Gjatë një takimi zyrtar në Beograd, presidenti serb Aleksandar Vuçiç i ka dhuruar kreut të UFC-së, Dana White, një lahutë, duke e prezantuar atë publikisht si një instrument të vjetër dhe tradicional të Serbisë. Ky veprim ka hapur një debat të madh në rrjetet sociale dhe ka shkaktuar reagime të shumta nga opinioni publik shqiptar, i cili ka vënë në pah pronësinë e vërtetë kulturore të instrumentit. Në aspektin faktik dhe historik, lahuta është një instrument i lashtë që përdoret gjerësisht në Malësinë e Veriut, veçanërisht brenda traditës së pasur të këngëve epike shqiptare. Ajo përbën një shtyllë kryesore të kulturës së rapsodëve shqiptarë dhe të trashëgimisë së këngës së lahutarëve, përmes së cilës janë përcjellë ndër shekuj legjenda, ngjarje historike dhe figura të rëndësishme të traditës sonë popullore.
Një qytetar ka kontaktuar JOQ Albania duke dërguar disa video, për të cilat pretendon se tregojnë grupe shtetasish egjiptianë të mbledhur në Tiranë. Ai shprehet i shqetësuar dhe kërkon që rasti të marrë vëmendje publike, duke pretenduar se një pjesë e tyre po pajisen edhe me dokumente shqiptare. “Shikoje sa masivisht po vijnë egjiptianët. Këta janë vetëm në Tiranë, pa llogaritur Kamzën dhe vendet e tjera. Madje kam informacion se po pajisen edhe me dokumente,” shkruan ai në mesazhin e dërguar. Qytetari shton se, sipas tij, Shqipëria po përballet ende me papunësi dhe emigrim të të rinjve, ndërsa punëtorët e huaj pranohen nga bizneset për paga më të ulëta. “Shqipëria ka plot njerëz pa punë, ndërsa po na sjellin punëtorë që punojnë për më pak lekë dhe po ua marrin vendet e punës shqiptarëve. Në fund humbet qytetari i këtij vendi,” shprehet ai. Ai ngre edhe pretendime të tjera, duke thënë: “Kanë ardhur 1 mijë veta brenda ditës në vendin tonë. Askush nuk flet. Në Kamëz disa nga këta ngacmojnë vajzat e supermarketeve.” JOQ Albania nuk ka mundur të verifikojë në mënyrë të pavarur pretendimet e qytetarit mbi identitetin e personave në video, numrin e tyre, pretendimin se po pajisen me dokumente shqiptare apo pretendimet e tjera të ngritura. Nëse institucionet kanë një reagim apo sqarim zyrtar mbi këtë situatë, jemi të gatshëm ta publikojmë.
Durrësi sonte nuk kishte nevojë për skenë. Disa vajza u panë duke dalë nga baxhoja e një taksie, teksa këndonin me të madhe dhe shijonin atmosferën e mbrëmjes.
Pas një udhëtimi të gjatë dhe të rrezikshëm, momenti i parë në tokën spanjolle ishte një telefonatë drejt shtëpisë. Në pamje, emigrantët marokenë nxjerrin telefonat për të lajmëruar familjarët se kishin mbërritur gjallë, duke përjetuar një çast të mbushur me emocion.
Një i ri maroken ka publikuar në rrjetet sociale pamje ku filmon veten duke notuar drejt enklavës spanjolle të Ceutës, me shpresën për të hyrë në Bashkimin Evropian. Videoja është bërë virale dhe pasqyron një fenomen që po përsëritet gjithnjë e më shpesh, ku emigrantë dokumentojnë udhëtimin e tyre të rrezikshëm drejt Evropës. Autoritetet kanë paralajmëruar vazhdimisht se këto kalime përmes detit janë jashtëzakonisht të rrezikshme dhe kanë shkaktuar edhe viktima.
