Mes simbolit të shqiponjës dhe numrit 7 që ishte ironi ndaj SPAK për kushtet në kafaz, ish-presidenti Ilir Meta ndaj të cilit rëndojnë tre akuza, e nisi gjyqin duke përshëndetur deputetët dhe mbështetësit qe ishin prezentë. Gazetarja Anila Hoxha ka treguar në Top Story se ish-bashkëshortja e tij, Monika Kryemadhi edhe pse ishte e pranishme në sallën e gjyqit, nuk pati asnjë shkëmbim shikimesh me Metën. “E ka kthyer në një gjuhë të vetën përdorimin e shqiponjës. Ai formoi edhe numrin 7, një ironi me SPAK-un, i cili më herët ka refuzuar qëndrimin e të pandehurve për të dalë nga kafazi, pasi, me gjasë, janë thënë se kushtet janë me 5 yje dhe Meta tha se janë me 7 yje. Ndërsa komunikuan përmes kutisë së kafazit të xhamtë, Kryemadhi nuk pati asnjë hedhje sysh ndaj ish-bashkëshortit të saj. Ajo e mbante shikimin nga prokurorët e SPAK-ut, gjykata ose publiku. Kryemadhi, si e bashkëpandehur, shprehu ironinë e saj kur tha se është e vërtetë që këto salla janë model amerikan, por shtoi se modeli amerikan na ka mësuar që edhe vrasësit serialë mund të ulen në sallën e gjykimit pranë avokatëve”, u shpreh gazetarja Anila Hoxha. #voxnews #media #news #monikakryemadhi #ilirmeta
Monika Kryemadhi, e ftuar në emisionin “Të Paekspozuarit”, ka folur për dosjen CEZ-DIA, ndërsa ka hedhur akuza të rënda ndaj ish-kreut të SPAK, Altin Dumani. Sipas saj, Dumani është kapur në përgjim me ish-ministrin e Drejtësisë, Ulsi Manja, ndërsa i ka kërkuar kryeministrit Edi Rama që ta bëjë kryeprokuror të SPAK se “do të fusë në burg Ilir Metën” Pjesë nga biseda Baton Haxhiu: Fuqia e prokurorisë në opinionin publik është në momentin kur vendos të japë pjesë nga dosja, është përparësi derisa fillon procesi gjyqësor pasi ashtu ndërton rrëfimin e vet. Kjo fuqi zhduket kur fillon gjykimi, aty pastaj jeni barabartë. Tani po shoh, që prokuroria apo gazetarët, ka dalë kjo 200 mijë euro. Meqenëse kjo pjesë e dosjes është asgjësuar, nuk e di pse ka dalë në publik dhe pse është e tillë. Nëse është e asgjësuar, ka elementë politikë. Dua të ma sqaroni si është e mundur që kur të gjithë gjërat janë kopsitur nga prokuroria, ende janë në pafuqinë e spekulimit. Është e patolerueshme, pasi e kanë patur kohën e mjaftueshme ta shkatërrojnë imazhin e Metës. Pse ka dalë kjo, dua të ma sqaroni. Monika Kryemadhi: Kjo nuk është provë, nuk ekziston si provë. Në akuzë 240 faqe, 210 faqe janë me perceptim, më the, të thashë, mendojmë, u tha, më tha, do të vij, a ke, ku je, do më blesh një palë vëthë, muhabete grash. Në 240 faqe, 200 faqe flitet për Monikën, marrëdhënia ime me kushëririn tim, deputetët, fëmijët, e me radhë. Është telefoni im për vitin 2014 dhe kanë marrë mesazhe. Aty është bërë çështje që ky zotëria të futet në burg. Kur ishim në seancë paraprake, kur zoti Meta filloi të shpjegojë procesin e CEZ-DIA, sepse shqiptarët nuk e dinë se si kompania e Ismailajt ka patur 71 kompani. Në këtë histori, që unë ta kisha ditur që Ismailajn e kanë futur në burg, se donin të mbyllnin historitë e CEZ-DIA është histori tjetër. Sotir Kllapi dhe Arben Kraja, ngelën të shokuar kur Meta fliste për CEZ-DIA, pasi e ka bërë Altin Dumani. Pse e ka marrë përsipër? Ka çuar haber nëpërmjet Ulsi Manjës, ka kërkuar, është edhe fotografia dhe përgjimi, prandaj nuk u bë Dumani kryeprokuror, sepse ka qenë i përzgjedhur i Berishës për te Krimet e Rënda, ky i tha Ramës, më bëj kryeprokuror se do të fus në burg Ilir Metën. E ke të regjistruar, e ka Operacionalja me shërbimet e huaja. Me këtë arsye nuk e zgjodhën kryeprokuror. Pra ngelën, nuk erdhën prokurorët, i thanë Dumanit shko mbroje vetë CEZ-DIA. Duke qenë se i zhbëhet çështja, kanë marrë këtë mesazh, në akuzën e parë nuk është mesazhi. Kjo gjë që pretendojnë këta nuk ekziston as si provë dhe as si veprim. #voxnews #media #news #monikakryemadhi
