Një aksident i frikshëm rrugor ka ndodhur pasditen e së martës në autostradën Tiranë–Durrës, ku dy automjete janë përplasur, duke shkaktuar dëme të konsiderueshme materiale. Një shtetas i huaj, i cili jeton në Shqipëri prej rreth katër vitesh, i ka dërguar redaksisë së JOQ Albania pamje nga aksidenti, ku shihet qartë momenti i përplasjes dhe dëmet e konsiderueshme materiale. Sipas dëshmisë, ai po udhëtonte drejt Tiranës së bashku me bashkëshorten, duke ndjekur normalisht rrjedhën e trafikut, kur një automjet tip Toyota ka kryer një manovër të papritur, duke e goditur anash. Si pasojë e përplasjes, mjeti i tij është përplasur fuqishëm drejt trafikndarëses prej betoni, ku ka përfunduar pjesërisht mbi të. “Po udhëtoja normalisht, kur makina tjetër u shfaq papritur nga e majta dhe më goditi. Pas goditjes, automjeti im u përplas me barrierën anësore prej betoni”, shprehet ai për JOQ Albania. Nga pamjet e siguruara, vërehet qartë se automjeti i shtetasit të huaj, një Volkswagen Passat gri i errët, ka pësuar dëme të rënda, veçanërisht në pjesën e përparme dhe anësore, ndërsa ka mbetur i ngritur mbi barrierën e betonit. Ai thekson se automjetin e kishte blerë vetëm tre muaj më parë dhe se pas aksidentit dëmet janë të tilla, sa mjeti është bërë pothuajse i papërdorshëm. Fatmirësisht, si ai ashtu edhe bashkëshortja e tij kanë pësuar vetëm lëndime të lehta. Shtetasi i huaj vlerëson edhe ndërhyrjen e policisë në vendngjarje, duke theksuar se efektivi i pranishëm i ndihmoi me procedurat dhe komunikimin, për shkak të barrierës gjuhësore. Sipas tij, nga pamjet dhe rrethanat e aksidentit, përgjegjësia dukej se i takonte mjetit tjetër. Megjithatë, këto mbeten vlerësime paraprake, ndërsa përcaktimi përfundimtar i përgjegjësisë pritet nga organet kompetente.

5586 views

Pamjet që po qarkullojnë së fundmi pasqyrojnë një realitet të dhimbshëm: dhjetëra të rinj që gdhihen rrugëve të qyteteve moderne, duke fjetur mbi kartonë apo direkt në trotuar. Këto video kanë nxitur raportime të shumta në rrjetet sociale dhe media të huaja, të cilat flasin për një situatë shqetësuese në Kinë, ku dhjetëra mijëra të rinj pretendohet se po përballen me pasoja ekstreme pas futjes në të ashtuquajturën “listë e zezë” të Sistemit të Kreditit Social. Sipas këtyre raportimeve, personat që futen në listën e zezë përballen menjëherë me kufizime të rënda financiare: u bllokohen shërbimet bankare, pagesat digjitale dhe transaksionet online, duke e bërë pothuajse të pamundur pagesën e qirasë, blerjen e ushqimit apo marrjen e pagës. Në disa raste, këto kufizime thuhet se kanë çuar shumë individë kanë çuar individë drejt varfërisë ekstreme, duke i lënë pa kulm mbi kokë dhe jashtë çdo sistemi jetik për mbijetesë, pasi jeta e përditshme në Kinë është e lidhur pothuajse tërësisht me pagesat digjitale. Sipas pretendimeve që qarkullojnë online, futja në listën e zezë mund të ndodhë edhe për shkak të mospagimit në kohë të huave informale ose kredive me interesa shumë të larta, të cilat në disa raste raportohet se arrijnë deri në 25% ose më shumë. Megjithatë, këto mbeten pretendime që nuk janë konfirmuar zyrtarisht nga autoritetet kineze. Autoritetet në Pekin e kanë justifikuar Sistemin e Kreditit Social si një mekanizëm për të rritur besueshmërinë financiare dhe disiplinën shoqërore, por kritikët ndërkombëtarë prej vitesh kanë ngritur shqetësime se ky sistem mund të përdoret për ndëshkime disproporcionale dhe përjashtim social. Ndërkohë, debati ka kaluar kufijtë e Azisë, pasi ekzistojnë frika se sisteme të ngjashme të identitetit apo kontrollit digjital mund të tentohen të aplikohen edhe në Europë në vitet e ardhshme. Deri më tani, nuk ka të dhëna zyrtare që konfirmojnë shifrat e përmendura, ndërsa organizata të të drejtave të njeriut kanë kërkuar më shumë transparencë mbi mënyrën se si funksionon ky sistem dhe pasojat reale për qytetarët.