Një qytetar i është drejtuar redaksisë së JOQ Albania për të denoncuar vjedhjen e biçikletës së tij në Rrugën e Kavajës, në Tiranë. Sipas tij, ngjarja ka ndodhur gjatë orëve të natës dhe është filmuar nga kamerat e sigurisë, të cilat kanë regjistruar të gjithë momentin e vjedhjes. Në pamjet e siguruara, një person shihet teksa i afrohet biçikletës së parkuar në trotuar. Pas disa sekondash, ai e merr biçikletën dhe largohet qetësisht duke e ngarë përgjatë rrugës. "Më kanë vjedhur biçikletën te Rruga e Kavajës. Kam edhe pamjet e kamerave.", shkruan qytetari. Me publikimin e videos, qytetari shpreson që dikush ta njohë personin që shfaqet në pamje ose të japë informacion që mund të ndihmojë në identifikimin e tij dhe rikuperimin e biçikletës. Nëse e njihni personin që shfaqet në video ose keni informacion që mund të ndihmojë në identifikimin e tij, kontaktoni redaksinë e JOQ Albania.
Një qytetar i është drejtuar redaksisë së JOQ Albania për të denoncuar një vjedhje të pazakontë të ndodhur në Shkodër, ku një person është filmuar nga kamerat e sigurisë duke vjedhur lulet e mbjella në oborrin e banesës së tij. Ngjarja ka ndodhur gjatë mbrëmjes, ndërsa në pamjet e siguruara nga kamerat e sigurisë shihet personi duke u afruar te porta e shtëpisë, duke marrë dy lule të mbjella dhe duke u larguar menjëherë nga vendi i ngjarjes. Sipas qytetarit, ajo që i tërhoqi më shumë vëmendjen ishte fakti se personi nuk kishte në dorë vetëm lulet e marra nga oborri i tij. "Mbrëmë ky person erdhi te porta e shtëpisë dhe vodhi dy lule të mbjella. Më bëri përshtypje se kishte edhe ca lule të tjera në dorë, që dukej se i kishte vjedhur diku tjetër. Kjo ka ndodhur në Shkodër.", shkruan qytetari. Pamjet janë vënë në dispozicion të redaksisë me shpresën se dikush mund ta njohë personin që shfaqet në video dhe të ndihmojë në identifikimin e tij. Nëse e njihni personin që shfaqet në pamje ose keni informacion që mund të ndihmojë në identifikimin e tij, kontaktoni redaksinë e JOQ Albania.
Një qytetar i është drejtuar redaksisë së JOQ Albania për të denoncuar vjedhjen e biçikletës së djalit të tij, duke kërkuar ndihmën e qytetarëve për identifikimin e autorit. Sipas tij, ngjarja ka ndodhur gjatë natës së 30 korrikut 2026, rreth orës 01:37, në garazhin e pallatit ku banon. Pamjet e kamerave të sigurisë tregojnë një person që lëviz në ambientet e garazhit dhe largohet me biçikletën e vjedhur. Në fotot e siguruara nga kamerat, ai shihet duke ecur në garazh gjatë orëve të vona të natës. “Më kanë vjedhur biçikletën e djalit. Mund ta postoni hajdutin, mbase sensibilizohet dhe nuk vjedh më.”, shkruan qytetari. Qytetari shpreson që publikimi i pamjeve të ndihmojë në identifikimin e autorit dhe, nëse është e mundur, në rikthimin e biçikletës. Nëse e njihni personin që shfaqet në video ose keni informacion që mund të ndihmojë në identifikimin e tij, kontaktoni redaksinë e JOQ Albania. Çdo informacion mund të jetë i vlefshëm për zbardhjen e rastit.