Tenderët e Agjencisë Kombëtare të Shoqërisë së Informacionit kanë qenë prej shumë kohësh të paracaktuar dhe me klane të fuqishme, aq sa shumë drejtorë, ish drejtorë, punonjës apo biznesmenë të fuqishëm, kanë masa sigurie dhe po hetohen nga Prokuroria e Posaçme. Madje, këta individë kanë vepruar se organizatë kriminale, grup kriminal, ndërsa duket se, edhe pas largimit të disa ish-drejtorëve, sërish drejtuesit e rinj po veprojnë njësoj. Vendin e Mirlinda Karçanajt e zuri një tjetër patronazhist, si Igli Tafa, që deri dje ka qenë po drejtor i përgjithshëm i Autoritetit Kombëtar për Sigurinë Kibernetike (AKSK), një institucion që del edhe në dosjen e SPAK-ut, pasi ka bërë tendera me vlera shumë të mëdha, por që deri më tani kanë ngelur në letër dhe s’janë hetuar për të prodhuar masa sigurie. Koha ka kaluar dhe tashmë, vendimet po i merr sërish Tafa, që në rastin që ka analizuar Vox News, kanë qenë totalisht të paracaktuara. Këto janë nga ato tenderët që kanë ngelur te AKSHI, pasi pjesa më e madhe e tyre ka kaluar në duart e Operatorit të Blerjeve të Përqendruara, me një vendim qeverie, pasi në të kaluarën ky organ që duhet të digjitalizonte Shqipërinë, veçse ka vepruar për disa klane. Ditët e fundit, AKSHI ka shpallur fituesin e një tenderi që kishte mbetur te ky institucion, ku fitues ka dalë kompania ATOM, me pronarë Luan Basha dhe Armand Agolli. Nën zë, të gjithë punonjësit e AKSHI-t e dinin se tenderin do e fitonte pikërisht kjo firmë, për shkak të së kaluarës apo lidhjes që këta pronarë kanë me disa punonjës të brendshëm, duke sjellë në fakt një lidhje të ngushtë, lidhje që në të kaluarën kanë prodhuar edhe dosje të mirëfillta. Tenderi ka si objekt “mirëmbajtje e regjistrave profesional mjekësor (infermieri, mjeku, stomatologu, farmacisti)”, me fondet e buxhetit të shtetit. Kohëzgjatja e kontratës për ekzekutimin është 24 muaj shërbim mirëmbajtje nga nënshkrimi i kontratës, teksa ka pasur si fondi limit 50,270,220 lekë, ose rreth 520 mijë euro. Që në momentin e shpalljes, tenderi ka qenë i paracaktuar, madje i denoncuar edhe nga media për lidhjen e pronarëve me disa anëtarë të komisionit të vlerësimit të ofertave. Dhe, nëse organet ligjzbatuese faktojnë këto lidhje, atëherë do të kemi një tjetër dosje të denjë për SPAK-un. ATOM-i, në këtë tender, ofroi 44 milionë lekë, ndërkohë që dy firma as nuk dhanë ofertë ekonomike. Një tjetër, Ovla dhe Kreatx ofroi 56 milionë lekë. Vox News ka shfletuar edhe dokumente të tjera të kompanisë ATOM, ku dy pronarët e saj, Luan Basha dhe Armand Agolli, e kanë kthyer firmën në një “minierë” ari, me të njëjta fitime dhe xhirime si firmat që ndodhen në dosjen e SPAK-ut, që lëviznin miliona euro dividente dhe fitime. Kjo firmë, në vitin 2025, ka publikuar bilancet e kompanisë ku rezulton se kanë dalë me një fitim prej 72 milionë lekësh, fitime të cilat i kanë ndarë divident. Para’ që janë marrë dhe xhiruar në llogaritë e dy pronarëve, teksa ndonjë hetim i mundshëm i organeve ligjzbatuese mund të gjejë se ku përfunduan. #voxnews #media #news
Glenn Gibbins, kandidat i partisë Reform UK të drejtuar nga Nigel Farage, është zgjedhur këshilltar komunal në zonën e Sunderland, pavarësisht postimeve të mëparshme raciste, misogjene dhe homofobe të publikuara online. Në një postim të vitit 2024, Gibbins kishte shkruar: “Nuk arrij ta besoj sa shumë nigerianë ka në qytet… duhet t’i djegin të gjithë dhe t’i përdorin për të mbushur gropat e rrugëve”. Pas zgjedhjes së tij në distriktin Hylton Castle, në media dolën edhe postime të tjera ku ai i përshkruante emigrantët që mbërrijnë me gomone si “një ushtri myslimanësh që një ditë do të kthehet kundër nesh”. Ai gjithashtu kishte publikuar komente seksiste dhe homofobe ndaj figurave publike britanike, përfshirë deklarata fyese ndaj moderatoreve televizive dhe një koment gjatë një ndeshjeje ragbie në vitin 2021, ku shkruante se gratë “duhet të merren me gatim, qendisje dhe shtëpinë”. Fillimisht, drejtues të Reform UK minimizuan polemikat. Nënkryetari i partisë, Richard Tice, deklaroi për BBC se partia po festonte suksesin zgjedhor dhe se raste të tilla do të trajtoheshin përmes procedurave të brendshme. Megjithatë, pas reagimeve të forta publike, Reform UK njoftoi më vonë pezullimin e Gibbins nga partia në pritje të një hetimi të brendshëm. Nga ana tjetër, ministrja britanike e Arsimit, Bridget Phillipson, e cilësoi rastin si shembull të “racizmit dhe përçarjes” që, sipas saj, po futet në politikën britanike nga Reform UK. Edhe Partia Laburiste reagoi ashpër, duke akuzuar Nigel Farage dhe drejtuesit e Reform UK se nuk dënuan menjëherë deklaratat raciste të kandidatit të tyre. #voxnews #media #news