13.2K views

Një qytetare i është drejtuar redaksisë së JOQ Albania për të falënderuar publikisht një çift të ri, të cilët gjetën dhe i dorëzuan portofolin që ajo kishte humbur në zonën e Pazarit të Ri në Tiranë. Ajo tregon se portofoli i kishte humbur pasditen e sotme dhe brenda tij ndodheshin rreth 300 mijë lekë të vjetra. Çifti që e gjeti portofolin nuk hezitoi aspak: ata kontaktuan bankën për të gjetur numrin e saj të telefonit dhe më pas e telefonuan për t’ia kthyer personalisht. Në videon e mbërritur në redaksinë tonë, qytetarja shpreh mirënjohjen e saj për këtë veprim të ndershëm: “Përshëndetje JOQ! Kjo është kuleta që mua më kishte humbur në zonën e Pazarit të Ri sot pasdite. Dua të falënderoj çiftin simpatik që më morën në telefon dhe ma sollën në shtëpi. Faleminderit dhe mirënjohje për këtë veprim kaq të ndershëm. Vërtet ekzistojnë njerëz kaq të mirë dhe duhet të ndërgjegjësohemi të gjithë, sepse nuk është vlera monetare ajo që na bën njerëz, por gjesti dhe veprimi.” Në prag të Vitit të Ri, ky gjest i thjeshtë, por shumë domethënës, është një kujtesë e bukur se ndershmëria, empatia dhe humanizmi ende ekzistojnë dhe meritojnë të vlerësohen publikisht. JOQ Albania i bashkohet falënderimit dhe uron që këto histori të vogla, por të mëdha në vlera, të shërbejnë si shembull për të gjithë shoqërinë.

22.9K views

Sot bëhen pesë ditë që qyteti i Vlorës përballet me mungesën e ujit të pijshëm, ndërsa pavarësisht deklaratave zyrtare se furnizimi ka nisur të rikthehet, dhjetëra qytetarë kanë kontaktuar redaksinë e JOQ Albania duke raportuar se shumë zona vijojnë të jenë pa ujë. Qytetarë të tjerë kanë dërguar pamje ku uji që ka ardhur në rubineta është i turbullt, me ngjyrë dhe me aromë të rëndë, duke theksuar se ai nuk është i konsumueshëm dhe paraqet rrezik për shëndetin. Në këtë situatë, një qytetare ka ngritur dyshime serioze mbi shkakun real të dëmtimit të tubacionit kryesor, i cili la Vlorën pa ujë për ditë të tëra. Në një video të mbërritur në redaksinë tonë, ajo ka shkuar vetë në vendin ku është çarë tubi dhe ka filmuar zonën përreth. Sipas saj, dëmtimi ka ndodhur brenda një kantieri ndërtimi, që ajo e identifikon si kantier të biznesmenit Arben Avduli. Qytetarja vë në dyshim deklaratën e kryetares së Bashkisë së Vlorës, Bruna Mersini, e cila një ditë më parë e cilësoi ngjarjen si “fatkeqësi natyrore”. “Nuk ka asnjë shenjë shkarjeje dherash këtu. Muri është në rregull. Pas murit është kanal. Nga kanë ardhur dherat? Si ka mundësi që shkarja të ketë ndodhur brenda kantierit? Ky është kantieri i Arben Avdulit”, shprehet ajo në video, duke ngritur pikëpyetje mbi versionin zyrtar. Edhe një tjetër qytetar i është drejtuar redaksisë sonë, duke pretenduar se dëmtimi i tubacionit ndodhet brenda të njëjtit kantier ndërtimi dhe se, sipas tij, askush nuk po flet publikisht për këtë çështje për shkak të lidhjeve politike që ai pretendon se ka biznesmeni në fjalë ka me Partinë Socialiste. Ndërkohë, kryetarja e Bashkisë së Vlorës, Bruna Mersini, në një deklaratë për mediat, u shpreh se problemi nuk është në përgjegjësi të bashkisë dhe se dëmtimi i tubacionit ishte pasojë e një “fatkeqësie natyrore”. “Kjo është një fatkeqësi natyrore, nuk duhet përdorur për politikë. Nuk është momenti të bëjmë analiza dhe të gjejmë fajtorin, por të japim zgjidhjen”, deklaroi ajo, duke shtuar se pjesët rezervë po vinin nga Turqia dhe se po aplikohej një zgjidhje e përkohshme me furnizim të pjesshëm dhe shpërndarje uji përmes autobotëve. Megjithatë, pesë ditë pa ujë në festat e fundvitit dhe raportimet e shumta nga qytetarët për mungesë totale ose ujë të papijshëm, kanë shtuar indinjatën dhe dyshimet në qytet. Sa i përket biznesmenit Arben Avduli, ai njihet si pronar dhe administrator i kompanisë së ndërtimit “Avduli shpk”, e cila ka përfituar miliona euro nga tendera publikë ndër vite. Çdo lidhje mes aktivitetit të kësaj kompanie dhe dëmtimit të tubacionit mbetet, në këtë fazë, për t’u verifikuar nga institucionet përgjegjëse. Redaksia e JOQ Albania i bën thirrje autoriteteve që të sqarojnë publikisht dhe me transparencë të plotë shkakun real të dëmtimit të tubacionit, si dhe të garantojnë furnizim të sigurt dhe të pijshëm me ujë për qytetarët e Vlorës.