Një tjetër denoncim shqetësues ka mbërritur në redaksinë e JOQ Albania, këtë herë nga zona e Plepave në Durrës, ku një qytetar ka filmuar atë që ai pretendon se është derdhja e ujërave të kanalizimeve direkt në det. Në pamjet e dërguara shihet një rrjedhë e vazhdueshme ujërash të pista që derdhen drejt bregdetit, në një zonë të frekuentuar nga pushuesit. Sipas qytetarit, kjo po ndodh në mes të ditës, ndërsa shumë njerëz ndodhen në plazh. "Këtu shihet pamja se si zbrazën ujërat e pista të kanalizimeve në mes të ditës, ndërkohë që zjarri përhapet në zonën e Plepave. Uji shkon direkt në det. Ky është burim infeksionesh. Të lutem publikoje dhe tregoji njerëzit Durrësin e vërtetë.", shkruan qytetari. Nëse pretendimi konfirmohet, situata përbën një rrezik serioz për shëndetin publik dhe për mjedisin, veçanërisht në kulmin e sezonit turistik, kur plazhet frekuentohen çdo ditë nga mijëra pushues. JOQ Albania i bën thirrje institucioneve përgjegjëse, përfshirë Agjencinë Kombëtare të Ujësjellës-Kanalizimeve, Inspektoratin Shtetëror të Mjedisit, Bashkinë Durrës dhe autoritetet shëndetësore, të verifikojnë menjëherë situatën dhe të marrin masat e nevojshme për mbrojtjen e shëndetit të qytetarëve dhe të mjedisit.
Një video e regjistruar gjatë një lutjeje të udhëhequr nga kardinali shqiptar Ernest Simoni në Medjugorje ka tërhequr vëmendjen e mijëra besimtarëve, pasi në sfond dëgjohen britma të forta që shumë prej tyre i interpretojnë si shenja të një rituali çlirimi nga forcat demonike. Sipas dëshmisë së gazetarit italian Eusebio Ciccotti, pas përfundimit të meshës, kardinali Ernest Simoni nisi lutjen e çlirimit të Papa Leonit XIII në latinisht. Brenda pak çastesh, nga dy zona të ndryshme të kishës u dëgjuan britma të forta nga dy gra. Autori rrëfen se më pas kardinali vazhdoi lutjet e çlirimit jashtë kishës, ku njëra prej grave reagoi me britma, kundërshtoi afrimin e tij dhe u qetësua vetëm pas përfundimit të lutjes dhe spërkatjes me ujë të bekuar. Për besimtarët katolikë që ishin të pranishëm, kjo u pa si një moment i fuqishëm shpirtëror dhe një dëshmi e fuqisë së lutjes së Kishës përballë së keqes. Në traditën katolike, lutjet e çlirimit dhe ekzorcizmi konsiderohen rite të njohura nga Kisha, të përdorura në raste të veçanta. Megjithatë, deri më tani nuk ka një deklaratë zyrtare nga autoritetet kishtare që ta ketë shpallur këtë ngjarje si një rast të konfirmuar posedimi demonik.
Një qytetar që thotë se ka qenë pranë vendngjarjes ka ndarë me JOQ Albania versionin e tij mbi zjarrin e përmasave të mëdha që përfshiu magazinën në unazën e Shkozetit, në Durrës. Sipas tij, shkaku i zjarrit ka qenë kontakti i kabllove të tensionit të lartë me çatinë e objektit. "Kabllot e tensionit të lartë kalonin shumë pranë magazinës, jo më larg se 30 centimetra. Kishin ngarkesë, prekën çatinë dhe aty nisi gjithçka. U këputën tre kabllot e mëdha dhe magazina mori flakë," pretendon ai. Qytetari shton se objekti nuk ishte një magazinë e zakonshme, por ishte e mbushur me mallra sezonalë, përfshirë lodra për fëmijë, çadra plazhi, fishekzjarre dhe produkte të tjera, çka sipas tij e bëri shumë të vështirë shuarjen e flakëve. Ai tregon gjithashtu se godina kishte qenë më parë një magazinë frigoriferike dhe ishte e ndarë në ambiente të veçanta me panele sanduiç, materiale që sipas tij favorizuan përhapjen e zjarrit. "Nuk arrinin ta fiknin dot. Brenda kishte dhoma të ndara me panele sanduiç dhe magazina ishte plot me mall. Prandaj zjarri u përhap me shpejtësi," shprehet ai. Sipas dëshmisë së qytetarit, në momentin kur shpërtheu zjarri nuk ndodhej asnjë punonjës brenda objektit, ndërsa i vetmi person që ishte pranë ishte pronari i magazinës. Në pamjet e mbërritura në redaksinë e JOQ Albania shihen flakë të mëdha që përfshijnë të gjithë objektin, tym i dendur dhe mjetet zjarrfikëse që vijojnë operacionin për vënien nën kontroll të zjarrit. Deri më tani, autoritetet nuk kanë konfirmuar zyrtarisht shkakun e zjarrit. Hetimet vijojnë për të përcaktuar rrethanat e plota të ngjarjes.