Kryetari i Partisë Demokratike Sali Berisha, në foltoren e radhës që u zhvillua këtë të hënë përpara godinës së Kryeministrisë falënderoi qytetarët që morën pjesë në protestë, duke i cilësuar si “guximtarë” dhe “të pamposhtur” përballë asaj që ai e quajti një “diktaturë”. Lideri demokrat deklaroi se mbështetësit e opozitës po shkruajnë “një kapitull të ndritur të historisë kombëtare” përmes qëndresës dhe vendosmërisë së tyre. Kryedemokrati duke u ndalur te protesta e 8 majit, tha se mijëra qytetarë sfiduan kushtet e motit për të shprehur kundërshtimin ndaj qeverisë. #saliberisha #voxnews #media #news @voxnews.al
Situata politike brenda Partisë Laburiste në Britani po përshkallëzohet, pasi dhjetëra deputetë kanë kërkuar largimin e kryeministrit Keir Starmer, ose të paktën vendosjen e një afati për dorëheqjen e tij. Sipas raportimeve, tre deputetë të Laburistëve që shërbenin si ndihmës ministra kanë dhënë dorëheqjen dhe i kanë kërkuar Starmer-it të largohet nga posti i kryeministrit. Ndërkohë sipas BBC-së, numri i deputetëve që kërkojnë publikisht dorëheqjen e tij ka arritur në 57, nga 55 që ishte më herët gjatë ditës. Deputetë të ndryshëm kanë shprehur pakënaqësi për drejtimin e qeverisë dhe mungesën e besimit publik. Disa prej tyre kërkojnë që Starmer të caktojë një afat të qartë për largimin e tij, duke argumentuar se Partia Laburiste ka nevojë për një lidership të ri për të rikthyer besimin e qytetarëve. Nga ana tjetër, Sekretari i Strehimit Steve Reed u shpreh se shumica e deputetëve brenda partisë nuk mbështesin dorëheqjen e kryeministrit. Ai tha se rreth “90% nuk duan që kjo të ndodhë” dhe se qeveria duhet të fokusohet te prioritetet e qytetarëve, jo te ndryshimi i lidershipit. “Ne duam të fokusohemi te ajo që do publiku… jo të flasim me veten për një lider të ri,” tha ai. Ai shtoi se qeveria pranon se nevojiten ndryshime, por nuk ndihmon “të hidhen poshtë” kryeministrat. Sipas tij, ndryshimet e shpeshta të kryeministrave, siç ndodhi me Partinë Konservatore, nuk janë zgjidhje e qëndrueshme. Ndërkohë, deputetja Catherine West është tërhequr nga ideja për të nisur një sfidë për lidershipin, por ka kërkuar që Starmer të largohet deri në muajin shtator. Situata është tensionuar edhe më tej me dorëheqjen e disa ndihmësve parlamentarë të ministrave, përfshirë Joe Morris, Tom Rutland dhe Naushabah Khan, të cilët kanë shprehur mungesë besimi në aftësinë e kryeministrit për të udhëhequr vendin. Joe Morris, ndihmës i ministrit të Shëndetësisë Wes Streeting, tha se vendi ka nevojë për një qeveri që përmbush premtimet për uljen e kostos së jetesës dhe investime në komunitete. Sipas tij, Starmer nuk gëzon më besimin e publikut për të udhëhequr këto ndryshime. Këto zhvillime vijnë në një moment të vështirë për qeverinë britanike, ndërsa presioni brenda Partisë Laburiste po rritet dhe debati për të ardhmen e lidershipit po thellohet. #voxnews #media #news
Raportimet për një projektligj të qeverisë turke, i cili do të përfshinte pretendimet e Ankarasë në Egje dhe Mesdheun Lindor në legjislacionin e brendshëm, po shihen si sinjale paralajmëruese për një përkeqësim të mundshëm të marrëdhënieve greko-turke. Pavarësisht se hartat dhe detajet e projektligjit nuk janë finalizuar ende, medat greke raportojnë se projektligji do të zyrtarizonte qëndrimet afatgjata të Turqisë, përfshirë pretendimet se Ankaraja ka juridiksion në lindje të meridianit të 25-të në fusha që variojnë nga kërkim-shpëtimi deri te lejet për kërkime në ujërat ndërkombëtare, si edhe se memorandumi detar Turqi-Libi mbetet i vlefshëm sipas të drejtës ndërkombëtare. Turqia, ndryshe nga Greqia, nuk e ka ratifikuar Konventën e OKB-së për të Drejtën e Detit dhe raportohet se po konsultohet mbi terminologjinë ligjore përpara se t’i përfshijë këto dispozita në ligjin e ri. Greqia e ratifikoi konventën në vitin 1995. Një javë më vonë, Parlamenti turk autorizoi qeverinë që ta konsideronte çdo zgjerim grek të ujërave territoriale në 12 milje detare si casus belli. Disa zyrtarë turq u thanë agjencive të huaja të lajmeve se lëvizja më e fundit mund të rrisë tensionet në Egje. Analistët thanë se qëllimi i Ankarasë nuk është përshkallëzimi i menjëhershëm, por një përpjekje graduale për të “përcaktuar kushtet e veta”. Zyrtarët turq besojnë se Greqia e ka forcuar pozicionin e saj përmes planifikimit hapësinor detar, parqeve detare dhe afrimit më të madh me operacionet e NATO-s. Ankaraja është gjithashtu e shqetësuar për zgjerimin e lidhjeve greko-izraelite dhe bashkëpunimin mbrojtës midis Francës dhe Qipros. #voxnews #media #news
