Ndërsa Prokuroria e Posaçme ka nën hetim tenderët e Agjencisë Kombëtare të Shoqërisë së Informacionit dhe vetë parkun e shumëpërfolur teknologjik në Xhafzotaj të Shijakut, një prej figurave kyçe të këtij projekti ka arritur të sigurojë sërish një kontratë të majme nga fondet publike. Bëhet fjalë për biznesmenin Armand Shara, i njohur si një nga themeluesit dhe mendjet drejtuese të parkut DURANA, i cili ka përfituar një tender me vlerë rreth 2 milionë euro nga AKSHI, pavarësisht se drejtues të këtij institucioni janë nën hetim penal, ndërsa ish-drejtoresha Mirlinda Karçanaj ndodhet nën masën e sigurisë “arrest shtëpie”. Sipas dokumentacionit të procedurës, kontrata ka si objekt mirëmbajtjen e sistemit “e-receta” për Fondin e Sigurimit të Detyrueshëm të Kujdesit Shëndetësor dhe parashikon një afat zbatimi prej 24 muajsh. Fondi limit i tenderit kapte shifrën mbi 210 milionë lekë, ose rreth 2.2 milionë euro. Por ajo që ngre dyshime të forta është mënyra se si është zhvilluar gara. Në procedurë është regjistruar formalisht edhe një operator tjetër ekonomik, por ky i fundit nuk ka dorëzuar as ofertë financiare dhe as dokumentacion shoqërues. Praktikisht, tenderi ka mbetur pa konkurrencë reale, duke i hapur rrugë shpalljes fituese të kompanisë “Infosoft Systems”, e lidhur në mënyrë direkte me Armand Sharan. Oferta fituese kapte vlerën rreth 185 milionë lekë pa TVSH, ose mbi 2.3 milionë euro me TVSH, çka u shpall automatike fituese për shkak të mungesës së rivalëve realë në garë. Kjo situatë ka shtuar dyshimet se procedura ka qenë e paracaktuar, ndërsa pjesëmarrja e kompanisë tjetër është përdorur thjesht për të krijuar idenë e një gare formale. Skandali thellohet edhe më tej nga fakti se një tjetër kompani e lidhur me familjen Shara, e regjistruar së fundmi në parkun DURANA, rezulton e themeluar pikërisht në qershor 2025 dhe ka si adresë të saj Xhafzotajn. Kjo firmë, ndonëse në letra figuron me pronësi të shpërndarë, sipas burimeve lidhet drejtpërdrejt me Armand Sharan dhe rrethin e tij familjar. Emri i këtij biznesmeni shfaqet vazhdimisht në dosje hetimore të SPAK, përfshirë edhe hetimet ndaj AKSHI-t, ku kompani të lidhura me të kanë pasur rol aktiv në disa procedura të dyshimta. Megjithatë, pavarësisht hetimeve, arrestimeve dhe akuzave për abuzime të rënda me fondet publike, skema e përfitimit të tenderëve duket se vijon pa u ndalur. Rasti ngre pikëpyetje serioze mbi funksionimin real të kontrollit shtetëror dhe efektivitetin e hetimeve: si është e mundur që kontrata miliona euro të jepen pa garë, në një institucion nën hetim, dhe të përfundojnë te të njëjtët emra? Dhe mbi të gjitha, ku kanë përfunduar qindra miliona euro të shpenzuara ndër vite nga AKSHI dhe kush ka përfituar realisht prej tyre?

14.7K views

Një tender me vlerë të lartë financiare dhe rëndësi kritike për funksionimin e sistemit gjyqësor po ngre dyshime serioze për mungesë gare dhe transparence. Bëhet fjalë për procedurën me objekt “Shërbim mirëmbajtje e Sistemit të Menaxhimit të Çështjeve Gjyqësore ICMIS, ARKIT për të gjitha gjykatat, PAKS+, INFOPOINT, portali www.gjykata.gov.al dhe infrastruktura mbështetëse”. Autoritet kontraktues për këtë procedurë është Këshilli i Lartë Gjyqësor, i drejtuar nga Ilir Rusi, ndërsa procedura është zhvilluar si “e hapur”, mbi kufirin e lartë monetar, me numër reference REF-69152-11-17-2025. Fondi limit i tenderit është përcaktuar në 119,166,608 lekë të reja pa TVSH, ndërsa fituese është shpallur bashkimi i operatorëve KREATX sh.p.k dhe AXIANS ALBANIA sh.p.k, me një ofertë prej 110,883,824 lekë pa TVSH, ose rreth 1.3 miliardë lekë të vjetra me TVSH. Kjo vlerë përbën rreth 93% të fondit limit, një diferencë minimale që në praktikat e prokurimeve publike shpesh konsiderohet tregues i mungesës së konkurrencës reale. Sipas hulumtimit të dokumenteve nga JOQ Albania, në këtë tender kanë marrë pjesë vetëm dy kompani, por njëra prej tyre nuk ka ofruar asnjë vlerë financiare. Në këto kushte, fituese është shpallur e vetmja ofertë e paraqitur, pra bashkimi i dy operatorëve të mësipërm, duke e kthyer procedurën faktikisht në një garë pa garë. Dyshimet shtohen edhe më tej nga të dhënat e publikuara në media lidhur me pronësinë dhe përfaqësimin e kompanive fituese. Firma “Kreatx” rezulton në dokumente zyrtare në pronësi të Lejdi Koçi dhe Enor Nakuçi, por sipas raportimeve mediatike, pas saj qëndron Panajot Gjiknuri, vëllai i ish-ministrit Damian Gjiknuri. Nga ana tjetër, Kleanthi Prifti, administrator i Axians Albania sh.p.k, përmendet gjithashtu në media si personazh problematik. Kompania Axians Albania, sipas denoncimeve, ka ndryshuar herë pas here emrin dhe është lidhur me struktura në Francë dhe Gjermani. Po sipas mediave, Prifti nuk ka zbatuar ligjin për deklarimin e pronarëve përfitues, duke mos deklaruar në QKB pronarin fundor të kompanisë. Madje, thuhet se në shkelje të ligjit dhe me dokumentacion të dyshimtë, ai ka përfituar rreth 3.5 milionë euro nga tendera publikë, përfshirë edhe procedura të mbyllura apo sekrete nga Agjencia Kombëtare e Shoqërisë së Informacionit. Në një kohë kur drejtësia shqiptare predikon transparencë, integritet dhe luftë ndaj korrupsionit, ky tender ngre pikëpyetje të forta mbi mënyrën se si menaxhohen fondet publike pikërisht nga institucionet që duhet të garantojnë standarde të larta ligjshmërie. Deri më tani, nga Këshilli i Lartë Gjyqësor nuk ka asnjë reagim zyrtar lidhur me mungesën e konkurrencës, përzgjedhjen e ofertës së vetme dhe dyshimet mbi lidhjet e kompanive fituese.