45.6K views

Një ngjarje e rëndë ka tronditur fshatin Piskupat në Pogradec. Një vajzë 12-vjeçare është përdhunuar katër muaj më parë nga një 67-vjeçar nga i njëjti fshat. Rasti u bë i ditur vetëm tani, pasi vajza rezultoi shtatzënë katër muajshe. Viktima nuk kishte treguar ngjarjen më parë për prindërit, pasi autori e kishte kërcënuar se do ta vriste nëse fliste. Ngjarja ka ndodhur brenda banesës së 67-vjeçarit, ku autori e ka lidhur dhe përdhunuar me forcë. E mitura është pyetur nga prokuroria në praninë e psikologut, duke rrëfyer detajet e ngjarjes. Prindërit e vajzës e dërguan për vizitë mjekësore pasi vunë re ndryshime në trupin e saj, dhe mjekët konfirmuan shtatzëninë. Policia ka arrestuar autorin, i cili është baba i katër fëmijëve dhe gjysh. Vajza ndodhet nën kujdesin e familjes dhe psikologëve për mbështetje psikologjike. Rasti po hetohet nga organet kompetente, ndërsa autoritetet janë duke ndjekur procedurat për ndjekjen penale të plotë të autorit.

276.2K views

Kina ka zhvilluar këtë javë stërvitjen më të gjerë ushtarake të regjistruar ndonjëherë rreth Tajvanit, duke rrethuar ishullin me forca detare dhe ajrore, duke lëshuar raketa në ujërat përreth dhe duke simuluar një bllokadë të plotë ushtarake. Gjatë ushtrimeve, të quajtura “Justice Mission 2025”, Komanda Lindore e Ushtrisë Çlirimtare Popullore kreu për rreth 10 orë ushtrime me zjarr real, duke lëshuar raketa në veri dhe jug të Tajvanit. Njësi detare dhe ajrore kineze simuluan goditje ndaj objektivave detare dhe ajrore, si edhe operacione kundër-nëndetëseje. Për herë të parë, Pekini deklaroi hapur se stërvitjet synojnë të pengojnë çdo ndërhyrje të jashtme, përfshirë SHBA-në dhe aleatët e saj. Zyra Kineze për Çështjet e Tajvanit paralajmëroi se çdo forcë e jashtme që ndërhyn do të “përplaset me muret e hekurt të ushtrisë kineze”. Stërvitjet nisën 11 ditë pasi SHBA njoftoi një paketë rekord armësh prej 11.1 miliardë dollarësh për Tajvanin, vendim që ka irrituar ashpër Pekinin. Mediat shtetërore kineze publikuan pamje propagandistike, duke theksuar epërsinë teknologjike dhe ushtarake të Kinës dhe aftësinë për ta marrë Tajvanin me forcë nëse do të jetë e nevojshme. Autoritetet tajvaneze raportuan se të martën rreth ishullit po operonin 71 avionë ushtarakë kinezë dhe 24 anije luftarake dhe të rojës bregdetare. Sipas Ministrisë së Mbrojtjes së Tajvanit, Kina ka lëshuar gjithsej 27 raketa në ujërat përreth ishullit. Një zyrtar i lartë i sigurisë në Tajvan deklaroi se ushtria kineze duket se po simulon goditje ndaj objektivave tokësore, përfshirë sistemet raketore amerikane HIMARS që Tajvani ka blerë së fundmi. Ndërkohë, presidenti i Tajvanit, Lai Ching-te, tha se trupat janë të gatshme për mbrojtje, por theksoi se Tajpej nuk synon përshkallëzim të situatës. Ushtrimet e kësaj jave janë raundi i gjashtë i madh i stërvitjeve që nga viti 2022 dhe konsiderohen më të gjërat për nga shtrirja dhe më të afërtat ndonjëherë me territorin tajvanez. Një raport i fundit i Pentagonit vlerëson se Kina po përgatitet të jetë gati ushtarakisht për të fituar një konflikt për Tajvanin deri në vitin 2027, në 100-vjetorin e krijimit të Ushtrisë Çlirimtare Popullore.