Një ngjarje e rëndë ka ndodhur në zonën e Plazhit të Vjetër në Vlorë, ku është gjetur e pajetë një 32-vjeçare. Sipas informacioneve paraprake, e reja ishte larguar nga banesa dhe familjarët, të shqetësuar për mungesën e saj, kishin nisur kërkimet në bashkëpunim me Policinë. Pas disa orësh kërkime, 32-vjeçarja është gjetur e mbytur në det në zonën e Plazhit të Vjetër. Nga të dhënat e para, dyshohet se kemi të bëjmë me një rast vetëvrasjeje, ndërsa grupi hetimor po punon për të sqaruar plotësisht rrethanat e ngjarjes. #vlore #voxnews #media #news @voxnews.al
Deputeti socialist Erion Braçe ka komentuar për herë të parë debatet mes kryeministrit Edi Rama dhe deputetes Elisa Spiropali, e cila i ka dalë hapur kundër kryesocialistit dhe e ka sfiduar që ta përjashtojë. I ftuar në Euronews Albania, Braçe tha se Spiropali nuk duhet të përjashtohet, pasi sipas tij ajo ka folur për gjëra normale. I pyetur më tej nëse Rama do ta përjashtojë Spiropalin nga grupi, Braçe u përgjigj se ky është një vendim që e merr partia dhe jo individi. “Pse duhet të përjashtohet zonja Spiropali? Nuk e kuptoj pse duhet të kërkohet përjashtimi i saj. Këto janë gjëra normale në këndvështrimin tim. Kë shqetëson këndvështrimi im? Në qoftë se janë të shqetësuar për urdhra, hajde ta diskutojmë këtë gjë”, tha ai. “Duhet t’i themi gjërat në sy për gjërat që nuk shkojnë dhe të kemi bonsensin t’i pranojmë, se nuk është sakrilegj të pranosh kritika për pushtetin… Përjashton partia, jo individët. Mendoj se PS nuk përjashton”, tha Braçe. Braçe u shpreh se shqetësimet e ngritura nga Spiropalit lidhur me ministrokracinë apo drejtorokracinë brenda PS janë të vërteta dhe shqetësojnë shumë deputetë të PS. “Për shembull, personalizimi i pushtetit është një gjë që e vuan qeverisja. E ka vuajtur qeveria e mëparshme dhe e vuan edhe qeveria e tanishme. Ministrokracinë dhe drejtorokracinë, patjetër që e vuan qeverisja. E vuajmë edhe ne deputetët, sepse është një element i pabarazisë mes atyre që janë ministra dhe deputetë, që kanë gjithë hierarkinë e shtetit në varësinë e tyre, dhe ne të tjerëve që nuk kemi asgjë. Po e vuajmë, sepse është një element pabarazie brenda PS-së”, deklaroi ai. Ndërsa, lidhur me deklaratat e Ramës se Spiropali është “investimi” i tij, Braçe tha se kjo është një marrëdhënie mes tyre dhe një temë debati personale. “Kjo është marrëdhënie mes të dyve. Nëse zonja e pranon këtë gjë dhe kryeministri e pranon këtë gjë, atëherë është një marrëdhënie mes të dyve. Është çështja e tyre. Por ajo që dua të them është se ne të gjithë jemi investime të Partisë Socialiste dhe jemi deficitarë ndaj saj”, u shpreh Braçe. #voxnews #media #news
Ish-kryetari i Kuvendit Namik Dokle ka organizuar një takim miqësor me disa prej figurave të njohura të së majtës shqiptare. Në këtë tryezë u panë së bashku edhe ish-presidenti Rexhep Meidani, ish-kryeministri Ylli Bufi, akademiku Sherif Bundo dhe ish-ministri Ethem Ruka, të cilët për vite me radhë kanë qenë pjesë e zhvillimeve politike në vend. Ata janë takuar në një nga kafet e kryeqytetit, ku kujtimet e përbashkëta dhe bisedat, pa anashkaluar dhe ato mbi çfarë po ndodh gjatë ditëve të fundit në politikën shqiptare. Siç ka treguar edhe vetë Dokle, gjithçka ka nisur me një kafe të zakonshme dhe një foto mes miqsh, për të vijuar më pas me një bisedë të lirshme për tema të ndryshme. Në fund, nuk ka munguar as humori karakteristik i takimeve të tilla, “humor shqiptari”, ku mes buzëqeshjeve ka lindur edhe debati i zakonshëm miqësor se kush do të paguante kafen këtë herë. “Duke pritur kafen e radhës e bëjmë edhe një foto me miqtë: Rexhep Meidani, Ylli Bufi, Sherif Bundo, Ethem Ruka. Dhe pastaj fillon biseda miqësore, e sinqertë, e hapur për çdo temë. Në fund, si të gjithë, edhe ne nisim “zënkën” e zakonshme: do paguaj unë, m’i lini mua kësaj radhe, pse vetëm ti do paguash?!”, shkruan Dokle. Fotoja ka tërhequr edhe vëmendjen e deputetes së PS-së Elisa Spiropali, e cila nuk e ka anashkaluar pa komentuar. Figurat historike të së majtës shqiptare, kafe mes kujtimeve dhe “Kafja t’ju jetë bërë shëndet e fuqi, e të tilla zënka paçi gjithmonë”, shkruan ish-kryetarja e Kuvendit që kohët e fundit është përplasur ashpër me kryesocialistin Edi Rama. #voxnews #media #news
