorët shprehen se situata paraqitet mjaft e rrezikshme, ndërsa njoftojnë se deri më tani bashkia e qytetit nuk ka marrë asnjë masë për normalizimin e situatës.

Teksa numërimi i votave me postë dhe me kusht po vazhdon në Kosovë, sipas rezultateve të deritanishme ka ndryshuar ndarja e vendeve që partitë kanë fituar në zgjedhjet e parakohshme parlamentare të 28 dhjetorit.

Në bazë të votave të numëruara deri në orën 15:30 të 6 janarit, Lëvizja Vetëvendosje pritet të ketë 57 deputetë në legjislaturën e dhjetë të Kuvendit të Kosovës, që ka 120 vende.

Votat me postë dhe ato me kusht duket se ia kanë siguruar edhe një deputet LVV-së të Albin Kurtit, që i fitoi bindshëm zgjedhjet e parakohshme duke marrë mbi 50 për qind të votave.

Partia Demokratike e Kosovës e Bedri Hamzës, pritet të ketë 23 deputetë, aq sa siguroi me votat e rregullta.

Me rezultatet aktuale, Lidhja Demokratike e Kosovës e Lumir Abdixhikut duket se ka humbur një deputet, pasi parashihet që të ketë 14 deputetë – nga 15 sa kishte pas numërimit të votave të rregullta.

Aleanca për Ardhmërinë e Kosovës e Ramush Haradinajt mbetet në numrin e njëjtë të deputetëve, përkatësisht me gjashtë.

Ndërkaq, Lista Serbe – partia e serbëve të Kosovës që është e afërt me Beogradin – pritet të ketë nëntë nga dhjetë vendet e rezervuara për komunitetin serb.

Komisioni Qendror i Zgjedhjeve ka thënë se pret që të shpallë rezultatet përfundimtare më herët seç kishte planifikuar, përkatësisht para 19 janarit.

Pas përfundimit të numërimit të votave me kusht dhe postë, pritet të numërohen edhe ato të personave me nevoja të veçanta.

Në zgjedhjet e 28 dhjetorit morën pjesë rreth 45 për qind të gati 2 milionë qytetarëve me të drejtë vote./REL

Nje aksident rrugor me pasojë plagosjen e dy personave është regjistruar në hyrjen jugore të qytetit të Lushnjes.

Në ngjarje janë përfshirë një automjet tip “Benz” dhe një mjet tip kamionçinë.

Sipas të dhënave paraprake, aksidenti ka ndodhur si pasojë e mosrespektimit të rregullave të qarkullimit rrugor. Menjëherë pas njoftimit, shërbimet e Policisë kanë mbërritur në vendngjarje, ndërsa ambulancat kanë transportuar në spital dy drejtuesit e mjeteve të përfshira në përplasje.

Burime nga spitali bëjnë me dije se të plagosurit ndodhen jashtë rrezikut për jetën dhe po marrin ndihmën e nevojshme mjekësore.

Reshjet e dendura të shiut kanë shkaktuar kaos në qytetin e Durrësit. Bëhet me dije se si pasojë e përmbytjeve mbi 40 familje janë evakuuar nga shtabi Emergjencave Civile dhe Forcat e Armatosura.

Ushtria ndodhet në Durrës që prej orëve të para të paradites me katër pompa te fuqishme, pasi janë shkaktuar përmbytje të mëdha.

Reshjet e dendura të shiut kanë nisur gjatë natës dhe kanë vijuar edhe përgjatë ditës së sotme, duke shkaktuar situata shqetësuese në disa qytete.

Kontrollet e Policisë Kufitare në hyrje dhe dalje të Republikës së Shqipërisë, në PKK Rinas, kanë çuar në goditjen e 6 rasteve të tentativës për kalim të paligjshëm të kufirit dhe 1 rasti kontrabande.

Si rezultat i verifikimeve, u arrestuan në flagrancë 6 shtetas kinezë, të dyshuar për përdorim të dokumenteve të falsifikuara. Në pranga ranë M. B., 29 vjeç, X. Zh., 66 vjeç, Zh. W., 52 vjeç, H. J., 45 vjeç, W. Zh., 38 vjeç dhe G. H., 43 vjeçe.

Ata akuzohen për veprën penale “Falsifikimi i pasaportave, letërnjoftimeve ose i vizave, kryer në bashkëpunim”.

Gjatë kontrollit, këta shtetas paraqitën pasaporta të Hong Kongut, për të cilat shërbimet e Policisë Kufitare dyshuan se ishin të falsifikuara.

Nga ekzaminimi laboratorik u konfirmua se dokumentet ishin false, duke çuar në sekuestrimin e 6 pasaportave.

Ndërkohë, një tjetër rast u evidentua në hyrje të vendit. Shtetasja A. W., 45 vjeçe, me shtetësi bjelloruse, e cila udhëtonte në itinerarin Treviso–Tiranë, u ndalua për kontroll të thelluar për shkak të dyshimeve mbi qëllimin e udhëtimit.