7205 views

Një emigrant shqiptar, i cili prej 25 vitesh jeton në Gjermani, ka realizuar një gjest humanitar dhe me shumë vlerë për Spitalin Rajonal të Kukësit. Xhevahir Ferati me origjinë nga fshati Bardhoc, ka dhuruar një ambulancë e re për spitalin, e cila do t’i shërbejë qytetit dhe banorëve të Kukësit. Falë këtij gjesti, spitali i Kukësit pasuron më tej flotën e ambulancave, duke rritur cilësinë e shërbimit shëndetësor për komunitetin. Duhet thënë se ky veprim përcjell një mesazh të fortë në këtë prag fundviti ku shëndetësia është në pikë të hallit dhe qytetarët s’marrin shërbimin që meritojnë.

121K views

Personi në foto është Hysni Ymeri, 67-vjeçari nga Shkodra, i cili u vra një ditë më parë pas një shpërthimi të fuqishëm në pallatin ku banonte. Ngjarja ndodhi sapo ai mbërriti në hyrjen e ndërtesës për t’u ngjitur në katin e katërt, ndërsa policia ende nuk ka zbardhur nëse shpërthimi shkaktohej nga lëndë eksplozive me telekomandë apo nga paneli i matësve të energjisë elektrike. Hetuesit po ndjekin dy pista kryesore dhe nuk kanë dhënë asnjë konfirmim për momentin. Hysni Ymeri ka pasur lidhje me një histori të gjatë konflikti mes familjeve në Shkodër. Në vitin 1995, vëllai i tij vrau Shefqet Çekorjen, dhe disa vite më vonë familjet arritën pajtimin. Përveç kësaj, disa kushërinj të tij kanë qenë të përfshirë në ngjarje të tjera të dhunshme dhe vrasje, duke përfshirë mjekun Ilir Aliaj në vitin 2017. Hetuesit nuk përjashtojnë mundësinë e një atentati si shkak të ngjarjes, duke marrë parasysh historikun e konflikteve mes fisve Bajri-Lici dhe të tjerëve. Deri në përfundimin e ekspertizës dhe zbardhjen e plotë nga policia, rrethanat mbeten të paqarta.