4928 views

Ndërsa Edi Rama po bën gati "fshesën" për t’i vënë kyçin RTSH-së me pretekstin se taksat e shqiptarëve nuk mund të mbajnë një gjigant të fjetur, Niko Peleshi ka vendosur që Kuvendi nuk mund të jetë thjesht një vend ku miratohen ligje, por duhet të jetë një Studio Hollivudi. Pse t’u japim llogari gazetarëve që bëjnë pyetje të besdisshme, kur mund të kemi televizionin tonë, me regjinë tonë, ku ne jemi yjet, ne jemi moderatorët dhe ne jemi të vetmit që duartrokasim? Byroja e Kuvendit ka marrë një propozim "modest": 500 mijë euro për të krijuar një "Media Hub". Nuk bëhet fjalë për një dhomë të thjeshtë me kamera, por për një qendër multimediale me Inteligjencë Artificiale (AI). Duket se deputetët tanë kanë nevojë për Inteligjencën Artificiale që t’u "përkthejë" qytetarëve se si reformat që ua rritin çmimet, janë në fakt dhurata për mirëqenien e tyre. Me 50 milionë lekë investim, tashmë nuk do të kemi thjesht seanca ku zihen për procedurë, por një "Reality Show" me regji qendrore ku çdo deputet mund të ketë emisionin e tij të preferuar: "Unë dhe Arritjet e Mia." Projekti parashikon një drejtori të re (sikur nuk na mjaftonin drejtoritë ekzistuese) që do të merret me: Edukimin e qytetarëve: Që populli më në fund të kuptojë se pse deputetët rrinë në telefon gjatë seancës. Analizën e thelluar: Ku deputetët do të intervistojnë njëri-tjetrin për të rënë dakord se sa mirë po punojnë. Arkivin Digjital: Që brezat e ardhshëm të kenë mundësi të shohin në rezolucion 4K se si harxhoheshin 500 mijë euro për t’i bërë tualet imazhit të thyer të parlamentit. Ironia arrin kulmin: Ndërsa RTSH-së i kërkohet të kursejë, "Media Room-i" i ri do të bashkëpunojë ngushtë me RTSH-në për transmetim. Pra, ne mbyllim televizionin publik që të hapim televizionin e deputetëve. Me sa duket, plani i Rilindjes është i qartë: Nëse media nuk na pëlqen, ne bëhemi media! Harroni debatet reale, harroni pyetjet pa skenar. Me "Peleshi-Vision", Parlamenti do të ketë titra, gjuhë shenjash (për ata që nuk duan t'i dëgjojnë më premtimet) dhe mbi të gjitha, një ekip që do të kurojë çdo zgerdhje e çdo gafë të pushtetit. Për 500 mijë euro, shqiptarët nuk do të kenë më shëndetësi apo arsim më të mirë, por do të kenë mundësinë të shohin deputetët e tyre në "High Definition". Sepse në fund të fundit, "shfaqja duhet të vazhdojë", sidomos kur biletën e paguan populli!

16.4K views

Ish-deputeti socialist Alqi Bllako ka tërhequr vëmendjen e qytetarëve të Tiranës pas daljes nga burgu... Ai është parë përsëri në publik, pas daljes nga qelia ku ka qëndruar më shumë se 3 vite e gjysmë në kuadër të çështjes së inceneratorëve. Ai u lirua në nëntor 2025, kur masa e “arrest në burg” u konsiderua e përmbushur duke llogaritur edhe kohën e kaluar në paraburgim. Bllakos iu hoq e drejta për të mbajtur funksione publike për 5 vjet. Akuzat ndaj Bllakos lidheshin me korrupsionin pasiv dhe shpërdorim detyre në lidhje me inceneratorin e Tiranës. SPAK e akuzoi se ka përfituar në mënyrë të padrejtë rreth 120,000 € dhe rreth 75 MILION Lekë përmes favorizimit të kompanive që fituan koncesionet për inceneratorët dhe përmes ndikimit të tij si zyrtar publik. Ai u arrestua për herë të parë në prill 2022, pasi GJKKO pranoi kërkesën për “arrest me burg” të SPAK për korrupsion dhe shpërdorim detyre në çështjen e inceneratorëve. Bllako u shpall fajtor për korrupsion pasiv dhe e dënoi me 4 vjet burg, që me zbritjen e gjykimit të shkurtuar u reduktua në 2 vite e 8 muaj, kohë që ai e pati kaluar në paraburgim dhe për këtë arsye u lirua. Gjatë proceseve gjyqësore, Bllako deklaroi se ishte i pafajshëm, duke mohuar pretendimet e SPAK për ndikim të paligjshëm në dhënien e koncesioneve.