Këshilli Shqiptar i Medias (KSHM) dhe Aleanca e Mediave Etike (AME) kanë reaguar ndaj vendimit të Gjykatës së Shkallës së Parë, nga gjyqtari Flamur Kapllani, që kërkon heqjen dhe bllokimin e aksesit në përmbajtjet mediatike. Dy organizatat shprehin shqetësimin për përdorimin e masave të përkohshme gjyqësore që urdhërojnë heqjen ose bllokimin e përmbajtjeve mediatike përpara shqyrtimit në themel të çështjes. Sipas KSHM dhe AME, urdhra të tillë krijojnë një problem parimor, pasi kur gjykata urdhëron heqjen e artikujve pa vendim për ligjshmërinë e tyre, masa rrezikon të funksionojë si censurë paraprake. Në deklaratë theksohet se reputacioni duhet të mbrohet përmes mjeteve proporcionale si: e drejta e përgjigjes, korrigjimi, përgënjeshtrimi, shënimi sqarues, përditësimi i artikullit, vendimi gjyqësor në themel dhe dëmshpërblimi kur provohet dëmi dhe se heqja e menjëhershme e artikujve nuk duhet të jetë zgjidhja e parë. Reagimi: Këshilli Shqiptar i Medias dhe Aleanca e Mediave Etike shpreh shqetësimin e tyre për vendimin për Sigurimin e Padisë (e datës 24/04/2026, me numër 12320) marrë nga Gjyqtari Flamur Kapllani, në Gjykatën e Shkallës së Parë. Ne shprehim shqetësim në lidhje përdorimin e masave të përkohshme gjyqësore që urdhërojnë heqjen ose bllokimin e përmbajtjeve mediatike përpara shqyrtimit në themel të çështjes. Pa paragjykuar asnjë mosmarrëveshje konkrete dhe pa marrë përsipër të vlerësojmë nëse një publikim i caktuar është i saktë, i pasaktë, etik apo joetik, ne vlerësojmë se urdhra të tillë ngrejnë një problem të rëndësishëm parimor: kur një gjykatë urdhëron heqjen e artikujve përpara se të vendosë nëse ata janë të paligjshëm, masa rrezikon të funksionojë si censurë paraprake. Kushtetuta e ndalon censurën paraprake të mjeteve të komunikimit. Ky ndalim është një garanci themelore që gjykatat, autoritetet publike dhe aktorët privatë me fuqi ekonomike apo politike të mos mund ta nxjerrin informacionin nga qarkullimi publik përpara se të ketë një vendimmarrje të plotë dhe të arsyetuar mbi ligjshmërinë e tij. Këshilli Shqiptar i Medias dhe Aleanca e Mediave Etike thekson se përgjigjja ndaj një publikimi të kontestuar nuk mund të jetë, si rregull, heqja e tij e menjëhershme nga qarkullimi publik përpara gjykimit të themelit. Në një shoqëri demokratike, reputacioni mbrohet përmes mjeteve proporcionale si: e drejta e përgjigjes, korrigjimi, përgënjeshtrimi, shënimi sqarues, përditësimi i artikullit, vendimi gjyqësor në themel dhe, kur provohet dëmi, dëmshpërblimi. Ne jemi veçanërisht të shqetësuar kur masa të tilla formulohen në mënyrë të gjerë, duke përfshirë portale, rrjete sociale dhe çdo mjedis tjetër digjital, pa përcaktuar me saktësi përmbajtjen konkrete, linket konkrete, shprehjet konkrete dhe arsyen pse çdo ndërhyrje është e domosdoshme. Një urdhër i përgjithshëm për heqje përmbajtjeje krijon pasiguri juridike, nxit vetëcensurë dhe u jep palëve të fuqishme një instrument presioni ndaj medias. Në çështje që prekin lirinë e shtypit, dëgjimi i medias para vendimit të gjykatës duhet të jetë domosdoshmëri. Vendimet në dhomë këshillimi, pa praninë e mediave si palë, nuk justifikohen në një shoqëri demokratike. Ne kërkojmë që masat e përkohshme për heqjen ose bllokimin e përmbajtjeve mediatike nuk duhet të përdoren si zëvendësim i gjykimit të themelit dhe as si rrugë e shkurtër për të zhdukur nga hapësira publike informacionin e pakëndshëm, të kontestuar apo kritik. KSHM dhe AME u bëjnë thirrje qytetarëve që përpara se t’i drejtohen gjykatës, të kryejnë një proces ankimimi pranë www.ame.media ose www.kshm.al, për të tentuar një zgjidhje më të shpejtë e jokonfliktuale përmes vetërregullimit. Për sa i përket artikujve objekt gjykimi, bazuar dhe në Kodin e Etikës së Gazetarit Shqiptar, KSHM dhe AME vërejnë se, artikujt nuk mund të konsiderohen “mashtrues”, sepse janë të bazuar mbi një fakt konkret, që është një document i prodhuar nga gjykata; titujt e përdorur janë sensacionalë dhe krijojnë një ide të ndryshme nga përmbajtja e shkrimeve.