29.6K views

Kryeministri Edi Rama ka zgjedhur ta mbrojë drejtoreshën e AKSHI-t, Mirlinda Karçajan, e cila ndodhet në masë “arrest shtëpie” me vendim të SPAK për shkelje të barazisë në tendera, duke vënë theksin jo te akuzat, por te qiraja. Në konferencën e fundit për mediat, Rama theksoi se Karçajan jeton në një banesë me qira dhe se më parë ka banuar në shtëpinë e prindërve, një detaj që duket se, sipas tij, shërben si provë karakteri dhe integriteti. Sipas Kryeministrit, fakti që drejtuesja e një institucioni kyç si AKSHI nuk ka shtëpi në pronësi është i mjaftueshëm për të rrëzuar dyshimet e SPAK. Rama deklaroi se Karçajan ka “respektin maksimal” të tij, se e njeh prej 20 vitesh dhe se është një figurë e njohur ndërkombëtarisht, duke lënë në plan të dytë hetimin penal dhe akuzat për tendera. Në këtë logjikë, duket se qiraja shndërrohet në argument mbrojtës më të fortë se çdo dokument hetimor. “Kjo është pjesë e hetimeve. Nuk kam dijeni për këtë dhe nuk mund të bëj asnjë koment për gjysmë të vërtetat që dalin lart e poshtë. Është proces, do bëhen hetime. Në krye të skuadrës së AKSHIT është një grua që ka respektin e padiskutueshëm. Linda Karçajan, që ka një masë sigurie, me një shtëpi me qira ku jeton, pasi më parë jetonte në një shtëpi të postkomunizmit në banesën e prindërve të tij. E njoh prej 20 vitesh dhe ka respektimin tim. E njohur ndërkombëtarisht dhe ka respektim tim maksimal. Çfarë thoni ju sot, bazuar në copëza të nxjerra rrugëve nga ata që duhet të ruajnë sekretin hetimor, nuk është e mjaftueshme për të dalë në përfundime për të fajësuar njerëzit. Nxirret një copë këtu dhe një copë atje, ushqehet publiku për të dënuar në sytë e opinionit njerëz që kanë të drejtën që të prezumohen të pafajshëm. Degjenerohen në publik që; këta janë llum. Dalin dhe kapakët e tenxheret që marrin paga marramendëse të padeklaruara, dhe pastaj flasin për pensionistet. Unë thjesht dhe vetëm jam në dispozicionin tuaj që të më fusni në tenxhere. Por sa të më sulmoni, vetëm më forconi. Po të doni të më dëmtoni, mos më fusni në tenxhere, se më i fortë do jem", tha Rama

35K views

Një situatë tejet shqetësuese është regjistruar mbrëmjen e sotme në fshatin Rrenas, Bashkia Belsh, ku një transformator i tensionit të lartë ka marrë flakë dhe ka pësuar shpërthime të njëpasnjëshme, duke rrezikuar jetën e banorëve të zonës. Në redaksinë e JOQ Albania kanë mbërritur pamje video nga vendngjarja, ku dallohet qartë transformatori teksa shkakton shpërthime dhe flakë në kabllot elektrike. Sipas denoncuesit, transformatori ndodhet shumë pranë banesave, madje i vendosur brenda një ndërtese, ndërsa shtëpi të tjera ndodhen vetëm pak metra larg. “Është hera e disatë që ndodhin shpërthime të tilla. Rrezikohet jeta e shumë banorëve, pasi transformatori është vendosur brenda një shtëpie dhe shumë afër banesave të tjera,” – shprehet qytetari. Sipas tij, pas shpërthimeve, banorët janë detyruar të njoftojnë për ndalimin e energjisë elektrike, e cila furnizohet nga zona e Kajanit. Vetëm pasi u ndërpre rryma, banorët e fshatit kanë hyrë vetë për të fikur zjarrin, i cili kishte përfshirë kabllot e rrymës, duke rrezikuar jetën e tyre për të shmangur një tragjedi më të madhe. Denoncuesi thekson se problemi është i përsëritur dhe i njohur prej vitesh, pasi transformatori nuk është ndërruar kurrë, por vetëm janë bërë ndërhyrje të pjesshme. “Sa herë prishet, ndërrojnë vetëm ndonjë kabllo apo ndonjë pjesë të vogël. Asnjëherë nuk është ndërruar i gjithë transformatori. Ai është shumë i vjetër, madje po bie komplet nga vendi. Shtyllat janë të shtrembëruara prej vitesh,” – shprehet qytetari. Ai shton se shpërthime të tilla ndodhin edhe kur nuk ka mot të keq, çka tregon gjendjen e amortizuar dhe rrezikun konstant që paraqet ky transformator. Banorët i bëjnë thirrje urgjente kryebashkiakut të Belshit, Arif Tafani, dhe institucioneve përgjegjëse që të marrin masa të menjëhershme për zgjidhjen e këtij problemi, përpara se të ndodhë ndonjë ngjarje tragjike. JOQ Albania e publikon këtë denoncim për të ngritur alarmin dhe për të kërkuar ndërhyrje urgjente, pasi situata e përshkruar paraqet rrezik real për jetën dhe pronën e banorëve të zonës.