19.8K views

Tregu i imobiliareve në Shqipëri, i cili prej kohësh është kthyer në një makth për qytetarët për shkak të çmimeve të kripura jashtë çdo realiteti ekonomik, është tronditur këtë të martë. Inspektorët e Tatimeve kanë mësyrë në zyrat e 9 agjencive më të mëdha në vend, duke zbuluar një skemë të frikshme mashtrimi dhe evazioni. Sipas njoftimit zyrtar, agjencitë imobiliare nuk kanë kursyer asgjë: nga fshehja e vlerës reale të shitjes së apartamenteve, e deri te mbajtja e punonjësve në të zezë. Në fokus të kontrollit ka qenë pikërisht diferenca mes asaj që qytetarët paguajnë për një shtëpi dhe asaj që deklarohet në shtet. Aksioni nuk ka kaluar me një thjesht një gjobë. Strukturat e specializuara kanë sekuestruar të gjithë kompjuterët dhe serverat e këtyre agjencive. Burime bëjnë me dije se brenda tyre janë gjetur prova të pakontestueshme se si bëhej evazioni me çmimet e shitjeve dhe fshehja e faturave fiskale. "Nga informacioni i marrë në njësitë kompjuterike rezulton se ka evazion tatimor në lidhje me çmimet e shitjeve të apartamenteve", konfirmojnë Tatimet. Përveç mashtrimit me pronat, këto agjenci që qarkullojnë miliona euro, rezulton se i paguajnë punonjësit e tyre me paga qesharake në bordero, ndërsa pjesën tjetër ua japin në dorë, duke u vjedhur pensionet dhe sigurimet. Po ju, keni pasur raste kur agjencitë ju kanë mashtruar? Na shkruani në inbox!

10K views

“E trishtë/ Vdes këngëtarja e njohur”, shkruhet në një postim në Facebook, i shoqëruar me një kolazh fotosh të një artisteje apo artisti shumë të njohur. Postimi të nxit të klikosh një link të fshehur në komente për të lexuar “lajmin e plotë”. Por lajmi është i rremë dhe artisti apo artistja nuk ka ndërruar jetë. Linku të çon në një faqe interneti me tekst të krijuar nga inteligjenca artificiale, të mbushur me pikëçuditëse, pikëpyetje dhe fjali pa kuptim, që imiton gjuhën e mediave serioze. “Ajo ka lënë një trashëgimi të gdhendur në industrinë e muzikës”, thuhet aty, në një artikull që nuk jep asnjë informacion real. Qëllimi i vetëm është të mbajë lexuesin në faqe dhe t’i shfaqë sa më shumë reklama. Pas “lajmit tronditës” fshihen reklama për të ashtuquajtura “kura mrekullibërëse” për prostatën, reumatizmën, nishanet apo problemet seksuale. Këto produkte, të paraqitura si zbulime mjekësore, janë suplemente të pacertifikuara dhe shpesh pa asnjë efekt. Kjo skemë përdoret nga një faqe Facebook në gjuhën shqipe e quajtur “Jetë & Yje”, e administruar nga Vietnami dhe me përmbajtje të prodhuar përmes inteligjencës artificiale. Faqja ka “shpallur të vdekur” apo ka raportuar tragjedi të rreme për më shumë se një duzinë personazhesh të njohura nga showbiz-i dhe politika në Shqipëri, Kosovë dhe Maqedoninë e Veriut. Sipas raportimeve në media thuhet se këto postime shpesh shoqërohen edhe me video në YouTube, të prodhuara me inteligjencë artificiale dhe informacion të rremë, të cilat grumbullojnë mijëra shikime çdo ditë. Skema njihet si “Affiliate Marketing Scams”, një formë krimi kibernetik ku mashtruesit përdorin lajme dhe video të rreme për të tërhequr vizitorë dhe për t’i shtyrë ata të klikojnë reklama për suplemente “shëruese”. Viktimat lënë të dhënat e tyre, përballen me presion psikologjik dhe paguajnë produkte që zakonisht zbulohet se nuk funksionojnë vetëm pasi paratë janë dhënë. Edhe pse titujt janë shpesh absurdë dhe gjuha e përdorur e dobët, ndërveprimi në këto faqe është i lartë. Kjo tregon se fake news-i, edhe kur është i dukshëm, vazhdon të funksionojë dhe të përhapet.

50.5K views

Në një deklaratë të fundit, presidenti i SHBA-së Donald Trump ka rikthyer përdorimin e asaj që ai e quan “diplomaci e tarifave” në marrëdhëniet me aleatët evropianë. Kësaj here, në fokus është vendosur Franca, konkretisht presidenti Emmanuel Macron dhe eksportet kryesore të vendit, vera dhe shampanja. Reagimi i Trump vjen pas raportimeve se Macron po heziton t’i bashkohet “Board of Peace” (Bordi i Paqes), një iniciativë e udhëhequr nga SHBA-ja, e cila synon të mbikëqyrë armëpushimin dhe procesin e rindërtimit në Gaza. I pyetur nga gazetarët lidhur me këtë qëndrim, Trump përdori tone kritike dhe paralajmëroi masa ekonomike ndaj Francës. Ai deklaroi se, në rast se pala franceze tregohet “armiqësore”, SHBA-ja mund të vendosë tarifa deri në 200% ndaj verërave dhe shampanjave franceze, duke nënkuptuar se kjo do të ndikonte në qëndrimin e Parisit. Në të njëjtën deklaratë, Trump foli edhe për Vladimir Putin, të cilin e cilësoi si një aktor të rëndësishëm ndërkombëtar që, sipas tij, duhet të jetë pjesë e diskutimeve. Ky qëndrim ka nxitur reagime dhe debate në qarqet diplomatike, veçanërisht në Evropë. Nuk është hera e parë që Trump përdor 'diplomacinë tarifore' si mjet presioni në politikën e jashtme. Ndërkohë, autoritetet franceze e kanë cilësuar këtë qasje si të papranueshme, duke theksuar se nuk do të ndryshojnë qëndrimet e tyre për shkak të presioneve ekonomike. Franca mbetet një nga eksportuesit kryesorë të verës drejt SHBA-së, çka e bën këtë çështje edhe më të ndjeshme në aspektin tregtar.