Shtatë ish-zyrtarë e ish-punonjës policie, të arrestuar me kërkesë të SPAK, dorëzuan pranë Gjykatës së Posaçme, kërkesa për zëvendësimin e masës së sigurisë, pas vendimit unifikues të dhënë nga Gjykata e Lartë mbi “arrestin në burg”. Ndër argumentet për zbutjen e masës, është dhe arsyetimi i Kolegjeve të Bashkuara, që kërkojnë nga shkallët më të ulëta që heqja e lirisë të jetë opsioni i fundit, të shqyrtojnë masa e tjera më të buta dhe ngarkoi prokurorinë me barrën e provës për nevojën e “Arrestit në burg”. Mes zyrtarëve që kërkon zbutje të masës së sigurisë është edhe ish ministri Ilir Beqaj, i cili bashkë më vendimin unifikues ka ofruar dhe 20 mijë euro garanci pasurore. Po ashtu pas vendimit të Gjykatës së Lartë, kërkesë për zëvendësim mase kanë dorëzuar edhe ish kreu i IKMT, Mariglen Qato, ish-administratori i UBT, Edmond Tërthorja, apo edhe ish-drejtori i Policisë së Lezhës, Henerigert Mitri, raporton Tv Klan. Për këtë të fundit, Gjykata e Posaçme, e rrëzoi kërkesën, duke argumentuar se praktika e Gjykatës së Lartë, që lidhet me zëvendësimin e masave të sigurisë, nuk është ndryshuar dhe ajo kërkon që personi që vë në lëvizje gjykatën të sjellë prova që kushtet kanë ndryshuar dhe ai mund të hetohet në një masë më të butë. #voxnews #media #news @voxnews.al
Timothy Garton Ash – La Repubblica Sot shënohet përvjetori i 81-të i përfundimit të Luftës së Dytë Botërore në Europë, dhe është e qartë se Gjermania së shpejti do të jetë përsëri fuqia kryesore ushtarake e kontinentit. Shpenzimet gjermane për mbrojtjen do të jenë tashmë të barabarta me ato të Francës dhe Mbretërisë së Bashkuar të kombinuara vitin e ardhshëm – dhe pritet t’i tejkalojnë ato shumë deri në vitin 2030. Qëllimi i deklaruar i qeverisë gjermane është të ketë “ushtrinë më të fortë konvencionale në Evropë”. Është e vërtetë që Franca dhe Mbretëria e Bashkuar posedojnë armë bërthamore, por kjo do të thotë që më pak burime mund të ndahen në fusha të tjera të mbrojtjes. Prandaj, është e padiskutueshme që fuqia ushtarake gjermane është e destinuar të rritet, përveç rrethanave të paparashikuara. Pyetja që lind, veçanërisht në një rast kaq solemn, është një tjetër: si mund të sigurohemi që këtë herë ajo të përfaqësojë një faktor pozitiv për të gjithë Evropën?. Ka dy arsye për këtë ndryshim radikal nga kursi gjithnjë e më i papërshtatshëm i ndjekur nga perspektiva optimiste e viteve 1990 në pushtimin në shkallë të plotë të Ukrainës nga Vladimir Putin më 24 shkurt 2022. E para është vetë agresioni rus. Berlini po fiton terren në besimin se Putini nuk do të ndalet në Ukrainë. E dyta është se Presidenti Donald Trump ka vënë në pikëpyetje angazhimin gjithëpërfshirës të Shteteve të Bashkuara për mbrojtjen e Evropës, të mishëruar nga NATO që nga viti 1949. Njoftimi i fundit për tërheqjen e 5,000 trupave amerikane (dhe ndoshta më shumë) nga Gjermania është vetëm shenja e fundit në këtë drejtim. Njoftimi, më shumë sesa vetë tërheqja, rrjedh nga pakënaqësia personale e Trump ndaj kancelarit gjerman Friedrich Merz, i cili ishte kritik ndaj luftës katastrofike të presidentit amerikan kundër Iranit. Sfida me të cilën përballet Evropa është pra kjo: a jemi ne të vetmit të aftë të pengojmë një Rusi agresive dhe të armatosur me armë bërthamore? (“Ne” duhet të përfshijmë Ukrainën, e cila ka ushtrinë më të madhe dhe më me përvojë në Evropë.) Por ekziston edhe një sfidë më pak e dukshme, por po aq e rëndësishme: si mund ta shmangim ringjalljen e tensioneve akute mbi shpërndarjen e fuqisë ushtarake midis vendeve evropiane, të cilat, deri në vitin 1945, ishin si norma ashtu edhe mallkimi i kontinentit? Si një fuqi hegjemonike ushtarake kryesisht dashamirëse, Shtetet e Bashkuara na kanë mbrojtur nga të dyja eventualitetet. Gjermania është qendrore për t’iu përgjigjur të dyja pyetjeve. Strategjia e saj e re ushtarake, e para në historinë e Republikës Federale, titullohet “Përgjegjësia për Evropën”. Por “për Europën” është thjesht një frazë që të gjitha vendet evropiane (përveç Mbretërisë së Bashkuar) e përdorin për t’iu referuar politikave të tyre kombëtare. Pyetja e vërtetë është nëse fjalët do të përkthehen në veprime vërtet evropiane. Fushat kryesore që kërkojnë përgjigje të përbashkëta janë industria e mbrojtjes dhe aftësitë tona aktuale të luftimit. Teknologjia dhe prodhimi i mbrojtjes janë muskujt dhe tendinat e fuqisë ushtarake. Otto von Bismarck shpesh i atribuohet gabimisht shprehja “gjak dhe hekur”, por historiani Peter Wilson kujton se, në vitin 1862, kur i kërkoi Parlamentit Prusian të rriste shpenzimet ushtarake, kancelari në fakt foli për “hekur dhe gjak”. Së pari hekur, pastaj gjak. Wilson gjithashtu vëren se, edhe para vitit 2022, pavarësisht se kishte zvogëluar ushtrinë e saj dhe vazhdonte të mbështeste fort një politikë paqësimi ndaj Rusisë, Gjermania ishte ende ndër eksportuesit më të mëdhenj të armëve në botë. #voxnews #media #news