857 views

Një qytetar nga Kamza i është drejtuar redaksisë së JOQ Albania për të denoncuar një rast të pazakontë dhe shqetësues, i cili ngre pikëpyetje serioze mbi sjelljen qytetare dhe respektin ndaj komunitetit. Ai ka dërguar një video të kapur nga kamerat e sigurisë, ku shihet një zonjë që ndalon makinën, zbret së bashku me një fëmijë të vogël dhe shkon drejt portës së shtëpisë së tij, ku hedh mbeturinat, duke i lënë aty, sikur të ishte një kosh plehrash. Sipas denoncuesit, ajo që e bën situatën edhe më shqetësuese është fakti se veprimi kryhet pa asnjë shqetësim, sikur të ishte diçka krejt normale, ndërkohë që koshat e mbeturinave ndodhen jo më shumë se 100 metra larg portës së banesës së tij. “Dje, në orën 09:25, përpara shtëpisë sime, një zonjë ndaloi makinën, zbriti me fëmijën dhe hodhi mbeturina në rrugë, sikur të ishte kosh plehrash. Veprimi është i regjistruar me video. Turp që në vitin 2025 ende ka njerëz që nuk respektojnë as mjedisin, as komunitetin ku jetojnë”, shprehet qytetari. Ai shton se mes mbeturinave kishte peceta të lagura dhe një qese, përmbajtja e së cilës nuk është hapur, por sipas tij dyshohet se ishte mbeturinë shtëpiake. Qytetari thekson se zonja duket se e ka vënë re kamerën e sigurisë, por pavarësisht kësaj, nuk ka shfaqur asnjë shqetësim dhe është larguar normalisht. “Pse duhet t’i hidhte mbeturinat pikërisht te porta ime, kur pak më lart janë koshat e plehrave?” – pyet qytetari, duke kërkuar që këto sjellje të mos normalizohen. Ky rast nuk është thjesht një akt papërgjegjshmërie individuale, por një pasqyrim i një mentaliteti që dëmton mjedisin dhe bashkëjetesën në komunitet. Respekti për hapësirën publike dhe private është detyrim minimal qytetar, jo zgjedhje personale. JOQ Albania e publikon këtë denoncim për të sensibilizuar dhe për të nxitur reflektim, me shpresën se raste të tilla të mos përsëriten dhe të marrin vëmendjen që meritojnë.

2739 views

Niveli i ri i vështirësisë për çunat e Vlorës: Pa u rregulluar uji, nuk ka takime! 🚫🚿 Vlonjatë, na njoftoni pak: A erdhi uji apo të vazhdojë "seen-i"? Se me ritmet e Bashkisë, takimi i parë rrezikon të bëhet kur të jetë harruar si muhabet. ⏳

77.6K views

Rusia ka pretenduar se një sulm me dronë nga Ukraina ka pasur si objektiv një nga rezidencat e presidentit Vladimir Putin, akuzë kjo që është mohuar menjëherë nga autoritetet ukrainase. Sipas radios shtetërore ruse, ky pretendim i është përcjellë drejtpërdrejt presidentit amerikan Donald Trump gjatë një bisede telefonike nga vetë Putin, i cili e ka informuar atë se Moska po rishikon pozicionin e saj në bisedimet e paqes. Ndihmësi i Kremlinit, Yuri Ushakov, citohet të ketë thënë se Trump reagoi "i tronditur" nga ky informacion. Nga ana tjetër, Ministri i Jashtëm rus, Sergey Lavrov, specifikoi se incidenti ka ndodhur në rajonin e Novgorodit, pranë rezidencës së fortifikuar në Valdai. Ndonëse u konfirmua se Putin nuk ndodhej aty dhe nuk pati dëme, Lavrov paralajmëroi sulme hakmarrëse, duke shtuar se mbrojtja ajrore ruse asgjësoi 91 dronë gjatë operacionit. Presidenti Volodymyr Zelensky e hodhi poshtë këtë version, duke e cilësuar si një "trillim të plotë" që synon të minojë diplomacinë. Ky reagim vjen vetëm një ditë pas takimit të tij maratonë me Trump në Florida, ku u diskutuan garancitë e sigurisë për Ukrainën. "Rusia po përdor deklarata të rrezikshme për të dëmtuar arritjet tona diplomatike," shkroi Zelensky në platformën X. Pavarësisht tensioneve, Moska ka bërë me dije se nuk do të tërhiqet plotësisht nga procesi i negociatave, ndonëse e ardhmja e tyre mbetet e pasigurt.