58.8K views

Një ngjarje e rëndë dhe e paprecedentë ka tronditur mbrëmjen e djeshme Urgjencën e QSUT-së, ku errësira ka mbuluar pavionin e Reanimacionit, aty ku çdo sekondë vlen sa një jetë. Ndërsa pacientët në gjendje kritike mbaheshin në frymëmarrje artificiale nga pajisjet që kërkojnë energji konstante, shteti "u fik", duke lënë pas tmerrin, pasigurinë dhe dështimin total të një sistemi që reklamohet si "shëndetësia që duam". Nuk ka turp më të madh se të shohësh Ministren e Shëndetësisë, Evis Sala, të shfaqet çdo ditë nëpër studio televizive me buzëqeshje propagandistike, ndërkohë që realiteti në spitalet tona është një "pus i zi" ku jeta nuk vlen as sa një qindarkë. Mbrëmja e djeshme në Reanimacionin e QSUT ishte pika që mbushi kupën e një populli që po vdes nën vjedhjet galopante të shtetit. Një dështim që mban emrin e Evis Salës: Sot, pyetja që rëndon mbi Ministren e Shëndetësisë, Evis Sala, nuk është më se "çfarë nuk shkoi", por se si ka mundësi që në vitin 2026, spitali më i madh në vend nuk garanton dot as elementin bazë: energjinë elektrike për jetën. Ky nuk është thjesht një defekt teknik. Ky është një skandal përgjegjësie institucionale. Kur dritat ikin në një pavion reanimacioni, nuk kemi të bëjmë me një incident, por me një "vrasje në tentativë" ndaj të pamundurve. Akuzat që rëndojnë mbi Ministrinë: Mungesa e Sigurisë: Ku janë gjeneratorët e emergjencës dhe sistemet UPS që duhet të hyjnë në punë brenda milisekondave? Miliona euro tendera për mirëmbajtje, por në momentin kritik, teknologjia tradhtoi. Fshehja e Ngjarjes: Pse Ministria e Shëndetësisë tentoi ta kalonte në heshtje këtë makth, duke mos dhënë asnjë sqarim zyrtar deri në orët e vona? Heshtja është bashkëfajësi. Propaganda vs. Realiteti: Ndërsa Evis Sala shpërndan video me suksese imagjinare në rrjetet sociale, realiteti i mjekëve i publikuar mbrëmë nga JOQ Albania që luftojnë në errësirë me elektrikë dore për të mbajtur njerëzit gjallë, tregon kalbëzimin e sistemit. Koha për Përgjegjësi: Në çdo vend demokratik, një ngjarje e tillë do të shoqërohej me dorëheqje të menjëhershme. Nuk mund të ketë "ndjesë" që mbulon tmerrin e një familjari që sheh aparaturën e oksigjenit të fiket sepse ministria nuk ka siguruar dot linjën e dytë të energjisë. Evis Sala nuk mund të fshihet pas raporteve teknike. Ajo mban përgjegjësinë morale dhe ligjore për këtë pasiguri vdekjeprurëse në zemër të Tiranës. Sot, qytetarët nuk duan premtime, por llogaridhënie për jetët që u rrezikuan në errësirën e korrupsionit dhe papërgjegjshmërisë. Ik në shtëpi Evis Sala, nuk je për këtë punë!