Projektligji i depozituar nga Partia Socialiste për reformën e re administrativo-territoriale parashikon një riorganizim të thellë të pushtetit vendor në Shqipëri, duke ulur numrin e bashkive nga 61 në 46. Sipas argumentimit zyrtar, reforma synon rritjen e eficiencës administrative, uljen e kostove, përmirësimin e shërbimeve për qytetarët dhe përshtatjen e hartës territoriale me realitetin e ri demografik të vendit, i cili gjatë viteve të fundit është ndikuar ndjeshëm nga emigracioni dhe rënia e popullsisë. Në këtë kuadër, një numër i konsiderueshëm bashkish do të humbasin statusin e tyre aktual dhe do të bashkohen me bashki më të mëdha. Mes tyre janë Poliçani, që propozohet të bashkohet me Beratin, Përrenjasi me Librazhdin, Këlcyra me Përmetin, Libohova me Gjirokastrën, Memaliaj me Tepelenën, Selenica me Vlorën, Patosi me Fierin, Belshi dhe Cërriku me Elbasanin dhe një sërë njësish të tjera vendore. Megjithatë, ndërsa lexohet harta e re territoriale, bie në sy një detaj që ngre pikëpyetje mbi kriteret e përdorura. Disa bashki me popullsi të ulët jo vetëm që nuk janë prekur nga reforma, por vazhdojnë të mbeten njësi të pavarura administrative. Bëhet fjalë për Himarën, Finiqin, Dropullin dhe Pustecin. Kjo ngre një pyetje të thjeshtë: nëse kriteri kryesor i reformës është numri i banorëve dhe eficienca administrative, pse këto bashki mbeten të paprekura? Himara, rreth 8,300 banorë sipas Censusit 2023 Sipas të dhënave zyrtare të Censusit 2023, Bashkia Himarë ka 8,328 banorë rezidentë. Edhe pse Himara është një nga zonat turistike më të rëndësishme të vendit dhe gjatë verës popullsia e saj shumëfishohet nga turistët dhe emigrantët që kthehen për pushime, numri i banorëve të përhershëm mbetet relativisht i ulët. Për krahasim, bashki të tjera me popullsi të ngjashme ose edhe më të madhe janë përfshirë në procesin e bashkimeve territoriale. Nëse logjika e reformës është zvogëlimi i numrit të njësive vendore me popullsi të ulët, lind natyrshëm pyetja nëse Himara mund të ishte konsideruar për bashkim me Vlorën ose Sarandën. Por kjo nuk ka ndodhur. Finiqi dhe Dropulli, dy bashki me prani të konsiderueshme të minoritetit grek Një rast edhe më interesant paraqitet në jug të vendit. Finiqi ka rreth 11,862 banorë sipas Censusit 2011, ndërsa Dropulli numëron 8,259 banorë sipas Censusit 2023. Të dyja këto bashki njihen si zona ku jeton një pjesë e konsiderueshme e minoritetit grek në Shqipëri dhe prej vitesh kanë qenë pjesë e debateve që lidhen me të drejtat e minoriteteve dhe përfaqësimin e tyre institucional. Megjithatë, projektligji nuk jep asnjë shpjegim specifik se përse këto bashki nuk janë përfshirë në procesin e bashkimeve territoriale. Kjo bëhet edhe më interesante kur krahasohen me bashki të tjera që po shkrihen. Poliçani, Memaliaj apo Përrenjasi kanë popullsi të krahasueshme ose më të lartë se Dropulli dhe megjithatë humbasin statusin e tyre si bashki më vete. Një nga pyetjet që lind është nëse në këto raste janë marrë në konsideratë edhe faktorë të tjerë, përfshirë mbrojtjen e komuniteteve minoritare. Deri tani, projektligji nuk e sqaron këtë. Pusteci, rasti që edhe në vitin 2015 mbeti i paprekur Edhe më i veçantë është rasti i Pustecit. Kjo bashki, e njohur për praninë e komunitetit maqedonas, mbeti e pandryshuar edhe gjatë reformës territoriale të vitit 2015. Pusteci u trajtua si një rast i veçantë, për shkak të karakteristikave të tij specifike dhe pranisë së komunitetit maqedonas. Sot, Pusteci vazhdon të jetë një nga bashkitë me popullsinë më të vogël në Shqipëri. Sipas vlerësimeve zyrtare më të fundit, popullsia e saj llogaritet në më pak se 2 mijë banorë, ndërsa Regjistri Civil raporton rreth 5 mijë banorë. Pavarësisht këtyre shifrave, bashkia mbetet e paprekur edhe në projektligjin e ri. Kjo ngre pyetjen nëse edhe në reformën e re janë marrë në konsideratë kritere të veçanta që nuk janë bërë publike.