40.2K views

Një aksident i rëndë rrugor është regjistruar mbrëmjen e sotme në Sukth, ku janë përplasur dy automjete, një mjet tip Range Rover dhe një Citroen me ngjyrë të bardhë. Sipas raportimeve të një dëshmitari nga vendngjarja për JOQ Albania, përplasja ka qenë e fortë, duke bërë që automjeti tip Citroen të përfundojë në ambientet e një lokali buzë rrugës, ku ka pasur përplasje me strukturën e këtij biznesi. Gjithnjë sipas dëshmisë së qytetarit, nga aksidenti kanë mbetur të plagosur tre persona, drejtuesi i Range Rover dhe dy personat që udhëtonin me mjetin tip Citroen, të cilët janë transportuar me urgjencë drejt spitalit. Deri në këto momente, nuk ka informacion zyrtar mbi gjendjen e tyre shëndetësore. Dëshmitari shprehet se dyshohet që mjeti tip Range Rover ka qenë duke lëvizur me shpejtësi të lartë, ndërsa automjeti i bardhë i ka prerë rrugën duke dalë nga një kryqëzim, çka dyshohet se ka sjellë përplasjen mes dy mjeteve. Si pasojë, makina e bardhë ka përfunduar brenda lokalit, ndërsa Range Rover-i është parë më pas duke u larguar nga vendngjarja me karrotrec. Qytetari ka dërguar edhe pamje nga aksidenti, ku shihet automjeti i bardhë pranë ambientit të biznesit, ndërsa mjeti tip Range Rover po transportohet. Sipas tij, makina e bardhë është lëvizur më pas për të nxjerrë dy personat e lënduar brenda saj. Rrethanat e plota të aksidentit mbeten ende të paqarta dhe pritet një reagim zyrtar nga Policia, e cila do të sqarojë shkaqet dhe dinamikën e ngjarjes.

54.7K views

Një video e bukur dhe me shumë vlera njerëzore ka mbërritur së fundmi në redaksinë tonë. Në pamje shihet një efektiv i Policisë së Shtetit, i cili i vjen në ndihmë një qytetari në nevojë. Polici jo vetëm që i dhuron atij një panetone, por edhe e ndihmon të largohet nga rruga, ku ndodhej duke lypur. Qytetari me aftësi të kufizuara shihet teksa bisedon me efektivin dhe më pas hipën në karrocën e tij për t’u larguar nga rruga, pasi qëndrimi në atë vend përbënte rrezik si për të, ashtu edhe për drejtuesit e tjerë të mjeteve. Gjeste të tilla humanizmi janë shembull pozitiv dhe tregojnë anën njerëzore të uniformës blu. Nevojiten më shumë veprime të tilla nga ana e Policisë.

70.9K views

Pasojat e këtij abuzimi financiar dhe institucional janë tashmë publike. Të dielën, banorët e revoltuar hynë me forcë në sallën ku Bashkia e Vlorës po zhvillonte Mbrëmjen Gala, ndërsa të hënën protestat u zhvendosën masivisht në ambientet e Bashkisë dhe të Prefekturës.

20.3K views

Një shqiptar ka dërguar pranë redaksisë pamje nga protesta e fermerëve grekë, e cila po zhvillohet në Greqi dhe ka sjellë bllokimin e kufirit mes Maqedonisë së Veriut dhe Greqisë. Si pasojë, qarkullimi i automjeteve është ndërprerë dhe udhëtarët kanë mbetur të bllokuar. Sipas qytetarit që ka dërguar videon, protesta është masive dhe fermerët kanë bllokuar akset hyrëse me traktorë dhe mjete bujqësore. Qytetari shton se protesta e grekëve është protestë me plot gojën, një protestë masive e një populli që nuk fle. Fermerët grekë po protestojnë për shkak të kostove të larta të prodhimit dhe mungesës së mbështetjes nga shteti. Autoritetet greke po monitorojnë situatën, ndërsa deri më tani nuk raportohet për incidente.

25.8K views

Tirana është paralizuar nga trafiku ditën e sotme. Çdo aks kryesor, por jo vetëm, përballet me trafik të rënduar që prej orëve të para të mëngjesit. Qytetarët kanë mbetur të bllokuar në trafik ndërkohë që situata sa vjen e rëndohet dhe askush nuk jep zgjidhje për këtë situatë kaotike. Të gjendur në këtë kaos, ata po detyrohen të gjejnë zgjidhje “alternative” edhe pse duke shkelur rregullat e qarkullimit rrugor.