5466 views

Një qytetar, pronar i një biznesi në zonën e Kombinatit, i është drejtuar redaksisë sonë për të denoncuar një problematikë serioze që po përjeton prej vitesh me fqinjin e tij, duke pretenduar se prona e tij është dëmtuar dhe zaptuar, ndërsa institucionet përgjegjëse nuk po marrin asnjë masë. Sipas qytetarit, biznesi i tij ndodhet në katin përdhes, ndërsa fqinji zotëron katin e dytë të pallatit së bashku me ballkonin. Objekti në fjalë, sipas tij, është përfituar nga projekti “Unifikim Fasade” i Bashkisë së Tiranës për katet përdhese në zonën e Kombinatit, investim i kryer nga vetë ai dhe që nuk ka lidhje funksionale me banesën e fqinjit. Qytetari shprehet se fqinji i tij ka ndërhyrë në mënyrë të paligjshme në objekt, duke dëmtuar tavanin nga sipër, hapur vrima dhe shkaktuar rrjedhje uji që kanë dëmtuar rëndë ambientin e brendshëm dhe mallin e biznesit. Ai pretendon se lagështira ka sjellë prishjen e produkteve, ndërsa era e rëndë ka larguar klientët. Në denoncimin e tij, qytetari thekson se ka kërkuar ndihmë në Komisariatin nr. 6, por është drejtuar te Urbanistika, e cila më pas ka përfshirë Policinë Bashkiake dhe Inspektoratin e Mbrojtjes së Territorit (IMT), pa u marrë asnjë masë konkrete. Ai pretendon se fqinji i tij po përdor ambientin sikur të ishte pronë e tij dhe se po përkrahet nga shefja e Urbanistikës së Njësisë nr. 6, duke e penguar edhe në kryerjen e riparimeve. Sipas tij, fqinji ka kthyer një dritare në derë, duke hyrë në objektin e biznesit, ndërsa tarraca i përket pronarit të katit përdhes dhe ndodhet në proces legalizimi. Qytetari shprehet se dëmtimet janë të qëllimshme dhe synojnë detyrimin për të shitur pronën. Ai i bën thirrje institucioneve përkatëse të ndërhyjnë urgjentisht për të ndalur dëmtimin e pronës dhe për t’i dhënë zgjidhje këtij konflikti, ndërsa kërkon publikimin e rastit me shpresën se problemi do të marrë vëmendjen e duhur. Denoncimi i qytetarit: "Pershendetje, kam nevoj per publikim urgjent jam banor i kombinatit kam nje problem ne aktivitetin tim ku me eshte shkatrruar dhe zaptuar prona nga komshiu kam kerkuar ndihme urgjente nga komisariati nr 6 ,komisariati me dergon tek urbanistika urbanistika dergon policin bashkiak te zones polici bashkiak ia le iMT asnje nuk po merr masa ju lutem kerkoj nga ju postim qe hallit tim ti jepet zgjidhje Video eshte tavani i brendshem i objektit. Po kati i dyte eshte i tij kurse kati perdhes ka nje projekt Unifikim Fasade nga Bashkia e madhe por investimi eshte i imi por ky objekt nuk ka lidhje me shtepine e tij sepse ai siper ka ballkonin e tij ndersa tarraca eshte e imja personale.  Ky eshte nje objekt i perfituar nga zbatimi i nje projekti “Unifikim Fasade” te Bashkise Tirane per katet perdhese tek rruga e Kavajes ne Kombinat Une Bujar Lico jam banor i vjeter i Kombinatit ndersa ky qe nderhyn e ka te blere shtepine ne kate te dyte dritaren Zotria e ka bere dere dhe hyn tek objekti qe eshte bere me Unifikim fasade.Shkelqim Nezha e perdor objektin tim sikur ta kishte te tijen sepse e perkrah shefja e urbanistikes te Njesis nr 6 Marjana Xibraku.Shkelqim Nezha ka kaq vite me ben presion sepse do ta blej sic ka bere me shume banor te ketij pallati ndersa tani ka dal hapur fare ne mbrojtje te inxhinieres se urbanistikes gjithashtu nuk me lejon te bej riparime. Tavanin e ka car nga larte ka hapur vrima cbie jashte bie brenda dhe me ka demtuar dhe mallin,rrobat me jane kalbur nga lageshtira dhe nuk me hyn njeri ne dyqan nga era e keqe e ka demtuar qellimisht qe tme merzisi dhe tia shes.Tani inxhinierja e Urbanistikes i jep perkrahje dhe ka dal me teorin qe tavani eshte objekt i perbashket ku eshte i perbashket?clidhje ka ?une ekam ne proces legalizimi.

51.9K views

Elinor Tushe, 25-vjeçari që shihni në foto është i riu që u aksidentua për vdekje mbrëmjen e kaluar në qytetin e Laçit. I riu po udhëtonte në makinë bashkë me Gentjan Xhaferrin, shoferi, dhe Leandro Fufin, kur në rrethana të paqarta janë përplasur fort me një mjet tjetër. Si pasojë e përplasjes, Xhaferri dhe Fufi kanë mbetur të plagosur rëndë dhe janë transportuar me urgjencë në spitalin e Traumës, ndërsa Elinori ka humbur jetën në vendngjarje. Policia ka shoqëruar në Komisariat drejtuesin e mjetit tjetër Aron Zymaj, ndërsa 23-vjeçari Gentjan Xhaferri është arrestuar për veprën penale “Drejtimi i automjeteve në mënyrë të parregullt”, me pasojë vdekjen. Për ndarjen e parakoshme nga jeta të 25-vjeçarit kanë reaguar në rrjetet sociale edhe miqtë dhe familjarët e tij të cilët e kujtojnë Elinorin si djalë të buzëqeshur dhe dashur me të gjithë.

181.2K views

Një ngjarje e rëndë ka ndodhur në burgun famëkeq të Koridhalosit në Greqi, ku është vrarë Jani Aliaj, 49 vjeç nga Tepelena, i njohur me nofkën “Xheku i frikshëm”. Aliaj u godit për vdekje me mjet prerës nga një i burgosur grek, edhe ai i dënuar për vrasje, në sektorin 3 të burgut. Autoritetet greke kanë nisur hetimet dhe nuk përjashtojnë pistën e një vrasjeje me pagesë. Jani Aliaj ishte i shumëkërkuar në Shqipëri dhe i dënuar në mungesë me burgim të përjetshëm për ekzekutimin e Elton Çiços më 1 maj 2016 në zonën e ish-Bllokut në Tiranë. Ai ishte arrestuar në Greqi më 31 dhjetor 2024 me identitet të rremë dhe priste ekstradimin drejt Shqipërisë. Sipas prokurorisë, vrasja e Elton Çiços lidhej me një konflikt të gjatë hakmarrjeje mes dy personave, me zanafillë vite më parë në Greqi, kryesisht për çështje të aktivitetit kriminal dhe drogës. Dyshohet se kishte tentativa të ndërsjella eliminimi, ku të dy kishin mbetur të plagosur në episode të ndryshme. Aliaj rezultonte gjithashtu i dënuar në Greqi me burgim të përjetshëm për vrasje, plagosje të rëndë dhe armëmbajtje pa leje, si dhe ishte arratisur më herët nga burgu i Korfuzit. Pavarësisht provave të shumta të mbledhura ndër vite për vrasjen e Elton Çiços, çështja mbeti pa autorë të dënuar përfundimisht, ndërsa “Xheku i frikshëm” gjeti fundin e tij pas hekurave në një burg grek.