Gjatë kontrollit fizik dhe të bagazheve iu gjetën dhe sekuestruan mallra për qëllime estetike, si botox dhe fillera, për të cilat kërkohen kushte të posaçme transporti dhe licencë e veçantë posedimi dhe përdorimi, dokumente që ajo nuk i dispononte.

Në vijim, shtetasja bjelloruse u arrestua në flagrancë për veprat penale “Kontrabanda me mallra të ndaluara” dhe “Kontrabanda me mallra të licencuara”.

Prokuroria e Tiranës u ka drejtuar kërkesa për informacion dhe dokumentacion disa institucioneve dhe palëve të përfshira në procedurat e tenderit për ndërtimin e Aeroportit të Vlorës.

Sipas burime pranë organit hetues të kryeqytetit, janë disa situacione, që ngrenë dyshime për fonde të fryra dhe rezultate të dobëta në kryerjen e ndërtimit të veprës.

Indicia është marrë mbi denoncime por edhe problematika që janë vërejtur në pjesën e ngritur të infrastrukturës, përfshirë edhe përmbytjet si pasojë e reshjeve.

Sipas burimeve prokurori Ndini Tavani është duke kryer veprime të ndryshme hetimore, për të dokumentuar problematika që mund të çojnë në evidentimit të shkeljeve ligjore.

Lidhur me aeroportin e Vlorës, Gjykata e Apelit me Juridiksion të Përgjithshëm Tiranë, më 24 dhjetor hoqi pjesërisht masën e sekuestros preventive, e vënë më 17 tetor nisur nga një hetim që u regjistrua mbi përplasjen e aksionerëve.

Një 22-vjeçar autor i disa vjedhjeve në Vlorë ka rënë në prangat e policisë.

Sipas njoftimit të bluve i riu me precedent të mëparshëm penal për vjedhje ka grabitur 4 dyqane në datën 1 dhe 2 janar në lagjet ‘28 Nëntori’, ’29 Nëntori’ dhe ‘24 Maji’.

Gjatë kontrollit të banesës së 22-vjeçarit blutë sekuestruan, në cilësinë e provës materiale, një sasi cigaresh, të dyshuara të vjedhura, si dhe një thikë.

Radha kilometrike vijon edhe sot në pikën kufitare të Kakavijës, ku emigrantët shqiptarë po kthehen drejt vendeve të tyre të punës pas festave.

Kolonat e automjeteve arrijnë deri në 7 kilometra, ndërsa pritja në doganë shkon mbi 3 orë.

Situata e rënduar është shkaktuar kryesisht nga pala greke, e cila po punon vetëm me dy sportele, ndërkohë që pala shqiptare ka në funksion katër sportele, në përpjekje për të përballuar fluksin e lartë.

Emigrantët shprehen të revoltuar pasi shumë prej tyre jetojnë në ishuj dhe nesër duhet ti kthehen punës.

Sipas të dhënave zyrtare, gjatë 24 orëve të fundit kanë kaluar kufirin mbi 9 mijë shtetas, shumica emigrantë që rikthehen në Greqi për të rifilluar punën.

Fluksi i lartë ka sjellë lodhje dhe shqetësim te udhëtarët, të cilët presin për orë të tëra në kushte të vështira.

Partia Demokratike ka akuzuar qeverinë për shpërdorim të fondeve publike përmes kontratave të klasifikuara të Agjencisë Kombëtare të Shoqërisë së Informacionit (AKSHI).

Në një deklaratë për media, zëdhënësja e Antikorrupsionit në Partinë Demokratike, Genta Vangjeli thekson se mungesa e fondeve për ndihmën ekonomike, barnat, fermerët apo pensionet lidhet drejtpërdrejt me korrupsionin dhe klientelizmin e pushtetit.

Sipas Vangjelit, Partia Demokratike ka kryer dhjetëra denoncime për AKSHI-n, ku është evidentuar abuzim sistematik me prokurimet dhe përdorim i pajustifikuar i kontratave të klasifikuara. Ajo bëri me dije se shumë prej këtyre kontratave kanë afate mbi 24 dhe 36 muaj dhe kanë nisur pas marrjes së detyrës nga drejtuesja e AKSHI-t, Mirlinda Karçanaj.

Sipas listës së publikuar nga PD, përfituesit kryesorë të këtyre fondeve janë disa kompani private, mes tyre:

ABS shpk (17 milionë euro), FIRST shpk (18.5 milionë euro), Infosoft Systems (12.6 milionë euro), TBS 96 shpk (11.8 milionë euro), AES Communication shpk (6.7 milionë euro), Soft Solution shpk (5 milionë euro), IKUBINFO (3.8 milionë euro), Alisa Albania (2.1 milionë euro), Image Communication Development (2 milionë euro), Intech + (1.6 milionë euro), Fastech shpk (1.2 milionë euro) dhe Trezhnjeva shpk (1.2 milionë euro).