175.5K views

Një situatë tejet shqetësuese është raportuar në redaksinë e JOQ Albania nga një qytetar që po udhëtonte në aksin rrugor Fier–Levan, një zonë e njohur për mungesën e ndriçimit dhe për aksidentet e shpeshta. Sipas denoncimit, gjatë lëvizjes në këtë aks, qytetarit i është shfaqur papritur përpara një mjet bujqësor tip triçikël (mjet motorik me tri rrota i përdorur për transport), i cili qarkullonte pa asnjë dritë ndriçimi, as përpara dhe as pas. Siç shihet edhe në pamjet e mbërritura në redaksinë tonë, mungesa totale e ndriçimit në rrugë, e kombinuar me faktin që mjeti bujqësor nuk kishte asnjë sinjalizim, e bën situatën një burim potencial për aksidente të rënda dhe tragjike. Qytetari shprehet se vetëm për shkak të kujdesit të shtuar është shmangur një përplasje që mund të kishte pasoja fatale. Aksi Fier–Levan prej vitesh konsiderohet problematik, ku kanë ndodhur dhjetëra aksidente tragjike, ndërsa mungesa e ndriçimit dhe qarkullimi i mjeteve të pasiguruara vazhdon të rrezikojë jetën e drejtuesve të automjeteve dhe vetë përdoruesve të këtyre mjeteve. Mesazhi i plotë i qytetarit për JOQ Albania: “Përshëndetje JOQ! Shikoni çfarë bëhet në rrugën Fier–Levan në periudhë festash dhe në një zonë pa ndriçim të mirëfilltë. Nëse nuk do kishim pasur kujdes, do kishte qenë fatale, pasi nuk kishin asnjë dritë për t’u parë nga makinat.” JOQ Albania i bën thirrje institucioneve përgjegjëse dhe Policisë Rrugore të marrin masa urgjente, si për ndriçimin e këtij aksi, ashtu edhe për kontrollin e mjeteve bujqësore që qarkullojnë pa kushte minimale sigurie, përpara se të ndodhë një tjetër tragjedi.

9178 views

Kryeministri në detyrë i Kosovës dhe kryetari i Lëvizjes Vetëvendosje, Albin Kurti, ka dalë në një konferencë për mediat pas publikimit të rezultateve paraprake të zgjedhjeve parlamentare të mbajtura këtë të diel, duke e cilësuar rezultatin si një fitore historike për Vetëvendosjen dhe qytetarët e Kosovës. Sipas përditësimit më të fundit të Komisionit Qendror të Zgjedhjeve, deri në këtë fazë janë numëruar 98.63% e votave, ku Lëvizja Vetëvendosje kryeson me 49.47%, ose 429.572 vota, duke ruajtur epërsinë ndaj forcave të tjera politike. Në fjalën e tij, Kurti u shpreh: “Urime fitorja më e madhe në historinë e vendit. Sa më parë të certifikohen rezultatet, aq më shpejt do të mund të krijojmë institucionet dhe të vijojmë me punën. Ftoj partitë opozitare për bashkëpunim në Kuvend, për marrëveshjet ndërkombëtare dhe për interesin publik të qytetarëve.” Ai theksoi se në Kuvendin e ardhshëm e pret vendin një axhendë e rëndësishme, përfshirë Planin e Rritjes së Bashkimit Europian në vlerë rreth 880 milionë euro, si dhe tre marrëveshje me Bankën Botërore në vlerë 120 milionë euro, duke e çuar totalin mbi 1 miliard euro investime dhe mbështetje financiare. Kurti bëri të ditur se, nëse Vetëvendosje arrin deri në përfundim të numërimit të kalojë pragun prej 50.1%, atëherë do të ketë mundësi të formojë qeverinë e vetme, pa pasur nevojë për koalicion qeverisës. Në të kundërt, bashkëpunimi në Kuvend mbetet i domosdoshëm për funksionimin institucional. I pyetur për zgjedhjen e presidentit të ri të Kosovës, që pritet në prill të vitit të ardhshëm, Kurti u shpreh se “është ende herët për të folur për këtë çështje”, duke theksuar se aktualisht është moment për reflektim dhe festë pas procesit zgjedhor. Sipas rezultateve paraprake të KQZ-së deri tani, renditja e forcave politike është si më poshtë: Vetëvendosje: 49.47% (429.572 vota) PDK: rreth 21% LDK: rreth 13–14% AAK: rreth 5–6% Lista Serbe: rreth 3.8% Nisma Socialdemokrate: rreth 1.7% Komisioni Qendror i Zgjedhjeve pritet të publikojë rezultatet përfundimtare pas përmbylljes së plotë të numërimit dhe certifikimit zyrtar të votave.

18.5K views