23.9K views

Interesi i shqiptarëve për mjetet elektrike ka shënuar një rritje të fortë gjatë vitit 2025, duke konfirmuar një kthesë të qartë drejt transportit të gjelbër. Sipas të dhënave zyrtare të Drejtorisë së Përgjithshme të Shërbimeve të Transportit Rrugor (DPShTRr), gjatë vitit që sapo u mbyll janë regjistruar 6.187 mjete “All-Electric”, gati dyfish më shumë krahasuar me vitin 2024. Shifrat tregojnë një rritje prej 98% të regjistrimeve të automjeteve plotësisht elektrike brenda një viti, një tregues i qartë i interesit në rritje të qytetarëve dhe bizneseve për mjete miqësore me mjedisin. Ky ritëm e bën vitin 2025 një nga më domethënësit për zhvillimin e mobilitetit elektrik në Shqipëri. Sipas ekspertëve, rritja lidhet me disa faktorë, përfshirë kostot më të ulëta të përdorimit krahasuar me mjetet me karburant, ndërgjegjësimin më të lartë mjedisor dhe interesin për teknologjitë e reja. Paralelisht, kjo prirje nxjerr në pah edhe nevojën për më shumë pika karikimi dhe politika publike që nxisin përdorimin e automjeteve elektrike.

4566 views

Greqia po ndërmerr një reformë të thellë në sistemin e emigracionit ligjor, duke ndryshuar rregullat për lejet e qëndrimit dhe punës. Projektligji i ri i Ministrisë së Imigracionit dhe Azilit synon t’i japë fund vonesave kronike dhe bllokimeve burokratike që kanë penalizuar prej vitesh emigrantët dhe bizneset. Sipas mediave greke, aktualisht në Greqi jetojnë rreth 793 mijë emigrantë të ligjshëm, ndërsa afro 293 mijë aplikime për leje qëndrimi mbeten në pritje. Me rregullat e reja, rreth 90 mijë leje pritet të zhbllokohen menjëherë, ndërsa edhe 90 mijë të tjera brenda dy viteve, duke prekur drejtpërdrejt mbi 180 mijë persona. Projektligji parashikon rinovim automatik të disa kategorive të lejeve, veçanërisht kur emigranti vijon të punojë për të njëjtin punëdhënës, si dhe vendos një afat minimal dyvjeçar për çdo leje të re. Qëllimi është shmangia e situatave kur lejet skadojnë për shkak të vonesave administrative, duke krijuar pasiguri ligjore për emigrantët. Një dispozitë e veçantë u jep mundësi emigrantëve që kanë jetuar ligjërisht në Greqi për më shumë se pesë vjet dhe që janë refuzuar më parë për arsye formale, të riparaqesin kërkesën dhe të pajisen me leje qëndrimi. Gjithashtu, për emigrantët mbi 65 vjeç, që kanë punuar ligjërisht për të paktën 20 vjet, parashikohet qëndrimi pa detyrim për punë, me kusht sigurimin shëndetësor dhe pension privat. Ndryshime të rëndësishme parashikohen edhe për punëtorët nga vendet e treta. Procedurat për sjelljen e fuqisë punëtore thjeshtohen, duke lejuar mbulimin e shpejtë të mungesave në sektorë si bujqësia, ndërtimi dhe turizmi. Për projekte të mëdha, parashikohet mundësia e rishpërndarjes së menjëhershme të deri në 500 punëtorëve, ndërsa lehtësohen edhe procedurat konsullore. Ministri i Imigracionit dhe Azilit, Thanos Plevris, thekson se Greqia mbetet e rreptë ndaj emigracionit të paligjshëm, por po “riformëson rrugën ligjore” për ata që duan të punojnë dhe të integrohen, duke krijuar një sistem më efikas që mbështet ekonominë dhe tregun e punës.

11K views

Eksportet e Shqipërisë vazhdojnë të shënojnë rënie për vitin e tretë radhazi, duke treguar vështirësi të thella në tregjet ndërkombëtare. Sipas INSTAT, gjatë vitit 2025 eksportet e mallrave u ulën me 6,1%, duke arritur vlerën 346 miliardë lekë. Ndërkohë, importet ranë me 0,8%, në 887 miliardë lekë, por deficiti tregtar u rrit me 3%, në 541 miliardë lekë. Grupet më të prekura nga tkurrja janë “Materiale ndërtimi dhe metale” (-25,4%) dhe “Minerale, lëndë djegëse dhe energji” (-6,7%), ndërsa sektorët e vetëmbrojtur, si ushqimet, pijet dhe makineritë, shënuan rritje modeste. Eksportet e tekstileve dhe këpucëve ranë lehtë (-1,1%), por prodhuesit presin përmirësim gradual në 2026. Një faktor i rëndësishëm që ka ndikuar në performancën e eksporteve është rënia e vazhdueshme e euros, e cila u ul për herë të parë nën 100 lekë në vitin 2024 dhe mbylli vitin 2025 me një mesatare prej 97,8 lekë, duke reflektuar një nënçmim prej rreth 30%. Ekspertët ekonomike theksojnë se pjesë e kësaj dobësie lidhet edhe me hyrjen e një sasi të madhe eurosh të padeklaruara në vend, të dyshuara si produkt i pastrimit të parave, e cila ka rritur presionin mbi kursin dhe stabilitetin e tregut valutor. Sipas analizës, pas tre viteve të vështira, disa sektorë me fokus në prodhimin bujqësor dhe industri mbështetëse, si makineritë dhe pjesët këmbimi për automjetet, po shfaqin shenja rimëkëmbjeje. Megjithatë, sfidat kryesore mbeten fuqia punëtore, konkurrenca globale dhe ndikimi i dobësimit të euros mbi kontratat ndërkombëtare.