Një vit pasi socialistët kishin ardhur në pushtet kryeministri Edi Rama do ti dorëzonte çmimin e Bletës së Artë, Brisida Shehaj, atëherë drejtoreshë e tatimeve. Dy vite më pas Shehaj do të jepte dorëheqjen nga kjo detyrë e u kthye në një kritike të fortë të Edi Ramës në rrjetet sociale dhe studiot televizive pasi iu bashkua ish-Lëvizjes Socialiste për Integrim. Në 2022, Shehaj deklaroi se kryeministri është duke e përdorur bordin e transparencës të karburanteve për të futur para në xhepat e tij. Kjo u konsiderua nga Edi Rama si një trillim dhe ai iu drejtua Gjykatës së Tiranës me një padi për shpifje. Në padi avokatët e kryeministrit Rama shkruanin se ai është dëmtuar nga deklarimet e bëra nga Shehaj në 10 mars 2022 në një video-postim në profilin e saj në Instagram, pas ngritjes të bordit të transparencës atë kohë. Duke i cilësuar si shpifëse dhe të pabaza deklarimet e Shehajt, Rama kërkonte të dëmshpërblehej me 1 milion lekë prej saj. Gazetari i Top Channel Muhamed Veliu, mëson se disa ditë më parë Gjykata e Shkallës së Parë Tiranë i dha të drejtë Kryeministrit Edi Rama dhe e konsideroi deklarimin e Shehajt si shpifje. Në vendim i kërkohet ish-bashkëpunëtores së ngushtë të Edi Ramës të publikojë një përgënjeshtrim në rrjetet sociale, por jo detyrim për të paguar dëm monetar siç kërkonte kryeministri në padi. E kontakuar nga Top Channel nëse do ta zbatojë këtë kërkesë të gjykatës së Tiranës, Brisida Shehaj tha: “Do ta ankimoj vendimin pasi nuk është i formës së prerë”. Në të shkuarën kryeministri Edi Rama ka fituar edhe katër procese të tjera gjyqësore për shpifje me Sali Berishën. Sikurse janë gjetur nga gjykata fajtor për shpifje ndaj Ramës edhe Lulzim Basha, Albana Vokshi, Arben Imami dhe Jorida Tabaku./TCH #voxnews #media #news #edirama
Nga Helen Pilcher – The Guardian Për ditëlindjen e fundit të burrit tim, i dhurova një abonim mujor me kuti birrash artizanale. Ndërsa ai e pa si një dhuratë të shijshme dhe bujare, mua më lindi një ide djallëzore. Një mbrëmje, ndërsa po e shihja të pinte shishen e fundit, hapa emailin dhe i thashë: “Sapo morëm një mesazh nga kompania e birrës. Po tërheqin serinë e fundit.” “Çfarë problemi ka?”, pyeti ai. “Duket se ka pasur një ndotje”, iu përgjigja. Fytyra iu zbeh menjëherë. “A je mirë? Dukesh pak i zbehtë”, i thashë. “Në fakt, po ndihem pak keq”, tha ai. Natyrisht, nuk kishte asnjë email dhe unë jam një bashkëshorte e tmerrshme. Prej disa vitesh po shkruaj një libër me titull “This Book May Cause Side Effects”, mbi mënyrën se si mendimet tona ndikojnë në shëndetin tonë. Shumë njerëz e njohin efektin placebo, kur pritshmëritë pozitive prodhojnë rezultate pozitive për shëndetin. Por interesi im është te binjaku i tij i errët: efekti nocebo. Efekti nocebo ndodh kur pritshmëritë negative prodhojnë pasoja reale negative për trupin. Ai mund të krijojë, përkeqësojë dhe zgjasë simptoma fizike. Kur këto simptoma bashkohen, njerëzit mund të sëmuren jo nga një sëmundje organike, por nga marrëdhënia e ngushtë mes mendjes dhe trupit. Eksperimenti me birrën ishte një provë primitive për të parë sa e lehtë është të krijosh efektin nocebo. Përgjigjja është: shumë e lehtë. Ndonjëherë mjaftojnë vetëm disa fjalë të zgjedhura mirë për ta bërë dikë të ndihet realisht i sëmurë. Dhe kjo nuk është thjesht teori. Studime të shumta shkencore e konfirmojnë fenomenin. Në një prej tyre, pacientëve që sapo kishin kryer një operacion të vogël iu dha një solucion fiziologjik i padëmshëm, por u tha se do t’ua shtonte përkohësisht dhimbjen. Dhe ashtu ndodhi. Në një tjetër studim, 40 të rritur me astmë thithën avull uji nga një inhalator për të cilin u thanë se përmbante irritues. Nëntëmbëdhjetë prej tyre nisën të kishin vështirësi në frymëmarrje dhe 12 përjetuan krizë të plotë astme. Efekti nocebo shfaqet edhe në jetën reale. Sa herë kemi pritshmëri negative për shëndetin, ato mund të kthehen në profeci që vetëpërmbushen. Nëse jeni ndjerë keq pas vaksinës kundër Covid-19, ka mundësi që një pjesë e simptomave të mos kenë ardhur nga vaksina vetë. Duke analizuar 12 prova klinike me më shumë se 45 mijë pjesëmarrës, shkencëtarët zbuluan se shumë persona që kishin marrë placebo raportuan efekte anësore, duke arritur në përfundimin se efekti nocebo shpjegonte rreth 76% të reagimeve të zakonshme negative ndaj vaksinës. Fenomeni mund të ndikojë edhe te efektet anësore të ilaçeve, madje edhe te intoleranca ndaj glutenit. Në disa eksperimente, njerëz që mendonin se nuk toleronin glutenin arritën të hanin bukë normale pa problem, kur nuk e dinin çfarë po konsumonin. Efekti nocebo nuk prek vetëm individët. Ai mund të përhapet si virus në nivel shoqëror. Studiuesit besojnë se ai ka luajtur rol në “sëmundje misterioze” kolektive, nga