Himara... aty ku deti është i kaltër, dielli përvëlues, por kryebashkiaku grekofil duket se ka harruar se është në Shqipëri dhe e gjen menjëherë rrugën drejt shtetit fqinj. A ka mënyrë më të goditur për të zhvilluar turizmin lokal sesa të importosh një yll të muzikës greke për të mbushur sheshin e Potamit?! Disa këngëtarë grekë do të kumbojnë gjuhën e tyre në brigjet e Himarës. Mendja e kujt nuk shkon menjëherë tek një koncerti recital grek të organizuar me aq dashuri përveçse kryebashkiakut tonë të dashuruar pas fqinjëve? Në fund të fundit, pse t'i kushtosh vëmendje artistëve vendas apo kulturës së zonës, kur mund të shndërrosh Himarën në një filial të preferuar të serenatave helene? Festoni, o banorë e pushues nën gjuhën greke me paratë e taksapaguesve shqiptarë! Buxhetet ikin e vijnë, pasi shfaqjet e importuara kërkojnë zemër të madhe patriote greke...
Një video e filmuar gjatë stuhisë së fuqishme të rërës që goditi Rio de Janeiron në Brazil është bërë virale në rrjetet sociale, pasi tregon një burrë që qëndron mbi një tarracë, ndërsa përballet me erërat e forta sikur po sfidonte vetë natyrën. Pamjet, të shpërndara gjerësisht në platforma të ndryshme, kanë nxitur mijëra komente dhe meme. Në rrjetet sociale, shumë përdorues bënë shaka me qëndrimin e tij, duke thënë se po sillej sikur po "komandonte" stuhinë, ndërsa të tjerë e konsideruan një veprim të rrezikshëm vetëm për të tërhequr vëmendje. Videoja është regjistruar në momentin kur rajone të ndryshme të Rio de Janeiros u goditën nga erëra shumë të forta. Sipas mediave braziliane, në disa zona shpejtësia e tyre kaloi 100 km/h, duke shkaktuar rrezik për rrëzim pemësh, dëmtime të çative dhe incidente të tjera. Edhe pse burri nuk raportohet të ketë pësuar lëndime, veprimi i tij është kritikuar nga shumë komentues, të cilët e konsideruan të panevojshëm dhe të rrezikshëm, pasi qëndrimi në vende të larta gjatë kushteve të tilla atmosferike mund të ketë pasoja serioze. Ndërkohë, autoritetet e Mbrojtjes Civile u kanë bërë thirrje qytetarëve të shmangin qëndrimin pranë pemëve, strukturave metalike dhe në vende të ekspozuara gjatë erërave të forta, pasi mjaftojnë pak sekonda që situata të kthehet në një aksident.