3171 views

Presidenti amerikan Donald Trump ka deklaruar se Europa duhet të përqendrohet te lufta mes Rusisë dhe Ukrainës, dhe jo te çështja e Groenlandës, mes rritjes së tensioneve për përpjekjet e tij për ta vënë territorin nën kontrollin e SHBA-ve. “Europa duhet të fokusohet te lufta me Rusinë dhe Ukrainën, sepse sinqerisht po shihni çfarë u ka sjellë ajo. Kjo është ajo ku Europa duhet të përqendrohet, jo te Groenlanda,” u shpreh Trump në një intervistë për NBC News. I pyetur nëse do të përdorte forcë për të marrë Groenlandën, territori gjysmë-autonom i Danimarkës, Trump u përgjigj shkurt: “Pa koment”. Presidenti ka intensifikuar presionin ndaj Danimarkës dhe disa vendeve europiane, duke paralajmëruar vendosjen e tarifave 10% ndaj Danimarkës dhe shtatë vendeve të tjera europiane, nëse nuk arrihet një marrëveshje për blerjen e Groenlandës. Sipas tij, tarifat do të hyjnë në fuqi më 1 shkurt. Një tjetër element që ka shtuar polemikat është lidhja që Trump i ka bërë kësaj çështjeje me Çmimin Nobel për Paqe. Në një mesazh drejtuar kryeministrit norvegjez Jonas Gahr Støre, Trump shprehej se, pasi Norvegjia nuk i dha Nobelin për, sipas tij, ndalimin e tetë luftërave, ai nuk ndihej më i detyruar të mendonte vetëm për paqen, por edhe për interesin e SHBA-ve. Kryeministri norvegjez reagoi duke theksuar se qëndrimi i Norvegjisë për Groenlandën është i qartë dhe se ajo është pjesë e Mbretërisë së Danimarkës, të cilën Norvegjia e mbështet plotësisht. Trump, nga ana e tij, ka hedhur poshtë pretendimet se Norvegjia nuk ka ndikim në dhënien e Çmimit Nobel për Paqe, duke deklaruar se vendi “e kontrollon plotësisht” procesin, pavarësisht se vendimi merret nga një komitet i pavarur i emëruar nga parlamenti norvegjez. Ndërkohë, ish-diplomatë amerikanë kanë shprehur skepticizëm ndaj pretendimeve të Trump, duke theksuar se qeveria norvegjeze nuk ka rol në vendimmarrjen për Çmimin Nobel. Trump ka përsëritur se nuk i intereson çmimi Nobel, duke deklaruar se ndalimi i konflikteve dhe shpëtimi i jetëve, sipas tij, është një shpërblim më i madh. Ai ka konfirmuar gjithashtu se do të zbatojë tarifat ndaj vendeve europiane nëse nuk arrihet një marrëveshje për Groenlandën, duke thënë: “Po, 100%”.

21.5K views

Denoncimet e qytetarëve për gjendjen e amortizuar të infrastrukturës rrugore shtohen çdo ditë. Rrugët e degraduara dhe pa asnjë standard sigurie, po kthehen në burim aksidentesh dhe po shkaktojnë dëme të vazhdueshme materiale për drejtuesit e mjeteve. Çdo ditë, dhjetëra qytetarë i drejtohen redaksisë sonë për të denoncuar gjendjen skandaloze të rrugëve. Së fundmi, një qytetar nga Shijaku, i vetëquajtur “Gjysh Ujku”, ka ngritur një shqetësim serioz për zonën ku banon. Ai tregon se gjatë ditës së sotme, teksa po qarkullonte me automjetin e tij tip “Benz”, i është çarë goma për shkak të gropave të shumta dhe rrugës së paasfaltuar prej dekadash, “që nga koha e italianit”, siç shprehet vetë ai. I indinjuar nga kjo situatë, qytetari i bën thirrje ministres së Infrastrukturës, Belinda Balluku, që të kthejë sytë edhe nga kjo zonë, pasi rruga shërben si dalje për në autostradën Durrës–Tiranë dhe ka një fluks të lartë automjetesh gjatë gjithë kohës. Për të shmangur dëme të tjera për drejtuesit e mjeteve dhe që qytetarë të tjerë të mos përballen me të njëjtin fat, “Gjysh Ujku” ka marrë vetë një lopatë dhe ka nisur të mbushë gropat me dhe dhe zhavorr, edhe pse kjo nuk është detyra e tij dhe ekzistojnë institucione të paguara për mirëmbajtjen e rrugëve. Ky rast ngre edhe një herë alarmin për neglizhencën ndaj infrastrukturës rrugore dhe nevojën për ndërhyrje të menjëhershme nga institucionet përgjegjëse.

43.9K views

Kryeministri Edi Rama inspektoi sot parkun e ri pranë liqenit të Paskuqanit, në territorin e bashkisë Kamëz, një hapësirë që duket gati për fotografi dhe superlativa: kënde lojërash, amfiteatër, mol dhe 84 hektarë të mbushur me pemë. Kryebashkiaku Rakip Suli prezantoi projektin me entuziazëm, por nuk la pa përmendur planet për ndërtime private pranë parkut, “vetëm” deri në tre kate, që i japin një shije të veçantë gjelbërimit që, duket se, do t’i rezistojë vetëm kaq pak kohë betoni. Teksa Suli fliste për parkun si magnet për fëmijë dhe të rinj, Rama nuk la pa ironinë e tij të zakonshme, duke iu drejtuar me nofkën “o Kipe o Kipe”, një ironi tallëse që banorët përdorin për kryebashkiakun. “Kemi 20 mijë fëmijë, plot të rinj,” shtoi Suli, ndërsa numrat, tingëllojnë më shumë si slogan se si statistika. Rama e mori Kamzën si shembull kombëtar, duke deklaruar se parku i jep kryeqytetit një “aset të gjelbër të paçmueshëm” dhe se duhet “të mësojmë nga Kamza”. Por ironia qëndron tek e vërteta më e thellë, shumë prej të rinjve të zonës nuk do ta shijojnë këtë aset për shumë kohë. Pjesa më e madhe emigrojnë drejt vendeve të BE-së, kryesisht Anglisë, sapo mbarojnë gjimnazin, për shkak të mungesës së mundësive të punësimit dhe zhvillimit në vend. Ndërsa liqeni zbukurohet dhe pedonalet shtrihen, ndërsa këndet e lojërave mbushen, dhe betonet me dy-tri kate presin të ngrihen, tabloja reale është më e dhimbshme, gjelbërimi është përkohësisht i bukur, por perspektiva e të rinjve duket larg, shumë larg, diku andej nga Anglia.