Deklarata e zëdhënëses së Antikorrupsionit në PD, Genta Vangjeli:

Nëse sot mungojnë paratë për ndihmën ekonomike, për barnat, për fermerët apo për pensionet, arsyeja është e thjeshtë: paratë e shtetit përfundojnë në duart e pushtetit.

Partia Demokratike ka kryer dhjetëra denoncime të lidhura drejtpërdrejt me AKSHI-n, ku është evidentuar qartë klientelizmi dhe abuzimi sistematik me prokurimet.

Për publikun dhe në vëmendje të SPAK, sot sjellim numrin e lartë të kontratave të klasifikuara që AKSHI ka lidhur me kohëzgjatje mbi 24 apo 36 muaj. Këto kontrata kanë nisur pas marrjes së detyrës si drejtuese e AKSHI-t nga Mirlinda Karçanaj.

Kontratat e klasifikuara, sipas ligjit, përjashtohen nga prokurimi publik vetëm kur kanë ndikim të veçantë në çështjet e mbrojtjes dhe sigurisë kombëtare.

Ndërsa kontratat e klasifikuara të AKSHI-t kanë si objekt shërbime sigurimi, ruajtjeje dhe, në pjesën dërrmuese të tyre, shpenzime për mirëmbajtjen e pajisjeve të zyrave.

Sipas të dhënave zyrtare të Spending data, nga viti 2016 e deri më sot, për 10 vite, shqiptarët kanë paguar plot 104 milionë euro për kontrata të tilla.

Pa asnjë njoftim publik, pa transparencë, pa publikuar të dhëna apo drafte kontratash dhe përmes kontraktimeve të mbyllura pa garë, rezulton se pagesat më të larta për kontrata të klasifikuara nga AKSHI kanë shkuar për:

ABS shpk, me pronar Gerond Meçe (aktualisht  kaluar në emër të nënës së tij), e cila ka përfituar 17 milionë euro, kryesisht për shpenzime mirëmbajtjeje të pajisjeve të zyrave.

FIRST shpk, me pronarë prestanome dhe shtetasin Gëzim Hoxha, ka përfituar 18.5 milionë euro, nga të cilat 3.5 milionë nga AKSHI dhe 15 milionë euro me një pagesë të vetme nga Autoriteti Kombëtar për Çertifikimin Elektronik dhe Sigurinë Kibernetike.

Infosoft Systems, me pronarë Armand Sharra dhe Bledar Dhima-12.6 milionë euro.

TBS 96 shpk, me pronar Artan Xhori-11.8 milionë euro.

AES Communication shpk, me pronar Jani Angjeli-6.7 milionë euro.

Soft Solution shpk, me pronar Ermal Beqiri-5 milionë euro.

IKUBINFO, me pronarë Romeo Sherko dhe Armand Sharra-3.8 milionë euro.

Alisa Albania, me pronarë vëllezërit Dulaku-2.1 milionë euro.

Image Communication Development, me pronar Igli Gjelishti-2 milionë euro.

Intech +, ish-pronar Ilir Beqaj, aktualisht Sokol Sinani-1.6 milionë euro.

Fastech shpk, me pronar Andis Papa-1.2 milionë euro.

Trezhnjeva shpk, me pronar Adem Trezhnjeva-1.2 milionë euro.

Partia Demokratike i kërkon SPAK-ut të finalizojë hetimet për AKSHI-n, duke marrë në konsideratë kontratat e kategorizuara si ‘të klasifikuara’, dhe hetimi të shkojë tek Edi Rama, si eprori i AKSHI-t dhe përgjegjësi kryesor për planifikimin dhe organizimin e këtyre skandaleve që kanë sjellë shpërdorimin e miliona eurove të shqiptarëve.

Shqiptarët kërkojnë drejtësi dhe ajo nuk mund të ekzistojë për sa kohë Edi Rama nuk i dorëzohet drejtësisë.

Një 31-vjeçar ka rënë në prangat e Policisë së Tiranës, pasi mbante pa leje në banesën e tij në fshatin Lalm, Vaqarr, një armë zjarri të llojit pushkë.

Njoftimi i policisë:

Tiranë/Finalizohet operacioni policor i koduar “Village”, në vijim të goditjeve kundër armëmbajtjes pa leje.

Arrestohet 1 shtetas që mbante pa leje, në banesë, 1 armë zjarri pushkë.

Sekuestrohet arma.

Në vijim të kontrolleve dhe punës informative, me synim evidentimin dhe goditjen e rasteve të armëmbajtjes pa leje që rrezikojnë të drejtat e qytetarëve dhe cenojnë rendin publik, shërbimet e Komisariatit të Policisë Nr. 6 finalizuan operacionin “Village”.

Si rezultat i operacionit u arrestua në flagrancë shtetasi Ernald Seferi, 31 vjeç.

Gjatë kontrollit në banesën e tij, në fshatin Lalm, Vaqarr, u gjet dhe u sekuestrua me cilësinë e provës materiale, 1 armë zjarri pushkë që posedohej pa leje.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.