Banorët e kompleksit Mangalem 21 në Tiranë i janë drejtuar redaksisë së JOQ Albania për të denoncuar një situatë që, sipas tyre, po përsëritet për të dytën natë radhazi. Sipas qytetarit, koshat e mbeturinave në kompleks janë përfshirë sërish nga flakët, ndërsa autori ose autorët e ngjarjes vijojnë të mbeten të paidentifikuar. Në videot e mbërritura në redaksi shihen flakë të mëdha dhe tym i dendur që ngrihet nga zona e koshave, ndërsa pranë tyre ndodhen automjete të parkuara dhe banorë që ndjekin me shqetësim situatën. "Është dita e dytë që u vënë zjarrin koshave te kompleksi Mangalem 21. Policia vjen, por nuk merr asnjë masë për të gjetur përgjegjësin," shkruan qytetari. Banorët shprehen të shqetësuar se zjarret e përsëritura rrezikojnë jo vetëm mjedisin, por edhe automjetet dhe banesat pranë, duke kërkuar identifikimin e autorit dhe marrjen e masave për të parandaluar përsëritjen e ngjarjeve të tilla. Ata u bëjnë thirrje institucioneve përgjegjëse që të hetojnë rastin dhe të garantojnë sigurinë e banorëve të kompleksit.
Ish-sekretarja për Marrëdhëniet me Publikun në Partinë Demokratike, Jola Hysaj, ka reaguar përmes një postimi publik pasi Rama e emëroi në krye të Agjencisë Kombëtare të Turizmit, duke iu përgjigjur pyetjeve të shumta. Hysaj konfirmon se është takuar me kreun e qeverisë, duke zbuluar detaje nga biseda: "Po e kam takuar Edi Ramën. Fjala që më mbeti në mend ishte: 'Nuk dua të bëhesh socialiste, dua të çosh më lart institucionin që ngriti Zana Çela'." Lidhur me qasjen e saj politike, ajo sqaron pozicionin e saj aktual: "Po jam demokrate, por nuk jam me Partinë Demokratike. Jam me partinë e Shqipërisë turistike." Në mbyllje të reagimit, ajo u bën thirrje ndjekësve të respektojnë zgjedhjen e saj: "Uroj të respektoni lirinë dhe zgjedhjen time për të bërë një punë të re në një sektor ku kam punuar shumë vite. Gjithkush është i lirë të spekullojë dhe thurrë teori konspirative. Por kush më njeh e di që unë i pres drutë shkurt. Kaq kisha nga ana ime. Kush do më urojë punë të mbarë e falenderoj! Kush do më shajë dhe mallkojë e ngushëlloj."
Në një lëvizje që ka tërhequr vëmendjen në skenën politike vendase, ish-Sekretarja për Marrëdhëniet me Publikun në Partinë Demokratike, Jola Hysa, është emëruar në krye të Agjencisë Kombëtare të Turizmit (AKT), duke zëvendësuar në këtë detyrë Zana Çelën. Hysa ka marrë drejtimin e AKT-së pas një angazhimi disa-vjeçar në strukturat drejtuese të opozitës. Përmes një reagimi publik, ajo ka sqaruar se pavarësisht largimit nga radhët e Partisë Demokratike, bindjet e saj mbeten opozitare. Ajo u shpreh se tashmë i përket "partisë së Shqipërisë turistike". Hysa zbuloi se gjatë bisedës me kryeministrin Edi Rama, ky i fundit i ka kërkuar angazhim institucional dhe jo aderim politik, duke i vënë theksin vazhdimësisë dhe rritjes së punës së nisur nga paraardhësja e saj.
Një qytetar i është drejtuar redaksisë së JOQ Albania për të denoncuar gjendjen e rënduar në zonën e Alliasit, pranë pallatit të policëve dhe fushës së basketbollit. Sipas denoncuesit, prej më shumë se dy javësh në zonë janë lënë pemë të prera dhe mbetje të tjera, ndërsa askush nuk ka ndërhyrë për pastrimin e hapësirave publike. Në videon e mbërritur në redaksi shihen trungje dhe degë pemësh të grumbulluara në tokë, si edhe mbeturina të shpërndara pranë trotuareve dhe ambienteve përreth. Qytetari thotë se situata është kthyer në shqetësim të përditshëm për banorët, pasi papastërtitë vazhdojnë të qëndrojnë në vend pa u larguar. Banorët i bëjnë thirrje Bashkisë Tiranë dhe shërbimeve të pastrimit të ndërhyjnë sa më parë për largimin e pemëve të prera dhe mbeturinave, si dhe për rikthimin e kushteve normale në këtë zonë të kryeqytetit.
Login