141.6K views

Media spanjolle CONFILEGAL i ka kushtuar një artikull një skeme të dyshuar mashtrimi dhe pastrimi parash, ku Shqipëria përmendet si një nga destinacionet kryesore ku janë kanalizuar fondet e paligjshme. Sipas raportimit, Gjykata e Tiranës ka urdhëruar sekuestrimin e pasurive me vlerë rreth 30 milionë euro, që i përkasin shtetasit spanjoll Álvaro Romillo Castillo, i njohur me pseudonimin “CryptoSpain”. Vendimi është marrë në kuadër të hetimeve për pastrim parash, pas dyshimeve se një pjesë e konsiderueshme e të ardhurave kriminale është investuar në Shqipëri. Autoritetet shqiptare bëjnë me dije se fondet, të përfituara nga një skemë mashtrimi që në Spanjë arrin vlerën mbi 250 milionë euro, janë kanalizuar kryesisht në zonën e Dhërmiut, përmes blerjes së tokave, automjeteve luksoze, hapjes së llogarive bankare dhe krijimit të tre kompanive të lidhura me sektorin e turizmit dhe pasurive të paluajtshme. Hetimet zbulojnë se këto kompani janë përdorur për blerjen e pronave me çmime nën vlerën reale të tregut, një metodë e njohur për pastrimin e parave. Ndërkohë, Romillo ndodhet aktualisht në paraburgim në Spanjë, i akuzuar si organizator i një skeme mashtruese investimesh në kriptomonedha, me mbi 3 mijë viktima dhe shtrirje ndërkombëtare.

13.3K views

Rasti i influencieres shqiptare Dajana Kalo, vetëm 25 vjeçe, ka nxjerrë edhe një herë në pah mosdhënien e shërbimit jetik nga QSUT dhe dështimin e shëndetësisë publike. E reja ka pësuar një hemorragji cerebrale si pasojë e një Malformacioni Arteriovenoz (MAV) dhe ndodhet në gjendje serioze shëndetësore, e paralizuar në anën e djathtë. Pavarësisht urgjencës, familjarët denoncojnë në rrjete sociale se për javë të tëra janë përballur me zvarritje, mungesë përgjegjësie dhe justifikime absurde nga spitali, duke e lënë Dajanën të luftojë për jetën pa ndërhyrjen e nevojshme në kohë. 25-vjeçarja ndodhet e shtruar që prej 29 dhjetorit në pavionin e neurokirurgjisë në QSUT dhe është diagnostikuar me Malformacion Arteriovenoz (MAV). Ajo ka pësuar një goditje në tru dhe aktualisht është e paralizuar në njërin krah dhe njërën këmbë. Pavarësisht gjendjes së rëndë, mjekët nuk kanë ndërhyrë ende, pasi për të vendosur për kirurgjinë, përfshirë edhe trombectominë, duhet më parë të kryhet ekzaminimi Arteriografi (DSA). Edhe pse në QSUT ndodhen dy pajisje për këtë ekzaminim, pas tre javësh për të renë nuk ka pasur asnjë zgjidhje: njëra pajisje pretendohet se nuk funksionon, ndërsa për tjetrën kërkohet miratimi i një mjeku që nuk e merr përsipër. Mjeku që duhet të japë miratimin për ekzaminimin punon gjithashtu në një spital privat, i cili është e vetmja strukturë jo publike në vend që ofron këtë shërbim, me kosto që nisin nga 25 mijë euro. Në këto rrethana, sorollatja e 25-vjeçares në QSUT merr kuptim të plotë, duke krijuar dyshime serioze për klientelizëm, monopol dhe konflikt të hapur interesi mes shëndetësisë publike dhe asaj private. Familjarët e Dajanës janë detyruar të hapin GOFUNDME, pasi shteti si gjithmonë dështon të shpëtojë jetën e qytetarëve të saj, duke nxjerrë në pah dështimin e shëndetësisë në Shqipëri. Kryeministri Edi Rama, ministrja e Shëndetësisë, Evis Sala, drejtoresha e QSUNT, Anxhela Paparizo mbajnë përgjegjësi të drejtpërdrejtë për një sistem që lë pacientët shqiptarë, në rastin konkretë edhe Dajanën, të presin mes jetës dhe vdekjes.

50K views

Ditën e sotme në stadiumin e Vorës po zhvillohet ndeshja e vendasve të Vorës me Tiranën, e vlefshme për Kategorinë Superiore. Ndeshja e cila ka startuar në orën 13:30, po ndiqet në stadium nga një numër i konsiderueshëm tifozësh që kanë arritur të sigurojnë bileta. Por tri tifozë të vegjël, që mesa duket s’kanë arritur dot të sigurojnë bileta, kanë tërhequr vëmendjen e të gjithëve. Fëmijët po e ndjekin ndeshjen nga jashtë stadiumit, në një kodër ku kanë vendosur 3 karrige, pa u shqetësuar fare për biletat, çmimet e tyre apo telefonat e video lojërat online si të gjithë bashkëmoshatarët.

19.7K views