epidemitë e vallëzimit në Mesjetë deri te sindroma Havana, ku diplomatët amerikanë zhvilluan simptoma të forta pasi besuan se ishin sulmuar nga një armë sekrete. Gjatë pandemisë, një shpërthim tikesh nervore te të rinjtë u përhap pasi ata panë video të ngjashme në TikTok. Fenomeni u quajt “TikTok tics”. Sot, shumë studiues mendojnë se rrjetet sociale po e përshpejtojnë përhapjen e simptomave të krijuara nga ankthi dhe pritshmëritë negative. Pilcher beson gjithashtu se efekti nocebo qëndron pas një pjese të madhe të simptomave “të pashpjegueshme mjekësisht”, si lodhja, marramendja apo dhimbjet pa shkak organik të dukshëm. Ajo argumenton se këto simptoma nuk janë imagjinare dhe nuk duhen tallur apo minimizuar. Sipas saj, shkenca po tregon gjithnjë e më shumë se mendimet dhe aktiviteti i trurit mund të prodhojnë pasoja shumë reale në trup. #voxnews #media #news
Ish-deputeti Ervin Salianji ka zhvilluar një takim me mbështetës dhe demokratë në qytetin e Peshkopisë, ku ka artikuluar kritika të forta ndaj drejtimit aktual të Partisë Demokratike dhe deklaratave të Sali Berishws kundër ambasadorit të Bashkimit Europian në Tiranë, Silvio Gonzato. Gjatë fjalës së tij, Salianji tha se Partia Demokratike nuk mund të ecë përpara duke u mbyllur dhe duke sulmuar aleatët ndërkombëtarë. #voxnews #media #news @voxnews.al
Në një atmosferë të rënduar emocionalisht, motrat e saj, Marjana dhe Silvana Nikolli, thyen heshtjen për herë të parë “Drejtësi për Xhuanën” – mes lotësh dhe dhimbjesh, familjarë, qytetarë dhe të afërm u mblodhën sërish për të ndezur qirinj në kujtim të 25-vjeçares Xhuana Nikolli, e cila humbi jetën tragjikisht pak javë më parë. Në një atmosferë të rënduar emocionalisht, motrat e saj, Marjana dhe Silvana Nikolli, thyen heshtjen për herë të parë, duke kërkuar zbardhjen e plotë të ngjarjes dhe vënien e autorit përpara drejtësisë. Mes lotëve, ato apeluan që institucionet ligjzbatuese të reagojnë me përgjegjësi, ndërsa theksuan se kjo tragjedi duhet të shërbejë si një thirrje ndërgjegjësimi për çdo vajzë dhe grua që përballet me dhunë apo kërcënime. “Xhuana nuk duhet të harrohet. Drejtësia për të është një mesazh për çdo grua që ka nevojë të ndihet e mbrojtur,” – u shprehën familjarët gjatë homazhit qytetar. Ngjarja e rëndë, ku ndërroi jetë në QSUT e reja Xhuana Nikolli, ndodhi më 10 mars të këtij viti. Ajo ndërroi jetë në Qendrën Spitalore Nënë Tereza, për shkak të vetëhelmimit me fostoksinë. Një ditë pas ngjarjes, familjarët e saj bënë kallëzim në komisariatin numër 2 në Tiranë ndaj bashkëshortit të saj, duke pretenduar se ai ushtronte dhunë ndaj të resë. Në trupin e saj janë konstatuar edhe shenja dhune. Ndërkohë Policia e Tiranës e ka shpallur bashkëshortin e saj në kërkim, ndërsa ende nuk ka arritur ta arrestojë. Çifti ishte martuar në qershor të vitit 2025, por ishin ndarë 4 muaj më parë, për shkak të konflikteve që kishin mes tyre. Vajza ishte gjetur në gjendje të rëndë nga shoqja e saj, e cila më pas kishte lajmëruar urgjencën. Shoqja e 25-vjeçares kishte dëshmuar para uniformave blu se Xhuana Nikolli dhunohej në mënyrë sistematike nga partneri. 25-vjeçarja kishte lënë edhe një letër përpara se të ndërmerrte aktin ekstrem. Dyshohet se ajo është dhunuar në mënyrë sistematike, teksa i ka kërkuar dhe falje familjes së saj, për zgjedhjet që kishte bërë në jetë. #voxnews #media #news
Presidenti serb Aleksandar Vuçiç ka deklaruar se nuk komunikon më me ndërkombëtarët, të cilët, siç thotë ai, i dëshirojnë të keqen Serbisë. Në këtë kontekst, gjatë qëndrimit të tij në Shid, ai përmendi Komisioneren Evropiane për Zgjerim, Marta Kos. “E shihni që kam pushuar së foluri për Marta Kos. Nuk do të them asnjë fjalë për të”, tha Vuçiç, sipas mediave serbe. Komentit të të pranishmëve se ai duhet të flasë ende me të, duke marrë parasysh faktin se është Presidenti i Serbisë dhe Kos është Komisionere e BE-së përgjegjëse për zgjerimin, Vuçiç iu përgjigj me tone kritike. “Për çfarë tjetër duhet të flas? Për çfarë duhet të flas me ata që gënjejnë për Serbinë? Për çfarë duhet të flas? Sidoqoftë, është e rëndësishme për mua që Serbia të jetë në rrugën evropiane”. Pak ditë më parë Bashkimi Evropian pezulloi mbështetjen financiare për Serbinë pas paralajmërimeve që lëshoi ndaj Beogradit për ndërhyrjet në sistemin gjyqësor. Komisionerja për Zgjerim, Marta Kos theksoi se Serbia nuk do të jetë në gjendje të marrë mbështetje financiare nga Plani i Rritjes, derisa të adresojë të gjithë shqetësimet e raportuara në gjyqësor. Marta Kos vuri në dukje se një vend që është kandidat për anëtarësim në Bashkimin Evropian “nuk mund të ulet në dy karrige dhe se në një moment Serbia do të duhet të bëjë një zgjedhje”. Kujtojmë se Kos do ta realizojë vizitën e saj të parë në Kosovë të premten, më 15 maj. #voxnews #media #news
Login
